੩. ਤਤਿਯਵਗ੍ਗੋ

੧. ਮਿਚ੍ਛਾਦਿਟ੍ਠਿਕਸੁਤ੍ਤਂ

੭੦. ਵੁਤ੍ਤਞ੍ਹੇਤਂ ਭਗਵਤਾ, ਵੁਤ੍ਤਮਰਹਤਾਤਿ ਮੇ ਸੁਤਂ –

‘‘ਦਿਟ੍ਠਾ ਮਯਾ, ਭਿਕ੍ਖਵੇ, ਸਤ੍ਤਾ ਕਾਯਦੁਚ੍ਚਰਿਤੇਨ ਸਮਨ੍ਨਾਗਤਾ ਵਚੀਦੁਚ੍ਚਰਿਤੇਨ ਸਮਨ੍ਨਾਗਤਾ ਮਨੋਦੁਚ੍ਚਰਿਤੇਨ ਸਮਨ੍ਨਾਗਤਾ ਅਰਿਯਾਨਂ ਉਪਵਾਦਕਾ ਮਿਚ੍ਛਾਦਿਟ੍ਠਿਕਾ ਮਿਚ੍ਛਾਦਿਟ੍ਠਿਕਮ੍ਮਸਮਾਦਾਨਾ. ਤੇ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਨ੍ਨਾ.

‘‘ਤਂ ਖੋ ਪਨਾਹਂ, ਭਿਕ੍ਖਵੇ, ਨਾਞ੍ਞਸ੍ਸ ਸਮਣਸ੍ਸ ਵਾ ਬ੍ਰਾਹ੍ਮਣਸ੍ਸ ਵਾ ਸੁਤ੍ਵਾ ਵਦਾਮਿ. ਦਿਟ੍ਠਾ ਮਯਾ, ਭਿਕ੍ਖਵੇ, ਸਤ੍ਤਾ ਕਾਯਦੁਚ੍ਚਰਿਤੇਨ ਸਮਨ੍ਨਾਗਤਾ ਵਚੀਦੁਚ੍ਚਰਿਤੇਨ ਸਮਨ੍ਨਾਗਤਾ ਮਨੋਦੁਚ੍ਚਰਿਤੇਨ ਸਮਨ੍ਨਾਗਤਾ ਅਰਿਯਾਨਂ ਉਪਵਾਦਕਾ ਮਿਚ੍ਛਾਦਿਟ੍ਠਿਕਾ ਮਿਚ੍ਛਾਦਿਟ੍ਠਿਕਮ੍ਮਸਮਾਦਾਨਾ. ਤੇ ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਨ੍ਨਾ. ਅਪਿ ਚ, ਭਿਕ੍ਖਵੇ, ਯਦੇਵ ਸਾਮਂ ਞਾਤਂ ਸਾਮਂ ਦਿਟ੍ਠਂ ਸਾਮਂ ਵਿਦਿਤਂ ਤਦੇਵਾਹਂ ਵਦਾਮਿ.

‘‘ਮਿਚ੍ਛਾ ਮਨਂ ਪਣਿਧਾਯ, ਮਿਚ੍ਛਾ ਵਾਚਞ੍ਚ ਭਾਸਿਯ [ਮਿਚਾ ਵਾਚਂ ਅਭਾਸਿਯ (ਸਬ੍ਬਤ੍ਥ)];

ਮਿਚ੍ਛਾ ਕਮ੍ਮਾਨਿ ਕਤ੍ਵਾਨ, ਕਾਯੇਨ ਇਧ ਪੁਗ੍ਗਲੋ.

‘‘ਅਪ੍ਪਸ੍ਸੁਤਾਪੁਞ੍ਞਕਰੋ [ਅਪ੍ਪਸ੍ਸੁਤੋਪੁਞ੍ਞਕਰੋ (ਸੀ.), ਅਪ੍ਪਸ੍ਸੁਤੋ ਅਪੁਞ੍ਞਕਰੋ (ਸ੍ਯਾ. ਪੀ.)], ਅਪ੍ਪਸ੍ਮਿਂ ਇਧ ਜੀਵਿਤੇ;

ਕਾਯਸ੍ਸ ਭੇਦਾ ਦੁਪ੍ਪਞ੍ਞੋ, ਨਿਰਯਂ ਸੋਪਪਜ੍ਜਤੀ’’ਤਿ.

ਅਯਮ੍ਪਿ ਅਤ੍ਥੋ ਵੁਤ੍ਤੋ ਭਗਵਤਾ, ਇਤਿ ਮੇ ਸੁਤਨ੍ਤਿ. ਪਠਮਂ.

੨. ਸਮ੍ਮਾਦਿਟ੍ਠਿਕਸੁਤ੍ਤਂ

੭੧. ਵੁਤ੍ਤਞ੍ਹੇਤਂ ਭਗਵਤਾ, ਵੁਤ੍ਤਮਰਹਤਾਤਿ ਮੇ ਸੁਤਂ –

‘‘ਦਿਟ੍ਠਾ ਮਯਾ, ਭਿਕ੍ਖਵੇ, ਸਤ੍ਤਾ ਕਾਯਸੁਚਰਿਤੇਨ ਸਮਨ੍ਨਾਗਤਾ ਵਚੀਸੁਚਰਿਤੇਨ ਸਮਨ੍ਨਾਗਤਾ ਮਨੋਸੁਚਰਿਤੇਨ ਸਮਨ੍ਨਾਗਤਾ ਅਰਿਯਾਨਂ ਅਨੁਪਵਾਦਕਾ ਸਮ੍ਮਾਦਿਟ੍ਠਿਕਾ ਸਮ੍ਮਾਦਿਟ੍ਠਿਕਮ੍ਮਸਮਾਦਾਨਾ. ਤੇ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਨ੍ਨਾ.

‘‘ਤਂ ਖੋ ਪਨਾਹਂ, ਭਿਕ੍ਖਵੇ, ਨਾਞ੍ਞਸ੍ਸ ਸਮਣਸ੍ਸ ਵਾ ਬ੍ਰਾਹ੍ਮਣਸ੍ਸ ਵਾ ਸੁਤ੍ਵਾ ਵਦਾਮਿ. ਦਿਟ੍ਠਾ ਮਯਾ, ਭਿਕ੍ਖਵੇ, ਸਤ੍ਤਾ ਕਾਯਸੁਚਰਿਤੇਨ ਸਮਨ੍ਨਾਗਤਾ ਵਚੀਸੁਚਰਿਤੇਨ ਸਮਨ੍ਨਾਗਤਾ ਮਨੋਸੁਚਰਿਤੇਨ ਸਮਨ੍ਨਾਗਤਾ ਅਰਿਯਾਨਂ ਅਨੁਪਵਾਦਕਾ ਸਮ੍ਮਾਦਿਟ੍ਠਿਕਾ ਸਮ੍ਮਾਦਿਟ੍ਠਿਕਮ੍ਮਸਮਾਦਾਨਾ. ਤੇ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਨ੍ਨਾ. ਅਪਿ ਚ, ਭਿਕ੍ਖਵੇ, ਯਦੇਵ ਸਾਮਂ ਞਾਤਂ ਸਾਮਂ ਦਿਟ੍ਠਂ ਸਾਮਂ ਵਿਦਿਤਂ ਤਦੇਵਾਹਂ ਵਦਾਮਿ.

‘‘ਸਮ੍ਮਾ ਮਨਂ ਪਣਿਧਾਯ, ਸਮ੍ਮਾ ਵਾਚਞ੍ਚ ਭਾਸਿਯ [ਸਮ੍ਮਾ ਵਾਚਂ ਅਭਾਸਿਯ (ਸਬ੍ਬਤ੍ਥ)];

ਸਮ੍ਮਾ ਕਮ੍ਮਾਨਿ ਕਤ੍ਵਾਨ, ਕਾਯੇਨ ਇਧ ਪੁਗ੍ਗਲੋ.

‘‘ਬਹੁਸ੍ਸੁਤੋ ਪੁਞ੍ਞਕਰੋ, ਅਪ੍ਪਸ੍ਮਿਂ ਇਧ ਜੀਵਿਤੇ;

ਕਾਯਸ੍ਸ ਭੇਦਾ ਸਪ੍ਪਞ੍ਞੋ, ਸਗ੍ਗਂ ਸੋ ਉਪਪਜ੍ਜਤੀ’’ਤਿ.

ਅਯਮ੍ਪਿ ਅਤ੍ਥੋ ਵੁਤ੍ਤੋ ਭਗਵਤਾ, ਇਤਿ ਮੇ ਸੁਤਨ੍ਤਿ. ਦੁਤਿਯਂ.

੩. ਨਿਸ੍ਸਰਣਿਯਸੁਤ੍ਤਂ

੭੨. ਵੁਤ੍ਤਞ੍ਹੇਤਂ ਭਗਵਤਾ, ਵੁਤ੍ਤਮਰਹਤਾਤਿ ਮੇ ਸੁਤਂ –

‘‘ਤਿਸ੍ਸੋ ਇਮਾ, ਭਿਕ੍ਖਵੇ, ਨਿਸ੍ਸਰਣਿਯਾ [ਨਿਸ੍ਸਾਰਣੀਯਾ (ਅ. ਨਿ. ੫.੨੦੦)] ਧਾਤੁਯੋ. ਕਤਮਾ ਤਿਸ੍ਸੋ? ਕਾਮਾਨਮੇਤਂ ਨਿਸ੍ਸਰਣਂ ਯਦਿਦਂ ਨੇਕ੍ਖਮ੍ਮਂ, ਰੂਪਾਨਮੇਤਂ ਨਿਸ੍ਸਰਣਂ ਯਦਿਦਂ ਆਰੁਪ੍ਪਂ, ਯਂ ਖੋ ਪਨ ਕਿਞ੍ਚਿ ਭੂਤਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨਂ ਨਿਰੋਧੋ ਤਸ੍ਸ ਨਿਸ੍ਸਰਣਂ – ਇਮਾ ਖੋ, ਭਿਕ੍ਖਵੇ, ਤਿਸ੍ਸੋ ਨਿਸ੍ਸਰਣਿਯਾ ਧਾਤੁਯੋ’’ਤਿ. ਏਤਮਤ੍ਥਂ ਭਗਵਾ ਅਵੋਚ. ਤਤ੍ਥੇਤਂ ਇਤਿ ਵੁਚ੍ਚਤਿ –

‘‘ਕਾਮਨਿਸ੍ਸਰਣਂ ਞਤ੍ਵਾ, ਰੂਪਾਨਞ੍ਚ ਅਤਿਕ੍ਕਮਂ;

ਸਬ੍ਬਸਙ੍ਖਾਰਸਮਥਂ, ਫੁਸਂ ਆਤਾਪਿ ਸਬ੍ਬਦਾ.

‘‘ਸ ਵੇ ਸਮ੍ਮਦ੍ਦਸੋ ਭਿਕ੍ਖੁ, ਯਤੋ ਤਤ੍ਥ ਵਿਮੁਚ੍ਚਤਿ;

ਅਭਿਞ੍ਞਾਵੋਸਿਤੋ ਸਨ੍ਤੋ, ਸ ਵੇ ਯੋਗਾਤਿਗੋ ਮੁਨੀ’’ਤਿ.

ਅਯਮ੍ਪਿ ਅਤ੍ਥੋ ਵੁਤ੍ਤੋ ਭਗਵਤਾ, ਇਤਿ ਮੇ ਸੁਤਨ੍ਤਿ. ਤਤਿਯਂ.

੪. ਸਨ੍ਤਤਰਸੁਤ੍ਤਂ

੭੩. ਵੁਤ੍ਤਞ੍ਹੇਤਂ ਭਗਵਤਾ, ਵੁਤ੍ਤਮਰਹਤਾਤਿ ਮੇ ਸੁਤਂ –

‘‘ਰੂਪੇਹਿ, ਭਿਕ੍ਖਵੇ, ਅਰੂਪਾ [ਆਰੁਪ੍ਪਾ (ਸੀ.)] ਸਨ੍ਤਤਰਾ, ਅਰੂਪੇਹਿ ਨਿਰੋਧੋ ਸਨ੍ਤਤਰੋ’’ਤਿ. ਏਤਮਤ੍ਥਂ ਭਗਵਾ ਅਵੋਚ. ਤਤ੍ਥੇਤਂ ਇਤਿ ਵੁਚ੍ਚਤਿ –

‘‘ਯੇ ਚ ਰੂਪੂਪਗਾ ਸਤ੍ਤਾ, ਯੇ ਚ ਅਰੂਪਟ੍ਠਾਯਿਨੋ [ਆਰੁਪ੍ਪਟ੍ਠਾਯਿਨੋ (ਸੀ.)];

ਨਿਰੋਧਂ ਅਪ੍ਪਜਾਨਨ੍ਤਾ, ਆਗਨ੍ਤਾਰੋ ਪੁਨਬ੍ਭਵਂ.

‘‘ਯੇ ਚ ਰੂਪੇ ਪਰਿਞ੍ਞਾਯ, ਅਰੂਪੇਸੁ ਅਸਣ੍ਠਿਤਾ;

ਨਿਰੋਧੇ ਯੇ ਵਿਮੁਚ੍ਚਨ੍ਤਿ, ਤੇ ਜਨਾ ਮਚ੍ਚੁਹਾਯਿਨੋ.

‘‘ਕਾਯੇਨ ਅਮਤਂ ਧਾਤੁਂ, ਫੁਸਯਿਤ੍ਵਾ ਨਿਰੂਪਧਿਂ;

ਉਪਧਿਪ੍ਪਟਿਨਿਸ੍ਸਗ੍ਗਂ, ਸਚ੍ਛਿਕਤ੍ਵਾ ਅਨਾਸਵੋ;

ਦੇਸੇਤਿ ਸਮ੍ਮਾਸਮ੍ਬੁਦ੍ਧੋ, ਅਸੋਕਂ ਵਿਰਜਂ ਪਦ’’ਨ੍ਤਿ.

ਅਯਮ੍ਪਿ ਅਤ੍ਥੋ ਵੁਤ੍ਤੋ ਭਗਵਤਾ, ਇਤਿ ਮੇ ਸੁਤਨ੍ਤਿ. ਚਤੁਤ੍ਥਂ.

੫. ਪੁਤ੍ਤਸੁਤ੍ਤਂ

੭੪. ਵੁਤ੍ਤਞ੍ਹੇਤਂ ਭਗਵਤਾ, ਵੁਤ੍ਤਮਰਹਤਾਤਿ ਮੇ ਸੁਤਂ –

‘‘ਤਯੋਮੇ, ਭਿਕ੍ਖਵੇ, ਪੁਤ੍ਤਾ ਸਨ੍ਤੋ ਸਂਵਿਜ੍ਜਮਾਨਾ ਲੋਕਸ੍ਮਿਂ. ਕਤਮੇ ਤਯੋ? ਅਤਿਜਾਤੋ, ਅਨੁਜਾਤੋ, ਅਵਜਾਤੋਤਿ.

‘‘ਕਥਞ੍ਚ, ਭਿਕ੍ਖਵੇ, ਪੁਤ੍ਤੋ ਅਤਿਜਾਤੋ ਹੋਤਿ? ਇਧ, ਭਿਕ੍ਖਵੇ, ਪੁਤ੍ਤਸ੍ਸ ਮਾਤਾਪਿਤਰੋ ਹੋਨ੍ਤਿ ਨ ਬੁਦ੍ਧਂ ਸਰਣਂ ਗਤਾ, ਨ ਧਮ੍ਮਂ ਸਰਣਂ ਗਤਾ, ਨ ਸਙ੍ਘਂ ਸਰਣਂ ਗਤਾ; ਪਾਣਾਤਿਪਾਤਾ ਅਪ੍ਪਟਿਵਿਰਤਾ, ਅਦਿਨ੍ਨਾਦਾਨਾ ਅਪ੍ਪਟਿਵਿਰਤਾ, ਕਾਮੇਸੁਮਿਚ੍ਛਾਚਾਰਾ ਅਪ੍ਪਟਿਵਿਰਤਾ, ਮੁਸਾਵਾਦਾ ਅਪ੍ਪਟਿਵਿਰਤਾ, ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਅਪ੍ਪਟਿਵਿਰਤਾ, ਦੁਸ੍ਸੀਲਾ ਪਾਪਧਮ੍ਮਾ. ਪੁਤ੍ਤੋ ਚ ਨੇਸਂ ਹੋਤਿ ਬੁਦ੍ਧਂ ਸਰਣਂ ਗਤੋ, ਧਮ੍ਮਂ ਸਰਣਂ ਗਤੋ, ਸਙ੍ਘਂ ਸਰਣਂ ਗਤੋ; ਪਾਣਾਤਿਪਾਤਾ ਪਟਿਵਿਰਤੋ, ਅਦਿਨ੍ਨਾਦਾਨਾ ਪਟਿਵਿਰਤੋ, ਕਾਮੇਸੁਮਿਚ੍ਛਾਚਾਰਾ ਪਟਿਵਿਰਤੋ, ਮੁਸਾਵਾਦਾ ਪਟਿਵਿਰਤੋ, ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਪਟਿਵਿਰਤੋ, ਸੀਲਵਾ ਕਲ੍ਯਾਣਧਮ੍ਮੋ. ਏਵਂ ਖੋ, ਭਿਕ੍ਖਵੇ, ਪੁਤ੍ਤੋ ਅਤਿਜਾਤੋ ਹੋਤਿ.

‘‘ਕਥਞ੍ਚ, ਭਿਕ੍ਖਵੇ, ਪੁਤ੍ਤੋ ਅਨੁਜਾਤੋ ਹੋਤਿ? ਇਧ, ਭਿਕ੍ਖਵੇ, ਪੁਤ੍ਤਸ੍ਸ ਮਾਤਾਪਿਤਰੋ ਹੋਨ੍ਤਿ ਬੁਦ੍ਧਂ ਸਰਣਂ ਗਤਾ, ਧਮ੍ਮਂ ਸਰਣਂ ਗਤਾ, ਸਙ੍ਘਂ ਸਰਣਂ ਗਤਾ; ਪਾਣਾਤਿਪਾਤਾ ਪਟਿਵਿਰਤਾ, ਅਦਿਨ੍ਨਾਦਾਨਾ ਪਟਿਵਿਰਤਾ, ਕਾਮੇਸੁਮਿਚ੍ਛਾਚਾਰਾ ਪਟਿਵਿਰਤਾ, ਮੁਸਾਵਾਦਾ ਪਟਿਵਿਰਤਾ, ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਪਟਿਵਿਰਤਾ, ਸੀਲਵਨ੍ਤੋ ਕਲ੍ਯਾਣਧਮ੍ਮਾ. ਪੁਤ੍ਤੋਪਿ ਨੇਸਂ ਹੋਤਿ ਬੁਦ੍ਧਂ ਸਰਣਂ ਗਤੋ, ਧਮ੍ਮਂ ਸਰਣਂ ਗਤੋ, ਸਙ੍ਘਂ ਸਰਣਂ ਗਤੋ; ਪਾਣਾਤਿਪਾਤਾ ਪਟਿਵਿਰਤੋ, ਅਦਿਨ੍ਨਾਦਾਨਾ ਪਟਿਵਿਰਤੋ, ਕਾਮੇਸੁਮਿਚ੍ਛਾਚਾਰਾ ਪਟਿਵਿਰਤੋ, ਮੁਸਾਵਾਦਾ ਪਟਿਵਿਰਤੋ, ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਪਟਿਵਿਰਤੋ, ਸੀਲਵਾ ਕਲ੍ਯਾਣਧਮ੍ਮੋ. ਏਵਂ ਖੋ, ਭਿਕ੍ਖਵੇ, ਪੁਤ੍ਤੋ ਅਨੁਜਾਤੋ ਹੋਤਿ.

‘‘ਕਥਞ੍ਚ, ਭਿਕ੍ਖਵੇ, ਪੁਤ੍ਤੋ ਅਵਜਾਤੋ ਹੋਤਿ? ਇਧ, ਭਿਕ੍ਖਵੇ, ਪੁਤ੍ਤਸ੍ਸ ਮਾਤਾਪਿਤਰੋ ਹੋਨ੍ਤਿ ਬੁਦ੍ਧਂ ਸਰਣਂ ਗਤਾ, ਧਮ੍ਮਂ ਸਰਣਂ ਗਤਾ, ਸਙ੍ਘਂ ਸਰਣਂ ਗਤਾ; ਪਾਣਾਤਿਪਾਤਾ ਪਟਿਵਿਰਤਾ, ਅਦਿਨ੍ਨਾਦਾਨਾ ਪਟਿਵਿਰਤਾ, ਕਾਮੇਸੁਮਿਚ੍ਛਾਚਾਰਾ ਪਟਿਵਿਰਤਾ, ਮੁਸਾਵਾਦਾ ਪਟਿਵਿਰਤਾ, ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਪਟਿਵਿਰਤਾ, ਸੀਲਵਨ੍ਤੋ ਕਲ੍ਯਾਣਧਮ੍ਮਾ. ਪੁਤ੍ਤੋ ਚ ਨੇਸਂ ਹੋਤਿ ਨ ਬੁਦ੍ਧਂ ਸਰਣਂ ਗਤੋ, ਨ ਧਮ੍ਮਂ ਸਰਣਂ ਗਤੋ, ਨ ਸਙ੍ਘਂ ਸਰਣਂ ਗਤੋ; ਪਾਣਾਤਿਪਾਤਾ ਅਪ੍ਪਟਿਵਿਰਤੋ, ਅਦਿਨ੍ਨਾਦਾਨਾ ਅਪ੍ਪਟਿਵਿਰਤੋ, ਕਾਮੇਸੁਮਿਚ੍ਛਾਚਾਰਾ ਅਪ੍ਪਟਿਵਿਰਤੋ, ਮੁਸਾਵਾਦਾ ਅਪ੍ਪਟਿਵਿਰਤੋ, ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਅਪ੍ਪਟਿਵਿਰਤੋ, ਦੁਸ੍ਸੀਲੋ ਪਾਪਧਮ੍ਮੋ. ਏਵਂ ਖੋ, ਭਿਕ੍ਖਵੇ, ਪੁਤ੍ਤੋ ਅਵਜਾਤੋ ਹੋਤਿ. ਇਮੇ ਖੋ, ਭਿਕ੍ਖਵੇ, ਤਯੋ ਪੁਤ੍ਤਾ ਸਨ੍ਤੋ ਸਂਵਿਜ੍ਜਮਾਨਾ ਲੋਕਸ੍ਮਿ’’ਨ੍ਤਿ. ਏਤਮਤ੍ਥਂ ਭਗਵਾ ਅਵੋਚ. ਤਤ੍ਥੇਤਂ ਇਤਿ ਵੁਚ੍ਚਤਿ –

‘‘ਅਤਿਜਾਤਂ ਅਨੁਜਾਤਂ, ਪੁਤ੍ਤਮਿਚ੍ਛਨ੍ਤਿ ਪਣ੍ਡਿਤਾ;

ਅਵਜਾਤਂ ਨ ਇਚ੍ਛਨ੍ਤਿ, ਯੋ ਹੋਤਿ ਕੁਲਗਨ੍ਧਨੋ.

‘‘ਏਤੇ ਖੋ ਪੁਤ੍ਤਾ ਲੋਕਸ੍ਮਿਂ, ਯੇ ਭਵਨ੍ਤਿ ਉਪਾਸਕਾ;

ਸਦ੍ਧਾ ਸੀਲੇਨ ਸਮ੍ਪਨ੍ਨਾ, ਵਦਞ੍ਞੂ ਵੀਤਮਚ੍ਛਰਾ;

ਚਨ੍ਦੋ ਅਬ੍ਭਘਨਾ ਮੁਤ੍ਤੋ, ਪਰਿਸਾਸੁ ਵਿਰੋਚਰੇ’’ਤਿ.

ਅਯਮ੍ਪਿ ਅਤ੍ਥੋ ਵੁਤ੍ਤੋ ਭਗਵਤਾ, ਇਤਿ ਮੇ ਸੁਤਨ੍ਤਿ. ਪਞ੍ਚਮਂ.

੬. ਅਵੁਟ੍ਠਿਕਸੁਤ੍ਤਂ

੭੫. ਵੁਤ੍ਤਞ੍ਹੇਤਂ ਭਗਵਤਾ, ਵੁਤ੍ਤਮਰਹਤਾਤਿ ਮੇ ਸੁਤਂ –

‘‘ਤਯੋਮੇ, ਭਿਕ੍ਖਵੇ, ਪੁਗ੍ਗਲਾ ਸਨ੍ਤੋ ਸਂਵਿਜ੍ਜਮਾਨਾ ਲੋਕਸ੍ਮਿਂ. ਕਤਮੇ ਤਯੋ? ਅਵੁਟ੍ਠਿਕਸਮੋ, ਪਦੇਸਵਸ੍ਸੀ, ਸਬ੍ਬਤ੍ਥਾਭਿਵਸ੍ਸੀ.

‘‘ਕਥਞ੍ਚ, ਭਿਕ੍ਖਵੇ, ਪੁਗ੍ਗਲੋ ਅਵੁਟ੍ਠਿਕਸਮੋ ਹੋਤਿ? ਇਧ, ਭਿਕ੍ਖਵੇ, ਏਕਚ੍ਚੋ ਪੁਗ੍ਗਲੋ ਸਬ੍ਬੇਸਞ੍ਞੇਵ ਨ ਦਾਤਾ ਹੋਤਿ, ਸਮਣਬ੍ਰਾਹ੍ਮਣਕਪਣਦ੍ਧਿਕਵਨਿਬ੍ਬਕਯਾਚਕਾਨਂ [… ਵਣਿਬ੍ਬਕਯਾਚਕਾਨਂ (ਸੀ.)] ਅਨ੍ਨਂ ਪਾਨਂ ਵਤ੍ਥਂ ਯਾਨਂ ਮਾਲਾਗਨ੍ਧਵਿਲੇਪਨਂ ਸੇਯ੍ਯਾਵਸਥਪਦੀਪੇਯ੍ਯਂ. ਏਵਂ ਖੋ, ਭਿਕ੍ਖਵੇ, ਪੁਗ੍ਗਲੋ ਅਵੁਟ੍ਠਿਕਸਮੋ ਹੋਤਿ.

‘‘ਕਥਞ੍ਚ, ਭਿਕ੍ਖਵੇ, ਪੁਗ੍ਗਲੋ ਪਦੇਸਵਸ੍ਸੀ ਹੋਤਿ? ਇਧ, ਭਿਕ੍ਖਵੇ, ਏਕਚ੍ਚੋ ਪੁਗ੍ਗਲੋ ਏਕਚ੍ਚਾਨਂ ਦਾਤਾ (ਹੋਤਿ) [( ) ਨਤ੍ਥਿ ਸ੍ਯਾਮਪੋਤ੍ਥਕੇ], ਏਕਚ੍ਚਾਨਂ ਨ ਦਾਤਾ ਹੋਤਿ ਸਮਣਬ੍ਰਾਹ੍ਮਣਕਪਣਦ੍ਧਿਕਵਨਿਬ੍ਬਕਯਾਚਕਾਨਂ ਅਨ੍ਨਂ ਪਾਨਂ ਵਤ੍ਥਂ ਯਾਨਂ ਮਾਲਾਗਨ੍ਧਵਿਲੇਪਨਂ ਸੇਯ੍ਯਾਵਸਥਪਦੀਪੇਯ੍ਯਂ. ਏਵਂ ਖੋ, ਭਿਕ੍ਖਵੇ, ਪੁਗ੍ਗਲੋ ਪਦੇਸਵਸ੍ਸੀ ਹੋਤਿ.

‘‘ਕਥਞ੍ਚ, ਭਿਕ੍ਖਵੇ, ਪੁਗ੍ਗਲੋ ਸਬ੍ਬਤ੍ਥਾਭਿਵਸ੍ਸੀ ਹੋਤਿ? ਇਧ, ਭਿਕ੍ਖਵੇ, ਏਕਚ੍ਚੋ ਪੁਗ੍ਗਲੋ ਸਬ੍ਬੇਸਂਵ ਦੇਤਿ, ਸਮਣਬ੍ਰਾਹ੍ਮਣਕਪਣਦ੍ਧਿਕਵਨਿਬ੍ਬਕਯਾਚਕਾਨਂ ਅਨ੍ਨਂ ਪਾਨਂ ਵਤ੍ਥਂ ਯਾਨਂ ਮਾਲਾਗਨ੍ਧਵਿਲੇਪਨਂ ਸੇਯ੍ਯਾਵਸਥਪਦੀਪੇਯ੍ਯਂ. ਏਵਂ ਖੋ, ਭਿਕ੍ਖਵੇ, ਪੁਗ੍ਗਲੋ ਸਬ੍ਬਤ੍ਥਾਭਿਵਸ੍ਸੀ ਹੋਤਿ. ਇਮੇ ਖੋ, ਭਿਕ੍ਖਵੇ, ਤਯੋ ਪੁਗ੍ਗਲਾ ਸਨ੍ਤੋ ਸਂਵਿਜ੍ਜਮਾਨਾ ਲੋਕਸ੍ਮਿ’’ਨ੍ਤਿ. ਏਤਮਤ੍ਥਂ ਭਗਵਾ ਅਵੋਚ. ਤਤ੍ਥੇਤਂ ਇਤਿ ਵੁਚ੍ਚਤਿ –

‘‘ਨ ਸਮਣੇ ਨ ਬ੍ਰਾਹ੍ਮਣੇ, ਨ ਕਪਣਦ੍ਧਿਕਵਨਿਬ੍ਬਕੇ;

ਲਦ੍ਧਾਨ ਸਂਵਿਭਾਜੇਤਿ, ਅਨ੍ਨਂ ਪਾਨਞ੍ਚ ਭੋਜਨਂ;

ਤਂ ਵੇ ਅਵੁਟ੍ਠਿਕਸਮੋਤਿ, ਆਹੁ ਨਂ ਪੁਰਿਸਾਧਮਂ.

‘‘ਏਕਚ੍ਚਾਨਂ ਨ ਦਦਾਤਿ, ਏਕਚ੍ਚਾਨਂ ਪਵੇਚ੍ਛਤਿ;

ਤਂ ਵੇ ਪਦੇਸਵਸ੍ਸੀਤਿ, ਆਹੁ ਮੇਧਾਵਿਨੋ ਜਨਾ.

‘‘ਸੁਭਿਕ੍ਖਵਾਚੋ ਪੁਰਿਸੋ, ਸਬ੍ਬਭੂਤਾਨੁਕਮ੍ਪਕੋ;

ਆਮੋਦਮਾਨੋ ਪਕਿਰੇਤਿ, ਦੇਥ ਦੇਥਾਤਿ ਭਾਸਤਿ.

‘‘ਯਥਾਪਿ ਮੇਘੋ ਥਨਯਿਤ੍ਵਾ, ਗਜ੍ਜਯਿਤ੍ਵਾ ਪਵਸ੍ਸਤਿ;

ਥਲਂ ਨਿਨ੍ਨਞ੍ਚ ਪੂਰੇਤਿ, ਅਭਿਸਨ੍ਦਨ੍ਤੋਵ [ਅਭਿਸਨ੍ਦੇਨ੍ਤੋਵ (?)] ਵਾਰਿਨਾ.

‘‘ਏਵਮੇਵ ਇਧੇਕਚ੍ਚੋ, ਪੁਗ੍ਗਲੋ ਹੋਤਿ ਤਾਦਿਸੋ;

ਧਮ੍ਮੇਨ ਸਂਹਰਿਤ੍ਵਾਨ, ਉਟ੍ਠਾਨਾਧਿਗਤਂ ਧਨਂ;

ਤਪ੍ਪੇਤਿ ਅਨ੍ਨਪਾਨੇਨ, ਸਮ੍ਮਾ ਪਤ੍ਤੇ ਵਨਿਬ੍ਬਕੇ’’ਤਿ.

ਅਯਮ੍ਪਿ ਅਤ੍ਥੋ ਵੁਤ੍ਤੋ ਭਗਵਤਾ, ਇਤਿ ਮੇ ਸੁਤਨ੍ਤਿ. ਛਟ੍ਠਂ.

੭. ਸੁਖਪਤ੍ਥਨਾਸੁਤ੍ਤਂ

੭੬. ਵੁਤ੍ਤਞ੍ਹੇਤਂ ਭਗਵਤਾ, ਵੁਤ੍ਤਮਰਹਤਾਤਿ ਮੇ ਸੁਤਂ –

‘‘ਤੀਣਿਮਾਨਿ, ਭਿਕ੍ਖਵੇ, ਸੁਖਾਨਿ ਪਤ੍ਥਯਮਾਨੋ ਸੀਲਂ ਰਕ੍ਖੇਯ੍ਯ ਪਣ੍ਡਿਤੋ. ਕਤਮਾਨਿ ਤੀਣਿ? ਪਸਂਸਾ ਮੇ ਆਗਚ੍ਛਤੂਤਿ [ਆਗਚ੍ਛਨ੍ਤੂਤਿ (ਸ੍ਯਾ.)] ਸੀਲਂ ਰਕ੍ਖੇਯ੍ਯ ਪਣ੍ਡਿਤੋ, ਭੋਗਾ ਮੇ ਉਪ੍ਪਜ੍ਜਨ੍ਤੂਤਿ ਸੀਲਂ ਰਕ੍ਖੇਯ੍ਯ ਪਣ੍ਡਿਤੋ, ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਿਸ੍ਸਾਮੀਤਿ ਸੀਲਂ ਰਕ੍ਖੇਯ੍ਯ ਪਣ੍ਡਿਤੋ. ਇਮਾਨਿ ਖੋ, ਭਿਕ੍ਖਵੇ, ਤੀਣਿ ਸੁਖਾਨਿ ਪਤ੍ਥਯਮਾਨੋ ਸੀਲਂ ਰਕ੍ਖੇਯ੍ਯ ਪਣ੍ਡਿਤੋ’’ਤਿ. ਏਤਮਤ੍ਥਂ ਭਗਵਾ ਅਵੋਚ. ਤਤ੍ਥੇਤਂ ਇਤਿ ਵੁਚ੍ਚਤਿ –

‘‘ਸੀਲਂ ਰਕ੍ਖੇਯ੍ਯ ਮੇਧਾਵੀ, ਪਤ੍ਥਯਾਨੋ ਤਯੋ ਸੁਖੇ;

ਪਸਂਸਂ ਵਿਤ੍ਤਲਾਭਞ੍ਚ, ਪੇਚ੍ਚ ਸਗ੍ਗੇ ਪਮੋਦਨਂ.

‘‘ਅਕਰੋਨ੍ਤੋਪਿ ਚੇ ਪਾਪਂ, ਕਰੋਨ੍ਤਮੁਪਸੇਵਤਿ;

ਸਙ੍ਕਿਯੋ ਹੋਤਿ ਪਾਪਸ੍ਮਿਂ, ਅਵਣ੍ਣੋ ਚਸ੍ਸ ਰੂਹਤਿ.

‘‘ਯਾਦਿਸਂ ਕੁਰੁਤੇ ਮਿਤ੍ਤਂ, ਯਾਦਿਸਂ ਚੂਪਸੇਵਤਿ;

ਸ ਵੇ ਤਾਦਿਸਕੋ ਹੋਤਿ, ਸਹਵਾਸੋ ਹਿ [ਸਹਵਾਸੋਪਿ (ਸੀ. ਕ.)] ਤਾਦਿਸੋ.

‘‘ਸੇਵਮਾਨੋ ਸੇਵਮਾਨਂ, ਸਮ੍ਫੁਟ੍ਠੋ ਸਮ੍ਫੁਸਂ ਪਰਂ;

ਸਰੋ ਦਿਦ੍ਧੋ ਕਲਾਪਂਵ, ਅਲਿਤ੍ਤਮੁਪਲਿਮ੍ਪਤਿ;

ਉਪਲੇਪਭਯਾ [ਉਪਲਿਮ੍ਪਭਯਾ (ਕ.)] ਧੀਰੋ, ਨੇਵ ਪਾਪਸਖਾ ਸਿਯਾ.

‘‘ਪੂਤਿਮਚ੍ਛਂ ਕੁਸਗ੍ਗੇਨ, ਯੋ ਨਰੋ ਉਪਨਯ੍ਹਤਿ;

ਕੁਸਾਪਿ ਪੂਤਿ ਵਾਯਨ੍ਤਿ, ਏਵਂ ਬਾਲੂਪਸੇਵਨਾ.

‘‘ਤਗਰਞ੍ਚ ਪਲਾਸੇਨ, ਯੋ ਨਰੋ ਉਪਨਯ੍ਹਤਿ;

ਪਤ੍ਤਾਪਿ ਸੁਰਭਿ ਵਾਯਨ੍ਤਿ, ਏਵਂ ਧੀਰੂਪਸੇਵਨਾ.

‘‘ਤਸ੍ਮਾ ਪਤ੍ਤਪੁਟਸ੍ਸੇਵ [ਪਲਾਸਪੁਟਸ੍ਸੇਵ (ਪੀ. ਕ.)], ਞਤ੍ਵਾ ਸਮ੍ਪਾਕਮਤ੍ਤਨੋ;

ਅਸਨ੍ਤੇ ਨੁਪਸੇਵੇਯ੍ਯ, ਸਨ੍ਤੇ ਸੇਵੇਯ੍ਯ ਪਣ੍ਡਿਤੋ;

ਅਸਨ੍ਤੋ ਨਿਰਯਂ ਨੇਨ੍ਤਿ, ਸਨ੍ਤੋ ਪਾਪੇਨ੍ਤਿ ਸੁਗ੍ਗਤਿ’’ਨ੍ਤਿ.

ਅਯਮ੍ਪਿ ਅਤ੍ਥੋ ਵੁਤ੍ਤੋ ਭਗਵਤਾ, ਇਤਿ ਮੇ ਸੁਤਨ੍ਤਿ. ਸਤ੍ਤਮਂ.

੮. ਭਿਦੁਰਸੁਤ੍ਤਂ

੭੭. ਵੁਤ੍ਤਞ੍ਹੇਤਂ ਭਗਵਤਾ, ਵੁਤ੍ਤਮਰਹਤਾਤਿ ਮੇ ਸੁਤਂ –

‘‘ਭਿਦੁਰਾਯਂ [ਭਿਨ੍ਦਨ੍ਤਾਯਂ (ਸ੍ਯਾ. ਪੀ. ਕ.)], ਭਿਕ੍ਖਵੇ, ਕਾਯੋ, ਵਿਞ੍ਞਾਣਂ ਵਿਰਾਗਧਮ੍ਮਂ, ਸਬ੍ਬੇ ਉਪਧੀ ਅਨਿਚ੍ਚਾ ਦੁਕ੍ਖਾ ਵਿਪਰਿਣਾਮਧਮ੍ਮਾ’’ਤਿ. ਏਤਮਤ੍ਥਂ ਭਗਵਾ ਅਵੋਚ. ਤਤ੍ਥੇਤਂ ਇਤਿ ਵੁਚ੍ਚਤਿ –

‘‘ਕਾਯਞ੍ਚ ਭਿਦੁਰਂ [ਭਿਨ੍ਦਨ੍ਤਂ (ਸ੍ਯਾ. ਪੀ. ਕ.)] ਞਤ੍ਵਾ, ਵਿਞ੍ਞਾਣਞ੍ਚ ਵਿਰਾਗੁਨਂ [ਵਿਰਾਗਿਕਂ (ਕ. ਸੀ.), ਪਭਙ੍ਗੁਣਂ (ਸ੍ਯਾ.)];

ਉਪਧੀਸੁ ਭਯਂ ਦਿਸ੍ਵਾ, ਜਾਤਿਮਰਣਮਚ੍ਚਗਾ;

ਸਮ੍ਪਤ੍ਵਾ ਪਰਮਂ ਸਨ੍ਤਿਂ, ਕਾਲਂ ਕਙ੍ਖਤਿ ਭਾਵਿਤਤ੍ਤੋ’’ਤਿ.

ਅਯਮ੍ਪਿ ਅਤ੍ਥੋ ਵੁਤ੍ਤੋ ਭਗਵਤਾ, ਇਤਿ ਮੇ ਸੁਤਨ੍ਤਿ. ਅਟ੍ਠਮਂ.

੯. ਧਾਤੁਸੋਸਂਸਨ੍ਦਨਸੁਤ੍ਤਂ

੭੮. ਵੁਤ੍ਤਞ੍ਹੇਤਂ ਭਗਵਤਾ, ਵੁਤ੍ਤਮਰਹਤਾਤਿ ਮੇ ਸੁਤਂ –

‘‘ਧਾਤੁਸੋ, ਭਿਕ੍ਖਵੇ, ਸਤ੍ਤਾ ਸਤ੍ਤੇਹਿ ਸਦ੍ਧਿਂ ਸਂਸਨ੍ਦਨ੍ਤਿ ਸਮੇਨ੍ਤਿ. ਹੀਨਾਧਿਮੁਤ੍ਤਿਕਾ ਸਤ੍ਤਾ ਹੀਨਾਧਿਮੁਤ੍ਤਿਕੇਹਿ ਸਤ੍ਤੇਹਿ ਸਦ੍ਧਿਂ ਸਂਸਨ੍ਦਨ੍ਤਿ ਸਮੇਨ੍ਤਿ, ਕਲ੍ਯਾਣਾਧਿਮੁਤ੍ਤਿਕਾ ਸਤ੍ਤਾ ਕਲ੍ਯਾਣਾਧਿਮੁਤ੍ਤਿਕੇਹਿ ਸਤ੍ਤੇਹਿ ਸਦ੍ਧਿਂ ਸਂਸਨ੍ਦਨ੍ਤਿ ਸਮੇਨ੍ਤਿ.

‘‘ਅਤੀਤਮ੍ਪਿ, ਭਿਕ੍ਖਵੇ, ਅਦ੍ਧਾਨਂ ਧਾਤੁਸੋਵ ਸਤ੍ਤਾ ਸਤ੍ਤੇਹਿ ਸਦ੍ਧਿਂ ਸਂਸਨ੍ਦਿਂਸੁ ਸਮਿਂਸੁ. ਹੀਨਾਧਿਮੁਤ੍ਤਿਕਾ ਸਤ੍ਤਾ ਹੀਨਾਧਿਮੁਤ੍ਤਿਕੇਹਿ ਸਤ੍ਤੇਹਿ ਸਦ੍ਧਿਂ ਸਂਸਨ੍ਦਿਂਸੁ ਸਮਿਂਸੁ, ਕਲ੍ਯਾਣਾਧਿਮੁਤ੍ਤਿਕਾ ਸਤ੍ਤਾ ਕਲ੍ਯਾਣਾਧਿਮੁਤ੍ਤਿਕੇਹਿ ਸਤ੍ਤੇਹਿ ਸਦ੍ਧਿਂ ਸਂਸਨ੍ਦਿਂਸੁ ਸਮਿਂਸੁ.

‘‘ਅਨਾਗਤਮ੍ਪਿ, ਭਿਕ੍ਖਵੇ, ਅਦ੍ਧਾਨਂ ਧਾਤੁਸੋਵ ਸਤ੍ਤਾ ਸਤ੍ਤੇਹਿ ਸਦ੍ਧਿਂ ਸਂਸਨ੍ਦਿਸ੍ਸਨ੍ਤਿ ਸਮੇਸ੍ਸਨ੍ਤਿ. ਹੀਨਾਧਿਮੁਤ੍ਤਿਕਾ ਸਤ੍ਤਾ ਹੀਨਾਧਿਮੁਤ੍ਤਿਕੇਹਿ ਸਤ੍ਤੇਹਿ ਸਦ੍ਧਿਂ ਸਂਸਨ੍ਦਿਸ੍ਸਨ੍ਤਿ ਸਮੇਸ੍ਸਨ੍ਤਿ, ਕਲ੍ਯਾਣਾਧਿਮੁਤ੍ਤਿਕਾ ਸਤ੍ਤਾ ਕਲ੍ਯਾਣਾਧਿਮੁਤ੍ਤਿਕੇਹਿ ਸਤ੍ਤੇਹਿ ਸਦ੍ਧਿਂ ਸਂਸਨ੍ਦਿਸ੍ਸਨ੍ਤਿ ਸਮੇਸ੍ਸਨ੍ਤਿ.

‘‘ਏਤਰਹਿਪਿ, ਭਿਕ੍ਖਵੇ, ਪਚ੍ਚੁਪ੍ਪਨਂ ਅਦ੍ਧਾਨਂ ਧਾਤੁਸੋਵ ਸਤ੍ਤਾ ਸਤ੍ਤੇਹਿ ਸਦ੍ਧਿਂ ਸਂਸਨ੍ਦਨ੍ਤਿ ਸਮੇਨ੍ਤਿ. ਹੀਨਾਧਿਮੁਤ੍ਤਿਕਾ ਸਤ੍ਤਾ ਹੀਨਾਧਿਮੁਤ੍ਤਿਕੇਹਿ ਸਤ੍ਤੇਹਿ ਸਦ੍ਧਿਂ ਸਂਸਨ੍ਦਨ੍ਤਿ ਸਮੇਨ੍ਤਿ, ਕਲ੍ਯਾਣਾਧਿਮੁਤ੍ਤਿਕਾ ਸਤ੍ਤਾ ਕਲ੍ਯਾਣਾਧਿਮੁਤ੍ਤਿਕੇਹਿ ਸਤ੍ਤੇਹਿ ਸਦ੍ਧਿਂ ਸਂਸਨ੍ਦਨ੍ਤਿ ਸਮੇਨ੍ਤੀ’’ਤਿ. ਏਤਮਤ੍ਥਂ ਭਗਵਾ ਅਵੋਚ. ਤਤ੍ਥੇਤਂ ਇਤਿ ਵੁਚ੍ਚਤਿ –

‘‘ਸਂਸਗ੍ਗਾ ਵਨਥੋ ਜਾਤੋ, ਅਸਂਸਗ੍ਗੇਨ ਛਿਜ੍ਜਤਿ;

ਪਰਿਤ੍ਤਂ ਦਾਰੁਮਾਰੁਯ੍ਹ, ਯਥਾ ਸੀਦੇ ਮਹਣ੍ਣਵੇ.

‘‘ਏਵਂ ਕੁਸੀਤਮਾਗਮ੍ਮ, ਸਾਧੁਜੀਵੀਪਿ ਸੀਦਤਿ;

ਤਸ੍ਮਾ ਤਂ ਪਰਿਵਜ੍ਜੇਯ੍ਯ, ਕੁਸੀਤਂ ਹੀਨਵੀਰਿਯਂ.

‘‘ਪਵਿਵਿਤ੍ਤੇਹਿ ਅਰਿਯੇਹਿ, ਪਹਿਤਤ੍ਤੇਹਿ ਝਾਯਿਭਿ;

ਨਿਚ੍ਚਂ ਆਰਦ੍ਧਵੀਰਿਯੇਹਿ, ਪਣ੍ਡਿਤੇਹਿ ਸਹਾਵਸੇ’’ਤਿ.

ਅਯਮ੍ਪਿ ਅਤ੍ਥੋ ਵੁਤ੍ਤੋ ਭਗਵਤਾ, ਇਤਿ ਮੇ ਸੁਤਨ੍ਤਿ. ਨਵਮਂ.

੧੦. ਪਰਿਹਾਨਸੁਤ੍ਤਂ

੭੯. ਵੁਤ੍ਤਞ੍ਹੇਤਂ ਭਗਵਤਾ, ਵੁਤ੍ਤਮਰਹਤਾਤਿ ਮੇ ਸੁਤਂ –

‘‘ਤਯੋਮੇ, ਭਿਕ੍ਖਵੇ, ਧਮ੍ਮਾ ਸੇਖਸ੍ਸ ਭਿਕ੍ਖੁਨੋ ਪਰਿਹਾਨਾਯ ਸਂਵਤ੍ਤਨ੍ਤਿ. ਕਤਮੇ ਤਯੋ? ਇਧ, ਭਿਕ੍ਖਵੇ, ਸੇਖੋ ਭਿਕ੍ਖੁ ਕਮ੍ਮਾਰਾਮੋ ਹੋਤਿ, ਕਮ੍ਮਰਤੋ, ਕਮ੍ਮਾਰਾਮਤਮਨੁਯੁਤ੍ਤੋ; ਭਸ੍ਸਾਰਾਮੋ ਹੋਤਿ, ਭਸ੍ਸਰਤੋ, ਭਸ੍ਸਾਰਾਮਤਮਨੁਯੁਤ੍ਤੋ; ਨਿਦ੍ਦਾਰਾਮੋ ਹੋਤਿ, ਨਿਦ੍ਦਾਰਤੋ, ਨਿਦ੍ਦਾਰਾਮਤਮਨੁਯੁਤ੍ਤੋ. ਇਮੇ ਖੋ, ਭਿਕ੍ਖਵੇ, ਤਯੋ ਧਮ੍ਮਾ ਸੇਖਸ੍ਸ ਭਿਕ੍ਖੁਨੋ ਪਰਿਹਾਨਾਯ ਸਂਵਤ੍ਤਨ੍ਤਿ.

‘‘ਤਯੋਮੇ, ਭਿਕ੍ਖਵੇ, ਧਮ੍ਮਾ ਸੇਖਸ੍ਸ ਭਿਕ੍ਖੁਨੋ ਅਪਰਿਹਾਨਾਯ ਸਂਵਤ੍ਤਨ੍ਤਿ. ਕਤਮੇ ਤਯੋ? ਇਧ, ਭਿਕ੍ਖਵੇ, ਸੇਖੋ ਭਿਕ੍ਖੁ ਨ ਕਮ੍ਮਾਰਾਮੋ ਹੋਤਿ, ਨ ਕਮ੍ਮਰਤੋ, ਨ ਕਮ੍ਮਾਰਾਮਤਮਨੁਯੁਤ੍ਤੋ; ਨ ਭਸ੍ਸਾਰਾਮੋ ਹੋਤਿ, ਨ ਭਸ੍ਸਰਤੋ, ਨ ਭਸ੍ਸਾਰਾਮਤਮਨੁਯੁਤ੍ਤੋ; ਨ ਨਿਦ੍ਦਾਰਾਮੋ ਹੋਤਿ, ਨ ਨਿਦ੍ਦਾਰਤੋ, ਨ ਨਿਦ੍ਦਾਰਾਮਤਮਨੁਯੁਤ੍ਤੋ. ਇਮੇ ਖੋ, ਭਿਕ੍ਖਵੇ, ਤਯੋ ਧਮ੍ਮਾ ਸੇਖਸ੍ਸ ਭਿਕ੍ਖੁਨੋ ਅਪਰਿਹਾਨਾਯ ਸਂਵਤ੍ਤਨ੍ਤੀ’’ਤਿ. ਏਤਮਤ੍ਥਂ ਭਗਵਾ ਅਵੋਚ. ਤਤ੍ਥੇਤਂ ਇਤਿ ਵੁਚ੍ਚਤਿ –

‘‘ਕਮ੍ਮਾਰਾਮੋ ਭਸ੍ਸਾਰਾਮੋ [ਭਸ੍ਸਰਤੋ (ਸਬ੍ਬਥ)], ਨਿਦ੍ਦਾਰਾਮੋ ਚ ਉਦ੍ਧਤੋ;

ਅਭਬ੍ਬੋ ਤਾਦਿਸੋ ਭਿਕ੍ਖੁ, ਫੁਟ੍ਠੁਂ ਸਮ੍ਬੋਧਿਮੁਤ੍ਤਮਂ.

‘‘ਤਸ੍ਮਾ ਹਿ ਅਪ੍ਪਕਿਚ੍ਚਸ੍ਸ, ਅਪ੍ਪਮਿਦ੍ਧੋ ਅਨੁਦ੍ਧਤੋ;

ਭਬ੍ਬੋ ਸੋ ਤਾਦਿਸੋ ਭਿਕ੍ਖੁ, ਫੁਟ੍ਠੁਂ ਸਮ੍ਬੋਧਿਮੁਤ੍ਤਮ’’ਨ੍ਤਿ.

ਅਯਮ੍ਪਿ ਅਤ੍ਥੋ ਵੁਤ੍ਤੋ ਭਗਵਤਾ, ਇਤਿ ਮੇ ਸੁਤਨ੍ਤਿ. ਦਸਮਂ.

ਤਤਿਯੋ ਵਗ੍ਗੋ ਨਿਟ੍ਠਿਤੋ.

ਤਸ੍ਸੁਦ੍ਦਾਨਂ –

ਦ੍ਵੇ ਦਿਟ੍ਠੀ ਨਿਸ੍ਸਰਣਂ ਰੂਪਂ, ਪੁਤ੍ਤੋ ਅਵੁਟ੍ਠਿਕੇਨ ਚ;

ਸੁਖਾ ਚ ਭਿਦੁਰੋ [ਭਿਨ੍ਦਨਾ (ਸਬ੍ਬਤ੍ਥ)] ਧਾਤੁ, ਪਰਿਹਾਨੇਨ ਤੇ ਦਸਾਤਿ.