੫੦੯. ਹਤ੍ਥਿਪਾਲਜਾਤਕਂ (੧੩)

੩੩੭. ਚਿਰਸ੍ਸਂ ਵਤ ਪਸ੍ਸਾਮ, ਬ੍ਰਾਹ੍ਮਣਂ ਦੇਵਵਣ੍ਣਿਨਂ;

ਮਹਾਜਟਂ ਖਾਰਿਧਰਂ [ਭਾਰਧਰਂ (ਪੀ.)], ਪਙ੍ਕਦਨ੍ਤਂ ਰਜਸ੍ਸਿਰਂ.

੩੩੮. ਚਿਰਸ੍ਸਂ ਵਤ ਪਸ੍ਸਾਮ, ਇਸਿਂ ਧਮ੍ਮਗੁਣੇ ਰਤਂ;

ਕਾਸਾਯਵਤ੍ਥਵਸਨਂ, ਵਾਕਚੀਰਂ ਪਟਿਚ੍ਛਦਂ.

੩੩੯. ਆਸਨਂ ਉਦਕਂ ਪਜ੍ਜਂ, ਪਟਿਗਣ੍ਹਾਤੁ ਨੋ ਭਵਂ;

ਅਗ੍ਘੇ ਭਵਨ੍ਤਂ ਪੁਚ੍ਛਾਮ, ਅਗ੍ਘਂ ਕੁਰੁਤੁ ਨੋ ਭਵਂ.

੩੪੦. ਅਧਿਚ੍ਚ ਵੇਦੇ ਪਰਿਯੇਸ ਵਿਤ੍ਤਂ, ਪੁਤ੍ਤੇ ਗਹੇ [ਗੇਹੇ (ਸੀ. ਸ੍ਯਾ. ਪੀ.)] ਤਾਤ ਪਤਿਟ੍ਠਪੇਤ੍ਵਾ;

ਗਨ੍ਧੇ ਰਸੇ ਪਚ੍ਚਨੁਭੁਯ੍ਯ [ਪਚ੍ਚਨੁਭੋਤ੍ਵ (ਸ੍ਯਾ.), ਪਚ੍ਚਨੁਭੁਤ੍ਵ (ਪੀ.)] ਸਬ੍ਬਂ, ਅਰਞ੍ਞਂ ਸਾਧੁ ਮੁਨਿ ਸੋ ਪਸਤ੍ਥੋ.

੩੪੧. ਵੇਦਾ ਨ ਸਚ੍ਚਾ ਨ ਚ ਵਿਤ੍ਤਲਾਭੋ, ਨ ਪੁਤ੍ਤਲਾਭੇਨ ਜਰਂ ਵਿਹਨ੍ਤਿ;

ਗਨ੍ਧੇ ਰਸੇ ਮੁਚ੍ਚਨ [ਮੁਞ੍ਚਨ (ਸੀ. ਕ.)] ਮਾਹੁ ਸਨ੍ਤੋ, ਸਕਮ੍ਮੁਨਾ [ਸਕਮ੍ਮਨਾ (ਸੀ. ਪੀ.)] ਹੋਤਿ ਫਲੂਪਪਤ੍ਤਿ.

੩੪੨. ਅਦ੍ਧਾ ਹਿ ਸਚ੍ਚਂ ਵਚਨਂ ਤਵੇਤਂ, ਸਕਮ੍ਮੁਨਾ ਹੋਤਿ ਫਲੂਪਪਤ੍ਤਿ;

ਜਿਣ੍ਣਾ ਚ ਮਾਤਾਪਿਤਰੋ ਤਵੀਮੇ [ਤਵੇਮੇ (ਸੀ.), ਤਵ ਯਿਮੇ (ਸ੍ਯਾ. ਪੀ.)], ਪਸ੍ਸੇਯ੍ਯੁਂ ਤਂ ਵਸ੍ਸਸਤਂ ਅਰੋਗਂ [ਅਰੋਗ੍ਯਂ (ਸ੍ਯਾ. ਕ.)].

੩੪੩. ਯਸ੍ਸਸ੍ਸ ਸਕ੍ਖੀ ਮਰਣੇਨ ਰਾਜ, ਜਰਾਯ ਮੇਤ੍ਤੀ ਨਰਵੀਰਸੇਟ੍ਠ;

ਯੋ ਚਾਪਿ ਜਞ੍ਞਾ ਨ ਮਰਿਸ੍ਸਂ ਕਦਾਚਿ, ਪਸ੍ਸੇਯ੍ਯੁਂ ਤਂ ਵਸ੍ਸਸਤਂ ਅਰੋਗਂ.

੩੪੪. ਯਥਾਪਿ ਨਾਵਂ ਪੁਰਿਸੋ ਦਕਮ੍ਹਿ, ਏਰੇਤਿ ਚੇ ਨਂ ਉਪਨੇਤਿ ਤੀਰਂ;

ਏਵਮ੍ਪਿ ਬ੍ਯਾਧੀ ਸਤਤਂ ਜਰਾ ਚ, ਉਪਨੇਤਿ ਮਚ੍ਚਂ [ਮਚ੍ਚੁ (ਸ੍ਯਾ. ਪੀ.)] ਵਸਮਨ੍ਤਕਸ੍ਸ.

੩੪੫. ਪਙ੍ਕੋ ਚ ਕਾਮਾ ਪਲਿਪੋ ਚ ਕਾਮਾ, ਮਨੋਹਰਾ ਦੁਤ੍ਤਰਾ ਮਚ੍ਚੁਧੇਯ੍ਯਾ;

ਏਤਸ੍ਮਿਂ ਪਙ੍ਕੇ ਪਲਿਪੇ ਬ੍ਯਸਨ੍ਨਾ [ਵਿਸਨ੍ਨਾ (ਸ੍ਯਾ. ਕ.)], ਹੀਨਤ੍ਤਰੂਪਾ ਨ ਤਰਨ੍ਤਿ ਪਾਰਂ.

੩੪੬. ਅਯਂ ਪੁਰੇ ਲੁਦ੍ਦਮਕਾਸਿ ਕਮ੍ਮਂ, ਸ੍ਵਾਯਂ ਗਹੀਤੋ ਨ ਹਿ ਮੋਕ੍ਖਿਤੋ ਮੇ;

ਓਰੁਨ੍ਧਿਯਾ ਨਂ ਪਰਿਰਕ੍ਖਿਸ੍ਸਾਮਿ, ਮਾਯਂ ਪੁਨ ਲੁਦ੍ਦਮਕਾਸਿ ਕਮ੍ਮਂ.

੩੪੭. ਗਵਂਵ [ਗਾਵਂਵ (ਸੀ.)] ਨਟ੍ਠਂ ਪੁਰਿਸੋ ਯਥਾ ਵਨੇ, ਅਨ੍ਵੇਸਤੀ [ਪਰਿਯੇਸਤੀ (ਸੀ. ਪੀ.)] ਰਾਜ ਅਪਸ੍ਸਮਾਨੋ;

ਏਵਂ ਨਟ੍ਠੋ ਏਸੁਕਾਰੀ ਮਮਤ੍ਥੋ, ਸੋਹਂ ਕਥਂ ਨ ਗਵੇਸੇਯ੍ਯਂ ਰਾਜ.

੩੪੮. ਹਿਯ੍ਯੋਤਿ ਹਿਯ੍ਯਤਿ [ਹੀਯੋਤਿ ਹੀਯਤਿ (ਸੀ.)] ਪੋਸੋ, ਪਰੇਤਿ ਪਰਿਹਾਯਤਿ;

ਅਨਾਗਤਂ ਨੇਤਮਤ੍ਥੀਤਿ ਞਤ੍ਵਾ, ਉਪ੍ਪਨ੍ਨਛਨ੍ਦਂ ਕੋ ਪਨੁਦੇਯ੍ਯ ਧੀਰੋ.

੩੪੯. ਪਸ੍ਸਾਮਿ ਵੋਹਂ ਦਹਰਂ [ਦਹਰੀ (ਸ੍ਯਾ. ਪੀ. ਕ.)] ਕੁਮਾਰਿਂ, ਮਤ੍ਤੂਪਮਂ ਕੇਤਕਪੁਪ੍ਫਨੇਤ੍ਤਂ;

ਅਭੁਤ੍ਤਭੋਗੇ [ਅਭੁਤ੍ਵ ਭੋਗੇ (ਸ੍ਯਾ. ਕ. ਅਟ੍ਠ.), ਅਭੁਤ੍ਵ ਭੋਗੇ (ਪੀ.), ਭੋਗੇ ਅਤੁਤ੍ਵਾ (ਕ.)] ਪਠਮੇ ਵਯਸ੍ਮਿਂ, ਆਦਾਯ ਮਚ੍ਚੁ ਵਜਤੇ ਕੁਮਾਰਿਂ.

੩੫੦. ਯੁਵਾ ਸੁਜਾਤੋ ਸੁਮੁਖੋ ਸੁਦਸ੍ਸਨੋ, ਸਾਮੋ ਕੁਸੁਮ੍ਭਪਰਿਕਿਣ੍ਣਮਸ੍ਸੁ;

ਹਿਤ੍ਵਾਨ ਕਾਮੇ ਪਟਿਕਚ੍ਚ [ਪਟਿਗਚ੍ਚ (ਸੀ.), ਪਟਿਗਚ੍ਛ (ਸ੍ਯਾ. ਪੀ.)] ਗੇਹਂ, ਅਨੁਜਾਨ ਮਂ ਪਬ੍ਬਜਿਸ੍ਸਾਮਿ ਦੇਵ.

੩੫੧. ਸਾਖਾਹਿ ਰੁਕ੍ਖੋ ਲਭਤੇ ਸਮਞ੍ਞਂ, ਪਹੀਨਸਾਖਂ ਪਨ ਖਾਣੁਮਾਹੁ;

ਪਹੀਨਪੁਤ੍ਤਸ੍ਸ ਮਮਜ੍ਜ ਭੋਤਿ, ਵਾਸੇਟ੍ਠਿ ਭਿਕ੍ਖਾਚਰਿਯਾਯ ਕਾਲੋ.

੩੫੨. ਅਘਸ੍ਮਿ ਕੋਞ੍ਚਾਵ ਯਥਾ ਹਿਮਚ੍ਚਯੇ, ਕਤਾਨਿ [ਤਨ੍ਤਾਨਿ (ਸੀ. ਪੀ.)] ਜਾਲਾਨਿ ਪਦਾਲਿਯ [ਪਦਾਲੇਯ੍ਯ (ਸੀ.)] ਹਂਸਾ;

ਗਚ੍ਛਨ੍ਤਿ ਪੁਤ੍ਤਾ ਚ ਪਤੀ ਚ ਮਯ੍ਹਂ, ਸਾਹਂ ਕਥਂ ਨਾਨੁਵਜੇ ਪਜਾਨਂ.

੩੫੩. ਏਤੇ ਭੁਤ੍ਵਾ ਵਮਿਤ੍ਵਾ ਚ, ਪਕ੍ਕਮਨ੍ਤਿ ਵਿਹਙ੍ਗਮਾ;

ਯੇ ਚ ਭੁਤ੍ਵਾਨ ਵਮਿਂਸੁ, ਤੇ ਮੇ ਹਤ੍ਥਤ੍ਤ [ਹਤ੍ਥਤ੍ਥ (ਸੀ. ਸ੍ਯਾ. ਪੀ.)] ਮਾਗਤਾ.

੩੫੪. ਅਵਮੀ ਬ੍ਰਾਹ੍ਮਣੋ ਕਾਮੇ, ਸੋ [ਤੇ (ਸੀ. ਪੀ.)] ਤ੍ਵਂ ਪਚ੍ਚਾਵਮਿਸ੍ਸਸਿ;

ਵਨ੍ਤਾਦੋ ਪੁਰਿਸੋ ਰਾਜ, ਨ ਸੋ ਹੋਤਿ ਪਸਂਸਿਯੋ.

੩੫੫. ਪਙ੍ਕੇ ਚ [ਪਙ੍ਕੇਵ (ਸੀ. ਪੀ.)] ਪੋਸਂ ਪਲਿਪੇ ਬ੍ਯਸਨ੍ਨਂ, ਬਲੀ ਯਥਾ ਦੁਬ੍ਬਲਮੁਦ੍ਧਰੇਯ੍ਯ;

ਏਵਮ੍ਪਿ ਮਂ ਤ੍ਵਂ ਉਦਤਾਰਿ ਭੋਤਿ, ਪਞ੍ਚਾਲਿ ਗਾਥਾਹਿ ਸੁਭਾਸਿਤਾਹਿ.

੩੫੬. ਇਦਂ ਵਤ੍ਵਾ ਮਹਾਰਾਜਾ, ਏਸੁਕਾਰੀ ਦਿਸਮ੍ਪਤਿ;

ਰਟ੍ਠਂ ਹਿਤ੍ਵਾਨ ਪਬ੍ਬਜਿ, ਨਾਗੋ ਛੇਤ੍ਵਾਵ ਬਨ੍ਧਨਂ.

੩੫੭. ਰਾਜਾ ਚ ਪਬ੍ਬਜ੍ਜਮਰੋਚਯਿਤ੍ਥ, ਰਟ੍ਠਂ ਪਹਾਯ ਨਰਵੀਰਸੇਟ੍ਠੋ;

ਤੁਵਮ੍ਪਿ ਨੋ ਹੋਤਿ ਯਥੇਵ ਰਾਜਾ, ਅਮ੍ਹੇਹਿ ਗੁਤ੍ਤਾ ਅਨੁਸਾਸ ਰਜ੍ਜਂ.

੩੫੮. ਰਾਜਾ ਚ ਪਬ੍ਬਜ੍ਜਮਰੋਚਯਿਤ੍ਥ, ਰਟ੍ਠਂ ਪਹਾਯ ਨਰਵੀਰਸੇਟ੍ਠੋ;

ਅਹਮ੍ਪਿ ਏਕਾ [ਏਕਾਵ (ਸੀ.)] ਚਰਿਸ੍ਸਾਮਿ ਲੋਕੇ, ਹਿਤ੍ਵਾਨ ਕਾਮਾਨਿ ਮਨੋਰਮਾਨਿ.

੩੫੯. ਰਾਜਾ ਚ ਪਬ੍ਬਜ੍ਜਮਰੋਚਯਿਤ੍ਥ, ਰਟ੍ਠਂ ਪਹਾਯ ਨਰਵੀਰਸੇਟ੍ਠੋ;

ਅਹਮ੍ਪਿ ਏਕਾ ਚਰਿਸ੍ਸਾਮਿ ਲੋਕੇ, ਹਿਤ੍ਵਾਨ ਕਾਮਾਨਿ ਯਥੋਧਿਕਾਨਿ.

੩੬੦. ਅਚ੍ਚੇਨ੍ਤਿ ਕਾਲਾ ਤਰਯਨ੍ਤਿ ਰਤ੍ਤਿਯੋ, ਵਯੋਗੁਣਾ ਅਨੁਪੁਬ੍ਬਂ ਜਹਨ੍ਤਿ;

ਅਹਮ੍ਪਿ ਏਕਾ ਚਰਿਸ੍ਸਾਮਿ ਲੋਕੇ, ਹਿਤ੍ਵਾਨ ਕਾਮਾਨਿ ਮਨੋਰਮਾਨਿ.

੩੬੧. ਅਚ੍ਚੇਨ੍ਤਿ ਕਾਲਾ ਤਰਯਨ੍ਤਿ ਰਤ੍ਤਿਯੋ, ਵਯੋਗੁਣਾ ਅਨੁਪੁਬ੍ਬਂ ਜਹਨ੍ਤਿ;

ਅਹਮ੍ਪਿ ਏਕਾ ਚਰਿਸ੍ਸਾਮਿ ਲੋਕੇ, ਹਿਤ੍ਵਾਨ ਕਾਮਾਨਿ ਯਥੋਧਿਕਾਨਿ.

੩੬੨. ਅਚ੍ਚੇਨ੍ਤਿ ਕਾਲਾ ਤਰਯਨ੍ਤਿ ਰਤ੍ਤਿਯੋ, ਵਯੋਗੁਣਾ ਅਨੁਪੁਬ੍ਬਂ ਜਹਨ੍ਤਿ;

ਅਹਮ੍ਪਿ ਏਕਾ ਚਰਿਸ੍ਸਾਮਿ ਲੋਕੇ, ਸੀਤਿਭੂਤਾ [ਸੀਤੀਭੂਤਾ (ਸੀ.)] ਸਬ੍ਬਮਤਿਚ੍ਚ ਸਙ੍ਗਨ੍ਤਿ.

ਹਤ੍ਥਿਪਾਲਜਾਤਕਂ ਤੇਰਸਮਂ.