੫੦੮. ਪਞ੍ਚਪਣ੍ਡਿਤਜਾਤਕਂ (੧੨)

੩੧੫. ਪਞ੍ਚ ਪਣ੍ਡਿਤਾ ਸਮਾਗਤਾਤ੍ਥ, ਪਞ੍ਹਾ ਮੇ ਪਟਿਭਾਤਿ ਤਂ ਸੁਣਾਥ;

ਨਿਨ੍ਦਿਯਮਤ੍ਥਂ ਪਸਂਸਿਯਂ ਵਾ, ਕਸ੍ਸੇਵਾਵਿਕਰੇਯ੍ਯ [ਕਸ੍ਸ ਵਾਵੀਕਰੇਯ੍ਯ (ਕ.)] ਗੁਯ੍ਹਮਤ੍ਥਂ.

੩੧੬. ਤ੍ਵਂ ਆਵਿਕਰੋਹਿ ਭੂਮਿਪਾਲ, ਭਤ੍ਤਾ ਭਾਰਸਹੋ ਤੁਵਂ ਵਦੇ ਤਂ;

ਤਵ ਛਨ੍ਦਰੁਚੀਨਿ [ਛਨ੍ਦਞ੍ਚ ਰੁਚਿਞ੍ਚ (ਸੀ. ਪੀ.)] ਸਮ੍ਮਸਿਤ੍ਵਾ, ਅਥ ਵਕ੍ਖਨ੍ਤਿ ਜਨਿਨ੍ਦ ਪਞ੍ਚ ਧੀਰਾ.

੩੧੭. ਯਾ ਸੀਲਵਤੀ ਅਨਞ੍ਞਥੇਯ੍ਯਾ [ਅਨਞ੍ਞਧੇਯ੍ਯਾ (ਸੀ. ਪੀ.)], ਭਤ੍ਤੁਚ੍ਛਨ੍ਦਵਸਾਨੁਗਾ (ਪਿਯਾ) [( ) ਨਤ੍ਥਿ ਸੀ. ਪੀ. ਪੋਤ੍ਥਕੇਸੁ] ਮਨਾਪਾ;

ਨਿਨ੍ਦਿਯਮਤ੍ਥਂ ਪਸਂਸਿਯਂ ਵਾ, ਭਰਿਯਾਯਾਵਿਕਰੇਯ੍ਯ [ਭਰਿਯਾਯ ਵਾਵੀਕਰੇਯ੍ਯ (ਕ.)] ਗੁਯ੍ਹਮਤ੍ਥਂ.

੩੧੮. ਯੋ ਕਿਚ੍ਛਗਤਸ੍ਸ ਆਤੁਰਸ੍ਸ, ਸਰਣਂ ਹੋਤਿ ਗਤੀ ਪਰਾਯਨਞ੍ਚ;

ਨਿਨ੍ਦਿਯਮਤ੍ਥਂ ਪਸਂਸਿਯਂ ਵਾ, ਸਖਿਨੋ ਵਾਵਿਕਰੇਯ੍ਯ ਗੁਯ੍ਹਮਤ੍ਥਂ.

੩੧੯. ਜੇਟ੍ਠੋ [ਯੋ ਜੇਟ੍ਠੋ (ਸ੍ਯਾ.)] ਅਥ ਮਜ੍ਝਿਮੋ ਕਨਿਟ੍ਠੋ, ਯੋ [ਸੋ (ਸੀ. ਸ੍ਯਾ. ਪੀ.)] ਚੇ ਸੀਲਸਮਾਹਿਤੋ ਠਿਤਤ੍ਤੋ;

ਨਿਨ੍ਦਿਯਮਤ੍ਥਂ ਪਸਂਸਿਯਂ ਵਾ, ਭਾਤੁ ਵਾਵੀਕਰੇਯ੍ਯ ਗੁਯ੍ਹਮਤ੍ਥਂ.

੩੨੦. ਯੋ ਵੇ ਪਿਤੁਹਦਯਸ੍ਸ ਪਦ੍ਧਗੂ [ਪਤ੍ਥਗੂ (ਸ੍ਯਾ.), ਪਤ੍ਤਗੂ (ਕ.)], ਅਨੁਜਾਤੋ ਪਿਤਰਂ ਅਨੋਮਪਞ੍ਞੋ;

ਨਿਨ੍ਦਿਯਮਤ੍ਥਂ ਪਸਂਸਿਯਂ ਵਾ, ਪੁਤ੍ਤਸ੍ਸਾਵਿਕਰੇਯ੍ਯ [ਪੁਤ੍ਤਸ੍ਸ ਵਾਵੀਕਰੇਯ੍ਯ (ਕ.)] ਗੁਯ੍ਹਮਤ੍ਥਂ.

੩੨੧. ਮਾਤਾ ਦ੍ਵਿਪਦਾਜਨਿਨ੍ਦਸੇਟ੍ਠ, ਯਾ ਨਂ [ਯੋ ਤਂ (ਸੀ. ਪੀ.)] ਪੋਸੇਤਿ ਛਨ੍ਦਸਾ ਪਿਯੇਨ;

ਨਿਨ੍ਦਿਯਮਤ੍ਥਂ ਪਸਂਸਿਯਂ ਵਾ, ਮਾਤੁਯਾਵੀਕਰੇਯ੍ਯ [ਮਾਤੁਯਾ ਵਾਵੀਕਰੇਯ੍ਯ (ਕ.)] ਗੁਯ੍ਹਮਤ੍ਥਂ.

੩੨੨. ਗੁਯ੍ਹਸ੍ਸ ਹਿ ਗੁਯ੍ਹਮੇਵ ਸਾਧੁ, ਨ ਹਿ ਗੁਯ੍ਹਸ੍ਸ ਪਸਤ੍ਥਮਾਵਿਕਮ੍ਮਂ;

ਅਨਿਪ੍ਫਨ੍ਨਤਾ [ਅਨਿਪ੍ਫਾਦਾਯ (ਸੀ. ਪੀ.), ਅਨਿਪ੍ਫਨ੍ਨਤਾਯ (ਸ੍ਯਾ.), ਆ ਨਿਪ੍ਫਾਦਾ (?)] ਸਹੇਯ੍ਯ ਧੀਰੋ, ਨਿਪ੍ਫਨ੍ਨੋਵ [ਨਿਪ੍ਫਨ੍ਨਤ੍ਥੋ (ਸੀ. ਪੀ.), ਨਿਪ੍ਫਨ੍ਨਤ੍ਥੋਵ (ਸ੍ਯਾ.)] ਯਥਾਸੁਖਂ ਭਣੇਯ੍ਯ.

੩੨੩. ਕਿਂ ਤ੍ਵਂ ਵਿਮਨੋਸਿ ਰਾਜਸੇਟ੍ਠ, ਦ੍ਵਿਪਦਜਨਿਨ੍ਦ [ਦਿਪਦਿਨ੍ਦ (ਸੀ. ਸ੍ਯਾ. ਪੀ.)] ਵਚਨਂ ਸੁਣੋਮ ਮੇਤਂ [ਨੇਤਂ (ਸੀ. ਪੀ.), ਤੇਤਂ (ਸ੍ਯਾ.)];

ਕਿਂ ਚਿਨ੍ਤਯਮਾਨੋ ਦੁਮ੍ਮਨੋਸਿ, ਨੂਨ ਦੇਵ ਅਪਰਾਧੋ ਅਤ੍ਥਿ ਮਯ੍ਹਂ.

੩੨੪. ‘‘ਪਣ੍ਹੇ [ਪਞ੍ਞੋ (ਸੀ. ਪੀ.), ਪਞ੍ਹੇ (ਸ੍ਯਾ.), ਪਨ੍ਹੇ (ਕ.)] ਵਜ੍ਝੋ ਮਹੋਸਧੋ’’ਤਿ, ਆਣਤ੍ਤੋ ਮੇ ਵਧਾਯ ਭੂਰਿਪਞ੍ਞੋ;

ਤਂ ਚਿਨ੍ਤਯਮਾਨੋ ਦੁਮ੍ਮਨੋਸ੍ਮਿ, ਨ ਹਿ ਦੇਵੀ ਅਪਰਾਧੋ ਅਤ੍ਥਿ ਤੁਯ੍ਹਂ.

੩੨੫. ਅਭਿਦੋਸਗਤੋ ਦਾਨਿ ਏਹਿਸਿ, ਕਿਂ ਸੁਤ੍ਵਾ ਕਿਂ ਸਙ੍ਕਤੇ ਮਨੋ ਤੇ;

ਕੋ ਤੇ ਕਿਮਵੋਚ ਭੂਰਿਪਞ੍ਞ, ਇਙ੍ਘ ਵਚਨਂ ਸੁਣੋਮ ਬ੍ਰੂਹਿ ਮੇਤਂ.

੩੨੬. ‘‘ਪਣ੍ਹੇ ਵਜ੍ਝੋ ਮਹੋਸਧੋ’’ਤਿ, ਯਦਿ ਤੇ ਮਨ੍ਤਯਿਤਂ ਜਨਿਨ੍ਦ ਦੋਸਂ;

ਭਰਿਯਾਯ ਰਹੋਗਤੋ ਅਸਂਸਿ, ਗੁਯ੍ਹਂ ਪਾਤੁਕਤਂ ਸੁਤਂ ਮਮੇਤਂ.

੩੨੭. ਯਂ ਸਾਲਵਨਸ੍ਮਿਂ ਸੇਨਕੋ, ਪਾਪਕਮ੍ਮਂ ਅਕਾਸਿ ਅਸਬ੍ਭਿਰੂਪਂ;

ਸਖਿਨੋਵ ਰਹੋਗਤੋ ਅਸਂਸਿ, ਗੁਯ੍ਹਂ ਪਾਤੁਕਤਂ ਸੁਤਂ ਮਮੇਤਂ.

੩੨੮. ਪੁਕ੍ਕੁਸ [ਪਕ੍ਕੁਸ (ਕ.) ਜਾ. ੧.੭.੪੧ ਪਣ੍ਣਜਾਤਕੇ ਪਸ੍ਸਿਤਬ੍ਬਂ] ਪੁਰਿਸਸ੍ਸ ਤੇ ਜਨਿਨ੍ਦ, ਉਪ੍ਪਨ੍ਨੋ ਰੋਗੋ ਅਰਾਜਯੁਤ੍ਤੋ;

ਭਾਤੁਞ੍ਚ [ਭਾਤੁਚ੍ਚ (ਸੀ. ਪੀ.), ਭਾਤੁਵ (ਸ੍ਯਾ.)] ਰਹੋਗਤੋ ਅਸਂਸਿ, ਗੁਯ੍ਹਂ ਪਾਤੁਕਤਂ ਸੁਤਂ ਮਮੇਤਂ.

੩੨੯. ਆਬਾਧੋਯਂ ਅਸਬ੍ਭਿਰੂਪੋ, ਕਾਮਿਨ੍ਦੋ [ਕਾਵਿਨ੍ਦੋ (ਸੀ. ਪੀ.)] ਨਰਦੇਵੇਨ ਫੁਟ੍ਠੋ;

ਪੁਤ੍ਤਸ੍ਸ ਰਹੋਗਤੋ ਅਸਂਸਿ, ਗੁਯ੍ਹਂ ਪਾਤੁਕਤਂ ਸੁਤਂ ਮਮੇਤਂ.

੩੩੦. ਅਟ੍ਠਵਙ੍ਕਂ ਮਣਿਰਤਨਂ ਉਲ਼ਾਰਂ, ਸਕ੍ਕੋ ਤੇ ਅਦਦਾ ਪਿਤਾਮਹਸ੍ਸ;

ਦੇਵਿਨ੍ਦਸ੍ਸ ਗਤਂ ਤਦਜ੍ਜ ਹਤ੍ਥਂ [ਦੇਵਿਨ੍ਦਸ੍ਸ ਤਦਜ੍ਜ ਹਤ੍ਥਗਤਂ (ਕ.)], ਮਾਤੁਞ੍ਚ ਰਹੋਗਤੋ ਅਸਂਸਿ;

ਗੁਯ੍ਹਂ ਪਾਤੁਕਤਂ ਸੁਤਂ ਮਮੇਤਂ.

੩੩੧. ਗੁਯ੍ਹਸ੍ਸ ਹਿ ਗੁਯ੍ਹਮੇਵ ਸਾਧੁ, ਨ ਹਿ ਗੁਯ੍ਹਸ੍ਸ ਪਸਤ੍ਥਮਾਵਿਕਮ੍ਮਂ;

ਅਨਿਪ੍ਫਨ੍ਨਤਾ ਸਹੇਯ੍ਯ ਧੀਰੋ, ਨਿਪ੍ਫਨ੍ਨੋਵ ਯਥਾਸੁਖਂ ਭਣੇਯ੍ਯ.

੩੩੨. ਨ ਗੁਯ੍ਹਮਤ੍ਥਂ ਵਿਵਰੇਯ੍ਯ, ਰਕ੍ਖੇਯ੍ਯ ਨਂ ਯਥਾ ਨਿਧਿਂ;

ਨ ਹਿ ਪਾਤੁਕਤੋ ਸਾਧੁ, ਗੁਯ੍ਹੋ ਅਤ੍ਥੋ ਪਜਾਨਤਾ.

੩੩੩. ਥਿਯਾ ਗੁਯ੍ਹਂ ਨ ਸਂਸੇਯ੍ਯ, ਅਮਿਤ੍ਤਸ੍ਸ ਚ ਪਣ੍ਡਿਤੋ;

ਯੋ ਚਾਮਿਸੇਨ ਸਂਹੀਰੋ, ਹਦਯਤ੍ਥੇਨੋ ਚ ਯੋ ਨਰੋ.

੩੩੪. ਗੁਯ੍ਹਮਤ੍ਥਂ ਅਸਮ੍ਬੁਦ੍ਧਂ, ਸਮ੍ਬੋਧਯਤਿ ਯੋ ਨਰੋ;

ਮਨ੍ਤਭੇਦਭਯਾ ਤਸ੍ਸ, ਦਾਸਭੂਤੋ ਤਿਤਿਕ੍ਖਤਿ.

੩੩੫. ਯਾਵਨ੍ਤੋ ਪੁਰਿਸਸ੍ਸਤ੍ਥਂ, ਗੁਯ੍ਹਂ ਜਾਨਨ੍ਤਿ ਮਨ੍ਤਿਨਂ;

ਤਾਵਨ੍ਤੋ ਤਸ੍ਸ ਉਬ੍ਬੇਗਾ, ਤਸ੍ਮਾ ਗੁਯ੍ਹਂ ਨ ਵਿਸ੍ਸਜੇ.

੩੩੬. ਵਿਵਿਚ੍ਚ ਭਾਸੇਯ੍ਯ ਦਿਵਾ ਰਹਸ੍ਸਂ, ਰਤ੍ਤਿਂ ਗਿਰਂ ਨਾਤਿਵੇਲਂ ਪਮੁਞ੍ਚੇ;

ਉਪਸ੍ਸੁਤਿਕਾ ਹਿ ਸੁਣਨ੍ਤਿ ਮਨ੍ਤਂ, ਤਸ੍ਮਾ ਮਨ੍ਤੋ ਖਿਪ੍ਪਮੁਪੇਤਿ ਭੇਦਨ੍ਤਿ.

ਪਞ੍ਚਪਣ੍ਡਿਤਜਾਤਕਂ ਦ੍ਵਾਦਸਮਂ.