੪੯੦. ਪਞ੍ਚੁਪੋਸਥਿਕਜਾਤਕਂ (੭)
੧੨੭. ਅਪ੍ਪੋਸ੍ਸੁਕ੍ਕੋ ਦਾਨਿ ਤੁਵਂ ਕਪੋਤ, ਵਿਹਙ੍ਗਮ ਨ ਤਵ ਭੋਜਨਤ੍ਥੋ;
ਖੁਦਂ [ਖੁਦ੍ਦਂ (ਸ੍ਯਾ. ਕ.), ਖੁਧਂ (ਸਕ੍ਕਤ-ਪਾਕਤਾਨੁਰੂਪਂ)] ਪਿਪਾਸਂ ਅਧਿਵਾਸਯਨ੍ਤੋ, ਕਸ੍ਮਾ ਭਵਂਪੋਸਥਿਕੋ ਕਪੋਤ [ਕਪੋਤੋ (ਸੀ. ਪੀ.)].
੧੨੮. ਅਹਂ ਪੁਰੇ ਗਿਦ੍ਧਿਗਤੋ ਕਪੋਤਿਯਾ, ਅਸ੍ਮਿਂ ਪਦੇਸਸ੍ਮਿਮੁਭੋ ਰਮਾਮ;
ਅਥਗ੍ਗਹੀ ਸਾਕੁਣਿਕੋ ਕਪੋਤਿਂ, ਅਕਾਮਕੋ ਤਾਯ ਵਿਨਾ ਅਹੋਸਿਂ.
੧੨੯. ਨਾਨਾਭਵਾ ਵਿਪ੍ਪਯੋਗੇਨ ਤਸ੍ਸਾ, ਮਨੋਮਯਂ ਵੇਦਨ ਵੇਦਯਾਮਿ [ਵੇਦਨਂ ਵੇਦਿਯਾਮਿ (ਸੀ. ਪੀ.)];
ਤਸ੍ਮਾ ਅਹਂਪੋਸਥਂ ਪਾਲਯਾਮਿ, ਰਾਗੋ ਮਮਂ ਮਾ ਪੁਨਰਾਗਮਾਸਿ.
੧੩੦. ਅਨੁਜ੍ਜੁਗਾਮੀ ਉਰਗਾ ਦੁਜਿਵ੍ਹ [ਉਰਗ ਦ੍ਵਿਜਿਵ੍ਹ (ਸੀ.)], ਦਾਠਾਵੁਧੋ ਘੋਰਵਿਸੋਸਿ ਸਪ੍ਪ;
ਖੁਦਂ ਪਿਪਾਸਂ ਅਧਿਵਾਸਯਨ੍ਤੋ, ਕਸ੍ਮਾ ਭਵਂਪੋਸਥਿਕੋ ਨੁ ਦੀਘ [ਦੀਘੋ (ਸੀ. ਪੀ.)].
੧੩੧. ਉਸਭੋ ਅਹੂ ਬਲਵਾ ਗਾਮਿਕਸ੍ਸ, ਚਲਕ੍ਕਕੂ ਵਣ੍ਣਬਲੂਪਪਨ੍ਨੋ;
ਸੋ ਮਂ ਅਕ੍ਕਮਿ ਤਂ ਕੁਪਿਤੋ ਅਡਂਸਿ, ਦੁਕ੍ਖਾਭਿਤੁਣ੍ਣੋ ਮਰਣਂ ਉਪਾਗਾ [ਉਪਾਗਮਿ (ਸੀ. ਪੀ.)].
੧੩੨. ਤਤੋ ਜਨਾ ਨਿਕ੍ਖਮਿਤ੍ਵਾਨ ਗਾਮਾ, ਕਨ੍ਦਿਤ੍ਵਾ ਰੋਦਿਤ੍ਵਾ [ਕਨ੍ਦਿਤ੍ਵ ਰੋਦਿਤ੍ਵ (ਸੀ.)] ਅਪਕ੍ਕਮਿਂਸੁ;
ਤਸ੍ਮਾ ਅਹਂਪੋਸਥਂ ਪਾਲਯਾਮਿ, ਕੋਧੋ ਮਮਂ ਮਾ ਪੁਨਰਾਗਮਾਸਿ.
੧੩੩. ਮਤਾਨ ਮਂਸਾਨਿ ਬਹੂ ਸੁਸਾਨੇ, ਮਨੁਞ੍ਞਰੂਪਂ ਤਵ ਭੋਜਨੇ ਤਂ;
ਖੁਦਂ ਪਿਪਾਸਂ ਅਧਿਵਾਸਯਨ੍ਤੋ, ਕਸ੍ਮਾ ਭਵਂਪੋਸਥਿਕੋ ਸਿਙ੍ਗਾਲ [ਸਿਗਾਲੋ (ਸੀ. ਪੀ.)].
੧੩੪. ਪਵਿਸਿ [ਪਵਿਸ੍ਸਂ (ਸੀ. ਪੀ.), ਪਵਿਸ੍ਸ (ਸ੍ਯਾ.)] ਕੁਚ੍ਛਿਂ ਮਹਤੋ ਗਜਸ੍ਸ, ਕੁਣਪੇ ਰਤੋ ਹਤ੍ਥਿਮਂਸੇਸੁ ਗਿਦ੍ਧੋ [ਹਤ੍ਥਿਮਂਸੇ ਪਗਿਦ੍ਧੋ (ਸੀ. ਪੀ.)];
ਉਣ੍ਹੋ ਚ ਵਾਤੋ ਤਿਖਿਣਾ ਚ ਰਸ੍ਮਿਯੋ, ਤੇ ਸੋਸਯੁਂ ਤਸ੍ਸ ਕਰੀਸਮਗ੍ਗਂ.
੧੩੫. ਕਿਸੋ ਚ ਪਣ੍ਡੂ ਚ ਅਹਂ ਭਦਨ੍ਤੇ, ਨ ਮੇ ਅਹੂ ਨਿਕ੍ਖਮਨਾਯ ਮਗ੍ਗੋ;
ਮਹਾ ਚ ਮੇਘੋ ਸਹਸਾ ਪਵਸ੍ਸਿ, ਸੋ ਤੇਮਯੀ ਤਸ੍ਸ ਕਰੀਸਮਗ੍ਗਂ.
੧੩੬. ਤਤੋ ਅਹਂ ਨਿਕ੍ਖਮਿਸਂ ਭਦਨ੍ਤੇ, ਚਨ੍ਦੋ ਯਥਾ ਰਾਹੁਮੁਖਾ ਪਮੁਤ੍ਤੋ;
ਤਸ੍ਮਾ ਅਹਂਪੋਸਥਂ ਪਾਲਯਾਮਿ, ਲੋਭੋ ਮਮਂ ਮਾ ਪੁਨਰਾਗਮਾਸਿ.
੧੩੭. ਵਮ੍ਮੀਕਥੂਪਸ੍ਮਿਂ ਕਿਪਿਲ੍ਲਿਕਾਨਿ, ਨਿਪ੍ਪੋਥਯਨ੍ਤੋ ਤੁਵਂ ਪੁਰੇ ਚਰਾਸਿ;
ਖੁਦਂ ਪਿਪਾਸਂ ਅਧਿਵਾਸਯਨ੍ਤੋ, ਕਸ੍ਮਾ ਭਵਂਪੋਸਥਿਕੋ ਨੁ ਅਚ੍ਛ [ਅਚ੍ਛੋ (ਸੀ. ਪੀ.)].
੧੩੮. ਸਕਂ ਨਿਕੇਤਂ ਅਤਿਹੀਲ਼ਯਾਨੋ [ਅਤਿਹੇਲ਼ਯਾਨੋ (ਸ੍ਯਾ. ਕ.)], ਅਤ੍ਰਿਚ੍ਛਤਾ [ਅਤ੍ਰਿਚ੍ਛਤਾਯ (ਸੀ. ਸ੍ਯਾ. ਪੀ.)] ਮਲ੍ਲਗਾਮਂ [ਮਲਤਂ (ਸੀ. ਪੀ.), ਮਲ੍ਲਯਤਂ (ਕ.)] ਅਗਚ੍ਛਿਂ;
ਤਤੋ ਜਨਾ ਨਿਕ੍ਖਮਿਤ੍ਵਾਨ ਗਾਮਾ, ਕੋਦਣ੍ਡਕੇਨ ਪਰਿਪੋਥਯਿਂਸੁ ਮਂ.
੧੩੯. ਸੋ ਭਿਨ੍ਨਸੀਸੋ ਰੁਹਿਰਮਕ੍ਖਿਤਙ੍ਗੋ, ਪਚ੍ਚਾਗਮਾਸਿਂ ਸਕਂ [ਸ ਸਕਂ (ਸ੍ਯਾ. ਕ.),’ਥ ਸਕਂ (?)] ਨਿਕੇਤਂ;
ਤਸ੍ਮਾ ਅਹਂਪੋਸਥਂ ਪਾਲਯਾਮਿ, ਅਤ੍ਰਿਚ੍ਛਤਾ ਮਾ ਪੁਨਰਾਗਮਾਸਿ.
੧੪੦. ਯਂ ਨੋ ਅਪੁਚ੍ਛਿਤ੍ਥ ਤੁਵਂ ਭਦਨ੍ਤੇ, ਸਬ੍ਬੇਵ ਬ੍ਯਾਕਰਿਮ੍ਹ ਯਥਾ ਪਜਾਨਂ;
ਮਯਮ੍ਪਿ ਪੁਚ੍ਛਾਮ ਤੁਵਂ ਭਦਨ੍ਤੇ, ਕਸ੍ਮਾ ਭਵਂਪੋਸਥਿਕੋ ਨੁ ਬ੍ਰਹ੍ਮੇ.
੧੪੧. ਅਨੂਪਲਿਤ੍ਤੋ ਮਮ ਅਸ੍ਸਮਮ੍ਹਿ, ਪਚ੍ਚੇਕਬੁਦ੍ਧੋ ਮੁਹੁਤ੍ਤਂ ਨਿਸੀਦਿ;
ਸੋ ਮਂ ਅਵੇਦੀ ਗਤਿਮਾਗਤਿਞ੍ਚ, ਨਾਮਞ੍ਚ ਗੋਤ੍ਤਂ ਚਰਣਞ੍ਚ ਸਬ੍ਬਂ.
੧੪੨. ਏਵਮ੍ਪਹਂ ਵਨ੍ਦਿ ਨ [ਏਵਮ੍ਪਹਂ ਨਗ੍ਗਹੇ (ਸੀ. ਪੀ.)] ਤਸ੍ਸ ਪਾਦੇ, ਨ ਚਾਪਿ ਨਂ ਮਾਨਗਤੇਨ ਪੁਚ੍ਛਿਂ;
ਤਸ੍ਮਾ ਅਹਂਪੋਸਥਂ ਪਾਲਯਾਮਿ, ਮਾਨੋ ਮਮਂ ਮਾ ਪੁਨਰਾਗਮਾਸੀਤਿ.
ਪਞ੍ਚੁਪੋਸਥਿਕਜਾਤਕਂ ਸਤ੍ਤਮਂ.