੪੮੩. ਸਰਭਮਿਗਜਾਤਕਂ (੧੦)

੧੩੪. ਆਸੀਸੇਥੇਵ [ਆਸਿਂਸੇਥੇਵ (ਸੀ. ਸ੍ਯਾ. ਪੀ.)] ਪੁਰਿਸੋ, ਨ ਨਿਬ੍ਬਿਨ੍ਦੇਯ੍ਯ ਪਣ੍ਡਿਤੋ;

ਪਸ੍ਸਾਮਿ ਵੋਹਂ ਅਤ੍ਤਾਨਂ, ਯਥਾ ਇਚ੍ਛਿਂ ਤਥਾ ਅਹੁ.

੧੩੫. ਆਸੀਸੇਥੇਵ ਪੁਰਿਸੋ, ਨ ਨਿਬ੍ਬਿਨ੍ਦੇਯ੍ਯ ਪਣ੍ਡਿਤੋ;

ਪਸ੍ਸਾਮਿ ਵੋਹਂ ਅਤ੍ਤਾਨਂ, ਉਦਕਾ ਥਲਮੁਬ੍ਭਤਂ.

੧੩੬. ਵਾਯਮੇਥੇਵ ਪੁਰਿਸੋ, ਨ ਨਿਬ੍ਬਿਨ੍ਦੇਯ੍ਯ ਪਣ੍ਡਿਤੋ;

ਪਸ੍ਸਾਮਿ ਵੋਹਂ ਅਤ੍ਤਾਨਂ, ਯਥਾ ਇਚ੍ਛਿਂ ਤਥਾ ਅਹੁ.

੧੩੭. ਵਾਯਮੇਥੇਵ ਪੁਰਿਸੋ, ਨ ਨਿਬ੍ਬਿਨ੍ਦੇਯ੍ਯ ਪਣ੍ਡਿਤੋ;

ਪਸ੍ਸਾਮਿ ਵੋਹਂ ਅਤ੍ਤਾਨਂ, ਉਦਕਾ ਥਲਮੁਬ੍ਭਤਂ.

੧੩੮. ਦੁਕ੍ਖੂਪਨੀਤੋਪਿ ਨਰੋ ਸਪਞ੍ਞੋ, ਆਸਂ ਨ ਛਿਨ੍ਦੇਯ੍ਯ ਸੁਖਾਗਮਾਯ;

ਬਹੂ ਹਿ ਫਸ੍ਸਾ ਅਹਿਤਾ ਹਿਤਾ ਚ, ਅਵਿਤਕ੍ਕਿਤਾ ਮਚ੍ਚਮੁਪਬ੍ਬਜਨ੍ਤਿ [ਮਚ੍ਚੁਮੁਪਬ੍ਬਜਨ੍ਤਿ (ਕ. ਸੀ. ਪੀ.), ਮਚ੍ਚੁਮੁਪਪਜ੍ਜਨ੍ਤਿ (ਸ੍ਯਾ. ਕ.) ਏਤ੍ਥ ‘‘ਅਵਿਤਕ੍ਕਿਤਾਪਿ ਫਸ੍ਸੋ ਮਚ੍ਚਂ ਜਨਂ ਉਪਗਚ੍ਛਨ੍ਤੀ’’ਤਿ ਅਤ੍ਥੋ].

੧੩੯. ਅਚਿਨ੍ਤਿਤਮ੍ਪਿ ਭਵਤਿ, ਚਿਨ੍ਤਿਤਮ੍ਪਿ ਵਿਨਸ੍ਸਤਿ;

ਨ ਹਿ ਚਿਨ੍ਤਾਮਯਾ ਭੋਗਾ, ਇਤ੍ਥਿਯਾ ਪੁਰਿਸਸ੍ਸ ਵਾ.

੧੪੦. ਸਰਭਂ ਗਿਰਿਦੁਗ੍ਗਸ੍ਮਿਂ, ਯਂ ਤ੍ਵਂ ਅਨੁਸਰੀ ਪੁਰੇ;

ਅਲੀਨਚਿਤ੍ਤਸ੍ਸ ਤੁਵਂ, ਵਿਕ੍ਕਨ੍ਤਮਨੁਜੀਵਸਿ [ਤਵ, ਵਿਕ੍ਕਨ੍ਤਂ ਜੀਵਿਤਂ ਲਭਿ (ਕ.)].

੧੪੧. ਯੋ ਤਂ ਵਿਦੁਗ੍ਗਾ ਨਰਕਾ ਸਮੁਦ੍ਧਰਿ, ਸਿਲਾਯ ਯੋਗ੍ਗਂ ਸਰਭੋ ਕਰਿਤ੍ਵਾ;

ਦੁਕ੍ਖੂਪਨੀਤਂ ਮਚ੍ਚੁਮੁਖਾ ਪਮੋਚਯਿ, ਅਲੀਨਚਿਤ੍ਤਂ ਤਂ ਮਿਗਂ [ਤਮੇਵ (ਸ੍ਯਾ. ਕ.)] ਵਦੇਸਿ.

੧੪੨. ਕਿਂ ਤ੍ਵਂ ਨੁ [ਤੁਵਨ੍ਨੁ (ਸੀ. ਪੀ.)] ਤਤ੍ਥੇਵ ਤਦਾ ਅਹੋਸਿ, ਉਦਾਹੁ ਤੇ ਕੋਚਿ ਨਂ [ਤਂ (ਕ.)] ਏਤਦਕ੍ਖਾ;

ਵਿਵਟ੍ਟਚ੍ਛਦ੍ਦੋ ਨੁਸਿ ਸਬ੍ਬਦਸ੍ਸੀ, ਞਾਣਂ ਨੁ ਤੇ ਬ੍ਰਾਹ੍ਮਣ ਭਿਂਸਰੂਪਂ.

੧੪੩. ਨ ਚੇਵਹਂ ਤਤ੍ਥ ਤਦਾ ਅਹੋਸਿਂ, ਨ ਚਾਪਿ ਮੇ ਕੋਚਿ ਨਂ [ਤਂ (ਕ.)] ਏਤਦਕ੍ਖਾ;

ਗਾਥਾਪਦਾਨਞ੍ਚ ਸੁਭਾਸਿਤਾਨਂ, ਅਤ੍ਥਂ ਤਦਾਨੇਨ੍ਤਿ ਜਨਿਨ੍ਦ ਧੀਰਾ.

੧੪੪. ਆਦਾਯ ਪਤ੍ਤਿਂ [ਪਤ੍ਤਂ (ਸ੍ਯਾ.), ਪਟ੍ਟਿਂ (ਕ.)] ਪਰਵਿਰਿਯਘਾਤਿਂ, ਚਾਪੇ ਸਰਂ ਕਿਂ ਵਿਚਿਕਿਚ੍ਛਸੇ ਤੁਵਂ;

ਨੁਨ੍ਨੋ [ਨੁਣ੍ਣੋ (ਕ. ਸੀ. ਸ੍ਯਾ.), ਤੁਣ੍ਣੋ (ਕ.)] ਸਰੋ ਸਰਭਂ ਹਨ੍ਤੁ ਖਿਪ੍ਪਂ, ਅਨ੍ਨਞ੍ਹਿ ਏਤਂ ਵਰਪਞ੍ਞ ਰਞ੍ਞੋ.

੧੪੫. ਅਦ੍ਧਾ ਪਜਾਨਾਮਿ ਅਹਮ੍ਪਿ ਏਤਂ, ਅਨ੍ਨਂ ਮਿਗੋ ਬ੍ਰਾਹ੍ਮਣ ਖਤ੍ਤਿਯਸ੍ਸ;

ਪੁਬ੍ਬੇ ਕਤਞ੍ਚ [ਪੁਬ੍ਬੇ ਚ ਕਤਂ (ਕ.)] ਅਪਚਾਯਮਾਨੋ, ਤਸ੍ਮਾ ਮਿਗਂ ਸਰਭਂ ਨੋ ਹਨਾਮਿ.

੧੪੬. ਨੇਸੋ ਮਿਗੋ ਮਹਾਰਾਜ, ਅਸੁਰੇਸੋ ਦਿਸਮ੍ਪਤਿ;

ਏਤਂ ਹਨ੍ਤ੍ਵਾ ਮਨੁਸ੍ਸਿਨ੍ਦ, ਭਵਸ੍ਸੁ ਅਮਰਾਧਿਪੋ.

੧੪੭. ਸਚੇ ਚ ਰਾਜਾ [ਰਾਜ (ਸੀ. ਸ੍ਯਾ. ਪੀ.)] ਵਿਚਿਕਿਚ੍ਛਸੇ ਤੁਵਂ, ਹਨ੍ਤੁਂ ਮਿਗਂ ਸਰਭਂ ਸਹਾਯਕਂ [ਸਹਾਯਕਂ ਮੇ (ਸੀ. ਪੀ.)];

ਸਪੁਤ੍ਤਦਾਰੋ ਨਰਵੀਰਸੇਟ੍ਠ [ਨਰਵਿਰਿਯਸੇਟ੍ਠ (ਸੀ. ਪੀ.)], ਗਨ੍ਤ੍ਵਾ [ਗਨ੍ਤਾ (ਸੀ. ਪੀ. ਅਟ੍ਠ.)] ਤੁਵਂ ਵੇਤਰਣਿਂ ਯਮਸ੍ਸ.

੧੪੮. ਕਾਮਂ ਅਹਂ ਜਾਨਪਦਾ ਚ ਸਬ੍ਬੇ, ਪੁਤ੍ਤਾ ਚ ਦਾਰਾ ਚ ਸਹਾਯਸਙ੍ਘਾ;

ਗਚ੍ਛੇਮੁ ਤਂ ਵੇਤਰਣਿਂ ਯਮਸ੍ਸ, ਨ ਤ੍ਵੇਵ ਹਞ੍ਞੋ ਮਮ ਪਾਣਦੋ ਯੋ [ਪਾਣਦ’ਸ੍ਸ (ਸੀ. ਸ੍ਯਾ. ਪੀ.)].

੧੪੯. ਅਯਂ ਮਿਗੋ ਕਿਚ੍ਛਗਤਸ੍ਸ ਮਯ੍ਹਂ, ਏਕਸ੍ਸ ਕਤ੍ਤਾ ਵਿਵਨਸ੍ਮਿ ਘੋਰੇ;

ਤਂ ਤਾਦਿਸਂ ਪੁਬ੍ਬਕਿਚ੍ਚਂ ਸਰਨ੍ਤੋ, ਜਾਨਂ ਮਹਾਬ੍ਰਹ੍ਮੇ ਕਥਂ ਹਨੇਯ੍ਯਂ.

੧੫੦. ਮਿਤ੍ਤਾਭਿਰਾਧੀ ਚਿਰਮੇਵ ਜੀਵ, ਰਜ੍ਜਂ ਇਮਂ ਧਮ੍ਮਗੁਣੇ [ਰਜ੍ਜਮ੍ਪਿਮਂ ਚਸ੍ਸ ਗਣੇ (ਕ.)] ਪਸਾਸ;

ਨਾਰੀਗਣੇਹਿ ਪਰਿਚਾਰਿਯਨ੍ਤੋ, ਮੋਦਸ੍ਸੁ ਰਟ੍ਠੇ ਤਿਦਿਵੇਵ ਵਾਸਵੋ.

੧੫੧. ਅਕ੍ਕੋਧਨੋ ਨਿਚ੍ਚਪਸਨ੍ਨਚਿਤ੍ਤੋ, ਸਬ੍ਬਾਤਿਥੀ ਯਾਚਯੋਗੋ ਭਵਿਤ੍ਵਾ [ਪਾਹੁਨਕੇ ਕਰਿਤ੍ਵਾ (ਸ੍ਯਾ.), ਯਾਚਯੋਗੋ ਵਿਦਿਤ੍ਵਾ (ਕ.)];

ਦਤ੍ਵਾ ਚ ਭੁਤ੍ਵਾ ਚ ਯਥਾਨੁਭਾਵਂ, ਅਨਿਨ੍ਦਿਤੋ ਸਗ੍ਗਮੁਪੇਹਿ ਠਾਨਨ੍ਤਿ.

ਸਰਭਮਿਗਜਾਤਕਂ ਦਸਮਂ.

ਤੇਰਸਕਨਿਪਾਤਂ ਨਿਟ੍ਠਿਤਂ.