੪੮੧. ਤਕ੍ਕਾਰਿਯਜਾਤਕਂ (੮)

੧੦੪. ਅਹਮੇਵ ਦੁਬ੍ਭਾਸਿਤਂ ਭਾਸਿ ਬਾਲੋ, ਭੇਕੋਵਰਞ੍ਞੇ ਅਹਿਮਵ੍ਹਾਯਮਾਨੋ [ਮਵ੍ਹਯਾਨੋ (ਸੀ. ਪੀ.)];

ਤਕ੍ਕਾਰਿਯੇ ਸੋਬ੍ਭਮਿਮਂ [ਸੋਬ੍ਭਮ੍ਹਿ ਅਹਂ (ਕ.)] ਪਤਾਮਿ, ਨ ਕਿਰੇਵ ਸਾਧੁ ਅਤਿਵੇਲਭਾਣੀ [ਸਾਧੂਤ੍ਯਤਿਵੇਲਭਾਣੀ (ਕ.)].

੧੦੫. ਪਪ੍ਪੋਤਿ ਮਚ੍ਚੋ ਅਤਿਵੇਲਭਾਣੀ, ਬਨ੍ਧਂ ਵਧਂ ਸੋਕਪਰਿਦ੍ਦਵਞ੍ਚ;

ਅਤ੍ਤਾਨਮੇਵ ਗਰਹਾਸਿ ਏਤ੍ਥ, ਆਚੇਰ ਯਂ ਤਂ ਨਿਖਣਨ੍ਤਿ ਸੋਬ੍ਭੇ.

੧੦੬. ਕਿਮੇਵਹਂ ਤੁਣ੍ਡਿਲਮਨੁਪੁਚ੍ਛਿਂ, ਕਰੇਯ੍ਯ ਸਂ [ਕਰੇਯ੍ਯਾਸਂ (ਸ੍ਯਾ.), ਕਰੇਯ੍ਯ ਸ (ਕ.), ਭਰੇਯ੍ਯ ਸਂ (?)] ਭਾਤਰਂ ਕਾਲ਼ਿਕਾਯਂ [ਕਾਲ਼ਿਕਾਯ (ਸ੍ਯਾ. ਕ.)];

ਨਗ੍ਗੋਵਹਂ [ਨਗ੍ਗੋਚ’ਹਂ (?)] ਵਤ੍ਥਯੁਗਞ੍ਚ ਜੀਨੋ, ਅਯਮ੍ਪਿ ਅਤ੍ਥੋ ਬਹੁਤਾਦਿਸੋਵ.

੧੦੭. ਯੋ ਯੁਜ੍ਝਮਾਨਾਨਮਯੁਜ੍ਝਮਾਨੋ [ਯੁਜ੍ਝਮਾਨੇਨ ਅਯੁਜ੍ਝਮਾਨੋ (ਕ.)], ਮੇਣ੍ਡਨ੍ਤਰਂ ਅਚ੍ਚੁਪਤੀ ਕੁਲਿਙ੍ਗੋ;

ਸੋ ਪਿਂਸਿਤੋ ਮੇਣ੍ਡਸਿਰੇਹਿ ਤਤ੍ਥ, ਅਯਮ੍ਪਿ ਅਤ੍ਥੋ ਬਹੁਤਾਦਿਸੋਵ.

੧੦੮. ਚਤੁਰੋ ਜਨਾ ਪੋਤ੍ਥਕਮਗ੍ਗਹੇਸੁਂ, ਏਕਞ੍ਚ ਪੋਸਂ ਅਨੁਰਕ੍ਖਮਾਨਾ;

ਸਬ੍ਬੇਵ ਤੇ ਭਿਨ੍ਨਸਿਰਾ ਸਯਿਂਸੁ, ਅਯਮ੍ਪਿ ਅਤ੍ਥੋ ਬਹੁਤਾਦਿਸੋਵ.

੧੦੯. ਅਜਾ ਯਥਾ ਵੇਲ਼ੁਗੁਮ੍ਬਸ੍ਮਿਂ ਬਦ੍ਧਾ [ਬਨ੍ਧਂ (ਸ੍ਯਾ. ਕ.)], ਅਵਕ੍ਖਿਪਨ੍ਤੀ ਅਸਿਮਜ੍ਝਗਚ੍ਛਿ;

ਤੇਨੇਵ ਤਸ੍ਸਾ ਗਲਕਾਵਕਨ੍ਤਂ [ਗਲਯਾ ਵਿਕਨ੍ਤੁਂ (ਕ.), ਗਲਕਂ ਵਿਕਨ੍ਤਾ (ਸ੍ਯਾ.)], ਅਯਮ੍ਪਿ ਅਤ੍ਥੋ ਬਹੁਤਾਦਿਸੋਵ.

੧੧੦. ਇਮੇ ਨ ਦੇਵਾ ਨ ਗਨ੍ਧਬ੍ਬਪੁਤ੍ਤਾ, ਮਿਗਾ ਇਮੇ ਅਤ੍ਥਵਸਂ ਗਤਾ ਮੇ [ਅਤ੍ਥਵਸਾਭਤਾ ਇਮੇ (ਸੀ. ਸ੍ਯਾ. ਪੀ.)];

ਏਕਞ੍ਚ ਨਂ ਸਾਯਮਾਸੇ ਪਚਨ੍ਤੁ, ਏਕਂ ਪੁਨਪ੍ਪਾਤਰਾਸੇ [ਏਕਞ੍ਚ ਨਂ ਪਾਤਰਾਸੇ (ਕ. ਸੀ. ਪੀ.)] ਪਚਨ੍ਤੁ.

੧੧੧. ਸਤਂ ਸਹਸ੍ਸਾਨਿ ਦੁਭਾਸਿਤਾਨਿ, ਕਲਮ੍ਪਿ ਨਾਗ੍ਘਨ੍ਤਿ ਸੁਭਾਸਿਤਸ੍ਸ;

ਦੁਬ੍ਭਾਸਿਤਂ ਸਙ੍ਕਮਾਨੋ ਕਿਲੇਸੋ [ਕਿਲਿਸ੍ਸਤਿ (?)], ਤਸ੍ਮਾ ਤੁਣ੍ਹੀ ਕਿਮ੍ਪੁਰਿਸਾ [ਕਿਂਪੁਰਿਸੋ (ਸੀ. ਸ੍ਯਾ.)] ਨ ਬਾਲ੍ਯਾ.

੧੧੨. ਯਾ ਮੇਸਾ ਬ੍ਯਾਹਾਸਿ [ਬ੍ਯਾਕਾਸਿ (ਸੀ. ਸ੍ਯਾ. ਪੀ.)] ਪਮੁਞ੍ਚਥੇਤਂ, ਗਿਰਿਞ੍ਚ ਨਂ [ਗਿਰਿਂ ਵਰਂ (ਕ.)] ਹਿਮਵਨ੍ਤਂ ਨਯਨ੍ਤੁ;

ਇਮਞ੍ਚ ਖੋ ਦੇਨ੍ਤੁ ਮਹਾਨਸਾਯ, ਪਾਤੋਵ ਨਂ ਪਾਤਰਾਸੇ ਪਚਨ੍ਤੁ.

੧੧੩. ਪਜ੍ਜੁਨ੍ਨਨਾਥਾ ਪਸਵੋ, ਪਸੁਨਾਥਾ ਅਯਂ ਪਜਾ;

ਤ੍ਵਂ ਨਾਥੋਸਿ [ਤ੍ਵਂ-ਨਾਥੋ’ਸ੍ਮਿ (ਸੀ. ਸ੍ਯਾ. ਪੀ.)] ਮਹਾਰਾਜ, ਨਾਥੋਹਂ ਭਰਿਯਾਯ ਮੇ [ਅਮ੍ਹ-ਨਾਥਾ ਮਮ ਭਰਿਯਾ (ਕ. ਸੀ. ਸ੍ਯਾ.)];

ਦ੍ਵਿਨ੍ਨਮਞ੍ਞਤਰਂ ਞਤ੍ਵਾ, ਮੁਤ੍ਤੋ ਗਚ੍ਛੇਯ੍ਯ ਪਬ੍ਬਤਂ.

੧੧੪. ਨ ਵੇ ਨਿਨ੍ਦਾ ਸੁਪਰਿਵਜ੍ਜਯੇਥ [ਸੁਪਰਿਵਜ੍ਜਯਾਥ (ਸ੍ਯਾ.)], ਨਾਨਾ ਜਨਾ ਸੇਵਿਤਬ੍ਬਾ ਜਨਿਨ੍ਦ;

ਯੇਨੇਵ ਏਕੋ ਲਭਤੇ ਪਸਂਸਂ, ਤੇਨੇਵ ਅਞ੍ਞੋ ਲਭਤੇ ਨਿਨ੍ਦਿਤਾਰਂ.

੧੧੫. ਸਬ੍ਬੋ ਲੋਕੋ ਪਰਿਚਿਤ੍ਤੋ ਅਤਿਚਿਤ੍ਤੋ [ਪਰਚਿਤ੍ਤੇਨ ਅਤਿਚਿਤ੍ਤੋ (ਸੀ. ਸ੍ਯਾ.), ਪਰਚਿਤ੍ਤੇਨ ਅਚਿਤ੍ਤੋ (ਸੀ. ਅਟ੍ਠ.)], ਸਬ੍ਬੋ ਲੋਕੋ ਚਿਤ੍ਤਵਾ ਸਮ੍ਹਿ ਚਿਤ੍ਤੇ;

ਪਚ੍ਚੇਕਚਿਤ੍ਤਾ ਪੁਥੁ ਸਬ੍ਬਸਤ੍ਤਾ, ਕਸ੍ਸੀਧ ਚਿਤ੍ਤਸ੍ਸ ਵਸੇ ਨ ਵਤ੍ਤੇ.

੧੧੬. ਤੁਣ੍ਹੀ ਅਹੂ ਕਿਮ੍ਪੁਰਿਸੋ ਸਭਰਿਯੋ [ਅਭਾਣੀ (ਕ.)], ਯੋ ਦਾਨਿ ਬ੍ਯਾਹਾਸਿ ਭਯਸ੍ਸ ਭੀਤੋ;

ਸੋ ਦਾਨਿ ਮੁਤ੍ਤੋ ਸੁਖਿਤੋ ਅਰੋਗੋ, ਵਾਚਾਕਿਰੇਵਤ੍ਤਵਤੀ ਨਰਾਨਨ੍ਤਿ.

ਤਕ੍ਕਾਰਿਯਜਾਤਕਂ ਅਟ੍ਠਮਂ.