੫੦੧. ਰੋਹਣਮਿਗਜਾਤਕਂ (੫)

੧੦੪. ਏਤੇ ਯੂਥਾ ਪਤਿਯਨ੍ਤਿ, ਭੀਤਾ ਮਰਣਸ੍ਸ [ਮਰਣਾ (ਸ੍ਯਾ. ਪੀ.), ਮਰਣ (ਕ.)] ਚਿਤ੍ਤਕ;

ਗਚ੍ਛ ਤੁਵਮ੍ਪਿ ਮਾਕਙ੍ਖਿ, ਜੀਵਿਸ੍ਸਨ੍ਤਿ ਤਯਾ ਸਹ.

੧੦੫. ਨਾਹਂ ਰੋਹਣ [ਰੋਹਨ੍ਤ (ਸੀ. ਪੀ.), ਰੋਹਨ (ਸ੍ਯਾ.)] ਗਚ੍ਛਾਮਿ, ਹਦਯਂ ਮੇ ਅਵਕਸ੍ਸਤਿ;

ਨ ਤਂ ਅਹਂ ਜਹਿਸ੍ਸਾਮਿ, ਇਧ ਹਿਸ੍ਸਾਮਿ ਜੀਵਿਤਂ.

੧੦੬. ਤੇ ਹਿ ਨੂਨ ਮਰਿਸ੍ਸਨ੍ਤਿ, ਅਨ੍ਧਾ ਅਪਰਿਣਾਯਕਾ;

ਗਚ੍ਛ ਤੁਵਮ੍ਪਿ ਮਾਕਙ੍ਖਿ, ਜੀਵਿਸ੍ਸਨ੍ਤਿ ਤਯਾ ਸਹ.

੧੦੭. ਨਾਹਂ ਰੋਹਣ ਗਚ੍ਛਾਮਿ, ਹਦਯਂ ਮੇ ਅਵਕਸ੍ਸਤਿ;

ਨ ਤਂ ਬਦ੍ਧਂ [ਬਨ੍ਧਂ (ਕ.)] ਜਹਿਸ੍ਸਾਮਿ, ਇਧ ਹਿਸ੍ਸਾਮਿ ਜੀਵਿਤਂ.

੧੦੮. ਗਚ੍ਛ ਭੀਰੁ ਪਲਾਯਸ੍ਸੁ, ਕੂਟੇ ਬਦ੍ਧੋਸ੍ਮਿ ਆਯਸੇ;

ਗਚ੍ਛ ਤੁਵਮ੍ਪਿ ਮਾਕਙ੍ਖਿ, ਜੀਵਿਸ੍ਸਨ੍ਤਿ ਤਯਾ ਸਹ.

੧੦੯. ਨਾਹਂ ਰੋਹਣ ਗਚ੍ਛਾਮਿ, ਹਦਯਂ ਮੇ ਅਵਕਸ੍ਸਤਿ;

ਨ ਤਂ ਅਹਂ ਜਹਿਸ੍ਸਾਮਿ, ਇਧ ਹਿਸ੍ਸਾਮਿ ਜੀਵਿਤਂ.

੧੧੦. ਤੇ ਹਿ ਨੂਨ ਮਰਿਸ੍ਸਨ੍ਤਿ, ਅਨ੍ਧਾ ਅਪਰਿਣਾਯਕਾ;

ਗਚ੍ਛ ਤੁਵਮ੍ਪਿ ਮਾਕਙ੍ਖਿ, ਜੀਵਿਸ੍ਸਨ੍ਤਿ ਤਯਾ ਸਹ.

੧੧੧. ਨਾਹਂ ਰੋਹਣ ਗਚ੍ਛਾਮਿ, ਹਦਯਂ ਮੇ ਅਵਕਸ੍ਸਤਿ;

ਨ ਤਂ ਬਦ੍ਧਂ ਜਹਿਸ੍ਸਾਮਿ, ਇਧ ਹਿਸ੍ਸਾਮਿ ਜੀਵਿਤਂ.

੧੧੨. ਅਯਂ ਸੋ ਲੁਦ੍ਦਕੋ ਏਤਿ, ਲੁਦ੍ਦਰੂਪੋ [ਰੁਦ੍ਦਰੂਪੋ (ਸੀ. ਪੀ.)] ਸਹਾਵੁਧੋ;

ਯੋ ਨੋ ਵਧਿਸ੍ਸਤਿ ਅਜ੍ਜ, ਉਸੁਨਾ ਸਤ੍ਤਿਯਾ ਅਪਿ [ਮਪਿ (ਸੀ. ਸ੍ਯਾ. ਪੀ.)].

੧੧੩. ਸਾ ਮੁਹੁਤ੍ਤਂ ਪਲਾਯਿਤ੍ਵਾ, ਭਯਟ੍ਟਾ [ਭਯਟ੍ਠਾ (ਪੀ.)] ਭਯਤਜ੍ਜਿਤਾ;

ਸੁਦੁਕ੍ਕਰਂ ਅਕਰਾ ਭੀਰੁ, ਮਰਣਾਯੂਪਨਿਵਤ੍ਤਥ.

੧੧੪. ਕਿਨ੍ਨੁ ਤੇਮੇ ਮਿਗਾ ਹੋਨ੍ਤਿ, ਮੁਤ੍ਤਾ ਬਦ੍ਧਂ ਉਪਾਸਰੇ;

ਨ ਤਂ ਚਜਿਤੁਮਿਚ੍ਛਨ੍ਤਿ, ਜੀਵਿਤਸ੍ਸਪਿ ਕਾਰਣਾ.

੧੧੫. ਭਾਤਰੋ ਹੋਨ੍ਤਿ ਮੇ ਲੁਦ੍ਦ, ਸੋਦਰਿਯਾ ਏਕਮਾਤੁਕਾ;

ਨ ਮਂ ਚਜਿਤੁਮਿਚ੍ਛਨ੍ਤਿ, ਜੀਵਿਤਸ੍ਸਪਿ ਕਾਰਣਾ.

੧੧੬. ਤੇ ਹਿ ਨੂਨ ਮਰਿਸ੍ਸਨ੍ਤਿ, ਅਨ੍ਧਾ ਅਪਰਿਣਾਯਕਾ;

ਪਞ੍ਚਨ੍ਨਂ ਜੀਵਿਤਂ ਦੇਹਿ, ਭਾਤਰਂ ਮੁਞ੍ਚ ਲੁਦ੍ਦਕ.

੧੧੭. ਸੋ ਵੋ ਅਹਂ ਪਮੋਕ੍ਖਾਮਿ, ਮਾਤਾਪੇਤ੍ਤਿਭਰਂ ਮਿਗਂ;

ਨਨ੍ਦਨ੍ਤੁ ਮਾਤਾਪਿਤਰੋ, ਮੁਤ੍ਤਂ ਦਿਸ੍ਵਾ ਮਹਾਮਿਗਂ.

੧੧੮. ਏਵਂ ਲੁਦ੍ਦਕ ਨਨ੍ਦਸ੍ਸੁ, ਸਹ ਸਬ੍ਬੇਹਿ ਞਾਤਿਭਿ;

ਯਥਾਹਮਜ੍ਜ ਨਨ੍ਦਾਮਿ, ਮੁਤ੍ਤਂ ਦਿਸ੍ਵਾ ਮਹਾਮਿਗਂ.

੧੧੯. ਕਥਂ ਤ੍ਵਂ ਪਮੋਕ੍ਖੋ [ਕਥਂ ਪਮੋਕ੍ਖੋ (ਸੀ. ਪੀ.), ਕਥਂ ਤੇ ਪਰੋਕ੍ਖੋ (?)] ਆਸਿ, ਉਪਨੀਤਸ੍ਮਿ ਜੀਵਿਤੇ;

ਕਥਂ ਪੁਤ੍ਤ ਅਮੋਚੇਸਿ, ਕੂਟਪਾਸਮ੍ਹ ਲੁਦ੍ਦਕੋ.

੧੨੦. ਭਣਂ ਕਣ੍ਣਸੁਖਂ ਵਾਚਂ, ਹਦਯਙ੍ਗਂ ਹਦਯਸ੍ਸਿਤਂ;

ਸੁਭਾਸਿਤਾਹਿ ਵਾਚਾਹਿ, ਚਿਤ੍ਤਕੋ ਮਂ ਅਮੋਚਯਿ.

੧੨੧. ਭਣਂ ਕਣ੍ਣਸੁਖਂ ਵਾਚਂ, ਹਦਯਙ੍ਗਂ ਹਦਯਸ੍ਸਿਤਂ;

ਸੁਭਾਸਿਤਾਹਿ ਵਾਚਾਹਿ, ਸੁਤਨਾ ਮਂ ਅਮੋਚਯਿ.

੧੨੨. ਸੁਤ੍ਵਾ ਕਣ੍ਣਸੁਖਂ ਵਾਚਂ, ਹਦਯਙ੍ਗਂ ਹਦਯਸ੍ਸਿਤਂ;

ਸੁਭਾਸਿਤਾਨਿ ਸੁਤ੍ਵਾਨ, ਲੁਦ੍ਦਕੋ ਮਂ ਅਮੋਚਯਿ.

੧੨੩. ਏਵਂ ਆਨਨ੍ਦਿਤੋ ਹੋਤੁ, ਸਹ ਦਾਰੇਹਿ ਲੁਦ੍ਦਕੋ;

ਯਥਾ ਮਯਜ੍ਜ ਨਨ੍ਦਾਮ, ਦਿਸ੍ਵਾ ਰੋਹਣਮਾਗਤਂ.

੧੨੪. ਨਨੁ ਤ੍ਵਂ ਅਵਚ [ਅਵਚਾ (ਸੀ. ਪੀ.)] ਲੁਦ੍ਦ, ‘‘ਮਿਗਚਮ੍ਮਾਨਿ ਆਹਰਿਂ’’;

ਅਥ ਕੇਨ ਨੁ ਵਣ੍ਣੇਨ, ਮਿਗਚਮ੍ਮਾਨਿ ਨਾਹਰਿ.

੧੨੫. ਆਗਮਾ ਚੇਵ ਹਤ੍ਥਤ੍ਥਂ, ਕੂਟਪਾਸਞ੍ਚ ਸੋ ਮਿਗੋ;

ਅਬਜ੍ਝਿ ਤਂ [ਅਬਜ੍ਝਿ ਤਞ੍ਚ (ਪੀ.)] ਮਿਗਰਾਜਂ, ਤਞ੍ਚ ਮੁਤ੍ਤਾ ਉਪਾਸਰੇ.

੧੨੬. ਤਸ੍ਸ ਮੇ ਅਹੁ ਸਂਵੇਗੋ, ਅਬ੍ਭੁਤੋ ਲੋਮਹਂਸਨੋ;

ਇਮਞ੍ਚਾਹਂ ਮਿਗਂ ਹਞ੍ਞੇ, ਅਜ੍ਜ ਹਿਸ੍ਸਾਮਿ ਜੀਵਿਤਂ.

੧੨੭. ਕੀਦਿਸਾ ਤੇ ਮਿਗਾ ਲੁਦ੍ਦ, ਕੀਦਿਸਾ ਧਮ੍ਮਿਕਾ ਮਿਗਾ;

ਕਥਂਵਣ੍ਣਾ ਕਥਂਸੀਲਾ, ਬਾਲ਼੍ਹਂ ਖੋ ਨੇ ਪਸਂਸਸਿ.

੧੨੮. ਓਦਾਤਸਿਙ੍ਗਾ ਸੁਚਿਵਾਲ਼ਾ, ਜਾਤਰੂਪਤਚੂਪਮਾ;

ਪਾਦਾ ਲੋਹਿਤਕਾ ਤੇਸਂ, ਅਞ੍ਜਿਤਕ੍ਖਾ ਮਨੋਰਮਾ.

੧੨੯. ਏਦਿਸਾ ਤੇ ਮਿਗਾ ਦੇਵ, ਏਦਿਸਾ ਧਮ੍ਮਿਕਾ ਮਿਗਾ;

ਮਾਤਾਪੇਤ੍ਤਿਭਰਾ ਦੇਵ, ਨ ਤੇ ਸੋ ਅਭਿਹਾਰਿਤੁਂ [ਅਭਿਹਾਰਯੁਂ (ਕ. ਸੀ.), ਅਭਿਹਾਰਯਿਂ (ਸ੍ਯਾ.), ਅਭਿਹਾਰਯਂ (ਪੀ.)].

੧੩੦. ਦਮ੍ਮਿ ਨਿਕ੍ਖਸਤਂ ਲੁਦ੍ਦ, ਥੂਲਞ੍ਚ ਮਣਿਕੁਣ੍ਡਲਂ;

ਚਤੁਸ੍ਸਦਞ੍ਚ [ਚਤੁਰਸ੍ਸਞ੍ਚ (ਸ੍ਯਾ. ਕ.)] ਪਲ੍ਲਙ੍ਕਂ, ਉਮਾਪੁਪ੍ਫਸਰਿਨ੍ਨਿਭਂ [ਉਮ੍ਮਾਪੁਪ੍ਫਸਿਰਿਨ੍ਨਿਭਂ (ਸੀ. ਸ੍ਯਾ. ਪੀ. ਕ.)].

੧੩੧. ਦ੍ਵੇ ਚ ਸਾਦਿਸਿਯੋ ਭਰਿਯਾ, ਉਸਭਞ੍ਚ ਗਵਂ ਸਤਂ;

ਧਮ੍ਮੇਨ ਰਜ੍ਜਂ ਕਾਰੇਸ੍ਸਂ, ਬਹੁਕਾਰੋ ਮੇਸਿ ਲੁਦ੍ਦਕ.

੧੩੨. ਕਸਿਵਾਣਿਜ੍ਜਾ [ਕਸੀ ਵਣਿਜ੍ਜਾ (ਸੀ. ਸ੍ਯਾ. ਪੀ.)] ਇਣਦਾਨਂ, ਉਞ੍ਛਾਚਰਿਯਾ ਚ ਲੁਦ੍ਦਕ;

ਏਤੇਨ ਦਾਰਂ ਪੋਸੇਹਿ, ਮਾ ਪਾਪਂ ਅਕਰੀ ਪੁਨਾਤਿ [ਅਕਰਾ ਪੁਨਨ੍ਤਿ (ਕ. ਸੀ. ਪੀ.)].

ਰੋਹਣਮਿਗਜਾਤਕਂ [ਰੋਹਨ੍ਤਮਿਗਜਾਤਕਂ (ਸੀ. ਪੀ.)] ਪਞ੍ਚਮਂ.