੨. ਸਙ੍ਖਚਰਿਯਾ

੧੧. ‘‘ਪੁਨਾਪਰਂ ਯਦਾ ਹੋਮਿ, ਬ੍ਰਾਹ੍ਮਣੋ ਸਙ੍ਖਸਵ੍ਹਯੋ;

ਮਹਾਸਮੁਦ੍ਦਂ ਤਰਿਤੁਕਾਮੋ, ਉਪਗਚ੍ਛਾਮਿ ਪਟ੍ਟਨਂ.

੧੨. ‘‘ਤਤ੍ਥਦ੍ਦਸਂ ਪਟਿਪਥੇ, ਸਯਮ੍ਭੁਂ ਅਪਰਾਜਿਤਂ;

ਕਨ੍ਤਾਰਦ੍ਧਾਨਂ ਪਟਿਪਨ੍ਨਂ [ਕਨ੍ਤਾਰਦ੍ਧਾਨਪਟਿਪਨ੍ਨਂ (ਸੀ. ਸ੍ਯਾ.)], ਤਤ੍ਤਾਯ ਕਠਿਨਭੂਮਿਯਾ.

੧੩. ‘‘ਤਮਹਂ ਪਟਿਪਥੇ ਦਿਸ੍ਵਾ, ਇਮਮਤ੍ਥਂ ਵਿਚਿਨ੍ਤਯਿਂ;

‘ਇਦਂ ਖੇਤ੍ਤਂ ਅਨੁਪ੍ਪਤ੍ਤਂ, ਪੁਞ੍ਞਕਾਮਸ੍ਸ ਜਨ੍ਤੁਨੋ.

੧੪. ‘‘‘ਯਥਾ ਕਸ੍ਸਕੋ ਪੁਰਿਸੋ, ਖੇਤ੍ਤਂ ਦਿਸ੍ਵਾ ਮਹਾਗਮਂ;

ਤਤ੍ਥ ਬੀਜਂ ਨ ਰੋਪੇਤਿ, ਨ ਸੋ ਧਞ੍ਞੇਨ ਅਤ੍ਥਿਕੋ.

੧੫. ‘‘‘ਏਵਮੇਵਾਹਂ ਪੁਞ੍ਞਕਾਮੋ, ਦਿਸ੍ਵਾ ਖੇਤ੍ਤਵਰੁਤ੍ਤਮਂ;

ਯਦਿ ਤਤ੍ਥ ਕਾਰਂ ਨ ਕਰੋਮਿ, ਨਾਹਂ ਪੁਞ੍ਞੇਨ ਅਤ੍ਥਿਕੋ.

੧੬. ‘‘‘ਯਥਾ ਅਮਚ੍ਚੋ ਮੁਦ੍ਦਿਕਾਮੋ, ਰਞ੍ਞੋ ਅਨ੍ਤੇਪੁਰੇ ਜਨੇ;

ਨ ਦੇਤਿ ਤੇਸਂ ਧਨਧਞ੍ਞਂ, ਮੁਦ੍ਦਿਤੋ ਪਰਿਹਾਯਤਿ.

੧੭. ‘‘‘ਏਵਮੇਵਾਹਂ ਪੁਞ੍ਞਕਾਮੋ, ਵਿਪੁਲਂ ਦਿਸ੍ਵਾਨ ਦਕ੍ਖਿਣਂ;

ਯਦਿ ਤਸ੍ਸ ਦਾਨਂ ਨ ਦਦਾਮਿ, ਪਰਿਹਾਯਿਸ੍ਸਾਮਿ ਪੁਞ੍ਞਤੋ’.

੧੮. ‘‘ਏਵਾਹਂ ਚਿਨ੍ਤਯਿਤ੍ਵਾਨ, ਓਰੋਹਿਤ੍ਵਾ ਉਪਾਹਨਾ;

ਤਸ੍ਸ ਪਾਦਾਨਿ ਵਨ੍ਦਿਤ੍ਵਾ, ਅਦਾਸਿਂ ਛਤ੍ਤੁਪਾਹਨਂ.

੧੯. ‘‘ਤੇਨੇਵਾਹਂ ਸਤਗੁਣਤੋ, ਸੁਖੁਮਾਲੋ ਸੁਖੇਧਿਤੋ;

ਅਪਿ ਚ ਦਾਨਂ ਪਰਿਪੂਰੇਨ੍ਤੋ, ਏਵਂ ਤਸ੍ਸ ਅਦਾਸਹ’’ਨ੍ਤਿ.

ਸਙ੍ਖਚਰਿਯਂ ਦੁਤਿਯਂ.