੫੦੭. ਮਹਾਪਲੋਭਨਜਾਤਕਂ (੧੧)

੨੮੪. ਬ੍ਰਹ੍ਮਲੋਕਾ ਚਵਿਤ੍ਵਾਨ, ਦੇਵਪੁਤ੍ਤੋ ਮਹਿਦ੍ਧਿਕੋ;

ਰਞ੍ਞੋ ਪੁਤ੍ਤੋ ਉਦਪਾਦਿ, ਸਬ੍ਬਕਾਮਸਮਿਦ੍ਧਿਸੁ.

੨੮੫. ਕਾਮਾ ਵਾ ਕਾਮਸਞ੍ਞਾ ਵਾ, ਬ੍ਰਹ੍ਮਲੋਕੇ ਨ ਵਿਜ੍ਜਤਿ;

ਸ੍ਵਾਸ੍ਸੁ [ਯ੍ਵਾਸ੍ਸ (ਸੀ.)] ਤਾਯੇਵ ਸਞ੍ਞਾਯ, ਕਾਮੇਹਿ ਵਿਜਿਗੁਚ੍ਛਥ.

੨੮੬. ਤਸ੍ਸ ਚਨ੍ਤੇਪੁਰੇ ਆਸਿ, ਝਾਨਾਗਾਰਂ ਸੁਮਾਪਿਤਂ;

ਸੋ ਤਤ੍ਥ ਪਟਿਸਲ੍ਲੀਨੋ [ਪਟਿਸਲ੍ਲਾਨੋ (ਕ.)], ਏਕੋ ਰਹਸਿ ਝਾਯਥ.

੨੮੭. ਸ ਰਾਜਾ ਪਰਿਦੇਵੇਸਿ, ਪੁਤ੍ਤਸੋਕੇਨ ਅਟ੍ਟਿਤੋ;

ਏਕਪੁਤ੍ਤੋ ਚਯਂ ਮਯ੍ਹਂ, ਨ ਚ ਕਾਮਾਨਿ ਭੁਞ੍ਜਤਿ.

੨੮੮. ਕੋ ਨੁ ਖ੍ਵੇਤ੍ਥ [ਖੇਤ੍ਥ (ਸੀ. ਪੀ.)] ਉਪਾਯੋ ਸੋ, ਕੋ ਵਾ ਜਾਨਾਤਿ ਕਿਞ੍ਚਨਂ;

ਯੋ [ਕੋ (ਸੀ. ਪੀ.)] ਮੇ ਪੁਤ੍ਤਂ ਪਲੋਭੇਯ੍ਯ, ਯਥਾ ਕਾਮਾਨਿ ਪਤ੍ਥਯੇ.

੨੮੯. ਅਹੁ ਕੁਮਾਰੀ ਤਤ੍ਥੇਵ, ਵਣ੍ਣਰੂਪਸਮਾਹਿਤਾ;

ਕੁਸਲਾ ਨਚ੍ਚਗੀਤਸ੍ਸ, ਵਾਦਿਤੇ ਚ ਪਦਕ੍ਖਿਣਾ.

੨੯੦. ਸਾ ਤਤ੍ਥ ਉਪਸਙ੍ਕਮ੍ਮ, ਰਾਜਾਨਂ ਏਤਦਬ੍ਰਵਿ;

ਅਹਂ ਖੋ ਨਂ ਪਲੋਭੇਯ੍ਯਂ, ਸਚੇ ਭਤ੍ਤਾ ਭਵਿਸ੍ਸਤਿ.

੨੯੧. ਤਂ ਤਥਾਵਾਦਿਨਿਂ ਰਾਜਾ, ਕੁਮਾਰਿਂ ਏਤਦਬ੍ਰਵਿ;

ਤ੍ਵਞ੍ਞੇਵ ਨਂ ਪਲੋਭੇਹਿ, ਤਵ ਭਤ੍ਤਾ ਭਵਿਸ੍ਸਤਿ.

੨੯੨. ਸਾ ਚ ਅਨ੍ਤੇਪੁਰਂ ਗਨ੍ਤ੍ਵਾ, ਬਹੁਂ ਕਾਮੁਪਸਂਹਿਤਂ;

ਹਦਯਙ੍ਗਮਾ ਪੇਮਨੀਯਾ, ਚਿਤ੍ਰਾ ਗਾਥਾ ਅਭਾਸਥ.

੨੯੩. ਤਸ੍ਸਾ ਚ ਗਾਯਮਾਨਾਯ, ਸਦ੍ਦਂ ਸੁਤ੍ਵਾਨ ਨਾਰਿਯਾ;

ਕਾਮਚ੍ਛਨ੍ਦਸ੍ਸ ਉਪ੍ਪਜ੍ਜਿ, ਜਨਂ ਸੋ ਪਰਿਪੁਚ੍ਛਥ.

੨੯੪. ਕਸ੍ਸੇਸੋ ਸਦ੍ਦੋ ਕੋ ਵਾ ਸੋ, ਭਣਤਿ ਉਚ੍ਚਾਵਚਂ ਬਹੁਂ;

ਹਦਯਙ੍ਗਮਂ ਪੇਮਨੀਯਂ, ਅਹੋ [ਅਥੋ (ਸੀ. ਪੀ.)] ਕਣ੍ਣਸੁਖਂ ਮਮ.

੨੯੫. ਏਸਾ ਖੋ ਪਮਦਾ ਦੇਵ, ਖਿਡ੍ਡਾ ਏਸਾ ਅਨਪ੍ਪਿਕਾ [ਅਨਪ੍ਪਕਾ (ਕ.)];

ਸਚੇ ਤ੍ਵਂ ਕਾਮੇ ਭੁਞ੍ਜੇਯ੍ਯ, ਭਿਯ੍ਯੋ ਭਿਯ੍ਯੋ ਛਾਦੇਯ੍ਯੁ ਤਂ.

੨੯੬. ਇਙ੍ਘ ਆਗਚ੍ਛਤੋਰੇਨ [ਆਗਚ੍ਛਤੋਰੇਨਂ (ਕ.) ਆਗਚ੍ਛਤੁ + ਓਰੇਨ], ਅਵਿਦੂਰਮ੍ਹਿ ਗਾਯਤੁ;

ਅਸ੍ਸਮਸ੍ਸ ਸਮੀਪਮ੍ਹਿ, ਸਨ੍ਤਿਕੇ ਮਯ੍ਹਂ ਗਾਯਤੁ.

੨੯੭. ਤਿਰੋਕੁਟ੍ਟਮ੍ਹਿ ਗਾਯਿਤ੍ਵਾ, ਝਾਨਾਗਾਰਮ੍ਹਿ ਪਾਵਿਸਿ;

ਬਨ੍ਧਿ ਨਂ [ਭਨ੍ਧਿਤੁਂ (ਸ੍ਯਾ. ਕ.)] ਅਨੁਪੁਬ੍ਬੇਨ, ਆਰਞ੍ਞਮਿਵ ਕੁਞ੍ਜਰਂ.

੨੯੮. ਤਸ੍ਸ [ਤਸ੍ਸਾ (ਸ੍ਯਾ.)] ਕਾਮਰਸਂ ਞਤ੍ਵਾ, ਇਸ੍ਸਾਧਮ੍ਮੋ ਅਜਾਯਥ;

‘‘ਅਹਮੇਵ ਕਾਮੇ ਭੁਞ੍ਜੇਯ੍ਯਂ, ਮਾ ਅਞ੍ਞੋ ਪੁਰਿਸੋ ਅਹੁ’’.

੨੯੯. ਤਤੋ ਅਸਿਂ ਗਹੇਤ੍ਵਾਨ, ਪੁਰਿਸੇ ਹਨ੍ਤੁਂ ਉਪਕ੍ਕਮਿ;

ਅਹਮੇਵੇਕੋ ਭੁਞ੍ਜਿਸ੍ਸਂ, ਮਾ ਅਞ੍ਞੋ ਪੁਰਿਸੋ ਸਿਯਾ.

੩੦੦. ਤਤੋ ਜਾਨਪਦਾ ਸਬ੍ਬੇ, ਵਿਕ੍ਕਨ੍ਦਿਂਸੁ ਸਮਾਗਤਾ;

ਪੁਤ੍ਤੋ ਤ੍ਯਾਯਂ ਮਹਾਰਾਜ, ਜਨਂ ਹੇਠੇਤ੍ਯਦੂਸਕਂ.

੩੦੧. ਤਞ੍ਚ ਰਾਜਾ ਵਿਵਾਹੇਸਿ [ਨਿਵਾਹੇਸਿ (ਸ੍ਯਾ.), ਵਿਹਾਹੇਸਿ (ਪੀ.)], ਸਮ੍ਹਾ ਰਟ੍ਠਾ ਚ [ਰਟ੍ਠਾਤੋ (ਸੀ. ਪੀ.), ਰਟ੍ਠਤੋ (ਕ.)] ਖਤ੍ਤਿਯੋ;

ਯਾਵਤਾ ਵਿਜਿਤਂ ਮਯ੍ਹਂ, ਨ ਤੇ ਵਤ੍ਥਬ੍ਬ [ਵਤ੍ਤਬ੍ਬ (ਸੀ. ਪੀ.)] ਤਾਵਦੇ.

੩੦੨. ਤਤੋ ਸੋ ਭਰਿਯਮਾਦਾਯ, ਸਮੁਦ੍ਦਂ ਉਪਸਙ੍ਕਮਿ;

ਪਣ੍ਣਸਾਲਂ ਕਰਿਤ੍ਵਾਨ, ਵਨਮੁਞ੍ਛਾਯ ਪਾਵਿਸਿ.

੩੦੩. ਅਥੇਤ੍ਥ ਇਸਿ ਮਾਗਚ੍ਛਿ, ਸਮੁਦ੍ਦਂ ਉਪਰੂਪਰਿ;

ਸੋ ਤਸ੍ਸ ਗੇਹਂ ਪਾਵੇਕ੍ਖਿ, ਭਤ੍ਤਕਾਲੇ ਉਪਟ੍ਠਿਤੇ.

੩੦੪. ਤਞ੍ਚ ਭਰਿਯਾ ਪਲੋਭੇਸਿ, ਪਸ੍ਸ ਯਾਵ ਸੁਦਾਰੁਣਂ;

ਚੁਤੋ ਸੋ ਬ੍ਰਹ੍ਮਚਰਿਯਮ੍ਹਾ, ਇਦ੍ਧਿਯਾ ਪਰਿਹਾਯਥ.

੩੦੫. ਰਾਜਪੁਤ੍ਤੋ ਚ ਉਞ੍ਛਾਤੋ, ਵਨਮੂਲਫਲਂ ਬਹੁਂ;

ਸਾਯਂ ਕਾਜੇਨ [ਕਾਚੇਨ (ਪੀ.)] ਆਦਾਯ, ਅਸ੍ਸਮਂ ਉਪਸਙ੍ਕਮਿ.

੩੦੬. ਇਸੀ ਚ ਖਤ੍ਤਿਯਂ ਦਿਸ੍ਵਾ, ਸਮੁਦ੍ਦਂ ਉਪਸਙ੍ਕਮਿ;

‘‘ਵੇਹਾਯਸਂ ਗਮਿਸ੍ਸ’’ਨ੍ਤਿ, ਸੀਦਤੇ ਸੋ ਮਹਣ੍ਣਵੇ.

੩੦੭. ਖਤ੍ਤਿਯੋ ਚ ਇਸਿਂ ਦਿਸ੍ਵਾ, ਸੀਦਮਾਨਂ ਮਹਣ੍ਣਵੇ;

ਤਸ੍ਸੇਵ ਅਨੁਕਮ੍ਪਾਯ, ਇਮਾ ਗਾਥਾ ਅਭਾਸਥ.

੩੦੮. ਅਭਿਜ੍ਜਮਾਨੇ ਵਾਰਿਸ੍ਮਿਂ, ਸਯਂ ਆਗਮ੍ਮ ਇਦ੍ਧਿਯਾ;

ਮਿਸ੍ਸੀਭਾਵਿਤ੍ਥਿਯਾ ਗਨ੍ਤ੍ਵਾ, ਸਂਸੀਦਸਿ ਮਹਣ੍ਣਵੇ.

੩੦੯. ਆਵਟ੍ਟਨੀ ਮਹਾਮਾਯਾ, ਬ੍ਰਹ੍ਮਚਰਿਯਵਿਕੋਪਨਾ;

ਸੀਦਨ੍ਤਿ ਨਂ ਵਿਦਿਤ੍ਵਾਨ, ਆਰਕਾ ਪਰਿਵਜ੍ਜਯੇ.

੩੧੦. ਅਨਲਾ ਮੁਦੁਸਮ੍ਭਾਸਾ, ਦੁਪ੍ਪੂਰਾ ਤਾ ਨਦੀਸਮਾ;

ਸੀਦਨ੍ਤਿ ਨਂ ਵਿਦਿਤ੍ਵਾਨ, ਆਰਕਾ ਪਰਿਵਜ੍ਜਯੇ.

੩੧੧. ਯਂ ਏਤਾ ਉਪਸੇਵਨ੍ਤਿ, ਛਨ੍ਦਸਾ ਵਾ ਧਨੇਨ ਵਾ;

ਜਾਤਵੇਦੋਵ ਸਂ ਠਾਨਂ, ਖਿਪ੍ਪਂ ਅਨੁਦਹਨ੍ਤਿ ਨਂ.

੩੧੨. ਖਤ੍ਤਿਯਸ੍ਸ ਵਚੋ ਸੁਤ੍ਵਾ, ਇਸਿਸ੍ਸ ਨਿਬ੍ਬਿਦਾ ਅਹੁ;

ਲਦ੍ਧਾ ਪੋਰਾਣਕਂ ਮਗ੍ਗਂ, ਗਚ੍ਛਤੇ ਸੋ ਵਿਹਾਯਸਂ.

੩੧੩. ਖਤ੍ਤਿਯੋ ਚ ਇਸਿਂ ਦਿਸ੍ਵਾ, ਗਚ੍ਛਮਾਨਂ ਵਿਹਾਯਸਂ;

ਸਂਵੇਗਂ ਅਲਭੀ ਧੀਰੋ, ਪਬ੍ਬਜ੍ਜਂ ਸਮਰੋਚਯਿ.

੩੧੪. ਤਤੋ ਸੋ ਪਬ੍ਬਜਿਤ੍ਵਾਨ, ਕਾਮਰਾਗਂ ਵਿਰਾਜਯਿ;

ਕਾਮਰਾਗਂ ਵਿਰਾਜੇਤ੍ਵਾ, ਬ੍ਰਹ੍ਮਲੋਕੂਪਗੋ ਅਹੂਤਿ.

ਮਹਾਪਲੋਭਨਜਾਤਕਂ ਏਕਾਦਸਮਂ.