੨. ਸੋਮਨਸ੍ਸਚਰਿਯਾ

੭. ‘‘ਪੁਨਾਪਰਂ ਯਦਾ ਹੋਮਿ, ਇਨ੍ਦਪਤ੍ਥੇ ਪੁਰੁਤ੍ਤਮੇ;

ਕਾਮਿਤੋ ਦਯਿਤੋ ਪੁਤ੍ਤੋ, ਸੋਮਨਸ੍ਸੋਤਿ ਵਿਸ੍ਸੁਤੋ.

੮. ‘‘ਸੀਲਵਾ ਗੁਣਸਮ੍ਪਨ੍ਨੋ, ਕਲ੍ਯਾਣਪਟਿਭਾਨਵਾ;

ਵੁਡ੍ਢਾਪਚਾਯੀ ਹਿਰੀਮਾ, ਸਙ੍ਗਹੇਸੁ ਚ ਕੋਵਿਦੋ.

੯. ‘‘ਤਸ੍ਸ ਰਞ੍ਞੋ ਪਤਿਕਰੋ, ਅਹੋਸਿ ਕੁਹਕਤਾਪਸੋ;

ਆਰਾਮਂ ਮਾਲਾਵਚ੍ਛਞ੍ਚ, ਰੋਪਯਿਤ੍ਵਾਨ ਜੀਵਤਿ.

੧੦. ‘‘ਤਮਹਂ ਦਿਸ੍ਵਾਨ ਕੁਹਕਂ, ਥੁਸਰਾਸਿਂਵ ਅਤਣ੍ਡੁਲਂ;

ਦੁਮਂਵ ਅਨ੍ਤੋ ਸੁਸਿਰਂ, ਕਦਲਿਂਵ ਅਸਾਰਕਂ.

੧੧. ‘‘ਨਤ੍ਥਿਮਸ੍ਸ ਸਤਂ ਧਮ੍ਮੋ, ਸਾਮਞ੍ਞਾਪਗਤੋ ਅਯਂ;

ਹਿਰੀਸੁਕ੍ਕਧਮ੍ਮਜਹਿਤੋ, ਜੀਵਿਤਵੁਤ੍ਤਿਕਾਰਣਾ.

੧੨. ‘‘ਕੁਪਿਤੋ ਅਹੁ [ਅਹੋਸਿ (ਸੀ.), ਆਸਿ (ਸ੍ਯਾ.)] ਪਚ੍ਚਨ੍ਤੋ, ਅਟਵੀਹਿ ਪਰਨ੍ਤਿਹਿ;

ਤਂ ਨਿਸੇਧੇਤੁਂ ਗਚ੍ਛਨ੍ਤੋ, ਅਨੁਸਾਸਿ ਪਿਤਾ ਮਮਂ.

੧੩. ‘‘‘ਮਾ ਪਮਜ੍ਜਿ ਤੁਵਂ ਤਾਤ, ਜਟਿਲਂ ਉਗ੍ਗਤਾਪਨਂ;

ਯਦਿਚ੍ਛਕਂ ਪਵਤ੍ਤੇਹਿ, ਸਬ੍ਬਕਾਮਦਦੋ ਹਿ ਸੋ’.

੧੪. ‘‘ਤਮਹਂ ਗਨ੍ਤ੍ਵਾਨੁਪਟ੍ਠਾਨਂ, ਇਦਂ ਵਚਨਮਬ੍ਰਵਿਂ;

‘ਕਚ੍ਚਿ ਤੇ ਗਹਪਤਿ ਕੁਸਲਂ, ਕਿਂ ਵਾ ਤੇ ਆਹਰੀਯਤੁ’.

੧੫. ‘‘ਤੇਨ ਸੋ ਕੁਪਿਤੋ ਆਸਿ, ਕੁਹਕੋ ਮਾਨਨਿਸ੍ਸਿਤੋ;

‘ਘਾਤਾਪੇਮਿ ਤੁਵਂ ਅਜ੍ਜ, ਰਟ੍ਠਾ ਪਬ੍ਬਾਜਯਾਮਿ ਵਾ’.

੧੬. ‘‘ਨਿਸੇਧਯਿਤ੍ਵਾ ਪਚ੍ਚਨ੍ਤਂ, ਰਾਜਾ ਕੁਹਕਮਬ੍ਰਵਿ;

‘ਕਚ੍ਚਿ ਤੇ ਭਨ੍ਤੇ ਖਮਨੀਯਂ, ਸਮ੍ਮਾਨੋ ਤੇ ਪਵਤ੍ਤਿਤੋ’.

੧੭. ‘‘ਤਸ੍ਸ ਆਚਿਕ੍ਖਤੀ ਪਾਪੋ, ਕੁਮਾਰੋ ਯਥਾ ਨਾਸਿਯੋ;

ਤਸ੍ਸ ਤਂ ਵਚਨਂ ਸੁਤ੍ਵਾ, ਆਣਾਪੇਸਿ ਮਹੀਪਤਿ.

੧੮. ‘‘‘ਸੀਸਂ ਤਤ੍ਥੇਵ ਛਿਨ੍ਦਿਤ੍ਵਾ, ਕਤ੍ਵਾਨ ਚਤੁਖਣ੍ਡਿਕਂ;

ਰਥਿਯਾ ਰਥਿਯਂ ਦਸ੍ਸੇਥ, ਸਾ ਗਤਿ ਜਟਿਲਹੀਲ਼ਿਤਾ’.

੧੯. ‘‘ਤਤ੍ਥ ਕਾਰਣਿਕਾ ਗਨ੍ਤ੍ਵਾ, ਚਣ੍ਡਾ ਲੁਦ੍ਦਾ ਅਕਾਰੁਣਾ;

ਮਾਤੁਅਙ੍ਕੇ ਨਿਸਿਨ੍ਨਸ੍ਸ, ਆਕਡ੍ਢਿਤ੍ਵਾ ਨਯਨ੍ਤਿ ਮਂ.

੨੦. ‘‘ਤੇਸਾਹਂ ਏਵਮਵਚਂ, ਬਨ੍ਧਤਂ ਗਾਲ਼੍ਹਬਨ੍ਧਨਂ;

‘ਰਞ੍ਞੋ ਦਸ੍ਸੇਥ ਮਂ ਖਿਪ੍ਪਂ, ਰਾਜਕਿਰਿਯਾਨਿ ਅਤ੍ਥਿ ਮੇ’.

੨੧. ‘‘ਤੇ ਮਂ ਰਞ੍ਞੋ ਦਸ੍ਸਯਿਂਸੁ, ਪਾਪਸ੍ਸ ਪਾਪਸੇਵਿਨੋ;

ਦਿਸ੍ਵਾਨ ਤਂ ਸਞ੍ਞਾਪੇਸਿਂ, ਮਮਞ੍ਚ ਵਸਮਾਨਯਿਂ.

੨੨. ‘‘ਸੋ ਮਂ ਤਤ੍ਥ ਖਮਾਪੇਸਿ, ਮਹਾਰਜ੍ਜਮਦਾਸਿ ਮੇ;

ਸੋਹਂ ਤਮਂ ਦਾਲਯਿਤ੍ਵਾ, ਪਬ੍ਬਜਿਂ ਅਨਗਾਰਿਯਂ.

੨੩. ‘‘ਨ ਮੇ ਦੇਸ੍ਸਂ ਮਹਾਰਜ੍ਜਂ, ਕਾਮਭੋਗੋ ਨ ਦੇਸ੍ਸਿਯੋ;

ਸਬ੍ਬਞ੍ਞੁਤਂ ਪਿਯਂ ਮਯ੍ਹਂ, ਤਸ੍ਮਾ ਰਜ੍ਜਂ ਪਰਿਚ੍ਚਜਿ’’ਨ੍ਤਿ.

ਸੋਮਨਸ੍ਸਚਰਿਯਂ ਦੁਤਿਯਂ.