੪੯੯. ਸਿਵਿਜਾਤਕਂ (੩)
੫੨. ਦੂਰੇ ਅਪਸ੍ਸਂ ਥੇਰੋਵ, ਚਕ੍ਖੁਂ ਯਾਚਿਤੁਮਾਗਤੋ;
ਏਕਨੇਤ੍ਤਾ ਭਵਿਸ੍ਸਾਮ, ਚਕ੍ਖੁਂ ਮੇ ਦੇਹਿ ਯਾਚਿਤੋ.
੫੩. ਕੇਨਾਨੁਸਿਟ੍ਠੋ ਇਧ ਮਾਗਤੋਸਿ, ਵਨਿਬ੍ਬਕ [ਵਣਿਬ੍ਬਕ (ਸੀ.)] ਚਕ੍ਖੁਪਥਾਨਿ ਯਾਚਿਤੁਂ;
ਸੁਦੁਚ੍ਚਜਂ ਯਾਚਸਿ ਉਤ੍ਤਮਙ੍ਗਂ, ਯਮਾਹੁ ਨੇਤ੍ਤਂ ਪੁਰਿਸੇਨ ਦੁਚ੍ਚਜਂ.
੫੪. ਯਮਾਹੁ ਦੇਵੇਸੁ ਸੁਜਮ੍ਪਤੀਤਿ, ਮਘਵਾਤਿ ਨਂ ਆਹੁ ਮਨੁਸ੍ਸਲੋਕੇ;
ਤੇਨਾਨੁਸਿਟ੍ਠੋ ਇਧ ਮਾਗਤੋਸ੍ਮਿ, ਵਨਿਬ੍ਬਕੋ ਚਕ੍ਖੁਪਥਾਨਿ ਯਾਚਿਤੁਂ.
੫੫. ਵਨਿਬ੍ਬਤੋ [ਵਨਿਬ੍ਬਕੋ (ਸ੍ਯਾ. ਪੀ.)] ਮਯ੍ਹ ਵਨਿਂ [ਵਨਂ (ਕ.), ਵਣਿਂ (ਸੀ. ਸ੍ਯਾ. ਪੀ.)] ਅਨੁਤ੍ਤਰਂ, ਦਦਾਹਿ ਤੇ ਚਕ੍ਖੁਪਥਾਨਿ ਯਾਚਿਤੋ;
ਦਦਾਹਿ ਮੇ ਚਕ੍ਖੁਪਥਂ ਅਨੁਤ੍ਤਰਂ, ਯਮਾਹੁ ਨੇਤ੍ਤਂ ਪੁਰਿਸੇਨ ਦੁਚ੍ਚਜਂ.
੫੬. ਯੇਨ ਅਤ੍ਥੇਨ ਆਗਚ੍ਛਿ [ਆਗਞ੍ਛਿ (ਸੀ. ਪੀ.)], ਯਮਤ੍ਥਮਭਿਪਤ੍ਥਯਂ;
ਤੇ ਤੇ ਇਜ੍ਝਨ੍ਤੁ ਸਙ੍ਕਪ੍ਪਾ, ਲਭ ਚਕ੍ਖੂਨਿ ਬ੍ਰਾਹ੍ਮਣ.
੫੭. ਏਕਂ ਤੇ ਯਾਚਮਾਨਸ੍ਸ, ਉਭਯਾਨਿ ਦਦਾਮਹਂ;
ਸ ਚਕ੍ਖੁਮਾ ਗਚ੍ਛ ਜਨਸ੍ਸ ਪੇਕ੍ਖਤੋ, ਯਦਿਚ੍ਛਸੇ ਤ੍ਵਂ ਤਦਤੇ ਸਮਿਜ੍ਝਤੁ.
੫੮. ਮਾ ਨੋ ਦੇਵ ਅਦਾ ਚਕ੍ਖੁਂ, ਮਾ ਨੋ ਸਬ੍ਬੇ ਪਰਾਕਰਿ [ਪਰਕ੍ਕਰਿ (ਸ੍ਯਾ. ਕ. ਅਟ੍ਠ.), ਪਰਿਕ੍ਕਰਿ (ਕ.) ਪਰਿ + ਆ + ਕਰਿ = ਪਰਾਕਰਿ];
ਧਨਂ ਦੇਹਿ ਮਹਾਰਾਜ, ਮੁਤ੍ਤਾ ਵੇਲ਼ੁਰਿਯਾ ਬਹੂ.
੫੯. ਯੁਤ੍ਤੇ ਦੇਵ ਰਥੇ ਦੇਹਿ, ਆਜਾਨੀਯੇ ਚਲਙ੍ਕਤੇ;
ਨਾਗੇ ਦੇਹਿ ਮਹਾਰਾਜ, ਹੇਮਕਪ੍ਪਨਵਾਸਸੇ.
੬੦. ਯਥਾ ਤਂ ਸਿਵਯੋ [ਸੀਵਿਯੋ (ਸ੍ਯਾ.)] ਸਬ੍ਬੇ, ਸਯੋਗ੍ਗਾ ਸਰਥਾ ਸਦਾ;
ਸਮਨ੍ਤਾ ਪਰਿਕਿਰੇਯ੍ਯੁਂ [ਪਰਿਕਰੇਯ੍ਯੁਂ (ਸ੍ਯਾ. ਪੀ.)], ਏਵਂ ਦੇਹਿ ਰਥੇਸਭ.
੬੧. ਯੋ ਵੇ ਦਸ੍ਸਨ੍ਤਿ ਵਤ੍ਵਾਨ, ਅਦਾਨੇ ਕੁਰੁਤੇ ਮਨੋ;
ਭੂਮ੍ਯਂ [ਭੂਮ੍ਯਾ (ਸੀ. ਪੀ.)] ਸੋ ਪਤਿਤਂ ਪਾਸਂ, ਗੀਵਾਯਂ ਪਟਿਮੁਞ੍ਚਤਿ.
੬੨. ਯੋ ਵੇ ਦਸ੍ਸਨ੍ਤਿ ਵਤ੍ਵਾਨ, ਅਦਾਨੇ ਕੁਰੁਤੇ ਮਨੋ;
ਪਾਪਾ ਪਾਪਤਰੋ ਹੋਤਿ, ਸਮ੍ਪਤ੍ਤੋ ਯਮਸਾਧਨਂ.
੬੩. ਯਞ੍ਹਿ ਯਾਚੇ ਤਞ੍ਹਿ ਦਦੇ, ਯਂ ਨ ਯਾਚੇ ਨ ਤਂ ਦਦੇ;
ਸ੍ਵਾਹਂ ਤਮੇਵ ਦਸ੍ਸਾਮਿ, ਯਂ ਮਂ ਯਾਚਤਿ ਬ੍ਰਾਹ੍ਮਣੋ.
੬੪. ਆਯੁਂ ਨੁ ਵਣ੍ਣਂ ਨੁ ਸੁਖਂ ਬਲਂ ਨੁ, ਕਿਂ ਪਤ੍ਥਯਾਨੋ ਨੁ ਜਨਿਨ੍ਦ ਦੇਸਿ;
ਕਥਞ੍ਹਿ ਰਾਜਾ ਸਿਵਿਨਂ ਅਨੁਤ੍ਤਰੋ, ਚਕ੍ਖੂਨਿ ਦਜ੍ਜਾ ਪਰਲੋਕਹੇਤੁ.
੬੫. ਨ ਵਾਹਮੇਤਂ ਯਸਸਾ ਦਦਾਮਿ, ਨ ਪੁਤ੍ਤਮਿਚ੍ਛੇ ਨ ਧਨਂ ਨ ਰਟ੍ਠਂ;
ਸਤਞ੍ਚ ਧਮ੍ਮੋ ਚਰਿਤੋ ਪੁਰਾਣੋ, ਇਚ੍ਚੇਵ ਦਾਨੇ ਰਮਤੇ ਮਨੋ ਮਮ [ਮਮਂ (ਸੀ. ਪੀ.)].
੬੬. ਸਖਾ ਚ ਮਿਤ੍ਤੋ ਚ ਮਮਾਸਿ ਸੀਵਿਕ [ਸੀਵਕ (ਸੀ. ਪੀ.)], ਸੁਸਿਕ੍ਖਿਤੋ ਸਾਧੁ ਕਰੋਹਿ ਮੇ ਵਚੋ;
ਉਦ੍ਧਰਿਤ੍ਵਾ [ਉਦ੍ਧਤ੍ਵ (ਸੀ.), ਲਦ੍ਧ ਤ੍ਵਂ (ਪੀ.)] ਚਕ੍ਖੂਨਿ ਮਮਂ ਜਿਗੀਸਤੋ, ਹਤ੍ਥੇਸੁ ਠਪੇਹਿ [ਆਵੇਸਿ (ਸੀ.)] ਵਨਿਬ੍ਬਕਸ੍ਸ.
੬੭. ਚੋਦਿਤੋ ਸਿਵਿਰਾਜੇਨ, ਸਿਵਿਕੋ ਵਚਨਙ੍ਕਰੋ;
ਰਞ੍ਞੋ ਚਕ੍ਖੂਨੁਦ੍ਧਰਿਤ੍ਵਾ [ਚਕ੍ਖੂਨਿ ਉਦ੍ਧਤ੍ਵਾ (ਸੀ. ਪੀ.)], ਬ੍ਰਾਹ੍ਮਣਸ੍ਸੂਪਨਾਮਯਿ;
ਸਚਕ੍ਖੁ ਬ੍ਰਾਹ੍ਮਣੋ ਆਸਿ, ਅਨ੍ਧੋ ਰਾਜਾ ਉਪਾਵਿਸਿ.
੬੮. ਤਤੋ ਸੋ ਕਤਿਪਾਹਸ੍ਸ, ਉਪਰੂਲ਼੍ਹੇਸੁ ਚਕ੍ਖੁਸੁ;
ਸੂਤਂ ਆਮਨ੍ਤਯੀ ਰਾਜਾ, ਸਿਵੀਨਂ ਰਟ੍ਠਵਡ੍ਢਨੋ.
੬੯. ਯੋਜੇਹਿ ਸਾਰਥਿ ਯਾਨਂ, ਯੁਤ੍ਤਞ੍ਚ ਪਟਿਵੇਦਯ;
ਉਯ੍ਯਾਨਭੂਮਿਂ ਗਚ੍ਛਾਮ, ਪੋਕ੍ਖਰਞ੍ਞੋ ਵਨਾਨਿ ਚ.
੭੦. ਸੋ ਚ ਪੋਕ੍ਖਰਣੀਤੀਰੇ [ਪੋਕ੍ਖਰਣਿਯਾ ਤੀਰੇ (ਸੀ. ਪੀ.)], ਪਲ੍ਲਙ੍ਕੇਨ ਉਪਾਵਿਸਿ;
ਤਸ੍ਸ ਸਕ੍ਕੋ ਪਾਤੁਰਹੁ, ਦੇਵਰਾਜਾ ਸੁਜਮ੍ਪਤਿ.
੭੧. ਸਕ੍ਕੋਹਮਸ੍ਮਿ ਦੇਵਿਨ੍ਦੋ, ਆਗਤੋਸ੍ਮਿ ਤਵਨ੍ਤਿਕੇ;
ਵਰਂ ਵਰਸ੍ਸੁ ਰਾਜੀਸਿ, ਯਂ ਕਿਞ੍ਚਿ ਮਨਸਿਚ੍ਛਸਿ.
੭੨. ਪਹੂਤਂ ਮੇ ਧਨਂ ਸਕ੍ਕ, ਬਲਂ ਕੋਸੋ ਚਨਪ੍ਪਕੋ;
ਅਨ੍ਧਸ੍ਸ ਮੇ ਸਤੋ ਦਾਨਿ, ਮਰਣਞ੍ਞੇਵ ਰੁਚ੍ਚਤਿ.
੭੩. ਯਾਨਿ ਸਚ੍ਚਾਨਿ ਦ੍ਵਿਪਦਿਨ੍ਦ, ਤਾਨਿ ਭਾਸਸ੍ਸੁ ਖਤ੍ਤਿਯ;
ਸਚ੍ਚਂ ਤੇ ਭਣਮਾਨਸ੍ਸ, ਪੁਨ ਚਕ੍ਖੁ ਭਵਿਸ੍ਸਤਿ.
੭੪. ਯੇ ਮਂ ਯਾਚਿਤੁਮਾਯਨ੍ਤਿ, ਨਾਨਾਗੋਤ੍ਤਾ ਵਨਿਬ੍ਬਕਾ;
ਯੋਪਿ ਮਂ ਯਾਚਤੇ ਤਤ੍ਥ, ਸੋਪਿ ਮੇ ਮਨਸੋ ਪਿਯੋ;
ਏਤੇਨ ਸਚ੍ਚਵਜ੍ਜੇਨ, ਚਕ੍ਖੁ ਮੇ ਉਪਪਜ੍ਜਥ.
੭੫. ਯਂ ਮਂ ਸੋ ਯਾਚਿਤੁਂ ਆਗਾ, ਦੇਹਿ ਚਕ੍ਖੁਨ੍ਤਿ ਬ੍ਰਾਹ੍ਮਣੋ;
ਤਸ੍ਸ ਚਕ੍ਖੂਨਿ ਪਾਦਾਸਿਂ, ਬ੍ਰਾਹ੍ਮਣਸ੍ਸ ਵਨਿਬ੍ਬਤੋ [ਵਣਿਬ੍ਬਿਨੋ (ਸੀ.), ਵਨਿਬ੍ਬਿਨੋ (ਪੀ.)].
੭੬. ਭਿਯ੍ਯੋ ਮਂ ਆਵਿਸੀ ਪੀਤਿ, ਸੋਮਨਸ੍ਸਞ੍ਚਨਪ੍ਪਕਂ;
ਏਤੇਨ ਸਚ੍ਚਵਜ੍ਜੇਨ, ਦੁਤਿਯਂ ਮੇ ਉਪਪਜ੍ਜਥ.
੭੭. ਧਮ੍ਮੇਨ ਭਾਸਿਤਾ ਗਾਥਾ, ਸਿਵੀਨਂ ਰਟ੍ਠਵਡ੍ਢਨ;
ਏਤਾਨਿ ਤਵ ਨੇਤ੍ਤਾਨਿ, ਦਿਬ੍ਬਾਨਿ ਪਟਿਦਿਸ੍ਸਰੇ.
੭੮. ਤਿਰੋਕੁਟ੍ਟਂ ਤਿਰੋਸੇਲਂ, ਸਮਤਿਗ੍ਗਯ੍ਹ ਪਬ੍ਬਤਂ;
ਸਮਨ੍ਤਾ ਯੋਜਨਸਤਂ, ਦਸ੍ਸਨਂ ਅਨੁਭੋਨ੍ਤੁ ਤੇ.
੭੯. ਕੋ ਨੀਧ ਵਿਤ੍ਤਂ ਨ ਦਦੇਯ੍ਯ ਯਾਚਿਤੋ, ਅਪਿ ਵਿਸਿਟ੍ਠਂ ਸੁਪਿਯਮ੍ਪਿ ਅਤ੍ਤਨੋ;
ਤਦਿਙ੍ਘ ਸਬ੍ਬੇ ਸਿਵਯੋ ਸਮਾਗਤਾ, ਦਿਬ੍ਬਾਨਿ ਨੇਤ੍ਤਾਨਿ ਮਮਜ੍ਜ ਪਸ੍ਸਥ.
੮੦. ਤਿਰੋਕੁਟ੍ਟਂ ਤਿਰੋਸੇਲਂ, ਸਮਤਿਗ੍ਗਯ੍ਹ ਪਬ੍ਬਤਂ;
ਸਮਨ੍ਤਾ ਯੋਜਨਸਤਂ, ਦਸ੍ਸਨਂ ਅਨੁਭੋਨ੍ਤਿ ਮੇ.
੮੧. ਨ ਚਾਗਮਤ੍ਤਾ ਪਰਮਤ੍ਥਿ ਕਿਞ੍ਚਿ, ਮਚ੍ਚਾਨਂ ਇਧ ਜੀਵਿਤੇ;
ਦਤ੍ਵਾਨ ਮਾਨੁਸਂ [ਦਤ੍ਵਾ ਮਾਨੁਸਕਂ (ਸੀ.)] ਚਕ੍ਖੁਂ, ਲਦ੍ਧਂ ਮੇ [ਮੇ ਇਤਿ ਪਦਂ ਨਤ੍ਥਿ ਸੀ. ਪੋਤ੍ਥਕੇ] ਚਕ੍ਖੁਂ ਅਮਾਨੁਸਂ.
੮੨. ਏਤਮ੍ਪਿ ਦਿਸ੍ਵਾ ਸਿਵਯੋ, ਦੇਥ ਦਾਨਾਨਿ ਭੁਞ੍ਜਥ;
ਦਤ੍ਵਾ ਚ ਭੁਤ੍ਵਾ ਚ ਯਥਾਨੁਭਾਵਂ, ਅਨਿਨ੍ਦਿਤਾ ਸਗ੍ਗਮੁਪੇਥ ਠਾਨਨ੍ਤਿ.
ਸਿਵਿਜਾਤਕਂ ਤਤਿਯਂ.