੧੦. ਸਸਪਣ੍ਡਿਤਚਰਿਯਾ

੧੨੫. ‘‘ਪੁਨਾਪਰਂ ਯਦਾ ਹੋਮਿ, ਸਸਕੋ ਪਵਨਚਾਰਕੋ;

ਤਿਣਪਣ੍ਣਸਾਕਫਲਭਕ੍ਖੋ, ਪਰਹੇਠਨਵਿਵਜ੍ਜਿਤੋ.

੧੨੬. ‘‘ਮਕ੍ਕਟੋ ਚ ਸਿਙ੍ਗਾਲੋ ਚ, ਸੁਤ੍ਤਪੋਤੋ ਚਹਂ ਤਦਾ;

ਵਸਾਮ ਏਕਸਾਮਨ੍ਤਾ, ਸਾਯਂ ਪਾਤੋ ਚ ਦਿਸ੍ਸਰੇ [ਸਾਯਂ ਪਾਤੋ ਪਦਿਸ੍ਸਰੇ (ਕ.)].

੧੨੭. ‘‘ਅਹਂ ਤੇ ਅਨੁਸਾਸਾਮਿ, ਕਿਰਿਯੇ ਕਲ੍ਯਾਣਪਾਪਕੇ;

‘ਪਾਪਾਨਿ ਪਰਿਵਜ੍ਜੇਥ, ਕਲ੍ਯਾਣੇ ਅਭਿਨਿਵਿਸ੍ਸਥ’.

੧੨੮. ‘‘ਉਪੋਸਥਮ੍ਹਿ ਦਿਵਸੇ, ਚਨ੍ਦਂ ਦਿਸ੍ਵਾਨ ਪੂਰਿਤਂ;

ਏਤੇਸਂ ਤਤ੍ਥ ਆਚਿਕ੍ਖਿਂ, ਦਿਵਸੋ ਅਜ੍ਜੁਪੋਸਥੋ.

੧੨੯. ‘‘ਦਾਨਾਨਿ ਪਟਿਯਾਦੇਥ, ਦਕ੍ਖਿਣੇਯ੍ਯਸ੍ਸ ਦਾਤਵੇ;

ਦਤ੍ਵਾ ਦਾਨਂ ਦਕ੍ਖਿਣੇਯ੍ਯੇ, ਉਪਵਸ੍ਸਥੁਪੋਸਥਂ.

੧੩੦. ‘‘ਤੇ ਮੇ ਸਾਧੂਤਿ ਵਤ੍ਵਾਨ, ਯਥਾਸਤ੍ਤਿ ਯਥਾਬਲਂ;

ਦਾਨਾਨਿ ਪਟਿਯਾਦੇਤ੍ਵਾ, ਦਕ੍ਖਿਣੇਯ੍ਯਂ ਗਵੇਸਿਸੁਂ [ਗਵੇਸਯ੍ਯੁਂ (ਕ.)].

੧੩੧. ‘‘ਅਹਂ ਨਿਸਜ੍ਜ ਚਿਨ੍ਤੇਸਿਂ, ਦਾਨਂ ਦਕ੍ਖਿਣਨੁਚ੍ਛਵਂ;

‘ਯਦਿਹਂ ਲਭੇ ਦਕ੍ਖਿਣੇਯ੍ਯਂ, ਕਿਂ ਮੇ ਦਾਨਂ ਭਵਿਸ੍ਸਤਿ.

੧੩੨. ‘‘‘ਨ ਮੇ ਅਤ੍ਥਿ ਤਿਲਾ ਮੁਗ੍ਗਾ, ਮਾਸਾ ਵਾ ਤਣ੍ਡੁਲਾ ਘਤਂ;

ਅਹਂ ਤਿਣੇਨ ਯਾਪੇਮਿ, ਨ ਸਕ੍ਕਾ ਤਿਣ ਦਾਤਵੇ.

੧੩੩. ‘‘‘ਯਦਿ ਕੋਚਿ ਏਤਿ ਦਕ੍ਖਿਣੇਯ੍ਯੋ, ਭਿਕ੍ਖਾਯ ਮਮ ਸਨ੍ਤਿਕੇ;

ਦਜ੍ਜਾਹਂ ਸਕਮਤ੍ਤਾਨਂ, ਨ ਸੋ ਤੁਚ੍ਛੋ ਗਮਿਸ੍ਸਤਿ’.

੧੩੪. ‘‘ਮਮ ਸਙ੍ਕਪ੍ਪਮਞ੍ਞਾਯ, ਸਕ੍ਕੋ ਬ੍ਰਾਹ੍ਮਣਵਣ੍ਣਿਨਾ;

ਆਸਯਂ ਮੇ ਉਪਾਗਚ੍ਛਿ, ਦਾਨਵੀਮਂਸਨਾਯ ਮੇ.

੧੩੫. ‘‘ਤਮਹਂ ਦਿਸ੍ਵਾਨ ਸਨ੍ਤੁਟ੍ਠੋ, ਇਦਂ ਵਚਨਮਬ੍ਰਵਿਂ;

‘ਸਾਧੁ ਖੋਸਿ ਅਨੁਪ੍ਪਤ੍ਤੋ, ਘਾਸਹੇਤੁ ਮਮਨ੍ਤਿਕੇ.

੧੩੬. ‘‘‘ਅਦਿਨ੍ਨਪੁਬ੍ਬਂ ਦਾਨਵਰਂ, ਅਜ੍ਜ ਦਸ੍ਸਾਮਿ ਤੇ ਅਹਂ;

ਤੁਵਂ ਸੀਲਗੁਣੂਪੇਤੋ, ਅਯੁਤ੍ਤਂ ਤੇ ਪਰਹੇਠਨਂ.

੧੩੭. ‘‘‘ਏਹਿ ਅਗ੍ਗਿਂ ਪਦੀਪੇਹਿ, ਨਾਨਾਕਟ੍ਠੇ ਸਮਾਨਯ;

ਅਹਂ ਪਚਿਸ੍ਸਮਤ੍ਤਾਨਂ, ਪਕ੍ਕਂ ਤ੍ਵਂ ਭਕ੍ਖਯਿਸ੍ਸਸਿ’.

੧੩੮. ‘‘‘ਸਾਧੂ’ਤਿ ਸੋ ਹਟ੍ਠਮਨੋ, ਨਾਨਾਕਟ੍ਠੇ ਸਮਾਨਯਿ;

ਮਹਨ੍ਤਂ ਅਕਾਸਿ ਚਿਤਕਂ, ਕਤ੍ਵਾ ਅਙ੍ਗਾਰਗਬ੍ਭਕਂ.

੧੩੯. ‘‘ਅਗ੍ਗਿਂ ਤਤ੍ਥ ਪਦੀਪੇਸਿ, ਯਥਾ ਸੋ ਖਿਪ੍ਪਂ ਮਹਾ ਭਵੇ;

ਫੋਟੇਤ੍ਵਾ ਰਜਗਤੇ ਗਤ੍ਤੇ, ਏਕਮਨ੍ਤਂ ਉਪਾਵਿਸਿਂ.

੧੪੦. ‘‘ਯਦਾ ਮਹਾਕਟ੍ਠਪੁਞ੍ਜੋ, ਆਦਿਤ੍ਤੋ ਧਮਧਮਾਯਤਿ [ਧੁਮਧੁਮਾਯਤਿ (ਸੀ.), ਧਮਮਾਯਤਿ (ਕ.)];

ਤਦੁਪ੍ਪਤਿਤ੍ਵਾ ਪਪਤਿਂ, ਮਜ੍ਝੇ ਜਾਲਸਿਖਨ੍ਤਰੇ.

੧੪੧. ‘‘ਯਥਾ ਸੀਤੋਦਕਂ ਨਾਮ, ਪਵਿਟ੍ਠਂ ਯਸ੍ਸ ਕਸ੍ਸਚਿ;

ਸਮੇਤਿ ਦਰਥਪਰਿਲ਼ਾਹਂ, ਅਸ੍ਸਾਦਂ ਦੇਤਿ ਪੀਤਿ ਚ.

੧੪੨. ‘‘ਤਥੇਵ ਜਲਿਤਂ ਅਗ੍ਗਿਂ, ਪਵਿਟ੍ਠਸ੍ਸ ਮਮਂ ਤਦਾ;

ਸਬ੍ਬਂ ਸਮੇਤਿ ਦਰਥਂ, ਯਥਾ ਸੀਤੋਦਕਂ ਵਿਯ.

੧੪੩. ‘‘ਛਵਿਂ ਚਮ੍ਮਂ ਮਂਸਂ ਨ੍ਹਾਰੁਂ, ਅਟ੍ਠਿਂ ਹਦਯਬਨ੍ਧਨਂ;

ਕੇਵਲਂ ਸਕਲਂ ਕਾਯਂ, ਬ੍ਰਾਹ੍ਮਣਸ੍ਸ ਅਦਾਸਹ’’ਨ੍ਤਿ.

ਸਸਪਣ੍ਡਿਤਚਰਿਯਂ ਦਸਮਂ.

ਅਕਿਤ੍ਤਿਵਗ੍ਗੋ ਪਠਮੋ.

ਤਸ੍ਸੁਦ੍ਦਾਨਂ –

ਅਕਿਤ੍ਤਿਬ੍ਰਾਹ੍ਮਣੋ ਸਙ੍ਖੋ, ਕੁਰੁਰਾਜਾ ਧਨਞ੍ਚਯੋ;

ਮਹਾਸੁਦਸ੍ਸਨੋ ਰਾਜਾ, ਮਹਾਗੋਵਿਨ੍ਦਬ੍ਰਾਹ੍ਮਣੋ.

ਨਿਮਿ ਚਨ੍ਦਕੁਮਾਰੋ ਚ, ਸਿਵਿ ਵੇਸ੍ਸਨ੍ਤਰੋ ਸਸੋ;

ਅਹਮੇਵ ਤਦਾ ਆਸਿਂ, ਯੋ ਤੇ ਦਾਨਵਰੇ ਅਦਾ.

ਏਤੇ ਦਾਨਪਰਿਕ੍ਖਾਰਾ, ਏਤੇ ਦਾਨਸ੍ਸ ਪਾਰਮੀ;

ਜੀਵਿਤਂ ਯਾਚਕੇ ਦਤ੍ਵਾ, ਇਮਂ ਪਾਰਮਿ ਪੂਰਯਿਂ.

ਭਿਕ੍ਖਾਯ ਉਪਗਤਂ ਦਿਸ੍ਵਾ, ਸਕਤ੍ਤਾਨਂ ਪਰਿਚ੍ਚਜਿਂ;

ਦਾਨੇਨ ਮੇ ਸਮੋ ਨਤ੍ਥਿ, ਏਸਾ ਮੇ ਦਾਨਪਾਰਮੀਤਿ.

ਦਾਨਪਾਰਮਿਨਿਦ੍ਦੇਸੋ ਨਿਟ੍ਠਿਤੋ.