੫੧੫. ਸਮ੍ਭਵਜਾਤਕਂ (੫)

੧੩੮. ਰਜ੍ਜਞ੍ਚ ਪਟਿਪਨ੍ਨਾਸ੍ਮ, ਆਧਿਪਚ੍ਚਂ ਸੁਚੀਰਤ;

ਮਹਤ੍ਤਂ ਪਤ੍ਤੁਮਿਚ੍ਛਾਮਿ, ਵਿਜੇਤੁਂ ਪਥਵਿਂ ਇਮਂ.

੧੩੯. ਧਮ੍ਮੇਨ ਨੋ ਅਧਮ੍ਮੇਨ, ਅਧਮ੍ਮੋ ਮੇ ਨ ਰੁਚ੍ਚਤਿ;

ਕਿਚ੍ਚੋਵ ਧਮ੍ਮੋ ਚਰਿਤੋ, ਰਞ੍ਞੋ ਹੋਤਿ ਸੁਚੀਰਤ.

੧੪੦. ਇਧ ਚੇਵਾਨਿਨ੍ਦਿਤਾ ਯੇਨ, ਪੇਚ੍ਚ ਯੇਨ ਅਨਿਨ੍ਦਿਤਾ;

ਯਸਂ ਦੇਵਮਨੁਸ੍ਸੇਸੁ, ਯੇਨ ਪਪ੍ਪੋਮੁ [ਪਪ੍ਪੇਮੁ (ਸੀ. ਅਟ੍ਠ.)] ਬ੍ਰਾਹ੍ਮਣ.

੧੪੧. ਯੋਹਂ ਅਤ੍ਥਞ੍ਚ ਧਮ੍ਮਞ੍ਚ, ਕਤ੍ਤੁਮਿਚ੍ਛਾਮਿ ਬ੍ਰਾਹ੍ਮਣ;

ਤਂ ਤ੍ਵਂ ਅਤ੍ਥਞ੍ਚ ਧਮ੍ਮਞ੍ਚ, ਬ੍ਰਾਹ੍ਮਣਕ੍ਖਾਹਿ ਪੁਚ੍ਛਿਤੋ.

੧੪੨. ਨਾਞ੍ਞਤ੍ਰ ਵਿਧੁਰਾ ਰਾਜ, ਏਤਦਕ੍ਖਾਤੁਮਰਹਤਿ;

ਯਂ ਤ੍ਵਂ ਅਤ੍ਥਞ੍ਚ ਧਮ੍ਮਞ੍ਚ, ਕਤ੍ਤੁਮਿਚ੍ਛਸਿ ਖਤ੍ਤਿਯ.

੧੪੩. ਏਹਿ ਖੋ ਪਹਿਤੋ ਗਚ੍ਛ, ਵਿਧੁਰਸ੍ਸ ਉਪਨ੍ਤਿਕਂ;

ਨਿਕ੍ਖਞ੍ਚਿਮਂ [ਨਿਕ੍ਖਂ ਰਤ੍ਤ (ਸੀ.), ਨਿਕ੍ਖਮਿਮਂ (ਪੀ.)] ਸੁਵਣ੍ਣਸ੍ਸ, ਹਰਂ ਗਚ੍ਛ ਸੁਚੀਰਤ;

ਅਭਿਹਾਰਂ ਇਮਂ ਦਜ੍ਜਾ, ਅਤ੍ਥਧਮ੍ਮਾਨੁਸਿਟ੍ਠਿਯਾ.

੧੪੪. ਸ੍ਵਾਧਿਪ੍ਪਾਗਾ ਭਾਰਦ੍ਵਾਜੋ, ਵਿਧੁਰਸ੍ਸ ਉਪਨ੍ਤਿਕਂ;

ਤਮਦ੍ਦਸ ਮਹਾਬ੍ਰਹ੍ਮਾ, ਅਸਮਾਨਂ ਸਕੇ ਘਰੇ.

੧੪੫. ਰਞ੍ਞੋਹਂ ਪਹਿਤੋ ਦੂਤੋ, ਕੋਰਬ੍ਯਸ੍ਸ ਯਸਸ੍ਸਿਨੋ;

‘‘ਅਤ੍ਥਂ ਧਮ੍ਮਞ੍ਚ ਪੁਚ੍ਛੇਸਿ’’, ਇਚ੍ਚਬ੍ਰਵਿ ਯੁਧਿਟ੍ਠਿਲੋ;

ਤਂ ਤ੍ਵਂ ਅਤ੍ਥਞ੍ਚ ਧਮ੍ਮਞ੍ਚ, ਵਿਧੁਰਕ੍ਖਾਹਿ ਪੁਚ੍ਛਿਤੋ.

੧੪੬. ਗਙ੍ਗਂ ਮੇ ਪਿਦਹਿਸ੍ਸਨ੍ਤਿ, ਨ ਤਂ ਸਕ੍ਕੋਮਿ ਬ੍ਰਾਹ੍ਮਣ;

ਅਪਿਧੇਤੁਂ ਮਹਾਸਿਨ੍ਧੁਂ, ਤਂ ਕਥਂ ਸੋ ਭਵਿਸ੍ਸਤਿ.

੧੪੭. ਨ ਤੇ ਸਕ੍ਕੋਮਿ ਅਕ੍ਖਾਤੁਂ, ਅਤ੍ਥਂ ਧਮ੍ਮਞ੍ਚ ਪੁਚ੍ਛਿਤੋ;

ਭਦ੍ਰਕਾਰੋ ਚ ਮੇ ਪੁਤ੍ਤੋ, ਓਰਸੋ ਮਮ ਅਤ੍ਰਜੋ;

ਤਂ ਤ੍ਵਂ ਅਤ੍ਥਞ੍ਚ ਧਮ੍ਮਞ੍ਚ, ਗਨ੍ਤ੍ਵਾ ਪੁਚ੍ਛਸ੍ਸੁ ਬ੍ਰਾਹ੍ਮਣ.

੧੪੮. ਸ੍ਵਾਧਿਪ੍ਪਾਗਾ ਭਾਰਦ੍ਵਾਜੋ, ਭਦ੍ਰਕਾਰਸ੍ਸੁਪਨ੍ਤਿਕਂ [ਭਦ੍ਰਕਾਰਸ੍ਸ ਸਨ੍ਤਿਕਂ (ਸੀ. ਸ੍ਯਾ.)];

ਤਮਦ੍ਦਸ ਮਹਾਬ੍ਰਹ੍ਮਾ, ਨਿਸਿਨ੍ਨਂ ਸਮ੍ਹਿ ਵੇਸ੍ਮਨਿ.

੧੪੯. ਰਞ੍ਞੋਹਂ ਪਹਿਤੋ ਦੂਤੋ, ਕੋਰਬ੍ਯਸ੍ਸ ਯਸਸ੍ਸਿਨੋ;

‘‘ਅਤ੍ਥਂ ਧਮ੍ਮਞ੍ਚ ਪੁਚ੍ਛੇਸਿ’’, ਇਚ੍ਚਬ੍ਰਵਿ ਯੁਧਿਟ੍ਠਿਲੋ;

ਤਂ ਤ੍ਵਂ ਅਤ੍ਥਞ੍ਚ ਧਮ੍ਮਞ੍ਚ, ਭਦ੍ਰਕਾਰ ਪਬ੍ਰੂਹਿ [ਬ੍ਰਵੀਹਿ (ਸੀ. ਪੀ.)] ਮੇ.

੧੫੦. ਮਂਸਕਾਜਂ [ਮਂਸਕਾਚਂ (ਪੀ.)] ਅਵਹਾਯ, ਗੋਧਂ ਅਨੁਪਤਾਮਹਂ;

ਨ ਤੇ ਸਕ੍ਕੋਮਿ ਅਕ੍ਖਾਤੁਂ, ਅਤ੍ਥਂ ਧਮ੍ਮਞ੍ਚ ਪੁਚ੍ਛਿਤੋ.

੧੫੧. ਸਞ੍ਚਯੋ [ਸਞ੍ਜਯੋ (ਸੀ. ਸ੍ਯਾ. ਪੀ.)] ਨਾਮ ਮੇ ਭਾਤਾ, ਕਨਿਟ੍ਠੋ ਮੇ ਸੁਚੀਰਤ;

ਤਂ ਤ੍ਵਂ ਅਤ੍ਥਞ੍ਚ ਧਮ੍ਮਞ੍ਚ, ਗਨ੍ਤ੍ਵਾ ਪੁਚ੍ਛਸ੍ਸੁ ਬ੍ਰਾਹ੍ਮਣ.

੧੫੨. ਸ੍ਵਾਧਿਪ੍ਪਾਗਾ ਭਾਰਦ੍ਵਾਜੋ, ਸਞ੍ਚਯਸ੍ਸ ਉਪਨ੍ਤਿਕਂ;

ਤਮਦ੍ਦਸ ਮਹਾਬ੍ਰਹ੍ਮਾ, ਨਿਸਿਨ੍ਨਂ ਸਮ੍ਹਿ ਵੇਸ੍ਮਨਿ [ਪਰਿਸਤਿ (ਸ੍ਯਾ.), ਪਰੀਸਤਿ (ਪੀ.)].

੧੫੩. ਰਞ੍ਞੋਹਂ ਪਹਿਤੋ ਦੂਤੋ, ਕੋਰਬ੍ਯਸ੍ਸ ਯਸਸ੍ਸਿਨੋ;

‘‘ਅਤ੍ਥਂ ਧਮ੍ਮਞ੍ਚ ਪੁਚ੍ਛੇਸਿ’’, ਇਚ੍ਚਬ੍ਰਵਿ ਯੁਧਿਟ੍ਠਿਲੋ;

ਤਂ ਤ੍ਵਂ ਅਤ੍ਥਞ੍ਚ ਧਮ੍ਮਞ੍ਚ, ਸਞ੍ਚਯਕ੍ਖਾਹਿ ਪੁਚ੍ਛਿਤੋ.

੧੫੪. ਸਦਾ ਮਂ ਗਿਲਤੇ [ਗਿਲਤੀ (ਸੀ.), ਗਿਲਤਿ (ਪੀ.)] ਮਚ੍ਚੁ, ਸਾਯਂ ਪਾਤੋ ਸੁਚੀਰਤ;

ਨ ਤੇ ਸਕ੍ਕੋਮਿ ਅਕ੍ਖਾਤੁਂ, ਅਤ੍ਥਂ ਧਮ੍ਮਞ੍ਚ ਪੁਚ੍ਛਿਤੋ.

੧੫੫. ਸਮ੍ਭਵੋ ਨਾਮ ਮੇ ਭਾਤਾ, ਕਨਿਟ੍ਠੋ ਮੇ ਸੁਚੀਰਤ;

ਤਂ ਤ੍ਵਂ ਅਤ੍ਥਞ੍ਚ ਧਮ੍ਮਞ੍ਚ, ਗਨ੍ਤ੍ਵਾ ਪੁਚ੍ਛਸ੍ਸੁ ਬ੍ਰਾਹ੍ਮਣ.

੧੫੬. ਅਬ੍ਭੁਤੋ ਵਤ ਭੋ ਧਮ੍ਮੋ, ਨਾਯਂ ਅਸ੍ਮਾਕ ਰੁਚ੍ਚਤਿ;

ਤਯੋ ਜਨਾ ਪਿਤਾਪੁਤ੍ਤਾ, ਤੇਸੁ ਪਞ੍ਞਾਯ ਨੋ ਵਿਦੂ.

੧੫੭. ਨ ਤਂ ਸਕ੍ਕੋਥ ਅਕ੍ਖਾਤੁਂ, ਅਤ੍ਥਂ ਧਮ੍ਮਞ੍ਚ ਪੁਚ੍ਛਿਤਾ;

ਕਥਂ ਨੁ ਦਹਰੋ ਜਞ੍ਞਾ, ਅਤ੍ਥਂ ਧਮ੍ਮਞ੍ਚ ਪੁਚ੍ਛਿਤੋ.

੧੫੮. ਮਾ ਨਂ ਦਹਰੋਤਿ ਉਞ੍ਞਾਸਿ [ਮਞ੍ਞਾਸਿ (ਸ੍ਯਾ. ਕ.)], ਅਪੁਚ੍ਛਿਤ੍ਵਾਨ ਸਮ੍ਭਵਂ;

ਪੁਚ੍ਛਿਤ੍ਵਾ ਸਮ੍ਭਵਂ ਜਞ੍ਞਾ, ਅਤ੍ਥਂ ਧਮ੍ਮਞ੍ਚ ਬ੍ਰਾਹ੍ਮਣ.

੧੫੯. ਯਥਾਪਿ ਚਨ੍ਦੋ ਵਿਮਲੋ, ਗਚ੍ਛਂ ਆਕਾਸਧਾਤੁਯਾ;

ਸਬ੍ਬੇ ਤਾਰਾਗਣੇ ਲੋਕੇ, ਆਭਾਯ ਅਤਿਰੋਚਤਿ.

੧੬੦. ਏਵਮ੍ਪਿ ਦਹਰੂਪੇਤੋ, ਪਞ੍ਞਾਯੋਗੇਨ ਸਮ੍ਭਵੋ;

ਮਾ ਨਂ ਦਹਰੋਤਿ ਉਞ੍ਞਾਸਿ, ਅਪੁਚ੍ਛਿਤ੍ਵਾਨ ਸਮ੍ਭਵਂ;

ਪੁਚ੍ਛਿਤ੍ਵਾ ਸਮ੍ਭਵਂ ਜਞ੍ਞਾ, ਅਤ੍ਥਂ ਧਮ੍ਮਞ੍ਚ ਬ੍ਰਾਹ੍ਮਣ.

੧੬੧. ਯਥਾਪਿ ਰਮ੍ਮਕੋ ਮਾਸੋ, ਗਿਮ੍ਹਾਨਂ ਹੋਤਿ ਬ੍ਰਾਹ੍ਮਣ;

ਅਤੇਵਞ੍ਞੇਹਿ ਮਾਸੇਹਿ, ਦੁਮਪੁਪ੍ਫੇਹਿ ਸੋਭਤਿ.

੧੬੨. ਏਵਮ੍ਪਿ ਦਹਰੂਪੇਤੋ, ਪਞ੍ਞਾਯੋਗੇਨ ਸਮ੍ਭਵੋ;

ਮਾ ਨਂ ਦਹਰੋਤਿ ਉਞ੍ਞਾਸਿ, ਅਪੁਚ੍ਛਿਤ੍ਵਾਨ ਸਮ੍ਭਵਂ;

ਪੁਚ੍ਛਿਤ੍ਵਾ ਸਮ੍ਭਵਂ ਜਞ੍ਞਾ, ਅਤ੍ਥਂ ਧਮ੍ਮਞ੍ਚ ਬ੍ਰਾਹ੍ਮਣ.

੧੬੩. ਯਥਾਪਿ ਹਿਮਵਾ ਬ੍ਰਹ੍ਮੇ, ਪਬ੍ਬਤੋ ਗਨ੍ਧਮਾਦਨੋ;

ਨਾਨਾਰੁਕ੍ਖੇਹਿ ਸਞ੍ਛਨ੍ਨੋ, ਮਹਾਭੂਤਗਣਾਲਯੋ;

ਓਸਧੇਹਿ ਚ ਦਿਬ੍ਬੇਹਿ, ਦਿਸਾ ਭਾਤਿ ਪਵਾਤਿ ਚ.

੧੬੪. ਏਵਮ੍ਪਿ ਦਹਰੂਪੇਤੋ, ਪਞ੍ਞਾਯੋਗੇਨ ਸਮ੍ਭਵੋ;

ਮਾ ਨਂ ਦਹਰੋਤਿ ਉਞ੍ਞਾਸਿ, ਅਪੁਚ੍ਛਿਤ੍ਵਾਨ ਸਮ੍ਭਵਂ;

ਪੁਚ੍ਛਿਤ੍ਵਾ ਸਮ੍ਭਵਂ ਜਞ੍ਞਾ, ਅਤ੍ਥਂ ਧਮ੍ਮਞ੍ਚ ਬ੍ਰਾਹ੍ਮਣ.

੧੬੫. ਯਥਾਪਿ ਪਾਵਕੋ ਬ੍ਰਹ੍ਮੇ, ਅਚ੍ਚਿਮਾਲੀ ਯਸਸ੍ਸਿਮਾ;

ਜਲਮਾਨੋ ਵਨੇ ਗਚ੍ਛੇ [ਚਰਂ ਕਚ੍ਛੇ (ਪੀ.)], ਅਨਲੋ ਕਣ੍ਹਵਤ੍ਤਨੀ.

੧੬੬. ਘਤਾਸਨੋ ਧੂਮਕੇਤੁ, ਉਤ੍ਤਮਾਹੇਵਨਨ੍ਦਹੋ;

ਨਿਸੀਥੇ [ਨਿਸ੍ਸੀਵੇ (ਸ੍ਯਾ.), ਨਿਸਿਵੇ (ਕ.)] ਪਬ੍ਬਤਗ੍ਗਸ੍ਮਿਂ, ਪਹੂਤੇਧੋ [ਬਹੁਤੇਜੋ (ਸ੍ਯਾ. ਕ.)] ਵਿਰੋਚਤਿ.

੧੬੭. ਏਵਮ੍ਪਿ ਦਹਰੂਪੇਤੋ, ਪਞ੍ਞਾਯੋਗੇਨ ਸਮ੍ਭਵੋ;

ਮਾ ਨਂ ਦਹਰੋਤਿ ਉਞ੍ਞਾਸਿ, ਅਪੁਚ੍ਛਿਤ੍ਵਾਨ ਸਮ੍ਭਵਂ;

ਪੁਚ੍ਛਿਤ੍ਵਾ ਸਮ੍ਭਵਂ ਜਞ੍ਞਾ, ਅਤ੍ਥਂ ਧਮ੍ਮਞ੍ਚ ਬ੍ਰਾਹ੍ਮਣ.

੧੬੮. ਜਵੇਨ ਭਦ੍ਰਂ ਜਾਨਨ੍ਤਿ, ਬਲਿਬਦ੍ਦਞ੍ਚ [ਬਲਿਵਦ੍ਦਞ੍ਚ (ਸੀ. ਪੀ.)] ਵਾਹਿਯੇ;

ਦੋਹੇਨ ਧੇਨੁਂ ਜਾਨਨ੍ਤਿ, ਭਾਸਮਾਨਞ੍ਚ ਪਣ੍ਡਿਤਂ.

੧੬੯. ਏਵਮ੍ਪਿ ਦਹਰੂਪੇਤੋ, ਪਞ੍ਞਾਯੋਗੇਨ ਸਮ੍ਭਵੋ;

ਮਾ ਨਂ ਦਹਰੋਤਿ ਉਞ੍ਞਾਸਿ, ਅਪੁਚ੍ਛਿਤ੍ਵਾਨ ਸਮ੍ਭਵਂ;

ਪੁਚ੍ਛਿਤ੍ਵਾ ਸਮ੍ਭਵਂ ਜਞ੍ਞਾ, ਅਤ੍ਥਂ ਧਮ੍ਮਞ੍ਚ ਬ੍ਰਾਹ੍ਮਣ.

੧੭੦. ਸ੍ਵਾਧਿਪ੍ਪਾਗਾ ਭਾਰਦ੍ਵਾਜੋ, ਸਮ੍ਭਵਸ੍ਸ ਉਪਨ੍ਤਿਕਂ;

ਤਮਦ੍ਦਸ ਮਹਾਬ੍ਰਹ੍ਮਾ, ਕੀਲ਼ਮਾਨਂ ਬਹੀਪੁਰੇ.

੧੭੧. ਰਞ੍ਞੋਹਂ ਪਹਿਤੋ ਦੂਤੋ, ਕੋਰਬ੍ਯਸ੍ਸ ਯਸਸ੍ਸਿਨੋ;

‘‘ਅਤ੍ਥਂ ਧਮ੍ਮਞ੍ਚ ਪੁਚ੍ਛੇਸਿ’’, ਇਚ੍ਚਬ੍ਰਵਿ ਯੁਧਿਟ੍ਠਿਲੋ;

ਤਂ ਤ੍ਵਂ ਅਤ੍ਥਞ੍ਚ ਧਮ੍ਮਞ੍ਚ, ਸਮ੍ਭਵਕ੍ਖਾਹਿ ਪੁਚ੍ਛਿਤੋ.

੧੭੨. ਤਗ੍ਘ ਤੇ ਅਹਮਕ੍ਖਿਸ੍ਸਂ, ਯਥਾਪਿ ਕੁਸਲੋ ਤਥਾ;

ਰਾਜਾ ਚ ਖੋ ਤਂ ਜਾਨਾਤਿ, ਯਦਿ ਕਾਹਤਿ ਵਾ ਨ ਵਾ.

੧੭੩. ‘‘ਅਜ੍ਜ ਸੁਵੇ’’ਤਿ ਸਂਸੇਯ੍ਯ, ਰਞ੍ਞਾ ਪੁਟ੍ਠੋ ਸੁਚੀਰਤ;

ਮਾ ਕਤ੍ਵਾ ਅਵਸੀ ਰਾਜਾ, ਅਤ੍ਥੇ ਜਾਤੇ ਯੁਧਿਟ੍ਠਿਲੋ.

੧੭੪. ਅਜ੍ਝਤ੍ਤਞ੍ਞੇਵ ਸਂਸੇਯ੍ਯ, ਰਞ੍ਞਾ ਪੁਟ੍ਠੋ ਸੁਚੀਰਤ;

ਕੁਮ੍ਮਗ੍ਗਂ ਨ ਨਿਵੇਸੇਯ੍ਯ, ਯਥਾ ਮੂਲ਼੍ਹੋ ਅਚੇਤਸੋ [ਅਚੇਤਨੋ (ਕ.)].

੧੭੫. ਅਤ੍ਤਾਨਂ ਨਾਤਿਵਤ੍ਤੇਯ੍ਯ, ਅਧਮ੍ਮਂ ਨ ਸਮਾਚਰੇ;

ਅਤਿਤ੍ਥੇ ਨਪ੍ਪਤਾਰੇਯ੍ਯ, ਅਨਤ੍ਥੇ ਨ ਯੁਤੋ ਸਿਯਾ.

੧੭੬. ਯੋ ਚ ਏਤਾਨਿ ਠਾਨਾਨਿ, ਕਤ੍ਤੁਂ ਜਾਨਾਤਿ ਖਤ੍ਤਿਯੋ;

ਸਦਾ ਸੋ ਵਡ੍ਢਤੇ ਰਾਜਾ, ਸੁਕ੍ਕਪਕ੍ਖੇਵ ਚਨ੍ਦਿਮਾ.

੧੭੭. ਞਾਤੀਨਞ੍ਚ ਪਿਯੋ ਹੋਤਿ, ਮਿਤ੍ਤੇਸੁ ਚ ਵਿਰੋਚਤਿ;

ਕਾਯਸ੍ਸ ਭੇਦਾ ਸਪ੍ਪਞ੍ਞੋ, ਸਗ੍ਗਂ ਸੋ ਉਪਪਜ੍ਜਤੀਤਿ.

ਸਮ੍ਭਵਜਾਤਕਂ ਪਞ੍ਚਮਂ.