੪੮੯. ਸੁਰੁਚਿਜਾਤਕਂ (੬)

੧੦੨. ਮਹੇਸੀ ਸੁਰੁਚਿਨੋ [ਰੁਚਿਨੋ (ਸੀ. ਸ੍ਯਾ. ਪੀ.)] ਭਰਿਯਾ, ਆਨੀਤਾ ਪਠਮਂ ਅਹਂ;

ਦਸ ਵਸ੍ਸਸਹਸ੍ਸਾਨਿ, ਯਂ ਮਂ ਸੁਰੁਚਿਮਾਨਯਿ.

੧੦੩. ਸਾਹਂ ਬ੍ਰਾਹ੍ਮਣ ਰਾਜਾਨਂ, ਵੇਦੇਹਂ ਮਿਥਿਲਗ੍ਗਹਂ;

ਨਾਭਿਜਾਨਾਮਿ ਕਾਯੇਨ, ਵਾਚਾਯ ਉਦ ਚੇਤਸਾ;

ਸੁਰੁਚਿਂ ਅਤਿਮਞ੍ਞਿਤ੍ਥ [ਅਤਿਮਞ੍ਞਿਤ੍ਥੋ (ਸੀ. ਪੀ.), ਅਤਿਮਞ੍ਞਿਤਾ (?)], ਆਵਿ [ਆਵਿਂ (ਸੀ. ਪੀ.)] ਵਾ ਯਦਿ ਵਾ ਰਹੋ.

੧੦੪. ਏਤੇਨ ਸਚ੍ਚਵਜ੍ਜੇਨ, ਪੁਤ੍ਤੋ ਉਪ੍ਪਜ੍ਜਤਂ ਇਸੇ;

ਮੁਸਾ ਮੇ ਭਣਮਾਨਾਯ, ਮੁਦ੍ਧਾ ਫਲਤੁ ਸਤ੍ਤਧਾ.

੧੦੫. ਭਤ੍ਤੁ ਮਮ ਸਸ੍ਸੁ ਮਾਤਾ, ਪਿਤਾ ਚਾਪਿ ਚ ਸਸ੍ਸੁਰੋ;

ਤੇ ਮਂ ਬ੍ਰਹ੍ਮੇ ਵਿਨੇਤਾਰੋ, ਯਾਵ ਅਟ੍ਠਂਸੁ ਜੀਵਿਤਂ.

੧੦੬. ਸਾਹਂ ਅਹਿਂਸਾਰਤਿਨੀ, ਕਾਮਸਾ [ਕਾਮਸੋ (ਸੀ.)] ਧਮ੍ਮਚਾਰਿਨੀ [ਧਮ੍ਮਚਾਰਿਣੀ (ਸੀ.)];

ਸਕ੍ਕਚ੍ਚਂ ਤੇ ਉਪਟ੍ਠਾਸਿਂ, ਰਤ੍ਤਿਨ੍ਦਿਵਮਤਨ੍ਦਿਤਾ.

੧੦੭. ਏਤੇਨ ਸਚ੍ਚਵਜ੍ਜੇਨ, ਪੁਤ੍ਤੋ ਉਪ੍ਪਜ੍ਜਤਂ ਇਸੇ;

ਮੁਸਾ ਮੇ ਭਣਮਾਨਾਯ, ਮੁਦ੍ਧਾ ਫਲਤੁ ਸਤ੍ਤਧਾ.

੧੦੮. ਸੋਲ਼ਸਿਤ੍ਥਿਸਹਸ੍ਸਾਨਿ, ਸਹਭਰਿਯਾਨਿ ਬ੍ਰਾਹ੍ਮਣ;

ਤਾਸੁ ਇਸ੍ਸਾ ਵਾ ਕੋਧੋ ਵਾ, ਨਾਹੁ ਮਯ੍ਹਂ ਕੁਦਾਚਨਂ.

੧੦੯. ਹਿਤੇਨ ਤਾਸਂ ਨਨ੍ਦਾਮਿ, ਨ ਚ ਮੇ ਕਾਚਿ ਅਪ੍ਪਿਯਾ;

ਅਤ੍ਤਾਨਂਵਾਨੁਕਮ੍ਪਾਮਿ, ਸਦਾ ਸਬ੍ਬਾ ਸਪਤ੍ਤਿਯੋ.

੧੧੦. ਏਤੇਨ ਸਚ੍ਚਵਜ੍ਜੇਨ, ਪੁਤ੍ਤੋ ਉਪ੍ਪਜ੍ਜਤਂ ਇਸੇ;

ਮੁਸਾ ਮੇ ਭਣਮਾਨਾਯ, ਮੁਦ੍ਧਾ ਫਲਤੁ ਸਤ੍ਤਧਾ.

੧੧੧. ਦਾਸੇ ਕਮ੍ਮਕਰੇ ਪੇਸ੍ਸੇ [ਪੋਸੇ (ਸ੍ਯਾ. ਕ.)], ਯੇ ਚਞ੍ਞੇ ਅਨੁਜੀਵਿਨੋ;

ਪੇਸੇਮਿ [ਪੋਸੇਮਿ (ਸੀ. ਸ੍ਯਾ. ਪੀ.)] ਸਹਧਮ੍ਮੇਨ, ਸਦਾ ਪਮੁਦਿਤਿਨ੍ਦ੍ਰਿਯਾ.

੧੧੨. ਏਤੇਨ ਸਚ੍ਚਵਜ੍ਜੇਨ, ਪੁਤ੍ਤੋ ਉਪ੍ਪਜ੍ਜਤਂ ਇਸੇ;

ਮੁਸਾ ਮੇ ਭਣਮਾਨਾਯ, ਮੁਦ੍ਧਾ ਫਲਤੁ ਸਤ੍ਤਧਾ.

੧੧੩. ਸਮਣੇ ਬ੍ਰਾਹ੍ਮਣੇ ਚਾਪਿ, ਅਞ੍ਞੇ ਚਾਪਿ ਵਨਿਬ੍ਬਕੇ;

ਤਪ੍ਪੇਮਿ ਅਨ੍ਨਪਾਨੇਨ, ਸਦਾ ਪਯਤਪਾਣਿਨੀ.

੧੧੪. ਏਤੇਨ ਸਚ੍ਚਵਜ੍ਜੇਨ, ਪੁਤ੍ਤੋ ਉਪ੍ਪਜ੍ਜਤਂ ਇਸੇ;

ਮੁਸਾ ਮੇ ਭਣਮਾਨਾਯ, ਮੁਦ੍ਧਾ ਫਲਤੁ ਸਤ੍ਤਧਾ.

੧੧੫. ਚਾਤੁਦ੍ਦਸਿਂ ਪਞ੍ਚਦ੍ਦਸਿਂ [ਪਨ੍ਨਰਸਿਂ (ਸੀ. ਪੀ.)], ਯਾ ਚ ਪਕ੍ਖਸ੍ਸ ਅਟ੍ਠਮੀ [ਅਟ੍ਠਮਿਂ (ਸੀ. ਪੀ.)];

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ [ਅਟ੍ਠਙ੍ਗਸੁਸਮਾਹਿਤਂ (ਸਬ੍ਬਤ੍ਥ) ਵਿ. ਵ. ੧੨੯ ਪਾਲ਼ਿਯਾ ਅਟ੍ਠਕਥਾ ਪਸ੍ਸਿਤਬ੍ਬਾ];

ਉਪੋਸਥਂ ਉਪਵਸਾਮਿ [ਉਪਵਸਿਂ (ਕ.)], ਸਦਾ ਸੀਲੇਸੁ ਸਂਵੁਤਾ.

੧੧੬. ਏਤੇਨ ਸਚ੍ਚਵਜ੍ਜੇਨ, ਪੁਤ੍ਤੋ ਉਪ੍ਪਜ੍ਜਤਂ ਇਸੇ;

ਮੁਸਾ ਮੇ ਭਣਮਾਨਾਯ, ਮੁਦ੍ਧਾ ਫਲਤੁ ਸਤ੍ਤਧਾ.

੧੧੭. ਸਬ੍ਬੇਵ ਤੇ ਧਮ੍ਮਗੁਣਾ, ਰਾਜਪੁਤ੍ਤਿ ਯਸਸ੍ਸਿਨਿ;

ਸਂਵਿਜ੍ਜਨ੍ਤਿ ਤਯਿ ਭਦ੍ਦੇ, ਯੇ ਤ੍ਵਂ ਕਿਤ੍ਤੇਸਿ ਅਤ੍ਤਨਿ.

੧੧੮. ਖਤ੍ਤਿਯੋ ਜਾਤਿਸਮ੍ਪਨ੍ਨੋ, ਅਭਿਜਾਤੋ ਯਸਸ੍ਸਿਮਾ;

ਧਮ੍ਮਰਾਜਾ ਵਿਦੇਹਾਨਂ, ਪੁਤ੍ਤੋ ਉਪ੍ਪਜ੍ਜਤੇ ਤਵ [ਤਵਂ (ਸੀ. ਪੀ.)].

੧੧੯. ਦੁਮ੍ਮੀ [ਰੁਮ੍ਮੀ (ਸੀ. ਪੀ.)] ਰਜੋਜਲ੍ਲਧਰੋ, ਅਘੇ ਵੇਹਾਯਸਂ ਠਿਤੋ;

ਮਨੁਞ੍ਞਂ ਭਾਸਸੇ ਵਾਚਂ, ਯਂ ਮਯ੍ਹਂ ਹਦਯਙ੍ਗਮਂ.

੧੨੦. ਦੇਵਤਾਨੁਸਿ ਸਗ੍ਗਮ੍ਹਾ, ਇਸਿ ਵਾਸਿ [ਚਾਪਿ (ਕ.)] ਮਹਿਦ੍ਧਿਕੋ;

ਕੋ ਵਾਸਿ ਤ੍ਵਂ ਅਨੁਪ੍ਪਤ੍ਤੋ, ਅਤ੍ਤਾਨਂ ਮੇ ਪਵੇਦਯ.

੧੨੧. ਯਂ ਦੇਵਸਙ੍ਘਾ ਵਨ੍ਦਨ੍ਤਿ, ਸੁਧਮ੍ਮਾਯਂ ਸਮਾਗਤਾ;

ਸੋਹਂ ਸਕ੍ਕੋ ਸਹਸ੍ਸਕ੍ਖੋ, ਆਗਤੋਸ੍ਮਿ ਤਵਨ੍ਤਿਕੇ.

੧੨੨. ਇਤ੍ਥਿਯੋ [ਇਤ੍ਥਿਯਾ (ਪੀ.)] ਜੀਵਲੋਕਸ੍ਮਿਂ, ਯਾ ਹੋਤਿ [ਹੋਨ੍ਤਿ (ਸੀ. ਸ੍ਯਾ.)] ਸਮਚਾਰਿਨੀ [ਸਮਚਾਰਿਣੀ (ਸੀ.)];

ਮੇਧਾਵਿਨੀ ਸੀਲਵਤੀ, ਸਸ੍ਸੁਦੇਵਾ ਪਤਿਬ੍ਬਤਾ.

੧੨੩. ਤਾਦਿਸਾਯ ਸੁਮੇਧਾਯ, ਸੁਚਿਕਮ੍ਮਾਯ ਨਾਰਿਯਾ;

ਦੇਵਾ ਦਸ੍ਸਨਮਾਯਨ੍ਤਿ, ਮਾਨੁਸਿਯਾ ਅਮਾਨੁਸਾ.

੧੨੪. ਤ੍ਵਞ੍ਚ ਭਦ੍ਦੇ ਸੁਚਿਣ੍ਣੇਨ, ਪੁਬ੍ਬੇ ਸੁਚਰਿਤੇਨ ਚ;

ਇਧ ਰਾਜਕੁਲੇ ਜਾਤਾ, ਸਬ੍ਬਕਾਮਸਮਿਦ੍ਧਿਨੀ.

੧੨੫. ਅਯਞ੍ਚ ਤੇ ਰਾਜਪੁਤ੍ਤਿ, ਉਭਯਤ੍ਥ ਕਟਗ੍ਗਹੋ;

ਦੇਵਲੋਕੂਪਪਤ੍ਤੀ ਚ, ਕਿਤ੍ਤੀ ਚ ਇਧ ਜੀਵਿਤੇ.

੧੨੬. ਚਿਰਂ ਸੁਮੇਧੇ ਸੁਖਿਨੀ, ਧਮ੍ਮਮਤ੍ਤਨਿ ਪਾਲਯ;

ਏਸਾਹਂ ਤਿਦਿਵਂ ਯਾਮਿ, ਪਿਯਂ ਮੇ ਤਵ ਦਸ੍ਸਨਨ੍ਤਿ.

ਸੁਰੁਚਿਜਾਤਕਂ ਛਟ੍ਠਂ.