੪੭੧. ਮੇਣ੍ਡਕਪਞ੍ਹਜਾਤਕਂ (੮)

੯੪. ਯੇਸਂ ਨ ਕਦਾਚਿ ਭੂਤਪੁਬ੍ਬਂ, ਸਖ੍ਯਂ [ਸਕ੍ਖਿਂ (ਸੀ. ਪੀ.), ਸਖਿ (ਸ੍ਯਾ.)] ਸਤ੍ਤਪਦਮ੍ਪਿਮਸ੍ਮਿ ਲੋਕੇ;

ਜਾਤਾ ਅਮਿਤ੍ਤਾ ਦੁਵੇ ਸਹਾਯਾ, ਪਟਿਸਨ੍ਧਾਯ ਚਰਨ੍ਤਿ ਕਿਸ੍ਸ ਹੇਤੁ.

੯੫. ਯਦਿ ਮੇ ਅਜ੍ਜ ਪਾਤਰਾਸਕਾਲੇ, ਪਞ੍ਹਂ ਨ ਸਕ੍ਕੁਣੇਯ੍ਯਾਥ ਵਤ੍ਤੁਮੇਤਂ;

ਰਟ੍ਠਾ ਪਬ੍ਬਾਜਯਿਸ੍ਸਾਮਿ ਵੋ ਸਬ੍ਬੇ, ਨ ਹਿ ਮਤ੍ਥੋ ਦੁਪ੍ਪਞ੍ਞਜਾਤਿਕੇਹਿ.

੯੬. ਮਹਾਜਨਸਮਾਗਮਮ੍ਹਿ ਘੋਰੇ, ਜਨਕੋਲਾਹਲਸਙ੍ਗਮਮ੍ਹਿ ਜਾਤੇ;

ਵਿਕ੍ਖਿਤ੍ਤਮਨਾ ਅਨੇਕਚਿਤ੍ਤਾ, ਪਞ੍ਹਂ ਨ ਸਕ੍ਕੁਣੋਮ ਵਤ੍ਤੁਮੇਤਂ.

੯੭. ਏਕਗ੍ਗਚਿਤ੍ਤਾਵ ਏਕਮੇਕਾ, ਰਹਸਿ ਗਤਾ ਅਤ੍ਥਂ ਨਿਚਿਨ੍ਤਯਿਤ੍ਵਾ [ਅਤ੍ਥਾਨਿ ਚਿਨ੍ਤਯਿਤ੍ਵਾ (ਸ੍ਯਾ. ਕ.)];

ਪਵਿਵੇਕੇ ਸਮ੍ਮਸਿਤ੍ਵਾਨ ਧੀਰਾ, ਅਥ ਵਕ੍ਖਨ੍ਤਿ ਜਨਿਨ੍ਦ ਏਤਮਤ੍ਥਂ.

੯੮. ਉਗ੍ਗਪੁਤ੍ਤ-ਰਾਜਪੁਤ੍ਤਿਯਾਨਂ, ਉਰਬ੍ਭਸ੍ਸ ਮਂਸਂ ਪਿਯਂ ਮਨਾਪਂ;

ਨ ਸੁਨਖਸ੍ਸ ਤੇ ਅਦੇਨ੍ਤਿ ਮਂਸਂ, ਅਥ ਮੇਣ੍ਡਸ੍ਸ ਸੁਣੇਨ ਸਖ੍ਯਮਸ੍ਸ.

੯੯. ਚਮ੍ਮਂ ਵਿਹਨਨ੍ਤਿ ਏਲ਼ਕਸ੍ਸ, ਅਸ੍ਸਪਿਟ੍ਠਤ੍ਥਰਸ੍ਸੁਖਸ੍ਸ [ਅਸ੍ਸਪਿਟ੍ਠਤ੍ਥਰਣਸੁਖਸ੍ਸ (ਸੀ.)] ਹੇਤੁ;

ਨ ਚ ਤੇ ਸੁਨਖਸ੍ਸ ਅਤ੍ਥਰਨ੍ਤਿ, ਅਥ ਮੇਣ੍ਡਸ੍ਸ ਸੁਣੇਨ ਸਖ੍ਯਮਸ੍ਸ.

੧੦੦. ਆਵੇਲ੍ਲਿਤਸਿਙ੍ਗਿਕੋ ਹਿ ਮੇਣ੍ਡੋ, ਨ ਚ ਸੁਨਖਸ੍ਸ ਵਿਸਾਣਕਾਨਿ ਅਤ੍ਥਿ;

ਤਿਣਭਕ੍ਖੋ ਮਂਸਭੋਜਨੋ ਚ, ਅਥ ਮੇਣ੍ਡਸ੍ਸ ਸੁਣੇਨ ਸਖ੍ਯਮਸ੍ਸ.

੧੦੧. ਤਿਣਮਾਸਿ ਪਲਾਸਮਾਸਿ ਮੇਣ੍ਡੋ, ਨ ਚ ਸੁਨਖੋ ਤਿਣਮਾਸਿ ਨੋ ਪਲਾਸਂ;

ਗਣ੍ਹੇਯ੍ਯ ਸੁਣੋ ਸਸਂ ਬਿਲ਼ਾਰਂ, ਅਥ ਮੇਣ੍ਡਸ੍ਸ ਸੁਣੇਨ ਸਖ੍ਯਮਸ੍ਸ.

੧੦੨. ਅਟ੍ਠਡ੍ਢਪਦੋ ਚਤੁਪ੍ਪਦਸ੍ਸ, ਮੇਣ੍ਡੋ ਅਟ੍ਠਨਖੋ ਅਦਿਸ੍ਸਮਾਨੋ;

ਛਾਦਿਯਮਾਹਰਤੀ ਅਯਂ ਇਮਸ੍ਸ, ਮਂਸਂ ਆਹਰਤੀ ਅਯਂ ਅਮੁਸ੍ਸ.

੧੦੩. ਪਾਸਾਦਵਰਗਤੋ ਵਿਦੇਹਸੇਟ੍ਠੋ, ਵਿਤਿਹਾਰਂ ਅਞ੍ਞਮਞ੍ਞਭੋਜਨਾਨਂ;

ਅਦ੍ਦਕ੍ਖਿ [ਅਦ੍ਦਸ (ਸ੍ਯਾ. ਕ.)] ਕਿਰ ਸਕ੍ਖਿਕਂ ਜਨਿਨ੍ਦੋ, ਬੁਭੁਕ੍ਕਸ੍ਸ ਪੁਣ੍ਣਂ ਮੁਖਸ੍ਸ [ਭੋਭੁਕ੍ਖਸ੍ਸ ਚ ਪੁਣ੍ਣਮੁਖਸ੍ਸ (ਸੀ.)] ਚੇਤਂ.

੧੦੪. ਲਾਭਾ ਵਤ ਮੇ ਅਨਪ੍ਪਰੂਪਾ, ਯਸ੍ਸ ਮੇਦਿਸਾ ਪਣ੍ਡਿਤਾ ਕੁਲਮ੍ਹਿ;

ਪਞ੍ਹਸ੍ਸ ਗਮ੍ਭੀਰਗਤਂ ਨਿਪੁਣਮਤ੍ਥਂ, ਪਟਿਵਿਜ੍ਝਨ੍ਤਿ ਸੁਭਾਸਿਤੇਨ ਧੀਰਾ.

੧੦੫. ਅਸ੍ਸਤਰਿਰਥਞ੍ਚ ਏਕਮੇਕਂ, ਫੀਤਂ ਗਾਮਵਰਞ੍ਚ ਏਕਮੇਕਂ;

ਸਬ੍ਬੇਸਂ ਵੋ ਦਮ੍ਮਿ ਪਣ੍ਡਿਤਾਨਂ, ਪਰਮਪ੍ਪਤੀਤਮਨੋ ਸੁਭਾਸਿਤੇਨਾਤਿ.

ਮੇਣ੍ਡਕਪਞ੍ਹਜਾਤਕਂ ਅਟ੍ਠਮਂ.