੩. ਅਯੋਘਰਚਰਿਯਾ

੨੪. ‘‘ਪੁਨਾਪਰਂ ਯਦਾ ਹੋਮਿ, ਕਾਸਿਰਾਜਸ੍ਸ ਅਤ੍ਰਜੋ;

ਅਯੋਘਰਮ੍ਹਿ ਸਂਵਡ੍ਢੋ, ਨਾਮੇਨਾਸਿ ਅਯੋਘਰੋ.

੨੫. ‘‘ਦੁਕ੍ਖੇਨ ਜੀਵਿਤੋ ਲਦ੍ਧੋ, ਸਂਪੀਲ਼ੇ ਪਤਿਪੋਸਿਤੋ;

ਅਜ੍ਜੇਵ ਪੁਤ੍ਤ ਪਟਿਪਜ੍ਜ, ਕੇਵਲਂ ਵਸੁਧਂ ਇਮਂ.

੨੬. ‘‘ਸਰਟ੍ਠਕਂ ਸਨਿਗਮਂ, ਸਜਨਂ ਵਨ੍ਦਿਤ੍ਵ ਖਤ੍ਤਿਯਂ;

ਅਞ੍ਜਲਿਂ ਪਗ੍ਗਹੇਤ੍ਵਾਨ, ਇਦਂ ਵਚਨਮਬ੍ਰਵਿਂ.

੨੭. ‘‘‘ਯੇ ਕੇਚਿ ਮਹਿਯਾ ਸਤ੍ਤਾ, ਹੀਨਮੁਕ੍ਕਟ੍ਠਮਜ੍ਝਿਮਾ;

ਨਿਰਾਰਕ੍ਖਾ ਸਕੇ ਗੇਹੇ, ਵਡ੍ਢਨ੍ਤਿ ਸਕਞਾਤਿਭਿ.

੨੮. ‘‘‘ਇਦਂ ਲੋਕੇ ਉਤ੍ਤਰਿਯਂ, ਸਂਪੀਲ਼ੇ ਮਮ ਪੋਸਨਂ;

ਅਯੋਘਰਮ੍ਹਿ ਸਂਵਡ੍ਢੋ, ਅਪ੍ਪਭੇ ਚਨ੍ਦਸੂਰਿਯੇ.

੨੯. ‘‘‘ਪੂਤਿਕੁਣਪਸਮ੍ਪੁਣ੍ਣਾ, ਮੁਚ੍ਚਿਤ੍ਵਾ ਮਾਤੁ ਕੁਚ੍ਛਿਤੋ;

ਤਤੋ ਘੋਰਤਰੇ ਦੁਕ੍ਖੇ, ਪੁਨ ਪਕ੍ਖਿਤ੍ਤਯੋਘਰੇ.

੩੦. ‘‘‘ਯਦਿਹਂ ਤਾਦਿਸਂ ਪਤ੍ਵਾ, ਦੁਕ੍ਖਂ ਪਰਮਦਾਰੁਣਂ;

ਰਜ੍ਜੇਸੁ ਯਦਿ ਰਜ੍ਜਾਮਿ [ਰਞ੍ਜਾਮਿ (ਸੀ.)], ਪਾਪਾਨਂ ਉਤ੍ਤਮੋ ਸਿਯਂ.

੩੧. ‘‘‘ਉਕ੍ਕਣ੍ਠਿਤੋਮ੍ਹਿ ਕਾਯੇਨ, ਰਜ੍ਜੇਨਮ੍ਹਿ ਅਨਤ੍ਥਿਕੋ;

ਨਿਬ੍ਬੁਤਿਂ ਪਰਿਯੇਸਿਸ੍ਸਂ, ਯਤ੍ਥ ਮਂ ਮਚ੍ਚੁ ਨ ਮਦ੍ਦਿਯੇ’.

੩੨. ‘‘ਏਵਾਹਂ ਚਿਨ੍ਤਯਿਤ੍ਵਾਨ, ਵਿਰਵਨ੍ਤੇ ਮਹਾਜਨੇ;

ਨਾਗੋਵ ਬਨ੍ਧਨਂ ਛੇਤ੍ਵਾ, ਪਾਵਿਸਿਂ ਕਾਨਨਂ ਵਨਂ.

੩੩. ‘‘ਮਾਤਾਪਿਤਾ ਨ ਮੇ ਦੇਸ੍ਸਾ, ਨਪਿ ਮੇ ਦੇਸ੍ਸਂ ਮਹਾਯਸਂ;

ਸਬ੍ਬਞ੍ਞੁਤਂ ਪਿਯਂ ਮਯ੍ਹਂ, ਤਸ੍ਮਾ ਰਜ੍ਜਂ ਪਰਿਚ੍ਚਜਿ’’ਨ੍ਤਿ.

ਅਯੋਘਰਚਰਿਯਂ ਤਤਿਯਂ.