੪੬੨. ਸਂਵਰਜਾਤਕਂ (੮)
੯੭. ਜਾਨਨ੍ਤੋ ਨੋ ਮਹਾਰਾਜ, ਤਵ ਸੀਲਂ ਜਨਾਧਿਪੋ;
ਇਮੇ ਕੁਮਾਰੇ ਪੂਜੇਨ੍ਤੋ, ਨ ਤਂ ਕੇਨਚਿ ਮਞ੍ਞਥ.
੯੮. ਤਿਟ੍ਠਨ੍ਤੇ ਨੋ ਮਹਾਰਾਜੇ, ਅਦੁ [ਆਦੁ (ਸੀ. ਪੀ.), ਆਦੂ (ਸ੍ਯਾ.)] ਦੇਵੇ ਦਿਵਙ੍ਗਤੇ;
ਞਾਤੀ ਤਂ ਸਮਨੁਞ੍ਞਿਂਸੁ, ਸਮ੍ਪਸ੍ਸਂ ਅਤ੍ਥਮਤ੍ਤਨੋ.
੯੯. ਕੇਨ ਸਂਵਰਵਤ੍ਤੇਨ, ਸਞ੍ਜਾਤੇ ਅਭਿਤਿਟ੍ਠਸਿ;
ਕੇਨ ਤਂ ਨਾਤਿਵਤ੍ਤਨ੍ਤਿ, ਞਾਤਿਸਙ੍ਘਾ ਸਮਾਗਤਾ.
੧੦੦. ਨ ਰਾਜਪੁਤ੍ਤ ਉਸੂਯਾਮਿ [ਰਾਜਪੁਤ੍ਤ ਨੁਸ੍ਸੁਯ੍ਯਾਮਿ (ਕ.)], ਸਮਣਾਨਂ ਮਹੇਸਿਨਂ;
ਸਕ੍ਕਚ੍ਚਂ ਤੇ ਨਮਸ੍ਸਾਮਿ, ਪਾਦੇ ਵਨ੍ਦਾਮਿ ਤਾਦਿਨਂ.
੧੦੧. ਤੇ ਮਂ ਧਮ੍ਮਗੁਣੇ ਯੁਤ੍ਤਂ, ਸੁਸ੍ਸੂਸਮਨੁਸੂਯਕਂ;
ਸਮਣਾ ਮਨੁਸਾਸਨ੍ਤਿ [ਸਮਨੁਸਾਸਨ੍ਤਿ (ਸੀ. ਸ੍ਯਾ. ਪੀ.)], ਇਸੀ ਧਮ੍ਮਗੁਣੇ ਰਤਾ.
੧੦੨. ਤੇਸਾਹਂ ਵਚਨਂ ਸੁਤ੍ਵਾ, ਸਮਣਾਨਂ ਮਹੇਸਿਨਂ;
ਨ ਕਿਞ੍ਚਿ ਅਤਿਮਞ੍ਞਾਮਿ, ਧਮ੍ਮੇ ਮੇ ਨਿਰਤੋ ਮਨੋ.
੧੦੩. ਹਤ੍ਥਾਰੋਹਾ ਅਨੀਕਟ੍ਠਾ, ਰਥਿਕਾ ਪਤ੍ਤਿਕਾਰਕਾ;
ਤੇਸਂ [ਤੇਸੁ (ਪੀ.)] ਨਪ੍ਪਟਿਬਨ੍ਧਾਮਿ, ਨਿਵਿਟ੍ਠਂ [ਨਿਬਦ੍ਧਂ (ਸੀ. ਪੀ.)] ਭਤ੍ਤਵੇਤਨਂ.
੧੦੪. ਮਹਾਮਤ੍ਤਾ ਚ ਮੇ ਅਤ੍ਥਿ, ਮਨ੍ਤਿਨੋ ਪਰਿਚਾਰਕਾ;
ਬਾਰਾਣਸਿਂ ਵੋਹਰਨ੍ਤਿ, ਬਹੁਮਂਸਸੁਰੋਦਕਂ.
੧੦੫. ਅਥੋਪਿ ਵਾਣਿਜਾ ਫੀਤਾ, ਨਾਨਾਰਟ੍ਠੇਹਿ ਆਗਤਾ;
ਤੇਸੁ ਮੇ ਵਿਹਿਤਾ ਰਕ੍ਖਾ, ਏਵਂ ਜਾਨਾਹੁਪੋਸਥ.
੧੦੬. ਧਮ੍ਮੇਨ ਕਿਰ ਞਾਤੀਨਂ, ਰਜ੍ਜਂ ਕਾਰੇਹਿ ਸਂਵਰ;
ਮੇਧਾਵੀ ਪਣ੍ਡਿਤੋ ਚਾਸਿ [ਚਾਪਿ (ਸੀ. ਪੀ.)], ਅਥੋਪਿ ਞਾਤਿਨਂ ਹਿਤੋ.
੧੦੭. ਤਂ ਤਂ ਞਾਤਿਪਰਿਬ੍ਯੂਲ਼੍ਹਂ, ਨਾਨਾਰਤਨਮੋਚਿਤਂ;
ਅਮਿਤ੍ਤਾ ਨਪ੍ਪਸਹਨ੍ਤਿ, ਇਨ੍ਦਂਵ ਅਸੁਰਾਧਿਪੋਤਿ.
ਸਂਵਰਜਾਤਕਂ ਅਟ੍ਠਮਂ.