੪੬੧. ਦਸਰਥਜਾਤਕਂ (੭)

੮੪. ਏਥ ਲਕ੍ਖਣ ਸੀਤਾ ਚ, ਉਭੋ ਓਤਰਥੋਦਕਂ;

ਏਵਾਯਂ ਭਰਤੋ ਆਹ, ‘‘ਰਾਜਾ ਦਸਰਥੋ ਮਤੋ’’.

੮੫. ਕੇਨ ਰਾਮਪ੍ਪਭਾਵੇਨ, ਸੋਚਿਤਬ੍ਬਂ ਨ ਸੋਚਸਿ;

ਪਿਤਰਂ ਕਾਲਕਤਂ [ਕਾਲਙ੍ਕਤਂ (ਕ.)] ਸੁਤ੍ਵਾ, ਨ ਤਂ ਪਸਹਤੇ ਦੁਖਂ.

੮੬. ਯਂ ਨ ਸਕ੍ਕਾ ਨਿਪਾਲੇਤੁਂ, ਪੋਸੇਨ ਲਪਤਂ ਬਹੁਂ;

ਸ ਕਿਸ੍ਸ ਵਿਞ੍ਞੂ ਮੇਧਾਵੀ, ਅਤ੍ਤਾਨਮੁਪਤਾਪਯੇ.

੮੭. ਦਹਰਾ ਚ ਹਿ ਵੁਦ੍ਧਾ ਚ [ਯੇ ਵੁਦ੍ਧਾ (ਸੀ. ਅਟ੍ਠ.), ਯੇ ਵੁਡ੍ਢਾ (ਸ੍ਯਾ.)], ਯੇ ਬਾਲਾ ਯੇ ਚ ਪਣ੍ਡਿਤਾ;

ਅਡ੍ਢਾ ਚੇਵ ਦਲਿਦ੍ਦਾ ਚ, ਸਬ੍ਬੇ ਮਚ੍ਚੁਪਰਾਯਣਾ.

੮੮. ਫਲਾਨਮਿਵ ਪਕ੍ਕਾਨਂ, ਨਿਚ੍ਚਂ ਪਤਨਤੋ ਭਯਂ;

ਏਵਂ ਜਾਤਾਨ ਮਚ੍ਚਾਨਂ, ਨਿਚ੍ਚ ਮਰਣਤੋ ਭਯਂ.

੮੯. ਸਾਯਮੇਕੇ ਨ ਦਿਸ੍ਸਨ੍ਤਿ, ਪਾਤੋ ਦਿਟ੍ਠਾ ਬਹੁਜ੍ਜਨਾ;

ਪਾਤੋ ਏਕੇ ਨ ਦਿਸ੍ਸਨ੍ਤਿ, ਸਾਯਂ ਦਿਟ੍ਠਾ ਬਹੁਜ੍ਜਨਾ.

੯੦. ਪਰਿਦੇਵਯਮਾਨੋ ਚੇ, ਕਿਞ੍ਚਿਦਤ੍ਥਂ ਉਦਬ੍ਬਹੇ;

ਸਮ੍ਮੂਲ਼੍ਹੋ ਹਿਂਸਮਤ੍ਤਾਨਂ, ਕਯਿਰਾ ਤਂ ਵਿਚਕ੍ਖਣੋ.

੯੧. ਕਿਸੋ ਵਿਵਣ੍ਣੋ ਭਵਤਿ, ਹਿਂਸਮਤ੍ਤਾਨਮਤ੍ਤਨੋ [ਮਤ੍ਤਨਾ (ਸੀ. ਅਟ੍ਠ. ਸੁ. ਨਿ. ੫੯੦)];

ਨ ਤੇਨ ਪੇਤਾ ਪਾਲੇਨ੍ਤਿ, ਨਿਰਤ੍ਥਾ ਪਰਿਦੇਵਨਾ.

੯੨. ਯਥਾ ਸਰਣਮਾਦਿਤ੍ਤਂ, ਵਾਰਿਨਾ ਪਰਿਨਿਬ੍ਬਯੇ [ਵਾਰਿਨਾਵਨਿਬ੍ਬਾਪਯੇ (ਸ੍ਯਾ. ਕ.)];

ਏਵਮ੍ਪਿ ਧੀਰੋ ਸੁਤਵਾ, ਮੇਧਾਵੀ ਪਣ੍ਡਿਤੋ ਨਰੋ;

ਖਿਪ੍ਪਮੁਪ੍ਪਤਿਤਂ ਸੋਕਂ, ਵਾਤੋ ਤੂਲਂਵ ਧਂਸਯੇ.

੯੩. ਮਚ੍ਚੋ ਏਕੋਵ [ਏਕੋਵ ਮਚ੍ਚੋ (ਸੀ. ਸ੍ਯਾ. ਪੀ.)] ਅਚ੍ਚੇਤਿ, ਏਕੋਵ ਜਾਯਤੇ ਕੁਲੇ;

ਸਂਯੋਗਪਰਮਾਤ੍ਵੇਵ, ਸਮ੍ਭੋਗਾ ਸਬ੍ਬਪਾਣਿਨਂ.

੯੪. ਤਸ੍ਮਾ ਹਿ ਧੀਰਸ੍ਸ ਬਹੁਸ੍ਸੁਤਸ੍ਸ, ਸਮ੍ਪਸ੍ਸਤੋ ਲੋਕਮਿਮਂ ਪਰਞ੍ਚ;

ਅਞ੍ਞਾਯ ਧਮ੍ਮਂ ਹਦਯਂ ਮਨਞ੍ਚ, ਸੋਕਾ ਮਹਨ੍ਤਾਪਿ ਨ ਤਾਪਯਨ੍ਤਿ.

੯੫. ਸੋਹਂ ਦਸ੍ਸਞ੍ਚ ਭੋਕ੍ਖਞ੍ਚ, ਭਰਿਸ੍ਸਾਮਿ ਚ [ਸੋਹਂ ਯਸਞ੍ਚ ਭੋਗਞ੍ਚ, ਭਰਿਯਾਪਿ ਚ (ਸ੍ਯਾ. ਕ.)] ਞਾਤਕੇ;

ਸੇਸਞ੍ਚ ਪਾਲਯਿਸ੍ਸਾਮਿ, ਕਿਚ੍ਚਮੇਤਂ [ਕਿਚ੍ਚਮੇਵਂ (ਪੀ.)] ਵਿਜਾਨਤੋ.

੯੬. ਦਸ ਵਸ੍ਸਸਹਸ੍ਸਾਨਿ, ਸਟ੍ਠਿ ਵਸ੍ਸਸਤਾਨਿ ਚ;

ਕਮ੍ਬੁਗੀਵੋ ਮਹਾਬਾਹੁ, ਰਾਮੋ ਰਜ੍ਜਮਕਾਰਯੀਤਿ.

ਦਸਰਥਜਾਤਕਂ ਸਤ੍ਤਮਂ.