੫੦੫. ਸੋਮਨਸ੍ਸਜਾਤਕਂ (੯)
੨੧੧. ਕੋ ਤਂ ਹਿਂਸਤਿ ਹੇਠੇਤਿ, ਕਿਂ [ਕਿਨ੍ਨੁ (ਪੀ. ਕ.)] ਦੁਮ੍ਮਨੋ ਸੋਚਸਿ ਅਪ੍ਪਤੀਤੋ;
ਕਸ੍ਸਜ੍ਜ ਮਾਤਾਪਿਤਰੋ ਰੁਦਨ੍ਤੁ, ਕ੍ਵਜ੍ਜ ਸੇਤੁ [ਕੋ ਨ੍ਵੇਜ੍ਜ ਸੇਤਿ (ਕ.), ਕੋ ਅਜ੍ਜ ਸੇਤੁ (?)] ਨਿਹਤੋ ਪਥਬ੍ਯਾ.
੨੧੨. ਤੁਟ੍ਠੋਸ੍ਮਿ ਦੇਵ ਤਵ ਦਸ੍ਸਨੇਨ, ਚਿਰਸ੍ਸਂ ਪਸ੍ਸਾਮਿ ਤਂ ਭੂਮਿਪਾਲ;
ਅਹਿਂਸਕੋ ਰੇਣੁਮਨੁਪ੍ਪਵਿਸ੍ਸ, ਪੁਤ੍ਤੇਨ ਤੇ ਹੇਠਯਿਤੋਸ੍ਮਿ [ਪੋਥਯਿਤੋਸ੍ਮਿ (ਕ.)] ਦੇਵ.
੨੧੩. ਆਯਨ੍ਤੁ ਦੋਵਾਰਿਕਾ ਖਗ੍ਗਬਨ੍ਧਾ [ਖਗ੍ਗਬਦ੍ਧਾ (ਸੀ. ਪੀ.)], ਕਾਸਾਵਿਯਾ ਯਨ੍ਤੁ [ਹਨ੍ਤੁ (ਕ.)] ਅਨ੍ਤੇਪੁਰਨ੍ਤਂ;
ਹਨ੍ਤ੍ਵਾਨ ਤਂ ਸੋਮਨਸ੍ਸਂ ਕੁਮਾਰਂ, ਛੇਤ੍ਵਾਨ ਸੀਸਂ ਵਰਮਾਹਰਨ੍ਤੁ.
੨੧੪. ਪੇਸਿਤਾ ਰਾਜਿਨੋ ਦੂਤਾ, ਕੁਮਾਰਂ ਏਤਦਬ੍ਰਵੁਂ;
ਇਸ੍ਸਰੇਨ ਵਿਤਿਣ੍ਣੋਸਿ, ਵਧਂ ਪਤ੍ਤੋਸਿ ਖਤ੍ਤਿਯ.
੨੧੫. ਸ ਰਾਜਪੁਤ੍ਤੋ ਪਰਿਦੇਵਯਨ੍ਤੋ, ਦਸਙ੍ਗੁਲਿਂ ਅਞ੍ਜਲਿਂ ਪਗ੍ਗਹੇਤ੍ਵਾ;
ਅਹਮ੍ਪਿ ਇਚ੍ਛਾਮਿ ਜਨਿਨ੍ਦ ਦਟ੍ਠੁਂ, ਜੀਵਂ ਮਂ ਨੇਤ੍ਵਾ [ਜੀਵਂ ਪਨੇਤ੍ਵਾ (ਸੀ. ਪੀ.)] ਪਟਿਦਸ੍ਸਯੇਥ.
੨੧੬. ਤਸ੍ਸ ਤਂ ਵਚਨਂ ਸੁਤ੍ਵਾ, ਰਞ੍ਞੋ ਪੁਤ੍ਤਂ ਅਦਸ੍ਸਯੁਂ;
ਪੁਤ੍ਤੋ ਚ ਪਿਤਰਂ ਦਿਸ੍ਵਾ, ਦੂਰਤੋਵਜ੍ਝਭਾਸਥ.
੨੧੭. ਆਗਚ੍ਛੁਂ [ਆਗਞ੍ਛੁਂ (ਸੀ.), ਆਗਞ੍ਛੁ (ਪੀ.)] ਦੋਵਾਰਿਕਾ ਖਗ੍ਗਬਨ੍ਧਾ, ਕਾਸਾਵਿਯਾ ਹਨ੍ਤੁ ਮਮਂ ਜਨਿਨ੍ਦ;
ਅਕ੍ਖਾਹਿ ਮੇ ਪੁਚ੍ਛਿਤੋ ਏਤਮਤ੍ਥਂ, ਅਪਰਾਧੋ ਕੋ ਨਿਧ ਮਮਜ੍ਜ ਅਤ੍ਥਿ.
੨੧੮. ਸਾਯਞ੍ਚ ਪਾਤੋ ਉਦਕਂ ਸਜਾਤਿ, ਅਗ੍ਗਿਂ ਸਦਾ ਪਾਰਿਚਰਤਪ੍ਪਮਤ੍ਤੋ;
ਤਂ ਤਾਦਿਸਂ ਸਂਯਤਂ ਬ੍ਰਹ੍ਮਚਾਰਿਂ, ਕਸ੍ਮਾ ਤੁਵਂ ਬ੍ਰੂਸਿ ਗਹਪ੍ਪਤੀਤਿ.
੨੧੯. ਤਾਲਾ ਚ ਮੂਲਾ ਚ ਫਲਾ ਚ ਦੇਵ, ਪਰਿਗ੍ਗਹਾ ਵਿਵਿਧਾ ਸਨ੍ਤਿਮਸ੍ਸ;
ਤੇ ਰਕ੍ਖਤਿ ਗੋਪਯਤਪ੍ਪਮਤ੍ਤੋ, [ਬ੍ਰਾਹ੍ਮਣੋ ਗਹਪਤਿ ਤੇਨ ਹੋਤਿ (ਸੀ. ਸ੍ਯਾ. ਪੀ.)] ਤਸ੍ਮਾ ਅਹਂ ਬ੍ਰੂਮਿ ਗਹਪ੍ਪਤੀਤਿ [ਬ੍ਰਾਹ੍ਮਣੋ ਗਹਪਤਿ ਤੇਨ ਹੋਤਿ (ਸੀ. ਸ੍ਯਾ. ਪੀ.)].
੨੨੦. ਸਚ੍ਚਂ ਖੋ ਏਤਂ ਵਦਸਿ ਕੁਮਾਰ, ਪਰਿਗ੍ਗਹਾ ਵਿਵਿਧਾ ਸਨ੍ਤਿਮਸ੍ਸ;
ਤੇ ਰਕ੍ਖਤਿ ਗੋਪਯਤਪ੍ਪਮਤ੍ਤੋ, ਸ [ਨਤ੍ਥਿ ਇਦਂ ਸੀ. ਸ੍ਯਾ. ਪੀ. ਪੋਤ੍ਥਕੇਸੁ] ਬ੍ਰਾਹ੍ਮਣੋ ਗਹਪਤਿ ਤੇਨ ਹੋਤਿ.
੨੨੧. ਸੁਣਨ੍ਤੁ ਮਯ੍ਹਂ ਪਰਿਸਾ ਸਮਾਗਤਾ, ਸਨੇਗਮਾ ਜਾਨਪਦਾ ਚ ਸਬ੍ਬੇ;
ਬਾਲਾਯਂ ਬਾਲਸ੍ਸ ਵਚੋ ਨਿਸਮ੍ਮ, ਅਹੇਤੁਨਾ ਘਾਤਯਤੇ ਮਂ [ਘਾਤਯਤੇ (ਸੀ. ਪੀ.)] ਜਨਿਨ੍ਦੋ.
੨੨੨. ਦਲ਼੍ਹਸ੍ਮਿ ਮੂਲੇ ਵਿਸਟੇ ਵਿਰੂਲ਼੍ਹੇ, ਦੁਨ੍ਨਿਕ੍ਕਯੋ ਵੇਲ਼ੁ ਪਸਾਖਜਾਤੋ;
ਵਨ੍ਦਾਮਿ ਪਾਦਾਨਿ ਤਵ [ਤਵਂ (ਸੀ. ਪੀ.)] ਜਨਿਨ੍ਦ, ਅਨੁਜਾਨ ਮਂ ਪਬ੍ਬਜਿਸ੍ਸਾਮਿ ਦੇਵ.
੨੨੩. ਭੁਞ੍ਜਸ੍ਸੁ ਭੋਗੇ ਵਿਪੁਲੇ ਕੁਮਾਰ, ਸਬ੍ਬਞ੍ਚ ਤੇ ਇਸ੍ਸਰਿਯਂ ਦਦਾਮਿ;
ਅਜ੍ਜੇਵ ਤ੍ਵਂ ਕੁਰੂਨਂ ਹੋਹਿ ਰਾਜਾ, ਮਾ ਪਬ੍ਬਜੀ ਪਬ੍ਬਜ੍ਜਾ ਹਿ ਦੁਕ੍ਖਾ.
੨੨੪. ਕਿਨ੍ਨੂਧ ਦੇਵ ਤਵਮਤ੍ਥਿ ਭੋਗਾ, ਪੁਬ੍ਬੇਵਹਂ [ਪੁਬ੍ਬੇ ਚਹਂ (ਕ.)] ਦੇਵਲੋਕੇ ਰਮਿਸ੍ਸਂ;
ਰੂਪੇਹਿ ਸਦ੍ਦੇਹਿ ਅਥੋ ਰਸੇਹਿ, ਗਨ੍ਧੇਹਿ ਫਸ੍ਸੇਹਿ ਮਨੋਰਮੇਹਿ.
੨੨੫. ਭੁਤ੍ਤਾ ਚ ਮੇ [ਭੁਤ੍ਤਾ (ਸੀ. ਪੀ.)] ਭੋਗਾ ਤਿਦਿਵਸ੍ਮਿਂ ਦੇਵ, ਪਰਿਵਾਰਿਤਾ [ਪਰਿਚਾਰਿਤਾ (ਕ.)] ਅਚ੍ਛਰਾਨਂ ਗਣੇਨ [ਅਚ੍ਛਰਾਸਂਗਣੇਨ (ਸ੍ਯਾ. ਪੀ. ਕ.)];
ਤੁਵਞ੍ਚ [ਤਵਞ੍ਚ (ਸੀ. ਪੀ.)] ਬਾਲਂ ਪਰਨੇਯ੍ਯਂ ਵਿਦਿਤ੍ਵਾ, ਨ ਤਾਦਿਸੇ ਰਾਜਕੁਲੇ ਵਸੇਯ੍ਯਂ.
੨੨੬. ਸਚਾਹਂ ਬਾਲੋ ਪਰਨੇਯ੍ਯੋ ਅਸ੍ਮਿ, ਏਕਾਪਰਾਧਂ [ਏਤਾਪਰਾਧਂ (ਕ.)] ਖਮ ਪੁਤ੍ਤ ਮਯ੍ਹਂ;
ਪੁਨਪਿ ਚੇ ਏਦਿਸਕਂ ਭਵੇਯ੍ਯ, ਯਥਾਮਤਿਂ ਸੋਮਨਸ੍ਸ ਕਰੋਹਿ.
੨੨੭. ਅਨਿਸਮ੍ਮ ਕਤਂ ਕਮ੍ਮਂ, ਅਨਵਤ੍ਥਾਯ ਚਿਨ੍ਤਿਤਂ;
ਭੇਸਜ੍ਜਸ੍ਸੇਵ ਵੇਭਙ੍ਗੋ, ਵਿਪਾਕੋ ਹੋਤਿ ਪਾਪਕੋ.
੨੨੮. ਨਿਸਮ੍ਮ ਚ ਕਤਂ ਕਮ੍ਮਂ, ਸਮ੍ਮਾਵਤ੍ਥਾਯ ਚਿਨ੍ਤਿਤਂ;
ਭੇਸਜ੍ਜਸ੍ਸੇਵ ਸਮ੍ਪਤ੍ਤਿ, ਵਿਪਾਕੋ ਹੋਤਿ ਭਦ੍ਰਕੋ.
੨੨੯. ਅਲਸੋ ਗਿਹੀ ਕਾਮਭੋਗੀ ਨ ਸਾਧੁ, ਅਸਞ੍ਞਤੋ ਪਬ੍ਬਜਿਤੋ ਨ ਸਾਧੁ;
ਰਾਜਾ ਨ ਸਾਧੁ ਅਨਿਸਮ੍ਮਕਾਰੀ, ਯੋ ਪਣ੍ਡਿਤੋ ਕੋਧਨੋ ਤਂ ਨ ਸਾਧੁ.
੨੩੦. ਨਿਸਮ੍ਮ ਖਤ੍ਤਿਯੋ ਕਯਿਰਾ, ਨਾਨਿਸਮ੍ਮ ਦਿਸਮ੍ਪਤਿ;
ਨਿਸਮ੍ਮਕਾਰਿਨੋ ਰਾਜ, ਯਸੋ ਕਿਤ੍ਤਿ ਚ ਵਡ੍ਢਤਿ.
੨੩੧. ਨਿਸਮ੍ਮ ਦਣ੍ਡਂ ਪਣਯੇਯ੍ਯ ਇਸ੍ਸਰੋ, ਵੇਗਾ ਕਤਂ ਤਪ੍ਪਤਿ ਭੂਮਿਪਾਲ;
ਸਮ੍ਮਾਪਣੀਧੀ ਚ ਨਰਸ੍ਸ ਅਤ੍ਥਾ, ਅਨਾਨੁਤਪ੍ਪਾ ਤੇ ਭਵਨ੍ਤਿ ਪਚ੍ਛਾ.
੨੩੨. ਅਨਾਨੁਤਪ੍ਪਾਨਿ ਹਿ ਯੇ ਕਰੋਨ੍ਤਿ, ਵਿਭਜ੍ਜ ਕਮ੍ਮਾਯਤਨਾਨਿ ਲੋਕੇ;
ਵਿਞ੍ਞੁਪ੍ਪਸਤ੍ਥਾਨਿ ਸੁਖੁਦ੍ਰਯਾਨਿ, ਭਵਨ੍ਤਿ ਬੁਦ੍ਧਾਨੁਮਤਾਨਿ [ਵਦ੍ਧਾਨੁਮਤਾਨਿ (ਸੀ. ਪੀ.)] ਤਾਨਿ.
੨੩੩. ਆਗਚ੍ਛੁਂ ਦੋਵਾਰਿਕਾ ਖਗ੍ਗਬਨ੍ਧਾ, ਕਾਸਾਵਿਯਾ ਹਨ੍ਤੁ ਮਮਂ ਜਨਿਨ੍ਦ;
ਮਾਤੁਞ੍ਚ [ਮਾਤੁਚ੍ਚ (ਪੀ.)] ਅਙ੍ਕਸ੍ਮਿਮਹਂ ਨਿਸਿਨ੍ਨੋ, ਆਕਡ੍ਢਿਤੋ ਸਹਸਾ ਤੇਹਿ ਦੇਵ.
੨੩੪. ਕਟੁਕਞ੍ਹਿ ਸਮ੍ਬਾਧਂ ਸੁਕਿਚ੍ਛਂ [ਸੁਕਿਚ੍ਛ (ਸੀ. ਪੀ.)] ਪਤ੍ਤੋ, ਮਧੁਰਮ੍ਪਿ ਯਂ ਜੀਵਿਤਂ ਲਦ੍ਧ ਰਾਜ;
ਕਿਚ੍ਛੇਨਹਂ ਅਜ੍ਜ ਵਧਾ ਪਮੁਤ੍ਤੋ, ਪਬ੍ਬਜ੍ਜਮੇਵਾਭਿਮਨੋਹਮਸ੍ਮਿ.
੨੩੫. ਪੁਤ੍ਤੋ ਤਵਾਯਂ ਤਰੁਣੋ ਸੁਧਮ੍ਮੇ, ਅਨੁਕਮ੍ਪਕੋ ਸੋਮਨਸ੍ਸੋ ਕੁਮਾਰੋ;
ਤਂ ਯਾਚਮਾਨੋ ਨ ਲਭਾਮਿ ਸ੍ਵਜ੍ਜ [ਸਜ੍ਜ (ਸੀ. ਪੀ.)], ਅਰਹਸਿ ਨਂ ਯਾਚਿਤਵੇ [ਯਾਚਿਤੁਯੇ (ਕ.)] ਤੁਵਮ੍ਪਿ.
੨੩੬. ਰਮਸ੍ਸੁ ਭਿਕ੍ਖਾਚਰਿਯਾਯ ਪੁਤ੍ਤ, ਨਿਸਮ੍ਮ ਧਮ੍ਮੇਸੁ ਪਰਿਬ੍ਬਜਸ੍ਸੁ;
ਸਬ੍ਬੇਸੁ ਭੂਤੇਸੁ ਨਿਧਾਯ ਦਣ੍ਡਂ, ਅਨਿਨ੍ਦਿਤੋ ਬ੍ਰਹ੍ਮਮੁਪੇਹਿ ਠਾਨਂ.
੨੩੭. ਅਚ੍ਛੇਰ [ਅਚ੍ਛਰਿਯ (ਸੀ. ਸ੍ਯਾ. ਪੀ.)] ਰੂਪਂ ਵਤ ਯਾਦਿਸਞ੍ਚ, ਦੁਕ੍ਖਿਤਂ ਮਂ ਦੁਕ੍ਖਾਪਯਸੇ ਸੁਧਮ੍ਮੇ;
ਯਾਚਸ੍ਸੁ ਪੁਤ੍ਤਂ ਇਤਿ ਵੁਚ੍ਚਮਾਨਾ, ਭਿਯ੍ਯੋਵ ਉਸ੍ਸਾਹਯਸੇ ਕੁਮਾਰਂ.
੨੩੮. ਯੇ ਵਿਪ੍ਪਮੁਤ੍ਤਾ ਅਨਵਜ੍ਜਭੋਗਿਨੋ [ਭੋਜਿਨੋ (ਸੀ. ਸ੍ਯਾ. ਪੀ.)], ਪਰਿਨਿਬ੍ਬੁਤਾ ਲੋਕਮਿਮਂ ਚਰਨ੍ਤਿ;
ਤਮਰਿਯਮਗ੍ਗਂ ਪਟਿਪਜ੍ਜਮਾਨਂ, ਨ ਉਸ੍ਸਹੇ ਵਾਰਯਿਤੁਂ ਕੁਮਾਰਂ.
੨੩੯. ਅਦ੍ਧਾ ਹਵੇ ਸੇਵਿਤਬ੍ਬਾ ਸਪਞ੍ਞਾ, ਬਹੁਸ੍ਸੁਤਾ ਯੇ ਬਹੁਠਾਨਚਿਨ੍ਤਿਨੋ;
ਯੇਸਾਯਂ ਸੁਤ੍ਵਾਨ ਸੁਭਾਸਿਤਾਨਿ, ਅਪ੍ਪੋਸ੍ਸੁਕ੍ਕਾ ਵੀਤਸੋਕਾ ਸੁਧਮ੍ਮਾਤਿ.
ਸੋਮਨਸ੍ਸਜਾਤਕਂ ਨਵਮਂ.