੫੧੪. ਛਦ੍ਦਨ੍ਤਜਾਤਕਂ (੪)

੯੭. ਕਿਂ ਨੁ ਸੋਚਸਿਨੁਚ੍ਚਙ੍ਗਿ, ਪਣ੍ਡੂਸਿ ਵਰਵਣ੍ਣਿਨਿ;

ਮਿਲਾਯਸਿ ਵਿਸਾਲਕ੍ਖਿ, ਮਾਲਾਵ ਪਰਿਮਦ੍ਦਿਤਾ.

੯੮. ਦੋਹਲ਼ੋ ਮੇ ਮਹਾਰਾਜ, ਸੁਪਿਨਨ੍ਤੇਨੁਪਜ੍ਝਗਾ [ਨੁ’ਪਚ੍ਚਗਾ (ਸੀ. ਸ੍ਯਾ. ਪੀ.)];

ਨ ਸੋ ਸੁਲਭਰੂਪੋਵ, ਯਾਦਿਸੋ ਮਮ ਦੋਹਲ਼ੋ.

੯੯. ਯੇ ਕੇਚਿ ਮਾਨੁਸਾ ਕਾਮਾ, ਇਧ ਲੋਕਸ੍ਮਿ ਨਨ੍ਦਨੇ;

ਸਬ੍ਬੇ ਤੇ ਪਚੁਰਾ ਮਯ੍ਹਂ, ਅਹਂ ਤੇ ਦਮ੍ਮਿ ਦੋਹਲ਼ਂ.

੧੦੦. ਲੁਦ੍ਦਾ ਦੇਵ ਸਮਾਯਨ੍ਤੁ, ਯੇ ਕੇਚਿ ਵਿਜਿਤੇ ਤਵ;

ਏਤੇਸਂ ਅਹਮਕ੍ਖਿਸ੍ਸਂ, ਯਾਦਿਸੋ ਮਮ ਦੋਹਲ਼ੋ.

੧੦੧. ਇਮੇ ਤੇ ਲੁਦ੍ਦਕਾ ਦੇਵਿ, ਕਤਹਤ੍ਥਾ ਵਿਸਾਰਦਾ;

ਵਨਞ੍ਞੂ ਚ ਮਿਗਞ੍ਞੂ ਚ, ਮਮਤ੍ਥੇ [ਮਮ ਤੇ (ਪੀ.)] ਚਤ੍ਤਜੀਵਿਤਾ.

੧੦੨. ਲੁਦ੍ਦਪੁਤ੍ਤਾ ਨਿਸਾਮੇਥ, ਯਾਵਨ੍ਤੇਤ੍ਥ ਸਮਾਗਤਾ;

ਛਬ੍ਬਿਸਾਣਂ ਗਜਂ ਸੇਤਂ, ਅਦ੍ਦਸਂ ਸੁਪਿਨੇ ਅਹਂ;

ਤਸ੍ਸ ਦਨ੍ਤੇਹਿ ਮੇ ਅਤ੍ਥੋ, ਅਲਾਭੇ ਨਤ੍ਥਿ ਜੀਵਿਤਂ.

੧੦੩. ਨ ਨੋ ਪਿਤੂਨਂ ਨ ਪਿਤਾਮਹਾਨਂ, ਦਿਟ੍ਠੋ ਸੁਤੋ ਕੁਞ੍ਜਰੋ ਛਬ੍ਬਿਸਾਣੋ;

ਯਮਦ੍ਦਸਾ ਸੁਪਿਨੇ ਰਾਜਪੁਤ੍ਤੀ, ਅਕ੍ਖਾਹਿ ਨੋ ਯਾਦਿਸੋ ਹਤ੍ਥਿਨਾਗੋ.

੧੦੪. ਦਿਸਾ ਚਤਸ੍ਸੋ ਵਿਦਿਸਾ ਚਤਸ੍ਸੋ, ਉਦ੍ਧਂ ਅਧੋ ਦਸ ਦਿਸਾ ਇਮਾਯੋ;

ਕਤਮਂ ਦਿਸਂ ਤਿਟ੍ਠਤਿ ਨਾਗਰਾਜਾ, ਯਮਦ੍ਦਸਾ ਸੁਪਿਨੇ ਛਬ੍ਬਿਸਾਣਂ.

੧੦੫. ਇਤੋ ਉਜੁਂ ਉਤ੍ਤਰਿਯਂ ਦਿਸਾਯਂ, ਅਤਿਕ੍ਕਮ੍ਮ ਸੋ ਸਤ੍ਤਗਿਰੀ ਬ੍ਰਹਨ੍ਤੇ;

ਸੁਵਣ੍ਣਪਸ੍ਸੋ ਨਾਮ ਗਿਰੀ ਉਲ਼ਾਰੋ, ਸੁਪੁਪ੍ਫਿਤੋ [ਸਮ੍ਪੁਪ੍ਫਿਤੋ (ਸ੍ਯਾ.)] ਕਿਮ੍ਪੁਰਿਸਾਨੁਚਿਣ੍ਣੋ.

੧੦੬. ਆਰੁਯ੍ਹ ਸੇਲਂ ਭਵਨਂ ਕਿਨ੍ਨਰਾਨਂ, ਓਲੋਕਯ ਪਬ੍ਬਤਪਾਦਮੂਲਂ;

ਅਥ ਦਕ੍ਖਸੀ ਮੇਘਸਮਾਨਵਣ੍ਣਂ, ਨਿਗ੍ਰੋਧਰਾਜਂ ਅਥ ਸਹਸ੍ਸਪਾਦਂ [ਪੋਰਂ (ਕ.)].

੧੦੭. ਤਤ੍ਥਚ੍ਛਤੀ ਕੁਞ੍ਜਰੋ ਛਬ੍ਬਿਸਾਣੋ, ਸਬ੍ਬਸੇਤੋ ਦੁਪ੍ਪਸਹੋ ਪਰੇਭਿ;

ਰਕ੍ਖਨ੍ਤਿ ਨਂ ਅਟ੍ਠਸਹਸ੍ਸਨਾਗਾ, ਈਸਾਦਨ੍ਤਾ ਵਾਤਜਵਪ੍ਪਹਾਰਿਨੋ.

੧੦੮. ਤਿਟ੍ਠਨ੍ਤਿ ਤੇ ਤੁਮੂਲਂ [ਤੁਮੂਲ (ਸ੍ਯਾ.), ਭਿਮੂਲ (ਪੀ. ਕ.)] ਪਸ੍ਸਸਨ੍ਤਾ, ਕੁਪ੍ਪਨ੍ਤਿ ਵਾਤਸ੍ਸਪਿ ਏਰਿਤਸ੍ਸ;

ਮਨੁਸ੍ਸਭੂਤਂ ਪਨ ਤਤ੍ਥ ਦਿਸ੍ਵਾ, ਭਸ੍ਮਂ ਕਰੇਯ੍ਯੁਂ ਨਾਸ੍ਸ ਰਜੋਪਿ ਤਸ੍ਸ.

੧੦੯. ਬਹੂ ਹਿਮੇ ਰਾਜਕੁਲਮ੍ਹਿ ਸਨ੍ਤਿ, ਪਿਲ਼ਨ੍ਧਨਾ ਜਾਤਰੂਪਸ੍ਸ ਦੇਵੀ;

ਮੁਤ੍ਤਾਮਣੀਵੇਲ਼ੁਰਿਯਾਮਯਾ ਚ, ਕਿਂ ਕਾਹਸਿ ਦਨ੍ਤਪਿਲ਼ਨ੍ਧਨੇਨ;

ਮਾਰੇਤੁਕਾਮਾ ਕੁਞ੍ਜਰਂ ਛਬ੍ਬਿਸਾਣਂ, ਉਦਾਹੁ ਘਾਤੇਸ੍ਸਸਿ ਲੁਦ੍ਦਪੁਤ੍ਤੇ.

੧੧੦. ਸਾ ਇਸ੍ਸਿਤਾ ਦੁਕ੍ਖਿਤਾ ਚਸ੍ਮਿ ਲੁਦ੍ਦ, ਉਦ੍ਧਞ੍ਚ ਸੁਸ੍ਸਾਮਿ ਅਨੁਸ੍ਸਰਨ੍ਤੀ;

ਕਰੋਹਿ ਮੇ ਲੁਦ੍ਦਕ ਏਤਮਤ੍ਥਂ, ਦਸ੍ਸਾਮਿ ਤੇ ਗਾਮਵਰਾਨਿ ਪਞ੍ਚ.

੧੧੧. ਕਤ੍ਥਚ੍ਛਤੀ ਕਤ੍ਥਮੁਪੇਤਿ ਠਾਨਂ, ਵੀਥਿਸ੍ਸ ਕਾ ਨ੍ਹਾਨ [ਨਹਾਨ (ਸੀ. ਪੀ.)] ਗਤਸ੍ਸ ਹੋਤਿ;

ਕਥਞ੍ਹਿ ਸੋ ਨ੍ਹਾਯਤਿ [ਨਹਾਯਤਿ (ਸੀ. ਪੀ.)] ਨਾਗਰਾਜਾ, ਕਥਂ ਵਿਜਾਨੇਮੁ ਗਤਿਂ ਗਜਸ੍ਸ.

੧੧੨. ਤਤ੍ਥੇਵ ਸਾ ਪੋਕ੍ਖਰਣੀ ਅਦੂਰੇ [ਅਵਿਦੂਰੇ (ਸ੍ਯਾ. ਕ.)], ਰਮ੍ਮਾ ਸੁਤਿਤ੍ਥਾ ਚ ਮਹੋਦਿਕਾ [ਮਹੋਦਕਾ (ਸ੍ਯਾ. ਕ.)] ਚ;

ਸਮ੍ਪੁਪ੍ਫਿਤਾ ਭਮਰਗਣਾਨੁਚਿਣ੍ਣਾ [ਕਿਣ੍ਣਾ (ਕਤ੍ਥਚਿ)], ਏਤ੍ਥ ਹਿ ਸੋ ਨ੍ਹਾਯਤਿ ਨਾਗਰਾਜਾ.

੧੧੩. ਸੀਸਂ ਨਹਾਤੁਪ੍ਪਲ [ਨਹਾਤੋ ਉਪ੍ਪਲ (ਸੀ. ਸ੍ਯਾ. ਪੀ.)] ਮਾਲਭਾਰੀ, ਸਬ੍ਬਸੇਤੋ ਪੁਣ੍ਡਰੀਕਤ੍ਤਚਙ੍ਗੀ;

ਆਮੋਦਮਾਨੋ ਗਚ੍ਛਤਿ ਸਨ੍ਨਿਕੇਤਂ, ਪੁਰਕ੍ਖਤ੍ਵਾ ਮਹੇਸਿਂ ਸਬ੍ਬਭਦ੍ਦਂ.

੧੧੪. ਤਤ੍ਥੇਵ ਸੋ ਉਗ੍ਗਹੇਤ੍ਵਾਨ ਵਾਕ੍ਯਂ, ਆਦਾਯ ਤੂਣਿਞ੍ਚ ਧਨੁਞ੍ਚ ਲੁਦ੍ਦੋ;

ਵਿਤੁਰਿਯਤਿ [ਵਿਤੁਰਿਯ ਸੋ (ਸੀ. ਅਟ੍ਠ.)] ਸਤ੍ਤਗਿਰੀ ਬ੍ਰਹਨ੍ਤੇ, ਸੁਵਣ੍ਣਪਸ੍ਸਂ ਨਾਮ ਗਿਰਿਂ ਉਲ਼ਾਰਂ.

੧੧੫. ਆਰੁਯ੍ਹ ਸੇਲਂ ਭਵਨਂ ਕਿਨ੍ਨਰਾਨਂ, ਓਲੋਕਯੀ ਪਬ੍ਬਤਪਾਦਮੂਲਂ;

ਤਤ੍ਥਦ੍ਦਸਾ ਮੇਘਸਮਾਨਵਣ੍ਣਂ, ਨਿਗ੍ਰੋਧਰਾਜਂ ਅਟ੍ਠਸਹਸ੍ਸਪਾਦਂ.

੧੧੬. ਤਤ੍ਥਦ੍ਦਸਾ ਕੁਞ੍ਜਰਂ ਛਬ੍ਬਿਸਾਣਂ, ਸਬ੍ਬਸੇਤਂ ਦੁਪ੍ਪਸਹਂ ਪਰੇਭਿ;

ਰਕ੍ਖਨ੍ਤਿ ਨਂ ਅਟ੍ਠਸਹਸ੍ਸਨਾਗਾ, ਈਸਾਦਨ੍ਤਾ ਵਾਤਜਵਪ੍ਪਹਾਰਿਨੋ.

੧੧੭. ਤਤ੍ਥਦ੍ਦਸਾ ਪੋਕ੍ਖਰਣਿਂ ਅਦੂਰੇ, ਰਮ੍ਮਂ ਸੁਤਿਤ੍ਥਞ੍ਚ ਮਹੋਦਿਕਞ੍ਚ;

ਸਮ੍ਪੁਪ੍ਫਿਤਂ ਭਮਰਗਣਾਨੁਚਿਣ੍ਣਂ, ਯਤ੍ਥ ਹਿ ਸੋ ਨ੍ਹਾਯਤਿ ਨਾਗਰਾਜਾ.

੧੧੮. ਦਿਸ੍ਵਾਨ ਨਾਗਸ੍ਸ ਗਤਿਂ ਠਿਤਿਞ੍ਚ, ਵੀਥਿਸ੍ਸ ਯਾ ਨ੍ਹਾਨਗਤਸ੍ਸ ਹੋਤਿ;

ਓਪਾਤਮਾਗਚ੍ਛਿ ਅਨਰਿਯਰੂਪੋ, ਪਯੋਜਿਤੋ ਚਿਤ੍ਤਵਸਾਨੁਗਾਯ.

੧੧੯. ਖਣਿਤ੍ਵਾਨ ਕਾਸੁਂ ਫਲਕੇਹਿ ਛਾਦਯਿ, ਅਤ੍ਤਾਨਮੋਧਾਯ ਧਨੁਞ੍ਚ ਲੁਦ੍ਦੋ;

ਪਸ੍ਸਾਗਤਂ ਪੁਥੁਸਲ੍ਲੇਨ ਨਾਗਂ, ਸਮਪ੍ਪਯੀ ਦੁਕ੍ਕਟਕਮ੍ਮਕਾਰੀ.

੧੨੦. ਵਿਦ੍ਧੋ ਚ ਨਾਗੋ ਕੋਞ੍ਚਮਨਾਦਿ ਘੋਰਂ, ਸਬ੍ਬੇ ਚ [ਸਬ੍ਬੇਵ (ਸੀ. ਸ੍ਯਾ. ਪੀ.)] ਨਾਗਾ ਨਿਨ੍ਨਦੁਂ [ਨਿਨ੍ਨਾਦੁ (ਸ੍ਯਾ.), ਨਿਨ੍ਨਾਦਂ (ਕ.)] ਘੋਰਰੂਪਂ;

ਤਿਣਞ੍ਚ ਕਟ੍ਠਞ੍ਚ ਰਣਂ [ਚੁਣ੍ਣਂ (ਕ. ਸੀ. ਪੀ.)] ਕਰੋਨ੍ਤਾ, ਧਾਵਿਂਸੁ ਤੇ ਅਟ੍ਠਦਿਸਾ ਸਮਨ੍ਤਤੋ.

੧੨੧. ਵਧਿਸ੍ਸਮੇਤਨ੍ਤਿ [ਵਧਿਸ੍ਸਮੇਨਨ੍ਤਿ (ਸ੍ਯਾ.)] ਪਰਾਮਸਨ੍ਤੋ, ਕਾਸਾਵਮਦ੍ਦਕ੍ਖਿ ਧਜਂ ਇਸੀਨਂ;

ਦੁਕ੍ਖੇਨ ਫੁਟ੍ਠਸ੍ਸੁਦਪਾਦਿ ਸਞ੍ਞਾ, ਅਰਹਦ੍ਧਜੋ ਸਬ੍ਭਿ ਅਵਜ੍ਝਰੂਪੋ.

੧੨੨. ਅਨਿਕ੍ਕਸਾਵੋ ਕਾਸਾਵਂ, ਯੋ ਵਤ੍ਥਂ ਪਰਿਦਹਿਸ੍ਸਤਿ [ਪਰਿਦਹੇਸ੍ਸਤਿ (ਸੀ. ਪੀ.), ਪਰਿਧਸ੍ਸਤਿ (ਕਤ੍ਥਚਿ)];

ਅਪੇਤੋ ਦਮਸਚ੍ਚੇਨ, ਨ ਸੋ ਕਾਸਾਵਮਰਹਤਿ.

੧੨੩. ਯੋ ਚ ਵਨ੍ਤਕਸਾਵਸ੍ਸ, ਸੀਲੇਸੁ ਸੁਸਮਾਹਿਤੋ;

ਉਪੇਤੋ ਦਮਸਚ੍ਚੇਨ, ਸ ਵੇ ਕਾਸਾਵਮਰਹਤਿ.

੧੨੪. ਸਮਪ੍ਪਿਤੋ ਪੁਥੁਸਲ੍ਲੇਨ ਨਾਗੋ, ਅਦੁਟ੍ਠਚਿਤ੍ਤੋ ਲੁਦ੍ਦਕਮਜ੍ਝਭਾਸਿ;

ਕਿਮਤ੍ਥਯਂ ਕਿਸ੍ਸ ਵਾ ਸਮ੍ਮ ਹੇਤੁ, ਮਮਂ ਵਧੀ ਕਸ੍ਸ ਵਾਯਂ ਪਯੋਗੋ.

੧੨੫. ਕਾਸਿਸ੍ਸ ਰਞ੍ਞੋ ਮਹੇਸੀ ਭਦਨ੍ਤੇ, ਸਾ ਪੂਜਿਤਾ ਰਾਜਕੁਲੇ ਸੁਭਦ੍ਦਾ;

ਤਂ ਅਦ੍ਦਸਾ ਸਾ ਚ ਮਮਂ ਅਸਂਸਿ, ਦਨ੍ਤੇਹਿ ਅਤ੍ਥੋਤਿ ਚ ਮਂ [ਅਤ੍ਥੋਤਿ ਮਮਂ (ਸ੍ਯਾ. ਕ.)] ਅਵੋਚ.

੧੨੬. ਬਹੂ ਹਿ ਮੇ ਦਨ੍ਤਯੁਗਾ ਉਲ਼ਾਰਾ, ਯੇ ਮੇ ਪਿਤੂਨਞ੍ਚ [ਪਿਤੁਨ੍ਨਮ੍ਪਿ (ਪੀ.)] ਪਿਤਾਮਹਾਨਂ;

ਜਾਨਾਤਿ ਸਾ ਕੋਧਨਾ ਰਾਜਪੁਤ੍ਤੀ, ਵਧਤ੍ਥਿਕਾ ਵੇਰਮਕਾਸਿ ਬਾਲਾ.

੧੨੭. ਉਟ੍ਠੇਹਿ ਤ੍ਵਂ ਲੁਦ੍ਦ ਖਰਂ ਗਹੇਤ੍ਵਾ, ਦਨ੍ਤੇ ਇਮੇ ਛਿਨ੍ਦ ਪੁਰਾ ਮਰਾਮਿ;

ਵਜ੍ਜਾਸਿ ਤਂ ਕੋਧਨਂ ਰਾਜਪੁਤ੍ਤਿਂ, ‘‘ਨਾਗੋ ਹਤੋ ਹਨ੍ਦ ਇਮਸ੍ਸ ਦਨ੍ਤਾ’’.

੧੨੮. ਉਟ੍ਠਾਯ ਸੋ ਲੁਦ੍ਦੋ ਖਰਂ ਗਹੇਤ੍ਵਾ, ਛੇਤ੍ਵਾਨ ਦਨ੍ਤਾਨਿ ਗਜੁਤ੍ਤਮਸ੍ਸ;

ਵਗ੍ਗੂ ਸੁਭੇ ਅਪ੍ਪਟਿਮੇ ਪਥਬ੍ਯਾ, ਆਦਾਯ ਪਕ੍ਕਾਮਿ ਤਤੋ ਹਿ ਖਿਪ੍ਪਂ.

੧੨੯. ਭਯਟ੍ਟਿਤਾ [ਭਯਦ੍ਦਿਤਾ (ਸੀ. ਪੀ.)] ਨਾਗਵਧੇਨ ਅਟ੍ਟਾ, ਯੇ ਤੇ ਨਾਗਾ ਅਟ੍ਠ ਦਿਸਾ ਵਿਧਾਵੁਂ;

ਅਦਿਸ੍ਵਾਨ [ਅਦਿਸ੍ਵ (ਸੀ. ਪੀ.)] ਪੋਸਂ ਗਜਪਚ੍ਚਮਿਤ੍ਤਂ, ਪਚ੍ਚਾਗਮੁਂ ਯੇਨ ਸੋ ਨਾਗਰਾਜਾ.

੧੩੦. ਤੇ ਤਤ੍ਥ ਕਨ੍ਦਿਤ੍ਵਾ ਰੋਦਿਤ੍ਵਾਨ [ਰੋਦਿਤ੍ਵ (ਸੀ. ਪੀ.)] ਨਾਗਾ, ਸੀਸੇ ਸਕੇ ਪਂਸੁਕਂ ਓਕਿਰਿਤ੍ਵਾ;

ਅਗਮਂਸੁ ਤੇ ਸਬ੍ਬੇ ਸਕਂ ਨਿਕੇਤਂ, ਪੁਰਕ੍ਖਤ੍ਵਾ ਮਹੇਸਿਂ ਸਬ੍ਬਭਦ੍ਦਂ.

੧੩੧. ਆਦਾਯ ਦਨ੍ਤਾਨਿ ਗਜੁਤ੍ਤਮਸ੍ਸ, ਵਗ੍ਗੂ ਸੁਭੇ ਅਪ੍ਪਟਿਮੇ ਪਥਬ੍ਯਾ;

ਸੁਵਣ੍ਣਰਾਜੀਹਿ ਸਮਨ੍ਤਮੋਦਰੇ, ਸੋ ਲੁਦ੍ਦਕੋ ਕਾਸਿਪੁਰਂ ਉਪਾਗਮਿ;

ਉਪਨੇਸਿ ਸੋ ਰਾਜਕਞ੍ਞਾਯ ਦਨ੍ਤੇ, ਨਾਗੋ ਹਤੋ ਹਨ੍ਦ ਇਮਸ੍ਸ ਦਨ੍ਤਾ.

੧੩੨. ਦਿਸ੍ਵਾਨ ਦਨ੍ਤਾਨਿ ਗਜੁਤ੍ਤਮਸ੍ਸ, ਭਤ੍ਤੁਪ੍ਪਿਯਸ੍ਸ ਪੁਰਿਮਾਯ ਜਾਤਿਯਾ;

ਤਤ੍ਥੇਵ ਤਸ੍ਸਾ ਹਦਯਂ ਅਫਾਲਿ, ਤੇਨੇਵ ਸਾ ਕਾਲਮਕਾਸਿ ਬਾਲਾ.

੧੩੩. ਸਮ੍ਬੋਧਿਪਤ੍ਤੋ ਸ [ਚ (ਸੀ. ਸ੍ਯਾ.), ਵ (ਪੀ.)] ਮਹਾਨੁਭਾਵੋ, ਸਿਤਂ ਅਕਾਸਿ ਪਰਿਸਾਯ ਮਜ੍ਝੇ;

ਪੁਚ੍ਛਿਂਸੁ ਭਿਕ੍ਖੂ ਸੁਵਿਮੁਤ੍ਤਚਿਤ੍ਤਾ, ਨਾਕਾਰਣੇ ਪਾਤੁਕਰੋਨ੍ਤਿ ਬੁਦ੍ਧਾ.

੧੩੪. ਯਮਦ੍ਦਸਾਥ ਦਹਰਿਂ ਕੁਮਾਰਿਂ, ਕਾਸਾਯਵਤ੍ਥਂ ਅਨਗਾਰਿਯਂ ਚਰਨ੍ਤਿਂ;

ਸਾ ਖੋ ਤਦਾ ਰਾਜਕਞ੍ਞਾ ਅਹੋਸਿ, ਅਹਂ ਤਦਾ ਨਾਗਰਾਜਾ ਅਹੋਸਿਂ.

੧੩੫. ਆਦਾਯ ਦਨ੍ਤਾਨਿ ਗਜੁਤ੍ਤਮਸ੍ਸ, ਵਗ੍ਗੂ ਸੁਭੇ ਅਪ੍ਪਟਿਮੇ ਪਥਬ੍ਯਾ;

ਯੋ ਲੁਦ੍ਦਕੋ ਕਾਸਿਪੁਰਂ ਉਪਾਗਮਿ, ਸੋ ਖੋ ਤਦਾ ਦੇਵਦਤ੍ਤੋ ਅਹੋਸਿ.

੧੩੬. ਅਨਾਵਸੂਰਂ ਚਿਰਰਤ੍ਤਸਂਸਿਤਂ, ਉਚ੍ਚਾਵਚਂ [ਉਚਂ ਨੀਚਂ (ਸੀ. ਸ੍ਯਾ. ਪੀ.)] ਚਰਿਤਮਿਦਂ ਪੁਰਾਣਂ;

ਵੀਤਦ੍ਦਰੋ ਵੀਤਸੋਕੋ ਵਿਸਲ੍ਲੋ, ਸਯਂ ਅਭਿਞ੍ਞਾਯ ਅਭਾਸਿ ਬੁਦ੍ਧੋ.

੧੩੭. ਅਹਂ ਵੋ ਤੇਨ ਕਾਲੇਨ, ਅਹੋਸਿਂ ਤਤ੍ਥ ਭਿਕ੍ਖਵੋ;

ਨਾਗਰਾਜਾ ਤਦਾ ਹੋਮਿ [ਹੋਸਿਂ (ਸੀ. ਸ੍ਯਾ. ਪੀ.)], ਏਵਂ ਧਾਰੇਥ ਜਾਤਕਨ੍ਤਿ.

ਛਦ੍ਦਨ੍ਤਜਾਤਕਂ ਚਤੁਤ੍ਥਂ.