੧੩. ਤੇਰਸਕਨਿਪਾਤੋ
੪੭੪. ਅਮ੍ਬਜਾਤਕਂ (੧)
੧. ਅਹਾਸਿ [ਆਹਾਸਿ (?)] ਮੇ ਅਮ੍ਬਫਲਾਨਿ ਪੁਬ੍ਬੇ, ਅਣੂਨਿ ਥੂਲਾਨਿ ਚ ਬ੍ਰਹ੍ਮਚਾਰਿ;
ਤੇਹੇਵ ਮਨ੍ਤੇਹਿ ਨ ਦਾਨਿ ਤੁਯ੍ਹਂ, ਦੁਮਪ੍ਫਲਾ ਪਾਤੁਭਵਨ੍ਤਿ ਬ੍ਰਹ੍ਮੇ.
੨. ਨਕ੍ਖਤ੍ਤਯੋਗਂ ਪਟਿਮਾਨਯਾਮਿ, ਖਣਂ ਮੁਹੁਤ੍ਤਞ੍ਚ ਮਨ੍ਤੇ ਨ ਪਸ੍ਸਂ [ਖਣਂ ਮੁਹੁਤ੍ਤਂ ਨ ਮਂ ਤੋਸਯਨ੍ਤਿ (ਸੀ. ਪੀ.)];
ਨਕ੍ਖਤ੍ਤਯੋਗਞ੍ਚ ਖਣਞ੍ਚ ਲਦ੍ਧਾ, ਅਦ੍ਧਾਹਰਿਸ੍ਸਮ੍ਬਫਲਂ [ਅਥਾਹਰਿਸ੍ਸਮ੍ਬਫਲਂ (ਸੀ. ਪੀ.)] ਪਹੂਤਂ.
੩. ਨਕ੍ਖਤ੍ਤਯੋਗਂ ਨ ਪੁਰੇ ਅਭਾਣਿ, ਖਣਂ ਮੁਹੁਤ੍ਤਂ ਨ ਪੁਰੇ ਅਸਂਸਿ;
ਸਯਂ ਹਰੀ [ਅਥਾਹਰੀ (ਸੀ. ਸ੍ਯਾ. ਪੀ.)] ਅਮ੍ਬਫਲਂ ਪਹੂਤਂ, ਵਣ੍ਣੇਨ ਗਨ੍ਧੇਨ ਰਸੇਨੁਪੇਤਂ.
੪. ਮਨ੍ਤਾਭਿਜਪ੍ਪੇਨ ਪੁਰੇ ਹਿ [ਪੁਰ’ਸ੍ਸ (ਸੀ. ਪੀ.), ਪੁਰੇਪਿ (ਸ੍ਯਾ.)] ਤੁਯ੍ਹਂ, ਦੁਮਪ੍ਫਲਾ ਪਾਤੁਭਵਨ੍ਤਿ ਬ੍ਰਹ੍ਮੇ;
ਸ੍ਵਾਜ੍ਜ ਨ ਪਾਰੇਸਿ ਜਪ੍ਪਮ੍ਪਿ ਮਨ੍ਤਂ [ਜਪਮ੍ਪਿ ਮਨ੍ਤੇ (ਸੀ. ਪੀ.)], ਅਯਂ ਸੋ ਕੋ ਨਾਮ ਤਵਜ੍ਜ ਧਮ੍ਮੋ.
੫. ਚਣ੍ਡਾਲਪੁਤ੍ਤੋ ਮਮ ਸਮ੍ਪਦਾਸਿ, ਧਮ੍ਮੇਨ ਮਨ੍ਤੇ ਪਕਤਿਞ੍ਚ ਸਂਸਿ;
ਮਾ ਚਸ੍ਸੁ ਮੇ ਪੁਚ੍ਛਿਤੋ ਨਾਮਗੋਤ੍ਤਂ, ਗੁਯ੍ਹਿਤ੍ਥੋ ਅਤ੍ਥਂ [ਮਾ ਤਂ (ਸੀ. ਸ੍ਯਾ. ਪੀ.)] ਵਿਜਹੇਯ੍ਯ ਮਨ੍ਤੋ [ਵਿਜਹੇਯ੍ਯੁਮਨ੍ਤਾ (ਸ੍ਯਾ.)].
੬. ਸੋਹਂ ਜਨਿਨ੍ਦੇਨ ਜਨਮ੍ਹਿ ਪੁਟ੍ਠੋ, ਮਕ੍ਖਾਭਿਭੂਤੋ ਅਲਿਕਂ ਅਭਾਣਿਂ;
‘‘ਮਨ੍ਤਾ ਇਮੇ ਬ੍ਰਾਹ੍ਮਣਸ੍ਸਾ’’ਤਿ ਮਿਚ੍ਛਾ, ਪਹੀਨਮਨ੍ਤੋ ਕਪਣੋ ਰੁਦਾਮਿ.
੭. ਏਰਣ੍ਡਾ ਪੁਚਿਮਨ੍ਦਾ ਵਾ, ਅਥ ਵਾ ਪਾਲਿਭਦ੍ਦਕਾ;
ਮਧੁਂ ਮਧੁਤ੍ਥਿਕੋ ਵਿਨ੍ਦੇ, ਸੋ ਹਿ ਤਸ੍ਸ ਦੁਮੁਤ੍ਤਮੋ.
੮. ਖਤ੍ਤਿਯਾ ਬ੍ਰਾਹ੍ਮਣਾ ਵੇਸ੍ਸਾ, ਸੁਦ੍ਦਾ ਚਣ੍ਡਾਲਪੁਕ੍ਕੁਸਾ;
ਯਮ੍ਹਾ ਧਮ੍ਮਂ ਵਿਜਾਨੇਯ੍ਯ, ਸੋ ਹਿ ਤਸ੍ਸ ਨਰੁਤ੍ਤਮੋ.
੯. ਇਮਸ੍ਸ ਦਣ੍ਡਞ੍ਚ ਵਧਞ੍ਚ ਦਤ੍ਵਾ, ਗਲੇ ਗਹੇਤ੍ਵਾ ਖਲਯਾਥ [ਬਲਯਾਥ (ਸ੍ਯਾ.), ਗਲਯਾਥ (ਕ.)] ਜਮ੍ਮਂ;
ਯੋ ਉਤ੍ਤਮਤ੍ਥਂ ਕਸਿਰੇਨ ਲਦ੍ਧਂ, ਮਾਨਾਤਿਮਾਨੇਨ ਵਿਨਾਸਯਿਤ੍ਥ.
੧੦. ਯਥਾ ਸਮਂ ਮਞ੍ਞਮਾਨੋ ਪਤੇਯ੍ਯ, ਸੋਬ੍ਭਂ ਗੁਹਂ ਨਰਕਂ ਪੂਤਿਪਾਦਂ;
ਰਜ੍ਜੂਤਿ ਵਾ ਅਕ੍ਕਮੇ ਕਣ੍ਹਸਪ੍ਪਂ, ਅਨ੍ਧੋ ਯਥਾ ਜੋਤਿਮਧਿਟ੍ਠਹੇਯ੍ਯ;
ਏਵਮ੍ਪਿ ਮਂ ਤ੍ਵਂ ਖਲਿਤਂ ਸਪਞ੍ਞ [ਸਪਞ੍ਞਾ (ਪੀ.)], ਪਹੀਨਮਨ੍ਤਸ੍ਸ ਪੁਨਪ੍ਪਦਾਹਿ [ਪੁਨ ਸਮ੍ਪਦਾਹਿ (ਸ੍ਯਾ.), ਪੁਨਪ੍ਪਸੀਦ (ਸੀ. ਪੀ.)].
੧੧. ਧਮ੍ਮੇਨ ਮਨ੍ਤਂ [ਮਨ੍ਤੇ (ਸੀ. ਸ੍ਯਾ. ਪੀ.)] ਤਵ ਸਮ੍ਪਦਾਸਿਂ, ਤੁਵਮ੍ਪਿ ਧਮ੍ਮੇਨ [ਤ੍ਵਮ੍ਪਿ ਧਮ੍ਮੇਨੇਵ (ਕ.)] ਪਰਿਗ੍ਗਹੇਸਿ;
ਪਕਤਿਮ੍ਪਿ ਤੇ ਅਤ੍ਤਮਨੋ ਅਸਂਸਿਂ, ਧਮ੍ਮੇ ਠਿਤਂ ਤਂ [ਪਤਿਟ੍ਠਂ (ਕ.)] ਨ ਜਹੇਯ੍ਯ ਮਨ੍ਤੋ.
੧੨. ਯੋ ਬਾਲ ਮਨ੍ਤਂ [ਬਲਮਨ੍ਤਂ (ਕ.)] ਕਸਿਰੇਨ ਲਦ੍ਧਂ, ਯਂ ਦੁਲ੍ਲਭਂ ਅਜ੍ਜ ਮਨੁਸ੍ਸਲੋਕੇ;
ਕਿਞ੍ਚਾਪਿ ਲਦ੍ਧਾ ਜੀਵਿਤੁਂ ਅਪ੍ਪਪਞ੍ਞੋ [ਕਿਚ੍ਛਾ ਲਦ੍ਧਂ ਜੀਵਿਕਂ ਅਪ੍ਪਪਞ੍ਞੋ (ਸੀ. ਸ੍ਯਾ.), ਕਚ੍ਛਾਪਿ ਲਦ੍ਧਾ ਜੀਵਿਕਂ ਅਪ੍ਪਞ੍ਞ (ਪੀ.)], ਵਿਨਾਸਯੀ ਅਲਿਕਂ ਭਾਸਮਾਨੋ.
੧੩. ਬਾਲਸ੍ਸ ਮੂਲ਼੍ਹਸ੍ਸ ਅਕਤਞ੍ਞੁਨੋ ਚ, ਮੁਸਾ ਭਣਨ੍ਤਸ੍ਸ ਅਸਞ੍ਞਤਸ੍ਸ;
ਮਨ੍ਤੇ ਮਯਂ ਤਾਦਿਸਕੇ ਨ ਦੇਮ, ਕੁਤੋ ਮਨ੍ਤਾ ਗਚ੍ਛ ਨ ਮਯ੍ਹ ਰੁਚ੍ਚਸੀਤਿ.
ਅਮ੍ਬਜਾਤਕਂ ਪਠਮਂ.
੪੭੫. ਫਨ੍ਦਨਜਾਤਕਂ (੨)
੧੪. ਕੁਠਾਰਿਹਤ੍ਥੋ [ਕੁਧਾਰਿਹਤ੍ਥੋ (ਕ.)] ਪੁਰਿਸੋ, ਵਨਮੋਗਯ੍ਹ ਤਿਟ੍ਠਸਿ;
ਪੁਟ੍ਠੋ ਮੇ ਸਮ੍ਮ ਅਕ੍ਖਾਹਿ, ਕਿਂ ਦਾਰੁਂ ਛੇਤੁਮਿਚ੍ਛਸਿ.
੧੫. ਇਸ੍ਸੋ [ਇਸੋ (ਸੀ.), ਈਸੋ (ਸ੍ਯਾ. ਪੀ.)] ਵਨਾਨਿ ਚਰਸਿ, ਸਮਾਨਿ ਵਿਸਮਾਨਿ ਚ;
ਪੁਟ੍ਠੋ ਮੇ ਸਮ੍ਮ ਅਕ੍ਖਾਹਿ, ਕਿਂ ਦਾਰੁਂ ਨੇਮਿਯਾ ਦਲ਼੍ਹਂ.
੧੬. ਨੇਵ ਸਾਲੋ ਨ ਖਦਿਰੋ, ਨਾਸ੍ਸਕਣ੍ਣੋ ਕੁਤੋ ਧਵੋ;
ਰੁਕ੍ਖੋ ਚ [ਰੁਕ੍ਖੋਵ (ਸੀ. ਪੀ.)] ਫਨ੍ਦਨੋ ਨਾਮ, ਤਂ ਦਾਰੁਂ ਨੇਮਿਯਾ ਦਲ਼੍ਹਂ.
੧੭. ਕੀਦਿਸਾਨਿਸ੍ਸ ਪਤ੍ਤਾਨਿ, ਖਨ੍ਧੋ ਵਾ ਪਨ ਕੀਦਿਸੋ;
ਪੁਟ੍ਠੋ ਮੇ ਸਮ੍ਮ ਅਕ੍ਖਾਹਿ, ਯਥਾ ਜਾਨੇਮੁ ਫਨ੍ਦਨਂ.
੧੮. ਯਸ੍ਸ ਸਾਖਾ ਪਲਮ੍ਬਨ੍ਤਿ, ਨਮਨ੍ਤਿ ਨ ਚ ਭਞ੍ਜਰੇ;
ਸੋ ਰੁਕ੍ਖੋ ਫਨ੍ਦਨੋ ਨਾਮ, ਯਸ੍ਸ ਮੂਲੇ ਅਹਂ ਠਿਤੋ.
੧੯. ਅਰਾਨਂ ਚਕ੍ਕਨਾਭੀਨਂ, ਈਸਾਨੇਮਿਰਥਸ੍ਸ ਚ;
ਸਬ੍ਬਸ੍ਸ ਤੇ ਕਮ੍ਮਨਿਯੋ, ਅਯਂ ਹੇਸ੍ਸਤਿ ਫਨ੍ਦਨੋ.
੨੦. ਇਤਿ ਫਨ੍ਦਨਰੁਕ੍ਖੋਪਿ, ਤਾਵਦੇ ਅਜ੍ਝਭਾਸਥ;
ਮਯ੍ਹਮ੍ਪਿ ਵਚਨਂ ਅਤ੍ਥਿ, ਭਾਰਦ੍ਵਾਜ ਸੁਣੋਹਿ ਮੇ.
੨੧. ਇਸ੍ਸਸ੍ਸ [ਇਮਸ੍ਸ (ਕ. ਸੀ. ਕ.)] ਉਪਕ੍ਖਨ੍ਧਮ੍ਹਾ [ਉਪਖਨ੍ਧਮ੍ਹਾ (ਕ. ਸੀ. ਪੀ. ਕ.)], ਉਕ੍ਕਚ੍ਚ ਚਤੁਰਙ੍ਗੁਲਂ;
ਤੇਨ ਨੇਮਿਂ ਪਸਾਰੇਸਿ [ਪਰਿਹਰੇਸਿ (ਸੀ. ਪੀ.)], ਏਵਂ ਦਲ਼੍ਹਤਰਂ ਸਿਯਾ.
੨੨. ਇਤਿ ਫਨ੍ਦਨਰੁਕ੍ਖੋਪਿ, ਵੇਰਂ ਅਪ੍ਪੇਸਿ ਤਾਵਦੇ;
ਜਾਤਾਨਞ੍ਚ ਅਜਾਤਾਨਂ, ਇਸ੍ਸਾਨਂ ਦੁਕ੍ਖਮਾਵਹਿ.
੨੩. ਇਚ੍ਚੇਵਂ [ਇਚ੍ਚੇਵ (ਸੀ. ਪੀ.)] ਫਨ੍ਦਨੋ ਇਸ੍ਸਂ, ਇਸ੍ਸੋ ਚ ਪਨ ਫਨ੍ਦਨਂ;
ਅਞ੍ਞਮਞ੍ਞਂ ਵਿਵਾਦੇਨ, ਅਞ੍ਞਮਞ੍ਞਮਘਾਤਯੁਂ.
੨੪. ਏਵਮੇਵ ਮਨੁਸ੍ਸਾਨਂ, ਵਿਵਾਦੋ ਯਤ੍ਥ ਜਾਯਤਿ;
ਮਯੂਰਨਚ੍ਚਂ ਨਚ੍ਚਨ੍ਤਿ, ਯਥਾ ਤੇ ਇਸ੍ਸਫਨ੍ਦਨਾ.
੨੫. ਤਂ ਵੋ ਵਦਾਮਿ ਭਦ੍ਦਂ ਵੋ [ਭਦ੍ਦਨ੍ਤੇ (ਕ.)], ਯਾਵਨ੍ਤੇਤ੍ਥ ਸਮਾਗਤਾ;
ਸਮ੍ਮੋਦਥ ਮਾ ਵਿਵਦਥ [ਮਾਵਿਵਦਿਤ੍ਥ (ਸੀ. ਸ੍ਯਾ. ਪੀ.)], ਮਾ ਹੋਥ ਇਸ੍ਸਫਨ੍ਦਨਾ.
੨੬. ਸਾਮਗ੍ਗਿਮੇਵ [ਸਾਮਗ੍ਯਮੇਵ (ਸ੍ਯਾ. ਕ.)] ਸਿਕ੍ਖੇਥ, ਬੁਦ੍ਧੇਹੇਤਂ ਪਸਂਸਿਤਂ;
ਸਾਮਗ੍ਗਿਰਤੋ ਧਮ੍ਮਟ੍ਠੋ, ਯੋਗਕ੍ਖੇਮਾ ਨ ਧਂਸਤੀਤਿ.
ਫਨ੍ਦਨਜਾਤਕਂ ਦੁਤਿਯਂ.
੪੭੬. ਜਵਨਹਂਸਜਾਤਕਂ (੩)
੨੭. ਇਧੇਵ ਹਂਸ ਨਿਪਤ, ਪਿਯਂ ਮੇ ਤਵ ਦਸ੍ਸਨਂ;
ਇਸ੍ਸਰੋਸਿ ਅਨੁਪ੍ਪਤ੍ਤੋ, ਯਮਿਧਤ੍ਥਿ ਪਵੇਦਯ.
੨੮. ਸਵਨੇਨ ਏਕਸ੍ਸ ਪਿਯਾ ਭਵਨ੍ਤਿ, ਦਿਸ੍ਵਾ ਪਨੇਕਸ੍ਸ ਵਿਯੇਤਿ [ਵਿਨੇਤਿ (ਸ੍ਯਾ.), ਵਿਹੇਤਿ (ਪੀ.), ਵਿਗੇਤਿ (ਕ. ਅਟ੍ਠ.)] ਛਨ੍ਦੋ;
ਦਿਸ੍ਵਾ ਚ ਸੁਤ੍ਵਾ ਚ ਪਿਯਾ ਭਵਨ੍ਤਿ, ਕਚ੍ਚਿਨ੍ਨੁ ਮੇ ਪੀਯਸਿ [ਪਿਯ੍ਯਸਿ (ਸੀ. ਪੀ.)] ਦਸ੍ਸਨੇਨ.
੨੯. ਸਵਨੇਨ ਪਿਯੋ ਮੇਸਿ, ਭਿਯ੍ਯੋ ਚਾਗਮ੍ਮ ਦਸ੍ਸਨਂ;
ਏਵਂ ਪਿਯਦਸ੍ਸਨੋ ਮੇ [ਏਵਂ ਪਿਯਦਸ੍ਸਨੋ ਸਮਾਨੋ (ਸੀ. ਸ੍ਯਾ. ਪੀ.)], ਵਸ ਹਂਸ ਮਮਨ੍ਤਿਕੇ [ਮਮ ਸਨ੍ਤਿਕੇ (ਸੀ. ਸ੍ਯਾ. ਪੀ.)].
੩੦. ਵਸੇਯ੍ਯਾਮ ਤਵਾਗਾਰੇ, ਨਿਚ੍ਚਂ ਸਕ੍ਕਤਪੂਜਿਤਾ;
ਮਤ੍ਤੋ ਚ ਏਕਦਾ ਵਜ੍ਜੇ [ਵਜ੍ਜਾ (ਸੀ. ਪੀ.)], ‘‘ਹਂਸਰਾਜਂ ਪਚਨ੍ਤੁ ਮੇ’’.
੩੧. ਧਿਰਤ੍ਥੁ ਤਂ ਮਜ੍ਜਪਾਨਂ, ਯਂ ਮੇ ਪਿਯਤਰਂ ਤਯਾ;
ਨ ਚਾਪਿ ਮਜ੍ਜਂ ਪਿਸ੍ਸਾਮਿ [ਪਿਵਿਸ੍ਸਾਮਿ (ਸ੍ਯਾ.), ਪਾਯਾਮਿ (ਸੀ. ਪੀ.)], ਯਾਵ ਮੇ ਵਚ੍ਛਸੀ ਘਰੇ.
੩੨. ਸੁਵਿਜਾਨਂ ਸਿਙ੍ਗਾਲਾਨਂ, ਸਕੁਣਾਨਞ੍ਚ [ਸਕੁਨ੍ਤਾਨਞ੍ਚ (ਸੀ. ਸ੍ਯਾ. ਪੀ.)] ਵਸ੍ਸਿਤਂ;
ਮਨੁਸ੍ਸਵਸ੍ਸਿਤਂ ਰਾਜ, ਦੁਬ੍ਬਿਜਾਨਤਰਂ ਤਤੋ.
੩੩. ਅਪਿ ਚੇ ਮਞ੍ਞਤੀ ਪੋਸੋ, ਞਾਤਿ ਮਿਤ੍ਤੋ ਸਖਾਤਿ ਵਾ;
ਯੋ ਪੁਬ੍ਬੇ ਸੁਮਨੋ ਹੁਤ੍ਵਾ, ਪਚ੍ਛਾ ਸਮ੍ਪਜ੍ਜਤੇ ਦਿਸੋ.
੩੪. ਯਸ੍ਮਿਂ ਮਨੋ ਨਿਵਿਸਤਿ, ਅਵਿਦੂਰੇ ਸਹਾਪਿ ਸੋ;
ਸਨ੍ਤਿਕੇਪਿ ਹਿ ਸੋ ਦੂਰੇ, ਯਸ੍ਮਿਂ ਨਾਵਿਸਤੇ [ਯਸ੍ਮਾ ਵਿਵਸਤੇ (ਸੀ. ਸ੍ਯਾ. ਪੀ.)] ਮਨੋ.
੩੫. ਅਨ੍ਤੋਪਿ ਸੋ ਹੋਤਿ ਪਸਨ੍ਨਚਿਤ੍ਤੋ, ਪਾਰਂ ਸਮੁਦ੍ਦਸ੍ਸ ਪਸਨ੍ਨਚਿਤ੍ਤੋ;
ਅਨ੍ਤੋਪਿ ਸੋ ਹੋਤਿ ਪਦੁਟ੍ਠਚਿਤ੍ਤੋ, ਪਾਰਂ ਸਮੁਦ੍ਦਸ੍ਸ ਪਦੁਟ੍ਠਚਿਤ੍ਤੋ.
੩੬. ਸਂਵਸਨ੍ਤਾ ਵਿਵਸਨ੍ਤਿ, ਯੇ ਦਿਸਾ ਤੇ ਰਥੇਸਭ;
ਆਰਾ ਸਨ੍ਤੋ ਸਂਵਸਨ੍ਤਿ, ਮਨਸਾ ਰਟ੍ਠਵਡ੍ਢਨ.
੩੭. ਅਤਿਚਿਰਂ ਨਿਵਾਸੇਨ, ਪਿਯੋ ਭਵਤਿ ਅਪ੍ਪਿਯੋ;
ਆਮਨ੍ਤ ਖੋ ਤਂ ਗਚ੍ਛਾਮ [ਗਚ੍ਛਾਮਿ (ਸ੍ਯਾ.)], ਪੁਰਾ ਤੇ ਹੋਮ ਅਪ੍ਪਿਯਾ [ਹੋਮਿ ਅਪ੍ਪਿਯੋ (ਸ੍ਯਾ.)].
੩੮. ਏਵਂ ਚੇ ਯਾਚਮਾਨਾਨਂ, ਅਞ੍ਜਲਿਂ ਨਾਵਬੁਜ੍ਝਸਿ;
ਪਰਿਚਾਰਕਾਨਂ ਸਤਂ [ਸਨ੍ਤਾਨਂ (ਸੀ. ਸ੍ਯਾ.), ਸਤ੍ਤਾਨਂ (ਪੀ.)], ਵਚਨਂ ਨ ਕਰੋਸਿ ਨੋ;
ਏਵਂ ਤਂ ਅਭਿਯਾਚਾਮ, ਪੁਨ ਕਯਿਰਾਸਿ ਪਰਿਯਾਯਂ.
੩੯. ਏਵਂ ਚੇ ਨੋ ਵਿਹਰਤਂ, ਅਨ੍ਤਰਾਯੋ ਨ ਹੇਸ੍ਸਤਿ;
ਤੁਯ੍ਹਞ੍ਚਾਪਿ [ਵਾਪਿ (ਸ੍ਯਾ. ਪੀ. ਕ.)] ਮਹਾਰਾਜ, ਮਯ੍ਹਞ੍ਚ [ਵਾ (ਬਹੂਸੁ)] ਰਟ੍ਠਵਡ੍ਢਨ;
ਅਪ੍ਪੇਵ ਨਾਮ ਪਸ੍ਸੇਮੁ [ਪਸ੍ਸੇਮ (ਸੀ. ਸ੍ਯਾ. ਪੀ.)], ਅਹੋਰਤਾਨਮਚ੍ਚਯੇਤਿ.
ਜਵਨਹਂਸਜਾਤਕਂ ਤਤਿਯਂ.
੪੭੭. ਚੂਲ਼ਨਾਰਦਜਾਤਕਂ (੪)
੪੦. ਨ ਤੇ ਕਟ੍ਠਾਨਿ ਭਿਨ੍ਨਾਨਿ, ਨ ਤੇ ਉਦਕਮਾਭਤਂ;
ਅਗ੍ਗੀਪਿ ਤੇ ਨ ਹਾਪਿਤੋ [ਹਾਸਿਤੋ (ਸੀ. ਸ੍ਯਾ.)], ਕਿਂ ਨੁ ਮਨ੍ਦੋਵ ਝਾਯਸਿ.
੪੧. ਨ ਉਸ੍ਸਹੇ ਵਨੇ ਵਤ੍ਥੁਂ, ਕਸ੍ਸਪਾਮਨ੍ਤਯਾਮਿ ਤਂ;
ਦੁਕ੍ਖੋ ਵਾਸੋ ਅਰਞ੍ਞਸ੍ਮਿਂ, ਰਟ੍ਠਂ ਇਚ੍ਛਾਮਿ ਗਨ੍ਤਵੇ.
੪੨. ਯਥਾ ਅਹਂ ਇਤੋ ਗਨ੍ਤ੍ਵਾ, ਯਸ੍ਮਿਂ ਜਨਪਦੇ ਵਸਂ;
ਆਚਾਰਂ ਬ੍ਰਹ੍ਮੇ [ਬ੍ਰਹ੍ਮਂ (ਕ.)] ਸਿਕ੍ਖੇਯ੍ਯਂ, ਤਂ ਧਮ੍ਮਂ ਅਨੁਸਾਸ ਮਂ.
੪੩. ਸਚੇ ਅਰਞ੍ਞਂ ਹਿਤ੍ਵਾਨ, ਵਨਮੂਲਫਲਾਨਿ ਚ;
ਰਟ੍ਠੇ ਰੋਚਯਸੇ ਵਾਸਂ, ਤਂ ਧਮ੍ਮਂ ਨਿਸਾਮੇਹਿ ਮੇ.
੪੪. ਵਿਸਂ ਮਾ ਪਟਿਸੇਵਿਤ੍ਥੋ [ਪਟਿਸੇਵਿਤ੍ਥ (ਸ੍ਯਾ. ਕ.)], ਪਪਾਤਂ ਪਰਿਵਜ੍ਜਯ;
ਪਙ੍ਕੇ ਚ ਮਾ ਵਿਸੀਦਿਤ੍ਥੋ [ਪਙ੍ਕੋ ਚ ਮਾ ਵਿਸਿਯਿਤ੍ਥੋ (ਕ.)], ਯਤ੍ਤੋ ਚਾਸੀਵਿਸੇ ਚਰੇ.
੪੫. ਕਿਂ ਨੁ ਵਿਸਂ ਪਪਾਤੋ ਵਾ, ਪਙ੍ਕੋ ਵਾ ਬ੍ਰਹ੍ਮਚਾਰਿਨਂ;
ਕਂ ਤ੍ਵਂ ਆਸੀਵਿਸਂ ਬ੍ਰੂਸਿ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ;
੪੬. ਆਸਵੋ ਤਾਤ ਲੋਕਸ੍ਮਿਂ, ਸੁਰਾ ਨਾਮ ਪਵੁਚ੍ਚਤਿ;
ਮਨੁਞ੍ਞੋ [ਮਨੁਞ੍ਞਾ (ਸੀ. ਸ੍ਯਾ. ਪੀ.)] ਸੁਰਭੀ ਵਗ੍ਗੁ, ਸਾਦੁ [ਮਧੁ (ਸੀ. ਸ੍ਯਾ.)] ਖੁਦ੍ਦਰਸੂਪਮੋ [ਰਸੂਪਮਾ (ਸੀ. ਸ੍ਯਾ. ਪੀ.)];
ਵਿਸਂ ਤਦਾਹੁ ਅਰਿਯਾ ਸੇ, ਬ੍ਰਹ੍ਮਚਰਿਯਸ੍ਸ ਨਾਰਦ.
੪੭. ਇਤ੍ਥਿਯੋ ਤਾਤ ਲੋਕਸ੍ਮਿਂ, ਪਮਤ੍ਤਂ ਪਮਥੇਨ੍ਤਿ ਤਾ;
ਹਰਨ੍ਤਿ ਯੁਵਿਨੋ ਚਿਤ੍ਤਂ, ਤੂਲਂ ਭਟ੍ਠਂਵ ਮਾਲੁਤੋ;
ਪਪਾਤੋ ਏਸੋ ਅਕ੍ਖਾਤੋ, ਬ੍ਰਹ੍ਮਚਰਿਯਸ੍ਸ ਨਾਰਦ.
੪੮. ਲਾਭੋ ਸਿਲੋਕੋ ਸਕ੍ਕਾਰੋ, ਪੂਜਾ ਪਰਕੁਲੇਸੁ ਚ;
ਪਙ੍ਕੋ ਏਸੋ ਚ [ਏਸੋਵ (ਸੀ. ਸ੍ਯਾ. ਪੀ.)] ਅਕ੍ਖਾਤੋ, ਬ੍ਰਹ੍ਮਚਰਿਯਸ੍ਸ ਨਾਰਦ.
੪੯. ਸਸਤ੍ਥਾ [ਮਹਨ੍ਤਾ (ਸ੍ਯਾ. ਕ.)] ਤਾਤ ਰਾਜਾਨੋ, ਆਵਸਨ੍ਤਿ ਮਹਿਂ ਇਮਂ;
ਤੇ ਤਾਦਿਸੇ ਮਨੁਸ੍ਸਿਨ੍ਦੇ, ਮਹਨ੍ਤੇ ਤਾਤ ਨਾਰਦ.
੫੦. ਇਸ੍ਸਰਾਨਂ ਅਧਿਪਤੀਨਂ, ਨ ਤੇਸਂ ਪਾਦਤੋ ਚਰੇ;
ਆਸੀਵਿਸੋਤਿ [ਆਸੀਵਿਸੋ ਸੋ (ਸੀ. ਪੀ.)] ਅਕ੍ਖਾਤੋ, ਬ੍ਰਹ੍ਮਚਰਿਯਸ੍ਸ ਨਾਰਦ.
੫੧. ਭਤ੍ਤਤ੍ਥੋ ਭਤ੍ਤਕਾਲੇ ਚ [ਯਂ (ਸੀ. ਪੀ.)], ਯਂ ਗੇਹਮੁਪਸਙ੍ਕਮੇ;
ਯਦੇਤ੍ਥ ਕੁਸਲਂ ਜਞ੍ਞਾ, ਤਤ੍ਥ ਘਾਸੇਸਨਂ ਚਰੇ.
੫੨. ਪਵਿਸਿਤ੍ਵਾ ਪਰਕੁਲਂ, ਪਾਨਤ੍ਥਂ [ਪਾਨਤ੍ਥੋ (ਸ੍ਯਾ. ਪੀ.)] ਭੋਜਨਾਯ ਵਾ;
ਮਿਤਂ ਖਾਦੇ ਮਿਤਂ ਭੁਞ੍ਜੇ, ਨ ਚ ਰੂਪੇ ਮਨਂ ਕਰੇ.
੫੩. ਗੋਟ੍ਠਂ ਮਜ੍ਜਂ ਕਿਰਾਟਞ੍ਚ [ਕਿਰਾਸਞ੍ਚ (ਸੀ. ਸ੍ਯਾ.), ਕਿਰਾਸਂ ਵਾ (ਪੀ.)], ਸਭਾ ਨਿਕਿਰਣਾਨਿ ਚ;
ਆਰਕਾ ਪਰਿਵਜ੍ਜੇਹਿ, ਯਾਨੀਵ ਵਿਸਮਂ ਪਥਨ੍ਤਿ.
ਚੂਲ਼ਨਾਰਦਜਾਤਕਂ ਚਤੁਤ੍ਥਂ.
੪੭੮. ਦੂਤਜਾਤਕਂ (੫)
੫੪. ਦੂਤੇ ਤੇ ਬ੍ਰਹ੍ਮੇ [ਦੂਤੇ ਬ੍ਰਾਹ੍ਮਣ (ਕ.)] ਪਾਹੇਸਿਂ, ਗਙ੍ਗਾਤੀਰਸ੍ਮਿ ਝਾਯਤੋ;
ਤੇਸਂ ਪੁਟ੍ਠੋ ਨ ਬ੍ਯਾਕਾਸਿ, ਦੁਕ੍ਖਂ ਗੁਯ੍ਹਮਤਂ [ਗੁਯ੍ਹਂ ਮਤਂ (ਸੀ.), ਤੁਯ੍ਹਂ ਮਤਂ (ਸ੍ਯਾ. ਕ.)] ਨੁ ਤੇ.
੫੫. ਸਚੇ ਤੇ ਦੁਕ੍ਖਮੁਪ੍ਪਜ੍ਜੇ, ਕਾਸੀਨਂ ਰਟ੍ਠਵਡ੍ਢਨ;
ਮਾ ਖੋ ਨਂ ਤਸ੍ਸ ਅਕ੍ਖਾਹਿ, ਯੋ ਤਂ ਦੁਕ੍ਖਾ ਨ ਮੋਚਯੇ.
੫੬. ਯੋ ਤਸ੍ਸ [ਯੋ ਚ ਤਥਾ (ਪੀ.)] ਦੁਕ੍ਖਜਾਤਸ੍ਸ, ਏਕਙ੍ਗਮਪਿ ਭਾਗਸੋ [ਏਕਨ੍ਤਮਪਿ ਭਾਸਤੋ (ਸੀ. ਪੀ.)];
ਵਿਪ੍ਪਮੋਚੇਯ੍ਯ ਧਮ੍ਮੇਨ, ਕਾਮਂ ਤਸ੍ਸ ਪਵੇਦਯ [ਪਵੇਦਯੇ (ਸੀ.)].
੫੭. ਸੁਵਿਜਾਨਂ ਸਿਙ੍ਗਾਲਾਨਂ, ਸਕੁਣਾਨਞ੍ਚ ਵਸ੍ਸਿਤਂ;
ਮਨੁਸ੍ਸਵਸ੍ਸਿਤਂ ਰਾਜ, ਦੁਬ੍ਬਿਜਾਨਤਰਂ ਤਤੋ.
੫੮. ਅਪਿ ਚੇ ਮਞ੍ਞਤੀ ਪੋਸੋ, ਞਾਤਿ ਮਿਤ੍ਤੋ ਸਖਾਤਿ ਵਾ;
ਯੋ ਪੁਬ੍ਬੇ ਸੁਮਨੋ ਹੁਤ੍ਵਾ, ਪਚ੍ਛਾ ਸਮ੍ਪਜ੍ਜਤੇ ਦਿਸੋ.
੫੯. ਯੋ ਅਤ੍ਤਨੋ ਦੁਕ੍ਖਮਨਾਨੁਪੁਟ੍ਠੋ, ਪਵੇਦਯੇ ਜਨ੍ਤੁ ਅਕਾਲਰੂਪੇ;
ਆਨਨ੍ਦਿਨੋ ਤਸ੍ਸ ਭਵਨ੍ਤਿਮਿਤ੍ਤਾ [ਭਵਨ੍ਤ’ਮਿਤ੍ਤਾ (ਸੀ. ਪੀ.)], ਹਿਤੇਸਿਨੋ ਤਸ੍ਸ ਦੁਖੀ ਭਵਨ੍ਤਿ.
੬੦. ਕਾਲਞ੍ਚ ਞਤ੍ਵਾਨ ਤਥਾਵਿਧਸ੍ਸ, ਮੇਧਾਵੀਨਂ ਏਕਮਨਂ ਵਿਦਿਤ੍ਵਾ;
ਅਕ੍ਖੇਯ੍ਯ ਤਿਬ੍ਬਾਨਿ [ਤਿਪ੍ਪਾਨਿ (ਸੀ. ਸ੍ਯਾ. ਪੀ.)] ਪਰਸ੍ਸ ਧੀਰੋ, ਸਣ੍ਹਂ ਗਿਰਂ ਅਤ੍ਥਵਤਿਂ ਪਮੁਞ੍ਚੇ.
੬੧. ਸਚੇ ਚ ਜਞ੍ਞਾ ਅਵਿਸਯ੍ਹਮਤ੍ਤਨੋ, ਨ ਤੇ ਹਿ ਮਯ੍ਹਂ [ਨਾਯਂ ਨੀਤਿ ਮਯ੍ਹ (ਸੀ. ਪੀ.)] ਸੁਖਾਗਮਾਯ;
ਏਕੋਵ ਤਿਬ੍ਬਾਨਿ ਸਹੇਯ੍ਯ ਧੀਰੋ, ਸਚ੍ਚਂ ਹਿਰੋਤ੍ਤਪ੍ਪਮਪੇਕ੍ਖਮਾਨੋ.
੬੨. ਅਹਂ ਰਟ੍ਠਾਨਿ ਵਿਚਰਨ੍ਤੋ, ਨਿਗਮੇ ਰਾਜਧਾਨਿਯੋ;
ਭਿਕ੍ਖਮਾਨੋ ਮਹਾਰਾਜ, ਆਚਰਿਯਸ੍ਸ ਧਨਤ੍ਥਿਕੋ.
੬੩. ਗਹਪਤੀ ਰਾਜਪੁਰਿਸੇ, ਮਹਾਸਾਲੇ ਚ ਬ੍ਰਾਹ੍ਮਣੇ;
ਅਲਤ੍ਥਂ ਸਤ੍ਤ ਨਿਕ੍ਖਾਨਿ, ਸੁਵਣ੍ਣਸ੍ਸ ਜਨਾਧਿਪ;
ਤੇ ਮੇ ਨਟ੍ਠਾ ਮਹਾਰਾਜ, ਤਸ੍ਮਾ ਸੋਚਾਮਹਂ ਭੁਸਂ.
੬੪. ਪੁਰਿਸਾ ਤੇ ਮਹਾਰਾਜ, ਮਨਸਾਨੁਵਿਚਿਨ੍ਤਿਤਾ;
ਨਾਲਂ ਦੁਕ੍ਖਾ ਪਮੋਚੇਤੁਂ, ਤਸ੍ਮਾ ਤੇਸਂ ਨ ਬ੍ਯਾਹਰਿਂ.
੬੫. ਤ੍ਵਞ੍ਚ ਖੋ ਮੇ ਮਹਾਰਾਜ, ਮਨਸਾਨੁਵਿਚਿਨ੍ਤਿਤੋ;
ਅਲਂ ਦੁਕ੍ਖਾ ਪਮੋਚੇਤੁਂ, ਤਸ੍ਮਾ ਤੁਯ੍ਹਂ ਪਵੇਦਯਿਂ.
੬੬. ਤਸ੍ਸਾਦਾਸਿ ਪਸਨ੍ਨਤ੍ਤੋ, ਕਾਸੀਨਂ ਰਟ੍ਠਵਡ੍ਢਨੋ;
ਜਾਤਰੂਪਮਯੇ ਨਿਕ੍ਖੇ, ਸੁਵਣ੍ਣਸ੍ਸ ਚਤੁਦ੍ਦਸਾਤਿ.
ਦੂਤਜਾਤਕਂ ਪਞ੍ਚਮਂ.