੧੪. ਪਕਿਣ੍ਣਕਨਿਪਾਤੋ

੪੮੪. ਸਾਲਿਕੇਦਾਰਜਾਤਕਂ (੧)

੧. ਸਮ੍ਪਨ੍ਨਂ ਸਾਲਿਕੇਦਾਰਂ, ਸੁਵਾ ਭੁਞ੍ਜਨ੍ਤਿ ਕੋਸਿਯ;

ਪਟਿਵੇਦੇਮਿ ਤੇ ਬ੍ਰਹ੍ਮੇ, ਨ ਨੇ [ਤੇ (ਸੀ. ਸ੍ਯਾ.), ਨਂ (ਸੀ. ਸ੍ਯਾ. ਪੀ. ਅਟ੍ਠ.), ਤਂ (ਕ. ਅਟ੍ਠ.)] ਵਾਰੇਤੁਮੁਸ੍ਸਹੇ.

੨. ਏਕੋ ਚ ਤਤ੍ਥ ਸਕੁਣੋ, ਯੋ ਨੇਸਂ [ਤੇਸਂ (ਸੀ. ਅਟ੍ਠ.)] ਸਬ੍ਬਸੁਨ੍ਦਰੋ;

ਭੁਤ੍ਵਾ ਸਾਲਿਂ ਯਥਾਕਾਮਂ, ਤੁਣ੍ਡੇਨਾਦਾਯ ਗਚ੍ਛਤਿ.

੩. ਓਡ੍ਡੇਨ੍ਤੁ [ਉਜ੍ਝੁਨ੍ਤੁ (ਸ੍ਯਾ. ਕ.) ਅਙ੍ਗੁਤ੍ਤਰਨਿਕਾਯੇ ਪਸ੍ਸਿਤਬ੍ਬਂ] ਵਾਲ਼ਪਾਸਾਨਿ, ਯਥਾ ਵਜ੍ਝੇਥ ਸੋ ਦਿਜੋ;

ਜੀਵਞ੍ਚ ਨਂ ਗਹੇਤ੍ਵਾਨ, ਆਨਯੇਹਿ [ਆਨਯੇਥ (ਸੀ. ਪੀ.)] ਮਮਨ੍ਤਿਕੇ.

੪. ਏਤੇ ਭੁਤ੍ਵਾ ਪਿਵਿਤ੍ਵਾ ਚ [ਭੁਤ੍ਵਾ ਚ ਪਿਤ੍ਵਾ ਚ (ਪੀ.)], ਪਕ੍ਕਮਨ੍ਤਿ ਵਿਹਙ੍ਗਮਾ;

ਏਕੋ ਬਦ੍ਧੋਸ੍ਮਿ ਪਾਸੇਨ, ਕਿਂ ਪਾਪਂ ਪਕਤਂ ਮਯਾ.

੫. ਉਦਰਂ ਨੂਨ ਅਞ੍ਞੇਸਂ, ਸੁਵ ਅਚ੍ਚੋਦਰਂ ਤਵ;

ਭੁਤ੍ਵਾ ਸਾਲਿਂ ਯਥਾਕਾਮਂ, ਤੁਣ੍ਡੇਨਾਦਾਯ ਗਚ੍ਛਸਿ.

੬. ਕੋਟ੍ਠਂ ਨੁ ਤਤ੍ਥ ਪੂਰੇਸਿ, ਸੁਵ ਵੇਰਂ ਨੁ ਤੇ ਮਯਾ;

ਪੁਟ੍ਠੋ ਮੇ ਸਮ੍ਮ ਅਕ੍ਖਾਹਿ, ਕੁਹਿਂ ਸਾਲਿਂ ਨਿਦਾਹਸਿ [ਨਿਧੀਯਸਿ (ਪੀ.)].

੭. ਨ ਮੇ ਵੇਰਂ ਤਯਾ ਸਦ੍ਧਿਂ, ਕੋਟ੍ਠੋ ਮਯ੍ਹਂ ਨ ਵਿਜ੍ਜਤਿ;

ਇਣਂ ਮੁਞ੍ਚਾਮਿਣਂ ਦਮ੍ਮਿ, ਸਮ੍ਪਤ੍ਤੋ ਕੋਟਸਿਮ੍ਬਲਿਂ;

ਨਿਧਿਮ੍ਪਿ ਤਤ੍ਥ ਨਿਦਹਾਮਿ, ਏਵਂ ਜਾਨਾਹਿ ਕੋਸਿਯ.

੮. ਕੀਦਿਸਂ ਤੇ ਇਣਦਾਨਂ, ਇਣਮੋਕ੍ਖੋ ਚ ਕੀਦਿਸੋ;

ਨਿਧਿਨਿਧਾਨਮਕ੍ਖਾਹਿ, ਅਥ ਪਾਸਾ ਪਮੋਕ੍ਖਸਿ.

੯. ਅਜਾਤਪਕ੍ਖਾ ਤਰੁਣਾ, ਪੁਤ੍ਤਕਾ ਮਯ੍ਹ ਕੋਸਿਯ;

ਤੇ ਮਂ ਭਤਾ ਭਰਿਸ੍ਸਨ੍ਤਿ, ਤਸ੍ਮਾ ਤੇਸਂ ਇਣਂ ਦਦੇ.

੧੦. ਮਾਤਾ ਪਿਤਾ ਚ ਮੇ ਵੁਦ੍ਧਾ, ਜਿਣ੍ਣਕਾ ਗਤਯੋਬ੍ਬਨਾ;

ਤੇਸਂ ਤੁਣ੍ਡੇਨ ਹਾਤੂਨ, ਮੁਞ੍ਚੇ ਪੁਬ੍ਬਕਤਂ [ਪੁਬ੍ਬੇ ਕਤਂ (ਸੀ.)] ਇਣਂ.

੧੧. ਅਞ੍ਞੇਪਿ ਤਤ੍ਥ ਸਕੁਣਾ, ਖੀਣਪਕ੍ਖਾ ਸੁਦੁਬ੍ਬਲਾ;

ਤੇਸਂ ਪੁਞ੍ਞਤ੍ਥਿਕੋ ਦਮ੍ਮਿ, ਤਂ ਨਿਧਿਂ ਆਹੁ ਪਣ੍ਡਿਤਾ.

੧੨. ਈਦਿਸਂ [ਏਦਿਸਂ (ਸੀ. ਪੀ.)] ਮੇ ਇਣਦਾਨਂ, ਇਣਮੋਕ੍ਖੋ ਚ ਈਦਿਸੋ;

ਨਿਧਿਨਿਧਾਨਮਕ੍ਖਾਮਿ [ਨਿਧਿਂ ਨਿਧਾਨਂ ਅਕ੍ਖਾਤਂ (ਸੀ. ਪੀ.)], ਏਵਂ ਜਾਨਾਹਿ ਕੋਸਿਯ.

੧੩. ਭਦ੍ਦਕੋ ਵਤਯਂ ਪਕ੍ਖੀ, ਦਿਜੋ ਪਰਮਧਮ੍ਮਿਕੋ;

ਏਕਚ੍ਚੇਸੁ ਮਨੁਸ੍ਸੇਸੁ, ਅਯਂ ਧਮ੍ਮੋ ਨ ਵਿਜ੍ਜਤਿ.

੧੪. ਭੁਞ੍ਜ ਸਾਲਿਂ ਯਥਾਕਾਮਂ, ਸਹ ਸਬ੍ਬੇਹਿ ਞਾਤਿਭਿ;

ਪੁਨਾਪਿ ਸੁਵ ਪਸ੍ਸੇਮੁ, ਪਿਯਂ ਮੇ ਤਵ ਦਸ੍ਸਨਂ.

੧੫. ਭੁਤ੍ਤਞ੍ਚ ਪੀਤਞ੍ਚ ਤਵਸ੍ਸਮਮ੍ਹਿ [ਤਵਸ੍ਸਬ੍ਯਮ੍ਹਿ (ਕ.)], ਰਤ੍ਤਿਞ੍ਚ [ਰਤੀ ਚ (ਸੀ. ਪੀ.)] ਨੋ ਕੋਸਿਯ ਤੇ ਸਕਾਸੇ;

ਨਿਕ੍ਖਿਤ੍ਤਦਣ੍ਡੇਸੁ ਦਦਾਹਿ ਦਾਨਂ, ਜਿਣ੍ਣੇ ਚ ਮਾਤਾਪਿਤਰੋ ਭਰਸ੍ਸੁ.

੧੬. ਲਕ੍ਖੀ ਵਤ ਮੇ ਉਦਪਾਦਿ ਅਜ੍ਜ, ਯੋ ਅਦ੍ਦਸਾਸਿਂ ਪਵਰਂ [ਯੋਹਂ ਅਦਸ੍ਸਂ ਪਰਮਂ (ਸ੍ਯਾ. ਕ.)] ਦਿਜਾਨਂ;

ਸੁਵਸ੍ਸ ਸੁਤ੍ਵਾਨ ਸੁਭਾਸਿਤਾਨਿ, ਕਾਹਾਮਿ ਪੁਞ੍ਞਾਨਿ ਅਨਪ੍ਪਕਾਨਿ.

੧੭. ਸੋ ਕੋਸਿਯੋ ਅਤ੍ਤਮਨੋ ਉਦਗ੍ਗੋ, ਅਨ੍ਨਞ੍ਚ ਪਾਨਞ੍ਚਭਿਸਙ੍ਖਰਿਤ੍ਵਾ [ਅਨ੍ਨਞ੍ਚ ਪਾਨਂ ਅਭਿਸਂਹਰਿਤ੍ਵਾ (ਕ.)];

ਅਨ੍ਨੇਨ ਪਾਨੇਨ ਪਸਨ੍ਨਚਿਤ੍ਤੋ, ਸਨ੍ਤਪ੍ਪਯਿ ਸਮਣਬ੍ਰਾਹ੍ਮਣੇ ਚਾਤਿ.

ਸਾਲਿਕੇਦਾਰਜਾਤਕਂ [ਕੇਦਾਰਜਾਤਕਂ (ਕ.)] ਪਠਮਂ.

੪੮੫. ਚਨ੍ਦਕਿਨ੍ਨਰੀਜਾਤਕਂ (੨)

੧੮. ਉਪਨੀਯਤਿਦਂ ਮਞ੍ਞੇ, ਚਨ੍ਦੇ [ਲੋਹਿਤਮਦੇਨ ਮਜ੍ਜਾਮਿ; ਵਿਜਹਾਮਿ ਜੀਵਿਤਂ ਪਾਣਾ, (ਸੀ. ਪੀ. ਅਟ੍ਠ.)] ਲੋਹਿਤਮਦ੍ਦਨੇ;

ਅਜ੍ਜ ਜਹਾਮਿ ਜੀਵਿਤਂ, ਪਾਣਾ [ਲੋਹਿਤਮਦੇਨ ਮਜ੍ਜਾਮਿ; ਵਿਜਹਾਮਿ ਜੀਵਿਤਂ ਪਾਣਾ, (ਸੀ. ਪੀ. ਅਟ੍ਠ.)] ਮੇ ਚਨ੍ਦੇ ਨਿਰੁਜ੍ਝਨ੍ਤਿ.

੧੯. ਓਸੀਦਿ [ਓਸਧਿ (ਸੀ. ਸ੍ਯਾ. ਪੀ.), ਓਸਟ੍ਠਿ (ਕ.), ਓਸਤਿ (ਅਭਿਨਵਟੀਕਾ), ਓਸੀਦਤਿ (?)] ਮੇ ਦੁਕ੍ਖਂ [ਦੁਕ੍ਖਂ ਮੇ (ਸੀ. ਪੀ.)] ਹਦਯਂ, ਮੇ ਡਯ੍ਹਤੇ ਨਿਤਮ੍ਮਾਮਿ;

ਤਵ ਚਨ੍ਦਿਯਾ ਸੋਚਨ੍ਤਿਯਾ, ਨ ਨਂ ਅਞ੍ਞੇਹਿ ਸੋਕੇਹਿ.

੨੦. ਤਿਣਮਿਵ ਵਨਮਿਵ ਮਿਲਾਯਾਮਿ [ਮਿਲਯਾਮਿ (ਸੀ.), ਮਿਯ੍ਯਾਮਿ (ਸੀ. ਪੀ. ਅਟ੍ਠ.)], ਨਦੀ ਅਪਰਿਪੁਣ੍ਣਾਵ [ਅਪਰਿਪੁਣ੍ਣਿਯਾਵ (ਸੀ. ਪੀ.)] ਸੁਸ੍ਸਾਮਿ;

ਤਵ ਚਨ੍ਦਿਯਾ ਸੋਚਨ੍ਤਿਯਾ, ਨ ਨਂ ਅਞ੍ਞੇਹਿ ਸੋਕੇਹਿ.

੨੧. ਵਸ੍ਸਮਿਵ ਸਰੇ ਪਾਦੇ [ਵਸ੍ਸਂਵ ਸਰੇ ਪਾਦੇ (ਸੀ.), ਵਸ੍ਸਂਵ ਸਰੇ ਪਬ੍ਬਤਪਾਦੇ (ਪੀ.)], ਇਮਾਨਿ ਅਸ੍ਸੂਨਿ ਵਤ੍ਤਰੇ ਮਯ੍ਹਂ;

ਤਵ ਚਨ੍ਦਿਯਾ ਸੋਚਨ੍ਤਿਯਾ, ਨ ਨਂ ਅਞ੍ਞੇਹਿ ਸੋਕੇਹਿ.

੨੨. ਪਾਪੋ ਖੋਸਿ [ਪਾਪੋਸਿ ਖੋ (ਸੀ.), ਪਾਪੋ ਖੋ (ਸ੍ਯਾ. ਪੀ.)] ਰਾਜਪੁਤ੍ਤ, ਯੋ ਮੇ ਇਚ੍ਛਿਤਂ [ਇਚ੍ਛਿਤ (ਸੀ. ਸ੍ਯਾ. ਪੀ.)] ਪਤਿਂ ਵਰਾਕਿਯਾ;

ਵਿਜ੍ਝਸਿ ਵਨਮੂਲਸ੍ਮਿਂ, ਸੋਯਂ ਵਿਦ੍ਧੋ ਛਮਾ ਸੇਤਿ.

੨੩. ਇਮਂ ਮਯ੍ਹਂ ਹਦਯਸੋਕਂ, ਪਟਿਮੁਞ੍ਚਤੁ ਰਾਜਪੁਤ੍ਤ ਤਵ ਮਾਤਾ;

ਯੋ ਮਯ੍ਹਂ ਹਦਯਸੋਕੋ, ਕਿਮ੍ਪੁਰਿਸਂ ਅਵੇਕ੍ਖਮਾਨਾਯ.

੨੪. ਇਮਂ ਮਯ੍ਹਂ ਹਦਯਸੋਕਂ, ਪਟਿਮੁਞ੍ਚਤੁ ਰਾਜਪੁਤ੍ਤ ਤਵ ਜਾਯਾ;

ਯੋ ਮਯ੍ਹਂ ਹਦਯਸੋਕੋ, ਕਿਮ੍ਪੁਰਿਸਂ ਅਵੇਕ੍ਖਮਾਨਾਯ.

੨੫. ਮਾ ਚ ਪੁਤ੍ਤਂ [ਪੁਤ੍ਤੇ (ਸੀ. ਪੀ.)] ਮਾ ਚ ਪਤਿਂ, ਅਦ੍ਦਕ੍ਖਿ ਰਾਜਪੁਤ੍ਤ ਤਵ ਮਾਤਾ;

ਯੋ ਕਿਮ੍ਪੁਰਿਸਂ ਅਵਧਿ, ਅਦੂਸਕਂ ਮਯ੍ਹ ਕਾਮਾ ਹਿ [ਮਯ੍ਹਂ ਕਾਮਾ (ਕ.)].

੨੬. ਮਾ ਚ ਪੁਤ੍ਤਂ ਮਾ ਚ ਪਤਿਂ, ਅਦ੍ਦਕ੍ਖਿ ਰਾਜਪੁਤ੍ਤ ਤਵ ਜਾਯਾ;

ਯੋ ਕਿਮ੍ਪੁਰਿਸਂ ਅਵਧਿ, ਅਦੂਸਕਂ ਮਯ੍ਹ ਕਾਮਾ ਹਿ.

੨੭. ਮਾ ਤ੍ਵਂ ਚਨ੍ਦੇ ਰੋਦਿ, ਮਾ ਸੋਚਿ ਵਨਤਿਮਿਰਮਤ੍ਤਕ੍ਖਿ;

ਮਮ ਤ੍ਵਂ ਹੇਹਿਸਿ ਭਰਿਯਾ, ਰਾਜਕੁਲੇ ਪੂਜਿਤਾ ਨਾਰੀਭਿ [ਨਾਰੀ (ਸੀ. ਪੀ.)].

੨੮. ਅਪਿ ਨੂਨਹਂ ਮਰਿਸ੍ਸਂ, ਨਾਹਂ [ਨ ਚ ਪਨਾਹਂ (ਸੀ. ਪੀ.)] ਰਾਜਪੁਤ੍ਤ ਤਵ ਹੇਸ੍ਸਂ;

ਯੋ ਕਿਮ੍ਪੁਰਿਸਂ ਅਵਧਿ, ਅਦੂਸਕਂ ਮਯ੍ਹ ਕਾਮਾ ਹਿ.

੨੯. ਅਪਿ ਭੀਰੁਕੇ ਅਪਿ ਜੀਵਿਤੁਕਾਮਿਕੇ, ਕਿਮ੍ਪੁਰਿਸਿ ਗਚ੍ਛ ਹਿਮਵਨ੍ਤਂ;

ਤਾਲੀਸਤਗਰਭੋਜਨਾ, ਅਞ੍ਞੇ [ਤਾਲਿਸ੍ਸਤਗਰਭੋਜਨੇ, ਅਰਞ੍ਞੇ (ਸੀ. ਪੀ.)] ਤਂ ਮਿਗਾ ਰਮਿਸ੍ਸਨ੍ਤਿ.

੩੦. ਤੇ ਪਬ੍ਬਤਾ ਤਾ ਚ ਕਨ੍ਦਰਾ, [ਤਾ ਚ ਗਿਰਿਗੁਹਾਯੋ (ਸੀ. ਸ੍ਯਾ. ਪੀ.)] ਤਾ ਚ ਗਿਰਿਗੁਹਾਯੋ ਤਥੇਵ ਤਿਟ੍ਠਨ੍ਤਿ [ਤਾ ਚ ਗਿਰਿਗੁਹਾਯੋ (ਸੀ. ਸ੍ਯਾ. ਪੀ.)];

ਤਤ੍ਥੇਵ [ਤਤ੍ਥ (ਸੀ. ਸ੍ਯਾ. ਪੀ.)] ਤਂ ਅਪਸ੍ਸਨ੍ਤੀ, ਕਿਮ੍ਪੁਰਿਸ ਕਥਂ ਅਹਂ ਕਸ੍ਸਂ.

੩੧. ਤੇ ਪਣ੍ਣਸਨ੍ਥਤਾ ਰਮਣੀਯਾ, ਵਾਲ਼ਮਿਗੇਹਿ ਅਨੁਚਿਣ੍ਣਾ;

ਤਤ੍ਥੇਵ ਤਂ ਅਪਸ੍ਸਨ੍ਤੀ, ਕਿਮ੍ਪੁਰਿਸ ਕਥਂ ਅਹਂ ਕਸ੍ਸਂ [ਕਾਸਂ (ਸੀ. ਸ੍ਯਾ. ਪੀ.)].

੩੨. ਤੇ ਪੁਪ੍ਫਸਨ੍ਥਤਾ ਰਮਣੀਯਾ, ਵਾਲ਼ਮਿਗੇਹਿ ਅਨੁਚਿਣ੍ਣਾ;