੧੫. ਵੀਸਤਿਨਿਪਾਤੋ
੪੯੭. ਮਾਤਙ੍ਗਜਾਤਕਂ (੧)
੧. ਕੁਤੋ ਨੁ ਆਗਚ੍ਛਸਿ ਦੁਮ੍ਮਵਾਸੀ [ਰੁਮ੍ਮਵਾਸੀ (ਸੀ. ਪੀ.)], ਓਤਲ੍ਲਕੋ ਪਂਸੁਪਿਸਾਚਕੋਵ;
ਸਙ੍ਕਾਰਚੋਲ਼ਂ ਪਟਿਮੁਞ੍ਚ [ਪਟਿਮੁਚ੍ਚ (ਸੀ. ਪੀ.)] ਕਣ੍ਠੇ, ਕੋ ਰੇ ਤੁਵਂ ਹੋਸਿ [ਹੋਹਿਸਿ (ਸੀ. ਪੀ.)] ਅਦਕ੍ਖਿਣੇਯ੍ਯੋ.
੨. ਅਨ੍ਨਂ ਤਵੇਦਂ [ਤਵ ਇਦਂ (ਕ. ਸੀ. ਪੀ.), ਤਵਯਿਦਂ (ਸ੍ਯਾ.)] ਪਕਤਂ ਯਸਸ੍ਸਿ, ਤਂ ਖਜ੍ਜਰੇ ਭੁਞ੍ਜਰੇ ਪਿਯ੍ਯਰੇ ਚ;
ਜਾਨਾਸਿ ਮਂ ਤ੍ਵਂ ਪਰਦਤ੍ਤੂਪਜੀਵਿਂ, ਉਤ੍ਤਿਟ੍ਠਪਿਣ੍ਡਂ ਲਭਤਂ ਸਪਾਕੋ.
੩. ਅਨ੍ਨਂ ਮਮੇਦਂ [ਮਮ ਇਦਂ (ਕ. ਸੀ. ਪੀ.), ਮਮਯਿਦਂ (ਸ੍ਯਾ.)] ਪਕਤਂ ਬ੍ਰਾਹ੍ਮਣਾਨਂ, ਅਤ੍ਤਤ੍ਥਾਯ ਸਦ੍ਦਹਤੋ ਮਮੇਦਂ [ਮਮ ਇਦਂ (ਕ. ਸੀ. ਪੀ.), ਮਮਯਿਦਂ (ਸ੍ਯਾ.)];
ਅਪੇਹਿ ਏਤ੍ਤੋ ਕਿਮਿਧਟ੍ਠਿਤੋਸਿ, ਨ ਮਾਦਿਸਾ ਤੁਯ੍ਹਂ ਦਦਨ੍ਤਿ ਜਮ੍ਮ.
੪. ਥਲੇ ਚ ਨਿਨ੍ਨੇ ਚ ਵਪਨ੍ਤਿ ਬੀਜਂ, ਅਨੂਪਖੇਤ੍ਤੇ ਫਲਮਾਸਮਾਨਾ [ਮਾਸਸਾਨਾ (ਸੀ. ਪੀ.), ਮਾਸਿਂ ਸਮਾਨਾ (ਸ੍ਯਾ.)];
ਏਤਾਯ ਸਦ੍ਧਾਯ ਦਦਾਹਿ ਦਾਨਂ, ਅਪ੍ਪੇਵ ਆਰਾਧਯੇ ਦਕ੍ਖਿਣੇਯ੍ਯੇ.
੫. ਖੇਤ੍ਤਾਨਿ ਮਯ੍ਹਂ ਵਿਦਿਤਾਨਿ ਲੋਕੇ, ਯੇਸਾਹਂ ਬੀਜਾਨਿ ਪਤਿਟ੍ਠਪੇਮਿ;
ਯੇ ਬ੍ਰਾਹ੍ਮਣਾ ਜਾਤਿਮਨ੍ਤੂਪਪਨ੍ਨਾ, ਤਾਨੀਧ ਖੇਤ੍ਤਾਨਿ ਸੁਪੇਸਲਾਨਿ.
੬. ਜਾਤਿਮਦੋ ਚ ਅਤਿਮਾਨਿਤਾ ਚ, ਲੋਭੋ ਚ ਦੋਸੋ ਚ ਮਦੋ ਚ ਮੋਹੋ;
ਏਤੇ ਅਗੁਣਾ ਯੇਸੁ ਚ ਸਨ੍ਤਿ [ਯੇਸੁ ਵਸਨ੍ਤਿ (ਸੀ. ਪੀ.)] ਸਬ੍ਬੇ, ਤਾਨੀਧ ਖੇਤ੍ਤਾਨਿ ਅਪੇਸਲਾਨਿ.
੭. ਜਾਤਿਮਦੋ ਚ ਅਤਿਮਾਨਿਤਾ ਚ, ਲੋਭੋ ਚ ਦੋਸੋ ਚ ਮਦੋ ਚ ਮੋਹੋ;
ਏਤੇ ਅਗੁਣਾ ਯੇਸੁ ਨ ਸਨ੍ਤਿ ਸਬ੍ਬੇ, ਤਾਨੀਧ ਖੇਤ੍ਤਾਨਿ ਸੁਪੇਸਲਾਨਿ.
੮. ਕ੍ਵੇਤ੍ਥ ਗਤਾ [ਕ੍ਵਤ੍ਥ ਗਤਾ (ਸ੍ਯਾ.), ਕਤ੍ਥੇਵ ਭਟ੍ਠਾ (ਪੀ.)] ਉਪਜੋਤਿਯੋ ਚ, ਉਪਜ੍ਝਾਯੋ ਚ ਅਥਵਾ ਗਣ੍ਡਕੁਚ੍ਛਿ [ਅਣ੍ਡਕੁਚ੍ਛਿ (ਸੀ. ਸ੍ਯਾ. ਪੀ.)];
ਇਮਸ੍ਸ ਦਣ੍ਡਞ੍ਚ ਵਧਞ੍ਚ ਦਤ੍ਵਾ, ਗਲੇ ਗਹੇਤ੍ਵਾ ਖਲਯਾਥ [ਗਲਯਾਥ (ਕ.)] ਜਮ੍ਮਂ.
੯. ਗਿਰਿਂ ਨਖੇਨ ਖਣਸਿ, ਅਯੋ ਦਨ੍ਤੇਹਿ [ਦਨ੍ਤੇਨ (ਸੀ. ਪੀ.)] ਖਾਦਸਿ;
ਜਾਤਵੇਦਂ ਪਦਹਸਿ, ਯੋ ਇਸਿਂ ਪਰਿਭਾਸਸਿ.
੧੦. ਇਦਂ ਵਤ੍ਵਾਨ ਮਾਤਙ੍ਗੋ, ਇਸਿ ਸਚ੍ਚਪਰਕ੍ਕਮੋ;
ਅਨ੍ਤਲਿਕ੍ਖਸ੍ਮਿਂ ਪਕ੍ਕਾਮਿ [ਪਕ੍ਕਮਿ (ਕ.)], ਬ੍ਰਾਹ੍ਮਣਾਨਂ ਉਦਿਕ੍ਖਤਂ.
੧੧. ਆਵੇਲ੍ਲਿਤਂ [ਅਵੇਠਿਤਂ (ਸੀ. ਪੀ.)] ਪਿਟ੍ਠਿਤੋ ਉਤ੍ਤਮਙ੍ਗਂ, ਬਾਹੁਂ [ਬਾਹਂ (ਸੀ. ਪੀ.)] ਪਸਾਰੇਤਿ ਅਕਮ੍ਮਨੇਯ੍ਯਂ [ਅਕਮ੍ਪਨੇਯ੍ਯਂ (ਕ.)];
ਸੇਤਾਨਿ ਅਕ੍ਖੀਨਿ ਯਥਾ ਮਤਸ੍ਸ, ਕੋ ਮੇ ਇਮਂ ਪੁਤ੍ਤਮਕਾਸਿ ਏਵਂ.
੧੨. ਇਧਾਗਮਾ ਸਮਣੋ ਦੁਮ੍ਮਵਾਸੀ, ਓਤਲ੍ਲਕੋ ਪਂਸੁਪਿਸਾਚਕੋਵ;
ਸਙ੍ਕਾਰਚੋਲ਼ਂ ਪਟਿਮੁਞ੍ਚ ਕਣ੍ਠੇ, ਸੋ ਤੇ ਇਮਂ ਪੁਤ੍ਤਮਕਾਸਿ ਏਵਂ.
੧੩. ਕਤਮਂ ਦਿਸਂ ਅਗਮਾ ਭੂਰਿਪਞ੍ਞੋ, ਅਕ੍ਖਾਥ ਮੇ ਮਾਣਵਾ ਏਤਮਤ੍ਥਂ;
ਗਨ੍ਤ੍ਵਾਨ ਤਂ ਪਟਿਕਰੇਮੁ ਅਚ੍ਚਯਂ, ਅਪ੍ਪੇਵ ਨਂ ਪੁਤ੍ਤ ਲਭੇਮੁ ਜੀਵਿਤਂ.
੧੪. ਵੇਹਾਯਸਂ ਅਗਮਾ ਭੂਰਿਪਞ੍ਞੋ, ਪਥਦ੍ਧੁਨੋ ਪਨ੍ਨਰਸੇਵ ਚਨ੍ਦੋ;
ਅਪਿ ਚਾਪਿ ਸੋ ਪੁਰਿਮਦਿਸਂ ਅਗਚ੍ਛਿ, ਸਚ੍ਚਪ੍ਪਟਿਞ੍ਞੋ ਇਸਿ ਸਾਧੁਰੂਪੋ.
੧੫. ਆਵੇਲ੍ਲਿਤਂ ਪਿਟ੍ਠਿਤੋ ਉਤ੍ਤਮਙ੍ਗਂ, ਬਾਹੁਂ ਪਸਾਰੇਤਿ ਅਕਮ੍ਮਨੇਯ੍ਯਂ;
ਸੇਤਾਨਿ ਅਕ੍ਖੀਨਿ ਯਥਾ ਮਤਸ੍ਸ, ਕੋ ਮੇ ਇਮਂ ਪੁਤ੍ਤਮਕਾਸਿ ਏਵਂ.
੧੬. ਯਕ੍ਖਾ ਹਵੇ ਸਨ੍ਤਿ ਮਹਾਨੁਭਾਵਾ, ਅਨ੍ਵਾਗਤਾ ਇਸਯੋ ਸਾਧੁਰੂਪਾ;
ਤੇ ਦੁਟ੍ਠਚਿਤ੍ਤਂ ਕੁਪਿਤਂ ਵਿਦਿਤ੍ਵਾ, ਯਕ੍ਖਾ ਹਿ ਤੇ ਪੁਤ੍ਤਮਕਂਸੁ ਏਵਂ.
੧੭. ਯਕ੍ਖਾ ਚ ਮੇ ਪੁਤ੍ਤਮਕਂਸੁ ਏਵਂ, ਤ੍ਵਞ੍ਞੇਵ ਮੇ ਮਾ ਕੁਦ੍ਧੋ [ਕੁਦ੍ਧ (ਕ.)] ਬ੍ਰਹ੍ਮਚਾਰਿ;
ਤੁਮ੍ਹੇਵ [ਤੁਯ੍ਹੇਵ (ਕ.)] ਪਾਦੇ ਸਰਣਂ ਗਤਾਸ੍ਮਿ, ਅਨ੍ਵਾਗਤਾ ਪੁਤ੍ਤਸੋਕੇਨ ਭਿਕ੍ਖੁ.
੧੮. ਤਦੇਵ ਹਿ ਏਤਰਹਿ ਚ ਮਯ੍ਹਂ, ਮਨੋਪਦੋਸੋ ਨ ਮਮਤ੍ਥਿ [ਮਮ ਨਤ੍ਥਿ (ਪੀ.)] ਕੋਚਿ;
ਪੁਤ੍ਤੋ ਚ ਤੇ ਵੇਦਮਦੇਨ ਮਤ੍ਤੋ, ਅਤ੍ਥਂ ਨ ਜਾਨਾਤਿ ਅਧਿਚ੍ਚ ਵੇਦੇ.
੧੯. ਅਦ੍ਧਾ ਹਵੇ ਭਿਕ੍ਖੁ ਮੁਹੁਤ੍ਤਕੇਨ, ਸਮ੍ਮੁਯ੍ਹਤੇਵ ਪੁਰਿਸਸ੍ਸ ਸਞ੍ਞਾ;
ਏਕਾਪਰਾਧਂ [ਏਤਾਪਰਾਧਂ (ਕ.)] ਖਮ ਭੂਰਿਪਞ੍ਞ, ਨ ਪਣ੍ਡਿਤਾ ਕੋਧਬਲਾ ਭਵਨ੍ਤਿ.
੨੦. ਇਦਞ੍ਚ ਮਯ੍ਹਂ ਉਤ੍ਤਿਟ੍ਠਪਿਣ੍ਡਂ, ਤਵ [ਨਤ੍ਥਿ ਸੀ. ਪੀ. ਪੋਤ੍ਥਕੇਸੁ] ਮਣ੍ਡਬ੍ਯੋ ਭੁਞ੍ਜਤੁ ਅਪ੍ਪਪਞ੍ਞੋ;
ਯਕ੍ਖਾ ਚ ਤੇ ਨਂ [ਤੇ ਪੁਤ੍ਤਂ (ਸ੍ਯਾ.)] ਨ ਵਿਹੇਠਯੇਯ੍ਯੁਂ, ਪੁਤ੍ਤੋ ਚ ਤੇ ਹੇਸ੍ਸਤਿ [ਹੋਹਿਤਿ (ਸੀ. ਪੀ.)] ਸੋ ਅਰੋਗੋ.
੨੧. ਮਣ੍ਡਬ੍ਯ ਬਾਲੋਸਿ ਪਰਿਤ੍ਤਪਞ੍ਞੋ, ਯੋ ਪੁਞ੍ਞਖੇਤ੍ਤਾਨਮਕੋਵਿਦੋਸਿ;
ਮਹਕ੍ਕਸਾਵੇਸੁ ਦਦਾਸਿ ਦਾਨਂ, ਕਿਲਿਟ੍ਠਕਮ੍ਮੇਸੁ ਅਸਞ੍ਞਤੇਸੁ.
੨੨. ਜਟਾ ਚ ਕੇਸਾ ਅਜਿਨਾ ਨਿਵਤ੍ਥਾ, ਜਰੂਦਪਾਨਂਵ ਮੁਖਂ ਪਰੂਲ਼੍ਹਂ;
ਪਜਂ ਇਮਂ ਪਸ੍ਸਥ ਦੁਮ੍ਮਰੂਪਂ [ਰੁਮ੍ਮਰੂਪਿਂ (ਸੀ. ਪੀ.)], ਨ ਜਟਾਜਿਨਂ ਤਾਯਤਿ ਅਪ੍ਪਪਞ੍ਞਂ.
੨੩. ਯੇਸਂ ਰਾਗੋ ਚ ਦੋਸੋ ਚ, ਅਵਿਜ੍ਜਾ ਚ ਵਿਰਾਜਿਤਾ;
ਖੀਣਾਸਵਾ ਅਰਹਨ੍ਤੋ, ਤੇਸੁ ਦਿਨ੍ਨਂ ਮਹਪ੍ਫਲਨ੍ਤਿ.
ਮਾਤਙ੍ਗਜਾਤਕਂ ਪਠਮਂ.
੪੯੮. ਚਿਤ੍ਤਸਮ੍ਭੂਤਜਾਤਕਂ (੨)
੨੪. ਸਬ੍ਬਂ ਨਰਾਨਂ ਸਫਲਂ ਸੁਚਿਣ੍ਣਂ, ਨ ਕਮ੍ਮੁਨਾ ਕਿਞ੍ਚਨ ਮੋਘਮਤ੍ਥਿ;
ਪਸ੍ਸਾਮਿ ਸਮ੍ਭੂਤਂ ਮਹਾਨੁਭਾਵਂ, ਸਕਮ੍ਮੁਨਾ ਪੁਞ੍ਞਫਲੂਪਪਨ੍ਨਂ.
੨੫. ਸਬ੍ਬਂ ਨਰਾਨਂ ਸਫਲਂ ਸੁਚਿਣ੍ਣਂ, ਨ ਕਮ੍ਮੁਨਾ ਕਿਞ੍ਚਨ ਮੋਘਮਤ੍ਥਿ;
ਕਚ੍ਚਿਨ੍ਨੁ ਚਿਤ੍ਤਸ੍ਸਪਿ ਏਵਮੇਵਂ, ਇਦ੍ਧੋ ਮਨੋ ਤਸ੍ਸ ਯਥਾਪਿ ਮਯ੍ਹਂ.
੨੬. ਸਬ੍ਬਂ ਨਰਾਨਂ ਸਫਲਂ ਸੁਚਿਣ੍ਣਂ, ਨ ਕਮ੍ਮੁਨਾ ਕਿਞ੍ਚਨ ਮੋਘਮਤ੍ਥਿ;
ਚਿਤ੍ਤਮ੍ਪਿ ਜਾਨਾਹਿ [ਚਿਤ੍ਤਂ ਵਿਜਾਨਾਹਿ (ਸੀ. ਪੀ.)] ਤਥੇਵ ਦੇਵ, ਇਦ੍ਧੋ ਮਨੋ ਤਸ੍ਸ ਯਥਾਪਿ ਤੁਯ੍ਹਂ.
੨੭. ਭਵਂ ਨੁ ਚਿਤ੍ਤੋ ਸੁਤਮਞ੍ਞਤੋ ਤੇ, ਉਦਾਹੁ ਤੇ ਕੋਚਿ ਨਂ ਏਤਦਕ੍ਖਾ;
ਗਾਥਾ ਸੁਗੀਤਾ ਨ ਮਮਤ੍ਥਿ ਕਙ੍ਖਾ, ਦਦਾਮਿ ਤੇ ਗਾਮਵਰਂ ਸਤਞ੍ਚ.
੨੮. ਨ ਚਾਹਂ ਚਿਤ੍ਤੋ ਸੁਤਮਞ੍ਞਤੋ ਮੇ, ਇਸੀ ਚ ਮੇ ਏਤਮਤ੍ਥਂ ਅਸਂਸਿ;
‘‘ਗਨ੍ਤ੍ਵਾਨ ਰਞ੍ਞੋ ਪਟਿਗਾਹਿ [ਪਟਿਗਾਯਿ (ਸ੍ਯਾ. ਕ.), ਪਟਿਗਾਯ (?)] ਗਾਥਂ, ਅਪਿ ਤੇ ਵਰਂ ਅਤ੍ਤਮਨੋ ਦਦੇਯ੍ਯ’’ [ਅਪਿ ਨੁ ਤੇ ਵਰਂ ਅਤ੍ਤਮਨੋ ਦਦੇਯ੍ਯ (ਸ੍ਯਾ.), ਅਪਿ ਨੁ ਤੇ ਅਤ੍ਤਮਨੋ ਵਰਂ ਦਦੇ (ਕ.)].
੨੯. ਯੋਜੇਨ੍ਤੁ ਵੇ ਰਾਜਰਥੇ, ਸੁਕਤੇ ਚਿਤ੍ਤਸਿਬ੍ਬਨੇ;
ਕਚ੍ਛਂ ਨਾਗਾਨਂ ਬਨ੍ਧਥ, ਗੀਵੇਯ੍ਯਂ ਪਟਿਮੁਞ੍ਚਥ.
੩੦. ਆਹਞ੍ਞਨ੍ਤੁ [ਆਹਞ੍ਞਰੇ (ਸ੍ਯਾ.)] ਭੇਰਿਮੁਦਿਙ੍ਗਸਙ੍ਖੇ [ਸਙ੍ਖਾ (ਸ੍ਯਾ.)], ਸੀਘਾਨਿ ਯਾਨਾਨਿ ਚ ਯੋਜਯਨ੍ਤੁ;
ਅਜ੍ਜੇਵਹਂ ਅਸ੍ਸਮਂ ਤਂ ਗਮਿਸ੍ਸਂ, ਯਤ੍ਥੇਵ ਦਕ੍ਖਿਸ੍ਸਮਿਸਿਂ ਨਿਸਿਨ੍ਨਂ.
੩੧. ਸੁਲਦ੍ਧਲਾਭੋ ਵਤ ਮੇ ਅਹੋਸਿ, ਗਾਥਾ ਸੁਗੀਤਾ ਪਰਿਸਾਯ ਮਜ੍ਝੇ;
ਸ੍ਵਾਹਂ ਇਸਿਂ ਸੀਲਵਤੂਪਪਨ੍ਨਂ, ਦਿਸ੍ਵਾ ਪਤੀਤੋ ਸੁਮਨੋਹਮਸ੍ਮਿ.
੩੨. ਆਸਨਂ ਉਦਕਂ ਪਜ੍ਜਂ, ਪਟਿਗ੍ਗਣ੍ਹਾਤੁ ਨੋ ਭਵਂ;
ਅਗ੍ਘੇ ਭਵਨ੍ਤਂ ਪੁਚ੍ਛਾਮ, ਅਗ੍ਘਂ ਕੁਰੁਤੁ ਨੋ ਭਵਂ.
੩੩. ਰਮ੍ਮਞ੍ਚ ਤੇ ਆਵਸਥਂ ਕਰੋਨ੍ਤੁ, ਨਾਰੀਗਣੇਹਿ ਪਰਿਚਾਰਯਸ੍ਸੁ;
ਕਰੋਹਿ ਓਕਾਸਮਨੁਗ੍ਗਹਾਯ, ਉਭੋਪਿ ਮਂ ਇਸ੍ਸਰਿਯਂ ਕਰੋਮ.
੩੪. ਦਿਸ੍ਵਾ ਫਲਂ ਦੁਚ੍ਚਰਿਤਸ੍ਸ ਰਾਜ, ਅਥੋ ਸੁਚਿਣ੍ਣਸ੍ਸ ਮਹਾਵਿਪਾਕਂ;
ਅਤ੍ਤਾਨਮੇਵ ਪਟਿਸਂਯਮਿਸ੍ਸਂ, ਨ ਪਤ੍ਥਯੇ ਪੁਤ੍ਤ [ਪੁਤ੍ਤਂ (ਸੀ. ਪੀ.)] ਪਸੁਂ ਧਨਂ ਵਾ.
੩੫. ਦਸੇਵਿਮਾ ਵਸ੍ਸਦਸਾ, ਮਚ੍ਚਾਨਂ ਇਧ ਜੀਵਿਤਂ;
ਅਪਤ੍ਤਞ੍ਞੇਵ ਤਂ ਓਧਿਂ, ਨਲ਼ੋ ਛਿਨ੍ਨੋਵ ਸੁਸ੍ਸਤਿ.
੩੬. ਤਤ੍ਥ ਕਾ ਨਨ੍ਦਿ ਕਾ ਖਿਡ੍ਡਾ, ਕਾ ਰਤੀ ਕਾ ਧਨੇਸਨਾ;
ਕਿਂ ਮੇ ਪੁਤ੍ਤੇਹਿ ਦਾਰੇਹਿ, ਰਾਜ ਮੁਤ੍ਤੋਸ੍ਮਿ ਬਨ੍ਧਨਾ.
੩੭. ਸੋਹਂ ਏਵਂ ਪਜਾਨਾਮਿ [ਸੋ ਅਹਂ ਸੁਪ੍ਪਜਾਨਾਮਿ (ਸੀ. ਪੀ.)], ਮਚ੍ਚੁ ਮੇ ਨਪ੍ਪਮਜ੍ਜਤਿ;
ਅਨ੍ਤਕੇਨਾਧਿਪਨ੍ਨਸ੍ਸ, ਕਾ ਰਤੀ ਕਾ ਧਨੇਸਨਾ.
੩੮. ਜਾਤਿ ਨਰਾਨਂ ਅਧਮਾ ਜਨਿਨ੍ਦ, ਚਣ੍ਡਾਲਯੋਨਿ ਦ੍ਵਿਪਦਾਕਨਿਟ੍ਠਾ [ਦਿਪਦਾਕਨਿਟ੍ਠਾ (ਸੀ. ਪੀ.)];
ਸਕੇਹਿ ਕਮ੍ਮੇਹਿ ਸੁਪਾਪਕੇਹਿ, ਚਣ੍ਡਾਲਗਬ੍ਭੇ [ਚਣ੍ਡਾਲਿਗਬ੍ਭੇ (ਸ੍ਯਾ.)] ਅਵਸਿਮ੍ਹ ਪੁਬ੍ਬੇ.
੩੯. ਚਣ੍ਡਾਲਾਹੁਮ੍ਹ ਅਵਨ੍ਤੀਸੁ, ਮਿਗਾ ਨੇਰਞ੍ਜਰਂ ਪਤਿ;
ਉਕ੍ਕੁਸਾ ਨਮ੍ਮਦਾਤੀਰੇ [ਰਮ੍ਮਦਾਤੀਰੇ (ਸ੍ਯਾ. ਕ.)], ਤ੍ਯਜ੍ਜ ਬ੍ਰਾਹ੍ਮਣਖਤ੍ਤਿਯਾ.
੪੦. ਉਪਨੀਯਤਿ ਜੀਵਿਤਮਪ੍ਪਮਾਯੁ, ਜਰੂਪਨੀਤਸ੍ਸ ਨ ਸਨ੍ਤਿ ਤਾਣਾ;
ਕਰੋਹਿ ਪਞ੍ਚਾਲ ਮਮੇਤ [ਮਮੇਵ (ਸ੍ਯਾ. ਕ.)] ਵਾਕ੍ਯਂ, ਮਾਕਾਸਿ ਕਮ੍ਮਾਨਿ ਦੁਕ੍ਖੁਦ੍ਰਯਾਨਿ.
੪੧. ਉਪਨੀਯਤਿ ਜੀਵਿਤਮਪ੍ਪਮਾਯੁ, ਜਰੂਪਨੀਤਸ੍ਸ ਨ ਸਨ੍ਤਿ ਤਾਣਾ;
ਕਰੋਹਿ ਪਞ੍ਚਾਲ ਮਮੇਤ ਵਾਕ੍ਯਂ, ਮਾਕਾਸਿ ਕਮ੍ਮਾਨਿ ਦੁਕ੍ਖਪ੍ਫਲਾਨਿ.
੪੨. ਉਪਨੀਯਤਿ ਜੀਵਿਤਮਪ੍ਪਮਾਯੁ, ਜਰੂਪਨੀਤਸ੍ਸ ਨ ਸਨ੍ਤਿ ਤਾਣਾ;
ਕਰੋਹਿ ਪਞ੍ਚਾਲ ਮਮੇਤ ਵਾਕ੍ਯਂ, ਮਾਕਾਸਿ ਕਮ੍ਮਾਨਿ ਰਜਸ੍ਸਿਰਾਨਿ.
੪੩. ਉਪਨੀਯਤਿ ਜੀਵਿਤਮਪ੍ਪਮਾਯੁ, ਵਣ੍ਣਂ ਜਰਾ ਹਨ੍ਤਿ ਨਰਸ੍ਸ ਜਿਯ੍ਯਤੋ;
ਕਰੋਹਿ ਪਞ੍ਚਾਲ ਮਮੇਤ ਵਾਕ੍ਯਂ, ਮਾਕਾਸਿ ਕਮ੍ਮਂ ਨਿਰਯੂਪਪਤ੍ਤਿਯਾ.
੪੪. ਅਦ੍ਧਾ ਹਿ ਸਚ੍ਚਂ ਵਚਨਂ ਤਵੇਤਂ, ਯਥਾ ਇਸੀ ਭਾਸਸਿ ਏਵਮੇਤਂ;
ਕਾਮਾ ਚ ਮੇ ਸਨ੍ਤਿ ਅਨਪ੍ਪਰੂਪਾ, ਤੇ ਦੁਚ੍ਚਜਾ ਮਾਦਿਸਕੇਨ ਭਿਕ੍ਖੁ.
੪੫. ਨਾਗੋ ਯਥਾ ਪਙ੍ਕਮਜ੍ਝੇ ਬ੍ਯਸਨ੍ਨੋ, ਪਸ੍ਸਂ ਥਲਂ ਨਾਭਿਸਮ੍ਭੋਤਿ ਗਨ੍ਤੁਂ;
ਏਵਮ੍ਪਹਂ [ਏਵਮਹਂ (ਸ੍ਯਾ.)] ਕਾਮਪਙ੍ਕੇ ਬ੍ਯਸਨ੍ਨੋ, ਨ ਭਿਕ੍ਖੁਨੋ ਮਗ੍ਗਮਨੁਬ੍ਬਜਾਮਿ.
੪੬. ਯਥਾਪਿ ਮਾਤਾ ਚ ਪਿਤਾ ਚ ਪੁਤ੍ਤਂ, ਅਨੁਸਾਸਰੇ ਕਿਨ੍ਤਿ ਸੁਖੀ ਭਵੇਯ੍ਯ;
ਏਵਮ੍ਪਿ ਮਂ ਤ੍ਵਂ ਅਨੁਸਾਸ ਭਨ੍ਤੇ, ਯਥਾ ਚਿਰਂ [ਯਮਾਚਰਂ (ਸੀ. ਪੀ. ਕ. ਅਟ੍ਠ.)] ਪੇਚ੍ਚ ਸੁਖੀ ਭਵੇਯ੍ਯਂ.
੪੭. ਨੋ ਚੇ ਤੁਵਂ ਉਸ੍ਸਹਸੇ ਜਨਿਨ੍ਦ, ਕਾਮੇ ਇਮੇ ਮਾਨੁਸਕੇ ਪਹਾਤੁਂ;
ਧਮ੍ਮਿਂ [ਧਮ੍ਮਂ (ਸੀ. ਪੀ.)] ਬਲਿਂ ਪਟ੍ਠਪਯਸ੍ਸੁ ਰਾਜ, ਅਧਮ੍ਮਕਾਰੋ ਤਵ [ਅਧਮ੍ਮਕਾਰੋ ਚ ਤੇ (ਸੀ. ਸ੍ਯਾ. ਪੀ.)] ਮਾਹੁ ਰਟ੍ਠੇ.
੪੮. ਦੂਤਾ ਵਿਧਾਵਨ੍ਤੁ ਦਿਸਾ ਚਤਸ੍ਸੋ, ਨਿਮਨ੍ਤਕਾ ਸਮਣਬ੍ਰਾਹ੍ਮਣਾਨਂ;
ਤੇ ਅਨ੍ਨਪਾਨੇਨ ਉਪਟ੍ਠਹਸ੍ਸੁ, ਵਤ੍ਥੇਨ ਸੇਨਾਸਨਪਚ੍ਚਯੇਨ ਚ.
੪੯. ਅਨ੍ਨੇਨ ਪਾਨੇਨ ਪਸਨ੍ਨਚਿਤ੍ਤੋ, ਸਨ੍ਤਪ੍ਪਯ ਸਮਣਬ੍ਰਾਹ੍ਮਣੇ ਚ;
ਦਤ੍ਵਾ ਚ ਭੁਤ੍ਵਾ ਚ ਯਥਾਨੁਭਾਵਂ, ਅਨਿਨ੍ਦਿਤੋ ਸਗ੍ਗਮੁਪੇਹਿ [ਮੁਪੇਤਿ (ਪੀ. ਕ.)] ਠਾਨਂ.
੫੦. ਸਚੇ ਚ ਤਂ ਰਾਜ ਮਦੋ ਸਹੇਯ੍ਯ, ਨਾਰੀਗਣੇਹਿ ਪਰਿਚਾਰਯਨ੍ਤਂ;
ਇਮਮੇਵ ਗਾਥਂ ਮਨਸੀ ਕਰੋਹਿ, ਭਾਸੇਸਿ [ਭਾਸੇਹਿ (ਸ੍ਯਾ. ਪੀ. ਕ.)] ਚੇਨਂ ਪਰਿਸਾਯ ਮਜ੍ਝੇ.
੫੧. ਅਬ੍ਭੋਕਾਸਸਯੋ ਜਨ੍ਤੁ, ਵਜਨ੍ਤ੍ਯਾ ਖੀਰਪਾਯਿਤੋ;
ਪਰਿਕਿਣ੍ਣੋ ਸੁਵਾਨੇਹਿ [ਸੁਪਿਨੇਹਿ (ਸੀ. ਪੀ.)], ਸ੍ਵਾਜ੍ਜ ਰਾਜਾਤਿ ਵੁਚ੍ਚਤੀਤਿ.
ਚਿਤ੍ਤਸਮ੍ਭੂਤਜਾਤਕਂ ਦੁਤਿਯਂ.
੪੯੯. ਸਿਵਿਜਾਤਕਂ (੩)
੫੨. ਦੂਰੇ ਅਪਸ੍ਸਂ ਥੇਰੋਵ, ਚਕ੍ਖੁਂ ਯਾਚਿਤੁਮਾਗਤੋ;
ਏਕਨੇਤ੍ਤਾ ਭਵਿਸ੍ਸਾਮ, ਚਕ੍ਖੁਂ ਮੇ ਦੇਹਿ ਯਾਚਿਤੋ.
੫੩. ਕੇਨਾਨੁਸਿਟ੍ਠੋ ਇਧ ਮਾਗਤੋਸਿ, ਵਨਿਬ੍ਬਕ [ਵਣਿਬ੍ਬਕ (ਸੀ.)] ਚਕ੍ਖੁਪਥਾਨਿ ਯਾਚਿਤੁਂ;
ਸੁਦੁਚ੍ਚਜਂ ਯਾਚਸਿ ਉਤ੍ਤਮਙ੍ਗਂ, ਯਮਾਹੁ ਨੇਤ੍ਤਂ ਪੁਰਿਸੇਨ ਦੁਚ੍ਚਜਂ.
੫੪. ਯਮਾਹੁ ਦੇਵੇਸੁ ਸੁਜਮ੍ਪਤੀਤਿ, ਮਘਵਾਤਿ ਨਂ ਆਹੁ ਮਨੁਸ੍ਸਲੋਕੇ;
ਤੇਨਾਨੁਸਿਟ੍ਠੋ ਇਧ ਮਾਗਤੋਸ੍ਮਿ, ਵਨਿਬ੍ਬਕੋ ਚਕ੍ਖੁਪਥਾਨਿ ਯਾਚਿਤੁਂ.
੫੫. ਵਨਿਬ੍ਬਤੋ [ਵਨਿਬ੍ਬਕੋ (ਸ੍ਯਾ. ਪੀ.)] ਮਯ੍ਹ ਵਨਿਂ [ਵਨਂ (ਕ.), ਵਣਿਂ (ਸੀ. ਸ੍ਯਾ. ਪੀ.)] ਅਨੁਤ੍ਤਰਂ, ਦਦਾਹਿ ਤੇ ਚਕ੍ਖੁਪਥਾਨਿ ਯਾਚਿਤੋ;
ਦਦਾਹਿ ਮੇ ਚਕ੍ਖੁਪਥਂ ਅਨੁਤ੍ਤਰਂ, ਯਮਾਹੁ ਨੇਤ੍ਤਂ ਪੁਰਿਸੇਨ ਦੁਚ੍ਚਜਂ.
੫੬. ਯੇਨ ਅਤ੍ਥੇਨ ਆਗਚ੍ਛਿ [ਆਗਞ੍ਛਿ (ਸੀ. ਪੀ.)], ਯਮਤ੍ਥਮਭਿਪਤ੍ਥਯਂ;
ਤੇ ਤੇ ਇਜ੍ਝਨ੍ਤੁ ਸਙ੍ਕਪ੍ਪਾ, ਲਭ ਚਕ੍ਖੂਨਿ ਬ੍ਰਾਹ੍ਮਣ.
੫੭. ਏਕਂ ਤੇ ਯਾਚਮਾਨਸ੍ਸ, ਉਭਯਾਨਿ ਦਦਾਮਹਂ;
ਸ ਚਕ੍ਖੁਮਾ ਗਚ੍ਛ ਜਨਸ੍ਸ ਪੇਕ੍ਖਤੋ, ਯਦਿਚ੍ਛਸੇ ਤ੍ਵਂ ਤਦਤੇ ਸਮਿਜ੍ਝਤੁ.
੫੮. ਮਾ ਨੋ ਦੇਵ ਅਦਾ ਚਕ੍ਖੁਂ, ਮਾ ਨੋ ਸਬ੍ਬੇ ਪਰਾਕਰਿ [ਪਰਕ੍ਕਰਿ (ਸ੍ਯਾ. ਕ. ਅਟ੍ਠ.), ਪਰਿਕ੍ਕਰਿ (ਕ.) ਪਰਿ + ਆ + ਕਰਿ = ਪਰਾਕਰਿ];
ਧਨਂ ਦੇਹਿ ਮਹਾਰਾਜ, ਮੁਤ੍ਤਾ ਵੇਲ਼ੁਰਿਯਾ ਬਹੂ.
੫੯. ਯੁਤ੍ਤੇ ਦੇਵ ਰਥੇ ਦੇਹਿ, ਆਜਾਨੀਯੇ ਚਲਙ੍ਕਤੇ;
ਨਾਗੇ ਦੇਹਿ ਮਹਾਰਾਜ, ਹੇਮਕਪ੍ਪਨਵਾਸਸੇ.
੬੦. ਯਥਾ ਤਂ ਸਿਵਯੋ [ਸੀਵਿਯੋ (ਸ੍ਯਾ.)] ਸਬ੍ਬੇ, ਸਯੋਗ੍ਗਾ ਸਰਥਾ ਸਦਾ;
ਸਮਨ੍ਤਾ ਪਰਿਕਿਰੇਯ੍ਯੁਂ [ਪਰਿਕਰੇਯ੍ਯੁਂ (ਸ੍ਯਾ. ਪੀ.)], ਏਵਂ ਦੇਹਿ ਰਥੇਸਭ.
੬੧. ਯੋ ਵੇ ਦਸ੍ਸਨ੍ਤਿ ਵਤ੍ਵਾਨ, ਅਦਾਨੇ ਕੁਰੁਤੇ ਮਨੋ;
ਭੂਮ੍ਯਂ [ਭੂਮ੍ਯਾ (ਸੀ. ਪੀ.)] ਸੋ ਪਤਿਤਂ ਪਾਸਂ, ਗੀਵਾਯਂ ਪਟਿਮੁਞ੍ਚਤਿ.
੬੨. ਯੋ ਵੇ ਦਸ੍ਸਨ੍ਤਿ ਵਤ੍ਵਾਨ, ਅਦਾਨੇ ਕੁਰੁਤੇ ਮਨੋ;
ਪਾਪਾ ਪਾਪਤਰੋ ਹੋਤਿ, ਸਮ੍ਪਤ੍ਤੋ ਯਮਸਾਧਨਂ.
੬੩. ਯਞ੍ਹਿ ਯਾਚੇ ਤਞ੍ਹਿ ਦਦੇ, ਯਂ ਨ ਯਾਚੇ ਨ ਤਂ ਦਦੇ;
ਸ੍ਵਾਹਂ ਤਮੇਵ ਦਸ੍ਸਾਮਿ, ਯਂ ਮਂ ਯਾਚਤਿ ਬ੍ਰਾਹ੍ਮਣੋ.
੬੪. ਆਯੁਂ ਨੁ ਵਣ੍ਣਂ ਨੁ ਸੁਖਂ ਬਲਂ ਨੁ, ਕਿਂ ਪਤ੍ਥਯਾਨੋ ਨੁ ਜਨਿਨ੍ਦ ਦੇਸਿ;
ਕਥਞ੍ਹਿ ਰਾਜਾ ਸਿਵਿਨਂ ਅਨੁਤ੍ਤਰੋ, ਚਕ੍ਖੂਨਿ ਦਜ੍ਜਾ ਪਰਲੋਕਹੇਤੁ.
੬੫. ਨ ਵਾਹਮੇਤਂ ਯਸਸਾ ਦਦਾਮਿ, ਨ ਪੁਤ੍ਤਮਿਚ੍ਛੇ ਨ ਧਨਂ ਨ ਰਟ੍ਠਂ;
ਸਤਞ੍ਚ ਧਮ੍ਮੋ ਚਰਿਤੋ ਪੁਰਾਣੋ, ਇਚ੍ਚੇਵ ਦਾਨੇ ਰਮਤੇ ਮਨੋ ਮਮ [ਮਮਂ (ਸੀ. ਪੀ.)].
੬੬. ਸਖਾ ਚ ਮਿਤ੍ਤੋ ਚ ਮਮਾਸਿ ਸੀਵਿਕ [ਸੀਵਕ (ਸੀ. ਪੀ.)], ਸੁਸਿਕ੍ਖਿਤੋ ਸਾਧੁ ਕਰੋਹਿ ਮੇ ਵਚੋ;
ਉਦ੍ਧਰਿਤ੍ਵਾ [ਉਦ੍ਧਤ੍ਵ (ਸੀ.), ਲਦ੍ਧ ਤ੍ਵਂ (ਪੀ.)] ਚਕ੍ਖੂਨਿ ਮਮਂ ਜਿਗੀਸਤੋ, ਹਤ੍ਥੇਸੁ ਠਪੇਹਿ [ਆਵੇਸਿ (ਸੀ.)] ਵਨਿਬ੍ਬਕਸ੍ਸ.
੬੭. ਚੋਦਿਤੋ ਸਿਵਿਰਾਜੇਨ, ਸਿਵਿਕੋ ਵਚਨਙ੍ਕਰੋ;
ਰਞ੍ਞੋ ਚਕ੍ਖੂਨੁਦ੍ਧਰਿਤ੍ਵਾ [ਚਕ੍ਖੂਨਿ ਉਦ੍ਧਤ੍ਵਾ (ਸੀ. ਪੀ.)], ਬ੍ਰਾਹ੍ਮਣਸ੍ਸੂਪਨਾਮਯਿ;
ਸਚਕ੍ਖੁ ਬ੍ਰਾਹ੍ਮਣੋ ਆਸਿ, ਅਨ੍ਧੋ ਰਾਜਾ ਉਪਾਵਿਸਿ.
੬੮. ਤਤੋ ਸੋ ਕਤਿਪਾਹਸ੍ਸ, ਉਪਰੂਲ਼੍ਹੇਸੁ ਚਕ੍ਖੁਸੁ;
ਸੂਤਂ ਆਮਨ੍ਤਯੀ ਰਾਜਾ, ਸਿਵੀਨਂ ਰਟ੍ਠਵਡ੍ਢਨੋ.
੬੯. ਯੋਜੇਹਿ ਸਾਰਥਿ ਯਾਨਂ, ਯੁਤ੍ਤਞ੍ਚ ਪਟਿਵੇਦਯ;
ਉਯ੍ਯਾਨਭੂਮਿਂ ਗਚ੍ਛਾਮ, ਪੋਕ੍ਖਰਞ੍ਞੋ ਵਨਾਨਿ ਚ.
੭੦. ਸੋ ਚ ਪੋਕ੍ਖਰਣੀਤੀਰੇ [ਪੋਕ੍ਖਰਣਿਯਾ ਤੀਰੇ (ਸੀ. ਪੀ.)], ਪਲ੍ਲਙ੍ਕੇਨ ਉਪਾਵਿਸਿ;
ਤਸ੍ਸ ਸਕ੍ਕੋ ਪਾਤੁਰਹੁ, ਦੇਵਰਾਜਾ ਸੁਜਮ੍ਪਤਿ.
੭੧. ਸਕ੍ਕੋਹਮਸ੍ਮਿ ਦੇਵਿਨ੍ਦੋ, ਆਗਤੋਸ੍ਮਿ ਤਵਨ੍ਤਿਕੇ;
ਵਰਂ ਵਰਸ੍ਸੁ ਰਾਜੀਸਿ, ਯਂ ਕਿਞ੍ਚਿ ਮਨਸਿਚ੍ਛਸਿ.
੭੨. ਪਹੂਤਂ ਮੇ ਧਨਂ ਸਕ੍ਕ, ਬਲਂ ਕੋਸੋ ਚਨਪ੍ਪਕੋ;