੪੭੮. ਦੂਤਜਾਤਕਂ (੫)

੫੪. ਦੂਤੇ ਤੇ ਬ੍ਰਹ੍ਮੇ [ਦੂਤੇ ਬ੍ਰਾਹ੍ਮਣ (ਕ.)] ਪਾਹੇਸਿਂ, ਗਙ੍ਗਾਤੀਰਸ੍ਮਿ ਝਾਯਤੋ;

ਤੇਸਂ ਪੁਟ੍ਠੋ ਨ ਬ੍ਯਾਕਾਸਿ, ਦੁਕ੍ਖਂ ਗੁਯ੍ਹਮਤਂ [ਗੁਯ੍ਹਂ ਮਤਂ (ਸੀ.), ਤੁਯ੍ਹਂ ਮਤਂ (ਸ੍ਯਾ. ਕ.)] ਨੁ ਤੇ.

੫੫. ਸਚੇ ਤੇ ਦੁਕ੍ਖਮੁਪ੍ਪਜ੍ਜੇ, ਕਾਸੀਨਂ ਰਟ੍ਠਵਡ੍ਢਨ;

ਮਾ ਖੋ ਨਂ ਤਸ੍ਸ ਅਕ੍ਖਾਹਿ, ਯੋ ਤਂ ਦੁਕ੍ਖਾ ਨ ਮੋਚਯੇ.

੫੬. ਯੋ ਤਸ੍ਸ [ਯੋ ਚ ਤਥਾ (ਪੀ.)] ਦੁਕ੍ਖਜਾਤਸ੍ਸ, ਏਕਙ੍ਗਮਪਿ ਭਾਗਸੋ [ਏਕਨ੍ਤਮਪਿ ਭਾਸਤੋ (ਸੀ. ਪੀ.)];

ਵਿਪ੍ਪਮੋਚੇਯ੍ਯ ਧਮ੍ਮੇਨ, ਕਾਮਂ ਤਸ੍ਸ ਪਵੇਦਯ [ਪਵੇਦਯੇ (ਸੀ.)].

੫੭. ਸੁਵਿਜਾਨਂ ਸਿਙ੍ਗਾਲਾਨਂ, ਸਕੁਣਾਨਞ੍ਚ ਵਸ੍ਸਿਤਂ;

ਮਨੁਸ੍ਸਵਸ੍ਸਿਤਂ ਰਾਜ, ਦੁਬ੍ਬਿਜਾਨਤਰਂ ਤਤੋ.

੫੮. ਅਪਿ ਚੇ ਮਞ੍ਞਤੀ ਪੋਸੋ, ਞਾਤਿ ਮਿਤ੍ਤੋ ਸਖਾਤਿ ਵਾ;

ਯੋ ਪੁਬ੍ਬੇ ਸੁਮਨੋ ਹੁਤ੍ਵਾ, ਪਚ੍ਛਾ ਸਮ੍ਪਜ੍ਜਤੇ ਦਿਸੋ.

੫੯. ਯੋ ਅਤ੍ਤਨੋ ਦੁਕ੍ਖਮਨਾਨੁਪੁਟ੍ਠੋ, ਪਵੇਦਯੇ ਜਨ੍ਤੁ ਅਕਾਲਰੂਪੇ;

ਆਨਨ੍ਦਿਨੋ ਤਸ੍ਸ ਭਵਨ੍ਤਿਮਿਤ੍ਤਾ [ਭਵਨ੍ਤ’ਮਿਤ੍ਤਾ (ਸੀ. ਪੀ.)], ਹਿਤੇਸਿਨੋ ਤਸ੍ਸ ਦੁਖੀ ਭਵਨ੍ਤਿ.

੬੦. ਕਾਲਞ੍ਚ ਞਤ੍ਵਾਨ ਤਥਾਵਿਧਸ੍ਸ, ਮੇਧਾਵੀਨਂ ਏਕਮਨਂ ਵਿਦਿਤ੍ਵਾ;

ਅਕ੍ਖੇਯ੍ਯ ਤਿਬ੍ਬਾਨਿ [ਤਿਪ੍ਪਾਨਿ (ਸੀ. ਸ੍ਯਾ. ਪੀ.)] ਪਰਸ੍ਸ ਧੀਰੋ, ਸਣ੍ਹਂ ਗਿਰਂ ਅਤ੍ਥਵਤਿਂ ਪਮੁਞ੍ਚੇ.

੬੧. ਸਚੇ ਚ ਜਞ੍ਞਾ ਅਵਿਸਯ੍ਹਮਤ੍ਤਨੋ, ਨ ਤੇ ਹਿ ਮਯ੍ਹਂ [ਨਾਯਂ ਨੀਤਿ ਮਯ੍ਹ (ਸੀ. ਪੀ.)] ਸੁਖਾਗਮਾਯ;

ਏਕੋਵ ਤਿਬ੍ਬਾਨਿ ਸਹੇਯ੍ਯ ਧੀਰੋ, ਸਚ੍ਚਂ ਹਿਰੋਤ੍ਤਪ੍ਪਮਪੇਕ੍ਖਮਾਨੋ.

੬੨. ਅਹਂ ਰਟ੍ਠਾਨਿ ਵਿਚਰਨ੍ਤੋ, ਨਿਗਮੇ ਰਾਜਧਾਨਿਯੋ;

ਭਿਕ੍ਖਮਾਨੋ ਮਹਾਰਾਜ, ਆਚਰਿਯਸ੍ਸ ਧਨਤ੍ਥਿਕੋ.

੬੩. ਗਹਪਤੀ ਰਾਜਪੁਰਿਸੇ, ਮਹਾਸਾਲੇ ਚ ਬ੍ਰਾਹ੍ਮਣੇ;

ਅਲਤ੍ਥਂ ਸਤ੍ਤ ਨਿਕ੍ਖਾਨਿ, ਸੁਵਣ੍ਣਸ੍ਸ ਜਨਾਧਿਪ;

ਤੇ ਮੇ ਨਟ੍ਠਾ ਮਹਾਰਾਜ, ਤਸ੍ਮਾ ਸੋਚਾਮਹਂ ਭੁਸਂ.

੬੪. ਪੁਰਿਸਾ ਤੇ ਮਹਾਰਾਜ, ਮਨਸਾਨੁਵਿਚਿਨ੍ਤਿਤਾ;

ਨਾਲਂ ਦੁਕ੍ਖਾ ਪਮੋਚੇਤੁਂ, ਤਸ੍ਮਾ ਤੇਸਂ ਨ ਬ੍ਯਾਹਰਿਂ.

੬੫. ਤ੍ਵਞ੍ਚ ਖੋ ਮੇ ਮਹਾਰਾਜ, ਮਨਸਾਨੁਵਿਚਿਨ੍ਤਿਤੋ;

ਅਲਂ ਦੁਕ੍ਖਾ ਪਮੋਚੇਤੁਂ, ਤਸ੍ਮਾ ਤੁਯ੍ਹਂ ਪਵੇਦਯਿਂ.

੬੬. ਤਸ੍ਸਾਦਾਸਿ ਪਸਨ੍ਨਤ੍ਤੋ, ਕਾਸੀਨਂ ਰਟ੍ਠਵਡ੍ਢਨੋ;

ਜਾਤਰੂਪਮਯੇ ਨਿਕ੍ਖੇ, ਸੁਵਣ੍ਣਸ੍ਸ ਚਤੁਦ੍ਦਸਾਤਿ.

ਦੂਤਜਾਤਕਂ ਪਞ੍ਚਮਂ.