੪੭੦. ਕੋਸਿਯਜਾਤਕਂ (੭)
੭੩. ਨੇਵ ਕਿਣਾਮਿ ਨਪਿ ਵਿਕ੍ਕਿਣਾਮਿ, ਨ ਚਾਪਿ ਮੇ ਸਨ੍ਨਿਚਯੋ ਚ ਅਤ੍ਥਿ [ਇਧਤ੍ਥਿ (ਸ੍ਯਾ.)];
ਸੁਕਿਚ੍ਛਰੂਪਂ ਵਤਿਦਂ ਪਰਿਤ੍ਤਂ, ਪਤ੍ਥੋਦਨੋ ਨਾਲਮਯਂ ਦੁਵਿਨ੍ਨਂ.
੭੪. ਅਪ੍ਪਮ੍ਹਾ ਅਪ੍ਪਕਂ ਦਜ੍ਜਾ, ਅਨੁਮਜ੍ਝਤੋ ਮਜ੍ਝਕਂ;
ਬਹੁਮ੍ਹਾ ਬਹੁਕਂ ਦਜ੍ਜਾ, ਅਦਾਨਂ ਨੁਪਪਜ੍ਜਤਿ [ਨ ਉਪਪਜ੍ਜਤਿ (ਸੀ. ਪੀ.), ਨੂਪਪਜ੍ਜਤਿ (ਸ੍ਯਾ.)].
੭੫. ਤਂ ਤਂ ਵਦਾਮਿ ਕੋਸਿਯ, ਦੇਹਿ ਦਾਨਾਨਿ ਭੁਞ੍ਜ ਚ.
ਅਰਿਯਮਗ੍ਗਂ ਸਮਾਰੂਹ [ਅਰਿਯਂ ਮਗ੍ਗਂ ਸਮਾਰੁਹ (ਸੀ. ਪੀ.)], ਨੇਕਾਸੀ ਲਭਤੇ ਸੁਖਂ.
੭੬. ਮੋਘਞ੍ਚਸ੍ਸ ਹੁਤਂ ਹੋਤਿ, ਮੋਘਞ੍ਚਾਪਿ ਸਮੀਹਿਤਂ;
ਅਤਿਥਿਸ੍ਮਿਂ ਯੋ ਨਿਸਿਨ੍ਨਸ੍ਮਿਂ, ਏਕੋ ਭੁਞ੍ਜਤਿ ਭੋਜਨਂ.
੭੭. ਤਂ ਤਂ ਵਦਾਮਿ ਕੋਸਿਯ, ਦੇਹਿ ਦਾਨਾਨਿ ਭੁਞ੍ਜ ਚ;
ਅਰਿਯਮਗ੍ਗਂ ਸਮਾਰੂਹ, ਨੇਕਾਸੀ ਲਭਤੇ ਸੁਖਂ.
੭੮. ਸਚ੍ਚਞ੍ਚਸ੍ਸ ਹੁਤਂ ਹੋਤਿ, ਸਚ੍ਚਞ੍ਚਾਪਿ ਸਮੀਹਿਤਂ;
ਅਤਿਥਿਸ੍ਮਿਂ ਯੋ ਨਿਸਿਨ੍ਨਸ੍ਮਿਂ, ਨੇਕੋ ਭੁਞ੍ਜਤਿ ਭੋਜਨਂ.
੭੯. ਤਂ ਤਂ ਵਦਾਮਿ ਕੋਸਿਯ, ਦੇਹਿ ਦਾਨਾਨਿ ਭੁਞ੍ਜ ਚ;
ਅਰਿਯਮਗ੍ਗਂ ਸਮਾਰੂਹ, ਨੇਕਾਸੀ ਲਭਤੇ ਸੁਖਂ.
੮੦. ਸਰਞ੍ਚ ਜੁਹਤਿ ਪੋਸੋ, ਬਹੁਕਾਯ ਗਯਾਯ ਚ;
ਦੋਣੇ ਤਿਮ੍ਬਰੁਤਿਤ੍ਥਸ੍ਮਿਂ, ਸੀਘਸੋਤੇ ਮਹਾਵਹੇ.
੮੧. ਅਤ੍ਰ ਚਸ੍ਸ ਹੁਤਂ ਹੋਤਿ, ਅਤ੍ਰ ਚਸ੍ਸ ਸਮੀਹਿਤਂ;
ਅਤਿਥਿਸ੍ਮਿਂ ਯੋ ਨਿਸਿਨ੍ਨਸ੍ਮਿਂ, ਨੇਕੋ ਭੁਞ੍ਜਤਿ ਭੋਜਨਂ.
੮੨. ਤਂ ਤਂ ਵਦਾਮਿ ਕੋਸਿਯ, ਦੇਹਿ ਦਾਨਾਨਿ ਭੁਞ੍ਜ ਚ;
ਅਰਿਯਮਗ੍ਗਂ ਸਮਾਰੂਹ, ਨੇਕਾਸੀ ਲਭਤੇ ਸੁਖਂ.
੮੩. ਬਲ਼ਿਸਞ੍ਹਿ ਸੋ ਨਿਗਿਲਤਿ [ਨਿਗ੍ਗਿਲਤਿ (ਸੀ. ਪੀ.)], ਦੀਘਸੁਤ੍ਤਂ ਸਬਨ੍ਧਨਂ;
ਅਤਿਥਿਸ੍ਮਿਂ ਯੋ ਨਿਸਿਨ੍ਨਸ੍ਮਿਂ, ਏਕੋ ਭੁਞ੍ਜਤਿ ਭੋਜਨਂ.
੮੪. ਤਂ ਤਂ ਵਦਾਮਿ ਕੋਸਿਯ, ਦੇਹਿ ਦਾਨਾਨਿ ਭੁਞ੍ਜ ਚ;
ਅਰਿਯਮਗ੍ਗਂ ਸਮਾਰੂਹ, ਨੇਕਾਸੀ ਲਭਤੇ ਸੁਖਂ.
੮੫. ਉਲ਼ਾਰਵਣ੍ਣਾ ਵਤ ਬ੍ਰਾਹ੍ਮਣਾ ਇਮੇ, ਅਯਞ੍ਚ ਵੋ ਸੁਨਖੋ ਕਿਸ੍ਸ ਹੇਤੁ;
ਉਚ੍ਚਾਵਚਂ ਵਣ੍ਣਨਿਭਂ ਵਿਕੁਬ੍ਬਤਿ, ਅਕ੍ਖਾਥ ਨੋ ਬ੍ਰਾਹ੍ਮਣਾ ਕੇ ਨੁ ਤੁਮ੍ਹੇ.
੮੬. ਚਨ੍ਦੋ ਚ ਸੁਰਿਯੋ ਚ [ਸੂਰਿਯੋ ਚ (ਕ.)] ਉਭੋ ਇਧਾਗਤਾ, ਅਯਂ ਪਨ ਮਾਤਲਿ ਦੇਵਸਾਰਥਿ;
ਸਕ੍ਕੋਹਮਸ੍ਮਿ ਤਿਦਸਾਨਮਿਨ੍ਦੋ, ਏਸੋ ਚ ਖੋ ਪਞ੍ਚਸਿਖੋਤਿ ਵੁਚ੍ਚਤਿ.
੮੭. ਪਾਣਿਸ੍ਸਰਾ ਮੁਦਿਙ੍ਗਾ ਚ [ਮੁਤਿਙ੍ਗਾ ਚ (ਸੀ. ਸ੍ਯਾ. ਪੀ.], ਮੁਰਜਾਲਮ੍ਬਰਾਨਿ ਚ;
ਸੁਤ੍ਤਮੇਨਂ ਪਬੋਧੇਨ੍ਤਿ, ਪਟਿਬੁਦ੍ਧੋ ਚ ਨਨ੍ਦਤਿ.
੮੮. ਯੇ ਕੇਚਿਮੇ ਮਚ੍ਛਰਿਨੋ ਕਦਰਿਯਾ, ਪਰਿਭਾਸਕਾ ਸਮਣਬ੍ਰਾਹ੍ਮਣਾਨਂ;
ਇਧੇਵ ਨਿਕ੍ਖਿਪ੍ਪ ਸਰੀਰਦੇਹਂ, ਕਾਯਸ੍ਸ ਭੇਦਾ ਨਿਰਯਂ ਵਜਨ੍ਤਿ.
੮੯. ਯੇ ਕੇਚਿਮੇ ਸੁਗ੍ਗਤਿਮਾਸਮਾਨਾ [ਸੁਗ੍ਗਤਿਮਾਸਸਾਨਾ (ਸੀ. ਪੀ.), ਸੁਗ੍ਗਤਾਸਿਸਮਾਨਾ (ਕ.)], ਧਮ੍ਮੇ ਠਿਤਾ ਸਂਯਮੇ ਸਂਵਿਭਾਗੇ;
ਇਧੇਵ ਨਿਕ੍ਖਿਪ੍ਪ ਸਰੀਰਦੇਹਂ, ਕਾਯਸ੍ਸ ਭੇਦਾ ਸੁਗਤਿਂ ਵਜਨ੍ਤਿ.
੯੦. ਤ੍ਵਂ ਨੋਸਿ ਞਾਤਿ ਪੁਰਿਮਾਸੁ ਜਾਤਿਸੁ, ਸੋ ਮਚ੍ਛਰੀ ਰੋਸਕੋ [ਕੋਸਿਯੋ (ਸ੍ਯਾ. ਕ.)] ਪਾਪਧਮ੍ਮੋ;
ਤਵੇਵ ਅਤ੍ਥਾਯ ਇਧਾਗਤਮ੍ਹਾ, ਮਾ ਪਾਪਧਮ੍ਮੋ ਨਿਰਯਂ ਗਮਿਤ੍ਥ [ਅਪ੍ਪਤ੍ਥ (ਕ. ਸੀ. ਸ੍ਯਾ. ਪੀ.)].
੯੧. ਅਦ੍ਧਾ ਹਿ ਮਂ ਵੋ ਹਿਤਕਾਮਾ, ਯਂ ਮਂ ਸਮਨੁਸਾਸਥ;
ਸੋਹਂ ਤਥਾ ਕਰਿਸ੍ਸਾਮਿ, ਸਬ੍ਬਂ ਵੁਤ੍ਤਂ ਹਿਤੇਸਿਭਿ.
੯੨. ਏਸਾਹਮਜ੍ਜੇਵ ਉਪਾਰਮਾਮਿ, ਨ ਚਾਪਿਹਂ [ਨ ਚਾਪਹਂ (ਸੀ. ਪੀ.)] ਕਿਞ੍ਚਿ ਕਰੇਯ੍ਯ ਪਾਪਂ;
ਨ ਚਾਪਿ ਮੇ ਕਿਞ੍ਚਿ ਅਦੇਯ੍ਯਮਤ੍ਥਿ, ਨ ਚਾਪਿਦਤ੍ਵਾ ਉਦਕਂ ਪਿਵਾਮਿ [ਉਦਕਮ੍ਪਹਂ ਪਿਬੇ (ਸੀ.)].
੯੩. ਏਵਞ੍ਚ ਮੇ ਦਦਤੋ ਸਬ੍ਬਕਾਲਂ [ਕਾਲੇ (ਕ.)], ਭੋਗਾ ਇਮੇ ਵਾਸਵ ਖੀਯਿਸ੍ਸਨ੍ਤਿ;
ਤਤੋ ਅਹਂ ਪਬ੍ਬਜਿਸ੍ਸਾਮਿ ਸਕ੍ਕ, ਹਿਤ੍ਵਾਨ ਕਾਮਾਨਿ ਯਥੋਧਿਕਾਨੀਤਿ.
ਕੋਸਿਯਜਾਤਕਂ ਸਤ੍ਤਮਂ.