੧੨. ਦ੍ਵਾਦਸਕਨਿਪਾਤੋ
੪੬੪. ਚੂਲ਼ਕੁਣਾਲਜਾਤਕਂ (੧)
੧. ਲੁਦ੍ਧਾਨਂ [ਖੁਦ੍ਦਾਨਂ (ਸੀ. ਸ੍ਯਾ. ਪੀ.)] ਲਹੁਚਿਤ੍ਤਾਨਂ, ਅਕਤਞ੍ਞੂਨ ਦੁਬ੍ਭਿਨਂ;
ਨਾਦੇਵਸਤ੍ਤੋ ਪੁਰਿਸੋ, ਥੀਨਂ ਸਦ੍ਧਾਤੁਮਰਹਤਿ.
੨. ਨ ਤਾ ਪਜਾਨਨ੍ਤਿ ਕਤਂ ਨ ਕਿਚ੍ਚਂ, ਨ ਮਾਤਰਂ ਪਿਤਰਂ ਭਾਤਰਂ ਵਾ;
ਅਨਰਿਯਾ ਸਮਤਿਕ੍ਕਨ੍ਤਧਮ੍ਮਾ, ਸਸ੍ਸੇਵ ਚਿਤ੍ਤਸ੍ਸ ਵਸਂ ਵਜਨ੍ਤਿ.
੩. ਚਿਰਾਨੁਵੁਟ੍ਠਮ੍ਪਿ [ਚਿਰਾਨੁਵੁਤ੍ਥਮ੍ਪਿ (ਸੀ. ਪੀ.)] ਪਿਯਂ ਮਨਾਪਂ, ਅਨੁਕਮ੍ਪਕਂ ਪਾਣਸਮਮ੍ਪਿ ਭਤ੍ਤੁਂ [ਸਨ੍ਤਂ (ਸੀ. ਸ੍ਯਾ. ਪੀ.)];
ਆਵਾਸੁ ਕਿਚ੍ਚੇਸੁ ਚ ਨਂ ਜਹਨ੍ਤਿ, ਤਸ੍ਮਾਹਮਿਤ੍ਥੀਨਂ ਨ ਵਿਸ੍ਸਸਾਮਿ.
੪. ਥੀਨਞ੍ਹਿ ਚਿਤ੍ਤਂ ਯਥਾ ਵਾਨਰਸ੍ਸ, ਕਨ੍ਨਪ੍ਪਕਨ੍ਨਂ ਯਥਾ ਰੁਕ੍ਖਛਾਯਾ;
ਚਲਾਚਲਂ ਹਦਯਮਿਤ੍ਥਿਯਾਨਂ, ਚਕ੍ਕਸ੍ਸ ਨੇਮਿ ਵਿਯ ਪਰਿਵਤ੍ਤਤਿ.
੫. ਯਦਾ ਤਾ ਪਸ੍ਸਨ੍ਤਿ ਸਮੇਕ੍ਖਮਾਨਾ, ਆਦੇਯ੍ਯਰੂਪਂ ਪੁਰਿਸਸ੍ਸ ਵਿਤ੍ਤਂ;
ਸਣ੍ਹਾਹਿ ਵਾਚਾਹਿ ਨਯਨ੍ਤਿ ਮੇਨਂ, ਕਮ੍ਬੋਜਕਾ ਜਲਜੇਨੇਵ ਅਸ੍ਸਂ.
੬. ਯਦਾ ਨ ਪਸ੍ਸਨ੍ਤਿ ਸਮੇਕ੍ਖਮਾਨਾ, ਆਦੇਯ੍ਯਰੂਪਂ ਪੁਰਿਸਸ੍ਸ ਵਿਤ੍ਤਂ;
ਸਮਨ੍ਤਤੋ ਨਂ ਪਰਿਵਜ੍ਜਯਨ੍ਤਿ, ਤਿਣ੍ਣੋ ਨਦੀਪਾਰਗਤੋਵ ਕੁਲ੍ਲਂ.
੭. ਸਿਲੇਸੂਪਮਾ ਸਿਖਿਰਿਵ ਸਬ੍ਬਭਕ੍ਖਾ, ਤਿਕ੍ਖਮਾਯਾ ਨਦੀਰਿਵ ਸੀਘਸੋਤਾ;
ਸੇਵਨ੍ਤਿ ਹੇਤਾ ਪਿਯਮਪ੍ਪਿਯਞ੍ਚ, ਨਾਵਾ ਯਥਾ ਓਰਕੂਲਂ ਪਰਞ੍ਚ.
੮. ਨ ਤਾ ਏਕਸ੍ਸ ਨ ਦ੍ਵਿਨ੍ਨਂ, ਆਪਣੋਵ ਪਸਾਰਿਤੋ;
ਯੋ ਤਾ ਮਯ੍ਹਨ੍ਤਿ ਮਞ੍ਞੇਯ੍ਯ, ਵਾਤਂ ਜਾਲੇਨ ਬਾਧਯੇ [ਬਨ੍ਧਯੇ (ਸ੍ਯਾ. ਕ.)].
੯. ਯਥਾ ਨਦੀ ਚ ਪਨ੍ਥੋ ਚ, ਪਾਨਾਗਾਰਂ ਸਭਾ ਪਪਾ;
ਏਵਂ ਲੋਕਿਤ੍ਥਿਯੋ ਨਾਮ, ਵੇਲਾ ਤਾਸਂ ਨ ਵਿਜ੍ਜਤਿ [ਇਮਿਸ੍ਸਾ ਗਾਥਾਯ ਪੁਬ੍ਬਦ੍ਧਾਪਰਦ੍ਧਂ ਵਿਪਰਿਯਾਯੇਨ ਦਿਸ੍ਸਤਿ (ਕ.)].
੧੦. ਘਤਾਸਨਸਮਾ ਏਤਾ, ਕਣ੍ਹਸਪ੍ਪਸਿਰੂਪਮਾ;
ਗਾਵੋ ਬਹਿਤਿਣਸ੍ਸੇਵ, ਓਮਸਨ੍ਤਿ ਵਰਂ ਵਰਂ.
੧੧. ਘਤਾਸਨਂ ਕੁਞ੍ਜਰਂ ਕਣ੍ਹਸਪ੍ਪਂ, ਮੁਦ੍ਧਾਭਿਸਿਤ੍ਤਂ ਪਮਦਾ ਚ ਸਬ੍ਬਾ;
ਏਤੇ ਨਰੋ ਨਿਚ੍ਚਯਤੋ [ਨਿਚ੍ਚਯਤ੍ਤੋ (ਸੀ. ਪੀ.)] ਭਜੇਥ, ਤੇਸਂ ਹਵੇ ਦੁਬ੍ਬਿਦੁ ਸਬ੍ਬਭਾਵੋ [ਸਚ੍ਚਭਾਵੋ (ਸ੍ਯਾ.)].
੧੨. ਨਚ੍ਚਨ੍ਤਵਣ੍ਣਾ ਨ ਬਹੂਨਂ ਕਨ੍ਤਾ, ਨ ਦਕ੍ਖਿਣਾ ਪਮਦਾ ਸੇਵਿਤਬ੍ਬਾ;
ਨ ਪਰਸ੍ਸ ਭਰਿਯਾ ਨ ਧਨਸ੍ਸ ਹੇਤੁ, ਏਤਿਤ੍ਥਿਯੋ ਪਞ੍ਚ ਨ ਸੇਵਿਤਬ੍ਬਾਤਿ.
ਚੂਲ਼ਕੁਣਾਲਜਾਤਕਂ ਪਠਮਂ.
੪੬੫. ਭਦ੍ਦਸਾਲਜਾਤਕਂ (੨)
੧੩. ਕਾ ਤ੍ਵਂ ਸੁਦ੍ਧੇਹਿ ਵਤ੍ਥੇਹਿ, ਅਘੇ ਵੇਹਾਯਸਂ [ਵੇਹਾਸਯਂ (ਸੀ. ਪੀ.)] ਠਿਤਾ;
ਕੇਨ ਤ੍ਯਾਸ੍ਸੂਨਿ ਵਤ੍ਤਨ੍ਤਿ, ਕੁਤੋ ਤਂ ਭਯਮਾਗਤਂ.
੧੪. ਤਵੇਵ ਦੇਵ ਵਿਜਿਤੇ, ਭਦ੍ਦਸਾਲੋਤਿ ਮਂ ਵਿਦੂ;
ਸਟ੍ਠਿ [ਸਟ੍ਠਿਂ (ਸੀ. ਪੀ.)] ਵਸ੍ਸਸਹਸ੍ਸਾਨਿ, ਤਿਟ੍ਠਤੋ ਪੂਜਿਤਸ੍ਸ ਮੇ.
੧੫. ਕਾਰਯਨ੍ਤਾ ਨਗਰਾਨਿ, ਅਗਾਰੇ ਚ ਦਿਸਮ੍ਪਤਿ;
ਵਿਵਿਧੇ ਚਾਪਿ ਪਾਸਾਦੇ, ਨ ਮਂ ਤੇ ਅਚ੍ਚਮਞ੍ਞਿਸੁਂ;
ਯਥੇਵ ਮਂ ਤੇ ਪੂਜੇਸੁਂ, ਤਥੇਵ ਤ੍ਵਮ੍ਪਿ ਪੂਜਯ.
੧੬. ਤਂ ਇਵਾਹਂ [ਤਞ੍ਚ ਅਹਂ (ਸੀ. ਸ੍ਯਾ. ਪੀ.)] ਨ ਪਸ੍ਸਾਮਿ, ਥੂਲਂ ਕਾਯੇਨ ਤੇ ਦੁਮਂ;
ਆਰੋਹਪਰਿਣਾਹੇਨ, ਅਭਿਰੂਪੋਸਿ ਜਾਤਿਯਾ.
੧੭. ਪਾਸਾਦਂ ਕਾਰਯਿਸ੍ਸਾਮਿ, ਏਕਤ੍ਥਮ੍ਭਂ ਮਨੋਰਮਂ;
ਤਤ੍ਥ ਤਂ ਉਪਨੇਸ੍ਸਾਮਿ, ਚਿਰਂ ਤੇ ਯਕ੍ਖ ਜੀਵਿਤਂ.
੧੮. ਏਵਂ ਚਿਤ੍ਤਂ ਉਦਪਾਦਿ, ਸਰੀਰੇਨ ਵਿਨਾਭਾਵੋ;
ਪੁਥੁਸੋ ਮਂ ਵਿਕਨ੍ਤਿਤ੍ਵਾ, ਖਣ੍ਡਸੋ ਅਵਕਨ੍ਤਥ.
੧੯. ਅਗ੍ਗੇ ਚ ਛੇਤ੍ਵਾ ਮਜ੍ਝੇ ਚ, ਪਚ੍ਛਾ ਮੂਲਮ੍ਹਿ ਛਿਨ੍ਦਥ [ਮੂਲਞ੍ਚ ਛਿਨ੍ਦਥ (ਸੀ.), ਮੂਲਂ ਵਿਛਿਨ੍ਦਥ (ਪੀ.)];
ਏਵਂ ਮੇ ਛਿਜ੍ਜਮਾਨਸ੍ਸ, ਨ ਦੁਕ੍ਖਂ ਮਰਣਂ ਸਿਯਾ.
੨੦. ਹਤ੍ਥਪਾਦਂ [ਹਤ੍ਥਪਾਦੇ (ਕ.)] ਯਥਾ ਛਿਨ੍ਦੇ [ਛਿਨ੍ਨੇ (ਕ.)], ਕਣ੍ਣਨਾਸਞ੍ਚ ਜੀਵਤੋ;
ਤਤੋ ਪਚ੍ਛਾ ਸਿਰੋ ਛਿਨ੍ਦੇ, ਤਂ ਦੁਕ੍ਖਂ ਮਰਣਂ ਸਿਯਾ.
੨੧. ਸੁਖਂ ਨੁ ਖਣ੍ਡਸੋ ਛਿਨ੍ਨਂ, ਭਦ੍ਦਸਾਲਵਨਪ੍ਪਤਿ;
ਕਿਂ ਹੇਤੁ ਕਿਂ ਉਪਾਦਾਯ, ਖਣ੍ਡਸੋ ਛਿਨ੍ਨਮਿਚ੍ਛਸਿ.
੨੨. ਯਞ੍ਚ ਹੇਤੁਮੁਪਾਦਾਯ, ਹੇਤੁਂ ਧਮ੍ਮੂਪਸਂਹਿਤਂ;
ਖਣ੍ਡਸੋ ਛਿਨ੍ਨਮਿਚ੍ਛਾਮਿ, ਮਹਾਰਾਜ ਸੁਣੋਹਿ ਮੇ.
੨੩. ਞਾਤੀ ਮੇ ਸੁਖਸਂਵਦ੍ਧਾ, ਮਮ ਪਸ੍ਸੇ ਨਿਵਾਤਜਾ;
ਤੇਪਿਹਂ ਉਪਹਿਂਸੇਯ੍ਯਂ, ਪਰੇਸਂ ਅਸੁਖੋਚਿਤਂ.
੨੪. ਚੇਤੇਯ੍ਯਰੂਪਂ [ਚੇਤਬ੍ਬਰੂਪਂ (ਸੀ. ਪੀ.)] ਚੇਤੇਸਿ, ਭਦ੍ਦਸਾਲਵਨਪ੍ਪਤਿ;
ਹਿਤਕਾਮੋਸਿ ਞਾਤੀਨਂ, ਅਭਯਂ ਸਮ੍ਮ ਦਮ੍ਮਿ ਤੇਤਿ.
ਭਦ੍ਦਸਾਲਜਾਤਕਂ ਦੁਤਿਯਂ.
੪੬੬. ਸਮੁਦ੍ਦਵਾਣਿਜਜਾਤਕਂ (੩)
੨੫. ਕਸਨ੍ਤਿ ਵਪਨ੍ਤਿ ਤੇ ਜਨਾ, ਮਨੁਜਾ ਕਮ੍ਮਫਲੂਪਜੀਵਿਨੋ;
ਨਯਿਮਸ੍ਸ ਦੀਪਕਸ੍ਸ ਭਾਗਿਨੋ, ਜਮ੍ਬੁਦੀਪਾ ਇਦਮੇਵ ਨੋ ਵਰਂ.
੨੬. ਤਿਪਞ੍ਚਰਤ੍ਤੂਪਗਤਮ੍ਹਿ ਚਨ੍ਦੇ, ਵੇਗੋ ਮਹਾ ਹੇਹਿਤਿ ਸਾਗਰਸ੍ਸ;
ਉਪ੍ਲਵਿਸ੍ਸਂ ਦੀਪਮਿਮਂ ਉਲ਼ਾਰਂ, ਮਾ ਵੋ ਵਧੀ ਗਚ੍ਛਥ ਲੇਣਮਞ੍ਞਂ.
੨੭. ਨ ਜਾਤੁਯਂ ਸਾਗਰਵਾਰਿਵੇਗੋ, ਉਪ੍ਲਵਿਸ੍ਸਂ ਦੀਪਮਿਮਂ ਉਲ਼ਾਰਂ;
ਤਂ ਮੇ ਨਿਮਿਤ੍ਤੇਹਿ ਬਹੂਹਿ ਦਿਟ੍ਠਂ, ਮਾ ਭੇਥ ਕਿਂ ਸੋਚਥ ਮੋਦਥਵ੍ਹੋ [ਮੋਦਥ ਵੋ (ਕ.) ੬.੩੮ ਮੋਗ੍ਗਲ੍ਲਾਨਸੁਤ੍ਤਂ ਪਸ੍ਸਿਤਬ੍ਬਂ].
੨੮. ਪਹੂਤਭਕ੍ਖਂ ਬਹੁਅਨ੍ਨਪਾਨਂ, ਪਤ੍ਤਤ੍ਥ ਆਵਾਸਮਿਮਂ ਉਲ਼ਾਰਂ;
ਨ ਵੋ ਭਯਂ ਪਟਿਪਸ੍ਸਾਮਿ ਕਿਞ੍ਚਿ, ਆਪੁਤ੍ਤਪੁਤ੍ਤੇਹਿ ਪਮੋਦਥਵ੍ਹੋ.
੨੯. ਯੋ ਦੇਵੋਯਂ ਦਕ੍ਖਿਣਾਯਂ [ਦਕ੍ਖਿਣਸ੍ਸਂ (ਸੀ.)] ਦਿਸਾਯਂ, ਖੇਮਨ੍ਤਿ ਪਕ੍ਕੋਸਤਿ ਤਸ੍ਸ ਸਚ੍ਚਂ;
ਨ ਉਤ੍ਤਰੋ ਵੇਦਿ ਭਯਾਭਯਸ੍ਸ, ਮਾ ਭੇਥ ਕਿਂ ਸੋਚਥ ਮੋਦਥਵ੍ਹੋ.
੩੦. ਯਥਾ ਇਮੇ ਵਿਪ੍ਪਵਦਨ੍ਤਿ ਯਕ੍ਖਾ, ਏਕੋ ਭਯਂ ਸਂਸਤਿ ਖੇਮਮੇਕੋ;
ਤਦਿਙ੍ਘ ਮਯ੍ਹਂ ਵਚਨਂ ਸੁਣਾਥ, ਖਿਪ੍ਪਂ ਲਹੁਂ ਮਾ ਵਿਨਸ੍ਸਿਮ੍ਹ ਸਬ੍ਬੇ.
੩੧. ਸਬ੍ਬੇ ਸਮਾਗਮ੍ਮ ਕਰੋਮ ਨਾਵਂ, ਦੋਣਿਂ ਦਲ਼੍ਹਂ ਸਬ੍ਬਯਨ੍ਤੂਪਪਨ੍ਨਂ;
ਸਚੇ ਅਯਂ ਦਕ੍ਖਿਣੋ ਸਚ੍ਚਮਾਹ, ਮੋਘਂ ਪਟਿਕ੍ਕੋਸਤਿ ਉਤ੍ਤਰੋਯਂ;
ਸਾ ਚੇਵ ਨੋ ਹੇਹਿਤਿ ਆਪਦਤ੍ਥਾ, ਇਮਞ੍ਚ ਦੀਪਂ ਨ ਪਰਿਚ੍ਚਜੇਮ.
੩੨. ਸਚੇ ਚ ਖੋ ਉਤ੍ਤਰੋ ਸਚ੍ਚਮਾਹ, ਮੋਘਂ ਪਟਿਕ੍ਕੋਸਤਿ ਦਕ੍ਖਿਣੋਯਂ;
ਤਮੇਵ ਨਾਵਂ ਅਭਿਰੁਯ੍ਹ ਸਬ੍ਬੇ, ਏਵਂ ਮਯਂ ਸੋਤ੍ਥਿ ਤਰੇਮੁ ਪਾਰਂ.
੩੩. ਨ ਵੇ ਸੁਗਣ੍ਹਂ ਪਠਮੇਨ ਸੇਟ੍ਠਂ, ਕਨਿਟ੍ਠਮਾਪਾਥਗਤਂ ਗਹੇਤ੍ਵਾ;
ਯੋ ਚੀਧ ਤਚ੍ਛਂ [ਮਜ੍ਝਂ (ਸੀ. ਸ੍ਯਾ. ਪੀ.)] ਪਵਿਚੇਯ੍ਯ ਗਣ੍ਹਤਿ [ਗਣ੍ਹਿ (ਕ.)], ਸ ਵੇ ਨਰੋ ਸੇਟ੍ਠਮੁਪੇਤਿ ਠਾਨਂ.
੩੪. ਯਥਾਪਿ ਤੇ ਸਾਗਰਵਾਰਿਮਜ੍ਝੇ, ਸਕਮ੍ਮੁਨਾ ਸੋਤ੍ਥਿ ਵਹਿਂਸੁ ਵਾਣਿਜਾ;
ਅਨਾਗਤਤ੍ਥਂ ਪਟਿਵਿਜ੍ਝਿਯਾਨ, ਅਪ੍ਪਮ੍ਪਿ ਨਾਚ੍ਚੇਤਿ ਸ ਭੂਰਿਪਞ੍ਞੋ.
੩੫. ਬਾਲਾ ਚ ਮੋਹੇਨ ਰਸਾਨੁਗਿਦ੍ਧਾ, ਅਨਾਗਤਂ ਅਪ੍ਪਟਿਵਿਜ੍ਝਿਯਤ੍ਥਂ;
ਪਚ੍ਚੁਪ੍ਪਨ੍ਨੇ ਸੀਦਨ੍ਤਿ ਅਤ੍ਥਜਾਤੇ, ਸਮੁਦ੍ਦਮਜ੍ਝੇ ਯਥਾ ਤੇ ਮਨੁਸ੍ਸਾ.
੩੬. ਅਨਾਗਤਂ ਪਟਿਕਯਿਰਾਥ ਕਿਚ੍ਚਂ, ‘‘ਮਾ ਮਂ ਕਿਚ੍ਚਂ ਕਿਚ੍ਚਕਾਲੇ ਬ੍ਯਧੇਸਿ’’;
ਤਂ ਤਾਦਿਸਂ ਪਟਿਕਤ [ਪਟਿਕਤਂ (ਕ.), ਪਟਿਗਤ (ਸੀ. ਅਟ੍ਠ.), ਪਟਿਕਚ੍ਚ (?)] ਕਿਚ੍ਚਕਾਰਿਂ, ਨ ਤਂ ਕਿਚ੍ਚਂ ਕਿਚ੍ਚਕਾਲੇ ਬ੍ਯਧੇਤੀਤਿ.
ਸਮੁਦ੍ਦਵਾਣਿਜਜਾਤਕਂ ਤਤਿਯਂ.
੪੬੭. ਕਾਮਜਾਤਕਂ (੪)
੩੭. ਕਾਮਂ ਕਾਮਯਮਾਨਸ੍ਸ, ਤਸ੍ਸ ਚੇ ਤਂ ਸਮਿਜ੍ਝਤਿ;
ਅਦ੍ਧਾ ਪੀਤਿਮਨੋ ਹੋਤਿ, ਲਦ੍ਧਾ ਮਚ੍ਚੋ ਯਦਿਚ੍ਛਤਿ.
੩੮. ਕਾਮਂ ਕਾਮਯਮਾਨਸ੍ਸ, ਤਸ੍ਸ ਚੇ ਤਂ ਸਮਿਜ੍ਝਤਿ;
ਤਤੋ ਨਂ ਅਪਰਂ ਕਾਮੇ, ਧਮ੍ਮੇ ਤਣ੍ਹਂਵ ਵਿਨ੍ਦਤਿ.
੩੯. ਗਵਂਵ ਸਿਙ੍ਗਿਨੋ ਸਿਙ੍ਗਂ, ਵਡ੍ਢਮਾਨਸ੍ਸ ਵਡ੍ਢਤਿ;
ਏਵਂ ਮਨ੍ਦਸ੍ਸ ਪੋਸਸ੍ਸ, ਬਾਲਸ੍ਸ ਅਵਿਜਾਨਤੋ;
ਭਿਯ੍ਯੋ ਤਣ੍ਹਾ ਪਿਪਾਸਾ ਚ, ਵਡ੍ਢਮਾਨਸ੍ਸ ਵਡ੍ਢਤਿ.
੪੦. ਪਥਬ੍ਯਾ ਸਾਲਿਯਵਕਂ, ਗਵਸ੍ਸਂ [ਗਵਾਸਂ (ਸੀ. ਸ੍ਯਾ. ਪੀ.)] ਦਾਸਪੋਰਿਸਂ;
ਦਤ੍ਵਾ ਚ [ਦਤ੍ਵਾਪਿ (ਸੀ. ਸ੍ਯਾ.), ਦਤ੍ਵਾ ਵਾ (ਪੀ.)] ਨਾਲਮੇਕਸ੍ਸ, ਇਤਿ ਵਿਦ੍ਵਾ [ਵਿਦ੍ਧਾ (ਸ੍ਯਾ.)] ਸਮਂ ਚਰੇ.
੪੧. ਰਾਜਾ ਪਸਯ੍ਹ ਪਥਵਿਂ ਵਿਜਿਤ੍ਵਾ, ਸਸਾਗਰਨ੍ਤਂ ਮਹਿਮਾਵਸਨ੍ਤੋ;
ਓਰਂ ਸਮੁਦ੍ਦਸ੍ਸ ਅਤਿਤ੍ਤਰੂਪੋ [ਅਤਿਤ੍ਤਿਰੂਪੋ (ਕ.)], ਪਾਰਂ ਸਮੁਦ੍ਦਸ੍ਸਪਿ ਪਤ੍ਥਯੇਥ.
੪੨. ਯਾਵ ਅਨੁਸ੍ਸਰਂ ਕਾਮੇ, ਮਨਸਾ ਤਿਤ੍ਤਿ ਨਾਜ੍ਝਗਾ;
ਤਤੋ ਨਿਵਤ੍ਤਾ ਪਟਿਕਮ੍ਮ ਦਿਸ੍ਵਾ, ਤੇ ਵੇ ਸੁਤਿਤ੍ਤਾ ਯੇ [ਤਿਤ੍ਤਾ (ਸੀ. ਸ੍ਯਾ. ਪੀ.)] ਪਞ੍ਞਾਯ ਤਿਤ੍ਤਾ.
੪੩. ਪਞ੍ਞਾਯ ਤਿਤ੍ਤਿਨਂ [ਤਿਤ੍ਤੀਨਂ (ਸੀ. ਸ੍ਯਾ.)] ਸੇਟ੍ਠਂ, ਨ ਸੋ ਕਾਮੇਹਿ ਤਪ੍ਪਤਿ;
ਪਞ੍ਞਾਯ ਤਿਤ੍ਤਂ ਪੁਰਿਸਂ, ਤਣ੍ਹਾ ਨ ਕੁਰੁਤੇ ਵਸਂ.
੪੪. ਅਪਚਿਨੇਥੇਵ ਕਾਮਾਨਂ [ਕਾਮਾਨਿ (ਸੀ. ਸ੍ਯਾ. ਪੀ.)], ਅਪ੍ਪਿਚ੍ਛਸ੍ਸ ਅਲੋਲੁਪੋ;
ਸਮੁਦ੍ਦਮਤ੍ਤੋ ਪੁਰਿਸੋ, ਨ ਸੋ ਕਾਮੇਹਿ ਤਪ੍ਪਤਿ.
੪੫. ਰਥਕਾਰੋਵ ਚਮ੍ਮਸ੍ਸ, ਪਰਿਕਨ੍ਤਂ ਉਪਾਹਨਂ;
ਯਂ ਯਂ ਚਜਤਿ [ਜਹਤਿ (ਸ੍ਯਾ. ਕ.)] ਕਾਮਾਨਂ, ਤਂ ਤਂ ਸਮ੍ਪਜ੍ਜਤੇ ਸੁਖਂ;
ਸਬ੍ਬਂ ਚੇ ਸੁਖਮਿਚ੍ਛੇਯ੍ਯ, ਸਬ੍ਬੇ ਕਾਮੇ ਪਰਿਚ੍ਚਜੇ.
੪੬. ਅਟ੍ਠ ਤੇ ਭਾਸਿਤਾ ਗਾਥਾ, ਸਬ੍ਬਾ ਹੋਨ੍ਤਿ ਸਹਸ੍ਸਿਯੋ [ਸਹਸ੍ਸਿਯਾ (?) ਉਪਰਿ ਸੁਤਸੋਮਜਾਤਕੇ ਤਥਾ ਦਿਸ੍ਸਤਿ];
ਪਟਿਗਣ੍ਹ ਮਹਾਬ੍ਰਹ੍ਮੇ, ਸਾਧੇਤਂ ਤਵ ਭਾਸਿਤਂ.
੪੭. ਨ ਮੇ ਅਤ੍ਥੋ ਸਹਸ੍ਸੇਹਿ, ਸਤੇਹਿ ਨਹੁਤੇਹਿ ਵਾ;
ਪਚ੍ਛਿਮਂ ਭਾਸਤੋ ਗਾਥਂ, ਕਾਮੇ ਮੇ ਨ ਰਤੋ ਮਨੋ.
੪੮. ਭਦ੍ਰਕੋ [ਸਦ੍ਦੋ (ਸੀ.)] ਵਤਾਯਂ ਮਾਣਵਕੋ, ਸਬ੍ਬਲੋਕਵਿਦੂ ਮੁਨਿ;
ਯੋ ਇਮਂ ਤਣ੍ਹਂ [ਯੋ ਤਣ੍ਹਂ (ਸੀ. ਸ੍ਯਾ.)] ਦੁਕ੍ਖਜਨਨਿਂ, ਪਰਿਜਾਨਾਤਿ ਪਣ੍ਡਿਤੋਤਿ.
ਕਾਮਜਾਤਕਂ ਚਤੁਤ੍ਥਂ.
੪੬੮. ਜਨਸਨ੍ਧਜਾਤਕਂ (੫)
੪੯. ਦਸ ਖਲੁ ਇਮਾਨਿ [ਖਲੁਮਾਨਿ (ਸ੍ਯਾ.)] ਠਾਨਾਨਿ, ਯਾਨਿ ਪੁਬ੍ਬੇ ਅਕਰਿਤ੍ਵਾ;
ਸ ਪਚ੍ਛਾ ਮਨੁਤਪ੍ਪਤਿ, ਇਚ੍ਚੇਵਾਹ [ਇਚ੍ਚਾਹ ਰਾਜਾ (ਸੀ. ਸ੍ਯਾ. ਪੀ.)] ਜਨਸਨ੍ਧੋ.
੫੦. ਅਲਦ੍ਧਾ ਵਿਤ੍ਤਂ ਤਪ੍ਪਤਿ, ਪੁਬ੍ਬੇ ਅਸਮੁਦਾਨਿਤਂ;
ਨ ਪੁਬ੍ਬੇ ਧਨਮੇਸਿਸ੍ਸਂ, ਇਤਿ ਪਚ੍ਛਾਨੁਤਪ੍ਪਤਿ.
੫੧. ਸਕ੍ਯਰੂਪਂ ਪੁਰੇ ਸਨ੍ਤਂ, ਮਯਾ ਸਿਪ੍ਪਂ ਨ ਸਿਕ੍ਖਿਤਂ;
ਕਿਚ੍ਛਾ ਵੁਤ੍ਤਿ ਅਸਿਪ੍ਪਸ੍ਸ, ਇਤਿ ਪਚ੍ਛਾਨੁਤਪ੍ਪਤਿ.
੫੨. ਕੂਟਵੇਦੀ ਪੁਰੇ ਆਸਿਂ, ਪਿਸੁਣੋ ਪਿਟ੍ਠਿਮਂਸਿਕੋ;
ਚਣ੍ਡੋ ਚ ਫਰੁਸੋ ਚਾਪਿ [ਚਾਸਿਂ (ਸੀ. ਸ੍ਯਾ. ਪੀ.)], ਇਤਿ ਪਚ੍ਛਾਨੁਤਪ੍ਪਤਿ.
੫੩. ਪਾਣਾਤਿਪਾਤੀ ਪੁਰੇ ਆਸਿਂ, ਲੁਦ੍ਦੋ ਚਾਪਿ [ਚਾਸਿਂ (ਸੀ. ਪੀ.)] ਅਨਾਰਿਯੋ;
ਭੂਤਾਨਂ ਨਾਪਚਾਯਿਸ੍ਸਂ, ਇਤਿ ਪਚ੍ਛਾਨੁਤਪ੍ਪਤਿ.
੫੪. ਬਹੂਸੁ ਵਤ ਸਨ੍ਤੀਸੁ, ਅਨਾਪਾਦਾਸੁ ਇਤ੍ਥਿਸੁ;
ਪਰਦਾਰਂ ਅਸੇਵਿਸ੍ਸਂ, ਇਤਿ ਪਚ੍ਛਾਨੁਤਪ੍ਪਤਿ.
੫੫. ਬਹੁਮ੍ਹਿ ਵਤ ਸਨ੍ਤਮ੍ਹਿ, ਅਨ੍ਨਪਾਨੇ ਉਪਟ੍ਠਿਤੇ;
ਨ ਪੁਬ੍ਬੇ ਅਦਦਂ [ਅਦਦਿਂ (ਸੀ.)] ਦਾਨਂ, ਇਤਿ ਪਚ੍ਛਾਨੁਤਪ੍ਪਤਿ.
੫੬. ਮਾਤਰਂ ਪਿਤਰਞ੍ਚਾਪਿ, ਜਿਣ੍ਣਕਂ ਗਤਯੋਬ੍ਬਨਂ [ਜਿਣ੍ਣਕੇ ਗਤਯੋਬ੍ਬਨੇ (ਸੀ. ਸ੍ਯਾ. ਪੀ.)];
ਪਹੁ ਸਨ੍ਤੋ ਨ ਪੋਸਿਸ੍ਸਂ, ਇਤਿ ਪਚ੍ਛਾਨੁਤਪ੍ਪਤਿ.
੫੭. ਆਚਰਿਯਮਨੁਸਤ੍ਥਾਰਂ, ਸਬ੍ਬਕਾਮਰਸਾਹਰਂ;
ਪਿਤਰਂ ਅਤਿਮਞ੍ਞਿਸ੍ਸਂ, ਇਤਿ ਪਚ੍ਛਾਨੁਤਪ੍ਪਤਿ.
੫੮. ਸਮਣੇ ਬ੍ਰਾਹ੍ਮਣੇ ਚਾਪਿ, ਸੀਲਵਨ੍ਤੇ ਬਹੁਸ੍ਸੁਤੇ;
ਨ ਪੁਬ੍ਬੇ ਪਯਿਰੁਪਾਸਿਸ੍ਸਂ, ਇਤਿ ਪਚ੍ਛਾਨੁਤਪ੍ਪਤਿ.
੫੯. ਸਾਧੁ ਹੋਤਿ ਤਪੋ ਚਿਣ੍ਣੋ, ਸਨ੍ਤੋ ਚ ਪਯਿਰੁਪਾਸਿਤੋ;
ਨ ਚ ਪੁਬ੍ਬੇ ਤਪੋ ਚਿਣ੍ਣੋ, ਇਤਿ ਪਚ੍ਛਾਨੁਤਪ੍ਪਤਿ.
੬੦. ਯੋ ਚ ਏਤਾਨਿ ਠਾਨਾਨਿ, ਯੋਨਿਸੋ ਪਟਿਪਜ੍ਜਤਿ;
ਕਰਂ ਪੁਰਿਸਕਿਚ੍ਚਾਨਿ, ਸ ਪਚ੍ਛਾ ਨਾਨੁਤਪ੍ਪਤੀਤਿ.
ਜਨਸਨ੍ਧਜਾਤਕਂ ਪਞ੍ਚਮਂ.
੪੬੯. ਮਹਾਕਣ੍ਹਜਾਤਕਂ (੬)
੬੧. ਕਣ੍ਹੋ ਕਣ੍ਹੋ ਚ ਘੋਰੋ ਚ, ਸੁਕ੍ਕਦਾਠੋ ਪਭਾਸਵਾ [ਪਤਾਪਵਾ (ਸੀ. ਸ੍ਯਾ. ਪੀ.)];
ਬਦ੍ਧੋ ਪਞ੍ਚਹਿ ਰਜ੍ਜੂਹਿ, ਕਿਂ ਰਵਿ [ਧੀਰ (ਸੀ. ਪੀ.), ਵੀਰ (ਸ੍ਯਾ.)] ਸੁਨਖੋ ਤਵ.
੬੨. ਨਾਯਂ ਮਿਗਾਨਮਤ੍ਥਾਯ, ਉਸੀਨਕ [ਉਸੀਨਰ (ਸੀ. ਪੀ.), ਉਸੀਨ੍ਨਰ (ਸ੍ਯਾ.)] ਭਵਿਸ੍ਸਤਿ;
ਮਨੁਸ੍ਸਾਨਂ ਅਨਯੋ ਹੁਤ੍ਵਾ, ਤਦਾ ਕਣ੍ਹੋ ਪਮੋਕ੍ਖਤਿ.
੬੩. ਪਤ੍ਤਹਤ੍ਥਾ ਸਮਣਕਾ, ਮੁਣ੍ਡਾ ਸਙ੍ਘਾਟਿਪਾਰੁਤਾ;
ਨਙ੍ਗਲੇਹਿ ਕਸਿਸ੍ਸਨ੍ਤਿ, ਤਦਾ ਕਣ੍ਹੋ ਪਮੋਕ੍ਖਤਿ.
੬੪. ਤਪਸ੍ਸਿਨਿਯੋ [ਤਪਨੀਯਾ (ਕ.) ਦੁਤਿਯਨ੍ਤਪਦਾਨਿ ਹੇਤਾਨਿ] ਪਬ੍ਬਜਿਤਾ, ਮੁਣ੍ਡਾ ਸਙ੍ਘਾਟਿਪਾਰੁਤਾ;
ਯਦਾ ਲੋਕੇ ਗਮਿਸ੍ਸਨ੍ਤਿ, ਤਦਾ ਕਣ੍ਹੋ ਪਮੋਕ੍ਖਤਿ.
੬੫. ਦੀਘੋਤ੍ਤਰੋਟ੍ਠਾ ਜਟਿਲਾ, ਪਙ੍ਕਦਨ੍ਤਾ ਰਜਸ੍ਸਿਰਾ;
ਇਣਂ ਚੋਦਾਯ [ਵੋਦਾਯ (ਸੀ. ਪੀ.), ਚੋਦਯ (ਸ੍ਯਾ.)] ਗਚ੍ਛਨ੍ਤਿ, ਤਦਾ ਕਣ੍ਹੋ ਪਮੋਕ੍ਖਤਿ.
੬੬. ਅਧਿਚ੍ਚ ਵੇਦੇ [ਵੇਦਂ (ਕ.)] ਸਾਵਿਤ੍ਤਿਂ, ਯਞ੍ਞਤਨ੍ਤਞ੍ਚ [ਤਨ੍ਤ੍ਰਞ੍ਚ (ਸੀ. ਸ੍ਯਾ. ਪੀ.)] ਬ੍ਰਾਹ੍ਮਣਾ;
ਭਤਿਕਾਯ ਯਜਿਸ੍ਸਨ੍ਤਿ, ਤਦਾ ਕਣ੍ਹੋ ਪਮੋਕ੍ਖਤਿ.
੬੭. ਮਾਤਰਂ ਪਿਤਰਞ੍ਚਾਪਿ, ਜਿਣ੍ਣਕਂ ਗਤਯੋਬ੍ਬਨਂ;
ਪਹੂ ਸਨ੍ਤੋ [ਸਨ੍ਤਾ (ਸੀ.)] ਨ ਭਰਨ੍ਤਿ, ਤਦਾ ਕਣ੍ਹੋ ਪਮੋਕ੍ਖਤਿ.