੫੦੦. ਸਿਰੀਮਨ੍ਤਜਾਤਕਂ (੪)

੮੩. ਪਞ੍ਞਾਯੁਪੇਤਂ ਸਿਰਿਯਾ ਵਿਹੀਨਂ, ਯਸਸ੍ਸਿਨਂ ਵਾਪਿ ਅਪੇਤਪਞ੍ਞਂ;

ਪੁਚ੍ਛਾਮਿ ਤਂ ਸੇਨਕ ਏਤਮਤ੍ਥਂ, ਕਮੇਤ੍ਥ ਸੇਯ੍ਯੋ ਕੁਸਲਾ ਵਦਨ੍ਤਿ.

੮੪. ਧੀਰਾ ਚ ਬਾਲਾ ਚ ਹਵੇ ਜਨਿਨ੍ਦ, ਸਿਪ੍ਪੂਪਪਨ੍ਨਾ ਚ ਅਸਿਪ੍ਪਿਨੋ ਚ;

ਸੁਜਾਤਿਮਨ੍ਤੋਪਿ ਅਜਾਤਿਮਸ੍ਸ, ਯਸਸ੍ਸਿਨੋ ਪੇਸਕਰਾ [ਪੇਸ੍ਸਕਰਾ (ਸੀ. ਪੀ.)] ਭਵਨ੍ਤਿ;

ਏਤਮ੍ਪਿ ਦਿਸ੍ਵਾਨ ਅਹਂ ਵਦਾਮਿ, ਪਞ੍ਞੋ ਨਿਹੀਨੋ ਸਿਰੀਮਾਵ [ਸਿਰਿਮਾਵ (ਸੀ. ਸ੍ਯਾ. ਪੀ.)] ਸੇਯ੍ਯੋ.

੮੫. ਤੁਵਮ੍ਪਿ ਪੁਚ੍ਛਾਮਿ ਅਨੋਮਪਞ੍ਞ, ਮਹੋਸਧ ਕੇਵਲਧਮ੍ਮਦਸ੍ਸਿ;

ਬਾਲਂ ਯਸਸ੍ਸਿਂ ਪਣ੍ਡਿਤਂ ਅਪ੍ਪਭੋਗਂ, ਕਮੇਤ੍ਥ ਸੇਯ੍ਯੋ ਕੁਸਲਾ ਵਦਨ੍ਤਿ.

੮੬. ਪਾਪਾਨਿ ਕਮ੍ਮਾਨਿ ਕਰੋਤਿ ਬਾਲੋ [ਕਰੋਨ੍ਤਿ ਬਾਲਾ (ਸ੍ਯਾ. ਕ.)], ਇਧਮੇਵ [ਇਦਮੇਵ (ਸ੍ਯਾ. ਕ. ਅਟ੍ਠ.), ਇਮਮੇਵ (ਕ.)] ਸੇਯ੍ਯੋ ਇਤਿ ਮਞ੍ਞਮਾਨੋ [ਮਞ੍ਞਮਾਨਾ (ਸ੍ਯਾ. ਕ.)];

ਇਧਲੋਕਦਸ੍ਸੀ ਪਰਲੋਕਮਦਸ੍ਸੀ, ਉਭਯਤ੍ਥ ਬਾਲੋ ਕਲਿਮਗ੍ਗਹੇਸਿ;

ਏਤਮ੍ਪਿ ਦਿਸ੍ਵਾਨ ਅਹਂ ਵਦਾਮਿ, ਪਞ੍ਞੋਵ ਸੇਯ੍ਯੋ ਨ ਯਸਸ੍ਸਿ ਬਾਲੋ.

੮੭. ਨ ਸਿਪ੍ਪਮੇਤਂ ਵਿਦਧਾਤਿ ਭੋਗਂ, ਨ ਬਨ੍ਧੁਵਾ [ਨ ਬਨ੍ਧਵਾ (ਸੀ. ਸ੍ਯਾ. ਕ.)] ਨ ਸਰੀਰਵਣ੍ਣੋ ਯੋ [ਨ ਸਰੀਰਾਵਕਾਸੋ (ਸੀ. ਸ੍ਯਾ. ਪੀ.)];

ਪਸ੍ਸੇਲ਼ਮੂਗਂ ਸੁਖਮੇਧਮਾਨਂ, ਸਿਰੀ ਹਿ ਨਂ ਭਜਤੇ ਗੋਰਵਿਨ੍ਦਂ [ਗੋਰਿਮਨ੍ਦਂ (ਸੀ. ਪੀ.)];

ਏਤਮ੍ਪਿ ਦਿਸ੍ਵਾਨ ਅਹਂ ਵਦਾਮਿ, ਪਞ੍ਞੋ ਨਿਹੀਨੋ ਸਿਰੀਮਾਵ ਸੇਯ੍ਯੋ.

੮੮. ਲਦ੍ਧਾ ਸੁਖਂ ਮਜ੍ਜਤਿ ਅਪ੍ਪਪਞ੍ਞੋ, ਦੁਕ੍ਖੇਨ ਫੁਟ੍ਠੋਪਿ ਪਮੋਹਮੇਤਿ;

ਆਗਨ੍ਤੁਨਾ ਦੁਕ੍ਖਸੁਖੇਨ ਫੁਟ੍ਠੋ, ਪਵੇਧਤਿ ਵਾਰਿਚਰੋਵ ਘਮ੍ਮੇ;

ਏਤਮ੍ਪਿ ਦਿਸ੍ਵਾਨ ਅਹਂ ਵਦਾਮਿ, ਪਞ੍ਞੋਵ ਸੇਯ੍ਯੋ ਨ ਯਸਸ੍ਸਿ ਬਾਲੋ.

੮੯. ਦੁਮਂ ਯਥਾ ਸਾਦੁਫਲਂ ਅਰਞ੍ਞੇ, ਸਮਨ੍ਤਤੋ ਸਮਭਿਸਰਨ੍ਤਿ [ਸਮਭਿਚਰਨ੍ਤਿ (ਸੀ. ਪੀ.)] ਪਕ੍ਖੀ;

ਏਵਮ੍ਪਿ ਅਡ੍ਢਂ ਸਧਨਂ ਸਭੋਗਂ, ਬਹੁਜ੍ਜਨੋ ਭਜਤਿ ਅਤ੍ਥਹੇਤੁ;

ਏਤਮ੍ਪਿ ਦਿਸ੍ਵਾਨ ਅਹਂ ਵਦਾਮਿ, ਪਞ੍ਞੋ ਨਿਹੀਨੋ ਸਿਰੀਮਾਵ ਸੇਯ੍ਯੋ.

੯੦. ਨ ਸਾਧੁ ਬਲਵਾ ਬਾਲੋ, ਸਾਹਸਾ ਵਿਨ੍ਦਤੇ ਧਨਂ;

ਕਨ੍ਦਨ੍ਤਮੇਤਂ ਦੁਮ੍ਮੇਧਂ, ਕਡ੍ਢਨ੍ਤਿ ਨਿਰਯਂ ਭੁਸਂ;

ਏਤਮ੍ਪਿ ਦਿਸ੍ਵਾਨ ਅਹਂ ਵਦਾਮਿ, ਪਞ੍ਞੋਵ ਸੇਯ੍ਯੋ ਨ ਯਸਸ੍ਸਿ ਬਾਲੋ.

੯੧. ਯਾ ਕਾਚਿ ਨਜ੍ਜੋ ਗਙ੍ਗਮਭਿਸ੍ਸਵਨ੍ਤਿ, ਸਬ੍ਬਾਵ ਤਾ ਨਾਮਗੋਤ੍ਤਂ ਜਹਨ੍ਤਿ;

ਗਙ੍ਗਾ ਸਮੁਦ੍ਦਂ ਪਟਿਪਜ੍ਜਮਾਨਾ, ਨ ਖਾਯਤੇ ਇਦ੍ਧਿਂ ਪਞ੍ਞੋਪਿ ਲੋਕੇ [ਇਦ੍ਧਿਪਰੋ ਹਿ ਲੋਕੇ (ਕ. ਸੀ. ਸ੍ਯਾ.), ਇਦ੍ਧਿਪਰੋ ਹਿ ਲੋਕੋ (ਸੀ. ਪੀ. ਅਟ੍ਠ.)];

ਏਤਮ੍ਪਿ ਦਿਸ੍ਵਾਨ ਅਹਂ ਵਦਾਮਿ, ਪਞ੍ਞੋ ਨਿਹੀਨੋ ਸਿਰੀਮਾਵ ਸੇਯ੍ਯੋ.

੯੨. ਯਮੇਤਮਕ੍ਖਾ ਉਦਧਿਂ ਮਹਨ੍ਤਂ, ਸਵਨ੍ਤਿ ਨਜ੍ਜੋ ਸਬ੍ਬਕਾਲਮਸਙ੍ਖ੍ਯਂ;

ਸੋ ਸਾਗਰੋ ਨਿਚ੍ਚਮੁਲ਼ਾਰਵੇਗੋ, ਵੇਲਂ ਨ ਅਚ੍ਚੇਤਿ ਮਹਾਸਮੁਦ੍ਦੋ.

੯੩. ਏਵਮ੍ਪਿ ਬਾਲਸ੍ਸ ਪਜਪ੍ਪਿਤਾਨਿ, ਪਞ੍ਞਂ ਨ ਅਚ੍ਚੇਤਿ ਸਿਰੀ ਕਦਾਚਿ;

ਏਤਮ੍ਪਿ ਦਿਸ੍ਵਾਨ ਅਹਂ ਵਦਾਮਿ, ਪਞ੍ਞੋਵ ਸੇਯ੍ਯੋ ਨ ਯਸਸ੍ਸਿ ਬਾਲੋ.

੯੪. ਅਸਞ੍ਞਤੋ ਚੇਪਿ ਪਰੇਸਮਤ੍ਥਂ, ਭਣਾਤਿ ਸਨ੍ਧਾਨਗਤੋ [ਸਣ੍ਠਾਨਗਤੋ (ਸ੍ਯਾ. ਪੀ.), ਸਨ੍ਥਾਨਗਤੋ (ਸੀ.)] ਯਸਸ੍ਸੀ;

ਤਸ੍ਸੇਵ ਤਂ ਰੂਹਤਿ ਞਾਤਿਮਜ੍ਝੇ, ਸਿਰੀ ਹਿ ਨਂ [ਸਿਰਿਹੀਨਂ (ਸੀ. ਕ.), ਸਿਰੀਹੀਨਂ (ਸ੍ਯਾ. ਪੀ.)] ਕਾਰਯਤੇ ਨ ਪਞ੍ਞਾ [ਨ ਪਞ੍ਞੋ (ਸੀ.), ਨ ਪਞ੍ਞਂ (ਸ੍ਯਾ. ਕ.)];

ਏਤਮ੍ਪਿ ਦਿਸ੍ਵਾਨ ਅਹਂ ਵਦਾਮਿ, ਪਞ੍ਞੋ ਨਿਹੀਨੋ ਸਿਰੀਮਾਵ ਸੇਯ੍ਯੋ.

੯੫. ਪਰਸ੍ਸ ਵਾ ਅਤ੍ਤਨੋ ਵਾਪਿ ਹੇਤੁ, ਬਾਲੋ ਮੁਸਾ ਭਾਸਤਿ ਅਪ੍ਪਪਞ੍ਞੋ;

ਸੋ ਨਿਨ੍ਦਿਤੋ ਹੋਤਿ ਸਭਾਯ ਮਜ੍ਝੇ, ਪਚ੍ਛਾਪਿ [ਪੇਚ੍ਚਮ੍ਪਿ (ਸੀ. ਪੀ.), ਪੇਚ੍ਚਾਪਿ (?)] ਸੋ ਦੁਗ੍ਗਤਿਗਾਮੀ ਹੋਤਿ;

ਏਤਮ੍ਪਿ ਦਿਸ੍ਵਾਨ ਅਹਂ ਵਦਾਮਿ, ਪਞ੍ਞੋਵ ਸੇਯ੍ਯੋ ਨ ਯਸਸ੍ਸਿ ਬਾਲੋ.

੯੬. ਅਤ੍ਥਮ੍ਪਿ ਚੇ ਭਾਸਤਿ ਭੂਰਿਪਞ੍ਞੋ, ਅਨਾਲ਼੍ਹਿਯੋ [ਅਨਾਲਯੋ (ਪੀ.)] ਅਪ੍ਪਧਨੋ ਦਲਿਦ੍ਦੋ;

ਨ ਤਸ੍ਸ ਤਂ ਰੂਹਤਿ ਞਾਤਿਮਜ੍ਝੇ, ਸਿਰੀ ਚ ਪਞ੍ਞਾਣਵਤੋ ਨ ਹੋਤਿ;

ਏਤਮ੍ਪਿ ਦਿਸ੍ਵਾਨ ਅਹਂ ਵਦਾਮਿ, ਪਞ੍ਞੋ ਨਿਹੀਨੋ ਸਿਰੀਮਾਵ ਸੇਯ੍ਯੋ.

੯੭. ਪਰਸ੍ਸ ਵਾ ਅਤ੍ਤਨੋ ਵਾਪਿ ਹੇਤੁ, ਨ ਭਾਸਤਿ ਅਲਿਕਂ ਭੂਰਿਪਞ੍ਞੋ;

ਸੋ ਪੂਜਿਤੋ ਹੋਤਿ ਸਭਾਯ ਮਜ੍ਝੇ, ਪਚ੍ਛਾਪਿ ਸੋ ਸੁਗ੍ਗਤਿਗਾਮੀ ਹੋਤਿ;

ਏਤਮ੍ਪਿ ਦਿਸ੍ਵਾਨ ਅਹਂ ਵਦਾਮਿ, ਪਞ੍ਞੋਵ ਸੇਯ੍ਯੋ ਨ ਯਸਸ੍ਸਿ ਬਾਲੋ.

੯੮. ਹਤ੍ਥੀ ਗਵਸ੍ਸਾ ਮਣਿਕੁਣ੍ਡਲਾ ਚ, ਥਿਯੋ ਚ ਇਦ੍ਧੇਸੁ ਕੁਲੇਸੁ ਜਾਤਾ;

ਸਬ੍ਬਾਵ ਤਾ ਉਪਭੋਗਾ ਭਵਨ੍ਤਿ, ਇਦ੍ਧਸ੍ਸ ਪੋਸਸ੍ਸ ਅਨਿਦ੍ਧਿਮਨ੍ਤੋ;

ਏਤਮ੍ਪਿ ਦਿਸ੍ਵਾਨ ਅਹਂ ਵਦਾਮਿ, ਪਞ੍ਞੋ ਨਿਹੀਨੋ ਸਿਰੀਮਾਵ ਸੇਯ੍ਯੋ.

੯੯. ਅਸਂਵਿਹਿਤਕਮ੍ਮਨ੍ਤਂ, ਬਾਲਂ ਦੁਮ੍ਮੇਧਮਨ੍ਤਿਨਂ;

ਸਿਰੀ ਜਹਤਿ ਦੁਮ੍ਮੇਧਂ, ਜਿਣ੍ਣਂਵ ਉਰਗੋ ਤਚਂ;

ਏਤਮ੍ਪਿ ਦਿਸ੍ਵਾਨ ਅਹਂ ਵਦਾਮਿ, ਪਞ੍ਞੋਵ ਸੇਯ੍ਯੋ ਨ ਯਸਸ੍ਸਿ ਬਾਲੋ.

੧੦੦. ਪਞ੍ਚ ਪਣ੍ਡਿਤਾ ਮਯਂ ਭਦ੍ਦਨ੍ਤੇ, ਸਬ੍ਬੇ ਪਞ੍ਜਲਿਕਾ ਉਪਟ੍ਠਿਤਾ;

ਤ੍ਵਂ ਨੋ ਅਭਿਭੁਯ੍ਯ ਇਸ੍ਸਰੋਸਿ, ਸਕ੍ਕੋਵ ਭੂਤਪਤਿ ਦੇਵਰਾਜਾ;

ਏਤਮ੍ਪਿ ਦਿਸ੍ਵਾਨ ਅਹਂ ਵਦਾਮਿ, ਪਞ੍ਞੋ ਨਿਹੀਨੋ ਸਿਰੀਮਾਵ ਸੇਯ੍ਯੋ.

੧੦੧. ਦਾਸੋਵ ਪਞ੍ਞਸ੍ਸ ਯਸਸ੍ਸਿ ਬਾਲੋ, ਅਤ੍ਥੇਸੁ ਜਾਤੇਸੁ ਤਥਾਵਿਧੇਸੁ;

ਯਂ ਪਣ੍ਡਿਤੋ ਨਿਪੁਣਂ ਸਂਵਿਧੇਤਿ, ਸਮ੍ਮੋਹਮਾਪਜ੍ਜਤਿ ਤਤ੍ਥ ਬਾਲੋ;

ਏਤਮ੍ਪਿ ਦਿਸ੍ਵਾਨ ਅਹਂ ਵਦਾਮਿ, ਪਞ੍ਞੋਵ ਸੇਯ੍ਯੋ ਨ ਯਸਸ੍ਸਿ ਬਾਲੋ.

੧੦੨. ਅਦ੍ਧਾ ਹਿ ਪਞ੍ਞਾਵ ਸਤਂ ਪਸਤ੍ਥਾ, ਕਨ੍ਤਾ ਸਿਰੀ ਭੋਗਰਤਾ ਮਨੁਸ੍ਸਾ;

ਞਾਣਞ੍ਚ ਬੁਦ੍ਧਾਨਮਤੁਲ੍ਯਰੂਪਂ, ਪਞ੍ਞਂ ਨ ਅਚ੍ਚੇਤਿ ਸਿਰੀ ਕਦਾਚਿ.

੧੦੩. ਯਂ ਤਂ ਅਪੁਚ੍ਛਿਮ੍ਹ ਅਕਿਤ੍ਤਯੀ ਨੋ, ਮਹੋਸਧ ਕੇਵਲਧਮ੍ਮਦਸ੍ਸੀ;

ਗਵਂ ਸਹਸ੍ਸਂ ਉਸਭਞ੍ਚ ਨਾਗਂ, ਆਜਞ੍ਞਯੁਤ੍ਤੇ ਚ ਰਥੇ ਦਸ ਇਮੇ;

ਪਞ੍ਹਸ੍ਸ ਵੇਯ੍ਯਾਕਰਣੇਨ ਤੁਟ੍ਠੋ, ਦਦਾਮਿ ਤੇ ਗਾਮਵਰਾਨਿ ਸੋਲ਼ਸਾਤਿ.

ਸਿਰੀਮਨ੍ਤਜਾਤਕਂ [ਸਿਰਿਮਨ੍ਦਜਾਤਕਂ (ਸੀ. ਸ੍ਯਾ. ਪੀ.)] ਚਤੁਤ੍ਥਂ.