੫੦੬. ਚਮ੍ਪੇਯ੍ਯਜਾਤਕਂ (੧੦)
੨੪੦. ਕਾ ਨੁ ਵਿਜ੍ਜੁਰਿਵਾਭਾਸਿ, ਓਸਧੀ ਵਿਯ ਤਾਰਕਾ;
ਦੇਵਤਾ ਨੁਸਿ ਗਨ੍ਧਬ੍ਬੀ, ਨ ਤਂ ਮਞ੍ਞਾਮਿ ਮਾਨੁਸਿਂ [ਮਾਨੁਸੀ (ਸ੍ਯਾ. ਕ.)].
੨੪੧. ਨਮ੍ਹਿ ਦੇਵੀ ਨ ਗਨ੍ਧਬ੍ਬੀ, ਨ ਮਹਾਰਾਜ ਮਾਨੁਸੀ;
ਨਾਗਕਞ੍ਞਾਸ੍ਮਿ ਭਦ੍ਦਨ੍ਤੇ, ਅਤ੍ਥੇਨਮ੍ਹਿ ਇਧਾਗਤਾ.
੨੪੨. ਵਿਬ੍ਭਨ੍ਤਚਿਤ੍ਤਾ ਕੁਪਿਤਿਨ੍ਦ੍ਰਿਯਾਸਿ, ਨੇਤ੍ਤੇਹਿ ਤੇ ਵਾਰਿਗਣਾ ਸਵਨ੍ਤਿ;
ਕਿਂ ਤੇ ਨਟ੍ਠਂ ਕਿਂ ਪਨ ਪਤ੍ਥਯਾਨਾ, ਇਧਾਗਤਾ ਨਾਰਿ ਤਦਿਙ੍ਘ ਬ੍ਰੂਹਿ.
੨੪੩. ਯਮੁਗ੍ਗਤੇਜੋ ਉਰਗੋਤਿ ਚਾਹੁ, ਨਾਗੋਤਿ ਨਂ ਆਹੁ ਜਨਾ ਜਨਿਨ੍ਦ;
ਤਮਗ੍ਗਹੀ ਪੁਰਿਸੋ ਜੀਵਿਕਤ੍ਥੋ, ਤਂ ਬਨ੍ਧਨਾ ਮੁਞ੍ਚ ਪਤੀ ਮਮੇਸੋ.
੨੪੪. ਕਥਂ ਨ੍ਵਯਂ ਬਲਵਿਰਿਯੂਪਪਨ੍ਨੋ, ਹਤ੍ਥਤ੍ਤ [ਹਤ੍ਥਤ੍ਥ (ਸੀ. ਸ੍ਯਾ. ਪੀ.)] ਮਾਗਚ੍ਛਿ ਵਨਿਬ੍ਬਕਸ੍ਸ;
ਅਕ੍ਖਾਹਿ ਮੇ ਨਾਗਕਞ੍ਞੇ ਤਮਤ੍ਥਂ, ਕਥਂ ਵਿਜਾਨੇਮੁ ਗਹੀਤਨਾਗਂ.
੨੪੫. ਨਗਰਮ੍ਪਿ ਨਾਗੋ ਭਸ੍ਮਂ ਕਰੇਯ੍ਯ, ਤਥਾ ਹਿ ਸੋ ਬਲਵਿਰਿਯੂਪਪਨ੍ਨੋ;
ਧਮ੍ਮਞ੍ਚ ਨਾਗੋ ਅਪਚਾਯਮਾਨੋ, ਤਸ੍ਮਾ ਪਰਕ੍ਕਮ੍ਮ ਤਪੋ ਕਰੋਤਿ.
੨੪੬. ਚਾਤੁਦ੍ਦਸਿਂ ਪਞ੍ਚਦਸਿਂ [ਪਨ੍ਨਰਸਿਂ (ਸੀ. ਸ੍ਯਾ. ਪੀ.)] ਚ ਰਾਜ, ਚਤੁਪ੍ਪਥੇ ਸਮ੍ਮਤਿ ਨਾਗਰਾਜਾ;
ਤਮਗ੍ਗਹੀ ਪੁਰਿਸੋ ਜੀਵਿਕਤ੍ਥੋ, ਤਂ ਬਨ੍ਧਨਾ ਮੁਞ੍ਚ ਪਤੀ ਮਮੇਸੋ.
੨੪੭. ਸੋਲ਼ਸਿਤ੍ਥਿਸਹਸ੍ਸਾਨਿ, ਆਮੁਤ੍ਤਮਣਿਕੁਣ੍ਡਲਾ;
ਵਾਰਿਗੇਹਸਯਾ ਨਾਰੀ [ਨਾਰਿਯੋ (ਪੀ.)], ਤਾਪਿ ਤਂ ਸਰਣਂ ਗਤਾ.
੨੪੮. ਧਮ੍ਮੇਨ ਮੋਚੇਹਿ ਅਸਾਹਸੇਨ, ਗਾਮੇਨ ਨਿਕ੍ਖੇਨ ਗਵਂ ਸਤੇਨ;
ਓਸ੍ਸਟ੍ਠਕਾਯੋ ਉਰਗੋ ਚਰਾਤੁ, ਪੁਞ੍ਞਤ੍ਥਿਕੋ ਮੁਞ੍ਚਤੁ ਬਨ੍ਧਨਸ੍ਮਾ.
੨੪੯. ਧਮ੍ਮੇਨ ਮੋਚੇਮਿ ਅਸਾਹਸੇਨ, ਗਾਮੇਨ ਨਿਕ੍ਖੇਨ ਗਵਂ ਸਤੇਨ;
ਓਸ੍ਸਟ੍ਠਕਾਯੋ ਉਰਗੋ ਚਰਾਤੁ, ਪੁਞ੍ਞਤ੍ਥਿਕੋ ਮੁਞ੍ਚਤੁ ਬਨ੍ਧਨਸ੍ਮਾ.
੨੫੦. ਦਮ੍ਮਿ ਨਿਕ੍ਖਸਤਂ ਲੁਦ੍ਦ, ਥੂਲਞ੍ਚ ਮਣਿਕੁਣ੍ਡਲਂ;
ਚਤੁਸ੍ਸਦਞ੍ਚ ਪਲ੍ਲਙ੍ਕਂ, ਉਮਾਪੁਪ੍ਫਸਰਿਨ੍ਨਿਭਂ.
੨੫੧. ਦ੍ਵੇ ਚ ਸਾਦਿਸਿਯੋ ਭਰਿਯਾ, ਉਸਭਞ੍ਚ ਗਵਂ ਸਤਂ;
ਓਸ੍ਸਟ੍ਠਕਾਯੋ ਉਰਗੋ ਚਰਾਤੁ, ਪੁਞ੍ਞਤ੍ਥਿਕੋ ਮੁਞ੍ਚਤੁ ਬਨ੍ਧਨਸ੍ਮਾ.
੨੫੨. ਵਿਨਾਪਿ ਦਾਨਾ ਤਵ ਵਚਨਂ ਜਨਿਨ੍ਦ, ਮੁਞ੍ਚੇਮੁ ਨਂ ਉਰਗਂ ਬਨ੍ਧਨਸ੍ਮਾ;
ਓਸ੍ਸਟ੍ਠਕਾਯੋ ਉਰਗੋ ਚਰਾਤੁ, ਪੁਞ੍ਞਤ੍ਥਿਕੋ ਮੁਞ੍ਚਤੁ ਬਨ੍ਧਨਸ੍ਮਾ.
੨੫੩. ਮੁਤ੍ਤੋ ਚਮ੍ਪੇਯ੍ਯਕੋ ਨਾਗੋ, ਰਾਜਾਨਂ ਏਤਦਬ੍ਰਵਿ;
ਨਮੋ ਤੇ ਕਾਸਿਰਾਜਤ੍ਥੁ, ਨਮੋ ਤੇ ਕਾਸਿਵਡ੍ਢਨ;
ਅਞ੍ਜਲਿਂ ਤੇ ਪਗ੍ਗਣ੍ਹਾਮਿ, ਪਸ੍ਸੇਯ੍ਯਂ ਮੇ ਨਿਵੇਸਨਂ.
੨੫੪. ਅਦ੍ਧਾ ਹਿ ਦੁਬ੍ਬਿਸ੍ਸਸਮੇਤਮਾਹੁ, ਯਂ ਮਾਨੁਸੋ ਵਿਸ੍ਸਸੇ ਅਮਾਨੁਸਮ੍ਹਿ;
ਸਚੇ ਚ ਮਂ ਯਾਚਸਿ ਏਤਮਤ੍ਥਂ, ਦਕ੍ਖੇਮੁ ਤੇ ਨਾਗ ਨਿਵੇਸਨਾਨਿ.
੨੫੫. ਸਚੇਪਿ [ਸਚੇ ਹਿ (ਸੀ. ਪੀ. ਅਟ੍ਠ.)] ਵਾਤੋ ਗਿਰਿਮਾਵਹੇਯ੍ਯ, ਚਨ੍ਦੋ ਚ ਸੁਰਿਯੋ ਚ ਛਮਾ ਪਤੇਯ੍ਯੁਂ;
ਸਬ੍ਬਾ ਚ ਨਜ੍ਜੋ ਪਟਿਸੋਤਂ ਵਜੇਯ੍ਯੁਂ, ਨ ਤ੍ਵੇਵਹਂ ਰਾਜ ਮੁਸਾ ਭਣੇਯ੍ਯਂ.
੨੫੬. ਨਭਂ ਫਲੇਯ੍ਯ ਉਦਧੀਪਿ ਸੁਸ੍ਸੇ, ਸਂਵਟ੍ਟਯੇ [ਸਂਵਟ੍ਟੇਯਂ (ਸੀ. ਪੀ.), ਸਂਵਟ੍ਟੇਯ੍ਯ (ਸ੍ਯਾ. ਕ.)] ਭੂਤਧਰਾ ਵਸੁਨ੍ਧਰਾ;
ਸਿਲੁਚ੍ਚਯੋ ਮੇਰੁ ਸਮੂਲਮੁਪ੍ਪਤੇ [ਮੁਬ੍ਬਹੇ (ਸੀ. ਸ੍ਯਾ. ਪੀ. ਕ. ਅਟ੍ਠ.), ਮੁਟ੍ਠਹੇ (ਕ.)], ਨ ਤ੍ਵੇਵਹਂ ਰਾਜ ਮੁਸਾ ਭਣੇਯ੍ਯਂ.
੨੫੭. ਅਦ੍ਧਾ ਹਿ ਦੁਬ੍ਬਿਸ੍ਸਸਮੇਤਮਾਹੁ, ਯਂ ਮਾਨੁਸੋ ਵਿਸ੍ਸਸੇ ਅਮਾਨੁਸਮ੍ਹਿ;
ਸਚੇ ਚ ਮਂ ਯਾਚਸਿ ਏਤਮਤ੍ਥਂ, ਦਕ੍ਖੇਮੁ ਤੇ ਨਾਗ ਨਿਵੇਸਨਾਨਿ.
੨੫੮. ਤੁਮ੍ਹੇ ਖੋਤ੍ਥ ਘੋਰਵਿਸਾ ਉਲ਼ਾਰਾ, ਮਹਾਤੇਜਾ ਖਿਪ੍ਪਕੋਪੀ ਚ ਹੋਥ;
ਮਂਕਾਰਣਾ [ਮਮ ਕਾਰਣਾ (ਸੀ. ਸ੍ਯਾ. ਪੀ.)] ਬਨ੍ਧਨਸ੍ਮਾ ਪਮੁਤ੍ਤੋ, ਅਰਹਸਿ ਨੋ ਜਾਨਿਤੁਯੇ [ਜਾਨਿਤਾਯੇ (ਸੀ.), ਜਾਨਿਤਵੇ (ਸ੍ਯਾ.), ਜਾਨਿਤਯੇ (ਪੀ.)] ਕਤਾਨਿ.
੨੫੯. ਸੋ ਪਚ੍ਚਤਂ ਨਿਰਯੇ ਘੋਰਰੂਪੇ, ਮਾ ਕਾਯਿਕਂ ਸਾਤਮਲਤ੍ਥ ਕਿਞ੍ਚਿ;
ਪੇਲ਼ਾਯ ਬਦ੍ਧੋ ਮਰਣਂ ਉਪੇਤੁ, ਯੋ ਤਾਦਿਸਂ ਕਮ੍ਮਕਤਂ ਨ ਜਾਨੇ.
੨੬੦. ਸਚ੍ਚਪ੍ਪਟਿਞ੍ਞਾ ਤਵਮੇਸ ਹੋਤੁ, ਅਕ੍ਕੋਧਨੋ ਹੋਹਿ ਅਨੁਪਨਾਹੀ;
ਸਬ੍ਬਞ੍ਚ ਤੇ ਨਾਗਕੁਲਂ ਸੁਪਣ੍ਣਾ, ਅਗ੍ਗਿਂਵ ਗਿਮ੍ਹੇਸੁ [ਗਿਮ੍ਹਾਸੁ (ਸੀ. ਸ੍ਯਾ. ਪੀ.)] ਵਿਵਜ੍ਜਯਨ੍ਤੁ.
੨੬੧. ਅਨੁਕਮ੍ਪਸੀ ਨਾਗਕੁਲਂ ਜਨਿਨ੍ਦ, ਮਾਤਾ ਯਥਾ ਸੁਪ੍ਪਿਯਂ ਏਕਪੁਤ੍ਤਂ;
ਅਹਞ੍ਚ ਤੇ ਨਾਗਕੁਲੇਨ ਸਦ੍ਧਿਂ, ਕਾਹਾਮਿ ਵੇਯ੍ਯਾਵਟਿਕਂ ਉਲ਼ਾਰਂ.
੨੬੨. ਯੋਜੇਨ੍ਤੁ ਵੇ ਰਾਜਰਥੇ ਸੁਚਿਤ੍ਤੇ, ਕਮ੍ਬੋਜਕੇ ਅਸ੍ਸਤਰੇ ਸੁਦਨ੍ਤੇ;
ਨਾਗੇ ਚ ਯੋਜੇਨ੍ਤੁ ਸੁਵਣ੍ਣਕਪ੍ਪਨੇ, ਦਕ੍ਖੇਮੁ ਨਾਗਸ੍ਸ ਨਿਵੇਸਨਾਨਿ.
੨੬੩. ਭੇਰੀ ਮੁਦਿਙ੍ਗਾ [ਮੁਤਿਙ੍ਗਾ (ਸੀ. ਪੀ.)] ਪਣਵਾ ਚ ਸਙ੍ਖਾ, ਅਵਜ੍ਜਯਿਂਸੁ ਉਗ੍ਗਸੇਨਸ੍ਸ ਰਞ੍ਞੋ;
ਪਾਯਾਸਿ ਰਾਜਾ ਬਹੁਸੋਭਮਾਨੋ, ਪੁਰਕ੍ਖਤੋ ਨਾਰਿਗਣਸ੍ਸ ਮਜ੍ਝੇ.
੨੬੪. ਸੁਵਣ੍ਣਚਿਤਕਂ ਭੂਮਿਂ, ਅਦ੍ਦਕ੍ਖਿ ਕਾਸਿਵਡ੍ਢਨੋ;
ਸੋਵਣ੍ਣਮਯਪਾਸਾਦੇ, ਵੇਲ਼ੁਰਿਯਫਲਕਤ੍ਥਤੇ.
੨੬੫. ਸ ਰਾਜਾ ਪਾਵਿਸਿ ਬ੍ਯਮ੍ਹਂ, ਚਮ੍ਪੇਯ੍ਯਸ੍ਸ ਨਿਵੇਸਨਂ;
ਆਦਿਚ੍ਚਵਣ੍ਣਸਨ੍ਨਿਭਂ, ਕਂਸਵਿਜ੍ਜੁ ਪਭਸ੍ਸਰਂ.
੨੬੬. ਨਾਨਾਰੁਕ੍ਖੇਹਿ ਸਞ੍ਛਨ੍ਨਂ, ਨਾਨਾਗਨ੍ਧਸਮੀਰਿਤਂ;
ਸੋ ਪਾਵੇਕ੍ਖਿ ਕਾਸਿਰਾਜਾ, ਚਮ੍ਪੇਯ੍ਯਸ੍ਸ ਨਿਵੇਸਨਂ.
੨੬੭. ਪਵਿਟ੍ਠਸ੍ਮਿਂ ਕਾਸਿਰਞ੍ਞੇ, ਚਮ੍ਪੇਯ੍ਯਸ੍ਸ ਨਿਵੇਸਨਂ;
ਦਿਬ੍ਬਾ ਤੂਰਿਯਾ ਪਵਜ੍ਜਿਂਸੁ, ਨਾਗਕਞ੍ਞਾ ਚ ਨਚ੍ਚਿਸੁਂ [ਨਚ੍ਚਯੁਂ (ਸੀ. ਪੀ. ਕ.)].
੨੬੮. ਤਂ ਨਾਗਕਞ੍ਞਾ ਚਰਿਤਂ ਗਣੇਨ, ਅਨ੍ਵਾਰੁਹੀ ਕਾਸਿਰਾਜਾ ਪਸਨ੍ਨੋ;
ਨਿਸੀਦਿ ਸੋਵਣ੍ਣਮਯਮ੍ਹਿ ਪੀਠੇ, ਸਾਪਸ੍ਸਯੇ [ਸੋਪਸ੍ਸਯੇ (ਕ.)] ਚਨ੍ਦਨਸਾਰਲਿਤ੍ਤੇ.
੨੬੯. ਸੋ ਤਤ੍ਥ ਭੁਤ੍ਵਾ ਚ ਅਥੋ ਰਮਿਤ੍ਵਾ, ਚਮ੍ਪੇਯ੍ਯਕਂ ਕਾਸਿਰਾਜਾ ਅਵੋਚ;
ਵਿਮਾਨਸੇਟ੍ਠਾਨਿ ਇਮਾਨਿ ਤੁਯ੍ਹਂ, ਆਦਿਚ੍ਚਵਣ੍ਣਾਨਿ ਪਭਸ੍ਸਰਾਨਿ;
ਨੇਤਾਦਿਸਂ ਅਤ੍ਥਿ ਮਨੁਸ੍ਸਲੋਕੇ, ਕਿਂ ਪਤ੍ਥਯਂ [ਕਿਮਤ੍ਥਿਯਂ (ਸੀ. ਸ੍ਯਾ. ਪੀ.)] ਨਾਗ ਤਪੋ ਕਰੋਸਿ.
੨੭੦. ਤਾ ਕਮ੍ਬੁਕਾਯੂਰਧਰਾ ਸੁਵਤ੍ਥਾ, ਵਟ੍ਟਙ੍ਗੁਲੀ ਤਮ੍ਬਤਲੂਪਪਨ੍ਨਾ;
ਪਗ੍ਗਯ੍ਹ ਪਾਯੇਨ੍ਤਿ ਅਨੋਮਵਣ੍ਣਾ, ਨੇਤਾਦਿਸਂ ਅਤ੍ਥਿ ਮਨੁਸ੍ਸਲੋਕੇ;
ਕਿਂ ਪਤ੍ਥਯਂ ਨਾਗ ਤਪੋ ਕਰੋਸਿ.
੨੭੧. ਨਜ੍ਜੋ ਚ ਤੇਮਾ ਪੁਥੁਲੋਮਮਚ੍ਛਾ, ਆਟਾ [ਆਦਾ (ਸ੍ਯਾ.), ਅਦਾ (ਪੀ.)] ਸਕੁਨ੍ਤਾਭਿਰੁਦਾ ਸੁਤਿਤ੍ਥਾ;
ਨੇਤਾਦਿਸਂ ਅਤ੍ਥਿ ਮਨੁਸ੍ਸਲੋਕੇ, ਕਿਂ ਪਤ੍ਥਯਂ ਨਾਗ ਤਪੋ ਕਰੋਸਿ.
੨੭੨. ਕੋਞ੍ਚਾ ਮਯੂਰਾ ਦਿਵਿਯਾ ਚ ਹਂਸਾ, ਵਗ੍ਗੁਸ੍ਸਰਾ ਕੋਕਿਲਾ ਸਮ੍ਪਤਨ੍ਤਿ;
ਨੇਤਾਦਿਸਂ ਅਤ੍ਥਿ ਮਨੁਸ੍ਸਲੋਕੇ, ਕਿਂ ਪਤ੍ਥਯਂ ਨਾਗ ਤਪੋ ਕਰੋਸਿ.
੨੭੩. ਅਮ੍ਬਾ ਚ ਸਾਲਾ ਤਿਲਕਾ ਚ ਜਮ੍ਬੁਯੋ, ਉਦ੍ਦਾਲਕਾ ਪਾਟਲਿਯੋ ਚ ਫੁਲ੍ਲਾ;
ਨੇਤਾਦਿਸਂ ਅਤ੍ਥਿ ਮਨੁਸ੍ਸਲੋਕੇ, ਕਿਂ ਪਤ੍ਥਯਂ ਨਾਗ ਤਪੋ ਕਰੋਸਿ.
੨੭੪. ਇਮਾ ਚ ਤੇ ਪੋਕ੍ਖਰਞ੍ਞੋ ਸਮਨ੍ਤਤੋ, ਦਿਬ੍ਬਾ [ਦਿਬ੍ਯਾ (ਸ੍ਯਾ.), ਦਿਵਿਯਾ (ਪੀ.)] ਚ ਗਨ੍ਧਾ ਸਤਤਂ ਪਵਾਯਨ੍ਤਿ;
ਨੇਤਾਦਿਸਂ ਅਤ੍ਥਿ ਮਨੁਸ੍ਸਲੋਕੇ, ਕਿਂ ਪਤ੍ਥਯਂ ਨਾਗ ਤਪੋ ਕਰੋਸਿ.
੨੭੫. ਨ ਪੁਤ੍ਤਹੇਤੁ ਨ ਧਨਸ੍ਸ ਹੇਤੁ, ਨ ਆਯੁਨੋ ਚਾਪਿ [ਵਾਪਿ (ਸੀ. ਪੀ.)] ਜਨਿਨ੍ਦ ਹੇਤੁ;
ਮਨੁਸ੍ਸਯੋਨਿਂ ਅਭਿਪਤ੍ਥਯਾਨੋ, ਤਸ੍ਮਾ ਪਰਕ੍ਕਮ੍ਮ ਤਪੋ ਕਰੋਮਿ.
੨੭੬. ਤ੍ਵਂ ਲੋਹਿਤਕ੍ਖੋ ਵਿਹਤਨ੍ਤਰਂਸੋ, ਅਲਙ੍ਕਤੋ ਕਪ੍ਪਿਤਕੇਸਮਸ੍ਸੁ;
ਸੁਰੋਸਿਤੋ ਲੋਹਿਤਚਨ੍ਦਨੇਨ, ਗਨ੍ਧਬ੍ਬਰਾਜਾਵ ਦਿਸਾ ਪਭਾਸਸਿ.
੨੭੭. ਦੇਵਿਦ੍ਧਿਪਤ੍ਤੋਸਿ ਮਹਾਨੁਭਾਵੋ, ਸਬ੍ਬੇਹਿ ਕਾਮੇਹਿ ਸਮਙ੍ਗਿਭੂਤੋ;
ਪੁਚ੍ਛਾਮਿ ਤਂ ਨਾਗਰਾਜੇਤਮਤ੍ਥਂ, ਸੇਯ੍ਯੋ ਇਤੋ ਕੇਨ ਮਨੁਸ੍ਸਲੋਕੋ.
੨੭੮. ਜਨਿਨ੍ਦ ਨਾਞ੍ਞਤ੍ਰ ਮਨੁਸ੍ਸਲੋਕਾ, ਸੁਦ੍ਧੀ ਵ ਸਂਵਿਜ੍ਜਤਿ ਸਂਯਮੋ ਵਾ;
ਅਹਞ੍ਚ ਲਦ੍ਧਾਨ ਮਨੁਸ੍ਸਯੋਨਿਂ, ਕਾਹਾਮਿ ਜਾਤਿਮਰਣਸ੍ਸ ਅਨ੍ਤਂ.
੨੭੯. ਅਦ੍ਧਾ ਹਵੇ ਸੇਵਿਤਬ੍ਬਾ ਸਪਞ੍ਞਾ, ਬਹੁਸ੍ਸੁਤਾ ਯੇ ਬਹੁਠਾਨਚਿਨ੍ਤਿਨੋ;
ਨਾਰਿਯੋ ਚ ਦਿਸ੍ਵਾਨ ਤੁਵਞ੍ਚ ਨਾਗ, ਕਾਹਾਮਿ ਪੁਞ੍ਞਾਨਿ ਅਨਪ੍ਪਕਾਨਿ.
੨੮੦. ਅਦ੍ਧਾ ਹਵੇ ਸੇਵਿਤਬ੍ਬਾ ਸਪਞ੍ਞਾ, ਬਹੁਸ੍ਸੁਤਾ ਯੇ ਬਹੁਠਾਨਚਿਨ੍ਤਿਨੋ;
ਨਾਰਿਯੋ ਚ ਦਿਸ੍ਵਾਨ ਮਮਞ੍ਚ ਰਾਜ, ਕਰੋਹਿ ਪੁਞ੍ਞਾਨਿ ਅਨਪ੍ਪਕਾਨਿ.
੨੮੧. ਇਦਞ੍ਚ ਮੇ ਜਾਤਰੂਪਂ ਪਹੂਤਂ, ਰਾਸੀ ਸੁਵਣ੍ਣਸ੍ਸ ਚ ਤਾਲਮਤ੍ਤਾ;
[ਇਤੋ ਹਰਿਤ੍ਵਾ ਸੋਵਣ੍ਣਘਰਾਨਿ ਕਾਰਯ, ਰੂਪਿਯਸ੍ਸ ਚ ਪਾਕਾਰਂ ਕਰੋਨ੍ਤੁ (ਸੀ. ਸ੍ਯਾ.) ਇਤੋ ਹਰਿਤ੍ਵਾ ਸੋਵਣ੍ਣਘਰਾਨਿ, [ਕਾਰਯ] ਰੂਪਿਯਸ੍ਸ ਚ ਪਾਕਾਰਂ ਕਰੋਨ੍ਤੁ (ਪੀ.)] ਇਤੋ ਹਰਿਤ੍ਵਾਨ ਸੁਵਣ੍ਣਘਰਾਨਿ, ਕਰਸ੍ਸੁ ਰੂਪਿਯਪਾਕਾਰਂ ਕਰੋਨ੍ਤੁ [ਇਤੋ ਹਰਿਤ੍ਵਾ ਸੋਵਣ੍ਣਘਰਾਨਿ ਕਾਰਯ, ਰੂਪਿਯਸ੍ਸ ਚ ਪਾਕਾਰਂ ਕਰੋਨ੍ਤੁ (ਸੀ. ਸ੍ਯਾ.) ਇਤੋ ਹਰਿਤ੍ਵਾ ਸੋਵਣ੍ਣਘਰਾਨਿ, [ਕਾਰਯ] ਰੂਪਿਯਸ੍ਸ ਚ ਪਾਕਾਰਂ ਕਰੋਨ੍ਤੁ (ਪੀ.)].
੨੮੨. ਮੁਤ੍ਤਾ ਚ [ਮੁਤ੍ਤਾਨਞ੍ਚ (ਸੀ. ਸ੍ਯਾ.)] ਵਾਹਸਹਸ੍ਸਾਨਿ ਪਞ੍ਚ, ਵੇਲ਼ੁਰਿਯਮਿਸ੍ਸਾਨਿ ਇਤੋ ਹਰਿਤ੍ਵਾ;
ਅਨ੍ਤੇਪੁਰੇ ਭੂਮਿਯਂ ਸਨ੍ਥਰਨ੍ਤੁ, ਨਿਕ੍ਕਦ੍ਦਮਾ ਹੇਹਿਤਿ ਨੀਰਜਾ ਚ.
੨੮੩. ਏਤਾਦਿਸਂ ਆਵਸ ਰਾਜਸੇਟ੍ਠ, ਵਿਮਾਨਸੇਟ੍ਠਂ ਬਹੁ ਸੋਭਮਾਨਂ;
ਬਾਰਾਣਸਿਂ ਨਗਰਂ ਇਦ੍ਧਂ ਫੀਤਂ, ਰਜ੍ਜਞ੍ਚ ਕਾਰੇਹਿ ਅਨੋਮਪਞ੍ਞਾਤਿ.
ਚਮ੍ਪੇਯ੍ਯਜਾਤਕਂ ਦਸਮਂ.