੧੧. ਏਕਾਦਸਕਨਿਪਾਤੋ

੪੫੫. ਮਾਤੁਪੋਸਕਜਾਤਕਂ (੧)

੧. ਤਸ੍ਸ ਨਾਗਸ੍ਸ ਵਿਪ੍ਪਵਾਸੇਨ, ਵਿਰੂਲ਼੍ਹਾ ਸਲ੍ਲਕੀ ਚ ਕੁਟਜਾ ਚ;

ਕੁਰੁਵਿਨ੍ਦਕਰਵੀਰਾ [ਕਰਵਰਾ (ਸੀ. ਸ੍ਯਾ.)] ਤਿਸਸਾਮਾ ਚ, ਨਿਵਾਤੇ ਪੁਪ੍ਫਿਤਾ ਚ ਕਣਿਕਾਰਾ.

੨. ਕੋਚਿਦੇਵ ਸੁਵਣ੍ਣਕਾਯੁਰਾ, ਨਾਗਰਾਜਂ ਭਰਨ੍ਤਿ ਪਿਣ੍ਡੇਨ;

ਯਤ੍ਥ ਰਾਜਾ ਰਾਜਕੁਮਾਰੋ ਵਾ, ਕਵਚਮਭਿਹੇਸ੍ਸਤਿ ਅਛਮ੍ਭਿਤੋ [ਅਸਮ੍ਭੀਤੋ (ਸੀ. ਸ੍ਯਾ. ਪੀ.)].

੩. ਗਣ੍ਹਾਹਿ ਨਾਗ ਕਬਲ਼ਂ, ਮਾ ਨਾਗ ਕਿਸਕੋ ਭਵ;

ਬਹੂਨਿ ਰਾਜਕਿਚ੍ਚਾਨਿ, ਤਾਨਿ [ਯਾਨਿ (ਸੀ. ਪੀ.)] ਨਾਗ ਕਰਿਸ੍ਸਸਿ.

੪. ਸਾ ਨੂਨਸਾ ਕਪਣਿਕਾ, ਅਨ੍ਧਾ ਅਪਰਿਣਾਯਿਕਾ;

ਖਾਣੁਂ ਪਾਦੇਨ ਘਟ੍ਟੇਤਿ, ਗਿਰਿਂ ਚਣ੍ਡੋਰਣਂ ਪਤਿ.

੫. ਕਾ ਨੁ ਤੇ ਸਾ ਮਹਾਨਾਗ, ਅਨ੍ਧਾ ਅਪਰਿਣਾਯਿਕਾ;

ਖਾਣੁਂ ਪਾਦੇਨ ਘਟ੍ਟੇਤਿ, ਗਿਰਿਂ ਚਣ੍ਡੋਰਣਂ ਪਤਿ.

੬. ਮਾਤਾ ਮੇ ਸਾ ਮਹਾਰਾਜ, ਅਨ੍ਧਾ ਅਪਰਿਣਾਯਿਕਾ;

ਖਾਣੁਂ ਪਾਦੇਨ ਘਟ੍ਟੇਤਿ, ਗਿਰਿਂ ਚਣ੍ਡੋਰਣਂ ਪਤਿ.

੭. ਮੁਞ੍ਚਥੇਤਂ ਮਹਾਨਾਗਂ, ਯੋਯਂ ਭਰਤਿ ਮਾਤਰਂ;

ਸਮੇਤੁ ਮਾਤਰਾ ਨਾਗੋ, ਸਹ ਸਬ੍ਬੇਹਿ ਞਾਤਿਭਿ.

੮. ਮੁਤ੍ਤੋ ਚ ਬਨ੍ਧਨਾ ਨਾਗੋ, ਮੁਤ੍ਤਮਾਦਾਯ ਕੁਞ੍ਜਰੋ [ਕਾਸਿਰਾਜੇਨ ਪੇਸਿਤੋ (ਸੀ. ਸ੍ਯਾ.), ਮੁਤ੍ਤੋ ਦਾਮਾਤੋ ਕੁਞ੍ਜਰੋ (ਪੀ. ਸੀ. ਨਿਯ੍ਯ)];

ਮੁਹੁਤ੍ਤਂ ਅਸ੍ਸਾਸਯਿਤ੍ਵਾ [ਵਿਸ੍ਸਮਿਤ੍ਵਾਨ (ਸੀ.)], ਅਗਮਾ ਯੇਨ ਪਬ੍ਬਤੋ.

੯. ਤਤੋ ਸੋ ਨਲ਼ਿਨਿਂ [ਨਿਲਿਨਂ (ਸ੍ਯਾ.)] ਗਨ੍ਤ੍ਵਾ, ਸੀਤਂ ਕੁਞ੍ਜਰਸੇਵਿਤਂ;

ਸੋਣ੍ਡਾਯੂਦਕਮਾਹਤ੍ਵਾ [ਮਾਹਿਤ੍ਵਾ (ਸ੍ਯਾ. ਕ.)], ਮਾਤਰਂ ਅਭਿਸਿਞ੍ਚਥ.

੧੦. ਕੋਯ ਅਨਰਿਯੋ ਦੇਵੋ, ਅਕਾਲੇਨਪਿ ਵਸ੍ਸਤਿ [ਅਕਾਲੇਨ ਪਵਸ੍ਸਤਿ (ਸੀ. ਸ੍ਯਾ.), ਅਕਾਲੇਨ’ਤਿਵਸ੍ਸਤਿ (ਪੀ.)];

ਗਤੋ ਮੇ ਅਤ੍ਰਜੋ ਪੁਤ੍ਤੋ, ਯੋ ਮਯ੍ਹਂ ਪਰਿਚਾਰਕੋ.

੧੧. ਉਟ੍ਠੇਹਿ ਅਮ੍ਮ ਕਿਂ ਸੇਸਿ, ਆਗਤੋ ਤ੍ਯਾਹਮਤ੍ਰਜੋ;

ਮੁਤ੍ਤੋਮ੍ਹਿ ਕਾਸਿਰਾਜੇਨ, ਵੇਦੇਹੇਨ ਯਸਸ੍ਸਿਨਾ.

੧੨. ਚਿਰਂ ਜੀਵਤੁ ਸੋ ਰਾਜਾ, ਕਾਸੀਨਂ ਰਟ੍ਠਵਡ੍ਢਨੋ;

ਯੋ ਮੇ ਪੁਤ੍ਤਂ ਪਮੋਚੇਸਿ, ਸਦਾ ਵੁਦ੍ਧਾਪਚਾਯਿਕਨ੍ਤਿ.

ਮਾਤੁਪੋਸਕਜਾਤਕਂ ਪਠਮਂ.

੪੫੬. ਜੁਣ੍ਹਜਾਤਕਂ (੨)

੧੩. ਸੁਣੋਹਿ ਮਯ੍ਹਂ ਵਚਨਂ ਜਨਿਨ੍ਦ, ਅਤ੍ਥੇਨ ਜੁਣ੍ਹਮ੍ਹਿ ਇਧਾਨੁਪਤ੍ਤੋ;

ਨ ਬ੍ਰਾਹ੍ਮਣੇ ਅਦ੍ਧਿਕੇ ਤਿਟ੍ਠਮਾਨੇ, ਗਨ੍ਤਬ੍ਬ [ਗਨ੍ਤਬ੍ਯ (ਕ.)] ਮਾਹੁ ਦ੍ਵਿਪਦਿਨ੍ਦ [ਦਿਪਦਾਨ (ਸੀ. ਪੀ.), ਦ੍ਵਿਪਦਾਨ (ਸ੍ਯਾ.)] ਸੇਟ੍ਠ.

੧੪. ਸੁਣੋਮਿ ਤਿਟ੍ਠਾਮਿ ਵਦੇਹਿ ਬ੍ਰਹ੍ਮੇ, ਯੇਨਾਸਿ [ਯੇਨਾਪਿ (ਸ੍ਯਾ. ਕ.)] ਅਤ੍ਥੇਨ ਇਧਾਨੁਪਤ੍ਤੋ;

ਕਂ ਵਾ ਤ੍ਵਮਤ੍ਥਂ ਮਯਿ ਪਤ੍ਥਯਾਨੋ, ਇਧਾਗਮਾ ਬ੍ਰਹ੍ਮੇ ਤਦਿਙ੍ਘ ਬ੍ਰੂਹਿ.

੧੫. ਦਦਾਹਿ ਮੇ ਗਾਮਵਰਾਨਿ ਪਞ੍ਚ, ਦਾਸੀਸਤਂ ਸਤ੍ਤ ਗਵਂਸਤਾਨਿ;

ਪਰੋਸਹਸ੍ਸਞ੍ਚ ਸੁਵਣ੍ਣਨਿਕ੍ਖੇ, ਭਰਿਯਾ ਚ ਮੇ ਸਾਦਿਸੀ ਦ੍ਵੇ ਦਦਾਹਿ.

੧੬. ਤਪੋ ਨੁ ਤੇ ਬ੍ਰਾਹ੍ਮਣ ਭਿਂਸਰੂਪੋ, ਮਨ੍ਤਾ ਨੁ ਤੇ ਬ੍ਰਾਹ੍ਮਣ ਚਿਤ੍ਤਰੂਪਾ;

ਯਕ੍ਖਾ ਨੁ [ਯਕ੍ਖਾ ਵ (ਸੀ. ਪੀ.)] ਤੇ ਅਸ੍ਸਵਾ ਸਨ੍ਤਿ ਕੇਚਿ, ਅਤ੍ਥਂ ਵਾ ਮੇ ਅਭਿਜਾਨਾਸਿ ਕਤ੍ਤਂ.

੧੭. ਨ ਮੇ ਤਪੋ ਅਤ੍ਥਿ ਨ ਚਾਪਿ ਮਨ੍ਤਾ, ਯਕ੍ਖਾਪਿ ਮੇ ਅਸ੍ਸਵਾ ਨਤ੍ਥਿ ਕੇਚਿ;

ਅਤ੍ਥਮ੍ਪਿ ਤੇ ਨਾਭਿਜਾਨਾਮਿ ਕਤ੍ਤਂ, ਪੁਬ੍ਬੇ ਚ ਖੋ [ਪੁਬ੍ਬੇਵ ਖੋ (ਸ੍ਯਾ. ਕ.)] ਸਙ੍ਗਤਿਮਤ੍ਤਮਾਸਿ.

੧੮. ਪਠਮਂ ਇਦਂ ਦਸ੍ਸਨਂ ਜਾਨਤੋ ਮੇ, ਨ ਤਾਭਿਜਾਨਾਮਿ ਇਤੋ ਪੁਰਤ੍ਥਾ;

ਅਕ੍ਖਾਹਿ ਮੇ ਪੁਚ੍ਛਿਤੋ ਏਤਮਤ੍ਥਂ, ਕਦਾ ਕੁਹਿਂ ਵਾ ਅਹੁ ਸਙ੍ਗਮੋ ਨੋ.

੧੯. ਗਨ੍ਧਾਰਰਾਜਸ੍ਸ ਪੁਰਮ੍ਹਿ ਰਮ੍ਮੇ, ਅਵਸਿਮ੍ਹਸੇ ਤਕ੍ਕਸੀਲਾਯਂ ਦੇਵ;

ਤਤ੍ਥਨ੍ਧਕਾਰਮ੍ਹਿ ਤਿਮੀਸਿਕਾਯਂ [ਤਿਮਿਸ੍ਸਿਕਾਯਂ (ਸੀ. ਅਟ੍ਠ.), ਤਿਮਿਸ੍ਸਕਾਯਂ (ਸ੍ਯਾ.)], ਅਂਸੇਨ ਅਂਸਂ ਸਮਘਟ੍ਟਯਿਮ੍ਹ.

੨੦. ਤੇ ਤਤ੍ਥ ਠਤ੍ਵਾਨ ਉਭੋ ਜਨਿਨ੍ਦ, ਸਾਰਾਣਿਯਂ [ਸਾਰਣੀਯਂ (ਕ.)] ਵੀਤਿਸਾਰਯਿਮ੍ਹ [ਵੀਤਿਸਾਰਿਮ੍ਹ (ਸੀ. ਸ੍ਯਾ. ਪੀ.)] ਤਤ੍ਥ;

ਸਾਯੇਵ ਨੋ ਸਙ੍ਗਤਿਮਤ੍ਤਮਾਸਿ, ਤਤੋ ਨ ਪਚ੍ਛਾ ਨ ਪੁਰੇ ਅਹੋਸਿ.

੨੧. ਯਦਾ ਕਦਾਚਿ ਮਨੁਜੇਸੁ ਬ੍ਰਹ੍ਮੇ, ਸਮਾਗਮੋ ਸਪ੍ਪੁਰਿਸੇਨ ਹੋਤਿ;

ਨ ਪਣ੍ਡਿਤਾ ਸਙ੍ਗਤਿਸਨ੍ਥਵਾਨਿ, ਪੁਬ੍ਬੇ ਕਤਂ ਵਾਪਿ ਵਿਨਾਸਯਨ੍ਤਿ.

੨੨. ਬਾਲਾਵ [ਬਾਲਾ ਚ (ਸੀ. ਸ੍ਯਾ. ਪੀ.)] ਖੋ ਸਙ੍ਗਤਿਸਨ੍ਥਵਾਨਿ, ਪੁਬ੍ਬੇ ਕਤਂ ਵਾਪਿ ਵਿਨਾਸਯਨ੍ਤਿ;

ਬਹੁਮ੍ਪਿ ਬਾਲੇਸੁ ਕਤਂ ਵਿਨਸ੍ਸਤਿ, ਤਥਾ ਹਿ ਬਾਲਾ ਅਕਤਞ੍ਞੁਰੂਪਾ.

੨੩. ਧੀਰਾ ਚ ਖੋ ਸਙ੍ਗਤਿਸਨ੍ਥਵਾਨਿ, ਪੁਬ੍ਬੇ ਕਤਂ ਵਾਪਿ ਨ ਨਾਸਯਨ੍ਤਿ;

ਅਪ੍ਪਮ੍ਪਿ ਧੀਰੇਸੁ ਕਤਂ ਨ ਨਸ੍ਸਤਿ, ਤਥਾ ਹਿ ਧੀਰਾ ਸੁਕਤਞ੍ਞੁਰੂਪਾ.

੨੪. ਦਦਾਮਿ ਤੇ ਗਾਮਵਰਾਨਿ ਪਞ੍ਚ, ਦਾਸੀਸਤਂ ਸਤ੍ਤ ਗਵਂਸਤਾਨਿ;

ਪਰੋਸਹਸ੍ਸਞ੍ਚ ਸੁਵਣ੍ਣਨਿਕ੍ਖੇ, ਭਰਿਯਾ ਚ ਤੇ ਸਾਦਿਸੀ ਦ੍ਵੇ ਦਦਾਮਿ.

੨੫. ਏਵਂ ਸਤਂ ਹੋਤਿ ਸਮੇਚ੍ਚ ਰਾਜ, ਨਕ੍ਖਤ੍ਤਰਾਜਾਰਿਵ ਤਾਰਕਾਨਂ;

ਆਪੂਰਤੀ ਕਾਸਿਪਤੀ ਤਥਾਹਂ, ਤਯਾਪਿ ਮੇ ਸਙ੍ਗਮੋ ਅਜ੍ਜ ਲਦ੍ਧੋਤਿ.

ਜੁਣ੍ਹਜਾਤਕਂ ਦੁਤਿਯਂ.

੪੫੭. ਧਮ੍ਮਦੇਵਪੁਤ੍ਤਜਾਤਕਂ (੩)

੨੬. ਯਸੋਕਰੋ ਪੁਞ੍ਞਕਰੋਹਮਸ੍ਮਿ, ਸਦਾਤ੍ਥੁਤੋ ਸਮਣਬ੍ਰਾਹ੍ਮਣਾਨਂ;

ਮਗ੍ਗਾਰਹੋ ਦੇਵਮਨੁਸ੍ਸਪੂਜਿਤੋ, ਧਮ੍ਮੋ ਅਹਂ ਦੇਹਿ ਅਧਮ੍ਮ ਮਗ੍ਗਂ.

੨੭. ਅਧਮ੍ਮਯਾਨਂ ਦਲ਼੍ਹਮਾਰੁਹਿਤ੍ਵਾ, ਅਸਨ੍ਤਸਨ੍ਤੋ ਬਲਵਾਹਮਸ੍ਮਿ;

ਸ ਕਿਸ੍ਸ ਹੇਤੁਮ੍ਹਿ ਤਵਜ੍ਜ ਦਜ੍ਜਂ, ਮਗ੍ਗਂ ਅਹਂ ਧਮ੍ਮ ਅਦਿਨ੍ਨਪੁਬ੍ਬਂ.

੨੮. ਧਮ੍ਮੋ ਹਵੇ ਪਾਤੁਰਹੋਸਿ ਪੁਬ੍ਬੇ, ਪਚ੍ਛਾ ਅਧਮ੍ਮੋ ਉਦਪਾਦਿ ਲੋਕੇ;

ਜੇਟ੍ਠੋ ਚ ਸੇਟ੍ਠੋ ਚ ਸਨਨ੍ਤਨੋ ਚ, ਉਯ੍ਯਾਹਿ ਜੇਟ੍ਠਸ੍ਸ ਕਨਿਟ੍ਠ ਮਗ੍ਗਾ.

੨੯. ਨ ਯਾਚਨਾਯ ਨਪਿ ਪਾਤਿਰੂਪਾ, ਨ ਅਰਹਤਾ [ਨ ਅਰਹਤਿ (ਸੀ. ਪੀ.), ਅਰਹਤਿ (ਕ.)] ਤੇਹਂ ਦਦੇਯ੍ਯਂ ਮਗ੍ਗਂ;

ਯੁਦ੍ਧਞ੍ਚ ਨੋ ਹੋਤੁ ਉਭਿਨ੍ਨਮਜ੍ਜ, ਯੁਦ੍ਧਮ੍ਹਿ ਯੋ ਜੇਸ੍ਸਤਿ ਤਸ੍ਸ ਮਗ੍ਗੋ.

੩੦. ਸਬ੍ਬਾ ਦਿਸਾ ਅਨੁਵਿਸਟੋਹਮਸ੍ਮਿ, ਮਹਬ੍ਬਲੋ ਅਮਿਤਯਸੋ ਅਤੁਲ੍ਯੋ;

ਗੁਣੇਹਿ ਸਬ੍ਬੇਹਿ ਉਪੇਤਰੂਪੋ, ਧਮ੍ਮੋ ਅਧਮ੍ਮ ਤ੍ਵਂ ਕਥਂ ਵਿਜੇਸ੍ਸਸਿ.

੩੧. ਲੋਹੇਨ ਵੇ ਹਞ੍ਞਤਿ ਜਾਤਰੂਪਂ, ਨ ਜਾਤਰੂਪੇਨ ਹਨਨ੍ਤਿ ਲੋਹਂ;

ਸਚੇ ਅਧਮ੍ਮੋ ਹਞ੍ਛਤਿ [ਹਞ੍ਞਤਿ (ਸੀ. ਸ੍ਯਾ.), ਹਞ੍ਞਿਤਿ (ਕਤ੍ਥਚਿ)] ਧਮ੍ਮਮਜ੍ਜ, ਅਯੋ ਸੁਵਣ੍ਣਂ ਵਿਯ ਦਸ੍ਸਨੇਯ੍ਯਂ.

੩੨. ਸਚੇ ਤੁਵਂ ਯੁਦ੍ਧਬਲੋ ਅਧਮ੍ਮ [ਯੁਦ੍ਧਬਲੋ’ਸਿ’ਧਮ੍ਮ (ਕ. ਸੀ.), ਯੁਦ੍ਧਬਲੋ’ਸ’ਧਮ੍ਮ (ਪੀ.)], ਨ ਤੁਯ੍ਹ ਵੁਡ੍ਢਾ [ਵਦ੍ਧਾ (ਸੀ. ਪੀ.)] ਚ ਗਰੂ ਚ ਅਤ੍ਥਿ;

ਮਗ੍ਗਞ੍ਚ ਤੇ ਦਮ੍ਮਿ ਪਿਯਾਪ੍ਪਿਯੇਨ, ਵਾਚਾਦੁਰੁਤ੍ਤਾਨਿਪਿ ਤੇ ਖਮਾਮਿ.

੩੩. ਇਦਞ੍ਚ ਸੁਤ੍ਵਾ ਵਚਨਂ ਅਧਮ੍ਮੋ, ਅਵਂਸਿਰੋ ਪਤਿਤੋ ਉਦ੍ਧਪਾਦੋ;

‘‘ਯੁਦ੍ਧਤ੍ਥਿਕੋ ਚੇ ਨ ਲਭਾਮਿ ਯੁਦ੍ਧਂ’’, ਏਤ੍ਤਾਵਤਾ ਹੋਤਿ ਹਤੋ ਅਧਮ੍ਮੋ.

੩੪. ਖਨ੍ਤੀਬਲੋ ਯੁਦ੍ਧਬਲਂ ਵਿਜੇਤ੍ਵਾ, ਹਨ੍ਤ੍ਵਾ ਅਧਮ੍ਮਂ ਨਿਹਨਿਤ੍ਵ [ਵਿਹਨਿਤ੍ਵਾ (ਕ.)] ਭੂਮ੍ਯਾ;

ਪਾਯਾਸਿ ਵਿਤ੍ਤੋ [ਚਿਤ੍ਤੋ (ਸ੍ਯਾ.)] ਅਭਿਰੁਯ੍ਹ ਸਨ੍ਦਨਂ, ਮਗ੍ਗੇਨੇਵ ਅਤਿਬਲੋ ਸਚ੍ਚਨਿਕ੍ਕਮੋ.

੩੫. ਮਾਤਾ ਪਿਤਾ ਸਮਣਬ੍ਰਾਹ੍ਮਣਾ ਚ, ਅਸਮ੍ਮਾਨਿਤਾ ਯਸ੍ਸ ਸਕੇ ਅਗਾਰੇ;

ਇਧੇਵ ਨਿਕ੍ਖਿਪ੍ਪ ਸਰੀਰਦੇਹਂ, ਕਾਯਸ੍ਸ ਭੇਦਾ ਨਿਰਯਂ ਵਜਨ੍ਤਿ ਤੇ [ਵਜਨ੍ਤਿ (ਸੀ. ਪੀ.)];

ਯਥਾ ਅਧਮ੍ਮੋ ਪਤਿਤੋ ਅਵਂਸਿਰੋ.

੩੬. ਮਾਤਾ ਪਿਤਾ ਸਮਣਬ੍ਰਾਹ੍ਮਣਾ ਚ, ਸੁਸਮ੍ਮਾਨਿਤਾ ਯਸ੍ਸ ਸਕੇ ਅਗਾਰੇ;

ਇਧੇਵ ਨਿਕ੍ਖਿਪ੍ਪ ਸਰੀਰਦੇਹਂ, ਕਾਯਸ੍ਸ ਭੇਦਾ ਸੁਗਤਿਂ ਵਜਨ੍ਤਿ ਤੇ;

ਯਥਾਪਿ ਧਮ੍ਮੋ ਅਭਿਰੁਯ੍ਹ ਸਨ੍ਦਨਨ੍ਤਿ.

ਧਮ੍ਮਦੇਵਪੁਤ੍ਤਜਾਤਕਂ [ਧਮ੍ਮਜਾਤਕਂ (ਸੀ. ਪੀ.)] ਤਤਿਯਂ.

੪੫੮. ਉਦਯਜਾਤਕਂ (੪)

੩੭. ਏਕਾ ਨਿਸਿਨ੍ਨਾ ਸੁਚਿ ਸਞ੍ਞਤੂਰੂ, ਪਾਸਾਦਮਾਰੁਯ੍ਹ ਅਨਿਨ੍ਦਿਤਙ੍ਗੀ;

ਯਾਚਾਮਿ ਤਂ ਕਿਨ੍ਨਰਨੇਤ੍ਤਚਕ੍ਖੁ, ਇਮੇਕਰਤ੍ਤਿਂ ਉਭਯੋ ਵਸੇਮ.

੩੮. ਓਕਿਣ੍ਣਨ੍ਤਰਪਰਿਖਂ, ਦਲ਼੍ਹਮਟ੍ਟਾਲਕੋਟ੍ਠਕਂ;

ਰਕ੍ਖਿਤਂ ਖਗ੍ਗਹਤ੍ਥੇਹਿ, ਦੁਪ੍ਪਵੇਸਮਿਦਂ ਪੁਰਂ.

੩੯. ਦਹਰਸ੍ਸ ਯੁਵਿਨੋ ਚਾਪਿ, ਆਗਮੋ ਚ ਨ ਵਿਜ੍ਜਤਿ;

ਅਥ ਕੇਨ ਨੁ ਵਣ੍ਣੇਨ, ਸਙ੍ਗਮਂ ਇਚ੍ਛਸੇ ਮਯਾ.

੪੦. ਯਕ੍ਖੋਹਮਸ੍ਮਿ ਕਲ੍ਯਾਣਿ, ਆਗਤੋਸ੍ਮਿ ਤਵਨ੍ਤਿਕੇ [ਤਵਨ੍ਤਿਕਂ (ਸੀ. ਪੀ.)];

ਤ੍ਵਂ ਮਂ ਨਨ੍ਦਯ [ਨਨ੍ਦਸ੍ਸੁ (ਸ੍ਯਾ. ਕ.)] ਭਦ੍ਦਨ੍ਤੇ, ਪੁਣ੍ਣਕਂਸਂ ਦਦਾਮਿ ਤੇ.

੪੧. ਦੇਵਂ ਵ ਯਕ੍ਖਂ ਅਥ ਵਾ ਮਨੁਸ੍ਸਂ, ਨ ਪਤ੍ਥਯੇ ਉਦਯਮਤਿਚ੍ਚ ਅਞ੍ਞਂ;

ਗਚ੍ਛੇਵ ਤ੍ਵਂ ਯਕ੍ਖ ਮਹਾਨੁਭਾਵ, ਮਾ ਚਸ੍ਸੁ ਗਨ੍ਤ੍ਵਾ ਪੁਨਰਾਵਜਿਤ੍ਥ.

੪੨. ਯਾ ਸਾ ਰਤਿ ਉਤ੍ਤਮਾ ਕਾਮਭੋਗਿਨਂ, ਯਂ ਹੇਤੁ ਸਤ੍ਤਾ ਵਿਸਮਂ ਚਰਨ੍ਤਿ;

ਮਾ ਤਂ ਰਤਿਂ ਜੀਯਿ ਤੁਵਂ ਸੁਚਿਮ੍ਹਿ ਤੇ, ਦਦਾਮਿ ਤੇ ਰੂਪਿਯਂ ਕਂਸਪੂਰਂ.

੪੩. ਨਾਰਿਂ ਨਰੋ ਨਿਜ੍ਝਪਯਂ ਧਨੇਨ, ਉਕ੍ਕਂਸਤੀ ਯਤ੍ਥ ਕਰੋਤਿ ਛਨ੍ਦਂ;

ਵਿਪਚ੍ਚਨੀਕੋ ਤਵ ਦੇਵਧਮ੍ਮੋ, ਪਚ੍ਚਕ੍ਖਤੋ ਥੋਕਤਰੇਨ ਏਸਿ.

੪੪. ਆਯੁ ਚ ਵਣ੍ਣੋ ਚ [ਆਯੁਂ ਚ ਵਣ੍ਣਂ ਚ (ਕ. ਸੀ. ਪੀ.)] ਮਨੁਸ੍ਸਲੋਕੇ, ਨਿਹੀਯਤਿ ਮਨੁਜਾਨਂ ਸੁਗ੍ਗਤ੍ਤੇ;

ਤੇਨੇਵ ਵਣ੍ਣੇਨ ਧਨਮ੍ਪਿ ਤੁਯ੍ਹਂ, ਨਿਹੀਯਤਿ ਜਿਣ੍ਣਤਰਾਸਿ ਅਜ੍ਜ.

੪੫. ਏਵਂ ਮੇ ਪੇਕ੍ਖਮਾਨਸ੍ਸ, ਰਾਜਪੁਤ੍ਤਿ ਯਸਸ੍ਸਿਨਿ;

ਹਾਯਤੇਵ ਤਵ [ਹਾਯਤੇ ਵਤ ਤੇ (ਸੀ. ਸ੍ਯਾ. ਕ.), ਹਾਯਤੇਵ ਤਤੋ (ਪੀ.)] ਵਣ੍ਣੋ, ਅਹੋਰਤ੍ਤਾਨਮਚ੍ਚਯੇ.

੪੬. ਇਮਿਨਾਵ ਤ੍ਵਂ ਵਯਸਾ, ਰਾਜਪੁਤ੍ਤਿ ਸੁਮੇਧਸੇ;

ਬ੍ਰਹ੍ਮਚਰਿਯਂ ਚਰੇਯ੍ਯਾਸਿ, ਭਿਯ੍ਯੋ ਵਣ੍ਣਵਤੀ ਸਿਯਾ.

੪੭. ਦੇਵਾ ਨ ਜੀਰਨ੍ਤਿ ਯਥਾ ਮਨੁਸ੍ਸਾ, ਗਤ੍ਤੇਸੁ ਤੇਸਂ ਵਲਿਯੋ ਨ ਹੋਨ੍ਤਿ;

ਪੁਚ੍ਛਾਮਿ ਤਂ ਯਕ੍ਖ ਮਹਾਨੁਭਾਵ, ਕਥਂ ਨੁ ਦੇਵਾਨ [ਕਥਂ ਨ ਦੇਵਾਨਂ (ਪੀ.)] ਸਰੀਰਦੇਹੋ.

੪੮. ਦੇਵਾ ਨ ਜੀਰਨ੍ਤਿ ਯਥਾ ਮਨੁਸ੍ਸਾ, ਗਤ੍ਤੇਸੁ ਤੇਸਂ ਵਲਿਯੋ ਨ ਹੋਨ੍ਤਿ;

ਸੁਵੇ ਸੁਵੇ ਭਿਯ੍ਯਤਰੋਵ [ਭਿਯ੍ਯਤਰੋ ਚ (ਕ.)] ਤੇਸਂ, ਦਿਬ੍ਬੋ ਚ ਵਣ੍ਣੋ ਵਿਪੁਲਾ ਚ ਭੋਗਾ.

੪੯. ਕਿਂਸੂਧ ਭੀਤਾ ਜਨਤਾ ਅਨੇਕਾ, ਮਗ੍ਗੋ ਚ ਨੇਕਾਯਤਨਂ ਪਵੁਤ੍ਤੋ;

ਪੁਚ੍ਛਾਮਿ ਤਂ ਯਕ੍ਖ ਮਹਾਨੁਭਾਵ, ਕਤ੍ਥਟ੍ਠਿਤੋ ਪਰਲੋਕਂ ਨ ਭਾਯੇ.

੫੦. ਵਾਚਂ ਮਨਞ੍ਚ ਪਣਿਧਾਯ ਸਮ੍ਮਾ, ਕਾਯੇਨ ਪਾਪਾਨਿ ਅਕੁਬ੍ਬਮਾਨੋ;

ਬਹੁਨ੍ਨਪਾਨਂ ਘਰਮਾਵਸਨ੍ਤੋ, ਸਦ੍ਧੋ ਮੁਦੂ ਸਂਵਿਭਾਗੀ ਵਦਞ੍ਞੂ;

ਸਙ੍ਗਾਹਕੋ ਸਖਿਲੋ ਸਣ੍ਹਵਾਚੋ, ਏਤ੍ਥਟ੍ਠਿਤੋ ਪਰਲੋਕਂ ਨ ਭਾਯੇ.

੫੧. ਅਨੁਸਾਸਸਿ ਮਂ ਯਕ੍ਖ, ਯਥਾ ਮਾਤਾ ਯਥਾ ਪਿਤਾ;

ਉਲ਼ਾਰਵਣ੍ਣਂ ਪੁਚ੍ਛਾਮਿ, ਕੋ ਨੁ ਤ੍ਵਮਸਿ ਸੁਬ੍ਰਹਾ.

੫੨. ਉਦਯੋਹਮਸ੍ਮਿ ਕਲ੍ਯਾਣਿ, ਸਙ੍ਕਰਤ੍ਤਾ ਇਧਾਗਤੋ [ਸਙ੍ਗਰਤ੍ਥਾ ਇਧਾਗਤੋ (ਸੀ. ਪੀ.), ਸਙ੍ਗਰਤ੍ਥਾਯਿਧਾਗਤੋ (ਸ੍ਯਾ.)];

ਆਮਨ੍ਤ ਖੋ ਤਂ ਗਚ੍ਛਾਮਿ, ਮੁਤ੍ਤੋਸ੍ਮਿ ਤਵ ਸਙ੍ਕਰਾ [ਸਙ੍ਗਰਾ (ਸੀ. ਸ੍ਯਾ. ਪੀ.)].

੫੩. ਸਚੇ ਖੋ ਤ੍ਵਂ ਉਦਯੋਸਿ, ਸਙ੍ਕਰਤ੍ਤਾ ਇਧਾਗਤੋ;

ਅਨੁਸਾਸ ਮਂ ਰਾਜਪੁਤ੍ਤ, ਯਥਾਸ੍ਸ ਪੁਨ ਸਙ੍ਗਮੋ.

੫੪. ਅਤਿਪਤਤਿ [ਅਧਿਪਤਤੀ (ਸੀ. ਪੀ.)] ਵਯੋ ਖਣੋ ਤਥੇਵ, ਠਾਨਂ ਨਤ੍ਥਿ ਧੁਵਂ ਚਵਨ੍ਤਿ ਸਤ੍ਤਾ;

ਪਰਿਜਿਯ੍ਯਤਿ ਅਦ੍ਧੁਵਂ ਸਰੀਰਂ, ਉਦਯੇ ਮਾ ਪਮਾਦ [ਮਾ ਪਮਾਦਂ (ਸੀ.)] ਚਰਸ੍ਸੁ ਧਮ੍ਮਂ.

੫੫. ਕਸਿਣਾ ਪਥਵੀ ਧਨਸ੍ਸ ਪੂਰਾ, ਏਕਸ੍ਸੇਵ ਸਿਯਾ ਅਨਞ੍ਞਧੇਯ੍ਯਾ;

ਤਞ੍ਚਾਪਿ ਜਹਤਿ [ਜਹਾਤਿ (ਸੀ. ਸ੍ਯਾ. ਪੀ.), ਜਹਾਤੀ (?)] ਅਵੀਤਰਾਗੋ, ਉਦਯੇ ਮਾ ਪਮਾਦ ਚਰਸ੍ਸੁ ਧਮ੍ਮਂ.

੫੬. ਮਾਤਾ ਚ ਪਿਤਾ ਚ ਭਾਤਰੋ ਚ, ਭਰਿਯਾ ਯਾਪਿ ਧਨੇਨ ਹੋਤਿ ਕੀਤਾ [ਭਰਿਯਾਪਿ ਧਨੇਨ ਹੋਨ੍ਤਿ ਅਤਿਤ੍ਤਾ (ਕ.)];

ਤੇ ਚਾਪਿ ਜਹਨ੍ਤਿ ਅਞ੍ਞਮਞ੍ਞਂ, ਉਦਯੇ ਮਾ ਪਮਾਦ ਚਰਸ੍ਸੁ ਧਮ੍ਮਂ.

੫੭. ਕਾਯੋ ਪਰਭੋਜਨਨ੍ਤਿ ਞਤ੍ਵਾ [ਕਾਯੋ ਚ ਪਰਭੋਜਨਂ ਵਿਦਿਤ੍ਵਾ (ਕ.)], ਸਂਸਾਰੇ ਸੁਗਤਿਞ੍ਚ ਦੁਗ੍ਗਤਿਞ੍ਚ [ਸੁਗਤੀ ਚ ਦੁਗ੍ਗਤੀ ਚ (ਸੀ. ਸ੍ਯਾ. ਪੀ.), ਸੁਗ੍ਗਤਿਂ ਦੁਗ੍ਗਤਿਞ੍ਚ (ਕ.)];

ਇਤ੍ਤਰਵਾਸੋਤਿ ਜਾਨਿਯਾਨ, ਉਦਯੇ ਮਾ ਪਮਾਦ ਚਰਸ੍ਸੁ ਧਮ੍ਮਂ.

੫੮. ਸਾਧੁ ਭਾਸਤਿਯਂ [ਭਾਸਤਯਂ (ਸੀ. ਪੀ.)] ਯਕ੍ਖੋ, ਅਪ੍ਪਂ ਮਚ੍ਚਾਨ ਜੀਵਿਤਂ;

ਕਸਿਰਞ੍ਚ ਪਰਿਤ੍ਤਞ੍ਚ, ਤਞ੍ਚ ਦੁਕ੍ਖੇਨ ਸਂਯੁਤਂ;

ਸਾਹਂ ਏਕਾ ਪਬ੍ਬਜਿਸ੍ਸਾਮਿ, ਹਿਤ੍ਵਾ ਕਾਸਿਂ ਸੁਰੁਨ੍ਧਨਨ੍ਤਿ.

ਉਦਯਜਾਤਕਂ ਚਤੁਤ੍ਥਂ.

੪੫੯. ਪਾਨੀਯਜਾਤਕਂ (੫)

੫੯. ਮਿਤ੍ਤੋ ਮਿਤ੍ਤਸ੍ਸ ਪਾਨੀਯਂ, ਅਦਿਨ੍ਨਂ ਪਰਿਭੁਞ੍ਜਿਸਂ;

ਤੇਨ ਪਚ੍ਛਾ ਵਿਜਿਗੁਚ੍ਛਿਂ, ਤਂ ਪਾਪਂ ਪਕਤਂ ਮਯਾ;

ਮਾ ਪੁਨ ਅਕਰਂ ਪਾਪਂ, ਤਸ੍ਮਾ ਪਬ੍ਬਜਿਤੋ ਅਹਂ.

੬੦. ਪਰਦਾਰਞ੍ਚ ਦਿਸ੍ਵਾਨ, ਛਨ੍ਦੋ ਮੇ ਉਦਪਜ੍ਜਥ [ਉਪਪਜ੍ਜਥ (ਸ੍ਯਾ. ਕ.)];

ਤੇਨ ਪਚ੍ਛਾ ਵਿਜਿਗੁਚ੍ਛਿਂ, ਤਂ ਪਾਪਂ ਪਕਤਂ ਮਯਾ;

ਮਾ ਪੁਨ ਅਕਰਂ ਪਾਪਂ, ਤਸ੍ਮਾ ਪਬ੍ਬਜਿਤੋ ਅਹਂ.

੬੧. ਪਿਤਰਂ ਮੇ ਮਹਾਰਾਜ, ਚੋਰਾ ਅਗਣ੍ਹੁ [ਅਗਣ੍ਹੁਂ (ਸੀ. ਪੀ.), ਅਗਣ੍ਹਿ (ਕ.)] ਕਾਨਨੇ;

ਤੇਸਾਹਂ ਪੁਚ੍ਛਿਤੋ ਜਾਨਂ, ਅਞ੍ਞਥਾ ਨਂ ਵਿਯਾਕਰਿਂ.

੬੨. ਤੇਨ ਪਚ੍ਛਾ ਵਿਜਿਗੁਚ੍ਛਿਂ, ਤਂ ਪਾਪਂ ਪਕਤਂ ਮਯਾ;

ਮਾ ਪੁਨ ਅਕਰਂ ਪਾਪਂ, ਤਸ੍ਮਾ ਪਬ੍ਬਜਿਤੋ ਅਹਂ.

੬੩. ਪਾਣਾਤਿਪਾਤਮਕਰੁਂ, ਸੋਮਯਾਗੇ ਉਪਟ੍ਠਿਤੇ;

ਤੇਸਾਹਂ ਸਮਨੁਞ੍ਞਾਸਿਂ, ਤੇਨ ਪਚ੍ਛਾ ਵਿਜਿਗੁਚ੍ਛਿਂ.

੬੪. ਤਂ ਪਾਪਂ ਪਕਤਂ ਮਯਾ, ਮਾ ਪੁਨ ਅਕਰਂ ਪਾਪਂ;

ਤਸ੍ਮਾ ਪਬ੍ਬਜਿਤੋ ਅਹਂ.

੬੫. ਸੁਰਾਮੇਰਯਮਾਧੁਕਾ [ਮਧੁਕਾ (ਸੀ. ਸ੍ਯਾ. ਪੀ.)], ਯੇ ਜਨਾ ਪਠਮਾਸੁ ਨੋ;

ਬਹੂਨਂ ਤੇ ਅਨਤ੍ਥਾਯ, ਮਜ੍ਜਪਾਨਮਕਪ੍ਪਯੁਂ.

੬੬. ਤੇਸਾਹਂ ਸਮਨੁਞ੍ਞਾਸਿਂ, ਤੇਨ ਪਚ੍ਛਾ ਵਿਜਿਗੁਚ੍ਛਿਂ;

ਤਂ ਪਾਪਂ ਪਕਤਂ ਮਯਾ, ਮਾ ਪੁਨ ਅਕਰਂ ਪਾਪਂ;

ਤਸ੍ਮਾ ਪਬ੍ਬਜਿਤੋ ਅਹਂ.

੬੭. ਧਿਰਤ੍ਥੁ ਸੁਬਹੂ ਕਾਮੇ, ਦੁਗ੍ਗਨ੍ਧੇ ਬਹੁਕਣ੍ਟਕੇ;