੪੮੮. ਭਿਸਜਾਤਕਂ (੫)
੭੮. ਅਸ੍ਸਂ ਗਵਂ ਰਜਤਂ ਜਾਤਰੂਪਂ, ਭਰਿਯਞ੍ਚ ਸੋ ਇਧ ਲਭਤਂ ਮਨਾਪਂ;
ਪੁਤ੍ਤੇਹਿ ਦਾਰੇਹਿ ਸਮਙ੍ਗਿ ਹੋਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.
੭੯. ਮਾਲਞ੍ਚ ਸੋ ਕਾਸਿਕਚਨ੍ਦਨਞ੍ਚ, ਧਾਰੇਤੁ ਪੁਤ੍ਤਸ੍ਸ ਬਹੂ ਭਵਨ੍ਤੁ;
ਕਾਮੇਸੁ ਤਿਬ੍ਬਂ ਕੁਰੁਤਂ ਅਪੇਕ੍ਖਂ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.
੮੦. ਪਹੂਤਧਞ੍ਞੋ ਕਸਿਮਾ ਯਸਸ੍ਸੀ, ਪੁਤ੍ਤੇ ਗਿਹੀ ਧਨਿਮਾ ਸਬ੍ਬਕਾਮੇ;
ਵਯਂ ਅਪਸ੍ਸਂ ਘਰਮਾਵਸਾਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.
੮੧. ਸੋ ਖਤ੍ਤਿਯੋ ਹੋਤੁ ਪਸਯ੍ਹਕਾਰੀ, ਰਾਜਾਭਿਰਾਜਾ [ਰਾਜਾਧਿਰਾਜਾ (ਸ੍ਯਾ. ਕ.)] ਬਲਵਾ ਯਸਸ੍ਸੀ;
ਸ ਚਾਤੁਰਨ੍ਤਂ ਮਹਿਮਾਵਸਾਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.
੮੨. ਸੋ ਬ੍ਰਾਹ੍ਮਣੋ ਹੋਤੁ ਅਵੀਤਰਾਗੋ, ਮੁਹੁਤ੍ਤਨਕ੍ਖਤ੍ਤਪਥੇਸੁ ਯੁਤ੍ਤੋ;
ਪੂਜੇਤੁ ਨਂ ਰਟ੍ਠਪਤੀ ਯਸਸ੍ਸੀ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.
੮੩. ਅਜ੍ਝਾਯਕਂ ਸਬ੍ਬਸਮਨ੍ਤਵੇਦਂ [ਸਬ੍ਬਸਮਤ੍ਤਵੇਦਂ (ਸੀ.), ਸਬ੍ਬਸਮਤ੍ਤਵੇਦਨਂ (ਪੀ.)], ਤਪਸ੍ਸੀਨਂ ਮਞ੍ਞਤੁ ਸਬ੍ਬਲੋਕੋ;
ਪੂਜੇਨ੍ਤੁ ਨਂ ਜਾਨਪਦਾ ਸਮੇਚ੍ਚ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.
੮੪. ਚਤੁਸ੍ਸਦਂ ਗਾਮਵਰਂ ਸਮਿਦ੍ਧਂ, ਦਿਨ੍ਨਞ੍ਹਿ ਸੋ ਭੁਞ੍ਜਤੁ ਵਾਸਵੇਨ;
ਅਵੀਤਰਾਗੋ ਮਰਣਂ ਉਪੇਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.
੮੫. ਸੋ ਗਾਮਣੀ ਹੋਤੁ ਸਹਾਯਮਜ੍ਝੇ, ਨਚ੍ਚੇਹਿ ਗੀਤੇਹਿ ਪਮੋਦਮਾਨੋ;
ਸੋ ਰਾਜਤੋ ਬ੍ਯਸਨ ਮਾਲਤ੍ਥ [ਮਾ ਰਾਜਤੋ ਵ੍ਯਸਨ’ਮਲਤ੍ਥ (ਸੀ. ਸ੍ਯਾ. ਪੀ.)] ਕਿਞ੍ਚਿ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.
੮੬. ਯਂ ਏਕਰਾਜਾ ਪਥਵਿਂ ਵਿਜੇਤ੍ਵਾ, ਇਤ੍ਥੀਸਹਸ੍ਸਾਨ [ਇਤ੍ਥੀਸਹਸ੍ਸਸ੍ਸ (ਸੀ. ਪੀ.)] ਠਪੇਤੁ ਅਗ੍ਗਂ;
ਸੀਮਨ੍ਤਿਨੀਨਂ ਪਵਰਾ ਭਵਾਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯਾ ਅਹਾਸਿ.
੮੭. ਇਸੀਨਞ੍ਹਿ ਸਾ ਸਬ੍ਬਸਮਾਗਤਾਨਂ, ਭੁਞ੍ਜੇਯ੍ਯ ਸਾਦੁਂ ਅਵਿਕਮ੍ਪਮਾਨਾ;
ਚਰਾਤੁ ਲਾਭੇਨ ਵਿਕਤ੍ਥਮਾਨਾ, ਭਿਸਾਨਿ ਤੇ ਬ੍ਰਾਹ੍ਮਣ ਯਾ ਅਹਾਸਿ.
੮੮. ਆਵਾਸਿਕੋ ਹੋਤੁ ਮਹਾਵਿਹਾਰੇ, ਨਵਕਮ੍ਮਿਕੋ ਹੋਤੁ ਗਜਙ੍ਗਲਾਯਂ [ਕਜਙ੍ਗਲਾਯਂ (ਸੀ. ਸ੍ਯਾ. ਪੀ.)];
ਆਲੋਕਸਨ੍ਧਿਂ ਦਿਵਸਂ [ਦਿਵਸਾ (ਸੀ. ਸ੍ਯਾ. ਪੀ.)] ਕਰੋਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.
੮੯. ਸੋ ਬਜ੍ਝਤੂ ਪਾਸਸਤੇਹਿ ਛਬ੍ਭਿ [ਛਮ੍ਹਿ (ਸੀ. ਪੀ.), ਛਸ੍ਸੁ (?)], ਰਮ੍ਮਾ ਵਨਾ ਨਿਯ੍ਯਤੁ ਰਾਜਧਾਨਿਂ [ਰਾਜਠਾਨਿਂ (ਕ.)];
ਤੁਤ੍ਤੇਹਿ ਸੋ ਹਞ੍ਞਤੁ ਪਾਚਨੇਹਿ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.
੯੦. ਅਲਕ੍ਕਮਾਲੀ ਤਿਪੁਕਣ੍ਣਵਿਦ੍ਧੋ, ਲਟ੍ਠੀਹਤੋ ਸਪ੍ਪਮੁਖਂ ਉਪੇਤੁ;
ਸਕਚ੍ਛਬਨ੍ਧੋ [ਸਕ੍ਕਚ੍ਚਬਦ੍ਧੋ (ਸੀ. ਪੀ.), ਸਂਕਚ੍ਚਬਨ੍ਧੋ (ਨਿਯ੍ਯ)] ਵਿਸਿਖਂ ਚਰਾਤੁ, ਭਿਸਾਨਿ ਤੇ ਬ੍ਰਾਹ੍ਮਣ ਯੋ ਅਹਾਸਿ.
੯੧. ਯੋ ਵੇ ਅਨਟ੍ਠਂਵ [ਅਨਟ੍ਠਂ (ਸੀ. ਸ੍ਯਾ. ਪੀ.)] ਨਟ੍ਠਨ੍ਤਿ ਚਾਹ, ਕਾਮੇਵ ਸੋ ਲਭਤਂ ਭੁਞ੍ਜਤਞ੍ਚ [ਲਭਤੁ ਭੁਞ੍ਜਤੁ ਚ (ਸ੍ਯਾ.)];
ਅਗਾਰਮਜ੍ਝੇ ਮਰਣਂ ਉਪੇਤੁ, ਯੋ ਵਾ ਭੋਨ੍ਤੋ ਸਙ੍ਕਤਿ ਕਞ੍ਚਿਦੇਵ [ਕਿਞ੍ਚਿਦੇਵ (ਕ.)].
੯੨. ਯਦੇਸਮਾਨਾ ਵਿਚਰਨ੍ਤਿ ਲੋਕੇ, ਇਟ੍ਠਞ੍ਚ ਕਨ੍ਤਞ੍ਚ ਬਹੂਨਮੇਤਂ;
ਪਿਯਂ ਮਨੁਞ੍ਞਂ ਚਿਧ ਜੀਵਲੋਕੇ, ਕਸ੍ਮਾ ਇਸਯੋ ਨਪ੍ਪਸਂਸਨ੍ਤਿ ਕਾਮੇ.
੯੩. ਕਾਮੇਸੁ ਵੇ ਹਞ੍ਞਰੇ ਬਜ੍ਝਰੇ ਚ, ਕਾਮੇਸੁ ਦੁਕ੍ਖਞ੍ਚ ਭਯਞ੍ਚ ਜਾਤਂ;
ਕਾਮੇਸੁ ਭੂਤਾਧਿਪਤੀ ਪਮਤ੍ਤਾ, ਪਾਪਾਨਿ ਕਮ੍ਮਾਨਿ ਕਰੋਨ੍ਤਿ ਮੋਹਾ.
੯੪. ਤੇ ਪਾਪਧਮ੍ਮਾ ਪਸਵੇਤ੍ਵ ਪਾਪਂ, ਕਾਯਸ੍ਸ ਭੇਦਾ ਨਿਰਯਂ ਵਜਨ੍ਤਿ;
ਆਦੀਨਵਂ ਕਾਮਗੁਣੇਸੁ ਦਿਸ੍ਵਾ, ਤਸ੍ਮਾ ਇਸਯੋ ਨਪ੍ਪਸਂਸਨ੍ਤਿ ਕਾਮੇ.
੯੫. ਵੀਮਂਸਮਾਨੋ ਇਸਿਨੋ ਭਿਸਾਨਿ, ਤੀਰੇ ਗਹੇਤ੍ਵਾਨ ਥਲੇ ਨਿਧੇਸਿਂ;
ਸੁਦ੍ਧਾ ਅਪਾਪਾ ਇਸਯੋ ਵਸਨ੍ਤਿ, ਏਤਾਨਿ ਤੇ ਬ੍ਰਹ੍ਮਚਾਰੀ ਭਿਸਾਨਿ.
੯੬. ਨ ਤੇ ਨਟਾ ਨੋ ਪਨ ਕੀਲ਼ਨੇਯ੍ਯਾ, ਨ ਬਨ੍ਧਵਾ ਨੋ ਪਨ ਤੇ ਸਹਾਯਾ;
ਕਿਸ੍ਮਿਂ ਵੁਪਤ੍ਥਮ੍ਭ ਸਹਸ੍ਸਨੇਤ੍ਤ, ਇਸੀਹਿ ਤ੍ਵਂ ਕੀਲ਼ਸਿ ਦੇਵਰਾਜ.
੯੭. ਆਚਰਿਯੋ ਮੇਸਿ ਪਿਤਾ ਚ ਮਯ੍ਹਂ, ਏਸਾ ਪਤਿਟ੍ਠਾ ਖਲਿਤਸ੍ਸ ਬ੍ਰਹ੍ਮੇ;
ਏਕਾਪਰਾਧਂ ਖਮ ਭੂਰਿਪਞ੍ਞ, ਨ ਪਣ੍ਡਿਤਾ ਕੋਧਬਲਾ ਭਵਨ੍ਤਿ.
੯੮. ਸੁਵਾਸਿਤਂ ਇਸਿਨਂ ਏਕਰਤ੍ਤਂ, ਯਂ ਵਾਸਵਂ ਭੂਤਪਤਿਦ੍ਦਸਾਮ;
ਸਬ੍ਬੇਵ ਭੋਨ੍ਤੋ ਸੁਮਨਾ ਭਵਨ੍ਤੁ, ਯਂ ਬ੍ਰਾਹ੍ਮਣੋ ਪਚ੍ਚੁਪਾਦੀ ਭਿਸਾਨਿ.
੯੯. ਅਹਞ੍ਚ ਸਾਰਿਪੁਤ੍ਤੋ ਚ, ਮੋਗ੍ਗਲ੍ਲਾਨੋ ਚ ਕਸ੍ਸਪੋ;
ਅਨੁਰੁਦ੍ਧੋ ਪੁਣ੍ਣੋ ਆਨਨ੍ਦੋ, ਤਦਾਸੁਂ ਸਤ੍ਤ ਭਾਤਰੋ.
੧੦੦. ਭਗਿਨੀ ਉਪ੍ਪਲਵਣ੍ਣਾ ਚ, ਦਾਸੀ ਖੁਜ੍ਜੁਤ੍ਤਰਾ ਤਦਾ;
ਚਿਤ੍ਤੋ ਗਹਪਤਿ ਦਾਸੋ, ਯਕ੍ਖੋ ਸਾਤਾਗਿਰੋ ਤਦਾ.
੧੦੧. ਪਾਲਿਲੇਯ੍ਯੋ [ਪਾਰਿਲੇਯ੍ਯੋ (ਸੀ. ਪੀ.)] ਤਦਾ ਨਾਗੋ, ਮਧੁਦੋ [ਮਧੁਵਾ (ਸੀ. ਪੀ.)] ਸੇਟ੍ਠਵਾਨਰੋ;
ਕਾਲ਼ੁਦਾਯੀ ਤਦਾ ਸਕ੍ਕੋ, ਏਵਂ ਧਾਰੇਥ ਜਾਤਕਨ੍ਤਿ.
ਭਿਸਜਾਤਕਂ ਪਞ੍ਚਮਂ.