੪੯੬. ਭਿਕ੍ਖਾਪਰਮ੍ਪਰਜਾਤਕਂ (੧੩)

੨੭੦. ਸੁਖੁਮਾਲਰੂਪਂ ਦਿਸ੍ਵਾ [ਦਿਸ੍ਵਾਨ (ਕ. ਸੀ. ਅਟ੍ਠ.)], ਰਟ੍ਠਾ ਵਿਵਨਮਾਗਤਂ;

ਕੂਟਾਗਾਰਵਰੂਪੇਤਂ, ਮਹਾਸਯਨਮੁਪਾਸਿਤਂ [ਮੁਪੋਚਿਤਂ (ਬਹੂਸੁ)].

੨੭੧. ਤਸ੍ਸ ਤੇ ਪੇਮਕੇਨਾਹਂ, ਅਦਾਸਿਂ ਵਡ੍ਢਮੋਦਨਂ [ਬਦ੍ਧਮੋਦਨਂ (ਸੀ. ਪੀ.)];

ਸਾਲੀਨਂ ਵਿਚਿਤਂ ਭਤ੍ਤਂ, ਸੁਚਿਂ ਮਂਸੂਪਸੇਚਨਂ.

੨੭੨. ਤਂ ਤ੍ਵਂ ਭਤ੍ਤਂ ਪਟਿਗ੍ਗਯ੍ਹ, ਬ੍ਰਾਹ੍ਮਣਸ੍ਸ ਅਦਾਸਯਿ [ਅਦਾਪਯਿ (ਸੀ. ਸ੍ਯਾ. ਪੀ.)];

ਅਤ੍ਤਾਨਂ [ਅਤ੍ਤਨਾ (ਪੀ. ਅਟ੍ਠ. ਪਾਠਨ੍ਤਰਂ)] ਅਨਸਿਤ੍ਵਾਨ, ਕੋਯਂ ਧਮ੍ਮੋ ਨਮਤ੍ਥੁ ਤੇ.

੨੭੩. ਆਚਰਿਯੋ ਬ੍ਰਾਹ੍ਮਣੋ ਮਯ੍ਹਂ, ਕਿਚ੍ਚਾਕਿਚ੍ਚੇਸੁ ਬ੍ਯਾਵਟੋ [ਵਾਵਟੋ (ਕ.)];

ਗਰੁ ਚ ਆਮਨ੍ਤਨੀਯੋ [ਆਮਨ੍ਤਣੀਯੋ (ਸੀ. ਪੀ.)] ਚ, ਦਾਤੁਮਰਹਾਮਿ ਭੋਜਨਂ.

੨੭੪. ਬ੍ਰਾਹ੍ਮਣਂ ਦਾਨਿ ਪੁਚ੍ਛਾਮਿ, ਗੋਤਮਂ ਰਾਜਪੂਜਿਤਂ;

ਰਾਜਾ ਤੇ ਭਤ੍ਤਂ ਪਾਦਾਸਿ, ਸੁਚਿਂ ਮਂਸੂਪਸੇਚਨਂ.

੨੭੫. ਤਂ ਤ੍ਵਂ ਭਤ੍ਤਂ ਪਟਿਗ੍ਗਯ੍ਹ, ਇਸਿਸ੍ਸ ਭੋਜਨਂ ਅਦਾ;

ਅਖੇਤ੍ਤਞ੍ਞੂਸਿ ਦਾਨਸ੍ਸ, ਕੋਯਂ ਧਮ੍ਮੋ ਨਮਤ੍ਥੁ ਤੇ.

੨੭੬. ਭਰਾਮਿ ਪੁਤ੍ਤ [ਪੁਤ੍ਤੇ (ਸੀ. ਪੀ.)] ਦਾਰੇ ਚ, ਘਰੇਸੁ ਗਧਿਤੋ [ਗਥਿਤੋ (ਸੀ. ਪੀ.)] ਅਹਂ;

ਭੁਞ੍ਜੇ ਮਾਨੁਸਕੇ ਕਾਮੇ, ਅਨੁਸਾਸਾਮਿ ਰਾਜਿਨੋ.

੨੭੭. ਆਰਞ੍ਞਿਕਸ੍ਸ [ਆਰਞ੍ਞਕਸ੍ਸ (ਸੀ. ਪੀ.)] ਇਸਿਨੋ, ਚਿਰਰਤ੍ਤਂ ਤਪਸ੍ਸਿਨੋ;

ਵੁਡ੍ਢਸ੍ਸ ਭਾਵਿਤਤ੍ਤਸ੍ਸ, ਦਾਤੁਮਰਹਾਮਿ ਭੋਜਨਂ.

੨੭੮. ਇਸਿਞ੍ਚ ਦਾਨਿ ਪੁਚ੍ਛਾਮਿ, ਕਿਸਂ ਧਮਨਿਸਨ੍ਥਤਂ;

ਪਰੂਲ਼੍ਹਕਚ੍ਛਨਖਲੋਮਂ, ਪਙ੍ਕਦਨ੍ਤਂ ਰਜਸ੍ਸਿਰਂ.

੨੭੯. ਏਕੋ ਅਰਞ੍ਞੇ ਵਿਹਰਸਿ [ਵਿਹਾਸਿ (ਕ.)], ਨਾਵਕਙ੍ਖਸਿ ਜੀਵਿਤਂ;

ਭਿਕ੍ਖੁ ਕੇਨ ਤਯਾ ਸੇਯ੍ਯੋ, ਯਸ੍ਸ ਤ੍ਵਂ ਭੋਜਨਂ ਅਦਾ.

੨੮੦. ਖਣਨ੍ਤਾਲੁਕਲਮ੍ਬਾਨਿ [ਖਣਮਾਲੁਕਲਮ੍ਬਾਨਿ (ਸ੍ਯਾ. ਕ.)], ਬਿਲਾਲਿਤਕ੍ਕਲਾਨਿ ਚ [ਬਿਲ਼ਾਲਿਤਕ੍ਕਲ਼ਾਨਿ ਚ (ਸੀ. ਪੀ.)];

ਧੁਨਂ ਸਾਮਾਕਨੀਵਾਰਂ, ਸਙ੍ਘਾਰਿਯਂ ਪਸਾਰਿਯਂ [ਸਂਹਾਰਿਯਂ ਪਹਾਰਿਯਂ (ਸ੍ਯਾ.), ਸਂਸਾਰਿਯਂ ਪਸਾਰਿਯਂ (ਕ.)].

੨੮੧. ਸਾਕਂ ਭਿਸਂ ਮਧੁਂ ਮਂਸਂ, ਬਦਰਾਮਲਕਾਨਿ ਚ;

ਤਾਨਿ ਆਹਰਿਤ੍ਵਾ [ਆਹਤ੍ਵ (ਸੀ. ਸ੍ਯਾ.)] ਭੁਞ੍ਜਾਮਿ, ਅਤ੍ਥਿ ਮੇ ਸੋ ਪਰਿਗ੍ਗਹੋ.

੨੮੨. ਪਚਨ੍ਤੋ ਅਪਚਨ੍ਤਸ੍ਸ, ਅਮਮਸ੍ਸ ਸਕਿਞ੍ਚਨੋ [ਅਕਿਞ੍ਚਨੋ (ਕ.)];

ਅਨਾਦਾਨਸ੍ਸ ਸਾਦਾਨੋ, ਦਾਤੁਮਰਹਾਮਿ ਭੋਜਨਂ.

੨੮੩. ਭਿਕ੍ਖੁਞ੍ਚ ਦਾਨਿ ਪੁਚ੍ਛਾਮਿ, ਤੁਣ੍ਹੀਮਾਸੀਨ ਸੁਬ੍ਬਤਂ;

ਇਸਿ ਤੇ ਭਤ੍ਤਂ ਪਾਦਾਸਿ, ਸੁਚਿਂ ਮਂਸੂਪਸੇਚਨਂ.

੨੮੪. ਤਂ ਤ੍ਵਂ ਭਤ੍ਤਂ ਪਟਿਗ੍ਗਯ੍ਹ, ਤੁਣ੍ਹੀ ਭੁਞ੍ਜਸਿ ਏਕਕੋ;

ਨਾਞ੍ਞਂ ਕਞ੍ਚਿ [ਕਿਞ੍ਚਿ (ਕ.)] ਨਿਮਨ੍ਤੇਸਿ, ਕੋਯਂ ਧਮ੍ਮੋ ਨਮਤ੍ਥੁ ਤੇ.

੨੮੫. ਨ ਪਚਾਮਿ ਨ ਪਾਚੇਮਿ, ਨ ਛਿਨ੍ਦਾਮਿ ਨ ਛੇਦਯੇ;

ਤਂ ਮਂ ਅਕਿਞ੍ਚਨਂ ਞਤ੍ਵਾ, ਸਬ੍ਬਪਾਪੇਹਿ ਆਰਤਂ.

੨੮੬. ਵਾਮੇਨ ਭਿਕ੍ਖਮਾਦਾਯ, ਦਕ੍ਖਿਣੇਨ ਕਮਣ੍ਡਲੁਂ;

ਇਸਿ ਮੇ ਭਤ੍ਤਂ ਪਾਦਾਸਿ, ਸੁਚਿਂ ਮਂਸੂਪਸੇਚਨਂ.

੨੮੭. ਏਤੇ ਹਿ ਦਾਤੁਮਰਹਨ੍ਤਿ, ਸਮਮਾ ਸਪਰਿਗ੍ਗਹਾ;

ਪਚ੍ਚਨੀਕਮਹਂ ਮਞ੍ਞੇ, ਯੋ ਦਾਤਾਰਂ ਨਿਮਨ੍ਤਯੇ.

੨੮੮. ਅਤ੍ਥਾਯ ਵਤ ਮੇ ਅਜ੍ਜ, ਇਧਾਗਚ੍ਛਿ ਰਥੇਸਭੋ;

ਸੋਹਂ ਅਜ੍ਜ ਪਜਾਨਾਮਿ [ਇਤੋ ਪੁਬ੍ਬੇ ਨ ਜਾਨਾਮਿ (ਸੀ. ਪੀ.)], ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੮੯. ਰਟ੍ਠੇਸੁ ਗਿਦ੍ਧਾ ਰਾਜਾਨੋ, ਕਿਚ੍ਚਾਕਿਚ੍ਚੇਸੁ ਬ੍ਰਾਹ੍ਮਣਾ;

ਇਸੀ ਮੂਲਫਲੇ ਗਿਦ੍ਧਾ, ਵਿਪ੍ਪਮੁਤ੍ਤਾ ਚ ਭਿਕ੍ਖਵੋਤਿ.

ਭਿਕ੍ਖਾਪਰਮ੍ਪਰਜਾਤਕਂ ਤੇਰਸਮਂ.

ਤਸ੍ਸੁਦ੍ਦਾਨਂ –

ਸੁਵ ਕਿਨ੍ਨਰ ਮੁਕ੍ਕ ਖਰਾਜਿਨਸੋ, ਭਿਸਜਾਤ ਮਹੇਸਿ ਕਪੋਤਵਰੋ;

ਅਥ ਮੋਰ ਸਤਚ੍ਛਕ ਵਾਣਿਜਕੋ, ਅਥ ਰਾਜ ਸਬ੍ਰਾਹ੍ਮਣ ਭਿਕ੍ਖਪਰਨ੍ਤਿ.

ਪਕਿਣ੍ਣਕਨਿਪਾਤਂ ਨਿਟ੍ਠਿਤਂ.