੪੮੨. ਰੁਰੁਮਿਗਰਾਜਜਾਤਕਂ (੯)

੧੧੭. ਤਸ੍ਸ [ਕਸ੍ਸ (ਸੀ. ਪੀ.)] ਗਾਮਵਰਂ ਦਮ੍ਮਿ, ਨਾਰਿਯੋ ਚ ਅਲਙ੍ਕਤਾ;

ਯੋ [ਕੋ (ਸੀ. ਸ੍ਯਾ. ਪੀ.)] ਮੇਤਂ ਮਿਗਮਕ੍ਖਾਤਿ [ਮਕ੍ਖਾਸਿ (ਸ੍ਯਾ. ਕ.)], ਮਿਗਾਨਂ ਮਿਗਮੁਤ੍ਤਮਂ.

੧੧੮. ਮਯ੍ਹਂ ਗਾਮਵਰਂ ਦੇਹਿ, ਨਾਰਿਯੋ ਚ ਅਲਙ੍ਕਤਾ;

ਅਹਂ ਤੇ ਮਿਗਮਕ੍ਖਿਸ੍ਸਂ, ਮਿਗਾਨਂ ਮਿਗਮੁਤ੍ਤਮਂ.

੧੧੯. ਏਤਸ੍ਮਿਂ ਵਨਸਣ੍ਡਸ੍ਮਿਂ, ਅਮ੍ਬਾ ਸਾਲਾ ਚ ਪੁਪ੍ਫਿਤਾ;

ਇਨ੍ਦਗੋਪਕਸਞ੍ਛਨ੍ਨਾ, ਏਤ੍ਥੇਸੋ ਤਿਟ੍ਠਤੇ ਮਿਗੋ.

੧੨੦. ਧਨੁਂ ਅਦ੍ਵੇਜ੍ਝਂ [ਅਦੇਜ੍ਝਂ (ਸੀ. ਪੀ.), ਸਰਜ੍ਜਂ (ਕ.)] ਕਤ੍ਵਾਨ, ਉਸੁਂ ਸਨ੍ਨਯ੍ਹੁਪਾਗਮਿ [ਸਨ੍ਧਾਯੁਪਾਗਮਿ (ਸੀ. ਪੀ.)];

ਮਿਗੋ ਚ ਦਿਸ੍ਵਾ ਰਾਜਾਨਂ, ਦੂਰਤੋ ਅਜ੍ਝਭਾਸਥ.

੧੨੧. ਆਗਮੇਹਿ ਮਹਾਰਾਜ, ਮਾ ਮਂ ਵਿਜ੍ਝਿ ਰਥੇਸਭ;

ਕੋ ਨੁ ਤੇ ਇਦਮਕ੍ਖਾਸਿ, ਏਤ੍ਥੇਸੋ ਤਿਟ੍ਠਤੇ ਮਿਗੋ.

੧੨੨. ਏਸ ਪਾਪਚਰੋ ਪੋਸੋ, ਸਮ੍ਮ ਤਿਟ੍ਠਤਿ ਆਰਕਾ;

ਸੋਯਂ [ਸੋ ਹਿ (ਸੀ. ਸ੍ਯਾ. ਪੀ.)] ਮੇ ਇਦਮਕ੍ਖਾਸਿ, ਏਤ੍ਥੇਸੋ ਤਿਟ੍ਠਤੇ ਮਿਗੋ.

੧੨੩. ਸਚ੍ਚਂ ਕਿਰੇਵ ਮਾਹਂਸੁ, ਨਰਾ ਏਕਚ੍ਚਿਯਾ ਇਧ;

ਕਟ੍ਠਂ ਨਿਪ੍ਲਵਿਤਂ ਸੇਯ੍ਯੋ, ਨ ਤ੍ਵੇਵੇਕਚ੍ਚਿ ਯੋ ਨਰੋ.

੧੨੪. ਕਿਂ ਨੁ ਰੁਰੁ ਗਰਹਸਿ ਮਿਗਾਨਂ, ਕਿਂ ਪਕ੍ਖੀਨਂ ਕਿਂ ਪਨ ਮਾਨੁਸਾਨਂ;

ਭਯਞ੍ਹਿ ਮਂ ਵਿਨ੍ਦਤਿਨਪ੍ਪਰੂਪਂ, ਸੁਤ੍ਵਾਨ ਤਂ ਮਾਨੁਸਿਂ ਭਾਸਮਾਨਂ.

੧੨੫. ਯਮੁਦ੍ਧਰਿਂ ਵਾਹਨੇ ਵੁਯ੍ਹਮਾਨਂ, ਮਹੋਦਕੇ ਸਲਿਲੇ ਸੀਘਸੋਤੇ;

ਤਤੋਨਿਦਾਨਂ ਭਯਮਾਗਤਂ ਮਮ, ਦੁਕ੍ਖੋ ਹਵੇ ਰਾਜ ਅਸਬ੍ਭਿ ਸਙ੍ਗਮੋ.

੧੨੬. ਸੋਹਂ ਚਤੁਪ੍ਪਤ੍ਤਮਿਮਂ ਵਿਹਙ੍ਗਮਂ, ਤਨੁਚ੍ਛਿਦਂ ਹਦਯੇ ਓਸ੍ਸਜਾਮਿ;

ਹਨਾਮਿ ਤਂ ਮਿਤ੍ਤਦੁਬ੍ਭਿਂ ਅਕਿਚ੍ਚਕਾਰਿਂ [ਹਨਾਮਿ ਮਿਤ੍ਤਦ੍ਦੁ’ਮਕਿਚ੍ਚਕਾਰਿਂ (ਸੀ. ਪੀ.)], ਯੋ ਤਾਦਿਸਂ ਕਮ੍ਮਕਤਂ ਨ ਜਾਨੇ.

੧੨੭. ਧੀਰਸ੍ਸ ਬਾਲਸ੍ਸ ਹਵੇ ਜਨਿਨ੍ਦ, ਸਨ੍ਤੋ ਵਧਂ ਨਪ੍ਪਸਂਸਨ੍ਤਿ ਜਾਤੁ;

ਕਾਮਂ ਘਰਂ ਗਚ੍ਛਤੁ ਪਾਪਧਮ੍ਮੋ, ਯਞ੍ਚਸ੍ਸ ਭਟ੍ਠਂ ਤਦੇਤਸ੍ਸ ਦੇਹਿ;

ਅਹਞ੍ਚ ਤੇ ਕਾਮਕਰੋ ਭਵਾਮਿ.

੧੨੮. ਅਦ੍ਧਾ ਰੁਰੁ ਅਞ੍ਞਤਰੋ ਸਤਂ ਸੋ [ਸਤਂ’ਸੇ (ਸੀ.)], ਯੋ ਦੁਬ੍ਭਤੋ [ਦੁਬ੍ਭਿਨੋ (ਸ੍ਯਾ.), ਦੂਭਤੋ (ਪੀ.)] ਮਾਨੁਸਸ੍ਸ ਨ ਦੁਬ੍ਭਿ;

ਕਾਮਂ ਘਰਂ ਗਚ੍ਛਤੁ ਪਾਪਧਮ੍ਮੋ, ਯਞ੍ਚਸ੍ਸ ਭਟ੍ਠਂ ਤਦੇਤਸ੍ਸ ਦਮ੍ਮਿ;

ਅਹਞ੍ਚ ਤੇ ਕਾਮਚਾਰਂ ਦਦਾਮਿ.

੧੨੯. ਸੁਵਿਜਾਨਂ ਸਿਙ੍ਗਾਲਾਨਂ, ਸਕੁਣਾਨਞ੍ਚਵਸ੍ਸਿਤਂ;

ਮਨੁਸ੍ਸਵਸ੍ਸਿਤਂ ਰਾਜ, ਦੁਬ੍ਬਿਜਾਨਤਰਂ ਤਤੋ.

੧੩੦. ਅਪਿ ਚੇ ਮਞ੍ਞਤੀ ਪੋਸੋ, ਞਾਤਿ ਮਿਤ੍ਤੋ ਸਖਾਤਿ ਵਾ;

ਯੋ ਪੁਬ੍ਬੇ ਸੁਮਨੋ ਹੁਤ੍ਵਾ, ਪਚ੍ਛਾ ਸਮ੍ਪਜ੍ਜਤੇ ਦਿਸੋ.

੧੩੧. ਸਮਾਗਤਾ ਜਾਨਪਦਾ, ਨੇਗਮਾ ਚ ਸਮਾਗਤਾ;

ਮਿਗਾ ਸਸ੍ਸਾਨਿ ਖਾਦਨ੍ਤਿ, ਤਂ ਦੇਵੋ ਪਟਿਸੇਧਤੁ.

੧੩੨. ਕਾਮਂ ਜਨਪਦੋ ਮਾਸਿ, ਰਟ੍ਠਞ੍ਚਾਪਿ ਵਿਨਸ੍ਸਤੁ;

ਨ ਤ੍ਵੇਵਾਹਂ ਰੁਰੁਂ ਦੁਬ੍ਭੇ, ਦਤ੍ਵਾ ਅਭਯਦਕ੍ਖਿਣਂ.

੧੩੩. ਮਾ ਮੇ ਜਨਪਦੋ ਆਸਿ [ਮਾ ਮਂ ਜਨਪਦੋ ਅਹੁ (ਸ੍ਯਾ.)], ਰਟ੍ਠਞ੍ਚਾਪਿ ਵਿਨਸ੍ਸਤੁ;

ਨ ਤ੍ਵੇਵਾਹਂ [ਨ ਤ੍ਵੇਵ (ਕ. ਸੀ. ਕ.)] ਮਿਗਰਾਜਸ੍ਸ, ਵਰਂ ਦਤ੍ਵਾ ਮੁਸਾ ਭਣੇਤਿ.

ਰੁਰੁਮਿਗਰਾਜਜਾਤਕਂ ਨਵਮਂ.