ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਖੁਦ੍ਦਕਨਿਕਾਯੇ

ਚਰਿਯਾਪਿਟਕਪਾਲ਼ਿ

੧. ਅਕਿਤ੍ਤਿਵਗ੍ਗੋ

੧. ਅਕਿਤ੍ਤਿਚਰਿਯਾ

੧. ‘‘ਕਪ੍ਪੇ ਚ ਸਤਸਹਸ੍ਸੇ, ਚਤੁਰੋ ਚ ਅਸਙ੍ਖਿਯੇ;

ਏਤ੍ਥਨ੍ਤਰੇ ਯਂ ਚਰਿਤਂ, ਸਬ੍ਬਂ ਤਂ ਬੋਧਿਪਾਚਨਂ.

੨. ‘‘ਅਤੀਤਕਪ੍ਪੇ ਚਰਿਤਂ, ਠਪਯਿਤ੍ਵਾ ਭਵਾਭਵੇ;

ਇਮਮ੍ਹਿ ਕਪ੍ਪੇ ਚਰਿਤਂ, ਪਵਕ੍ਖਿਸ੍ਸਂ ਸੁਣੋਹਿ ਮੇ.

੩. ‘‘ਯਦਾ ਅਹਂ ਬ੍ਰਹਾਰਞ੍ਞੇ, ਸੁਞ੍ਞੇ ਵਿਪਿਨਕਾਨਨੇ;

ਅਜ੍ਝੋਗਾਹੇਤ੍ਵਾ [ਅਜ੍ਝੋਗਹੇਤ੍ਵਾ (ਸੀ. ਸ੍ਯਾ.)] ਵਿਹਰਾਮਿ, ਅਕਿਤ੍ਤਿ ਨਾਮ ਤਾਪਸੋ.

੪. ‘‘ਤਦਾ ਮਂ ਤਪਤੇਜੇਨ, ਸਨ੍ਤਤ੍ਤੋ ਤਿਦਿਵਾਭਿਭੂ;

ਧਾਰੇਨ੍ਤੋ ਬ੍ਰਾਹ੍ਮਣਵਣ੍ਣਂ, ਭਿਕ੍ਖਾਯ ਮਂ ਉਪਾਗਮਿ.

੫. ‘‘ਪਵਨਾ ਆਭਤਂ ਪਣ੍ਣਂ, ਅਤੇਲਞ੍ਚ ਅਲੋਣਿਕਂ;

ਮਮ ਦ੍ਵਾਰੇ ਠਿਤਂ ਦਿਸ੍ਵਾ, ਸਕਟਾਹੇਨ ਆਕਿਰਿਂ.

੬. ‘‘ਤਸ੍ਸ ਦਤ੍ਵਾਨਹਂ ਪਣ੍ਣਂ, ਨਿਕ੍ਕੁਜ੍ਜਿਤ੍ਵਾਨ ਭਾਜਨਂ;

ਪੁਨੇਸਨਂ ਜਹਿਤ੍ਵਾਨ, ਪਾਵਿਸਿਂ ਪਣ੍ਣਸਾਲਕਂ.

੭. ‘‘ਦੁਤਿਯਮ੍ਪਿ ਤਤਿਯਮ੍ਪਿ, ਉਪਗਞ੍ਛਿ ਮਮਨ੍ਤਿਕਂ;

ਅਕਮ੍ਪਿਤੋ ਅਨੋਲਗ੍ਗੋ, ਏਵਮੇਵਮਦਾਸਹਂ.

੮. ‘‘ਨ ਮੇ ਤਪ੍ਪਚ੍ਚਯਾ ਅਤ੍ਥਿ, ਸਰੀਰਸ੍ਮਿਂ ਵਿਵਣ੍ਣਿਯਂ;

ਪੀਤਿਸੁਖੇਨ ਰਤਿਯਾ, ਵੀਤਿਨਾਮੇਮਿ ਤਂ ਦਿਵਂ.

੯. ‘‘ਯਦਿ ਮਾਸਮ੍ਪਿ ਦ੍ਵੇਮਾਸਂ, ਦਕ੍ਖਿਣੇਯ੍ਯਂ ਵਰਂ ਲਭੇ;

ਅਕਮ੍ਪਿਤੋ ਅਨੋਲੀਨੋ, ਦਦੇਯ੍ਯਂ ਦਾਨਮੁਤ੍ਤਮਂ.

੧੦. ‘‘ਨ ਤਸ੍ਸ ਦਾਨਂ ਦਦਮਾਨੋ, ਯਸਂ ਲਾਭਞ੍ਚ ਪਤ੍ਥਯਿਂ;

ਸਬ੍ਬਞ੍ਞੁਤਂ ਪਤ੍ਥਯਾਨੋ, ਤਾਨਿ ਕਮ੍ਮਾਨਿ ਆਚਰਿ’’ਨ੍ਤਿ.

ਅਕਿਤ੍ਤਿਚਰਿਯਂ ਪਠਮਂ.

੨. ਸਙ੍ਖਚਰਿਯਾ

੧੧. ‘‘ਪੁਨਾਪਰਂ ਯਦਾ ਹੋਮਿ, ਬ੍ਰਾਹ੍ਮਣੋ ਸਙ੍ਖਸਵ੍ਹਯੋ;

ਮਹਾਸਮੁਦ੍ਦਂ ਤਰਿਤੁਕਾਮੋ, ਉਪਗਚ੍ਛਾਮਿ ਪਟ੍ਟਨਂ.

੧੨. ‘‘ਤਤ੍ਥਦ੍ਦਸਂ ਪਟਿਪਥੇ, ਸਯਮ੍ਭੁਂ ਅਪਰਾਜਿਤਂ;

ਕਨ੍ਤਾਰਦ੍ਧਾਨਂ ਪਟਿਪਨ੍ਨਂ [ਕਨ੍ਤਾਰਦ੍ਧਾਨਪਟਿਪਨ੍ਨਂ (ਸੀ. ਸ੍ਯਾ.)], ਤਤ੍ਤਾਯ ਕਠਿਨਭੂਮਿਯਾ.

੧੩. ‘‘ਤਮਹਂ ਪਟਿਪਥੇ ਦਿਸ੍ਵਾ, ਇਮਮਤ੍ਥਂ ਵਿਚਿਨ੍ਤਯਿਂ;

‘ਇਦਂ ਖੇਤ੍ਤਂ ਅਨੁਪ੍ਪਤ੍ਤਂ, ਪੁਞ੍ਞਕਾਮਸ੍ਸ ਜਨ੍ਤੁਨੋ.

੧੪. ‘‘‘ਯਥਾ ਕਸ੍ਸਕੋ ਪੁਰਿਸੋ, ਖੇਤ੍ਤਂ ਦਿਸ੍ਵਾ ਮਹਾਗਮਂ;

ਤਤ੍ਥ ਬੀਜਂ ਨ ਰੋਪੇਤਿ, ਨ ਸੋ ਧਞ੍ਞੇਨ ਅਤ੍ਥਿਕੋ.

੧੫. ‘‘‘ਏਵਮੇਵਾਹਂ ਪੁਞ੍ਞਕਾਮੋ, ਦਿਸ੍ਵਾ ਖੇਤ੍ਤਵਰੁਤ੍ਤਮਂ;

ਯਦਿ ਤਤ੍ਥ ਕਾਰਂ ਨ ਕਰੋਮਿ, ਨਾਹਂ ਪੁਞ੍ਞੇਨ ਅਤ੍ਥਿਕੋ.

੧੬. ‘‘‘ਯਥਾ ਅਮਚ੍ਚੋ ਮੁਦ੍ਦਿਕਾਮੋ, ਰਞ੍ਞੋ ਅਨ੍ਤੇਪੁਰੇ ਜਨੇ;

ਨ ਦੇਤਿ ਤੇਸਂ ਧਨਧਞ੍ਞਂ, ਮੁਦ੍ਦਿਤੋ ਪਰਿਹਾਯਤਿ.

੧੭. ‘‘‘ਏਵਮੇਵਾਹਂ ਪੁਞ੍ਞਕਾਮੋ, ਵਿਪੁਲਂ ਦਿਸ੍ਵਾਨ ਦਕ੍ਖਿਣਂ;

ਯਦਿ ਤਸ੍ਸ ਦਾਨਂ ਨ ਦਦਾਮਿ, ਪਰਿਹਾਯਿਸ੍ਸਾਮਿ ਪੁਞ੍ਞਤੋ’.

੧੮. ‘‘ਏਵਾਹਂ ਚਿਨ੍ਤਯਿਤ੍ਵਾਨ, ਓਰੋਹਿਤ੍ਵਾ ਉਪਾਹਨਾ;

ਤਸ੍ਸ ਪਾਦਾਨਿ ਵਨ੍ਦਿਤ੍ਵਾ, ਅਦਾਸਿਂ ਛਤ੍ਤੁਪਾਹਨਂ.

੧੯. ‘‘ਤੇਨੇਵਾਹਂ ਸਤਗੁਣਤੋ, ਸੁਖੁਮਾਲੋ ਸੁਖੇਧਿਤੋ;

ਅਪਿ ਚ ਦਾਨਂ ਪਰਿਪੂਰੇਨ੍ਤੋ, ਏਵਂ ਤਸ੍ਸ ਅਦਾਸਹ’’ਨ੍ਤਿ.

ਸਙ੍ਖਚਰਿਯਂ ਦੁਤਿਯਂ.

੩. ਕੁਰੁਰਾਜਚਰਿਯਾ

੨੦. ‘‘ਪੁਨਾਪਰਂ ਯਦਾ ਹੋਮਿ, ਇਨ੍ਦਪਤ੍ਥੇ [ਇਨ੍ਦਪਤ੍ਤੇ (ਸੀ. ਕ.)] ਪੁਰੁਤ੍ਤਮੇ;

ਰਾਜਾ ਧਨਞ੍ਚਯੋ ਨਾਮ, ਕੁਸਲੇ ਦਸਹੁਪਾਗਤੋ.

੨੧. ‘‘ਕਲਿਙ੍ਗਰਟ੍ਠਵਿਸਯਾ, ਬ੍ਰਾਹ੍ਮਣਾ ਉਪਗਞ੍ਛੁ ਮਂ;

ਆਯਾਚੁਂ ਮਂ ਹਤ੍ਥਿਨਾਗਂ, ਧਞ੍ਞਂ ਮਙ੍ਗਲਸਮ੍ਮਤਂ.

੨੨. ‘‘‘ਅਵੁਟ੍ਠਿਕੋ ਜਨਪਦੋ, ਦੁਬ੍ਭਿਕ੍ਖੋ ਛਾਤਕੋ ਮਹਾ;

ਦਦਾਹਿ ਪਵਰਂ ਨਾਗਂ, ਨੀਲਂ ਅਞ੍ਜਨਸਵ੍ਹਯਂ.

੨੩. ‘‘‘ਨ ਮੇ ਯਾਚਕਮਨੁਪ੍ਪਤ੍ਤੇ, ਪਟਿਕ੍ਖੇਪੋ ਅਨੁਚ੍ਛਵੋ;

ਮਾ ਮੇ ਭਿਜ੍ਜਿ ਸਮਾਦਾਨਂ, ਦਸ੍ਸਾਮਿ ਵਿਪੁਲਂ ਗਜਂ’.

੨੪. ‘‘ਨਾਗਂ ਗਹੇਤ੍ਵਾ ਸੋਣ੍ਡਾਯ, ਭਿਙ੍ਗਾਰੇ [ਭਿਙ੍ਕਾਰੇ (ਸੀ.)] ਰਤਨਾਮਯੇ;

ਜਲਂ ਹਤ੍ਥੇ ਆਕਿਰਿਤ੍ਵਾ, ਬ੍ਰਾਹ੍ਮਣਾਨਂ ਅਦਂ ਗਜਂ.

੨੫. ‘‘ਤਸ੍ਸ ਨਾਗੇ ਪਦਿਨ੍ਨਮ੍ਹਿ, ਅਮਚ੍ਚਾ ਏਤਦਬ੍ਰਵੁਂ;

‘ਕਿਂ ਨੁ ਤੁਯ੍ਹਂ ਵਰਂ ਨਾਗਂ, ਯਾਚਕਾਨਂ ਪਦਸ੍ਸਸਿ.

੨੬. ‘‘‘ਧਞ੍ਞਂ ਮਙ੍ਗਲਸਮ੍ਪਨ੍ਨਂ, ਸਙ੍ਗਾਮਵਿਜਯੁਤ੍ਤਮਂ;

ਤਸ੍ਮਿਂ ਨਾਗੇ ਪਦਿਨ੍ਨਮ੍ਹਿ, ਕਿਂ ਤੇ ਰਜ੍ਜਂ ਕਰਿਸ੍ਸਤਿ.

੨੭. ‘‘‘ਰਜ੍ਜਮ੍ਪਿ ਮੇ ਦਦੇ ਸਬ੍ਬਂ, ਸਰੀਰਂ ਦਜ੍ਜਮਤ੍ਤਨੋ;

ਸਬ੍ਬਞ੍ਞੁਤਂ ਪਿਯਂ ਮਯ੍ਹਂ, ਤਸ੍ਮਾ ਨਾਗਂ ਅਦਾਸਹ’’’ਨ੍ਤਿ.

ਕੁਰੁਰਾਜਚਰਿਯਂ ਤਤਿਯਂ.

੪. ਮਹਾਸੁਦਸ੍ਸਨਚਰਿਯਾ

੨੮. ‘‘ਕੁਸਾਵਤਿਮ੍ਹਿ ਨਗਰੇ, ਯਦਾ ਆਸਿਂ ਮਹੀਪਤਿ;

ਮਹਾਸੁਦਸ੍ਸਨੋ ਨਾਮ, ਚਕ੍ਕਵਤ੍ਤੀ ਮਹਬ੍ਬਲੋ.

੨੯. ‘‘ਤਤ੍ਥਾਹਂ ਦਿਵਸੇ ਤਿਕ੍ਖਤ੍ਤੁਂ, ਘੋਸਾਪੇਮਿ ਤਹਿਂ ਤਹਿਂ;

‘ਕੋ ਕਿਂ ਇਚ੍ਛਤਿ ਪਤ੍ਥੇਤਿ, ਕਸ੍ਸ ਕਿਂ ਦੀਯਤੂ ਧਨਂ.

੩੦. ‘‘‘ਕੋ ਛਾਤਕੋ ਕੋ ਤਸਿਤੋ, ਕੋ ਮਾਲਂ ਕੋ ਵਿਲੇਪਨਂ;

ਨਾਨਾਰਤ੍ਤਾਨਿ ਵਤ੍ਥਾਨਿ, ਕੋ ਨਗ੍ਗੋ ਪਰਿਦਹਿਸ੍ਸਤਿ.

੩੧. ‘‘‘ਕੋ ਪਥੇ ਛਤ੍ਤਮਾਦੇਤਿ, ਕੋਪਾਹਨਾ ਮੁਦੂ ਸੁਭਾ’;

ਇਤਿ ਸਾਯਞ੍ਚ ਪਾਤੋ ਚ, ਘੋਸਾਪੇਮਿ ਤਹਿਂ ਤਹਿਂ.

੩੨. ‘‘ਨ ਤਂ ਦਸਸੁ ਠਾਨੇਸੁ, ਨਪਿ ਠਾਨਸਤੇਸੁ ਵਾ;

ਅਨੇਕਸਤਠਾਨੇਸੁ, ਪਟਿਯਤ੍ਤਂ ਯਾਚਕੇ ਧਨਂ.

੩੩. ‘‘ਦਿਵਾ ਵਾ ਯਦਿ ਵਾ ਰਤ੍ਤਿਂ, ਯਦਿ ਏਤਿ ਵਨਿਬ੍ਬਕੋ;

ਲਦ੍ਧਾ ਯਦਿਚ੍ਛਕਂ ਭੋਗਂ, ਪੂਰਹਤ੍ਥੋਵ ਗਚ੍ਛਤਿ.

੩੪. ‘‘ਏਵਰੂਪਂ ਮਹਾਦਾਨਂ, ਅਦਾਸਿਂ ਯਾਵਜੀਵਿਕਂ;

ਨਪਾਹਂ ਦੇਸ੍ਸਂ ਧਨਂ ਦਮ੍ਮਿ, ਨਪਿ ਨਤ੍ਥਿ ਨਿਚਯੋ ਮਯਿ.

੩੫. ‘‘ਯਥਾਪਿ ਆਤੁਰੋ ਨਾਮ, ਰੋਗਤੋ ਪਰਿਮੁਤ੍ਤਿਯਾ;

ਧਨੇਨ ਵੇਜ੍ਜਂ ਤਪ੍ਪੇਤ੍ਵਾ, ਰੋਗਤੋ ਪਰਿਮੁਚ੍ਚਤਿ.

੩੬. ‘‘ਤਥੇਵਾਹਂ ਜਾਨਮਾਨੋ, ਪਰਿਪੂਰੇਤੁਮਸੇਸਤੋ;

ਊਨਮਨਂ ਪੂਰਯਿਤੁਂ, ਦੇਮਿ ਦਾਨਂ ਵਨਿਬ੍ਬਕੇ;

ਨਿਰਾਲਯੋ ਅਪਚ੍ਚਾਸੋ, ਸਮ੍ਬੋਧਿਮਨੁਪਤ੍ਤਿਯਾ’’ਤਿ.

ਮਹਾਸੁਦਸ੍ਸਨਚਰਿਯਂ ਚਤੁਤ੍ਥਂ.

੫. ਮਹਾਗੋਵਿਨ੍ਦਚਰਿਯਾ

੩੭. ‘‘ਪੁਨਾਪਰਂ ਯਦਾ ਹੋਮਿ, ਸਤ੍ਤਰਾਜਪੁਰੋਹਿਤੋ;

ਪੂਜਿਤੋ ਨਰਦੇਵੇਹਿ, ਮਹਾਗੋਵਿਨ੍ਦਬ੍ਰਾਹ੍ਮਣੋ.

੩੮. ‘‘ਤਦਾਹਂ ਸਤ੍ਤਰਜ੍ਜੇਸੁ, ਯਂ ਮੇ ਆਸਿ ਉਪਾਯਨਂ;

ਤੇਨ ਦੇਮਿ ਮਹਾਦਾਨਂ, ਅਕ੍ਖੋਬ੍ਭਂ [ਅਕ੍ਖੋਭਂ (ਸ੍ਯਾ. ਕਂ.)] ਸਾਗਰੂਪਮਂ.

੩੯. ‘‘ਨ ਮੇ ਦੇਸ੍ਸਂ ਧਨਂ ਧਞ੍ਞਂ, ਨਪਿ ਨਤ੍ਥਿ ਨਿਚਯੋ ਮਯਿ;

ਸਬ੍ਬਞ੍ਞੁਤਂ ਪਿਯਂ ਮਯ੍ਹਂ, ਤਸ੍ਮਾ ਦੇਮਿ ਵਰਂ ਧਨ’’ਨ੍ਤਿ.

ਮਹਾਗੋਵਿਨ੍ਦਚਰਿਯਂ ਪਞ੍ਚਮਂ.

੬. ਨਿਮਿਰਾਜਚਰਿਯਾ

੪੦. ‘‘ਪੁਨਾਪਰਂ ਯਦਾ ਹੋਮਿ, ਮਿਥਿਲਾਯਂ ਪੁਰੁਤ੍ਤਮੇ;

ਨਿਮਿ ਨਾਮ ਮਹਾਰਾਜਾ, ਪਣ੍ਡਿਤੋ ਕੁਸਲਤ੍ਥਿਕੋ.

੪੧. ‘‘ਤਦਾਹਂ ਮਾਪਯਿਤ੍ਵਾਨ, ਚਤੁਸ੍ਸਾਲਂ ਚਤੁਮ੍ਮੁਖਂ;

ਤਤ੍ਥ ਦਾਨਂ ਪਵਤ੍ਤੇਸਿਂ, ਮਿਗਪਕ੍ਖਿਨਰਾਦਿਨਂ.

੪੨. ‘‘ਅਚ੍ਛਾਦਨਞ੍ਚ ਸਯਨਂ, ਅਨ੍ਨਂ ਪਾਨਞ੍ਚ ਭੋਜਨਂ;

ਅਬ੍ਬੋਚ੍ਛਿਨ੍ਨਂ ਕਰਿਤ੍ਵਾਨ, ਮਹਾਦਾਨਂ ਪਵਤ੍ਤਯਿਂ.

੪੩. ‘‘ਯਥਾਪਿ ਸੇਵਕੋ ਸਾਮਿਂ, ਧਨਹੇਤੁਮੁਪਾਗਤੋ;

ਕਾਯੇਨ ਵਾਚਾ ਮਨਸਾ, ਆਰਾਧਨੀਯਮੇਸਤਿ.

੪੪. ‘‘ਤਥੇਵਾਹਂ ਸਬ੍ਬਭਵੇ, ਪਰਿਯੇਸਿਸ੍ਸਾਮਿ ਬੋਧਿਜਂ;

ਦਾਨੇਨ ਸਤ੍ਤੇ ਤਪ੍ਪੇਤ੍ਵਾ, ਇਚ੍ਛਾਮਿ ਬੋਧਿਮੁਤ੍ਤਮ’’ਨ੍ਤਿ.

ਨਿਮਿਰਾਜਚਰਿਯਂ ਛਟ੍ਠਂ.

੭. ਚਨ੍ਦਕੁਮਾਰਚਰਿਯਾ

੪੫. ‘‘ਪੁਨਾਪਰਂ ਯਦਾ ਹੋਮਿ, ਏਕਰਾਜਸ੍ਸ ਅਤ੍ਰਜੋ;

ਨਗਰੇ ਪੁਪ੍ਫਵਤਿਯਾ, ਕੁਮਾਰੋ ਚਨ੍ਦਸਵ੍ਹਯੋ.

੪੬. ‘‘ਤਦਾਹਂ ਯਜਨਾ ਮੁਤ੍ਤੋ, ਨਿਕ੍ਖਨ੍ਤੋ ਯਞ੍ਞਵਾਟਤੋ;

ਸਂਵੇਗਂ ਜਨਯਿਤ੍ਵਾਨ, ਮਹਾਦਾਨਂ ਪਵਤ੍ਤਯਿਂ.

੪੭. ‘‘ਨਾਹਂ ਪਿਵਾਮਿ ਖਾਦਾਮਿ, ਨਪਿ ਭੁਞ੍ਜਾਮਿ ਭੋਜਨਂ;

ਦਕ੍ਖਿਣੇਯ੍ਯੇ ਅਦਤ੍ਵਾਨ, ਅਪਿ ਛਪ੍ਪਞ੍ਚਰਤ੍ਤਿਯੋ.

੪੮. ‘‘ਯਥਾਪਿ ਵਾਣਿਜੋ ਨਾਮ, ਕਤ੍ਵਾਨ ਭਣ੍ਡਸਞ੍ਚਯਂ;

ਯਤ੍ਥ ਲਾਭੋ ਮਹਾ ਹੋਤਿ, ਤਤ੍ਥ ਤਂ [ਤਤ੍ਥ ਨਂ (ਸੀ.), ਤਤ੍ਥ (ਕ.)] ਹਰਤਿ ਭਣ੍ਡਕਂ.

੪੯. ‘‘ਤਥੇਵ ਸਕਭੁਤ੍ਤਾਪਿ, ਪਰੇ ਦਿਨ੍ਨਂ ਮਹਪ੍ਫਲਂ;

ਤਸ੍ਮਾ ਪਰਸ੍ਸ ਦਾਤਬ੍ਬਂ, ਸਤਭਾਗੋ ਭਵਿਸ੍ਸਤਿ.

੫੦. ‘‘ਏਤਮਤ੍ਥਵਸਂ ਞਤ੍ਵਾ, ਦੇਮਿ ਦਾਨਂ ਭਵਾਭਵੇ;

ਨ ਪਟਿਕ੍ਕਮਾਮਿ ਦਾਨਤੋ, ਸਮ੍ਬੋਧਿਮਨੁਪਤ੍ਤਿਯਾ’’ਤਿ.

ਚਨ੍ਦਕੁਮਾਰਚਰਿਯਂ ਸਤ੍ਤਮਂ.

੮. ਸਿਵਿਰਾਜਚਰਿਯਾ

੫੧. ‘‘ਅਰਿਟ੍ਠਸਵ੍ਹਯੇ ਨਗਰੇ, ਸਿਵਿਨਾਮਾਸਿ ਖਤ੍ਤਿਯੋ;

ਨਿਸਜ੍ਜ ਪਾਸਾਦਵਰੇ, ਏਵਂ ਚਿਨ੍ਤੇਸਹਂ ਤਦਾ.

੫੨. ‘‘‘ਯਂ ਕਿਞ੍ਚਿ ਮਾਨੁਸਂ ਦਾਨਂ, ਅਦਿਨ੍ਨਂ ਮੇ ਨ ਵਿਜ੍ਜਤਿ;

ਯੋਪਿ ਯਾਚੇਯ੍ਯ ਮਂ ਚਕ੍ਖੁਂ, ਦਦੇਯ੍ਯਂ ਅਵਿਕਮ੍ਪਿਤੋ’.

੫੩. ‘‘ਮਮ ਸਙ੍ਕਪ੍ਪਮਞ੍ਞਾਯ, ਸਕ੍ਕੋ ਦੇਵਾਨਮਿਸ੍ਸਰੋ;

ਨਿਸਿਨ੍ਨੋ ਦੇਵਪਰਿਸਾਯ, ਇਦਂ ਵਚਨਮਬ੍ਰਵਿ.

੫੪. ‘‘‘ਨਿਸਜ੍ਜ ਪਾਸਾਦਵਰੇ, ਸਿਵਿਰਾਜਾ ਮਹਿਦ੍ਧਿਕੋ;

ਚਿਨ੍ਤੇਨ੍ਤੋ ਵਿਵਿਧਂ ਦਾਨਂ, ਅਦੇਯ੍ਯਂ ਸੋ ਨ ਪਸ੍ਸਤਿ.

੫੫. ‘‘‘ਤਥਂ ਨੁ ਵਿਤਥਂ ਨੇਤਂ, ਹਨ੍ਦ ਵੀਮਂਸਯਾਮਿ ਤਂ;

ਮੁਹੁਤ੍ਤਂ ਆਗਮੇਯ੍ਯਾਥ, ਯਾਵ ਜਾਨਾਮਿ ਤਂ ਮਨਂ’.

੫੬. ‘‘ਪਵੇਧਮਾਨੋ ਪਲਿਤਸਿਰੋ, ਵਲਿਗਤ੍ਤੋ [ਵਲਿਤਗਤ੍ਤੋ (ਸੀ.)] ਜਰਾਤੁਰੋ;

ਅਨ੍ਧਵਣ੍ਣੋਵ ਹੁਤ੍ਵਾਨ, ਰਾਜਾਨਂ ਉਪਸਙ੍ਕਮਿ.

੫੭. ‘‘ਸੋ ਤਦਾ ਪਗ੍ਗਹੇਤ੍ਵਾਨ, ਵਾਮਂ ਦਕ੍ਖਿਣਬਾਹੁ ਚ;

ਸਿਰਸ੍ਮਿਂ ਅਞ੍ਜਲਿਂ ਕਤ੍ਵਾ, ਇਦਂ ਵਚਨਮਬ੍ਰਵਿ.

੫੮. ‘‘‘ਯਾਚਾਮਿ ਤਂ ਮਹਾਰਾਜ, ਧਮ੍ਮਿਕ ਰਟ੍ਠਵਡ੍ਢਨ;

ਤਵ ਦਾਨਰਤਾ ਕਿਤ੍ਤਿ, ਉਗ੍ਗਤਾ ਦੇਵਮਾਨੁਸੇ.

੫੯. ‘‘‘ਉਭੋਪਿ ਨੇਤ੍ਤਾ ਨਯਨਾ, ਅਨ੍ਧਾ ਉਪਹਤਾ ਮਮ;

ਏਕਂ ਮੇ ਨਯਨਂ ਦੇਹਿ, ਤ੍ਵਮ੍ਪਿ ਏਕੇਨ ਯਾਪਯ’.

੬੦. ‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਹਟ੍ਠੋ ਸਂਵਿਗ੍ਗਮਾਨਸੋ;

ਕਤਞ੍ਜਲੀ ਵੇਦਜਾਤੋ, ਇਦਂ ਵਚਨਮਬ੍ਰਵਿਂ.

੬੧. ‘‘‘ਇਦਾਨਾਹਂ ਚਿਨ੍ਤਯਿਤ੍ਵਾਨ, ਪਾਸਾਦਤੋ ਇਧਾਗਤੋ;

ਤ੍ਵਂ ਮਮ ਚਿਤ੍ਤਮਞ੍ਞਾਯ, ਨੇਤ੍ਤਂ ਯਾਚਿਤੁਮਾਗਤੋ.

੬੨. ‘‘‘ਅਹੋ ਮੇ ਮਾਨਸਂ ਸਿਦ੍ਧਂ, ਸਙ੍ਕਪ੍ਪੋ ਪਰਿਪੂਰਿਤੋ;

ਅਦਿਨ੍ਨਪੁਬ੍ਬਂ ਦਾਨਵਰਂ, ਅਜ੍ਜ ਦਸ੍ਸਾਮਿ ਯਾਚਕੇ.

੬੩. ‘‘‘ਏਹਿ ਸਿਵਕ ਉਟ੍ਠੇਹਿ, ਮਾ ਦਨ੍ਧਯਿ ਮਾ ਪਵੇਧਯਿ;

ਉਭੋਪਿ ਨਯਨਂ ਦੇਹਿ, ਉਪ੍ਪਾਟੇਤ੍ਵਾ ਵਣਿਬ੍ਬਕੇ’.

੬੪. ‘‘ਤਤੋ ਸੋ ਚੋਦਿਤੋ ਮਯ੍ਹਂ, ਸਿਵਕੋ ਵਚਨਂ ਕਰੋ;

ਉਦ੍ਧਰਿਤ੍ਵਾਨ ਪਾਦਾਸਿ, ਤਾਲਮਿਞ੍ਜਂਵ ਯਾਚਕੇ.

੬੫. ‘‘ਦਦਮਾਨਸ੍ਸ ਦੇਨ੍ਤਸ੍ਸ, ਦਿਨ੍ਨਦਾਨਸ੍ਸ ਮੇ ਸਤੋ;

ਚਿਤ੍ਤਸ੍ਸ ਅਞ੍ਞਥਾ ਨਤ੍ਥਿ, ਬੋਧਿਯਾਯੇਵ ਕਾਰਣਾ.