੯. ਵੇਸ੍ਸਨ੍ਤਰਚਰਿਯਾ

੬੭. ‘‘ਯਾ ਮੇ ਅਹੋਸਿ ਜਨਿਕਾ, ਫੁਸ੍ਸਤੀ [ਫੁਸਤੀ (ਸੀ.)] ਨਾਮ ਖਤ੍ਤਿਯਾ;

ਸਾ ਅਤੀਤਾਸੁ ਜਾਤੀਸੁ, ਸਕ੍ਕਸ੍ਸ ਮਹੇਸੀ ਪਿਯਾ.

੬੮. ‘‘ਤਸ੍ਸਾ ਆਯੁਕ੍ਖਯਂ ਞਤ੍ਵਾ, ਦੇਵਿਨ੍ਦੋ ਏਤਦਬ੍ਰਵਿ;

‘ਦਦਾਮਿ ਤੇ ਦਸ ਵਰੇ, ਵਰਭਦ੍ਦੇ ਯਦਿਚ੍ਛਸਿ’.

੬੯. ‘‘ਏਵਂ ਵੁਤ੍ਤਾ ਚ ਸਾ ਦੇਵੀ, ਸਕ੍ਕਂ ਪੁਨਿਦਮਬ੍ਰਵਿ;

‘ਕਿਂ ਨੁ ਮੇ ਅਪਰਾਧਤ੍ਥਿ, ਕਿਂ ਨੁ ਦੇਸ੍ਸਾ ਅਹਂ ਤਵ;

ਰਮ੍ਮਾ ਚਾਵੇਸਿ ਮਂ ਠਾਨਾ, ਵਾਤੋਵ ਧਰਣੀਰੁਹਂ’.

੭੦. ‘‘ਏਵਂ ਵੁਤ੍ਤੋ ਚ ਸੋ ਸਕ੍ਕੋ, ਪੁਨ ਤਸ੍ਸਿਦਮਬ੍ਰਵਿ;

‘ਨ ਚੇਵ ਤੇ ਕਤਂ ਪਾਪਂ, ਨ ਚ ਮੇ ਤ੍ਵਂਸਿ ਅਪ੍ਪਿਯਾ.

੭੧. ‘‘‘ਏਤ੍ਤਕਂਯੇਵ ਤੇ ਆਯੁ, ਚਵਨਕਾਲੋ ਭਵਿਸ੍ਸਤਿ;

ਪਟਿਗ੍ਗਣ੍ਹ ਮਯਾ ਦਿਨ੍ਨੇ, ਵਰੇ ਦਸ ਵਰੁਤ੍ਤਮੇ’.

੭੨. ‘‘ਸਕ੍ਕੇਨ ਸਾ ਦਿਨ੍ਨਵਰਾ, ਤੁਟ੍ਠਹਟ੍ਠਾ ਪਮੋਦਿਤਾ;

ਮਮਂ ਅਬ੍ਭਨ੍ਤਰਂ ਕਤ੍ਵਾ, ਫੁਸ੍ਸਤੀ ਦਸ ਵਰੇ ਵਰੀ.

੭੩. ‘‘ਤਤੋ ਚੁਤਾ ਸਾ ਫੁਸ੍ਸਤੀ, ਖਤ੍ਤਿਯੇ ਉਪਪਜ੍ਜਥ;

ਜੇਤੁਤ੍ਤਰਮ੍ਹਿ ਨਗਰੇ, ਸਞ੍ਜਯੇਨ ਸਮਾਗਮਿ.

੭੪. ‘‘ਯਦਾਹਂ ਫੁਸ੍ਸਤਿਯਾ ਕੁਚ੍ਛਿਂ, ਓਕ੍ਕਨ੍ਤੋ ਪਿਯਮਾਤੁਯਾ;

ਮਮ ਤੇਜੇਨ ਮੇ ਮਾਤਾ, ਸਦਾ ਦਾਨਰਤਾ ਅਹੁ.

੭੫. ‘‘ਅਧਨੇ ਆਤੁਰੇ ਜਿਣ੍ਣੇ, ਯਾਚਕੇ ਅਦ੍ਧਿਕੇ [ਪਥਿਕੇ (ਕ.)] ਜਨੇ;

ਸਮਣੇ ਬ੍ਰਾਹ੍ਮਣੇ ਖੀਣੇ, ਦੇਤਿ ਦਾਨਂ ਅਕਿਞ੍ਚਨੇ.

੭੬. ‘‘ਦਸ ਮਾਸੇ ਧਾਰਯਿਤ੍ਵਾਨ, ਕਰੋਨ੍ਤੇ ਪੁਰਂ ਪਦਕ੍ਖਿਣਂ;

ਵੇਸ੍ਸਾਨਂ ਵੀਥਿਯਾ ਮਜ੍ਝੇ, ਜਨੇਸਿ ਫੁਸ੍ਸਤੀ ਮਮਂ.

੭੭. ‘‘ਨ ਮਯ੍ਹਂ ਮਤ੍ਤਿਕਂ ਨਾਮਂ, ਨਪਿ ਪੇਤ੍ਤਿਕਸਮ੍ਭਵਂ;

ਜਾਤੇਤ੍ਥ ਵੇਸ੍ਸਵੀਥਿਯਾ, ਤਸ੍ਮਾ ਵੇਸ੍ਸਨ੍ਤਰੋ ਅਹੁ.

੭੮. ‘‘ਯਦਾਹਂ ਦਾਰਕੋ ਹੋਮਿ, ਜਾਤਿਯਾ ਅਟ੍ਠਵਸ੍ਸਿਕੋ;

ਤਦਾ ਨਿਸਜ੍ਜ ਪਾਸਾਦੇ, ਦਾਨਂ ਦਾਤੁਂ ਵਿਚਿਨ੍ਤਯਿਂ.

੭੯. ‘‘‘ਹਦਯਂ ਦਦੇਯ੍ਯਂ ਚਕ੍ਖੁਂ, ਮਂਸਮ੍ਪਿ ਰੁਧਿਰਮ੍ਪਿ ਚ;

ਦਦੇਯ੍ਯਂ ਕਾਯਂ ਸਾਵੇਤ੍ਵਾ, ਯਦਿ ਕੋਚਿ ਯਾਚਯੇ ਮਮਂ’.

੮੦. ‘‘ਸਭਾਵਂ ਚਿਨ੍ਤਯਨ੍ਤਸ੍ਸ, ਅਕਮ੍ਪਿਤਮਸਣ੍ਠਿਤਂ;

ਅਕਮ੍ਪਿ ਤਤ੍ਥ ਪਥਵੀ, ਸਿਨੇਰੁਵਨਵਟਂਸਕਾ.

੮੧. ‘‘ਅਨ੍ਵਦ੍ਧਮਾਸੇ ਪਨ੍ਨਰਸੇ, ਪੁਣ੍ਣਮਾਸੇ ਉਪੋਸਥੇ;

ਪਚ੍ਚਯਂ ਨਾਗਮਾਰੁਯ੍ਹ, ਦਾਨਂ ਦਾਤੁਂ ਉਪਾਗਮਿਂ.

੮੨. ‘‘ਕਲਿਙ੍ਗਰਟ੍ਠਵਿਸਯਾ, ਬ੍ਰਾਹ੍ਮਣਾ ਉਪਗਞ੍ਛੁ ਮਂ;

ਅਯਾਚੁਂ ਮਂ ਹਤ੍ਥਿਨਾਗਂ, ਧਞ੍ਞਂ ਮਙ੍ਗਲਸਮ੍ਮਤਂ.

੮੩. ‘‘ਅਵੁਟ੍ਠਿਕੋ ਜਨਪਦੋ, ਦੁਬ੍ਭਿਕ੍ਖੋ ਛਾਤਕੋ ਮਹਾ;

ਦਦਾਹਿ ਪਵਰਂ ਨਾਗਂ, ਸਬ੍ਬਸੇਤਂ ਗਜੁਤ੍ਤਮਂ.

੮੪. ‘‘ਦਦਾਮਿ ਨ ਵਿਕਮ੍ਪਾਮਿ, ਯਂ ਮਂ ਯਾਚਨ੍ਤਿ ਬ੍ਰਾਹ੍ਮਣਾ;

ਸਨ੍ਤਂ ਨਪ੍ਪਤਿਗੂਹਾਮਿ [ਨਪ੍ਪਤਿਗੁਯ੍ਹਾਮਿ (ਸੀ. ਕ.)], ਦਾਨੇ ਮੇ ਰਮਤੇ ਮਨੋ.

੮੫. ‘‘ਨ ਮੇ ਯਾਚਕਮਨੁਪ੍ਪਤ੍ਤੇ, ਪਟਿਕ੍ਖੇਪੋ ਅਨੁਚ੍ਛਵੋ;

‘ਮਾ ਮੇ ਭਿਜ੍ਜਿ ਸਮਾਦਾਨਂ, ਦਸ੍ਸਾਮਿ ਵਿਪੁਲਂ ਗਜਂ’.

੮੬. ‘‘ਨਾਗਂ ਗਹੇਤ੍ਵਾ ਸੋਣ੍ਡਾਯ, ਭਿਙ੍ਗਾਰੇ ਰਤਨਾਮਯੇ;

ਜਲਂ ਹਤ੍ਥੇ ਆਕਿਰਿਤ੍ਵਾ, ਬ੍ਰਾਹ੍ਮਣਾਨਂ ਅਦਂ ਗਜਂ.

੮੭. ‘‘ਪੁਨਾਪਰਂ ਦਦਨ੍ਤਸ੍ਸ, ਸਬ੍ਬਸੇਤਂ ਗਜੁਤ੍ਤਮਂ;

ਤਦਾਪਿ ਪਥਵੀ ਕਮ੍ਪਿ, ਸਿਨੇਰੁਵਨਵਟਂਸਕਾ.

੮੮. ‘‘ਤਸ੍ਸ ਨਾਗਸ੍ਸ ਦਾਨੇਨ, ਸਿਵਯੋ ਕੁਦ੍ਧਾ ਸਮਾਗਤਾ;

ਪਬ੍ਬਾਜੇਸੁਂ ਸਕਾ ਰਟ੍ਠਾ, ‘ਵਙ੍ਕਂ ਗਚ੍ਛਤੁ ਪਬ੍ਬਤਂ’.

੮੯. ‘‘ਤੇਸਂ ਨਿਚ੍ਛੁਭਮਾਨਾਨਂ, ਅਕਮ੍ਪਿਤ੍ਥਮਸਣ੍ਠਿਤਂ;

ਮਹਾਦਾਨਂ ਪਵਤ੍ਤੇਤੁਂ, ਏਕਂ ਵਰਮਯਾਚਿਸਂ.

੯੦. ‘‘ਯਾਚਿਤਾ ਸਿਵਯੋ ਸਬ੍ਬੇ, ਏਕਂ ਵਰਮਦਂਸੁ ਮੇ;

ਸਾਵਯਿਤ੍ਵਾ ਕਣ੍ਣਭੇਰਿਂ, ਮਹਾਦਾਨਂ ਦਦਾਮਹਂ.

੯੧. ‘‘ਅਥੇਤ੍ਥ ਵਤ੍ਤਤੀ ਸਦ੍ਦੋ, ਤੁਮੁਲੋ ਭੇਰਵੋ ਮਹਾ;

ਦਾਨੇਨਿਮਂ ਨੀਹਰਨ੍ਤਿ, ਪੁਨ ਦਾਨਂ ਦਦਾਤਯਂ.

੯੨. ‘‘ਹਤ੍ਥਿਂ ਅਸ੍ਸੇ ਰਥੇ ਦਤ੍ਵਾ, ਦਾਸਿਂ ਦਾਸਂ ਗਵਂ ਧਨਂ;

ਮਹਾਦਾਨਂ ਦਦਿਤ੍ਵਾਨ, ਨਗਰਾ ਨਿਕ੍ਖਮਿਂ ਤਦਾ.

੯੩. ‘‘ਨਿਕ੍ਖਮਿਤ੍ਵਾਨ ਨਗਰਾ, ਨਿਵਤ੍ਤਿਤ੍ਵਾ ਵਿਲੋਕਿਤੇ;

ਤਦਾਪਿ ਪਥਵੀ ਕਮ੍ਪਿ, ਸਿਨੇਰੁਵਨਵਟਂਸਕਾ.

੯੪. ‘‘ਚਤੁਵਾਹਿਂ ਰਥਂ ਦਤ੍ਵਾ, ਠਤ੍ਵਾ ਚਾਤੁਮ੍ਮਹਾਪਥੇ;

ਏਕਾਕਿਯੋ ਅਦੁਤਿਯੋ, ਮਦ੍ਦਿਦੇਵਿਂ ਇਦਮਬ੍ਰਵਿਂ.

੯੫. ‘‘‘ਤ੍ਵਂ ਮਦ੍ਦਿ ਕਣ੍ਹਂ ਗਣ੍ਹਾਹਿ, ਲਹੁਕਾ ਏਸਾ ਕਨਿਟ੍ਠਿਕਾ;

ਅਹਂ ਜਾਲਿਂ ਗਹੇਸ੍ਸਾਮਿ, ਗਰੁਕੋ ਭਾਤਿਕੋ ਹਿ ਸੋ’.

੯੬. ‘‘ਪਦੁਮਂ ਪੁਣ੍ਡਰੀਕਂਵ, ਮਦ੍ਦੀ ਕਣ੍ਹਾਜਿਨਗ੍ਗਹੀ;

ਅਹਂ ਸੁਵਣ੍ਣਬਿਮ੍ਬਂਵ, ਜਾਲਿਂ ਖਤ੍ਤਿਯਮਗ੍ਗਹਿਂ.

੯੭. ‘‘ਅਭਿਜਾਤਾ ਸੁਖੁਮਾਲਾ, ਖਤ੍ਤਿਯਾ ਚਤੁਰੋ ਜਨਾ;

ਵਿਸਮਂ ਸਮਂ ਅਕ੍ਕਮਨ੍ਤਾ, ਵਙ੍ਕਂ ਗਚ੍ਛਾਮ ਪਬ੍ਬਤਂ.

੯੮. ‘‘ਯੇ ਕੇਚਿ ਮਨੁਜਾ ਏਨ੍ਤਿ, ਅਨੁਮਗ੍ਗੇ ਪਟਿਪ੍ਪਥੇ;

ਮਗ੍ਗਨ੍ਤੇ ਪਟਿਪੁਚ੍ਛਾਮ, ‘ਕੁਹਿਂ ਵਙ੍ਕਨ੍ਤ [ਵਙ੍ਕਤ (ਸੀ.)] ਪਬ੍ਬਤੋ’.

੯੯. ‘‘ਤੇ ਤਤ੍ਥ ਅਮ੍ਹੇ ਪਸ੍ਸਿਤ੍ਵਾ, ਕਰੁਣਂ ਗਿਰਮੁਦੀਰਯੁਂ;

ਦੁਕ੍ਖਂ ਤੇ ਪਟਿਵੇਦੇਨ੍ਤਿ, ਦੂਰੇ ਵਙ੍ਕਨ੍ਤਪਬ੍ਬਤੋ.

੧੦੦. ‘‘ਯਦਿ ਪਸ੍ਸਨ੍ਤਿ ਪਵਨੇ, ਦਾਰਕਾ ਫਲਿਨੇ ਦੁਮੇ;

ਤੇਸਂ ਫਲਾਨਂ ਹੇਤੁਮ੍ਹਿ, ਉਪਰੋਦਨ੍ਤਿ ਦਾਰਕਾ.

੧੦੧. ‘‘ਰੋਦਨ੍ਤੇ ਦਾਰਕੇ ਦਿਸ੍ਵਾ, ਉਬ੍ਬਿਦ੍ਧਾ [ਉਬ੍ਬਿਗ੍ਗਾ (ਸ੍ਯਾ. ਕਂ.)] ਵਿਪੁਲਾ ਦੁਮਾ;

ਸਯਮੇਵੋਣਮਿਤ੍ਵਾਨ, ਉਪਗਚ੍ਛਨ੍ਤਿ ਦਾਰਕੇ.

੧੦੨. ‘‘ਇਦਂ ਅਚ੍ਛਰਿਯਂ ਦਿਸ੍ਵਾ, ਅਬ੍ਭੁਤਂ ਲੋਮਹਂਸਨਂ;

ਸਾਹੁਕਾਰਂ [ਸਾਧੁਕਾਰਂ (ਸਬ੍ਬਤ੍ਥ)] ਪਵਤ੍ਤੇਸਿ, ਮਦ੍ਦੀ ਸਬ੍ਬਙ੍ਗਸੋਭਨਾ.

੧੦੩. ‘‘ਅਚ੍ਛੇਰਂ ਵਤ ਲੋਕਸ੍ਮਿਂ, ਅਬ੍ਭੁਤਂ ਲੋਮਹਂਸਨਂ;

ਵੇਸ੍ਸਨ੍ਤਰਸ੍ਸ ਤੇਜੇਨ, ਸਯਮੇਵੋਣਤਾ ਦੁਮਾ.

੧੦੪. ‘‘ਸਙ੍ਖਿਪਿਂਸੁ ਪਥਂ ਯਕ੍ਖਾ, ਅਨੁਕਮ੍ਪਾਯ ਦਾਰਕੇ;

ਨਿਕ੍ਖਨ੍ਤਦਿਵਸੇਨੇਵ [ਨਿਕ੍ਖਨ੍ਤਦਿਵਸੇਯੇਵ (ਸੀ.)], ਚੇਤਰਟ੍ਠਮੁਪਾਗਮੁਂ.

੧੦੫. ‘‘ਸਟ੍ਠਿਰਾਜਸਹਸ੍ਸਾਨਿ, ਤਦਾ ਵਸਨ੍ਤਿ ਮਾਤੁਲੇ;

ਸਬ੍ਬੇ ਪਞ੍ਜਲਿਕਾ ਹੁਤ੍ਵਾ, ਰੋਦਮਾਨਾ ਉਪਾਗਮੁਂ.

੧੦੬. ‘‘ਤਤ੍ਥ ਵਤ੍ਤੇਤ੍ਵਾ ਸਲ੍ਲਾਪਂ, ਚੇਤੇਹਿ ਚੇਤਪੁਤ੍ਤੇਹਿ;

ਤੇ ਤਤੋ ਨਿਕ੍ਖਮਿਤ੍ਵਾਨ, ਵਙ੍ਕਂ ਅਗਮੁ ਪਬ੍ਬਤਂ.

੧੦੭. ‘‘ਆਮਨ੍ਤਯਿਤ੍ਵਾ ਦੇਵਿਨ੍ਦੋ, ਵਿਸ੍ਸਕਮ੍ਮਂ [ਵਿਸੁਕਮ੍ਮਂ (ਕ.)] ਮਹਿਦ੍ਧਿਕਂ;

ਅਸ੍ਸਮਂ ਸੁਕਤਂ ਰਮ੍ਮਂ, ਪਣ੍ਣਸਾਲਂ ਸੁਮਾਪਯ.

੧੦੮. ‘‘ਸਕ੍ਕਸ੍ਸ ਵਚਨਂ ਸੁਤ੍ਵਾ, ਵਿਸ੍ਸਕਮ੍ਮੋ ਮਹਿਦ੍ਧਿਕੋ;

ਅਸ੍ਸਮਂ ਸੁਕਤਂ ਰਮ੍ਮਂ, ਪਣ੍ਣਸਾਲਂ ਸੁਮਾਪਯਿ.

੧੦੯. ‘‘ਅਜ੍ਝੋਗਾਹੇਤ੍ਵਾ ਪਵਨਂ, ਅਪ੍ਪਸਦ੍ਦਂ ਨਿਰਾਕੁਲਂ;

ਚਤੁਰੋ ਜਨਾ ਮਯਂ ਤਤ੍ਥ, ਵਸਾਮ ਪਬ੍ਬਤਨ੍ਤਰੇ.

੧੧੦. ‘‘ਅਹਞ੍ਚ ਮਦ੍ਦਿਦੇਵੀ ਚ, ਜਾਲੀ ਕਣ੍ਹਾਜਿਨਾ ਚੁਭੋ;

ਅਞ੍ਞਮਞ੍ਞਂ ਸੋਕਨੁਦਾ, ਵਸਾਮ ਅਸ੍ਸਮੇ ਤਦਾ.

੧੧੧. ‘‘ਦਾਰਕੇ ਅਨੁਰਕ੍ਖਨ੍ਤੋ, ਅਸੁਞ੍ਞੋ ਹੋਮਿ ਅਸ੍ਸਮੇ;

ਮਦ੍ਦੀ ਫਲਂ ਆਹਰਿਤ੍ਵਾ, ਪੋਸੇਤਿ ਸਾ ਤਯੋ ਜਨੇ.

੧੧੨. ‘‘ਪਵਨੇ ਵਸਮਾਨਸ੍ਸ, ਅਦ੍ਧਿਕੋ ਮਂ ਉਪਾਗਮਿ;

ਆਯਾਚਿ ਪੁਤ੍ਤਕੇ ਮਯ੍ਹਂ, ਜਾਲਿਂ ਕਣ੍ਹਾਜਿਨਂ ਚੁਭੋ.

੧੧੩. ‘‘ਯਾਚਕਂ ਉਪਗਤਂ ਦਿਸ੍ਵਾ, ਹਾਸੋ ਮੇ ਉਪਪਜ੍ਜਥ;

ਉਭੋ ਪੁਤ੍ਤੇ ਗਹੇਤ੍ਵਾਨ, ਅਦਾਸਿਂ ਬ੍ਰਾਹ੍ਮਣੇ ਤਦਾ.

੧੧੪. ‘‘ਸਕੇ ਪੁਤ੍ਤੇ ਚਜਨ੍ਤਸ੍ਸ, ਜੂਜਕੇ ਬ੍ਰਾਹ੍ਮਣੇ ਯਦਾ;

ਤਦਾਪਿ ਪਥਵੀ ਕਮ੍ਪਿ, ਸਿਨੇਰੁਵਨਵਟਂਸਕਾ.

੧੧੫. ‘‘ਪੁਨਦੇਵ ਸਕ੍ਕੋ ਓਰੁਯ੍ਹ, ਹੁਤ੍ਵਾ ਬ੍ਰਾਹ੍ਮਣਸਨ੍ਨਿਭੋ;

ਆਯਾਚਿ ਮਂ ਮਦ੍ਦਿਦੇਵਿਂ, ਸੀਲਵਨ੍ਤਿਂ ਪਤਿਬ੍ਬਤਂ.

੧੧੬. ‘‘ਮਦ੍ਦਿਂ ਹਤ੍ਥੇ ਗਹੇਤ੍ਵਾਨ, ਉਦਕਞ੍ਜਲਿ ਪੂਰਿਯ;

ਪਸਨ੍ਨਮਨਸਙ੍ਕਪ੍ਪੋ, ਤਸ੍ਸ ਮਦ੍ਦਿਂ ਅਦਾਸਹਂ.

੧੧੭. ‘‘ਮਦ੍ਦਿਯਾ ਦੀਯਮਾਨਾਯ, ਗਗਨੇ ਦੇਵਾ ਪਮੋਦਿਤਾ;

ਤਦਾਪਿ ਪਥਵੀ ਕਮ੍ਪਿ, ਸਿਨੇਰੁਵਨਵਟਂਸਕਾ.

੧੧੮. ‘‘ਜਾਲਿਂ ਕਣ੍ਹਾਜਿਨਂ ਧੀਤਂ, ਮਦ੍ਦਿਦੇਵਿਂ ਪਤਿਬ੍ਬਤਂ;

ਚਜਮਾਨੋ ਨ ਚਿਨ੍ਤੇਸਿਂ, ਬੋਧਿਯਾਯੇਵ ਕਾਰਣਾ.

੧੧੯. ‘‘ਨ ਮੇ ਦੇਸ੍ਸਾ ਉਭੋ ਪੁਤ੍ਤਾ, ਮਦ੍ਦਿਦੇਵੀ ਨ ਦੇਸ੍ਸਿਯਾ;

ਸਬ੍ਬਞ੍ਞੁਤਂ ਪਿਯਂ ਮਯ੍ਹਂ, ਤਸ੍ਮਾ ਪਿਯੇ ਅਦਾਸਹਂ.

੧੨੦. ‘‘ਪੁਨਾਪਰਂ ਬ੍ਰਹਾਰਞ੍ਞੇ, ਮਾਤਾਪਿਤੁਸਮਾਗਮੇ;

ਕਰੁਣਂ ਪਰਿਦੇਵਨ੍ਤੇ, ਸਲ੍ਲਪਨ੍ਤੇ ਸੁਖਂ ਦੁਖਂ.

੧੨੧. ‘‘ਹਿਰੋਤ੍ਤਪ੍ਪੇਨ ਗਰੁਨਾ [ਗਰੁਨਂ (ਸ੍ਯਾ. ਕ.)], ਉਭਿਨ੍ਨਂ ਉਪਸਙ੍ਕਮਿ;

ਤਦਾਪਿ ਪਥਵੀ ਕਮ੍ਪਿ, ਸਿਨੇਰੁਵਨਵਟਂਸਕਾ.

੧੨੨. ‘‘ਪੁਨਾਪਰਂ ਬ੍ਰਹਾਰਞ੍ਞਾ, ਨਿਕ੍ਖਮਿਤ੍ਵਾ ਸਞਾਤਿਭਿ;

ਪਵਿਸਾਮਿ ਪੁਰਂ ਰਮ੍ਮਂ, ਜੇਤੁਤ੍ਤਰਂ ਪੁਰੁਤ੍ਤਮਂ.

੧੨੩. ‘‘ਰਤਨਾਨਿ ਸਤ੍ਤ ਵਸ੍ਸਿਂਸੁ, ਮਹਾਮੇਘੋ ਪਵਸ੍ਸਥ;

ਤਦਾਪਿ ਪਥਵੀ ਕਮ੍ਪਿ, ਸਿਨੇਰੁਵਨਵਟਂਸਕਾ.

੧੨੪. ‘‘ਅਚੇਤਨਾਯਂ ਪਥਵੀ, ਅਵਿਞ੍ਞਾਯ ਸੁਖਂ ਦੁਖਂ;

ਸਾਪਿ ਦਾਨਬਲਾ ਮਯ੍ਹਂ, ਸਤ੍ਤਕ੍ਖਤ੍ਤੁਂ ਪਕਮ੍ਪਥਾ’’ਤਿ.

ਵੇਸ੍ਸਨ੍ਤਰਚਰਿਯਂ ਨਵਮਂ.