੪੯੫. ਦਸਬ੍ਰਾਹ੍ਮਣਜਾਤਕਂ (੧੨)

੨੨੨. ਰਾਜਾ ਅਵੋਚ ਵਿਧੁਰਂ, ਧਮ੍ਮਕਾਮੋ ਯੁਧਿਟ੍ਠਿਲੋ;

ਬ੍ਰਾਹ੍ਮਣੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੨੩. ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ [ਭੁਞ੍ਜੇਯ੍ਯੁਂ (ਸੀ.)] ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੨੪. ਦੁਲ੍ਲਭਾ ਬ੍ਰਾਹ੍ਮਣਾ ਦੇਵ, ਸੀਲਵਨ੍ਤੋ ਬਹੁਸ੍ਸੁਤਾ;

ਵਿਰਤਾ ਮੇਥੁਨਾ ਧਮ੍ਮਾ, ਯੇ ਤੇ ਭੁਞ੍ਜੇਯ੍ਯੁ ਭੋਜਨਂ.

੨੨੫. ਦਸ ਖਲੁ ਮਹਾਰਾਜ, ਯਾ ਤਾ ਬ੍ਰਾਹ੍ਮਣਜਾਤਿਯੋ;

ਤੇਸਂ ਵਿਭਙ੍ਗਂ ਵਿਚਯਂ [ਵਿਚਿਯ (ਕ.)], ਵਿਤ੍ਥਾਰੇਨ ਸੁਣੋਹਿ ਮੇ.

੨੨੬. ਪਸਿਬ੍ਬਕੇ ਗਹੇਤ੍ਵਾਨ, ਪੁਣ੍ਣੇ ਮੂਲਸ੍ਸ ਸਂਵੁਤੇ;

ਓਸਧਿਕਾਯੋ [ਓਸਧਿਕਾਯੇ (ਸ੍ਯਾ. ਕ.)] ਗਨ੍ਥੇਨ੍ਤਿ, ਨ੍ਹਾਪਯਨ੍ਤਿ [ਨਹਾਯਨ੍ਤਿ (ਸੀ. ਪੀ.)] ਜਪਨ੍ਤਿ ਚ.

੨੨੭. ਤਿਕਿਚ੍ਛਕਸਮਾ ਰਾਜ, ਤੇਪਿ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੨੮. ਅਪੇਤਾ ਤੇ ਚ [ਤੇ (ਸੀ. ਪੀ.)] ਬ੍ਰਹ੍ਮਞ੍ਞਾ,

(ਇਤਿ ਰਾਜਾ [ਰਾਜਾ ਚ (ਸ੍ਯਾ. ਕ.)] ਕੋਰਬ੍ਯੋ)

ਨ ਤੇ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਞ੍ਞੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੨੯. ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੩੦. ਕਿਙ੍ਕਿਣਿਕਾਯੋ [ਕਿਙ੍ਕਣਿਕਾਯੋ (ਕ.), ਕਿਙ੍ਕਿਣਿਯੋ (ਸ੍ਯਾ.)] ਗਹੇਤ੍ਵਾ [ਗਹੇਤ੍ਵਾਨ (ਸੀ. ਸ੍ਯਾ. ਪੀ.)], ਘੋਸੇਨ੍ਤਿ ਪੁਰਤੋਪਿ ਤੇ;

ਪੇਸਨਾਨਿਪਿ ਗਚ੍ਛਨ੍ਤਿ, ਰਥਚਰਿਯਾਸੁ ਸਿਕ੍ਖਰੇ.

੨੩੧. ਪਰਿਚਾਰਕਸਮਾ ਰਾਜ, ਤੇਪਿ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੩੨. ਅਪੇਤਾ ਤੇ ਚ ਬ੍ਰਹ੍ਮਞ੍ਞਾ,

(ਇਤਿ ਰਾਜਾ ਕੋਰਬ੍ਯੋ)

ਨ ਤੇ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਞ੍ਞੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੩੩. ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੩੪. ਕਮਣ੍ਡਲੁਂ ਗਹੇਤ੍ਵਾਨ, ਵਙ੍ਕਦਣ੍ਡਞ੍ਚ ਬ੍ਰਾਹ੍ਮਣਾ;

ਪਚ੍ਚੁਪੇਸ੍ਸਨ੍ਤਿ ਰਾਜਾਨੋ, ਗਾਮੇਸੁ ਨਿਗਮੇਸੁ ਚ;

ਨਾਦਿਨ੍ਨੇ ਵੁਟ੍ਠਹਿਸ੍ਸਾਮ, ਗਾਮਮ੍ਹਿ ਵਾ ਵਨਮ੍ਹਿ ਵਾ [ਵਾਮਮ੍ਹਿ ਚ ਵਨਮ੍ਹਿ ਚ (ਸੀ. ਪੀ.), ਗਾਮਮ੍ਹਿ ਨਿਗਮਮ੍ਹਿ ਵਾ (ਸ੍ਯਾ.)].

੨੩੫. ਨਿਗ੍ਗਾਹਕਸਮਾ ਰਾਜ, ਤੇਪਿ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੩੬. ਅਪੇਤਾ ਤੇ ਚ ਬ੍ਰਹ੍ਮਞ੍ਞਾ,

(ਇਤਿ ਰਾਜਾ ਕੋਰਬ੍ਯੋ)

ਨ ਤੇ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਞ੍ਞੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੩੭. ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੩੮. ਪਰੂਲ਼੍ਹਕਚ੍ਛਨਖਲੋਮਾ, ਪਙ੍ਕਦਨ੍ਤਾ ਰਜਸ੍ਸਿਰਾ;

ਓਕਿਣ੍ਣਾ ਰਜਰੇਣੂਹਿ, ਯਾਚਕਾ ਵਿਚਰਨ੍ਤਿ ਤੇ.

੨੩੯. ਖਾਣੁਘਾਤਸਮਾ ਰਾਜ, ਤੇਪਿ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੪੦. ਅਪੇਤਾ ਤੇ ਚ ਬ੍ਰਹ੍ਮਞ੍ਞਾ,

(ਇਤਿ ਰਾਜਾ ਕੋਰਬ੍ਯੋ)

ਨ ਤੇ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਞ੍ਞੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੪੧. ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੪੨. ਹਰੀਤਕਂ [ਹਰੀਟਕਂ (ਬਹੂਸੁ)] ਆਮਲਕਂ, ਅਮ੍ਬਂ ਜਮ੍ਬੁਂ ਵਿਭੀਤਕਂ [ਅਮ੍ਬਜਮ੍ਬੁਵਿਭੀਟਕਂ (ਸੀ. ਪੀ.)];

ਲਬੁਜਂ ਦਨ੍ਤਪੋਣਾਨਿ, ਬੇਲੁਵਾ ਬਦਰਾਨਿ ਚ.

੨੪੩. ਰਾਜਾਯਤਨਂ ਉਚ੍ਛੁ-ਪੁਟਂ, ਧੂਮਨੇਤ੍ਤਂ ਮਧੁ-ਅਞ੍ਜਨਂ;

ਉਚ੍ਚਾਵਚਾਨਿ ਪਣਿਯਾਨਿ, ਵਿਪਣੇਨ੍ਤਿ ਜਨਾਧਿਪ.

੨੪੪. ਵਾਣਿਜਕਸਮਾ ਰਾਜ, ਤੇਪਿ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੪੫. ਅਪੇਤਾ ਤੇ ਚ ਬ੍ਰਹ੍ਮਞ੍ਞਾ,

(ਇਤਿ ਰਾਜਾ ਕੋਰਬ੍ਯੋ)

ਨ ਤੇ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਞ੍ਞੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੪੬. ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੪੭. ਕਸਿ-ਵਾਣਿਜ੍ਜਂ [ਕਸਿਂ ਵਣਿਜ੍ਜਂ (ਸੀ. ਪੀ.)] ਕਾਰੇਨ੍ਤਿ, ਪੋਸਯਨ੍ਤਿ ਅਜੇਲ਼ਕੇ;

ਕੁਮਾਰਿਯੋ ਪਵੇਚ੍ਛਨ੍ਤਿ, ਵਿਵਾਹਨ੍ਤਾਵਹਨ੍ਤਿ ਚ.

੨੪੮. ਸਮਾ ਅਮ੍ਬਟ੍ਠਵੇਸ੍ਸੇਹਿ, ਤੇਪਿ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੪੯. ਅਪੇਤਾ ਤੇ ਚ ਬ੍ਰਹ੍ਮਞ੍ਞਾ,

(ਇਤਿ ਰਾਜਾ ਕੋਰਬ੍ਯੋ)

ਨ ਤੇ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਞ੍ਞੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੫੦. ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੫੧. ਨਿਕ੍ਖਿਤ੍ਤਭਿਕ੍ਖਂ ਭੁਞ੍ਜਨ੍ਤਿ, ਗਾਮੇਸ੍ਵੇਕੇ ਪੁਰੋਹਿਤਾ;

ਬਹੂ ਤੇ [ਨੇ (ਸ੍ਯਾ. ਕ.)] ਪਰਿਪੁਚ੍ਛਨ੍ਤਿ, ਅਣ੍ਡਚ੍ਛੇਦਾ ਨਿਲਞ੍ਛਕਾ [ਤਿਲਞ੍ਛਕਾ (ਪੀ.)].

੨੫੨. ਪਸੂਪਿ ਤਤ੍ਥ ਹਞ੍ਞਨ੍ਤਿ, ਮਹਿਂਸਾ ਸੂਕਰਾ ਅਜਾ;

ਗੋਘਾਤਕਸਮਾ ਰਾਜ, ਤੇਪਿ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੫੩. ਅਪੇਤਾ ਤੇ ਬ੍ਰਹ੍ਮਞ੍ਞਾ,

(ਇਤਿ ਰਾਜਾ ਕੋਰਬ੍ਯੋ)

ਨ ਤੇ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਞ੍ਞੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੫੪. ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੫੫. ਅਸਿਚਮ੍ਮਂ ਗਹੇਤ੍ਵਾਨ, ਖਗ੍ਗਂ ਪਗ੍ਗਯ੍ਹ ਬ੍ਰਾਹ੍ਮਣਾ;

ਵੇਸ੍ਸਪਥੇਸੁ ਤਿਟ੍ਠਨ੍ਤਿ, ਸਤ੍ਥਂ ਅਬ੍ਬਾਹਯਨ੍ਤਿਪਿ.

੨੫੬. ਸਮਾ ਗੋਪਨਿਸਾਦੇਹਿ, ਤੇਪਿ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੫੭. ਅਪੇਤਾ ਤੇ ਬ੍ਰਹ੍ਮਞ੍ਞਾ,

(ਇਤਿ ਰਾਜਾ ਕੋਰਬ੍ਯੋ)

ਨ ਤੇ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਞ੍ਞੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੫੮. ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੫੯. ਅਰਞ੍ਞੇ ਕੁਟਿਕਂ ਕਤ੍ਵਾ, ਕੂਟਾਨਿ ਕਾਰਯਨ੍ਤਿ ਤੇ;

ਸਸਬਿਲ਼ਾਰੇ ਬਾਧੇਨ੍ਤਿ, ਆਗੋਧਾ ਮਚ੍ਛਕਚ੍ਛਪਂ.

੨੬੦. ਤੇ ਲੁਦ੍ਦਕਸਮਾ ਰਾਜ [ਲੁਦ੍ਦਕਾ ਤੇ ਮਹਾਰਾਜ (ਸੀ. ਪੀ.)], ਤੇਪਿ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੬੧. ਅਪੇਤਾ ਤੇ ਬ੍ਰਹ੍ਮਞ੍ਞਾ,

(ਇਤਿ ਰਾਜਾ ਕੋਰਬ੍ਯੋ)

ਨ ਤੇ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਞ੍ਞੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੬੨. ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੬੩. ਅਞ੍ਞੇ ਧਨਸ੍ਸ ਕਾਮਾ ਹਿ, ਹੇਟ੍ਠਾਮਞ੍ਚੇ ਪਸਕ੍ਕਿਤਾ [ਪਸਕ੍ਖਿਤਾ (ਸੀ. ਸ੍ਯਾ. ਪੀ.)];

ਰਾਜਾਨੋ ਉਪਰਿ ਨ੍ਹਾਯਨ੍ਤਿ, ਸੋਮਯਾਗੇ ਉਪਟ੍ਠਿਤੇ.

੨੬੪. ਮਲਮਜ੍ਜਕਸਮਾ ਰਾਜ, ਤੇਪਿ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੬੫. ਅਪੇਤਾ ਤੇ ਬ੍ਰਹ੍ਮਞ੍ਞਾ,

(ਇਤਿ ਰਾਜਾ ਕੋਰਬ੍ਯੋ)

ਨ ਤੇ ਵੁਚ੍ਚਨ੍ਤਿ ਬ੍ਰਾਹ੍ਮਣਾ;

ਅਞ੍ਞੇ ਵਿਧੁਰ ਪਰਿਯੇਸ, ਸੀਲਵਨ੍ਤੇ ਬਹੁਸ੍ਸੁਤੇ.

੨੬੬. ਵਿਰਤੇ ਮੇਥੁਨਾ ਧਮ੍ਮਾ, ਯੇ ਮੇ ਭੁਞ੍ਜੇਯ੍ਯੁ ਭੋਜਨਂ;

ਦਕ੍ਖਿਣਂ ਸਮ੍ਮ ਦਸ੍ਸਾਮ, ਯਤ੍ਥ ਦਿਨ੍ਨਂ ਮਹਪ੍ਫਲਂ.

੨੬੭. ਅਤ੍ਥਿ ਖੋ ਬ੍ਰਾਹ੍ਮਣਾ ਦੇਵ, ਸੀਲਵਨ੍ਤੋ ਬਹੁਸ੍ਸੁਤਾ;

ਵਿਰਤਾ ਮੇਥੁਨਾ ਧਮ੍ਮਾ, ਯੇ ਤੇ ਭੁਞ੍ਜੇਯ੍ਯੁ ਭੋਜਨਂ.

੨੬੮. ਏਕਞ੍ਚ ਭਤ੍ਤਂ ਭੁਞ੍ਜਨ੍ਤਿ, ਨ ਚ ਮਜ੍ਜਂ ਪਿਵਨ੍ਤਿ ਤੇ;

ਅਕ੍ਖਾਤਾ ਤੇ ਮਹਾਰਾਜ, ਤਾਦਿਸੇ ਨਿਪਤਾਮਸੇ.

੨੬੯. ਏਤੇ ਖੋ ਬ੍ਰਾਹ੍ਮਣਾ ਵਿਧੁਰ, ਸੀਲਵਨ੍ਤੋ ਬਹੁਸ੍ਸੁਤਾ;

ਏਤੇ ਵਿਧੁਰ ਪਰਿਯੇਸ, ਖਿਪ੍ਪਞ੍ਚ ਨੇ [ਖਿਪ੍ਪਂਵ ਨੇ (ਕ.)] ਨਿਮਨ੍ਤਯਾਤਿ.

ਦਸਬ੍ਰਾਹ੍ਮਣਜਾਤਕਂ ਦ੍ਵਾਦਸਮਂ.