੪੭੨. ਮਹਾਪਦੁਮਜਾਤਕਂ (੯)

੧੦੬. ਨਾਦਟ੍ਠਾ [ਨਾਦਿਟ੍ਠਾ (ਕ. ਸੀ. ਸ੍ਯਾ. ਕ.)] ਪਰਤੋ ਦੋਸਂ, ਅਣੁਂ ਥੂਲਾਨਿ ਸਬ੍ਬਸੋ;

ਇਸ੍ਸਰੋ ਪਣਯੇ ਦਣ੍ਡਂ, ਸਾਮਂ ਅਪ੍ਪਟਿਵੇਕ੍ਖਿਯ.

੧੦੭. ਯੋ ਚ ਅਪ੍ਪਟਿਵੇਕ੍ਖਿਤ੍ਵਾ, ਦਣ੍ਡਂ ਕੁਬ੍ਬਤਿ ਖਤ੍ਤਿਯੋ;

ਸਕਣ੍ਟਕਂ ਸੋ ਗਿਲਤਿ, ਜਚ੍ਚਨ੍ਧੋਵ ਸਮਕ੍ਖਿਕਂ.

੧੦੮. ਅਦਣ੍ਡਿਯਂ ਦਣ੍ਡਯਤਿ [ਦਣ੍ਡਿਯਤਿ (ਸ੍ਯਾ. ਪੀ.)], ਦਣ੍ਡਿਯਞ੍ਚ ਅਦਣ੍ਡਿਯਂ [ਅਦਣ੍ਡਿਯ (ਨਿਯ੍ਯ), ਨ ਦਣ੍ਡਯੇ (?)];

ਅਨ੍ਧੋਵ ਵਿਸਮਂ ਮਗ੍ਗਂ, ਨ ਜਾਨਾਤਿ ਸਮਾਸਮਂ.

੧੦੯. ਯੋ ਚ ਏਤਾਨਿ ਠਾਨਾਨਿ, ਅਣੁਂ ਥੂਲਾਨਿ ਸਬ੍ਬਸੋ;

ਸੁਦਿਟ੍ਠਮਨੁਸਾਸੇਯ੍ਯ, ਸ ਵੇ ਵੋਹਰਿਤੁ [ਵੋਹਾਤੁ (ਪੀ.)] ਮਰਹਤਿ.

੧੧੦. ਨੇਕਨ੍ਤਮੁਦੁਨਾ ਸਕ੍ਕਾ, ਏਕਨ੍ਤਤਿਖਿਣੇਨ ਵਾ;

ਅਤ੍ਤਂ ਮਹਨ੍ਤੇ [ਮਹਤ੍ਤੇ (ਸ੍ਯਾ. ਕ.)] ਠਪੇਤੁਂ [ਠਾਪੇਤੁਂ (ਸੀ. ਸ੍ਯਾ. ਪੀ.)], ਤਸ੍ਮਾ ਉਭਯਮਾਚਰੇ.

੧੧੧. ਪਰਿਭੂਤੋ ਮੁਦੁ ਹੋਤਿ, ਅਤਿਤਿਕ੍ਖੋ ਚ ਵੇਰਵਾ;

ਏਤਞ੍ਚ ਉਭਯਂ ਞਤ੍ਵਾ, ਅਨੁਮਜ੍ਝਂ ਸਮਾਚਰੇ.

੧੧੨. ਬਹੁਮ੍ਪਿ ਰਤ੍ਤੋ ਭਾਸੇਯ੍ਯ, ਦੁਟ੍ਠੋਪਿ ਬਹੁ ਭਾਸਤਿ;

ਨ ਇਤ੍ਥਿਕਾਰਣਾ ਰਾਜ, ਪੁਤ੍ਤਂ ਘਾਤੇਤੁਮਰਹਸਿ.

੧੧੩. ਸਬ੍ਬੋਵ [ਸਬ੍ਬੋ ਚ (ਕ. ਸੀ. ਪੀ.)] ਲੋਕੋ ਏਕਤੋ [ਏਕਨ੍ਤੋ (ਸੀ. ਪੀ.)], ਇਤ੍ਥੀ ਚ ਅਯਮੇਕਿਕਾ;

ਤੇਨਾਹਂ ਪਟਿਪਜ੍ਜਿਸ੍ਸਂ, ਗਚ੍ਛਥ ਪਕ੍ਖਿਪਥੇਵ [ਪਕ੍ਖਿਪੇਥ (ਸ੍ਯਾ. ਅਟ੍ਠ.)] ਤਂ.

੧੧੪. ਅਨੇਕਤਾਲੇ ਨਰਕੇ, ਗਮ੍ਭੀਰੇ ਚ ਸੁਦੁਤ੍ਤਰੇ [ਗਮ੍ਭੀਰੇ ਸੁਦੁਰੁਤ੍ਤਰੇ (ਪੀ. ਕ.)];

ਪਾਤਿਤੋ ਗਿਰਿਦੁਗ੍ਗਸ੍ਮਿਂ, ਕੇਨ ਤ੍ਵਂ ਤਤ੍ਥ ਨਾਮਰਿ.

੧੧੫. ਨਾਗੋ ਜਾਤਫਣੋ ਤਤ੍ਥ, ਥਾਮਵਾ ਗਿਰਿਸਾਨੁਜੋ;

ਪਚ੍ਚਗ੍ਗਹਿ ਮਂ ਭੋਗੇਹਿ, ਤੇਨਾਹਂ ਤਤ੍ਥ ਨਾਮਰਿਂ.

੧੧੬. ਏਹਿ ਤਂ ਪਟਿਨੇਸ੍ਸਾਮਿ, ਰਾਜਪੁਤ੍ਤ ਸਕਂ ਘਰਂ;

ਰਜ੍ਜਂ ਕਾਰੇਹਿ [ਕਾਰੇਸਿ (ਸੀ.)] ਭਦ੍ਦਨ੍ਤੇ, ਕਿਂ ਅਰਞ੍ਞੇ ਕਰਿਸ੍ਸਸਿ.

੧੧੭. ਯਥਾ ਗਿਲਿਤ੍ਵਾ ਬਲ਼ਿਸਂ, ਉਦ੍ਧਰੇਯ੍ਯ ਸਲੋਹਿਤਂ;

ਉਦ੍ਧਰਿਤ੍ਵਾ ਸੁਖੀ ਅਸ੍ਸ, ਏਵਂ [ਸੁਖਂ (ਪੀ. ਕ.)] ਪਸ੍ਸਾਮਿ ਅਤ੍ਤਨਂ [ਅਤ੍ਤਨਿ (ਪੀ. ਕ.), ਅਤ੍ਤਨਾ (ਸ੍ਯਾ.), ਏਵਂ ਅਹਮ੍ਪਿ ਪੁਨ ਸੋਤ੍ਥਿਭਾਵਪ੍ਪਤ੍ਤਂ ਗਿਲਿਤਬਲ਼ਿਸਂ ਪੁਰਿਸਮਿਵ ਅਤ੍ਤਾਨਂ ਪਸ੍ਸਾਮੀਤਿ (ਅਟ੍ਠ. ਸਂਵਣ੍ਣਨਾ)].

੧੧੮. ਕਿਂ ਨੁ ਤ੍ਵਂ ਬਲ਼ਿਸਂ ਬ੍ਰੂਸਿ, ਕਿਂ ਤ੍ਵਂ ਬ੍ਰੂਸਿ ਸਲੋਹਿਤਂ;

ਕਿਂ ਨੁ ਤ੍ਵਂ ਉਬ੍ਭਤਂ ਬ੍ਰੂਸਿ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ.

੧੧੯. ਕਾਮਾਹਂ ਬਲ਼ਿਸਂ ਬ੍ਰੂਮਿ, ਹਤ੍ਥਿਅਸ੍ਸਂ ਸਲੋਹਿਤਂ;

ਚਤ੍ਤਾਹਂ ਉਬ੍ਭਤਂ ਬ੍ਰੂਮਿ, ਏਵਂ ਜਾਨਾਹਿ ਖਤ੍ਤਿਯ.

੧੨੦. ਚਿਞ੍ਚਾਮਾਣਵਿਕਾ ਮਾਤਾ, ਦੇਵਦਤ੍ਤੋ ਚ ਮੇ ਪਿਤਾ;

ਆਨਨ੍ਦੋ ਪਣ੍ਡਿਤੋ ਨਾਗੋ, ਸਾਰਿਪੁਤ੍ਤੋ ਚ ਦੇਵਤਾ;

ਰਾਜਪੁਤ੍ਤੋ ਅਹਂ ਆਸਿਂ [ਅਹਂ ਤਦਾ ਰਾਜਪੁਤ੍ਤੋ (ਸੀ. ਸ੍ਯਾ. ਪੀ.)], ਏਵਂ ਧਾਰੇਥ ਜਾਤਕਨ੍ਤਿ.

ਮਹਾਪਦੁਮਜਾਤਕਂ ਨਵਮਂ.