੫੧੬. ਮਹਾਕਪਿਜਾਤਕਂ (੬)

੧੭੮. ਬਾਰਾਣਸ੍ਯਂ [ਬਾਰਾਣਸ੍ਸਂ (ਸੀ. ਪੀ.)] ਅਹੂ ਰਾਜਾ, ਕਾਸੀਨਂ ਰਟ੍ਠਵਡ੍ਢਨੋ;

ਮਿਤ੍ਤਾਮਚ੍ਚਪਰਿਬ੍ਯੂਲ਼੍ਹੋ, ਅਗਮਾਸਿ ਮਿਗਾਜਿਨਂ [ਮਿਗਾਜਿਰਂ (ਸੀ.), ਮਿਗਾਚਿਰਂ (ਪੀ.)].

੧੭੯. ਤਤ੍ਥ ਬ੍ਰਾਹ੍ਮਣਮਦ੍ਦਕ੍ਖਿ, ਸੇਤਂ ਚਿਤ੍ਰਂ ਕਿਲਾਸਿਨਂ;

ਵਿਦ੍ਧਸ੍ਤਂ ਕੋਵਿਲ਼ਾਰਂਵ, ਕਿਸਂ ਧਮਨਿਸਨ੍ਥਤਂ.

੧੮੦. ਪਰਮਕਾਰੁਞ੍ਞਤਂ ਪਤ੍ਤਂ, ਦਿਸ੍ਵਾ ਕਿਚ੍ਛਗਤਂ ਨਰਂ;

ਅਵਚ ਬ੍ਯਮ੍ਹਿਤੋ ਰਾਜਾ, ‘‘ਯਕ੍ਖਾਨਂ ਕਤਮੋ ਨੁਸਿ.

੧੮੧. ‘‘ਹਤ੍ਥਪਾਦਾ ਚ ਤੇ ਸੇਤਾ, ਤਤੋ ਸੇਤਤਰਂ [ਸੇਤਤਰੋ (ਪੀ.)] ਸਿਰੋ;

ਗਤ੍ਤਂ ਕਮ੍ਮਾਸਵਣ੍ਣਂ ਤੇ, ਕਿਲਾਸਬਹੁਲੋ ਚਸਿ.

੧੮੨. ‘‘ਵਟ੍ਟਨਾਵਲ਼ਿ [ਵਟ੍ਠਨਾਵਲਿ (ਪੀ.)] ਸਙ੍ਕਾਸਾ, ਪਿਟ੍ਠਿ ਤੇ ਨਿਨ੍ਨਤੁਨ੍ਨਤਾ;

ਕਾਲ਼ਪਬ੍ਬਾਵ [ਕਾਲ਼ਪਬ੍ਬਾ ਚ (ਸ੍ਯਾ.), ਕਾਲ਼ਾ ਪਬ੍ਬਾ ਚ (ਪੀ.)] ਤੇ ਅਙ੍ਗਾ, ਨਾਞ੍ਞਂ ਪਸ੍ਸਾਮਿ ਏਦਿਸਂ.

੧੮੩. ‘‘ਉਗ੍ਘਟ੍ਟਪਾਦੋ ਤਸਿਤੋ, ਕਿਸੋ ਧਮਨਿਸਨ੍ਥਤੋ;

ਛਾਤੋ ਆਤਤ੍ਤਰੂਪੋਸਿ [ਆਦਿਤ੍ਤਰੂਪੋਸਿ (ਕ.), ਅਤਿਤ੍ਤਰੂਪੋਸਿ (ਸ੍ਯਾ. ਕ. ਅਟ੍ਠ.)], ਕੁਤੋਸਿ ਕਤ੍ਥ ਗਚ੍ਛਸਿ.

੧੮੪. ‘‘ਦੁਦ੍ਦਸੀ ਅਪ੍ਪਕਾਰੋਸਿ, ਦੁਬ੍ਬਣ੍ਣੋ ਭੀਮਦਸ੍ਸਨੋ;

ਜਨੇਤ੍ਤਿ ਯਾਪਿ ਤੇ ਮਾਤਾ, ਨ ਤਂ ਇਚ੍ਛੇਯ੍ਯ ਪਸ੍ਸਿਤੁਂ.

੧੮੫. ‘‘ਕਿਂ ਕਮ੍ਮਮਕਰਂ [ਕਮ੍ਮਮਕਰਾ (ਸੀ. ਸ੍ਯਾ. ਪੀ.)] ਪੁਬ੍ਬੇ, ਕਂ ਅਵਜ੍ਝਂ ਅਘਾਤਯਿ;

ਕਿਬ੍ਬਿਸਂ ਯਂ ਕਰਿਤ੍ਵਾਨ, ਇਦਂ ਦੁਕ੍ਖਂ ਉਪਾਗਮਿ’’.

੧੮੬. ਤਗ੍ਘ ਤੇ ਅਹਮਕ੍ਖਿਸ੍ਸਂ, ਯਥਾਪਿ ਕੁਸਲੋ ਤਥਾ;

ਸਚ੍ਚਵਾਦਿਞ੍ਹਿ ਲੋਕਸ੍ਮਿਂ, ਪਸਂਸਨ੍ਤੀਧ ਪਣ੍ਡਿਤਾ.

੧੮੭. ਏਕੋ ਚਰਂ ਗੋਗਵੇਸੋ, ਮੂਲ਼੍ਹੋ ਅਚ੍ਚਸਰਿਂ ਵਨੇ;

ਅਰਞ੍ਞੇ ਇਰੀਣੇ [ਈਰਿਣੇ (ਸੀ. ਸ੍ਯਾ. ਪੀ.)] ਵਿਵਨੇ, ਨਾਨਾਕੁਞ੍ਜਰਸੇਵਿਤੇ.

੧੮੮. ਵਾਲ਼ਮਿਗਾਨੁਚਰਿਤੇ, ਵਿਪ੍ਪਨਟ੍ਠੋਸ੍ਮਿ ਕਾਨਨੇ;

ਅਚਰਿਂ ਤਤ੍ਥ ਸਤ੍ਤਾਹਂ, ਖੁਪ੍ਪਿਪਾਸ [ਖੁਪ੍ਪਿਪਾਸਾ (ਸੀ. ਪੀ.)] ਸਮਪ੍ਪਿਤੋ.

੧੮੯. ਤਤ੍ਥ ਤਿਨ੍ਦੁਕਮਦ੍ਦਕ੍ਖਿਂ, ਵਿਸਮਟ੍ਠਂ ਬੁਭੁਕ੍ਖਿਤੋ;

ਪਪਾਤਮਭਿਲਮ੍ਬਨ੍ਤਂ, ਸਮ੍ਪਨ੍ਨਫਲਧਾਰਿਨਂ.

੧੯੦. ਵਾਤਸ੍ਸਿਤਾਨਿ ਭਕ੍ਖੇਸਿਂ, ਤਾਨਿ ਰੁਚ੍ਚਿਂਸੁ ਮੇ ਭੁਸਂ;

ਅਤਿਤ੍ਤੋ ਰੁਕ੍ਖਮਾਰੂਹਿਂ [ਮਾਰੁਯ੍ਹ (ਸੀ. ਸ੍ਯਾ.)], ਤਤ੍ਥ ਹੇਸ੍ਸਾਮਿ ਆਸਿਤੋ.

੧੯੧. ਏਕਂ ਮੇ ਭਕ੍ਖਿਤਂ ਆਸਿ, ਦੁਤਿਯਂ ਅਭਿਪਤ੍ਥਿਤਂ;

ਤਤੋ ਸਾ ਭਞ੍ਜਥ ਸਾਖਾ, ਛਿਨ੍ਨਾ ਫਰਸੁਨਾ ਵਿਯ.

੧੯੨. ਸੋਹਂ ਸਹਾਵ ਸਾਖਾਹਿ, ਉਦ੍ਧਂਪਾਦੋ ਅਵਂਸਿਰੋ;

ਅਪ੍ਪਤਿਟ੍ਠੇ ਅਨਾਲਮ੍ਬੇ, ਗਿਰਿਦੁਗ੍ਗਸ੍ਮਿ ਪਾਪਤਂ.

੧੯੩. ਯਸ੍ਮਾ ਚ ਵਾਰਿ ਗਮ੍ਭੀਰਂ, ਤਸ੍ਮਾ ਨ ਸਮਪਜ੍ਜਿਸਂ [ਸਮਪਜ੍ਜਸਿਂ (ਸੀ.), ਸਮਭਜ੍ਜਿਸਂ (ਪੀ.)];

ਤਤ੍ਥ ਸੇਸਿਂ ਨਿਰਾਨਨ੍ਦੋ, ਅਨੂਨਾ [ਅਨਾਥੋ (ਸੀ.)] ਦਸ ਰਤ੍ਤਿਯੋ.

੧੯੪. ਅਥੇਤ੍ਥ ਕਪਿ ਮਾਗਞ੍ਛਿ [ਮਾਗਚ੍ਛਿ (ਸ੍ਯਾ. ਕ.)], ਗੋਨਙ੍ਗੁਲੋ ਦਰੀਚਰੋ;

ਸਾਖਾਹਿ ਸਾਖਂ ਵਿਚਰਨ੍ਤੋ, ਖਾਦਮਾਨੋ ਦੁਮਪ੍ਫਲਂ.

੧੯੫. ਸੋ ਮਂ ਦਿਸ੍ਵਾ ਕਿਸਂ ਪਣ੍ਡੁਂ, ਕਾਰੁਞ੍ਞਮਕਰਂ ਮਯਿ;

ਅਮ੍ਭੋ ਕੋ ਨਾਮ ਸੋ ਏਤ੍ਥ, ਏਵਂ ਦੁਕ੍ਖੇਨ ਅਟ੍ਟਿਤੋ.

੧੯੬. ਮਨੁਸ੍ਸੋ ਅਮਨੁਸ੍ਸੋ ਵਾ, ਅਤ੍ਤਾਨਂ ਮੇ ਪਵੇਦਯ;

ਤਸ੍ਸਞ੍ਜਲਿਂ ਪਣਾਮੇਤ੍ਵਾ, ਇਦਂ ਵਚਨਮਬ੍ਰਵਿਂ.

੧੯੭. ਮਨੁਸ੍ਸੋਹਂ ਬ੍ਯਸਮ੍ਪਤ੍ਤੋ [ਵਸਮ੍ਪਤ੍ਤੋ (ਸ੍ਯਾ. ਕ.)], ਸਾ ਮੇ ਨਤ੍ਥਿ ਇਤੋ ਗਤਿ;

ਤਂ ਵੋ ਵਦਾਮਿ ਭਦ੍ਦਂ ਵੋ, ਤ੍ਵਞ੍ਚ ਮੇ ਸਰਣਂ ਭਵ.

੧੯੮. ਗਰੁਂ [ਗਰੁ (ਸੀ. ਪੀ.)] ਸਿਲਂ ਗਹੇਤ੍ਵਾਨ, ਵਿਚਰੀ [ਵਿਚਰਿ (ਪੀ.)] ਪਬ੍ਬਤੇ ਕਪਿ;

ਸਿਲਾਯ ਯੋਗ੍ਗਂ ਕਤ੍ਵਾਨ, ਨਿਸਭੋ ਏਤਦਬ੍ਰਵਿ.

੧੯੯. ਏਹਿ ਮੇ ਪਿਟ੍ਠਿਮਾਰੁਯ੍ਹ, ਗੀਵਂ ਗਣ੍ਹਾਹਿ ਬਾਹੁਭਿ;

ਅਹਂ ਤਂ ਉਦ੍ਧਰਿਸ੍ਸਾਮਿ, ਗਿਰਿਦੁਗ੍ਗਤ ਵੇਗਸਾ.

੨੦੦. ਤਸ੍ਸ ਤਂ ਵਚਨਂ ਸੁਤ੍ਵਾ, ਵਾਨਰਿਨ੍ਦਸ੍ਸ ਸਿਰੀਮਤੋ;

ਪਿਟ੍ਠਿਮਾਰੁਯ੍ਹ ਧੀਰਸ੍ਸ, ਗੀਵਂ ਬਾਹਾਹਿ ਅਗ੍ਗਹਿਂ.

੨੦੧. ਸੋ ਮਂ ਤਤੋ ਸਮੁਟ੍ਠਾਸਿ, ਤੇਜਸ੍ਸੀ [ਤੇਜਸੀ (ਸ੍ਯਾ. ਪੀ. ਕ.)] ਬਲਵਾ ਕਪਿ;

ਵਿਹਞ੍ਞਮਾਨੋ ਕਿਚ੍ਛੇਨ, ਗਿਰਿਦੁਗ੍ਗਤ ਵੇਗਸਾ.

੨੦੨. ਉਦ੍ਧਰਿਤ੍ਵਾਨ ਮਂ ਸਨ੍ਤੋ, ਨਿਸਭੋ ਏਤਦਬ੍ਰਵਿ;

ਇਙ੍ਘ ਮਂ ਸਮ੍ਮ ਰਕ੍ਖਸ੍ਸੁ, ਪਸ੍ਸੁਪਿਸ੍ਸਂ ਮੁਹੁਤ੍ਤਕਂ.

੨੦੩. ਸੀਹਾ ਬ੍ਯਗ੍ਘਾ ਚ ਦੀਪੀ ਚ, ਅਚ੍ਛਕੋਕਤਰਚ੍ਛਯੋ;

ਤੇ ਮਂ ਪਮਤ੍ਤਂ ਹਿਂਸੇਯ੍ਯੁਂ, ਤੇ ਤ੍ਵਂ ਦਿਸ੍ਵਾ ਨਿਵਾਰਯ [ਦਿਸ੍ਵਾਨ ਵਾਰਯ (ਪੀ.)].

੨੦੪. ਏਵਂ ਮੇ ਪਰਿਤ੍ਤਾਤੂਨ [ਪਰਿਤ੍ਤਾਤੁਨ (ਕ.)], ਪਸ੍ਸੁਪਿ ਸੋ ਮੁਹੁਤ੍ਤਕਂ;

ਤਦਾਹਂ ਪਾਪਿਕਂ ਦਿਟ੍ਠਿਂ, ਪਟਿਲਚ੍ਛਿਂ ਅਯੋਨਿਸੋ.

੨੦੫. ਭਕ੍ਖੋ ਅਯਂ ਮਨੁਸ੍ਸਾਨਂ, ਯਥਾ ਚਞ੍ਞੇ ਵਨੇ ਮਿਗਾ;

ਯਂ ਨੂਨਿਮਂ ਵਧਿਤ੍ਵਾਨ, ਛਾਤੋ ਖਾਦੇਯ੍ਯ ਵਾਨਰਂ.

੨੦੬. ਅਸਿਤੋ [ਆਸਿਕੋ (ਪੀ.)] ਚ ਗਮਿਸ੍ਸਾਮਿ, ਮਂਸਮਾਦਾਯ ਸਮ੍ਬਲਂ;

ਕਨ੍ਤਾਰਂ ਨਿਤ੍ਥਰਿਸ੍ਸਾਮਿ, ਪਾਥੇਯ੍ਯਂ ਮੇ ਭਵਿਸ੍ਸਤਿ.

੨੦੭. ਤਤੋ ਸਿਲਂ ਗਹੇਤ੍ਵਾਨ, ਮਤ੍ਥਕਂ ਸਨ੍ਨਿਤਾਲ਼ਯਿਂ;

ਮਮ ਗਤ੍ਤ [ਭਤ੍ਤ (ਸੀ. ਸ੍ਯਾ.), ਹਤ੍ਥ (ਪੀ.)] ਕਿਲਨ੍ਤਸ੍ਸ, ਪਹਾਰੋ ਦੁਬ੍ਬਲੋ ਅਹੁ.

੨੦੮. ਸੋ ਚ ਵੇਗੇਨੁਦਪ੍ਪਤ੍ਤੋ, ਕਪਿ ਰੁਹਿਰ [ਰੁਧਿਰ (ਸੀ.)] ਮਕ੍ਖਿਤੋ;

ਅਸ੍ਸੁਪੁਣ੍ਣੇਹਿ ਨੇਤ੍ਤੇਹਿ, ਰੋਦਨ੍ਤੋ ਮਂ ਉਦਿਕ੍ਖਤਿ.

੨੦੯. ਮਾਯ੍ਯੋਮਂ ਕਰਿ ਭਦ੍ਦਨ੍ਤੇ, ਤ੍ਵਞ੍ਚ ਨਾਮੇਦਿਸਂ ਕਰਿ;

ਤ੍ਵਞ੍ਚ ਖੋ ਨਾਮ ਦੀਘਾਵੁ [ਦੀਘਾਯੁ (ਪੀ.)], ਅਞ੍ਞੇ [ਅਞ੍ਞਂ (ਪੀ.)] ਵਾਰੇਤੁਮਰਹਸਿ.

੨੧੦. ਅਹੋ ਵਤ ਰੇ ਪੁਰਿਸ, ਤਾਵ ਦੁਕ੍ਕਰਕਾਰਕ;

ਏਦਿਸਾ ਵਿਸਮਾ ਦੁਗ੍ਗਾ, ਪਪਾਤਾ ਉਦ੍ਧਤੋ [ਉਦ੍ਧਟੋ (ਪੀ.)] ਮਯਾ.

੨੧੧. ਆਨੀਤੋ ਪਰਲੋਕਾਵ, ਦੁਬ੍ਭੇਯ੍ਯਂ ਮਂ ਅਮਞ੍ਞਥ;

ਤਂ ਤੇਨ ਪਾਪਧਮ੍ਮੇਨ, ਪਾਪਂ ਪਾਪੇਨ ਚਿਨ੍ਤਿਤਂ.

੨੧੨. ਮਾ ਹੇਵ ਤ੍ਵਂ ਅਧਮ੍ਮਟ੍ਠ, ਵੇਦਨਂ ਕਟੁਕਂ ਫੁਸਿ;

ਮਾ ਹੇਵ ਪਾਪਕਮ੍ਮਂ ਤਂ, ਫਲਂ ਵੇਲ਼ੁਂਵ ਤਂ ਵਧਿ.

੨੧੩. ਤਯਿਮੇ ਨਤ੍ਥਿ ਵਿਸ੍ਸਾਸੋ, ਪਾਪਧਮ੍ਮ ਅਸਞ੍ਞਤ [ਪਾਪਧਮ੍ਮਂ ਅਮਞ੍ਞਥ (ਪੀ.)];

ਏਹਿ ਮੇ ਪਿਟ੍ਠਿਤੋ ਗਚ੍ਛ, ਦਿਸ੍ਸਮਾਨੋਵ ਸਨ੍ਤਿਕੇ.

੨੧੪. ਮੁਤ੍ਤੋਸਿ ਹਤ੍ਥਾ ਵਾਲ਼ਾਨਂ, ਪਤ੍ਤੋਸਿ ਮਾਨੁਸਿਂ ਪਦਂ;

ਏਸ ਮਗ੍ਗੋ ਅਧਮ੍ਮਟ੍ਠ, ਤੇਨ ਗਚ੍ਛ ਯਥਾਸੁਖਂ.

੨੧੫. ਇਦਂ ਵਤ੍ਵਾ ਗਿਰਿਚਰੋ, ਰਹਦੇ [ਰੁਹਿਰਂ (ਸ੍ਯਾ. ਕ.)] ਪਕ੍ਖਲ੍ਯ ਮਤ੍ਥਕਂ;

ਅਸ੍ਸੂਨਿ ਸਮ੍ਪਮਜ੍ਜਿਤ੍ਵਾ, ਤਤੋ ਪਬ੍ਬਤਮਾਰੁਹਿ.

੨੧੬. ਸੋਹਂ ਤੇਨਾਭਿਸਤ੍ਤੋਸ੍ਮਿ, ਪਰਿਲ਼ਾਹੇਨ ਅਟ੍ਟਿਤੋ;

ਡਯ੍ਹਮਾਨੇਨ ਗਤ੍ਤੇਨ, ਵਾਰਿਂ ਪਾਤੁਂ ਉਪਾਗਮਿਂ.

੨੧੭. ਅਗ੍ਗਿਨਾ ਵਿਯ ਸਨ੍ਤਤ੍ਤੋ, ਰਹਦੋ ਰੁਹਿਰਮਕ੍ਖਿਤੋ;

ਪੁਬ੍ਬਲੋਹਿਤਸਙ੍ਕਾਸੋ, ਸਬ੍ਬੋ ਮੇ ਸਮਪਜ੍ਜਥ.

੨੧੮. ਯਾਵਨ੍ਤੋ ਉਦਬਿਨ੍ਦੂਨਿ, ਕਾਯਸ੍ਮਿਂ ਨਿਪਤਿਂਸੁ ਮੇ;

ਤਾਵਨ੍ਤੋ ਗਣ੍ਡ [ਗਣ੍ਡੂ (ਸੀ. ਪੀ.), ਗਣ੍ਡੁ (ਸ੍ਯਾ.)] ਜਾਯੇਥ, ਅਦ੍ਧਬੇਲੁਵਸਾਦਿਸਾ.

੨੧੯. ਪਭਿਨ੍ਨਾ ਪਗ੍ਘਰਿਂਸੁ ਮੇ, ਕੁਣਪਾ ਪੁਬ੍ਬਲੋਹਿਤਾ;

ਯੇਨ ਯੇਨੇਵ ਗਚ੍ਛਾਮਿ, ਗਾਮੇਸੁ ਨਿਗਮੇਸੁ ਚ.

੨੨੦. ਦਣ੍ਡਹਤ੍ਥਾ ਨਿਵਾਰੇਨ੍ਤਿ, ਇਤ੍ਥਿਯੋ ਪੁਰਿਸਾ ਚ ਮਂ;

ਓਕ੍ਕਿਤਾ [ਓਕਿਣ੍ਣਾ (ਸੀ.)] ਪੂਤਿਗਨ੍ਧੇਨ, ਮਾਸ੍ਸੁ ਓਰੇਨ ਆਗਮਾ [ਮਾਗਮਾ (ਸੀ. ਪੀ.)].

੨੨੧. ਏਤਾਦਿਸਂ ਇਦਂ ਦੁਕ੍ਖਂ, ਸਤ੍ਤ ਵਸ੍ਸਾਨਿ ਦਾਨਿ ਮੇ;

ਅਨੁਭੋਮਿ ਸਕਂ ਕਮ੍ਮਂ, ਪੁਬ੍ਬੇ ਦੁਕ੍ਕਟਮਤ੍ਤਨੋ.

੨੨੨. ਤਂ ਵੋ ਵਦਾਮਿ ਭਦ੍ਦਨ੍ਤੇ [ਭਦ੍ਦਂ ਵੋ (ਸੀ. ਪੀ.)], ਯਾਵਨ੍ਤੇਤ੍ਥ ਸਮਾਗਤਾ;

ਮਾਸ੍ਸੁ ਮਿਤ੍ਤਾਨ [ਮਿਤ੍ਤਾਨਂ (ਸੀ. ਪੀ.)] ਦੁਬ੍ਭਿਤ੍ਥੋ, ਮਿਤ੍ਤਦੁਬ੍ਭੋ ਹਿ ਪਾਪਕੋ.

੨੨੩. ਕੁਟ੍ਠੀ ਕਿਲਾਸੀ ਭਵਤਿ, ਯੋ ਮਿਤ੍ਤਾਨਿਧ ਦੁਬ੍ਭਤਿ [ਯੋ ਮਿਤ੍ਤਾਨਂ ਇਧਦ੍ਦੁਭਿ (ਸੀ. ਅਟ੍ਠ.), ਯੋ ਮਿਤ੍ਤਾਨਂ ਇਧ ਦੁਬ੍ਭਤਿ (ਪੀ.)];

ਕਾਯਸ੍ਸ ਭੇਦਾ ਮਿਤ੍ਤਦ੍ਦੁ [ਮਿਤ੍ਤਦੁਬ੍ਭੀ (ਸ੍ਯਾ. ਕ.)], ਨਿਰਯਂ ਸੋਪਪਜ੍ਜਤੀਤਿ [ਸੋ ਉਪਪਜ੍ਜਤੀਤਿ (ਸੀ. ਸ੍ਯਾ. ਪੀ.)].

ਮਹਾਕਪਿਜਾਤਕਂ ਛਟ੍ਠਂ.