੪੯੩. ਮਹਾਵਾਣਿਜਜਾਤਕਂ (੧੦)
੧੮੦. ਵਾਣਿਜਾ ਸਮਿਤਿਂ ਕਤ੍ਵਾ, ਨਾਨਾਰਟ੍ਠਤੋ ਆਗਤਾ;
ਧਨਾਹਰਾ ਪਕ੍ਕਮਿਂਸੁ, ਏਕਂ ਕਤ੍ਵਾਨ ਗਾਮਣਿਂ.
੧੮੧. ਤੇ ਤਂ ਕਨ੍ਤਾਰਮਾਗਮ੍ਮ, ਅਪ੍ਪਭਕ੍ਖਂ ਅਨੋਦਕਂ;
ਮਹਾਨਿਗ੍ਰੋਧਮਦ੍ਦਕ੍ਖੁਂ, ਸੀਤਚ੍ਛਾਯਂ ਮਨੋਰਮਂ.
੧੮੨. ਤੇ ਚ ਤਤ੍ਥ ਨਿਸੀਦਿਤ੍ਵਾ, ਤਸ੍ਸ ਰੁਕ੍ਖਸ੍ਸ ਛਾਯਯਾ [ਛਾਦਿਯਾ (ਸੀ. ਸ੍ਯਾ. ਪੀ.)];
ਵਾਣਿਜਾ ਸਮਚਿਨ੍ਤੇਸੁਂ, ਬਾਲਾ ਮੋਹੇਨ ਪਾਰੁਤਾ.
੧੮੩. ਅਲ੍ਲਾਯਤੇ [ਅਦ੍ਦਾਯਤੇ (ਸੀ. ਪੀ.)] ਅਯਂ ਰੁਕ੍ਖੋ, ਅਪਿ ਵਾਰੀਵ [ਵਾਰਿ ਚ (ਸੀ. ਪੀ.)] ਸਨ੍ਦਤਿ;
ਇਙ੍ਘਸ੍ਸ ਪੁਰਿਮਂ ਸਾਖਂ, ਮਯਂ ਛਿਨ੍ਦਾਮ ਵਾਣਿਜਾ.
੧੮੪. ਸਾ ਚ ਛਿਨ੍ਨਾਵ ਪਗ੍ਘਰਿ, ਅਚ੍ਛਂ ਵਾਰਿਂ ਅਨਾਵਿਲਂ;
ਤੇ ਤਤ੍ਥ ਨ੍ਹਤ੍ਵਾ ਪਿਵਿਤ੍ਵਾ, ਯਾਵਤਿਚ੍ਛਿਂਸੁ ਵਾਣਿਜਾ.
੧੮੫. ਦੁਤਿਯਂ ਸਮਚਿਨ੍ਤੇਸੁਂ, ਬਾਲਾ ਮੋਹੇਨ ਪਾਰੁਤਾ;
ਇਙ੍ਘਸ੍ਸ ਦਕ੍ਖਿਣਂ ਸਾਖਂ, ਮਯਂ ਛਿਨ੍ਦਾਮ ਵਾਣਿਜਾ.
੧੮੬. ਸਾ ਚ ਛਿਨ੍ਨਾਵ ਪਗ੍ਘਰਿ, ਸਾਲਿਮਂਸੋਦਨਂ ਬਹੁਂ;
ਅਪ੍ਪੋਦਵਣ੍ਣੇ ਕੁਮ੍ਮਾਸੇ, ਸਿਙ੍ਗਿਂ ਵਿਦਲਸੂਪਿਯੋ [ਸਿਙ੍ਗਿਂ ਬਿਦਲਸੂਪਿਯੋ (ਸੀ. ਪੀ.), ਸਿਙ੍ਗੀਵੇਰਂ ਲਸੂਪਿਯੋ (ਕ.) ਸਿਙ੍ਗੀਨ੍ਤਿ ਸਿਙ੍ਗੀਵੇਰਾਦਿਕਂ ਉਤ੍ਤਰਿਭਙ੍ਗਂ; ਵਿਦਲਸੂਪਿਯੋਤਿ ਮੁਗ੍ਗਸੂਪਾਦਯੋ (ਅਟ੍ਠ.) ਵਿਦਲਂ ਕਲਾਯਾਦਿਮ੍ਹਿ ਵਤ੍ਤਤੀਤਿ ਸਕ੍ਕਤਾਭਿਧਾਨੇ].
੧੮੭. ਤੇ ਤਤ੍ਥ ਭੁਤ੍ਵਾ ਖਾਦਿਤ੍ਵਾ [ਭੁਤ੍ਵਾ ਚ ਪਿਵਿਤ੍ਵਾ ਚ (ਪੀ.)], ਯਾਵਤਿਚ੍ਛਿਂਸੁ ਵਾਣਿਜਾ;
ਤਤਿਯਂ ਸਮਚਿਨ੍ਤੇਸੁਂ, ਬਾਲਾ ਮੋਹੇਨ ਪਾਰੁਤਾ;
ਇਙ੍ਘਸ੍ਸ ਪਚ੍ਛਿਮਂ ਸਾਖਂ, ਮਯਂ ਛਿਨ੍ਦਾਮ ਵਾਣਿਜਾ.
੧੮੮. ਸਾ ਚ ਛਿਨ੍ਨਾਵ ਪਗ੍ਘਰਿ, ਨਾਰਿਯੋ ਸਮਲਙ੍ਕਤਾ;
ਵਿਚਿਤ੍ਰਵਤ੍ਥਾਭਰਣਾ, ਆਮੁਤ੍ਤਮਣਿਕੁਣ੍ਡਲਾ.
੧੮੯. ਅਪਿ ਸੁ ਵਾਣਿਜਾ ਏਕਾ, ਨਾਰਿਯੋ ਪਣ੍ਣਵੀਸਤਿ;
ਸਮਨ੍ਤਾ ਪਰਿਵਾਰਿਂਸੁ [ਪਰਿਕਰਿਂਸੁ (ਸੀ. ਸ੍ਯਾ. ਪੀ.)], ਤਸ੍ਸ ਰੁਕ੍ਖਸ੍ਸ ਛਾਯਯਾ [ਛਾਦਿਯਾ (ਸੀ. ਸ੍ਯਾ. ਪੀ.)].
੧੯੦. ਤੇ ਤਾਹਿ ਪਰਿਚਾਰੇਤ੍ਵਾ [ਪਰਿਵਾਰੇਤ੍ਵਾ (ਸੀ. ਸ੍ਯਾ. ਪੀ.)], ਯਾਵਤਿਚ੍ਛਿਂਸੁ ਵਾਣਿਜਾ;
ਚਤੁਤ੍ਥਂ ਸਮਚਿਨ੍ਤੇਸੁਂ, ਬਾਲਾ ਮੋਹੇਨ ਪਾਰੁਤਾ;
ਇਙ੍ਘਸ੍ਸ ਉਤ੍ਤਰਂ ਸਾਖਂ, ਮਯਂ ਛਿਨ੍ਦਾਮ ਵਾਣਿਜਾ.
੧੯੧. ਸਾ ਚ ਛਿਨ੍ਨਾਵ ਪਗ੍ਘਰਿ, ਮੁਤ੍ਤਾ ਵੇਲ਼ੁਰਿਯਾ ਬਹੂ;
ਰਜਤਂ ਜਾਤਰੂਪਞ੍ਚ, ਕੁਤ੍ਤਿਯੋ ਪਟਿਯਾਨਿ ਚ.
੧੯੨. ਕਾਸਿਕਾਨਿ ਚ ਵਤ੍ਥਾਨਿ, ਉਦ੍ਦਿਯਾਨਿ ਚ ਕਮ੍ਬਲਾ [ਉਦ੍ਦਿਯਾਨੇ ਚ ਕਮ੍ਬਲੇ (ਸੀ. ਪੀ.)];
ਤੇ ਤਤ੍ਥ ਭਾਰੇ ਬਨ੍ਧਿਤ੍ਵਾ, ਯਾਵਤਿਚ੍ਛਿਂਸੁ ਵਾਣਿਜਾ.
੧੯੩. ਪਞ੍ਚਮਂ ਸਮਚਿਨ੍ਤੇਸੁਂ, ਬਾਲਾ ਮੋਹੇਨ ਪਾਰੁਤਾ;
ਇਙ੍ਘਸ੍ਸ ਮੂਲੇ [ਮੂਲਂ (ਸੀ. ਪੀ. ਕ.)] ਛਿਨ੍ਦਾਮ, ਅਪਿ ਭਿਯ੍ਯੋ ਲਭਾਮਸੇ.
੧੯੪. ਅਥੁਟ੍ਠਹਿ ਸਤ੍ਥਵਾਹੋ, ਯਾਚਮਾਨੋ ਕਤਞ੍ਜਲੀ;
ਨਿਗ੍ਰੋਧੋ ਕਿਂ ਪਰਜ੍ਝਤਿ [ਅਪਰਜ੍ਝਥ (ਸੀ.), ਅਪਰਜ੍ਝਤਿ (ਸ੍ਯਾ. ਪੀ.)], ਵਾਣਿਜਾ ਭਦ੍ਦਮਤ੍ਥੁ ਤੇ.
੧੯੫. ਵਾਰਿਦਾ ਪੁਰਿਮਾ ਸਾਖਾ, ਅਨ੍ਨਪਾਨਞ੍ਚ ਦਕ੍ਖਿਣਾ;
ਨਾਰਿਦਾ ਪਚ੍ਛਿਮਾ ਸਾਖਾ, ਸਬ੍ਬਕਾਮੇ ਚ ਉਤ੍ਤਰਾ;
ਨਿਗ੍ਰੋਧੋ ਕਿਂ ਪਰਜ੍ਝਤਿ, ਵਾਣਿਜਾ ਭਦ੍ਦਮਤ੍ਥੁ ਤੇ.
੧੯੬. ਯਸ੍ਸ ਰੁਕ੍ਖਸ੍ਸ ਛਾਯਾਯ, ਨਿਸੀਦੇਯ੍ਯ ਸਯੇਯ੍ਯ ਵਾ;
ਨ ਤਸ੍ਸ ਸਾਖਂ ਭਞ੍ਜੇਯ੍ਯ, ਮਿਤ੍ਤਦੁਬ੍ਭੋ ਹਿ ਪਾਪਕੋ.
੧੯੭. ਤੇ ਚ ਤਸ੍ਸਾਨਾਦਿਯਿਤ੍ਵਾ [ਤਸ੍ਸ ਅਨਾਦਿਤ੍ਵਾ (ਸੀ. ਸ੍ਯਾ.)], ਏਕਸ੍ਸ ਵਚਨਂ ਬਹੂ;
ਨਿਸਿਤਾਹਿ ਕੁਠਾਰੀਹਿ [ਕੁਧਾਰੀਹਿ (ਕ.)], ਮੂਲਤੋ ਨਂ ਉਪਕ੍ਕਮੁਂ.
੧੯੮. ਤਤੋ ਨਾਗਾ ਨਿਕ੍ਖਮਿਂਸੁ, ਸਨ੍ਨਦ੍ਧਾ ਪਣ੍ਣਵੀਸਤਿ;
ਧਨੁਗ੍ਗਹਾਨਂ ਤਿਸਤਾ, ਛਸਹਸ੍ਸਾ ਚ ਵਮ੍ਮਿਨੋ.
੧੯੯. ਏਤੇ ਹਨਥ ਬਨ੍ਧਥ, ਮਾ ਵੋ ਮੁਞ੍ਚਿਤ੍ਥ [ਮੁਚ੍ਚਿਤ੍ਥ (ਪੀ.)] ਜੀਵਿਤਂ;
ਠਪੇਤ੍ਵਾ ਸਤ੍ਥਵਾਹਂਵ, ਸਬ੍ਬੇ ਭਸ੍ਮਂ [ਭਸ੍ਮੀ (ਸੀ.)] ਕਰੋਥ ਨੇ.
੨੦੦. ਤਸ੍ਮਾ ਹਿ ਪਣ੍ਡਿਤੋ ਪੋਸੋ, ਸਮ੍ਪਸ੍ਸਂ ਅਤ੍ਥਮਤ੍ਤਨੋ;
ਲੋਭਸ੍ਸ ਨ ਵਸਂ ਗਚ੍ਛੇ, ਹਨੇਯ੍ਯਾਰਿਸਕਂ [ਹਨੇਯ੍ਯ ਦਿਸਤਂ (ਸੀ.), ਹਨੇਯ੍ਯ ਦਿਸਕਂ (ਸ੍ਯਾ.)] ਮਨਂ.
੨੦੧. ਏਵ [ਏਤ (ਸੀ. ਪੀ.)] ਮਾਦੀਨਵਂ ਞਤ੍ਵਾ, ਤਣ੍ਹਾ ਦੁਕ੍ਖਸ੍ਸ ਸਮ੍ਭਵਂ;
ਵੀਤਤਣ੍ਹੋ ਅਨਾਦਾਨੋ, ਸਤੋ ਭਿਕ੍ਖੁ ਪਰਿਬ੍ਬਜੇਤਿ.
ਮਹਾਵਾਣਿਜਜਾਤਕਂ ਦਸਮਂ.