੪੭੯. ਕਾਲਿਙ੍ਗਬੋਧਿਜਾਤਕਂ (੬)

੬੭. ਰਾਜਾ ਕਾਲਿਙ੍ਗੋ ਚਕ੍ਕਵਤ੍ਤਿ, ਧਮ੍ਮੇਨ ਪਥਵਿਮਨੁਸਾਸਂ [ਮਨੁਸਾਸਿ (ਸ੍ਯਾ. ਕ.)];

ਅਗਮਾ [ਅਗਮਾਸਿ (ਸ੍ਯਾ. ਕ.)] ਬੋਧਿਸਮੀਪਂ, ਨਾਗੇਨ ਮਹਾਨੁਭਾਵੇਨ.

੬੮. ਕਾਲਿਙ੍ਗੋ ਭਾਰਦ੍ਵਾਜੋ ਚ, ਰਾਜਾਨਂ ਕਾਲਿਙ੍ਗਂ ਸਮਣਕੋਲਞ੍ਞਂ;

ਚਕ੍ਕਂ ਵਤ੍ਤਯਤੋ ਪਰਿਗ੍ਗਹੇਤ੍ਵਾ [ਪਰਿਣੇਤ੍ਵਾ (ਪੀ.)], ਪਞ੍ਜਲੀ ਇਦਮਵੋਚ.

੬੯. ਪਚ੍ਚੋਰੋਹ ਮਹਾਰਾਜ, ਭੂਮਿਭਾਗੋ ਯਥਾ ਸਮਣੁਗ੍ਗਤੋ [ਸਮਨੁਗੀਤੋ (ਸੀ. ਸ੍ਯਾ. ਪੀ.)];

ਇਧ ਅਨਧਿਵਰਾ ਬੁਦ੍ਧਾ, ਅਭਿਸਮ੍ਬੁਦ੍ਧਾ ਵਿਰੋਚਨ੍ਤਿ.

੭੦. ਪਦਕ੍ਖਿਣਤੋ ਆਵਟ੍ਟਾ, ਤਿਣਲਤਾ ਅਸ੍ਮਿਂ ਭੂਮਿਭਾਗਸ੍ਮਿਂ;

ਪਥਵਿਯਾ ਨਾਭਿਯਂ [ਪੁਥੁਵਿਯਾ ਅਯਂ (ਸੀ.), ਪਠਵਿਯਾ ਅਯਂ (ਸ੍ਯਾ.), ਪੁਥਵਿਯਾ’ਯਂ (ਪੀ.)] ਮਣ੍ਡੋ, ਇਤਿ ਨੋ ਸੁਤਂ ਮਨ੍ਤੇ ਮਹਾਰਾਜ [ਸੁਤਂ ਮਹਾਰਾਜ (ਸੀ. ਸ੍ਯਾ. ਪੀ.)].

੭੧. ਸਾਗਰਪਰਿਯਨ੍ਤਾਯ, ਮੇਦਿਨਿਯਾ ਸਬ੍ਬਭੂਤਧਰਣਿਯਾ;

ਪਥਵਿਯਾ ਅਯਂ ਮਣ੍ਡੋ, ਓਰੋਹਿਤ੍ਵਾ ਨਮੋ ਕਰੋਹਿ.

੭੨. ਯੇ ਤੇ ਭਵਨ੍ਤਿ ਨਾਗਾ ਚ, ਅਭਿਜਾਤਾ ਚ ਕੁਞ੍ਜਰਾ;

ਏਤ੍ਤਾਵਤਾ ਪਦੇਸਂ ਤੇ, ਨਾਗਾ ਨੇਵ ਮੁਪਯਨ੍ਤਿ.

੭੩. ਅਭਿਜਾਤੋ ਨਾਗੋ [ਅਭਿਜਾਤੋ ਤੇ ਨਾਗੋ (ਸੀ. ਪੀ. ਅਟ੍ਠ.)] ਕਾਮਂ, ਪੇਸੇਹਿ ਕੁਞ੍ਜਰਂ ਦਨ੍ਤਿਂ;

ਏਤ੍ਤਾਵਤਾ ਪਦੇਸੋ [ਪਦੇਸੋ ਚ (ਸ੍ਯਾ. ਕ.)], ਸਕ੍ਕਾ [ਨ ਸਕ੍ਕਾ (ਸ੍ਯਾ.)] ਨਾਗੇਨ ਮੁਪਗਨ੍ਤੁਂ.

੭੪. ਤਂ ਸੁਤ੍ਵਾ ਰਾਜਾ ਕਾਲਿਙ੍ਗੋ, ਵੇਯ੍ਯਞ੍ਜਨਿਕਵਚੋ ਨਿਸਾਮੇਤ੍ਵਾ;

ਸਮ੍ਪੇਸੇਸਿ ਨਾਗਂ ਞਸ੍ਸਾਮ, ਮਯਂ ਯਥਿਮਸ੍ਸਿਦਂ [ਯਥਾ ਇਦਂ (ਸੀ. ਸ੍ਯਾ. ਪੀ.)] ਵਚਨਂ.

੭੫. ਸਮ੍ਪੇਸਿਤੋ ਚ ਰਞ੍ਞਾ, ਨਾਗੋ ਕੋਞ੍ਚੋਵ ਅਭਿਨਦਿਤ੍ਵਾਨ;

ਪਟਿਸਕ੍ਕਿਤ੍ਵਾ [ਪਟਿਓਸਕ੍ਕਿਤ੍ਵਾ (ਕ.)] ਨਿਸੀਦਿ, ਗਰੁਂਵ ਭਾਰਂ ਅਸਹਮਾਨੋ.

੭੬. ਕਾਲਿਙ੍ਗਭਾਰਦ੍ਵਾਜੋ, ਨਾਗਂ ਖੀਣਾਯੁਕਂ ਵਿਦਿਤ੍ਵਾਨ;

ਰਾਜਾਨਂ ਕਾਲਿਙ੍ਗਂ, ਤਰਮਾਨੋ ਅਜ੍ਝਭਾਸਿਤ੍ਥ;

ਅਞ੍ਞਂ ਸਙ੍ਕਮ ਨਾਗਂ, ਨਾਗੋ ਖੀਣਾਯੁਕੋ ਮਹਾਰਾਜ.

੭੭. ਤਂ ਸੁਤ੍ਵਾ ਕਾਲਿਙ੍ਗੋ, ਤਰਮਾਨੋ ਸਙ੍ਕਮੀ ਨਾਗਂ;

ਸਙ੍ਕਨ੍ਤੇਵ ਰਞ੍ਞੇ, ਨਾਗੋ ਤਤ੍ਥੇਵ ਪਤਿ [ਪਤਿਤੋ (ਕ.)] ਭੁਮ੍ਯਾ;

ਵੇਯ੍ਯਞ੍ਜਨਿਕਵਚੋ, ਯਥਾ ਤਥਾ ਅਹੁ ਨਾਗੋ.

੭੮. ਕਾਲਿਙ੍ਗੋ ਰਾਜਾ ਕਾਲਿਙ੍ਗਂ, ਬ੍ਰਾਹ੍ਮਣਂ ਏਤਦਵੋਚ;

ਤ੍ਵਮੇਵ ਅਸਿ ਸਮ੍ਬੁਦ੍ਧੋ, ਸਬ੍ਬਞ੍ਞੂ ਸਬ੍ਬਦਸ੍ਸਾਵੀ.

੭੯. ਤਂ ਅਨਧਿਵਾਸੇਨ੍ਤੋ ਕਾਲਿਙ੍ਗਂ [ਕਾਲਿਙ੍ਗੋ (ਸੀ. ਸ੍ਯਾ. ਪੀ.)], ਬ੍ਰਾਹ੍ਮਣੋ ਇਦਮਵੋਚ;

ਵੇਯ੍ਯਞ੍ਜਨਿਕਾ ਹਿ ਮਯਂ, ਬੁਦ੍ਧਾ ਸਬ੍ਬਞ੍ਞੁਨੋ ਮਹਾਰਾਜ.

੮੦. ਸਬ੍ਬਞ੍ਞੂ ਸਬ੍ਬਵਿਦੂ ਚ, ਬੁਦ੍ਧਾ ਨ ਲਕ੍ਖਣੇਨ ਜਾਨਨ੍ਤਿ;

ਆਗਮਬਲਸਾ [ਆਗਮਪੁਰਿਸਾ (ਪੀ.)] ਹਿ ਮਯਂ, ਬੁਦ੍ਧਾ ਸਬ੍ਬਂ ਪਜਾਨਨ੍ਤਿ.

੮੧. ਮਹਯਿਤ੍ਵਾ ਸਮ੍ਬੋਧਿਂ [ਮਹਾਯਿਤ੍ਵਾਨ ਸਮ੍ਬੋਧਿਂ (ਸੀ. ਪੀ.), ਪਹਂਸਿਤ੍ਵਾਨ ਸਮ੍ਬੋਧਿਂ (ਸ੍ਯਾ.), ਮਮਾਯਿਤ੍ਵਾਨ ਤਂ ਬੋਧਿਂ (ਕ.)], ਨਾਨਾਤੁਰਿਯੇਹਿ ਵਜ੍ਜਮਾਨੇਹਿ;

ਮਾਲਾਵਿਲੇਪਨਂ ਅਭਿਹਰਿਤ੍ਵਾ [ਮਾਲਾਗਨ੍ਧਵਿਲੇਪਨਂ ਆਹਰਿਤ੍ਵਾ (ਸੀ. ਪੀ.); ਪਾਕਾਰਪਰਿਕ੍ਖੇਪਂ ਕਾਰੇਸਿ; ਅਥ ਰਾਜਾ ਪਾਯਾਸਿ (ਸੀ. ਸ੍ਯਾ. ਪੀ.)] ਅਥ ਰਾਜਾ ਮਨੁਪਾਯਾਸਿ [ਪਾਕਾਰਪਰਿਕ੍ਖੇਪਂ ਕਾਰੇਸਿ; ਅਥ ਰਾਜਾ ਪਾਯਾਸਿ (ਸੀ. ਸ੍ਯਾ. ਪੀ.)].

੮੨. ਸਟ੍ਠਿ ਵਾਹਸਹਸ੍ਸਾਨਿ, ਪੁਪ੍ਫਾਨਂ ਸਨ੍ਨਿਪਾਤਯਿ;

ਪੂਜੇਸਿ ਰਾਜਾ ਕਾਲਿਙ੍ਗੋ, ਬੋਧਿਮਣ੍ਡਮਨੁਤ੍ਤਰਨ੍ਤਿ [ਵਰੁਤ੍ਤਮੇਤਿ (ਸੀ.)].

ਕਾਲਿਙ੍ਗਬੋਧਿਜਾਤਕਂ ਛਟ੍ਠਂ.