੯. ਅਲੀਨਸਤ੍ਤੁਚਰਿਯਾ

੭੪. ‘‘ਪਞ੍ਚਾਲਰਟ੍ਠੇ ਨਗਰਵਰੇ, ਕਪਿਲਾਯਂ [ਕਮ੍ਪਿਲਾਯਂ (ਸੀ.), ਕਪ੍ਪਿਲਾਯਂ (ਸ੍ਯਾ.)] ਪੁਰੁਤ੍ਤਮੇ;

ਰਾਜਾ ਜਯਦ੍ਦਿਸੋ ਨਾਮ, ਸੀਲਗੁਣਮੁਪਾਗਤੋ.

੭੫. ‘‘ਤਸ੍ਸ ਰਞ੍ਞੋ ਅਹਂ ਪੁਤ੍ਤੋ, ਸੁਤਧਮ੍ਮੋ ਸੁਸੀਲਵਾ;

ਅਲੀਨਸਤ੍ਤੋ ਗੁਣਵਾ, ਅਨੁਰਕ੍ਖਪਰਿਜਨੋ ਸਦਾ.

੭੬. ‘‘ਪਿਤਾ ਮੇ ਮਿਗਵਂ ਗਨ੍ਤ੍ਵਾ, ਪੋਰਿਸਾਦਂ ਉਪਾਗਮਿ;

ਸੋ ਮੇ ਪਿਤੁਮਗ੍ਗਹੇਸਿ, ‘ਭਕ੍ਖੋਸਿ ਮਮ ਮਾ ਚਲਿ’.

੭੭. ‘‘ਤਸ੍ਸ ਤਂ ਵਚਨਂ ਸੁਤ੍ਵਾ, ਭੀਤੋ ਤਸਿਤਵੇਧਿਤੋ;

ਊਰੁਕ੍ਖਮ੍ਭੋ ਅਹੁ ਤਸ੍ਸ, ਦਿਸ੍ਵਾਨ ਪੋਰਿਸਾਦਕਂ.

੭੮. ‘‘ਮਿਗਵਂ ਗਹੇਤ੍ਵਾ ਮੁਞ੍ਚਸ੍ਸੁ, ਕਤ੍ਵਾ ਆਗਮਨਂ ਪੁਨ;

ਬ੍ਰਾਹ੍ਮਣਸ੍ਸ ਧਨਂ ਦਤ੍ਵਾ, ਪਿਤਾ ਆਮਨ੍ਤਯੀ ਮਮਂ.

੭੯. ‘‘‘ਰਜ੍ਜਂ ਪੁਤ੍ਤ ਪਟਿਪਜ੍ਜ, ਮਾ ਪਮਜ੍ਜਿ ਪੁਰਂ ਇਦਂ;

ਕਤਂ ਮੇ ਪੋਰਿਸਾਦੇਨ, ਮਮ ਆਗਮਨਂ ਪੁਨ’.

੮੦. ‘‘ਮਾਤਾਪਿਤੂ ਚ ਵਨ੍ਦਿਤ੍ਵਾ, ਨਿਮ੍ਮਿਨਿਤ੍ਵਾਨ ਅਤ੍ਤਨਾ;

ਨਿਕ੍ਖਿਪਿਤ੍ਵਾ ਧਨੁਂ ਖਗ੍ਗਂ, ਪੋਰਿਸਾਦਂ ਉਪਾਗਮਿਂ.

੮੧. ‘‘ਸਸਤ੍ਥਹਤ੍ਥੂਪਗਤਂ, ਕਦਾਚਿ ਸੋ ਤਸਿਸ੍ਸਤਿ;

ਤੇਨ ਭਿਜ੍ਜਿਸ੍ਸਤਿ ਸੀਲਂ, ਪਰਿਤ੍ਤਾਸਂ [ਪਰਿਤਾਸਂ (ਸੀ.)] ਕਤੇ ਮਯਿ.

੮੨. ‘‘ਸੀਲਖਣ੍ਡਭਯਾ ਮਯ੍ਹਂ, ਤਸ੍ਸ ਦੇਸ੍ਸਂ ਨ ਬ੍ਯਾਹਰਿਂ;

ਮੇਤ੍ਤਚਿਤ੍ਤੋ ਹਿਤਵਾਦੀ, ਇਦਂ ਵਚਨਮਬ੍ਰਵਿਂ.

੮੩. ‘‘‘ਉਜ੍ਜਾਲੇਹਿ ਮਹਾਅਗ੍ਗਿਂ, ਪਪਤਿਸ੍ਸਾਮਿ ਰੁਕ੍ਖਤੋ;

ਤ੍ਵਂ ਪਕ੍ਕਕਾਲਮਞ੍ਞਾਯ [ਸੁਪਕ੍ਕਕਾਲਮਞ੍ਞਾਯ (ਪੀ.)], ਭਕ੍ਖਯ ਮਂ ਪਿਤਾਮਹ’.

੮੪. ‘‘ਇਤਿ ਸੀਲਵਤਂ ਹੇਤੁ, ਨਾਰਕ੍ਖਿਂ ਮਮ ਜੀਵਿਤਂ;

ਪਬ੍ਬਾਜੇਸਿਂ ਚਹਂ ਤਸ੍ਸ, ਸਦਾ ਪਾਣਾਤਿਪਾਤਿਕ’’ਨ੍ਤਿ.

ਅਲੀਨਸਤ੍ਤੁਚਰਿਯਂ ਨਵਮਂ.