੫੦੨. ਚੂਲ਼ਹਂਸਜਾਤਕਂ (੬)
੧੩੩. ਏਤੇ ਹਂਸਾ ਪਕ੍ਕਮਨ੍ਤਿ, ਵਕ੍ਕਙ੍ਗਾ ਭਯਮੇਰਿਤਾ;
ਹਰਿਤ੍ਤਚ ਹੇਮਵਣ੍ਣ, ਕਾਮਂ ਸੁਮੁਖ ਪਕ੍ਕਮ.
੧੩੪. ਓਹਾਯ ਮਂ ਞਾਤਿਗਣਾ, ਏਕਂ ਪਾਸਵਸਂ ਗਤਂ;
ਅਨਪੇਕ੍ਖਮਾਨਾ [ਨਾਪੇਕ੍ਖਮਾਨਾ (ਕ.)] ਗਚ੍ਛਨ੍ਤਿ, ਕਿਂ ਏਸੋ ਅਵਹਿਯ੍ਯਸਿ.
੧੩੫. ਪਤੇਵ ਪਤਤਂ ਸੇਟ੍ਠ, ਨਤ੍ਥਿ ਬਦ੍ਧੇ ਸਹਾਯਤਾ [ਸਹਾਯਕਾ (ਸ੍ਯਾ.)];
ਮਾ ਅਨੀਘਾਯ ਹਾਪੇਸਿ, ਕਾਮਂ ਸੁਮੁਖ ਪਕ੍ਕਮ.
੧੩੬. ਨਾਹਂ ‘‘ਦੁਕ੍ਖਪਰੇਤੋ’’ਤਿ [ਦੁਕ੍ਖਪਰੇਤੋਪਿ (ਕ.)], ਧਤਰਟ੍ਠ ਤੁਵਂ [ਤਵਂ (ਸੀ. ਪੀ.)] ਜਹੇ;
ਜੀਵਿਤਂ ਮਰਣਂ ਵਾ ਮੇ, ਤਯਾ ਸਦ੍ਧਿਂ ਭਵਿਸ੍ਸਤਿ.
੧੩੭. ਏਤਦਰਿਯਸ੍ਸ ਕਲ੍ਯਾਣਂ, ਯਂ ਤ੍ਵਂ ਸੁਮੁਖ ਭਾਸਸਿ;
ਤਞ੍ਚ ਵੀਮਂਸਮਾਨੋਹਂ, ‘‘ਪਤਤੇਤਂ’’ ਅਵਸ੍ਸਜਿਂ.
੧੩੮. ਅਪਦੇਨ ਪਦਂ ਯਾਤਿ, ਅਨ੍ਤਲਿਕ੍ਖਚਰੋ [ਅਨ੍ਤਲਿਕ੍ਖੇ ਚਰੋ (ਸੀ. ਪੀ.)] ਦਿਜੋ;
ਆਰਾ ਪਾਸਂ ਨ ਬੁਜ੍ਝਿ ਤ੍ਵਂ, ਹਂਸਾਨਂ ਪਵਰੁਤ੍ਤਮ [ਪਵਰੁਤ੍ਤਮੋ (ਕ. ਸੀ. ਪੀ.)].
੧੩੯. ਯਦਾ ਪਰਾਭਵੋ ਹੋਤਿ, ਪੋਸੋ ਜੀਵਿਤਸਙ੍ਖਯੇ;
ਅਥ ਜਾਲਞ੍ਚ ਪਾਸਞ੍ਚ, ਆਸਜ੍ਜਾਪਿ ਨ ਬੁਜ੍ਝਤਿ.
੧੪੦. ਏਤੇ ਹਂਸਾ ਪਕ੍ਕਮਨ੍ਤਿ, ਵਕ੍ਕਙ੍ਗਾ ਭਯਮੇਰਿਤਾ;
ਹਰਿਤ੍ਤਚ ਹੇਮਵਣ੍ਣ, ਤ੍ਵਞ੍ਞੇਵ [ਤ੍ਵਞ੍ਚ ਤਂ (ਸੀ.), ਤ੍ਵਞ੍ਚ (ਪੀ.)] ਅਵਹਿਯ੍ਯਸਿ.
੧੪੧. ਏਤੇ ਭੁਤ੍ਵਾ ਚ ਪਿਤ੍ਵਾ ਚ, ਪਕ੍ਕਮਨ੍ਤਿ ਵਿਹਙ੍ਗਮਾ;
ਅਨਪੇਕ੍ਖਮਾਨਾ ਵਕ੍ਕਙ੍ਗਾ, ਤ੍ਵਞ੍ਞੇਵੇਕੋ ਉਪਾਸਸਿ.
੧੪੨. ਕਿਨ੍ਨੁ ਤ੍ਯਾਯਂ [ਤਾਯਂ (ਸੀ. ਸ੍ਯਾ. ਪੀ.)] ਦਿਜੋ ਹੋਤਿ, ਮੁਤ੍ਤੋ ਬਦ੍ਧਂ ਉਪਾਸਸਿ;
ਓਹਾਯ ਸਕੁਣਾ ਯਨ੍ਤਿ, ਕਿਂ ਏਕੋ ਅਵਹਿਯ੍ਯਸਿ.
੧੪੩. ਰਾਜਾ ਮੇ ਸੋ ਦਿਜੋ ਮਿਤ੍ਤੋ, ਸਖਾ ਪਾਣਸਮੋ ਚ ਮੇ;
ਨੇਵ ਨਂ ਵਿਜਹਿਸ੍ਸਾਮਿ, ਯਾਵ ਕਾਲਸ੍ਸ ਪਰਿਯਾਯਂ.
੧੪੪. ਯੋ ਚ ਤ੍ਵਂ ਸਖਿਨੋ ਹੇਤੁ, ਪਾਣਂ ਚਜਿਤੁਮਿਚ੍ਛਸਿ;
ਸੋ ਤੇ ਸਹਾਯਂ ਮੁਞ੍ਚਾਮਿ, ਹੋਤੁ ਰਾਜਾ ਤਵਾਨੁਗੋ.
੧੪੫. ਏਵਂ ਲੁਦ੍ਦਕ ਨਨ੍ਦਸ੍ਸੁ, ਸਹ ਸਬ੍ਬੇਹਿ ਞਾਤਿਭਿ;
ਯਥਾਹਮਜ੍ਜ ਨਨ੍ਦਾਮਿ, ਦਿਸ੍ਵਾ ਮੁਤ੍ਤਂ ਦਿਜਾਧਿਪਂ.
੧੪੬. ਕਚ੍ਚਿਨ੍ਨੁ ਭੋਤੋ ਕੁਸਲਂ, ਕਚ੍ਚਿ ਭੋਤੋ ਅਨਾਮਯਂ;
ਕਚ੍ਚਿ ਰਟ੍ਠਮਿਦਂ ਫੀਤਂ, ਧਮ੍ਮੇਨ ਮਨੁਸਾਸਸਿ.
੧੪੭. ਕੁਸਲਞ੍ਚੇਵ ਮੇ ਹਂਸ, ਅਥੋ ਹਂਸ ਅਨਾਮਯਂ;
ਅਥੋ ਰਟ੍ਠਮਿਦਂ ਫੀਤਂ, ਧਮ੍ਮੇਨ ਮਨੁਸਾਸਹਂ.
੧੪੮. ਕਚ੍ਚਿ ਭੋਤੋ ਅਮਚ੍ਚੇਸੁ, ਦੋਸੋ ਕੋਚਿ ਨ ਵਿਜ੍ਜਤਿ;
ਕਚ੍ਚਿ ਆਰਾ ਅਮਿਤ੍ਤਾ ਤੇ, ਛਾਯਾ ਦਕ੍ਖਿਣਤੋਰਿਵ.
੧੪੯. ਅਥੋਪਿ ਮੇ ਅਮਚ੍ਚੇਸੁ, ਦੋਸੋ ਕੋਚਿ ਨ ਵਿਜ੍ਜਤਿ;
ਅਥੋ ਆਰਾ ਅਮਿਤ੍ਤਾ ਮੇ, ਛਾਯਾ ਦਕ੍ਖਿਣਤੋਰਿਵ.
੧੫੦. ਕਚ੍ਚਿ ਤੇ ਸਾਦਿਸੀ ਭਰਿਯਾ, ਅਸ੍ਸਵਾ ਪਿਯਭਾਣਿਨੀ;
ਪੁਤ੍ਤਰੂਪਯਸੂਪੇਤਾ, ਤਵ ਛਨ੍ਦਵਸਾਨੁਗਾ.
੧੫੧. ਅਥੋ ਮੇ ਸਾਦਿਸੀ ਭਰਿਯਾ, ਅਸ੍ਸਵਾ ਪਿਯਭਾਣਿਨੀ;
ਪੁਤ੍ਤਰੂਪਯਸੂਪੇਤਾ, ਮਮ ਛਨ੍ਦਵਸਾਨੁਗਾ.
੧੫੨. ਕਚ੍ਚਿ ਤੇ ਬਹਵੋ ਪੁਤ੍ਤਾ, ਸੁਜਾਤਾ ਰਟ੍ਠਵਡ੍ਢਨ;
ਪਞ੍ਞਾਜਵੇਨ ਸਮ੍ਪਨ੍ਨਾ, ਸਮ੍ਮੋਦਨ੍ਤਿ ਤਤੋ ਤਤੋ.
੧੫੩. ਸਤਮੇਕੋ ਚ ਮੇ ਪੁਤ੍ਤਾ, ਧਤਰਟ੍ਠ ਮਯਾ ਸੁਤਾ;
ਤੇਸਂ ਤ੍ਵਂ ਕਿਚ੍ਚਮਕ੍ਖਾਹਿ, ਨਾਵਰੁਜ੍ਝਨ੍ਤਿ [ਨਾਵਰਜ੍ਝਨ੍ਤਿ (ਕ. ਸੀ. ਪੀ.)] ਤੇ ਵਚੋ.
੧੫੪. ਉਪਪਨ੍ਨੋਪਿ ਚੇ ਹੋਤਿ, ਜਾਤਿਯਾ ਵਿਨਯੇਨ ਵਾ;
ਅਥ ਪਚ੍ਛਾ ਕੁਰੁਤੇ ਯੋਗਂ, ਕਿਚ੍ਛੇ [ਕਿਚ੍ਚੇ (ਸੀ. ਸ੍ਯਾ. ਪੀ.)] ਆਪਾਸੁ [ਆਵਾਸੁ (ਸ੍ਯਾ.), ਆਪਦਾਸੁ (ਕ.)] ਸੀਦਤਿ.
੧੫੫. ਤਸ੍ਸ ਸਂਹੀਰਪਞ੍ਞਸ੍ਸ, ਵਿਵਰੋ ਜਾਯਤੇ ਮਹਾ;
ਰਤ੍ਤਿਮਨ੍ਧੋਵ [ਨਤ੍ਤਮਨ੍ਧੋਵ (ਸੀ. ਪੀ.)] ਰੂਪਾਨਿ, ਥੂਲਾਨਿ ਮਨੁਪਸ੍ਸਤਿ.
੧੫੬. ਅਸਾਰੇ ਸਾਰਯੋਗਞ੍ਞੂ, ਮਤਿਂ ਨ ਤ੍ਵੇਵ ਵਿਨ੍ਦਤਿ;
ਸਰਭੋਵ ਗਿਰਿਦੁਗ੍ਗਸ੍ਮਿਂ, ਅਨ੍ਤਰਾਯੇਵ ਸੀਦਤਿ.
੧੫੭. ਹੀਨਜਚ੍ਚੋਪਿ ਚੇ ਹੋਤਿ, ਉਟ੍ਠਾਤਾ ਧਿਤਿਮਾ ਨਰੋ;
ਆਚਾਰਸੀਲਸਮ੍ਪਨ੍ਨੋ, ਨਿਸੇ ਅਗ੍ਗੀਵ ਭਾਸਤਿ.
੧੫੮. ਏਤਂ ਮੇ ਉਪਮਂ ਕਤ੍ਵਾ, ਪੁਤ੍ਤੇ ਵਿਜ੍ਜਾਸੁ ਵਾਚਯ [ਠਾਪਸ (ਸ੍ਯਾ. ਕ.)];
ਸਂਵਿਰੂਲ਼੍ਹੇਥ ਮੇਧਾਵੀ, ਖੇਤ੍ਤੇ ਬੀਜਂਵ [ਖੇਤ੍ਤਬੀਜਂਵ (ਸੀ. ਪੀ.)] ਵੁਟ੍ਠਿਯਾਤਿ.
ਚੂਲ਼ਹਂਸਜਾਤਕਂ ਛਟ੍ਠਂ.