੪੯੪. ਸਾਧਿਨਜਾਤਕਂ (੧੧)

੨੦੨. ਅਬ੍ਭੁਤੋ ਵਤ ਲੋਕਸ੍ਮਿਂ, ਉਪ੍ਪਜ੍ਜਿ ਲੋਮਹਂਸਨੋ;

ਦਿਬ੍ਬੋ ਰਥੋ ਪਾਤੁਰਹੁ, ਵੇਦੇਹਸ੍ਸ ਯਸਸ੍ਸਿਨੋ.

੨੦੩. ਦੇਵਪੁਤ੍ਤੋ ਮਹਿਦ੍ਧਿਕੋ, ਮਾਤਲਿ [ਮਾਤਲੀ (ਸੀ.)] ਦੇਵਸਾਰਥਿ;

ਨਿਮਨ੍ਤਯਿਤ੍ਥ ਰਾਜਾਨਂ, ਵੇਦੇਹਂ ਮਿਥਿਲਗ੍ਗਹਂ.

੨੦੪. ਏਹਿਮਂ ਰਥਮਾਰੁਯ੍ਹ, ਰਾਜਸੇਟ੍ਠ ਦਿਸਮ੍ਪਤਿ;

ਦੇਵਾ ਦਸ੍ਸਨਕਾਮਾ ਤੇ, ਤਾਵਤਿਂਸਾ ਸਇਨ੍ਦਕਾ;

ਸਰਮਾਨਾ ਹਿ ਤੇ ਦੇਵਾ, ਸੁਧਮ੍ਮਾਯਂ ਸਮਚ੍ਛਰੇ.

੨੦੫. ਤਤੋ ਚ ਰਾਜਾ ਸਾਧਿਨੋ [ਸਾਧੀਨੋ (ਸੀ. ਪੀ.)], ਵੇਦੇਹੋ ਮਿਥਿਲਗ੍ਗਹੋ [ਪਮੁਖੋ ਰਥਮਾਰੁਹਿ (ਸੀ. ਪੀ.)];

ਸਹਸ੍ਸਯੁਤ੍ਤਮਾਰੁਯ੍ਹ [ਯੁਤ੍ਤਂ ਅਭਿਰੁਯ੍ਹ (ਸੀ.)], ਅਗਾ ਦੇਵਾਨ ਸਨ੍ਤਿਕੇ;

ਤਂ ਦੇਵਾ ਪਟਿਨਨ੍ਦਿਂਸੁ, ਦਿਸ੍ਵਾ ਰਾਜਾਨਮਾਗਤਂ.

੨੦੬. ਸ੍ਵਾਗਤਂ ਤੇ ਮਹਾਰਾਜ, ਅਥੋ ਤੇ ਅਦੁਰਾਗਤਂ;

ਨਿਸੀਦ ਦਾਨਿ ਰਾਜੀਸਿ [ਰਾਜਿਸਿ (ਸੀ. ਸ੍ਯਾ. ਪੀ.)], ਦੇਵਰਾਜਸ੍ਸ ਸਨ੍ਤਿਕੇ.

੨੦੭. ਸਕ੍ਕੋਪਿ ਪਟਿਨਨ੍ਦਿਤ੍ਥ, ਵੇਦੇਹਂ ਮਿਥਿਲਗ੍ਗਹਂ;

ਨਿਮਨ੍ਤਯਿਤ੍ਥ [ਨਿਮਨ੍ਤਯੀ ਚ (ਸੀ. ਪੀ.)] ਕਾਮੇਹਿ, ਆਸਨੇਨ ਚ ਵਾਸਵੋ.

੨੦੮. ਸਾਧੁ ਖੋਸਿ ਅਨੁਪ੍ਪਤ੍ਤੋ, ਆਵਾਸਂ ਵਸਵਤ੍ਤਿਨਂ;

ਵਸ ਦੇਵੇਸੁ ਰਾਜੀਸਿ, ਸਬ੍ਬਕਾਮਸਮਿਦ੍ਧਿਸੁ;

ਤਾਵਤਿਂਸੇਸੁ ਦੇਵੇਸੁ, ਭੁਞ੍ਜ ਕਾਮੇ ਅਮਾਨੁਸੇ.

੨੦੯. ਅਹਂ ਪੁਰੇ ਸਗ੍ਗਗਤੋ ਰਮਾਮਿ, ਨਚ੍ਚੇਹਿ ਗੀਤੇਹਿ ਚ ਵਾਦਿਤੇਹਿ;

ਸੋ ਦਾਨਿ ਅਜ੍ਜ ਨ ਰਮਾਮਿ ਸਗ੍ਗੇ, ਆਯੁਂ ਨੁ ਖੀਣੋ [ਖੀਣਂ (ਸ੍ਯਾ.)] ਮਰਣਂ ਨੁ ਸਨ੍ਤਿਕੇ;

ਉਦਾਹੁ ਮੂਲ਼੍ਹੋਸ੍ਮਿ ਜਨਿਨ੍ਦਸੇਟ੍ਠ.

੨੧੦. ਨ ਤਾਯੁ [ਨ ਚਾਯੁ (ਸੀ. ਪੀ. ਕ.)] ਖੀਣਂ ਮਰਣਞ੍ਚ [ਮਰਣਂ ਤੇ (ਸੀ. ਪੀ.)] ਦੂਰੇ, ਨ ਚਾਪਿ ਮੂਲ਼੍ਹੋ ਨਰਵੀਰਸੇਟ੍ਠ;

ਤੁਯ੍ਹਞ੍ਚ [ਤਵਞ੍ਚ (ਸੀ. ਪੀ.), ਤਵ ਚ (ਕ.)] ਪੁਞ੍ਞਾਨਿ ਪਰਿਤ੍ਤਕਾਨਿ, ਯੇਸਂ ਵਿਪਾਕਂ ਇਧ ਵੇਦਯਿਤ੍ਥੋ [ਵੇਦਯਤੋ (ਪੀ. ਕ.)].

੨੧੧. ਵਸ ਦੇਵਾਨੁਭਾਵੇਨ, ਰਾਜਸੇਟ੍ਠ ਦਿਸਮ੍ਪਤਿ;

ਤਾਵਤਿਂਸੇਸੁ ਦੇਵੇਸੁ, ਭੁਞ੍ਜ ਕਾਮੇ ਅਮਾਨੁਸੇ.

੨੧੨. ਯਥਾ ਯਾਚਿਤਕਂ ਯਾਨਂ, ਯਥਾ ਯਾਚਿਤਕਂ ਧਨਂ;

ਏਵਂ ਸਮ੍ਪਦਮੇਵੇਤਂ, ਯਂ ਪਰਤੋ ਦਾਨਪਚ੍ਚਯਾ.

੨੧੩. ਨ ਚਾਹਮੇਤਮਿਚ੍ਛਾਮਿ, ਯਂ ਪਰਤੋ ਦਾਨਪਚ੍ਚਯਾ;

ਸਯਂਕਤਾਨਿ ਪੁਞ੍ਞਾਨਿ, ਤਂ ਮੇ ਆਵੇਣਿਕਂ [ਆਵੇਣਿਯਂ (ਸੀ. ਸ੍ਯਾ. ਪੀ.), ਆਵੇਨਿਕਂ (ਕ.)] ਧਨਂ.

੨੧੪. ਸੋਹਂ ਗਨ੍ਤ੍ਵਾ ਮਨੁਸ੍ਸੇਸੁ, ਕਾਹਾਮਿ ਕੁਸਲਂ ਬਹੁਂ;

ਦਾਨੇਨ ਸਮਚਰਿਯਾਯ, ਸਂਯਮੇਨ ਦਮੇਨ ਚ;

ਯਂ ਕਤ੍ਵਾ ਸੁਖਿਤੋ ਹੋਤਿ, ਨ ਚ ਪਚ੍ਛਾਨੁਤਪ੍ਪਤਿ.

੨੧੫. ਇਮਾਨਿ ਤਾਨਿ ਖੇਤ੍ਤਾਨਿ, ਇਮਂ ਨਿਕ੍ਖਂ ਸੁਕੁਣ੍ਡਲਂ;

ਇਮਾ ਤਾ ਹਰਿਤਾਨੂਪਾ, ਇਮਾ ਨਜ੍ਜੋ ਸਵਨ੍ਤਿਯੋ.

੨੧੬. ਇਮਾ ਤਾ ਪੋਕ੍ਖਰਣੀ ਰਮ੍ਮਾ, ਚਕ੍ਕਵਾਕਪਕੂਜਿਤਾ [ਚਕ੍ਕਵਾਕੂਪਕੂਜਿਤਾ (ਸੀ. ਪੀ.)];

ਮਨ੍ਦਾਲਕੇਹਿ ਸਞ੍ਛਨ੍ਨਾ, ਪਦੁਮੁਪ੍ਪਲਕੇਹਿ ਚ;

ਯਸ੍ਸਿਮਾਨਿ ਮਮਾਯਿਂਸੁ, ਕਿਂ ਨੁ ਤੇ ਦਿਸਤਂ ਗਤਾ.

੨੧੭. ਤਾਨੀਧ ਖੇਤ੍ਤਾਨਿ ਸੋ ਭੂਮਿਭਾਗੋ, ਤੇਯੇਵ ਆਰਾਮਵਨੁਪਚਾਰਾ [ਤੇ ਆਰਾਮਾ ਤੇ ਵਨ’ਮੇ ਪਚਾਰਾ (ਸੀ. ਪੀ.), ਤੇ ਯੇਵ ਆਰਾਮਵਨਾਨਿ ਸਞ੍ਚਰਾ (ਕ.)];

ਤਮੇਵ ਮਯ੍ਹਂ ਜਨਤਂ ਅਪਸ੍ਸਤੋ, ਸੁਞ੍ਞਂਵ ਮੇ ਨਾਰਦ ਖਾਯਤੇ ਦਿਸਾ.

੨੧੮. ਦਿਟ੍ਠਾ ਮਯਾ ਵਿਮਾਨਾਨਿ, ਓਭਾਸੇਨ੍ਤਾ ਚਤੁਦ੍ਦਿਸਾ;

ਸਮ੍ਮੁਖਾ ਦੇਵਰਾਜਸ੍ਸ, ਤਿਦਸਾਨਞ੍ਚ ਸਮ੍ਮੁਖਾ.

੨੧੯. ਵੁਤ੍ਥਂ ਮੇ ਭਵਨਂ ਦਿਬ੍ਯਂ [ਦਿਬ੍ਬਂ (ਸੀ. ਪੀ.)], ਭੁਤ੍ਤਾ ਕਾਮਾ ਅਮਾਨੁਸਾ;

ਤਾਵਤਿਂਸੇਸੁ ਦੇਵੇਸੁ, ਸਬ੍ਬਕਾਮਸਮਿਦ੍ਧਿਸੁ.

੨੨੦. ਸੋਹਂ ਏਤਾਦਿਸਂ ਹਿਤ੍ਵਾ, ਪੁਞ੍ਞਾਯਮ੍ਹਿ ਇਧਾਗਤੋ;

ਧਮ੍ਮਮੇਵ ਚਰਿਸ੍ਸਾਮਿ, ਨਾਹਂ ਰਜ੍ਜੇਨ ਅਤ੍ਥਿਕੋ.

੨੨੧. ਅਦਣ੍ਡਾਵਚਰਂ ਮਗ੍ਗਂ, ਸਮ੍ਮਾਸਮ੍ਬੁਦ੍ਧਦੇਸਿਤਂ;

ਤਂ ਮਗ੍ਗਂ ਪਟਿਪਜ੍ਜਿਸ੍ਸਂ, ਯੇਨ ਗਚ੍ਛਨ੍ਤਿ ਸੁਬ੍ਬਤਾਤਿ.

ਸਾਧਿਨਜਾਤਕਂ [ਸਾਧਿਨਰਾਜਜਾਤਕਂ (ਸ੍ਯਾ.)] ਏਕਾਦਸਮਂ.