੧. ਯੁਧਞ੍ਜਯਚਰਿਯਾ

੧. ‘‘ਯਦਾਹਂ ਅਮਿਤਯਸੋ, ਰਾਜਪੁਤ੍ਤੋ ਯੁਧਞ੍ਜਯੋ;

ਉਸ੍ਸਾਵਬਿਨ੍ਦੁਂ ਸੂਰਿਯਾਤਪੇ, ਪਤਿਤਂ ਦਿਸ੍ਵਾਨ ਸਂਵਿਜਿਂ.

੨. ‘‘ਤਞ੍ਞੇਵਾਧਿਪਤਿਂ ਕਤ੍ਵਾ, ਸਂਵੇਗਮਨੁਬ੍ਰੂਹਯਿਂ;

ਮਾਤਾਪਿਤੂ ਚ ਵਨ੍ਦਿਤ੍ਵਾ, ਪਬ੍ਬਜ੍ਜਮਨੁਯਾਚਹਂ.

੩. ‘‘ਯਾਚਨ੍ਤਿ ਮਂ ਪਞ੍ਜਲਿਕਾ, ਸਨੇਗਮਾ ਸਰਟ੍ਠਕਾ;

‘ਅਜ੍ਜੇਵ ਪੁਤ੍ਤ ਪਟਿਪਜ੍ਜ, ਇਦ੍ਧਂ ਫੀਤਂ ਮਹਾਮਹਿਂ’.

੪. ‘‘ਸਰਾਜਕੇ ਸਹੋਰੋਧੇ, ਸਨੇਗਮੇ ਸਰਟ੍ਠਕੇ;

ਕਰੁਣਂ ਪਰਿਦੇਵਨ੍ਤੇ, ਅਨਪੇਕ੍ਖੋਵ ਪਰਿਚ੍ਚਜਿਂ.

੫. ‘‘ਕੇਵਲਂ ਪਥਵਿਂ ਰਜ੍ਜਂ, ਞਾਤਿਪਰਿਜਨਂ ਯਸਂ;

ਚਜਮਾਨੋ ਨ ਚਿਨ੍ਤੇਸਿਂ, ਬੋਧਿਯਾਯੇਵ ਕਾਰਣਾ.

੬. ‘‘ਮਾਤਾਪਿਤਾ ਨ ਮੇ ਦੇਸ੍ਸਾ, ਨਪਿ ਮੇ ਦੇਸ੍ਸਂ ਮਹਾਯਸਂ;

ਸਬ੍ਬਞ੍ਞੁਤਂ ਪਿਯਂ ਮਯ੍ਹਂ, ਤਸ੍ਮਾ ਰਜ੍ਜਂ ਪਰਿਚ੍ਚਜਿ’’ਨ੍ਤਿ.

ਯੁਧਞ੍ਜਯਚਰਿਯਂ ਪਠਮਂ.