੪੮੭. ਉਦ੍ਦਾਲਕਜਾਤਕਂ (੪)

੬੨. ਖਰਾਜਿਨਾ ਜਟਿਲਾ ਪਙ੍ਕਦਨ੍ਤਾ, ਦੁਮ੍ਮਕ੍ਖਰੂਪਾ [ਦੁਮ੍ਮੁਧਰੂਪਾ (ਸੀ. ਪੀ. ਕ.)] ਯੇ ਮਨ੍ਤਂ ਜਪ੍ਪਨ੍ਤਿ [ਯੇਮੇ ਜਪਨ੍ਤਿ (ਸੀ. ਪੀ.), ਯੇ’ਮੇ ਜਪ੍ਪਨ੍ਤਿ ਮਨ੍ਤੇ (ਜਾ. ੧.੬.੧੦)];

ਕਚ੍ਚਿਨ੍ਨੁ ਤੇ ਮਾਨੁਸਕੇ ਪਯੋਗੇ, ਇਦਂ ਵਿਦੂ ਪਰਿਮੁਤ੍ਤਾ ਅਪਾਯਾ.

੬੩. ਪਾਪਾਨਿ ਕਮ੍ਮਾਨਿ ਕਰੇਥ [ਕਰੇਯ੍ਯ (ਸ੍ਯਾ.), ਕਤ੍ਵਾਨ (ਜਾ. ੧.੬.੧੧)] ਰਾਜ, ਬਹੁਸ੍ਸੁਤੋ ਚੇ ਨ ਚਰੇਯ੍ਯ ਧਮ੍ਮਂ;

ਸਹਸ੍ਸਵੇਦੋਪਿ ਨ ਤਂ ਪਟਿਚ੍ਚ, ਦੁਕ੍ਖਾ ਪਮੁਚ੍ਚੇ [ਪਮੁਞ੍ਚੇ (ਸ੍ਯਾ.)] ਚਰਣਂ ਅਪਤ੍ਵਾ.

੬੪. ਸਹਸ੍ਸਵੇਦੋਪਿ ਨ ਤਂ ਪਟਿਚ੍ਚ, ਦੁਕ੍ਖਾ ਪਮੁਚ੍ਚੇ ਚਰਣਂ ਅਪਤ੍ਵਾ;

ਮਞ੍ਞਾਮਿ ਵੇਦਾ ਅਫਲਾ ਭਵਨ੍ਤਿ, ਸਸਂਯਮਂ ਚਰਣਞ੍ਞੇਵ ਸਚ੍ਚਂ.

੬੫. ਨ ਹੇਵ ਵੇਦਾ ਅਫਲਾ ਭਵਨ੍ਤਿ, ਸਸਂਯਮਂ ਚਰਣਞ੍ਞੇਵ ਸਚ੍ਚਂ;

ਕਿਤ੍ਤਿਞ੍ਹਿ [ਕਿਤ੍ਤਿਞ੍ਚ (ਸ੍ਯਾ.)] ਪਪ੍ਪੋਤਿ ਅਧਿਚ੍ਚ ਵੇਦੇ, ਸਨ੍ਤਿਂ ਪੁਣਾਤਿ [ਪੁਨੋਤਿ (ਸੀ. ਅਟ੍ਠ.), ਪੁਣੇਤਿ (ਸ੍ਯਾ. ਜਾ. ੧.੬.੧੩), ਪੁਨੇਤਿ (ਪੀ.)] ਚਰਣੇਨ ਦਨ੍ਤੋ.

੬੬. ਭਚ੍ਚਾ ਮਾਤਾ ਪਿਤਾ ਬਨ੍ਧੂ, ਯੇਨ ਜਾਤੋ ਸਯੇਵ ਸੋ;

ਉਦ੍ਦਾਲਕੋ ਅਹਂ ਭੋਤੋ [ਭੋਤਿ (ਕ.)], ਸੋਤ੍ਤਿਯਾਕੁਲਵਂਸਕੋ [ਵਂਸਤੋ (ਕ.)].

੬੭. ਕਥਂ ਭੋ ਬ੍ਰਾਹ੍ਮਣੋ ਹੋਤਿ, ਕਥਂ ਭਵਤਿ ਕੇਵਲੀ;

ਕਥਞ੍ਚ ਪਰਿਨਿਬ੍ਬਾਨਂ, ਧਮ੍ਮਟ੍ਠੋ ਕਿਨ੍ਤਿ ਵੁਚ੍ਚਤਿ.

੬੮. ਨਿਰਂਕਤ੍ਵਾ ਅਗ੍ਗਿਮਾਦਾਯ ਬ੍ਰਾਹ੍ਮਣੋ, ਆਪੋ ਸਿਞ੍ਚਂ ਯਜਂ ਉਸ੍ਸੇਤਿ ਯੂਪਂ;

ਏਵਂਕਰੋ ਬ੍ਰਾਹ੍ਮਣੋ ਹੋਤਿ ਖੇਮੀ, ਧਮ੍ਮੇ ਠਿਤਂ ਤੇਨ ਅਮਾਪਯਿਂਸੁ.

੬੯. ਨ ਸੁਦ੍ਧਿ ਸੇਚਨੇਨਤ੍ਥਿ, ਨਾਪਿ ਕੇਵਲੀ ਬ੍ਰਾਹ੍ਮਣੋ;

ਨ ਖਨ੍ਤੀ ਨਾਪਿ ਸੋਰਚ੍ਚਂ, ਨਾਪਿ ਸੋ ਪਰਿਨਿਬ੍ਬੁਤੋ.

੭੦. ਕਥਂ ਸੋ [ਭੋ (ਸ੍ਯਾ. ਕ.)] ਬ੍ਰਾਹ੍ਮਣੋ ਹੋਤਿ, ਕਥਂ ਭਵਤਿ ਕੇਵਲੀ;

ਕਥਞ੍ਚ ਪਰਿਨਿਬ੍ਬਾਨਂ, ਧਮ੍ਮਟ੍ਠੋ ਕਿਨ੍ਤਿ ਵੁਚ੍ਚਤਿ.

੭੧. ਅਖੇਤ੍ਤਬਨ੍ਧੂ ਅਮਮੋ ਨਿਰਾਸੋ, ਨਿਲ੍ਲੋਭਪਾਪੋ ਭਵਲੋਭਖੀਣੋ;

ਏਵਂਕਰੋ ਬ੍ਰਾਹ੍ਮਣੋ ਹੋਤਿ ਖੇਮੀ, ਧਮ੍ਮੇ ਠਿਤਂ ਤੇਨ ਅਮਾਪਯਿਂਸੁ.

੭੨. ਖਤ੍ਤਿਯਾ ਬ੍ਰਾਹ੍ਮਣਾ ਵੇਸ੍ਸਾ, ਸੁਦ੍ਦਾ ਚਣ੍ਡਾਲਪੁਕ੍ਕੁਸਾ;

ਸਬ੍ਬੇਵ ਸੋਰਤਾ ਦਨ੍ਤਾ, ਸਬ੍ਬੇਵ ਪਰਿਨਿਬ੍ਬੁਤਾ;

ਸਬ੍ਬੇਸਂ ਸੀਤਿਭੂਤਾਨਂ, ਅਤ੍ਥਿ ਸੇਯ੍ਯੋਥ [ਸੇਯ੍ਯੋਵ (ਸੀ. ਪੀ.)] ਪਾਪਿਯੋ.

੭੩. ਖਤ੍ਤਿਯਾ ਬ੍ਰਾਹ੍ਮਣਾ ਵੇਸ੍ਸਾ, ਸੁਦ੍ਦਾ ਚਣ੍ਡਾਲਪੁਕ੍ਕੁਸਾ;

ਸਬ੍ਬੇਵ ਸੋਰਤਾ ਦਨ੍ਤਾ, ਸਬ੍ਬੇਵ ਪਰਿਨਿਬ੍ਬੁਤਾ;

ਸਬ੍ਬੇਸਂ ਸੀਤਿਭੂਤਾਨਂ, ਨਤ੍ਥਿ ਸੇਯ੍ਯੋਥ ਪਾਪਿਯੋ.

੭੪. ਖਤ੍ਤਿਯਾ ਬ੍ਰਾਹ੍ਮਣਾ ਵੇਸ੍ਸਾ, ਸੁਦ੍ਦਾ ਚਣ੍ਡਾਲਪੁਕ੍ਕੁਸਾ;

ਸਬ੍ਬੇਵ ਸੋਰਤਾ ਦਨ੍ਤਾ, ਸਬ੍ਬੇਵ ਪਰਿਨਿਬ੍ਬੁਤਾ.

੭੫. ਸਬ੍ਬੇਸਂ ਸੀਤਿਭੂਤਾਨਂ, ਨਤ੍ਥਿ ਸੇਯ੍ਯੋਥ ਪਾਪਿਯੋ;

ਪਨਤ੍ਥਂ [ਪਸਤ੍ਥਂ (ਸ੍ਯਾ.), ਪਸਟ੍ਠਂ (ਕ.)] ਚਰਸਿ ਬ੍ਰਹ੍ਮਞ੍ਞਂ, ਸੋਤ੍ਤਿਯਾਕੁਲਵਂਸਤਂ.

੭੬. ਨਾਨਾਰਤ੍ਤੇਹਿ ਵਤ੍ਥੇਹਿ, ਵਿਮਾਨਂ ਭਵਤਿ ਛਾਦਿਤਂ;

ਨ ਤੇਸਂ ਛਾਯਾ ਵਤ੍ਥਾਨਂ, ਸੋ ਰਾਗੋ ਅਨੁਪਜ੍ਜਥ.

੭੭. ਏਵਮੇਵ [ਏਵਮੇਵਂ (ਪੀ.)] ਮਨੁਸ੍ਸੇਸੁ, ਯਦਾ ਸੁਜ੍ਝਨ੍ਤਿ ਮਾਣਵਾ;

ਤੇ ਸਜਾਤਿਂ ਪਮੁਞ੍ਚਨ੍ਤਿ [ਨ ਤੇਸਂ ਜਾਤਿਂ ਪੁਚ੍ਛਨ੍ਤਿ (ਸੀ. ਸ੍ਯਾ. ਪੀ.), ਨ ਤੇਸਂ ਜਾਤਿ ਸੁਜ੍ਝਤਿ (ਕ.)], ਧਮ੍ਮਮਞ੍ਞਾਯ ਸੁਬ੍ਬਤਾਤਿ.

ਉਦ੍ਦਾਲਕਜਾਤਕਂ ਚਤੁਤ੍ਥਂ.