੫੦੩. ਸਤ੍ਤਿਗੁਮ੍ਬਜਾਤਕਂ (੭)

੧੫੯. ਮਿਗਲੁਦ੍ਦੋ ਮਹਾਰਾਜਾ, ਪਞ੍ਚਾਲਾਨਂ ਰਥੇਸਭੋ;

ਨਿਕ੍ਖਨ੍ਤੋ ਸਹ ਸੇਨਾਯ, ਓਗਣੋ ਵਨਮਾਗਮਾ.

੧੬੦. ਤਤ੍ਥਦ੍ਦਸਾ ਅਰਞ੍ਞਸ੍ਮਿਂ, ਤਕ੍ਕਰਾਨਂ ਕੁਟਿਂ ਕਤਂ;

ਤਸ੍ਸਾ [ਤਸ੍ਮਾ (ਸ੍ਯਾ. ਪੀ. ਕ.)] ਕੁਟਿਯਾ ਨਿਕ੍ਖਮ੍ਮ, ਸੁਵੋ ਲੁਦ੍ਦਾਨਿ ਭਾਸਤਿ.

੧੬੧. ਸਮ੍ਪਨ੍ਨਵਾਹਨੋ ਪੋਸੋ, ਯੁਵਾ ਸਮ੍ਮਟ੍ਠਕੁਣ੍ਡਲੋ [ਕੁਣ੍ਡਲੀ (ਸ੍ਯਾ. ਕ.)];

ਸੋਭਤਿ ਲੋਹਿਤੁਣ੍ਹੀਸੋ, ਦਿਵਾ ਸੂਰਿਯੋਵ ਭਾਸਤਿ.

੧੬੨. ਮਜ੍ਝਨ੍ਹਿਕੇ [ਮਜ੍ਝਨ੍ਤਿਕੇ (ਸਬ੍ਬਤ੍ਥ)] ਸਮ੍ਪਤਿਕੇ, ਸੁਤ੍ਤੋ ਰਾਜਾ ਸਸਾਰਥਿ;

ਹਨ੍ਦਸ੍ਸਾਭਰਣਂ ਸਬ੍ਬਂ, ਗਣ੍ਹਾਮ ਸਾਹਸਾ [ਸਹਸਾ (ਸੀ. ਸ੍ਯਾ. ਪੀ.)] ਮਯਂ.

੧੬੩. ਨਿਸੀਥੇਪਿ ਰਹੋ ਦਾਨਿ, ਸੁਤ੍ਤੋ ਰਾਜਾ ਸਸਾਰਥਿ;

ਆਦਾਯ ਵਤ੍ਥਂ ਮਣਿਕੁਣ੍ਡਲਞ੍ਚ, ਹਨ੍ਤ੍ਵਾਨ ਸਾਖਾਹਿ ਅਵਤ੍ਥਰਾਮ.

੧੬੪. ਕਿਨ੍ਨੁ ਉਮ੍ਮਤ੍ਤਰੂਪੋਵ, ਸਤ੍ਤਿਗੁਮ੍ਬ ਪਭਾਸਸਿ;

ਦੁਰਾਸਦਾ ਹਿ ਰਾਜਾਨੋ, ਅਗ੍ਗਿ ਪਜ੍ਜਲਿਤੋ ਯਥਾ.

੧੬੫. ਅਥ ਤ੍ਵਂ ਪਤਿਕੋਲਮ੍ਬ, ਮਤ੍ਤੋ ਥੁਲ੍ਲਾਨਿ ਗਜ੍ਜਸਿ;

ਮਾਤਰਿ ਮਯ੍ਹਂ ਨਗ੍ਗਾਯ, ਕਿਨ੍ਨੁ ਤ੍ਵਂ ਵਿਜਿਗੁਚ੍ਛਸੇ.

੧੬੬. ਉਟ੍ਠੇਹਿ ਸਮ੍ਮ ਤਰਮਾਨੋ, ਰਥਂ ਯੋਜੇਹਿ ਸਾਰਥਿ;

ਸਕੁਣੋ ਮੇ ਨ ਰੁਚ੍ਚਤਿ, ਅਞ੍ਞਂ ਗਚ੍ਛਾਮ ਅਸ੍ਸਮਂ.

੧੬੭. ਯੁਤ੍ਤੋ ਰਥੋ ਮਹਾਰਾਜ, ਯੁਤ੍ਤੋ ਚ ਬਲਵਾਹਨੋ;

ਅਧਿਤਿਟ੍ਠ ਮਹਾਰਾਜ, ਅਞ੍ਞਂ ਗਚ੍ਛਾਮ ਅਸ੍ਸਮਂ.

੧੬੮. ਕੋ ਨੁਮੇਵ ਗਤਾ [ਕ੍ਵ ਨੁ’ਮੇ’ਪਗਤਾ (?)] ਸਬ੍ਬੇ, ਯੇ ਅਸ੍ਮਿਂ ਪਰਿਚਾਰਕਾ;

ਏਸ ਗਚ੍ਛਤਿ ਪਞ੍ਚਾਲੋ, ਮੁਤ੍ਤੋ ਤੇਸਂ ਅਦਸ੍ਸਨਾ.

੧੬੯. ਕੋਦਣ੍ਡਕਾਨਿ ਗਣ੍ਹਥ, ਸਤ੍ਤਿਯੋ ਤੋਮਰਾਨਿ ਚ;

ਏਸ ਗਚ੍ਛਤਿ ਪਞ੍ਚਾਲੋ, ਮਾ ਵੋ ਮੁਞ੍ਚਿਤ੍ਥ ਜੀਵਤਂ [ਜੀਵਿਤਂ (ਬਹੂਸੁ)].

੧੭੦. ਅਥਾਪਰੋ ਪਟਿਨਨ੍ਦਿਤ੍ਥ, ਸੁਵੋ ਲੋਹਿਤਤੁਣ੍ਡਕੋ;

ਸ੍ਵਾਗਤਂ ਤੇ ਮਹਾਰਾਜ, ਅਥੋ ਤੇ ਅਦੁਰਾਗਤਂ;

ਇਸ੍ਸਰੋਸਿ ਅਨੁਪ੍ਪਤ੍ਤੋ, ਯਂ ਇਧਤ੍ਥਿ ਪਵੇਦਯ.

੧੭੧. ਤਿਨ੍ਦੁਕਾਨਿ ਪਿਯਾਲਾਨਿ, ਮਧੁਕੇ ਕਾਸੁਮਾਰਿਯੋ;

ਫਲਾਨਿ ਖੁਦ੍ਦਕਪ੍ਪਾਨਿ, ਭੁਞ੍ਜ ਰਾਜ ਵਰਂ ਵਰਂ.

੧੭੨. ਇਦਮ੍ਪਿ ਪਾਨੀਯਂ ਸੀਤਂ, ਆਭਤਂ ਗਿਰਿਗਬ੍ਭਰਾ;

ਤਤੋ ਪਿਵ ਮਹਾਰਾਜ, ਸਚੇ ਤ੍ਵਂ ਅਭਿਕਙ੍ਖਸਿ.

੧੭੩. ਅਰਞ੍ਞਂ ਉਞ੍ਛਾਯ ਗਤਾ, ਯੇ ਅਸ੍ਮਿਂ ਪਰਿਚਾਰਕਾ;

ਸਯਂ ਉਟ੍ਠਾਯ ਗਣ੍ਹਵ੍ਹੋ, ਹਤ੍ਥਾ ਮੇ ਨਤ੍ਥਿ ਦਾਤਵੇ.

੧੭੪. ਭਦ੍ਦਕੋ ਵਤਯਂ ਪਕ੍ਖੀ, ਦਿਜੋ ਪਰਮਧਮ੍ਮਿਕੋ;

ਅਥੇਸੋ ਇਤਰੋ ਪਕ੍ਖੀ, ਸੁਵੋ ਲੁਦ੍ਦਾਨਿ ਭਾਸਤਿ.

੧੭੫. ‘‘ਏਤਂ ਹਨਥ ਬਨ੍ਧਥ, ਮਾ ਵੋ ਮੁਞ੍ਚਿਤ੍ਥ ਜੀਵਤਂ’’;

ਇਚ੍ਚੇਵਂ ਵਿਲਪਨ੍ਤਸ੍ਸ, ਸੋਤ੍ਥਿਂ [ਸੋਤ੍ਥੀ (ਸ੍ਯਾ.)] ਪਤ੍ਤੋਸ੍ਮਿ ਅਸ੍ਸਮਂ.

੧੭੬. ਭਾਤਰੋਸ੍ਮ ਮਹਾਰਾਜ, ਸੋਦਰਿਯਾ ਏਕਮਾਤੁਕਾ;

ਏਕਰੁਕ੍ਖਸ੍ਮਿਂ ਸਂਵਡ੍ਢਾ, ਨਾਨਾਖੇਤ੍ਤਗਤਾ ਉਭੋ.

੧੭੭. ਸਤ੍ਤਿਗੁਮ੍ਬੋ ਚ ਚੋਰਾਨਂ, ਅਹਞ੍ਚ ਇਸੀਨਂ ਇਧ;

ਅਸਤਂ ਸੋ, ਸਤਂ ਅਹਂ, ਤੇਨ ਧਮ੍ਮੇਨ ਨੋ ਵਿਨਾ.

੧੭੮. ਤਤ੍ਥ ਵਧੋ ਚ ਬਨ੍ਧੋ ਚ, ਨਿਕਤੀ ਵਞ੍ਚਨਾਨਿ ਚ;

ਆਲੋਪਾ ਸਾਹਸਾਕਾਰਾ, ਤਾਨਿ ਸੋ ਤਤ੍ਥ ਸਿਕ੍ਖਤਿ.

੧੭੯. ਇਧ ਸਚ੍ਚਞ੍ਚ ਧਮ੍ਮੋ ਚ, ਅਹਿਂਸਾ ਸਂਯਮੋ ਦਮੋ;

ਆਸਨੂਦਕਦਾਯੀਨਂ, ਅਙ੍ਕੇ ਵਦ੍ਧੋਸ੍ਮਿ ਭਾਰਧ [ਭਾਰਤ (ਸੀ. ਸ੍ਯਾ. ਪੀ.)].

੧੮੦. ਯਂ ਯਞ੍ਹਿ ਰਾਜ ਭਜਤਿ, ਸਨ੍ਤਂ ਵਾ ਯਦਿ ਵਾ ਅਸਂ;

ਸੀਲਵਨ੍ਤਂ ਵਿਸੀਲਂ ਵਾ, ਵਸਂ ਤਸ੍ਸੇਵ ਗਚ੍ਛਤਿ.

੧੮੧. ਯਾਦਿਸਂ ਕੁਰੁਤੇ ਮਿਤ੍ਤਂ, ਯਾਦਿਸਂ ਚੂਪਸੇਵਤਿ;

ਸੋਪਿ ਤਾਦਿਸਕੋ ਹੋਤਿ, ਸਹਵਾਸੋ ਹਿ [ਸਹਵਾਸੋਪਿ (ਸ੍ਯਾ. ਕ.)] ਤਾਦਿਸੋ.

੧੮੨. ਸੇਵਮਾਨੋ ਸੇਵਮਾਨਂ, ਸਮ੍ਫੁਟ੍ਠੋ ਸਮ੍ਫੁਸਂ ਪਰਂ;

ਸਰੋ ਦਿਦ੍ਧੋ ਕਲਾਪਂਵ, ਅਲਿਤ੍ਤਮੁਪਲਿਮ੍ਪਤਿ;

ਉਪਲੇਪਭਯਾ [ਉਪਲਿਮ੍ਪਭਯਾ (ਸ੍ਯਾ. ਕ.)] ਧੀਰੋ, ਨੇਵ ਪਾਪਸਖਾ ਸਿਯਾ.

੧੮੩. ਪੂਤਿਮਚ੍ਛਂ ਕੁਸਗ੍ਗੇਨ, ਯੋ ਨਰੋ ਉਪਨਯ੍ਹਤਿ;

ਕੁਸਾਪਿ ਪੂਤਿ [ਪੂਤੀ (ਸੀ. ਪੀ.)] ਵਾਯਨ੍ਤਿ, ਏਵਂ ਬਾਲੂਪਸੇਵਨਾ.

੧੮੪. ਤਗਰਞ੍ਚ ਪਲਾਸੇਨ, ਯੋ ਨਰੋ ਉਪਨਯ੍ਹਤਿ;

ਪਤ੍ਤਾਪਿ ਸੁਰਭਿ [ਸੁਰਭੀ (ਸੀ. ਸ੍ਯਾ. ਪੀ.)] ਵਾਯਨ੍ਤਿ, ਏਵਂ ਧੀਰੂਪਸੇਵਨਾ.

੧੮੫. ਤਸ੍ਮਾ ਪਤ੍ਤਪੁਟਸ੍ਸੇਵ [ਫਲਪੁਟਸ੍ਸੇਵ (ਸੀ. ਪੀ.), ਪਲਪੁਟਸ੍ਸੇਵ (ਕ. ਅਟ੍ਠ.), ਪਲਾਸਪੁਟਸ੍ਸੇਵ (ਸ੍ਯਾ. ਕ.)], ਞਤ੍ਵਾ ਸਮ੍ਪਾਕਮਤ੍ਤਨੋ;

ਅਸਨ੍ਤੇ ਨੋਪਸੇਵੇਯ੍ਯ, ਸਨ੍ਤੇ ਸੇਵੇਯ੍ਯ ਪਣ੍ਡਿਤੋ;

ਅਸਨ੍ਤੋ ਨਿਰਯਂ ਨੇਨ੍ਤਿ, ਸਨ੍ਤੋ ਪਾਪੇਨ੍ਤਿ ਸੁਗ੍ਗਤਿਨ੍ਤਿ.

ਸਤ੍ਤਿਗੁਮ੍ਬਜਾਤਕਂ ਸਤ੍ਤਮਂ.