੮. ਧਮ੍ਮਦੇਵਪੁਤ੍ਤਚਰਿਯਾ

੬੬. ‘‘ਪੁਨਾਪਰਂ ਯਦਾ ਹੋਮਿ, ਮਹਾਪਕ੍ਖੋ ਮਹਿਦ੍ਧਿਕੋ;

ਧਮ੍ਮੋ ਨਾਮ ਮਹਾਯਕ੍ਖੋ, ਸਬ੍ਬਲੋਕਾਨੁਕਮ੍ਪਕੋ.

੬੭. ‘‘ਦਸਕੁਸਲਕਮ੍ਮਪਥੇ, ਸਮਾਦਪੇਨ੍ਤੋ ਮਹਾਜਨਂ;

ਚਰਾਮਿ ਗਾਮਨਿਗਮਂ, ਸਮਿਤ੍ਤੋ ਸਪਰਿਜ੍ਜਨੋ.

੬੮. ‘‘ਪਾਪੋ ਕਦਰਿਯੋ ਯਕ੍ਖੋ, ਦੀਪੇਨ੍ਤੋ ਦਸ ਪਾਪਕੇ;

ਸੋਪੇਤ੍ਥ ਮਹਿਯਾ ਚਰਤਿ, ਸਮਿਤ੍ਤੋ ਸਪਰਿਜ੍ਜਨੋ.

੬੯. ‘‘ਧਮ੍ਮਵਾਦੀ ਅਧਮ੍ਮੋ ਚ, ਉਭੋ ਪਚ੍ਚਨਿਕਾ ਮਯਂ;

ਧੁਰੇ ਧੁਰਂ ਘਟ੍ਟਯਨ੍ਤਾ, ਸਮਿਮ੍ਹਾ ਪਟਿਪਥੇ ਉਭੋ.

੭੦. ‘‘ਕਲਹੋ ਵਤ੍ਤਤੀ ਭੇਸ੍ਮਾ, ਕਲ੍ਯਾਣਪਾਪਕਸ੍ਸ ਚ;

ਮਗ੍ਗਾ ਓਕ੍ਕਮਨਤ੍ਥਾਯ, ਮਹਾਯੁਦ੍ਧੋ ਉਪਟ੍ਠਿਤੋ.

੭੧. ‘‘ਯਦਿਹਂ ਤਸ੍ਸ ਕੁਪ੍ਪੇਯ੍ਯਂ, ਯਦਿ ਭਿਨ੍ਦੇ ਤਪੋਗੁਣਂ;

ਸਹਪਰਿਜਨਂ ਤਸ੍ਸ, ਰਜਭੂਤਂ ਕਰੇਯ੍ਯਹਂ.

੭੨. ‘‘ਅਪਿਚਾਹਂ ਸੀਲਰਕ੍ਖਾਯ, ਨਿਬ੍ਬਾਪੇਤ੍ਵਾਨ ਮਾਨਸਂ;

ਸਹ ਜਨੇਨੋਕ੍ਕਮਿਤ੍ਵਾ, ਪਥਂ ਪਾਪਸ੍ਸ ਦਾਸਹਂ.

੭੩. ‘‘ਸਹ ਪਥਤੋ ਓਕ੍ਕਨ੍ਤੇ, ਕਤ੍ਵਾ ਚਿਤ੍ਤਸ੍ਸ ਨਿਬ੍ਬੁਤਿਂ;

ਵਿਵਰਂ ਅਦਾਸਿ ਪਥਵੀ, ਪਾਪਯਕ੍ਖਸ੍ਸ ਤਾਵਦੇ’’ਤਿ.

ਧਮ੍ਮਦੇਵਪੁਤ੍ਤਚਰਿਯਂ ਅਟ੍ਠਮਂ.