੫੧੩. ਜਯਦ੍ਦਿਸਜਾਤਕਂ (੩)

੬੪. ਚਿਰਸ੍ਸਂ ਵਤ ਮੇ ਉਦਪਾਦਿ ਅਜ੍ਜ, ਭਕ੍ਖੋ ਮਹਾ ਸਤ੍ਤਮਿਭਤ੍ਤਕਾਲੇ;

ਕੁਤੋਸਿ ਕੋ ਵਾਸਿ ਤਦਿਙ੍ਘ ਬ੍ਰੂਹਿ, ਆਚਿਕ੍ਖ ਜਾਤਿਂ ਵਿਦਿਤੋ ਯਥਾਸਿ.

੬੫. ਪਞ੍ਚਾਲਰਾਜਾ ਮਿਗਵਂ ਪਵਿਟ੍ਠੋ, ਜਯਦ੍ਦਿਸੋ ਨਾਮ ਯਦਿਸ੍ਸੁਤੋ ਤੇ;

ਚਰਾਮਿ ਕਚ੍ਛਾਨਿ ਵਨਾਨਿ ਚਾਹਂ, ਪਸਦਂ ਇਮਂ ਖਾਦ ਮਮਜ੍ਜ ਮੁਞ੍ਚ.

੬੬. ਸੇਨੇਵ ਤ੍ਵਂ ਪਣਸਿ ਸਸ੍ਸਮਾਨੋ [ਸਯ੍ਹਮਾਨੋ (ਸ੍ਯਾ. ਕ.)], ਮਮੇਸ ਭਕ੍ਖੋ ਪਸਦੋ ਯਂ ਵਦੇਸਿ;

ਤਂ ਖਾਦਿਯਾਨ ਪਸਦਂ ਜਿਘਞ੍ਞਂ [ਜਿਘਚ੍ਛਂ (?)], ਖਾਦਿਸ੍ਸਂ ਪਚ੍ਛਾ ਨ ਵਿਲਾਪਕਾਲੋ.

੬੭. ਨ ਚਤ੍ਥਿ ਮੋਕ੍ਖੋ ਮਮ ਨਿਕ੍ਕਯੇਨ [ਵਿਕ੍ਕਯੇਨ (ਸੀ.)], ਗਨ੍ਤ੍ਵਾਨ ਪਚ੍ਚਾਗਮਨਾਯ ਪਣ੍ਹੇ;

ਤਂ ਸਙ੍ਕਰਂ [ਸਙ੍ਗਰਂ (ਸੀ. ਸ੍ਯਾ. ਪੀ.)] ਬ੍ਰਾਹ੍ਮਣਸ੍ਸਪ੍ਪਦਾਯ, ਸਚ੍ਚਾਨੁਰਕ੍ਖੀ ਪੁਨਰਾਵਜਿਸ੍ਸਂ.

੬੮. ਕਿਂ ਕਮ੍ਮਜਾਤਂ ਅਨੁਤਪ੍ਪਤੇ ਤ੍ਵਂ [ਅਨੁਤਪ੍ਪਤੀ ਤਂ (ਸੀ. ਪੀ.)], ਪਤ੍ਤਂ ਸਮੀਪਂ ਮਰਣਸ੍ਸ ਰਾਜ;

ਆਚਿਕ੍ਖ ਮੇ ਤਂ ਅਪਿ ਸਕ੍ਕੁਣੇਮੁ, ਅਨੁਜਾਨਿਤੁਂ ਆਗਮਨਾਯ ਪਣ੍ਹੇ.

੬੯. ਕਤਾ ਮਯਾ ਬ੍ਰਾਹ੍ਮਣਸ੍ਸ ਧਨਾਸਾ, ਤਂ ਸਙ੍ਕਰਂ ਪਟਿਮੁਕ੍ਕਂ ਨ ਮੁਤ੍ਤਂ;

ਤਂ ਸਙ੍ਕਰਂ ਬ੍ਰਾਹ੍ਮਣਸ੍ਸਪ੍ਪਦਾਯ, ਸਚ੍ਚਾਨੁਰਕ੍ਖੀ ਪੁਨਰਾਵਜਿਸ੍ਸਂ.

੭੦. ਯਾ ਤੇ ਕਤਾ ਬ੍ਰਾਹ੍ਮਣਸ੍ਸ ਧਨਾਸਾ, ਤਂ ਸਙ੍ਕਰਂ ਪਟਿਮੁਕ੍ਕਂ ਨ ਮੁਤ੍ਤਂ;

ਤਂ ਸਙ੍ਕਰਂ ਬ੍ਰਾਹ੍ਮਣਸ੍ਸਪ੍ਪਦਾਯ, ਸਚ੍ਚਾਨੁਰਕ੍ਖੀ ਪੁਨਰਾਵਜਸ੍ਸੁ.

੭੧. ਮੁਤ੍ਤੋ ਚ ਸੋ ਪੋਰਿਸਾਦਸ੍ਸ [ਪੁਰਿਸਾਦਸ੍ਸ (ਪੀ.)] ਹਤ੍ਥਾ, ਗਨ੍ਤ੍ਵਾ ਸਕਂ ਮਨ੍ਦਿਰਂ ਕਾਮਕਾਮੀ;

ਤਂ ਸਙ੍ਕਰਂ ਬ੍ਰਾਹ੍ਮਣਸ੍ਸਪ੍ਪਦਾਯ, ਆਮਨ੍ਤਯੀ ਪੁਤ੍ਤਮਲੀਨਸਤ੍ਤਂ [ਸਤ੍ਤੁਂ (ਸ੍ਯਾ. ਪੀ. ਕ.)].

੭੨. ਅਜ੍ਜੇਵ ਰਜ੍ਜਂ ਅਭਿਸਿਞ੍ਚਯਸ੍ਸੁ, ਧਮ੍ਮਂ ਚਰ ਸੇਸੁ ਪਰੇਸੁ ਚਾਪਿ;

ਅਧਮ੍ਮਕਾਰੋ ਚ ਤੇ ਮਾਹੁ ਰਟ੍ਠੇ, ਗਚ੍ਛਾਮਹਂ ਪੋਰਿਸਾਦਸ੍ਸ ਞਤ੍ਤੇ [ਞਨ੍ਤੇ (ਸ੍ਯਾ.)].

੭੩. ਕਿਂ ਕਮ੍ਮ ਕੁਬ੍ਬਂ ਤਵ ਦੇਵ ਪਾਵ [ਦੇਵਪਾਦੇ (ਸੀ. ਸ੍ਯਾ. ਪੀ.)], ਨਾਰਾਧਯੀ ਤਂ ਤਦਿਚ੍ਛਾਮਿ ਸੋਤੁਂ;

ਯਮਜ੍ਜ ਰਜ੍ਜਮ੍ਹਿ ਉਦਸ੍ਸਯੇ ਤੁਵਂ, ਰਜ੍ਜਮ੍ਪਿ ਨਿਚ੍ਛੇਯ੍ਯਂ ਤਯਾ ਵਿਨਾਹਂ.

੭੪. ਨ ਕਮ੍ਮੁਨਾ ਵਾ ਵਚਸਾ ਵ ਤਾਤ, ਅਪਰਾਧਿਤੋਹਂ ਤੁਵਿਯਂ ਸਰਾਮਿ;

ਸਨ੍ਧਿਞ੍ਚ [ਸਦ੍ਧਿਂ ਚ (ਕ.)] ਕਤ੍ਵਾ ਪੁਰਿਸਾਦਕੇਨ, ਸਚ੍ਚਾਨੁਰਕ੍ਖੀ ਪੁਨਾਹਂ ਗਮਿਸ੍ਸਂ.

੭੫. ਅਹਂ ਗਮਿਸ੍ਸਾਮਿ ਇਧੇਵ ਹੋਹਿ, ਨਤ੍ਥਿ ਤਤੋ ਜੀਵਤੋ ਵਿਪ੍ਪਮੋਕ੍ਖੋ;

ਸਚੇ ਤੁਵਂ ਗਚ੍ਛਸਿਯੇਵ ਰਾਜ, ਅਹਮ੍ਪਿ ਗਚ੍ਛਾਮਿ ਉਭੋ ਨ ਹੋਮ.

੭੬. ਅਦ੍ਧਾ ਹਿ ਤਾਤ ਸਤਾਨੇਸ ਧਮ੍ਮੋ, ਮਰਣਾ ਚ ਮੇ ਦੁਕ੍ਖਤਰਂ ਤਦਸ੍ਸ;

ਕਮ੍ਮਾਸਪਾਦੋ ਤਂ ਯਦਾ ਪਚਿਤ੍ਵਾ, ਪਸਯ੍ਹ ਖਾਦੇ ਭਿਦਾ ਰੁਕ੍ਖਸੂਲੇ.

੭੭. ਪਾਣੇਨ ਤੇ ਪਾਣਮਹਂ ਨਿਮਿਸ੍ਸਂ, ਮਾ ਤ੍ਵਂ ਅਗਾ ਪੋਰਿਸਾਦਸ੍ਸ ਞਤ੍ਤੇ;

ਏਤਞ੍ਚ ਤੇ ਪਾਣਮਹਂ ਨਿਮਿਸ੍ਸਂ, ਤਸ੍ਮਾ ਮਤਂ ਜੀਵਿਤਸ੍ਸ ਵਣ੍ਣੇਮਿ [ਵਰੇਮਿ (ਸੀ.)].

੭੮. ਤਤੋ ਹਵੇ ਧਿਤਿਮਾ ਰਾਜਪੁਤ੍ਤੋ, ਵਨ੍ਦਿਤ੍ਵਾ ਮਾਤੁ ਚ ਪਿਤੁ ਚ [ਵਨ੍ਦਿਤ੍ਥ ਮਾਤੁਚ੍ਚ ਪਿਤੁਚ੍ਚ (ਸੀ. ਪੀ.)] ਪਾਦੇ;

ਦੁਖਿਨਿਸ੍ਸ ਮਾਤਾ ਨਿਪਤਾ [ਨਿਪਤੀ (ਸੀ. ਪੀ.)] ਪਥਬ੍ਯਾ, ਪਿਤਾਸ੍ਸ ਪਗ੍ਗਯ੍ਹ ਭੁਜਾਨਿ ਕਨ੍ਦਤਿ.

੭੯. ਤਂ ਗਚ੍ਛਨ੍ਤਂ ਤਾਵ ਪਿਤਾ ਵਿਦਿਤ੍ਵਾ, ਪਰਮ੍ਮੁਖੋ ਵਨ੍ਦਤਿ ਪਞ੍ਜਲੀਕੋ;

ਸੋਮੋ ਚ ਰਾਜਾ ਵਰੁਣੋ ਚ ਰਾਜਾ, ਪਜਾਪਤੀ ਚਨ੍ਦਿਮਾ ਸੂਰਿਯੋ ਚ;

ਏਤੇਹਿ ਗੁਤ੍ਤੋ ਪੁਰਿਸਾਦਕਮ੍ਹਾ, ਅਨੁਞ੍ਞਾਤੋ ਸੋਤ੍ਥਿ ਪਚ੍ਚੇਹਿ ਤਾਤ.

੮੦. ਯਂ ਦਣ੍ਡਕਿਰਞ੍ਞੋ ਗਤਸ੍ਸ [ਯਂ ਦਣ੍ਡਕਾਰਞ੍ਞਗਤਸ੍ਸ (ਪੀ.)] ਮਾਤਾ, ਰਾਮਸ੍ਸਕਾਸਿ ਸੋਤ੍ਥਾਨਂ ਸੁਗੁਤ੍ਤਾ;

ਤਂ ਤੇ ਅਹਂ ਸੋਤ੍ਥਾਨਂ ਕਰੋਮਿ, ਏਤੇਨ ਸਚ੍ਚੇਨ ਸਰਨ੍ਤੁ ਦੇਵਾ;

ਅਨੁਞ੍ਞਾਤੋ ਸੋਤ੍ਥਿ ਪਚ੍ਚੇਹਿ ਪੁਤ੍ਤ.

੮੧. ਆਵੀ ਰਹੋ ਵਾਪੀ ਮਨੋਪਦੋਸਂ, ਨਾਹਂ ਸਰੇ ਜਾਤੁ ਮਲੀਨਸਤ੍ਤੇ;

ਏਤੇਨ ਸਚ੍ਚੇਨ ਸਰਨ੍ਤੁ ਦੇਵਾ, ਅਨੁਞ੍ਞਾਤੋ ਸੋਤ੍ਥਿ ਪਚ੍ਚੇਹਿ ਭਾਤਿਕ [ਭਾਤ (ਸੀ.), ਭਾਤਾ (ਸ੍ਯਾ. ਪੀ.)].

੮੨. ਯਸ੍ਮਾ ਚ ਮੇ ਅਨਧਿਮਨੋਸਿ ਸਾਮਿ, ਨ ਚਾਪਿ ਮੇ ਮਨਸਾ ਅਪ੍ਪਿਯੋਸਿ;

ਏਤੇਨ ਸਚ੍ਚੇਨ ਸਰਨ੍ਤੁ ਦੇਵਾ, ਅਨੁਞ੍ਞਾਤੋ ਸੋਤ੍ਥਿ ਪਚ੍ਚੇਹਿ ਸਾਮਿ.

੮੩. ਬ੍ਰਹਾ ਉਜੂ ਚਾਰੁਮੁਖੋ ਕੁਤੋਸਿ, ਨ ਮਂ ਪਜਾਨਾਸਿ ਵਨੇ ਵਸਨ੍ਤਂ;

ਲੁਦ੍ਦਂ ਮਂ ਞਤ੍ਵਾ ‘‘ਪੁਰਿਸਾਦਕੋ’’ਤਿ, ਕੋ ਸੋਤ੍ਥਿ ਮਾਜਾਨਮਿਧਾ’ਵਜੇਯ੍ਯ.

੮੪. ਜਾਨਾਮਿ ਲੁਦ੍ਦ ਪੁਰਿਸਾਦਕੋ ਤ੍ਵਂ, ਨ ਤਂ ਨ ਜਾਨਾਮਿ ਵਨੇ ਵਸਨ੍ਤਂ;

ਅਹਞ੍ਚ ਪੁਤ੍ਤੋਸ੍ਮਿ ਜਯਦ੍ਦਿਸਸ੍ਸ, ਮਮਜ੍ਜ ਖਾਦ ਪਿਤੁਨੋ ਪਮੋਕ੍ਖਾ.

੮੫. ਜਾਨਾਮਿ ਪੁਤ੍ਤੋਤਿ [ਪੁਤ੍ਤੋਸਿ (ਸ੍ਯਾ. ਕ.)] ਜਯਦ੍ਦਿਸਸ੍ਸ, ਤਥਾ ਹਿ ਵੋ ਮੁਖਵਣ੍ਣੋ ਉਭਿਨ੍ਨਂ;

ਸੁਦੁਕ੍ਕਰਞ੍ਞੇਵ [ਸੁਦੁਕ੍ਕਰਞ੍ਚੇਵ (ਸ੍ਯਾ. ਪੀ. ਕ.)] ਕਤਂ ਤਵੇਦਂ, ਯੋ ਮਤ੍ਤੁਮਿਚ੍ਛੇ ਪਿਤੁਨੋ ਪਮੋਕ੍ਖਾ.

੮੬. ਨ ਦੁਕ੍ਕਰਂ ਕਿਞ੍ਚਿ ਮਹੇਤ੍ਥ ਮਞ੍ਞੇ, ਯੋ ਮਤ੍ਤੁਮਿਚ੍ਛੇ ਪਿਤੁਨੋ ਪਮੋਕ੍ਖਾ;

ਮਾਤੁ ਚ [ਮਾਤੁਚ੍ਚ (ਸੀ.)] ਹੇਤੁ ਪਰਲੋਕ ਗਨ੍ਤ੍ਵਾ [ਗਮ੍ਯਾ (ਸੀ. ਸ੍ਯਾ.), ਗਮ੍ਯ (ਪੀ.)], ਸੁਖੇਨ ਸਗ੍ਗੇਨ ਚ ਸਮ੍ਪਯੁਤ੍ਤੋ.

੮੭. ਅਹਞ੍ਚ ਖੋ ਅਤ੍ਤਨੋ ਪਾਪਕਿਰਿਯਂ, ਆਵੀ ਰਹੋ ਵਾਪਿ ਸਰੇ ਨ ਜਾਤੁ;

ਸਙ੍ਖਾਤਜਾਤੀਮਰਣੋਹਮਸ੍ਮਿ, ਯਥੇਵ ਮੇ ਇਧ ਤਥਾ ਪਰਤ੍ਥ.

੮੮. ਖਾਦਜ੍ਜ ਮਂ ਦਾਨਿ ਮਹਾਨੁਭਾਵ, ਕਰਸ੍ਸੁ ਕਿਚ੍ਚਾਨਿ ਇਮਂ ਸਰੀਰਂ;

ਰੁਕ੍ਖਸ੍ਸ ਵਾ ਤੇ ਪਪਤਾਮਿ ਅਗ੍ਗਾ, ਛਾਦਯਮਾਨੋ ਮਯ੍ਹਂ ਤ੍ਵਮਦੇਸਿ ਮਂਸਂ.

੮੯. ਇਦਞ੍ਚ ਤੇ ਰੁਚ੍ਚਤਿ ਰਾਜਪੁਤ੍ਤ, ਚਜੇਸਿ [ਚਜਾਸਿ (ਸੀ. ਪੀ.)] ਪਾਣਂ ਪਿਤੁਨੋ ਪਮੋਕ੍ਖਾ;

ਤਸ੍ਮਾ ਹਿ ਸੋ [ਤਸ੍ਮਾਤਿਹ (ਸੀ. ਸ੍ਯਾ.)] ਤ੍ਵਂ ਤਰਮਾਨਰੂਪੋ, ਸਮ੍ਭਞ੍ਜ ਕਟ੍ਠਾਨਿ ਜਲੇਹਿ ਅਗ੍ਗਿਂ.

੯੦. ਤਤੋ ਹਵੇ ਧਿਤਿਮਾ ਰਾਜਪੁਤ੍ਤੋ, ਦਾਰੁਂ ਸਮਾਹਤ੍ਵਾ ਮਹਨ੍ਤਮਗ੍ਗਿਂ;

ਸਨ੍ਦੀਪਯਿਤ੍ਵਾ ਪਟਿਵੇਦਯਿਤ੍ਥ, ਆਦੀਪਿਤੋ ਦਾਨਿ ਮਹਾਯਮਗ੍ਗਿ [ਮਯਾ ਯਕ੍ਖਮਗ੍ਗਿ (ਕ.)].

੯੧. ਖਾਦਜ੍ਜ ਮਂ ਦਾਨਿ ਪਸਯ੍ਹਕਾਰੀ, ਕਿਂ ਮਂ ਮੁਹੁਂ ਪੇਕ੍ਖਸਿ ਹਟ੍ਠਲੋਮੋ;

ਤਥਾ ਤਥਾ ਤੁਯ੍ਹਮਹਂ ਕਰੋਮਿ, ਯਥਾ ਯਥਾ ਮਂ ਛਾਦਯਮਾਨੋ ਅਦੇਸਿ.

੯੨. ਕੋ ਤਾਦਿਸਂ ਅਰਹਤਿ ਖਾਦਿਤਾਯੇ, ਧਮ੍ਮੇ ਠਿਤਂ ਸਚ੍ਚਵਾਦਿਂ ਵਦਞ੍ਞੁਂ;

ਮੁਦ੍ਧਾਪਿ ਤਸ੍ਸ ਵਿਫਲੇਯ੍ਯ ਸਤ੍ਤਧਾ, ਯੋ ਤਾਦਿਸਂ ਸਚ੍ਚਵਾਦਿਂ ਅਦੇਯ੍ਯ.

੯੩. ਇਦਞ੍ਹਿ ਸੋ ਬ੍ਰਾਹ੍ਮਣਂ ਮਞ੍ਞਮਾਨੋ, ਸਸੋ ਅਵਾਸੇਸਿ ਸਕੇ ਸਰੀਰੇ;

ਤੇਨੇਵ ਸੋ ਚਨ੍ਦਿਮਾ ਦੇਵਪੁਤ੍ਤੋ, ਸਸਤ੍ਥੁਤੋ [ਸਸਟ੍ਠਕੋ (ਸ੍ਯਾ.)] ਕਾਮਦੁਹਜ੍ਜ [ਕਾਮਰੁਹਜ੍ਜ (ਕ.)] ਯਕ੍ਖ.

੯੪. ਚਨ੍ਦੋ ਯਥਾ ਰਾਹੁਮੁਖਾ ਪਮੁਤ੍ਤੋ, ਵਿਰੋਚਤੇ ਪਨ੍ਨਰਸੇਵ ਭਾਣੁਮਾ [ਭਾਨੁਮਾ (ਸੀ. ਪੀ.)];

ਏਵਂ ਤੁਵਂ ਪੋਰਿਸਾਦਾ ਪਮੁਤ੍ਤੋ, ਵਿਰੋਚ ਕਪਿਲੇ [ਕਮ੍ਪਿਲ੍ਲ (ਸੀ. ਪੀ.), ਕਪਿਲ੍ਲੇ (ਸ੍ਯਾ.)] ਮਹਾਨੁਭਾਵ;

ਆਮੋਦਯਂ ਪਿਤਰਂ ਮਾਤਰਞ੍ਚ, ਸਬ੍ਬੋ ਚ ਤੇ ਨਨ੍ਦਤੁ ਞਾਤਿਪਕ੍ਖੋ.

੯੫. ਤਤੋ ਹਵੇ ਧਿਤਿਮਾ ਰਾਜਪੁਤ੍ਤੋ, ਕਤਞ੍ਜਲੀ ਪਰਿਯਾਯ [ਪਰਿਯਗਾ (ਸੀ.), ਪਗ੍ਗਯ੍ਹ (ਸ੍ਯਾ. ਪੀ.)] ਪੋਰਿਸਾਦਂ;

ਅਨੁਞ੍ਞਾਤੋ ਸੋਤ੍ਥਿ ਸੁਖੀ ਅਰੋਗੋ, ਪਚ੍ਚਾਗਮਾ [ਪਚ੍ਚਾਗ (ਪੀ.)] ਕਪਿਲਮਲੀਨਸਤ੍ਤਾ [ਕਮ੍ਪਿਲ੍ਲ’ਮਲੀਨਸਤ੍ਤੋ (ਸੀ. ਪੀ.), ਕਪਿਲ’ਮਲੀਨਸਤ੍ਤਾ (ਕ.)].

੯੬. ਤਂ ਨੇਗਮਾ ਜਾਨਪਦਾ ਚ ਸਬ੍ਬੇ, ਹਤ੍ਥਾਰੋਹਾ ਰਥਿਕਾ ਪਤ੍ਤਿਕਾ ਚ;

ਨਮਸ੍ਸਮਾਨਾ ਪਞ੍ਜਲਿਕਾ ਉਪਾਗਮੁਂ, ਨਮਤ੍ਥੁ ਤੇ ਦੁਕ੍ਕਰਕਾਰਕੋਸੀਤਿ.

ਜਯਦ੍ਦਿਸਜਾਤਕਂ [ਜਯਦਿਸਜਾਤਕਂ (ਕ.)] ਤਤਿਯਂ.