੪੬੦. ਯੁਧਞ੍ਚਯਜਾਤਕਂ (੬)

੭੩. ਮਿਤ੍ਤਾਮਚ੍ਚਪਰਿਬ੍ਯੂਲ਼੍ਹਂ [ਪਰਿਬ੍ਬੂਲ਼੍ਹਂ (ਸੀ. ਪੀ.)], ਅਹਂ ਵਨ੍ਦੇ ਰਥੇਸਭਂ;

ਪਬ੍ਬਜਿਸ੍ਸਾਮਹਂ ਰਾਜ [ਪਬ੍ਬਜਿਸ੍ਸਂ ਮਹਾਰਾਜ (ਸੀ. ਪੀ.)], ਤਂ ਦੇਵੋ ਅਨੁਮਞ੍ਞਤੁ.

੭੪. ਸਚੇ ਤੇ ਊਨਂ ਕਾਮੇਹਿ, ਅਹਂ ਪਰਿਪੂਰਯਾਮਿ [ਅਹਂਵ ਪੂਰਯਾਮਿ (ਕ.)] ਤੇ;

ਯੋ ਤਂ ਹਿਂਸਤਿ ਵਾਰੇਮਿ, ਮਾ ਪਬ੍ਬਜ [ਪਬ੍ਬਜਿ (ਪੀ.)] ਯੁਧਞ੍ਚਯ [ਯੁਧਞ੍ਜਯ (ਸੀ. ਸ੍ਯਾ.), ਯੁਵਞ੍ਜਯ (ਪੀ.)].

੭੫. ਨ ਮਤ੍ਥਿ ਊਨਂ ਕਾਮੇਹਿ, ਹਿਂਸਿਤਾ ਮੇ ਨ ਵਿਜ੍ਜਤਿ;

ਦੀਪਞ੍ਚ ਕਾਤੁਮਿਚ੍ਛਾਮਿ, ਯਂ ਜਰਾ ਨਾਭਿਕੀਰਤਿ.

੭੬. ਪੁਤ੍ਤੋ ਵਾ ਪਿਤਰਂ ਯਾਚੇ, ਪਿਤਾ ਵਾ ਪੁਤ੍ਤਮੋਰਸਂ;

ਨੇਗਮੋ ਤਂ ਯਾਚੇ [ਨੇਗਮੋ ਯਾਚਤੇ (ਸੀ. ਸ੍ਯਾ. ਪੀ.)] ਤਾਤ, ਮਾ ਪਬ੍ਬਜ ਯੁਧਞ੍ਚਯ.

੭੭. ਮਾ ਮਂ ਦੇਵ ਨਿਵਾਰੇਹਿ, ਪਬ੍ਬਜਨ੍ਤਂ ਰਥੇਸਭ;

ਮਾਹਂ ਕਾਮੇਹਿ ਸਮ੍ਮਤ੍ਤੋ, ਜਰਾਯ ਵਸਮਨ੍ਵਗੂ.

੭੮. ਅਹਂ ਤਂ ਤਾਤ ਯਾਚਾਮਿ, ਅਹਂ ਪੁਤ੍ਤ ਨਿਵਾਰਯੇ;

ਚਿਰਂ ਤਂ ਦਟ੍ਠੁਮਿਚ੍ਛਾਮਿ, ਮਾ ਪਬ੍ਬਜ ਯੁਧਞ੍ਚਯ.

੭੯. ਉਸ੍ਸਾਵੋਵ ਤਿਣਗ੍ਗਮ੍ਹਿ, ਸੂਰਿਯੁਗ੍ਗਮਨਂ ਪਤਿ;

ਏਵਮਾਯੁ ਮਨੁਸ੍ਸਾਨਂ, ਮਾ ਮਂ ਅਮ੍ਮ ਨਿਵਾਰਯ.

੮੦. ਤਰਮਾਨੋ ਇਮਂ ਯਾਨਂ, ਆਰੋਪੇਤੁ [ਤਰਮਾਨਾ ਇਮਂ ਯਾਨਂ, ਆਰੋਪੇਨ੍ਤੁ (ਸੀ. ਪੀ.)] ਰਥੇਸਭ;

ਮਾ ਮੇ ਮਾਤਾ ਤਰਨ੍ਤਸ੍ਸ, ਅਨ੍ਤਰਾਯਕਰਾ ਅਹੁ.

੮੧. ਅਭਿਧਾਵਥ ਭਦ੍ਦਨ੍ਤੇ, ਸੁਞ੍ਞਂ ਹੇਸ੍ਸਤਿ ਰਮ੍ਮਕਂ;

ਯੁਧਞ੍ਚਯੋ ਅਨੁਞ੍ਞਾਤੋ, ਸਬ੍ਬਦਤ੍ਤੇਨ ਰਾਜਿਨਾ.

੮੨. ਯੋਹੁ ਸੇਟ੍ਠੋ ਸਹਸ੍ਸਸ੍ਸ [ਮਨੁਸ੍ਸਾਨਂ (ਸ੍ਯਾ.), ਸਹਸ੍ਸਾਨਂ (ਕ.)], ਯੁਵਾ ਕਞ੍ਚਨਸਨ੍ਨਿਭੋ;

ਸੋਯਂ ਕੁਮਾਰੋ ਪਬ੍ਬਜਿਤੋ, ਕਾਸਾਯਵਸਨੋ ਬਲੀ.

੮੩. ਉਭੋ ਕੁਮਾਰਾ ਪਬ੍ਬਜਿਤਾ, ਯੁਧਞ੍ਚਯੋ ਯੁਧਿਟ੍ਠਿਲੋ;

ਪਹਾਯ ਮਾਤਾਪਿਤਰੋ, ਸਙ੍ਗਂ ਛੇਤ੍ਵਾਨ ਮਚ੍ਚੁਨੋਤਿ.

ਯੁਧਞ੍ਚਯਜਾਤਕਂ ਛਟ੍ਠਂ.