੪੯੧. ਮਹਾਮੋਰਜਾਤਕਂ (੮)

੧੪੩. ਸਚੇ ਹਿ ਤ੍ਯਾਹਂ ਧਨਹੇਤੁ ਗਾਹਿਤੋ, ਮਾ ਮਂ ਵਧੀ ਜੀਵਗਾਹਂ ਗਹੇਤ੍ਵਾ;

ਰਞ੍ਞੋ ਚ [ਰਞ੍ਞੋਵ (ਸੀ. ਪੀ.)] ਮਂ ਸਮ੍ਮ ਉਪਨ੍ਤਿਕਂ [ਉਪਨ੍ਤਿ (ਸੀ. ਸ੍ਯਾ. ਪੀ.)] ਨੇਹਿ, ਮਞ੍ਞੇ ਧਨਂ ਲਚ੍ਛਸਿਨਪ੍ਪਰੂਪਂ.

੧੪੪. ਨ ਮੇ ਅਯਂ ਤੁਯ੍ਹ ਵਧਾਯ ਅਜ੍ਜ, ਸਮਾਹਿਤੋ ਚਾਪਧੁਰੇ [ਚਾਪਵਰੇ (ਸੀ. ਪੀ.), ਚਾਪਵਰੋ (ਸ੍ਯਾ.)] ਖੁਰਪ੍ਪੋ;

ਪਾਸਞ੍ਚ ਤ੍ਯਾਹਂ ਅਧਿਪਾਤਯਿਸ੍ਸਂ, ਯਥਾਸੁਖਂ ਗਚ੍ਛਤੁ ਮੋਰਰਾਜਾ.

੧੪੫. ਯਂ ਸਤ੍ਤ ਵਸ੍ਸਾਨਿ ਮਮਾਨੁਬਨ੍ਧਿ, ਰਤ੍ਤਿਨ੍ਦਿਵਂ ਖੁਪ੍ਪਿਪਾਸਂ ਸਹਨ੍ਤੋ;

ਅਥ ਕਿਸ੍ਸ ਮਂ ਪਾਸਵਸੂਪਨੀਤਂ, ਪਮੁਤ੍ਤਵੇ ਇਚ੍ਛਸਿ ਬਨ੍ਧਨਸ੍ਮਾ.

੧੪੬. ਪਾਣਾਤਿਪਾਤਾ ਵਿਰਤੋ ਨੁਸਜ੍ਜ, ਅਭਯਂ ਨੁ ਤੇ ਸਬ੍ਬਭੂਤੇਸੁ ਦਿਨ੍ਨਂ;

ਯਂ ਮਂ ਤੁਵਂ ਪਾਸਵਸੂਪਨੀਤਂ, ਪਮੁਤ੍ਤਵੇ ਇਚ੍ਛਸਿ ਬਨ੍ਧਨਸ੍ਮਾ.

੧੪੭. ਪਾਣਾਤਿਪਾਤਾ ਵਿਰਤਸ੍ਸ ਬ੍ਰੂਹਿ, ਅਭਯਞ੍ਚ ਯੋ ਸਬ੍ਬਭੂਤੇਸੁ ਦੇਤਿ;

ਪੁਚ੍ਛਾਮਿ ਤਂ ਮੋਰਰਾਜੇਤਮਤ੍ਥਂ, ਇਤੋ ਚੁਤੋ ਕਿਂ ਲਭਤੇ ਸੁਖਂ ਸੋ.

੧੪੮. ਪਾਣਾਤਿਪਾਤਾ ਵਿਰਤਸ੍ਸ ਬ੍ਰੂਮਿ, ਅਭਯਞ੍ਚ ਯੋ ਸਬ੍ਬਭੂਤੇਸੁ ਦੇਤਿ;

ਦਿਟ੍ਠੇਵ ਧਮ੍ਮੇ ਲਭਤੇ ਪਸਂਸਂ, ਸਗ੍ਗਞ੍ਚ ਸੋ ਯਾਤਿ ਸਰੀਰਭੇਦਾ.

੧੪੯. ਨ ਸਨ੍ਤਿ ਦੇਵਾ ਇਤਿ ਆਹੁ [ਇਚ੍ਚਾਹੁ (ਸੀ. ਪੀ.)] ਏਕੇ, ਇਧੇਵ ਜੀਵੋ ਵਿਭਵਂ ਉਪੇਤਿ;

ਤਥਾ ਫਲਂ ਸੁਕਤਦੁਕ੍ਕਟਾਨਂ, ਦਤ੍ਤੁਪਞ੍ਞਤ੍ਤਞ੍ਚ ਵਦਨ੍ਤਿ ਦਾਨਂ;

ਤੇਸਂ ਵਚੋ ਅਰਹਤਂ ਸਦ੍ਦਹਾਨੋ, ਤਸ੍ਮਾ ਅਹਂ ਸਕੁਣੇ ਬਾਧਯਾਮਿ.

੧੫੦. ਚਨ੍ਦੋ ਚ ਸੁਰਿਯੋ ਚ ਉਭੋ ਸੁਦਸ੍ਸਨਾ, ਗਚ੍ਛਨ੍ਤਿ ਓਭਾਸਯਮਨ੍ਤਲਿਕ੍ਖੇ;

ਇਮਸ੍ਸ ਲੋਕਸ੍ਸ ਪਰਸ੍ਸ ਵਾ ਤੇ, ਕਥਂ ਨੁ ਤੇ ਆਹੁ ਮਨੁਸ੍ਸਲੋਕੇ.

੧੫੧. ਚਨ੍ਦੋ ਚ ਸੁਰਿਯੋ ਚ ਉਭੋ ਸੁਦਸ੍ਸਨਾ, ਗਚ੍ਛਨ੍ਤਿ ਓਭਾਸਯਮਨ੍ਤਲਿਕ੍ਖੇ;

ਪਰਸ੍ਸ ਲੋਕਸ੍ਸ ਨ ਤੇ ਇਮਸ੍ਸ, ਦੇਵਾਤਿ ਤੇ ਆਹੁ ਮਨੁਸ੍ਸਲੋਕੇ.

੧੫੨. ਏਤ੍ਥੇਵ ਤੇ ਨੀਹਤਾ ਹੀਨਵਾਦਾ, ਅਹੇਤੁਕਾ ਯੇ ਨ ਵਦਨ੍ਤਿ ਕਮ੍ਮਂ;

ਤਥਾ ਫਲਂ ਸੁਕਤਦੁਕ੍ਕਟਾਨਂ, ਦਤ੍ਤੁਪਞ੍ਞਤ੍ਤਂ ਯੇ ਚ ਵਦਨ੍ਤਿ ਦਾਨਂ.

੧੫੩. ਅਦ੍ਧਾ ਹਿ ਸਚ੍ਚਂ ਵਚਨਂ ਤਵੇਦਂ [ਤਵੇਤਂ (ਸੀ. ਸ੍ਯਾ. ਪੀ.)], ਕਥਞ੍ਹਿ ਦਾਨਂ ਅਫਲਂ ਭਵੇਯ੍ਯ [ਵਦੇਯ੍ਯ (ਸੀ. ਪੀ.)];

ਤਥਾ ਫਲਂ ਸੁਕਤਦੁਕ੍ਕਟਾਨਂ, ਦਤ੍ਤੁਪਞ੍ਞਤ੍ਤਞ੍ਚ ਕਥਂ ਭਵੇਯ੍ਯ.

੧੫੪. ਕਥਂਕਰੋ ਕਿਨ੍ਤਿਕਰੋ ਕਿਮਾਚਰਂ, ਕਿਂ ਸੇਵਮਾਨੋ ਕੇਨ ਤਪੋਗੁਣੇਨ;

ਅਕ੍ਖਾਹਿ [ਅਕ੍ਖਾਹਿ ਤਂ ਦਾਨਿ (ਕ.)] ਮੇ ਮੋਰਰਾਜੇਤਮਤ੍ਥਂ, ਯਥਾ ਅਹਂ ਨੋ ਨਿਰਯਂ ਪਤੇਯ੍ਯਂ.

੧੫੫. ਯੇ ਕੇਚਿ ਅਤ੍ਥਿ ਸਮਣਾ ਪਥਬ੍ਯਾ, ਕਾਸਾਯਵਤ੍ਥਾ ਅਨਗਾਰਿਯਾ ਤੇ;

ਪਾਤੋਵ ਪਿਣ੍ਡਾਯ ਚਰਨ੍ਤਿ ਕਾਲੇ, ਵਿਕਾਲਚਰਿਯਾ ਵਿਰਤਾ ਹਿ ਸਨ੍ਤੋ.

੧੫੬. ਤੇ ਤਤ੍ਥ ਕਾਲੇਨੁਪਸਙ੍ਕਮਿਤ੍ਵਾ, ਪੁਚ੍ਛਾਹਿ ਯਂ ਤੇ ਮਨਸੋ ਪਿਯਂ ਸਿਯਾ;

ਤੇ ਤੇ ਪਵਕ੍ਖਨ੍ਤਿ ਯਥਾਪਜਾਨਂ, ਇਮਸ੍ਸ ਲੋਕਸ੍ਸ ਪਰਸ੍ਸ ਚਤ੍ਥਂ.

੧੫੭. ਤਚਂਵ ਜਿਣ੍ਣਂ ਉਰਗੋ ਪੁਰਾਣਂ, ਪਣ੍ਡੂਪਲਾਸਂ ਹਰਿਤੋ ਦੁਮੋਵ;

ਏਸਪ੍ਪਹੀਨੋ ਮਮ ਲੁਦ੍ਦਭਾਵੋ, ਜਹਾਮਹਂ ਲੁਦ੍ਦਕਭਾਵਮਜ੍ਜ.

੧੫੮. ਯੇ ਚਾਪਿ ਮੇ ਸਕੁਣਾ ਅਤ੍ਥਿ ਬਦ੍ਧਾ, ਸਤਾਨਿਨੇਕਾਨਿ ਨਿਵੇਸਨਸ੍ਮਿਂ;

ਤੇਸਮ੍ਪਹਂ [ਤੇਸਂ ਅਹਂ (ਸ੍ਯਾ. ਕ.)] ਜੀਵਿਤਮਜ੍ਜ ਦਮ੍ਮਿ, ਮੋਕ੍ਖਞ੍ਚ ਤੇ ਪਤ੍ਤਾ [ਪਤ੍ਤੋ (ਸੀ.), ਅਚ੍ਛ (ਸ੍ਯਾ.)] ਸਕਂ ਨਿਕੇਤਂ.

੧੫੯. ਲੁਦ੍ਦੋ ਚਰੀ ਪਾਸਹਤ੍ਥੋ ਅਰਞ੍ਞੇ, ਬਾਧੇਤੁ ਮੋਰਾਧਿਪਤਿਂ ਯਸਸ੍ਸਿਂ;

ਬਨ੍ਧਿਤ੍ਵਾ [ਬਨ੍ਧਿਤ੍ਵ (ਸੀ. ਪੀ.)] ਮੋਰਾਧਿਪਤਿਂ ਯਸਸ੍ਸਿਂ, ਦੁਕ੍ਖਾ ਸ ਪਮੁਚ੍ਚਿ [ਦੁਕ੍ਖਾ ਪਮੁਚ੍ਚਿ (ਸੀ.), ਦੁਕ੍ਖਾ ਪਮੁਞ੍ਚਿ (ਸ੍ਯਾ. ਪੀ.)] ਯਥਾਹਂ ਪਮੁਤ੍ਤੋਤਿ.

ਮਹਾਮੋਰਜਾਤਕਂ ਅਟ੍ਠਮਂ.