੫੦੪. ਭਲ੍ਲਾਤਿਯਜਾਤਕਂ (੮)

੧੮੬. ਭਲ੍ਲਾਤਿਯੋ [ਭਲ੍ਲਾਟਿਯੋ (ਸੀ. ਪੀ.)] ਨਾਮ ਅਹੋਸਿ ਰਾਜਾ, ਰਟ੍ਠਂ ਪਹਾਯ ਮਿਗਵਂ ਅਚਾਰਿ ਸੋ;

ਅਗਮਾ ਗਿਰਿਵਰਂ ਗਨ੍ਧਮਾਦਨਂ, ਸੁਪੁਪ੍ਫਿਤਂ [ਸਮ੍ਪੁਪ੍ਫਿਤਂ (ਸੀ. ਪੀ.)] ਕਿਮ੍ਪੁਰਿਸਾਨੁਚਿਣ੍ਣਂ.

੧੮੭. ਸਾਲ਼ੂਰਸਙ੍ਘਞ੍ਚ ਨਿਸੇਧਯਿਤ੍ਵਾ, ਧਨੁਂ [ਧਨੁ (ਸੀ. ਸ੍ਯਾ. ਪੀ.)] ਕਲਾਪਞ੍ਚ ਸੋ ਨਿਕ੍ਖਿਪਿਤ੍ਵਾ;

ਉਪਾਗਮਿ ਵਚਨਂ ਵਤ੍ਤੁਕਾਮੋ, ਯਤ੍ਥਟ੍ਠਿਤਾ ਕਿਮ੍ਪੁਰਿਸਾ ਅਹੇਸੁਂ.

੧੮੮. ਹਿਮਚ੍ਚਯੇ ਹੇਮਵਤਾਯ ਤੀਰੇ, ਕਿਮਿਧਟ੍ਠਿਤਾ ਮਨ੍ਤਯਵ੍ਹੋ ਅਭਿਣ੍ਹਂ;

ਪੁਚ੍ਛਾਮਿ ਵੋ ਮਾਨੁਸਦੇਹਵਣ੍ਣੇ, ਕਥਂ ਨੁ [ਕਥਂ ਵੋ (ਸੀ. ਸ੍ਯਾ. ਪੀ.)] ਜਾਨਨ੍ਤਿ ਮਨੁਸ੍ਸਲੋਕੇ.

੧੮੯. ਮਲ੍ਲਂ ਗਿਰਿਂ ਪਣ੍ਡਰਕਂ ਤਿਕੂਟਂ, ਸੀਤੋਦਕਾ [ਸੀਤੋਦਿਯਾ (ਸੀ. ਪੀ.), ਸੀਤੋਦਿਕਾ (?)] ਅਨੁਵਿਚਰਾਮ ਨਜ੍ਜੋ;

ਮਿਗਾ ਮਨੁਸ੍ਸਾਵ ਨਿਭਾਸਵਣ੍ਣਾ, ਜਾਨਨ੍ਤਿ ਨੋ ਕਿਮ੍ਪੁਰਿਸਾਤਿ ਲੁਦ੍ਦ.

੧੯੦. ਸੁਕਿਚ੍ਛਰੂਪਂ ਪਰਿਦੇਵਯਵ੍ਹੋ [ਪਰਿਦੇਵਥਵ੍ਹੋ (?) ਮੋਗ੍ਗਲ੍ਲਾਨਬ੍ਯਾਕਰਣੇ ੬.੩੮ ਸੁਤ੍ਤਂ], ਆਲਿਙ੍ਗਿਤੋ ਚਾਸਿ ਪਿਯੋ ਪਿਯਾਯ;

ਪੁਚ੍ਛਾਮਿ ਵੋ ਮਾਨੁਸਦੇਹਵਣ੍ਣੇ, ਕਿਮਿਧ ਵਨੇ ਰੋਦਥ ਅਪ੍ਪਤੀਤਾ.

੧੯੧. ਸੁਕਿਚ੍ਛਰੂਪਂ ਪਰਿਦੇਵਯਵ੍ਹੋ, ਆਲਿਙ੍ਗਿਤੋ ਚਾਸਿ ਪਿਯੋ ਪਿਯਾਯ;

ਪੁਚ੍ਛਾਮਿ ਵੋ ਮਾਨੁਸਦੇਹਵਣ੍ਣੇ, ਕਿਮਿਧ ਵਨੇ ਵਿਲਪਥ ਅਪ੍ਪਤੀਤਾ.

੧੯੨. ਸੁਕਿਚ੍ਛਰੂਪਂ ਪਰਿਦੇਵਯਵ੍ਹੋ, ਆਲਿਙ੍ਗਿਤੋ ਚਾਸਿ ਪਿਯੋ ਪਿਯਾਯ;

ਪੁਚ੍ਛਾਮਿ ਵੋ ਮਾਨੁਸਦੇਹਵਣ੍ਣੇ, ਕਿਮਿਧ ਵਨੇ ਸੋਚਥ ਅਪ੍ਪਤੀਤਾ.

੧੯੩. ਮਯੇਕਰਤ੍ਤਂ [ਰਤ੍ਤਿਂ (ਪੀ.)] ਵਿਪ੍ਪਵਸਿਮ੍ਹ ਲੁਦ੍ਦ, ਅਕਾਮਕਾ ਅਞ੍ਞਮਞ੍ਞਂ ਸਰਨ੍ਤਾ;

ਤਮੇਕਰਤ੍ਤਂ ਅਨੁਤਪ੍ਪਮਾਨਾ, ਸੋਚਾਮ ‘‘ਸਾ ਰਤ੍ਤਿ ਪੁਨਂ ਨ ਹੇਸ੍ਸਤਿ’’.

੧੯੪. ਯਮੇਕਰਤ੍ਤਂ ਅਨੁਤਪ੍ਪਥੇਤਂ, ਧਨਂ ਵ ਨਟ੍ਠਂ ਪਿਤਰਂ ਵ ਪੇਤਂ;

ਪੁਚ੍ਛਾਮਿ ਵੋ ਮਾਨੁਸਦੇਹਵਣ੍ਣੇ, ਕਥਂ ਵਿਨਾ ਵਾਸਮਕਪ੍ਪਯਿਤ੍ਥ.

੧੯੫. ਯਮਿਮਂ [ਯਯਿਮਂ (ਕ. ਸੀ.)] ਨਦਿਂ ਪਸ੍ਸਸਿ ਸੀਘਸੋਤਂ, ਨਾਨਾਦੁਮਚ੍ਛਾਦਨਂ ਸੇਲਕੂਲਂ [ਦੁਮਚ੍ਛਦਨਂ ਸੇਲਕੂਟਂ (ਸੀ. ਪੀ.), ਦੁਮਸਞ੍ਛਨ੍ਨਂ ਸੇਲਕੂਲਂ (ਕ.)];

ਤਂ ਮੇ ਪਿਯੋ ਉਤ੍ਤਰਿ ਵਸ੍ਸਕਾਲੇ, ਮਮਞ੍ਚ ਮਞ੍ਞਂ ਅਨੁਬਨ੍ਧਤੀਤਿ.

੧੯੬. ਅਹਞ੍ਚ ਅਙ੍ਕੋਲਕਮੋਚਿਨਾਮਿ, ਅਤਿਮੁਤ੍ਤਕਂ ਸਤ੍ਤਲਿਯੋਥਿਕਞ੍ਚ;

‘‘ਪਿਯੋ ਚ ਮੇ ਹੇਹਿਤਿ ਮਾਲਭਾਰੀ, ਅਹਞ੍ਚ ਨਂ ਮਾਲਿਨੀ ਅਜ੍ਝੁਪੇਸ੍ਸਂ’’.

੧੯੭. ਅਹਞ੍ਚਿਦਂ ਕੁਰਵਕਮੋਚਿਨਾਮਿ, ਉਦ੍ਦਾਲਕਾ ਪਾਟਲਿਸਿਨ੍ਧੁਵਾਰਕਾ [ਸਿਨ੍ਧੁਵਾਰਿਤਾ (ਸ੍ਯਾ. ਪੀ. ਕ.)];

‘‘ਪਿਯੋ ਚ ਮੇ ਹੇਹਿਤਿ ਮਾਲਭਾਰੀ, ਅਹਞ੍ਚ ਨਂ ਮਾਲਿਨੀ ਅਜ੍ਝੁਪੇਸ੍ਸਂ’’.

੧੯੮. ਅਹਞ੍ਚ ਸਾਲਸ੍ਸ ਸੁਪੁਪ੍ਫਿਤਸ੍ਸ, ਓਚੇਯ੍ਯ ਪੁਪ੍ਫਾਨਿ ਕਰੋਮਿ ਮਾਲਂ;

‘‘ਪਿਯੋ ਚ ਮੇ ਹੇਹਿਤਿ ਮਾਲਭਾਰੀ, ਅਹਞ੍ਚ ਨਂ ਮਾਲਿਨੀ ਅਜ੍ਝੁਪੇਸ੍ਸਂ’’.

੧੯੯. ਅਹਞ੍ਚ ਸਾਲਸ੍ਸ ਸੁਪੁਪ੍ਫਿਤਸ੍ਸ, ਓਚੇਯ੍ਯ ਪੁਪ੍ਫਾਨਿ ਕਰੋਮਿ ਭਾਰਂ;

ਇਦਞ੍ਚ ਨੋ ਹੇਹਿਤਿ ਸਨ੍ਥਰਤ੍ਥਂ, ਯਤ੍ਥਜ੍ਜਿਮਂ [ਯਤ੍ਥਜ੍ਜਮਂ (ਸੀ. ਪੀ.)] ਵਿਹਰਿਸ੍ਸਾਮ [ਵਿਹਰਿਸ੍ਸਾਮੁ (ਪੀ.)] ਰਤ੍ਤਿਂ.

੨੦੦. ਅਹਞ੍ਚ ਖੋ ਅਗਲ਼ੁਂ [ਅਗ੍ਗਲੁ (ਸ੍ਯਾ. ਕ.), ਅਕਲੁਂ (ਪੀ.)] ਚਨ੍ਦਨਞ੍ਚ, ਸਿਲਾਯ ਪਿਂਸਾਮਿ ਪਮਤ੍ਤਰੂਪਾ;

‘‘ਪਿਯੋ ਚ ਮੇ ਹੇਹਿਤਿ ਰੋਸਿਤਙ੍ਗੋ, ਅਹਞ੍ਚ ਨਂ ਰੋਸਿਤਾ ਅਜ੍ਝੁਪੇਸ੍ਸਂ’’.

੨੦੧. ਅਥਾਗਮਾ ਸਲਿਲਂ ਸੀਘਸੋਤਂ, ਨੁਦਂ ਸਾਲੇ ਸਲਲ਼ੇ ਕਣ੍ਣਿਕਾਰੇ;

ਆਪੂਰਥ [ਅਪੂਰਥ (ਸੀ. ਪੀ.), ਆਪੂਰਥੇ (ਸ੍ਯਾ.)] ਤੇਨ ਮੁਹੁਤ੍ਤਕੇਨ, ਸਾਯਂ ਨਦੀ ਆਸਿ ਮਯਾ ਸੁਦੁਤ੍ਤਰਾ.

੨੦੨. ਉਭੋਸੁ ਤੀਰੇਸੁ ਮਯਂ ਤਦਾ ਠਿਤਾ, ਸਮ੍ਪਸ੍ਸਨ੍ਤਾ ਉਭਯੋ ਅਞ੍ਞਮਞ੍ਞਂ;

ਸਕਿਮ੍ਪਿ ਰੋਦਾਮ ਸਕਿਂ ਹਸਾਮ, ਕਿਚ੍ਛੇਨ ਨੋ ਆਗਮਾ [ਅਗਮਾ (ਸੀ. ਸ੍ਯਾ. ਪੀ.)] ਸਂਵਰੀ ਸਾ.

੨੦੩. ਪਾਤੋਵ [ਪਾਤੋ ਚ (ਸੀ. ਸ੍ਯਾ. ਪੀ.)] ਖੋ ਉਗ੍ਗਤੇ ਸੂਰਿਯਮ੍ਹਿ, ਚਤੁਕ੍ਕਂ ਨਦਿਂ ਉਤ੍ਤਰਿਯਾਨ ਲੁਦ੍ਦ;

ਆਲਿਙ੍ਗਿਯਾ ਅਞ੍ਞਮਞ੍ਞਂ ਮਯਂ ਉਭੋ, ਸਕਿਮ੍ਪਿ ਰੋਦਾਮ ਸਕਿਂ ਹਸਾਮ.

੨੦੪. ਤੀਹੂਨਕਂ ਸਤ੍ਤਸਤਾਨਿ ਲੁਦ੍ਦ, ਯਮਿਧ ਮਯਂ ਵਿਪ੍ਪਵਸਿਮ੍ਹ ਪੁਬ੍ਬੇ;

ਵਸ੍ਸੇਕਿਮਂ [ਵਾਸੇਕਿਮਂ (ਸੀ. ਪੀ.)] ਜੀਵਿਤਂ ਭੂਮਿਪਾਲ, ਕੋ ਨੀਧ ਕਨ੍ਤਾਯ ਵਿਨਾ ਵਸੇਯ੍ਯ.

੨੦੫. ਆਯੁਞ੍ਚ ਵੋ ਕੀਵਤਕੋ ਨੁ ਸਮ੍ਮ, ਸਚੇਪਿ ਜਾਨਾਥ ਵਦੇਥ ਆਯੁਂ;

ਅਨੁਸ੍ਸਵਾ ਵੁਡ੍ਢਤੋ ਆਗਮਾ ਵਾ, ਅਕ੍ਖਾਥ ਮੇ ਤਂ ਅਵਿਕਮ੍ਪਮਾਨਾ.

੨੦੬. ਆਯੁਞ੍ਚ ਨੋ ਵਸ੍ਸਸਹਸ੍ਸਂ ਲੁਦ੍ਦ, ਨ ਚਨ੍ਤਰਾ ਪਾਪਕੋ ਅਤ੍ਥਿ ਰੋਗੋ;

ਅਪ੍ਪਞ੍ਚ [ਅਪ੍ਪਂਵ (ਸ੍ਯਾ. ਕ.)] ਦੁਕ੍ਖਂ ਸੁਖਮੇਵ ਭਿਯ੍ਯੋ, ਅਵੀਤਰਾਗਾ ਵਿਜਹਾਮ ਜੀਵਿਤਂ.

੨੦੭. ਇਦਞ੍ਚ ਸੁਤ੍ਵਾਨ ਅਮਾਨੁਸਾਨਂ, ਭਲ੍ਲਾਤਿਯੋ ਇਤ੍ਤਰ ਜੀਵਿਤਨ੍ਤਿ;

ਨਿਵਤ੍ਤਥ ਨ ਮਿਗਵਂ ਅਚਰਿ, ਅਦਾਸਿ ਦਾਨਾਨਿ ਅਭੁਞ੍ਜਿ ਭੋਗੇ.

੨੦੮. ਇਦਞ੍ਚ ਸੁਤ੍ਵਾਨ ਅਮਾਨੁਸਾਨਂ, ਸਮ੍ਮੋਦਥ ਮਾ ਕਲਹਂ ਅਕਤ੍ਥ;

ਮਾ ਵੋ ਤਪੀ ਅਤ੍ਤਕਮ੍ਮਾਪਰਾਧੋ, ਯਥਾਪਿ ਤੇ ਕਿਮ੍ਪੁਰਿਸੇਕਰਤ੍ਤਂ.

੨੦੯. ਇਦਞ੍ਚ ਸੁਤ੍ਵਾਨ ਅਮਾਨੁਸਾਨਂ, ਸਮ੍ਮੋਦਥ ਮਾ ਵਿਵਾਦਂ ਅਕਤ੍ਥ;

ਮਾ ਵੋ ਤਪੀ ਅਤ੍ਤਕਮ੍ਮਾਪਰਾਧੋ, ਯਥਾਪਿ ਤੇ ਕਿਮ੍ਪੁਰਿਸੇਕਰਤ੍ਤਂ.

੨੧੦. ਵਿਵਿਧਂ [ਵਿਵਿਧ (ਸੀ. ਸ੍ਯਾ.)] ਅਧਿਮਨਾ ਸੁਣੋਮਹਂ, ਵਚਨਪਥਂ ਤਵ ਅਤ੍ਥਸਂਹਿਤਂ;

ਮੁਞ੍ਚਂ [ਮੁਞ੍ਚ (ਸੀ. ਪੀ.)] ਗਿਰਂ ਨੁਦਸੇਵ ਮੇ ਦਰਂ, ਸਮਣ ਸੁਖਾਵਹ ਜੀਵ ਮੇ ਚਿਰਨ੍ਤਿ.

ਭਲ੍ਲਾਤਿਯਜਾਤਕਂ ਅਟ੍ਠਮਂ.